رواية راديو شهرزاد كاملة بقلم نسرين بلعجيلي عبر مدونة دليل الروايات
رواية راديو شهرزاد الفصل الاول 1
نعرفكم على الشخصيات…..
شهرزاد 28 سنه. خريجة صحافه إعلام، بتشتغل في محطه مشهوره، وليها برنامج بيتذاع على الهوا كل يوم، باسم راديو شهرزاد..
بتستقبل كل يوم مكالمات من المتابعين، وكل يوم عندها موضوع بتناقشه مع الجمهور. والبرنامج ناحج جدا.
عايشه مع أمها حكمت، أبوها اتوفى من 10 سنين، ساب ليهم عماره ساكنين في الدور الأول، و 5 شقق متأجرين. عايشين بيهم مع معاش المرحوم.
حكمت فتحت محل ملابس محجبات، علشان تشغل وقتها في غياب بنتها. شهرزاد مخطوبه لابن عمها حسام 33 سنه، بيشتغل مع أبوه في المقاولات. عملوا مكتب صغير وبياخذوا شقق يغيروا الديكورات و التشطيب بتاعها ويرجعوا يبعوها.
حسام بيحب جدا شهرزاد، وبقاله كثير بيحاول ياخذ خطوه رسميه معاها، بس في الاخر وافقت لما عرفت إن أبوها مدي كلمه لعمها.
حلقة اليوم: الحب…
حكمت : يلا شهرزاد إصحي بقى.
شهرزاد : ماما حبيبتي، لسه مجاش موعد الشغل.
حكمت : ما تقومي بقى اقعدي معايا شويه.
شهرزاد : ماشي يا ماما.
حكمت راحت تحضر الفطار، وهما على السفره…
حكمت : هتعملي إيه مع حسام؟
شهرزاد : حعمل إيه في إيه؟؟
حكمت : يا بنتي إنتم بقالكم سنتين مخطوبين، وبصراحه صفاء مرات عمك لمحت ليا، لحد إمتي هتفضلوا مخطوبين؟ الشقه و جاهزه و جهازك خلصتيه.
شهرزاد : ماما أرجوك، مش عايزه اتكلم في الموضوع ده. انا و حسام متفقين لما اكون جاهزه هنعمل الفرح. غير كده لو سمحت، مش عايزه اتكلم في الموضوع ده.
و قامت من على السفره تجهز نفسها.
شهرزاد بنت عاديه، ملامحها بسيطه، شعرها طويل إسود، جسمها نحيف شويه، بس فيها مقومات الأنثى.
لبست هدومها، واخذت تاكسي راحت الشغل.
عصام تقني معاها، و في فريق الإعداد.
عصامة: جاهزه يا شهرزاد؟
شهرزاد : جاهزه.
أخذت مكانها في الإذاعة وابتدت البرنامج….
شهرزاد : مساء الخير، مساء الحب. النهارده عيد الحب، يارب يجعل أيامكم كلها حب في حب. المفروض الحب يكون ليه كل يوم عيد، لأننا عايشين بالحب، بنتنفس حب، ودينا كله حب. بس مش كل الناس بتعرف هو إيه حب، ولا ازاي تحب. لو بس نعرف نعيش الحب، يا سلام!!! حياتنا هتكون كلها حب في حب.
النهارده عايزه استقبل مكالمات عن الحب، مين عايشه؟ مين عارف قيمته؟ مين بيحب؟ مين اتحب؟ و مين لسه ما جربش الحب؟
و سؤال مهم جدا جدا، هل كل المتزوجين عايشين قصه حب؟ أو بيحبوا بعض؟ ولا عايشين علشان متجوزين. وهل الجواز ليه علاقه بالحب؟ ولا الجواز حاجه و الحب حاجه ثانيه. قبل الحلقه جاتلي مكالمه من متتبعه معانا، عايزه تطرح مشكلتها أو استفسار بتاعها، لأني بصراحه ماعرفتش أقول ليها إيه، وهل موضوعها ينفع في اليوم ده اللي الحلقه خاصه بعيد الحب؟؟
المهم المشكله فيها حاجات كثيره جدا، حاسه إن كثير عايشينها، علشان كده عايزه اختم بيها الحلقه.
بس الأول ناخذ مكالمات إيجابية،
ونروح نسمع أغنيه ونرجع ليكم….
عصام : مصممه تطلعي الست في اليوم ده؟
شهرزاد : أيوه يا عصام.
شهرزاد : ورجعنا لكم ونقول الوووووو…..
متصله : سلام عليكم يا بنتي.
شهرزاد : و عليكم السلام. عرفينا بحضرتك.
متصله : معاك الحاجه فاطمه.
شهرزاد : اهلا وسهلا بيك يا حاجه.
فاطمه : ربنا يخليك يا بنتي. عايزه بس أجاوب على سؤال سألتيه، هل كل المتزوجين بيحبوا بعض؟ الجواب من خبرتي المتواضعه، للأسف لأ. فيه اللي بيتجوز علشان سنة الحياة، وفي اللي بيتجوز ويكتشف إنه مش حب أصلا، لأن يا بنتي الحب حاجه روحانيه جدا، إحساس بشخص ثاني، شخص ربنا رزقك بحبه ورزقه بحبكه. أيوه الحب رزق من عند ربنا.
شهرزاد : الله يا حاجه فاطمه على كلامك، الحب رزق…
فاطمه : أيوه يا بنتي، ده رزق ربنا. قوليلي بقى اللي قلبه اسود حيحب ازاي؟ اللي كله حقد و غيره حيحب ازاي؟ واللي بيكره الناس و مش بيحب حد، هيحب ازاي؟ الحب يا بنتي تسامح، تضحيه، ورضى إنك تحب الخير. الحب للناس اللي قلبهم أبيض، قلب مايعرفش يكره ولا يتمنى الشر لحد. شايفه بنات اليومين دول، أول ما تشوف واحد، تقولك بحبه. ولا واحد يادوب مكلم وحده يقولها حبيبتي. علشان كده أول ما بيتجوزوا يتصدموا في الواقع، ويقولك أصل الجواز مقبره الحب.
شهرزاد : وانت يا حاجه ربنا رزقك بالحب ؟؟
فاطمه : أيوه يا بنتي، و الحب ده اللي مخليني عايشه. حبيته قبل ما اشوفه، أول ما اتقابلنا قلبي اتخطف مني، وهو كمان. إتقابلنا بترتيب من ربنا، إتكلمنا، وخطفني وخطف قلبي. لغايه دلوقتي بقالنا متجوزين 45 سنه، و عمر الحب ما فارقنا، و على طول بقول يارب يجعل يومي قبل يومه، لأني مش هقدر على فراقه لحظه وحده.
شهرزاد : ماشاء الله و تبارك الله، ربنا يحفظكم، وربنا يخليكم لبعض.
وناخد مكالمه…..
متصل : يا مساء الخير على أحلى شهرزاد.
شهرزاد : مساء النور على حضرتك.
متصل: مع حضرتك الشيخ خالد.
شهرزاد : أهلا بحضرتك، ومبسوطه جدا إن حضرتك إتصلت بينا. عايزه اسأل إيه حكم الدين في الحب؟
الشيخ خالد : الدين حب….
بنحب ربنا، بنحب رسولنا عليه افضل الصلاه والسلام. الحب تعامل، وأحلا حب هو اللي بيتكلل بالزواج.
شوفي يا بنتي.. اللي تلاقيه بيحب، صعب يهين اللي بيحبها، قصدي بالإهانه الكلام القاسي، والكلام الوحش. اللي بيحب مستحيل يخون، لأن كل الستات ولا يسووا حاجه قدام اللي بيحبها. اللي بيحب مستحيل يمد إيده على اللي بيحبها. اللي بيحب، تلاقيه عايز يسعد اللي بيحبها، يدخل بيتها بالحلال.
أكيد الحياه فيها مشاكل، بس لما أحب أكون حنين مع اللي بحبه، حتى في وقت الزعل. مش أهينها وأهين أهلها و اضربها، واقول لها معلش أنا بحبك.
شهرزاد : هو فيه حضرتك نوع الرجاله ده ؟
الشيح خالد : طبعا فيه. أنا بأكد كلام الحاجه فاطمه، الحب رزق، ولو ربنا رزقك الحب، تلاقي الدنيا اتغيرت في عنيك. وفيه رجاله بتحب من قلبها.
وارجع واقول الحب معامله. علشان تعرفي الإنسان بيحبك ولا لأ، شوفيه وقت الزعل، و وقت المشاكل.
وبقول كمان لكل بنت من بناتنا، إوعي تصدقي أي حد يقولك بحبك. كلمة بحبك مش لعبه، لازم يكون راجل علشان يقولها، لازم يكون قد المسؤليه، ولازم يكون عارف نهايته معاك قبل مايقولها. والسلام عليكم.
شهرزاد : و عليكم السلام.
مبسوطه من كلام رجل الدين في الحب. وفعلا فيه شباب كثير كلمة حب متداوله عندهم، يتعرف على بنت يقولها حبيبتي على طول.
فيه مكالمه معانا…
متصله : مساء الحب، و مساء الورد.
شهرزاد : مساء النور.
متصله : أول حاجه عايزه أقولها لك، بحبك في الله. وعايزه أقولك إنك سبب إني أخذت أحسن قرار في حياتي. والقرار ده خلاني أخيرا لقيت الحب.
شهرزاد : كلامك فوق راسي، والله شكرا ليك. قولي لينا إيه هو القرار اللي أخذتيه؟
متصله : أعرفك بنفسي، إسمي نهله، عمري 48 سنه. من 5 سنين كان أول ما ابتدا راديو شهرزاد، كنت باسمعه وانا في حزن كبير، وبعد كلامك، قررت إني أطلق بعد 15 سنه جواز ب 4 أولاد.
شهرزاد : يا خبر أبيض!! كنت سبب في طلاقك؟
نهله : بالعكس، إنت خليتني آخذ أحلى قرار. كنت عايشه و مش عايشه، كنت متبهدله آخر بهدله، ضرب وإهانه وقلة قيمه، وفي الآخر يقولي بحبك. وللأسف كنت مفكره إني بحبه، بس كان مجرد تعود، الحب عرفته بعدين. عرفته بعد طلاقي بسنتين، كان عمري 46 سنه.
في ناس هاتسغرب، وخاصه الناس اللي تفكيرها محدود. أيوه أنا حبيت واتجوزت، و كمان خلفت توأم، وانا عندي 4 أولاد، واتعمل لي فرح ولبست فستان أبيض.
شهرزاد : الله أكبر! ماشاء الله.
نهله : والله يا شهرزاد، عمري ماعرفت هي إيه السعاده، إلا مع جوزي ده. رغم إن مدة جوازي الأول كانت 15 سنه كرهت فيهم نفسي. بس ربنا عوضه كبير جدا، عرفني براجل فهمني يعني إيه الحياه، و إيه هي السعاده، وإيه هو الحب، و شعور الحب.
أول ما اتعرفت عليه حبيت صوته، عشقت نبرة صوته اللي اخذتني عالم ثاني. حسيت نفسي إني مراهقه. حبيت نفسي، حبيت أنوثتي، بقيت احلم بيه ليل نهار. وهي كانت بس صدفه، وحصلت صدفه ثانيه جمعتنا، وقلت ياه يا نهله! ده إنت بتحلمي. وبعد مده، لقيت نفسي هموت من غيره، مش قادره اتنفس بعيد عنه لقيت نفسي بحبه وانا مش عارفه هو إيه نظامه. أقولك إيه يا شهرزاد، بقيت عامله زي العيله الصغيره اللي شبطانه في لعبه مش بتاعتها. عشت حيره كبيره، وعذاب و دموع وليالي مش عارفه أنام، وأيام مش قادره أركز من كثر التفكير، لحد ما في يوم إبتدا يعترف ليا، وعدا وقت كبير أوي أوي، لحد ماسمعت منه بحبك. ياه يا شهرزاد، حسيت نفسي حاطير من الفرحه، وقلت ساعتها: لقد هرمنا من أجل هذه اللحظه، هههه. وجيه اليوم اللي طلب إيدي، واتجوزنا، ولبست فستان أبيض، وعملت فرح بسيط، كنت مبسوطه بيه.
عشت أنا وهو و ولادي في بيت واحد، ساعتها شفت الفرق بين السما و الأرض، واتاكدت إن مش كل راجل راجل، فيه رجاله تتشال فوق الراس. خلاني أحس إني اني عروسه، وإني أول مره أتجوز، عشت معاه حاجات عمري ما عشتها. بابقى قدامه زي العيله الصغيره. بيسمع ليا حتى في زعلي منه، و في جناني عليه. مع طليقي كان صعب حتى أفتح بؤي، وعلى طول أنا اللي غلطانه. عرفت معاه الاستقرار و السعاده.
عارفه يا شهرزاد، لو بس بعد شويه، بحس روحي بتهرب مني. وهو كمان نفس الإحساس. بينا كيميا صعب حد يفهمها. ومش باقولك ده معناه إننا مش بنتخانق، لأ، بيحصل بينا مشاكل، بس بنحلها بالعقل. وزي ما قال الشيخ خالد جزاه الله كل خير، في عز خصامنا عمره ما قلل مني، ولا قال لي كلمه تجرحني. و حصلت مشاكل كبيره جدا جدا بينا، بس بحبنا قدرنا نتخطى كل حاجه. بجد حياتي فرقت جدا معاه.وحتى أولادي حبوه. كل يوم بحمد ربنا على النعمه دي، و على عوض ربنا ليا.
شهرزاد : الحمد لله، عوض ربنا جميل جدا، فوق كل توقعاتنا. ربنا يخليكم لبعض.
نهله : امين يارب.
أتمنالك السعاده يا شهرزاد، لأنك بجد تستحقي ده. ونصيحه من متتبعه ليك، إتجوزي حد بتحبيه، لأن الحياه بتبقى جميله.
شهرزاد : أعزائي المستمعين، نطلع فاصل و نرجع.
عصام : فاضل نص ساعه، وبنحاول نتصل بيها مش بترد.
شهرزاد : ح بعث ليها حالا.
شهرزاد كتبت رساله…
شهرزاد : خلاص هترد عليك، بس مادخلهاش الخط لحد ما اقولك.
عصام إداها إشارة إن الفاصل خلص.
…نسرين بلعجيلي..
شهرزاد : و رجعنا ليكم.
أعزائي المشاهدين، معايا حاله فيها كل المشاكل اللي بتحصل في البيوت. عارفه إنه قليل لما آخذ حالات الفضفضه في المشاكل الخاصه، بس الليله دي استثناء. هي ليها علاقه بعيد الحب، لأن المتصله بتشتكي من قلة حب جوزها.
هاختصر ليكم طفولتها، و ازاي اتجوزت، علشان يبقى عندكم فكرة عن الحكايه قبل ما تتكلم، لأن وقت البرنامج لا يسمح….
منار أكبر اخواتها، و شالت المسؤليه بدري، لأن أبوها كان بيقولها إنت أكبر اخواتك، ولو عملوا حاجه أعاقبك انت لأنك ماعرفتيش تخلي بالك منهم. وفي نفس الوقت أمها كانت حامل بعد 4 بنات، وحالتها كانت وحشه وتعبانه، ولدت ابنها وكان عنده مشاكل إعاقيه و نفسيه، ورجعت حملت ثاني. ومنار ماكانتش تسلم من كلام الناس إن أمها كبرت ولسه بتخلف. الولاده دي كانت صعبه، فا منار كانت واخذه بالها من أمها ومن اخواتها، واعادت السنه. وحتى الدراسه، أبوها هو اللي كان يختار تدرس إيه و ماتدرسش إيه. كان نفسها في حاجات كثير، بس أبوها كان شايف مصلحتها في نظره
واختار ليها تعمل دبلوم، وتروح بعد الظهر لما ترجع أمها من الشغل،
وتكون خلصت شغل البيت و الطبخ وكل حاجه.و لما كان نفسها تدخل الجامعه، والدها قرر إنها تروح معاه الشغل أحسن، وده اللي حصل إنها نزلت تشتغل في الشركه مع أبوها. حالة والدتها اتدهورت جدا، فا بقت منار هي اللي شايله البيت، لحد ما اتوفت أمها، وطبعا بقت كل حاجه عليها، إنها تراعي اخواتها 6 و أبوها. الفتره دي إتخطبت مرتين من زمايلها في الشركه و ما كانش نصيب، لحد ما تعب أبوها تعب جامد، وانخطبت ثالث مره من زميلها. أبوها كان كل غرضه إنه يجوزها قبل ما يتوفى،
هنا إبتدت تنازلات عند منار. وعايزه أحط ألف سطر على الجمله دي.
منار علشان تمشي الجوازه، ابراهيم كان راجل الكل يشكر في أخلاقه، وكان مطيع لأبوه. إبراهيم و أبوه فكروا إنها حتكون جوازه ناجحه، بنت شغاله و كمان حتورث من أبوها.
كان في فرق اجتماعي بينهم، لأن ابراهيم كانت إمكانياته قليله. في الخطوبه أبوها هو اللي إدا الفلوس لعمها علشان يجيب الشبكه وهي مكانتش تعرف، واختارت حاجات بسيطه علشان ما تقلش عليه.
إخواتها البنات اتجوزوا وفضلت هي
وابوها، كان مستعجل يجوزها لا يفوتها القطار. إبراهيم كان عارف ده.
أبوها قبل ما يتوفى، وصى عمها إنها تتجوز بعد اربع شهور من موته، وعمها عمل بالوصيه واتكلم مع ابراهيم وحددوا معاد، وأجر ليها شقه متواضعه، بس للأسف ماعرفتش تفرشها زي ما هي عايزه،
لأن حماها فرشها على ذوقه هو،
وإبراهيم شخصيته ضعيفه قدامه، مرتبط بيه جدا بعد وفاه أمه، فا كلامه أوامر.
منار لما شافت الفرش اتصدمت، ولما اعترضت معجبش حماها واشتكاها لعمها. صبرت و استحملت، وخاصه إنه فيه ألوان مش طايقاها في الشقه، بس قالت معلش أصبر. ما عملتش فرح كبير و راحت بيت جوزها، وهي دلوقتي بقالها متجوزه 20 سنه و جابت 4 بنات، بس للأسف هي مش سعيده في حياتها، وهنسمعها مع بعض. أنا اختصرت كثير من الأحداث علشان وقت البرنامج.
ونقول ألو….
منار : مساء الخير يا شهرزاد.
شهرزاد : مساء النور.
منار : باشكرك على اهتمامك بمشكلتي، وإنك تعرضيها الليله دي.
الكل عارف إنه عيد الحب، فيه اللي بيحتفل، و فيه اللي زي حالاتي قاعده في البيت.
شهرزاد : قوليلي يا منار، ليه عايزه تحكي مشكلتك؟؟
منار : علشان ارتاح من الحيره اللي أنا فيها، واعرف إذا أنا على حق ولا لأ. لو قلتلك يا شهرزاد إني 20 سنه وانا باشحت حضن جوزي. أيوه بالمعني ده، باشحت حضنه.
جوزي راجل محترم جدا بشهاده الجميع، والكل بيحسدني عليه. راجل من البيت للشغل، لا بيسكر ولا بيعمل أي حاجه، متدين. مشكلته إنه عديم المشاعر معايا. أبوه فهمه إنه لو أظهر حبه ليا يبقى هو مش راجل. على طول مديني وش الخشب. بافضل أنا أجرى وراه. أنا فعلا بحبه، وعايزه على طول أكون في حضنه وجنبه، بس هو لأ. حياته ليها اهتمامات ثانيه غيري، و للأسف عرفت إنه اتجوزني لأني حاورث، وحساعده في الحياة. وده و جعني منه جدا. جوزي جاف المشاعر، لا باسمع منه كلام حلو، ولا كلام حب، ولا غزل، و لا أي حاجه، بارد معايا جدا. ولما أسأله يقولي أنا كويس و عادي، عايزاني أعمل إيه؟؟
هو أنا ببالغ إني عايزه أحس بحب جوزي؟ بلهفته عليا وإعجابه بيا؟
مافيش كل ده. طول السنين دي، عمري ما افتكر إننا عملنا سفر أو خروجه أو حتى شهر عسل. ما عندوش وقت ليا.
أنا ست حساسه جدا، عشت ظروف ذكرت منها بس شويه. كنت باحلم براجل يديني حب و حنان، راجل يحس بيا، هو اللي بطلبه صعب يا شهرزاد؟؟
شهرزاد : لأ طبعا، ده حقك. لو جوزك ماحضنكيش مين هيحضنك؟؟ اللي بتطلبيه ده حق مشروع، يعني مش حاجه خارجه عن العاده. طيب سؤال ؟ هو بيحضن بناته ؟؟
منار : لأ خالص. و كمان بناته بيشتكوا. الراجل بيشتغل ويرجع البيت وينام بس، هو شايف إن ده دوره في الحياة. حاجه إسمها متعه، مايعرفهاش، قال إيه زاهد في الحياه، يمتع نفسه، يفرح، و يفرحنا، لأ.
شهرزادو: سؤال خاص شويه، لو عايزه تجاوبي ممكن لو لا براحتك.
منار : إسألي براحتك.
شهرزاد : علاقتك الخاصه بيه، يعني علاقة أي زوجين عامله ازاي؟؟ يعني دي لحظات بين أي اثنين بيتحرروا من كل القيود.
منار : إلا جوزي، عارفه ده موضوع ثاني، حتى في ده مش مبسوطه. جوزي عنده ضعف جنسي، و سرعة القذف. آسفه إني قلت كده، بس عايزه احطكم في الصوره. والمصيبه إنه رافض العلاج، اللي هو بسيط جدا جدا، مجرد فيتامين و برشام ويبقى كويس، بس رافض ياخذه. وحتى العلاقه لازم أنا اللي اطلب، يعني هو ييجي لوحده عندي، لأ. ممكن نقعد 3 شهور مايحصلش حاجه، مش في باله. المفروض أي راجل الموضوع ده مهم عنده إلا هو. أنا ما اقدرش أصبر أكثر من شهر و باروح عنده أطلب حقي الشرعي، وكرامتي بتوجعني، لأنه لما بيحصل مايكونش بالصوره اللي أنا عايزاها، هو كإنه بيأذي واجب وبس. لازم أنا أكون القائده في العلاقه، حتى في دي لازم أنا اللي أعمل واطلب، وانا بجد تعبت أوي أوي.
وكمان مشاكل الحياه، هو مابيعرفش يتصرف، بيغرق ديون وسلف وانا أسدد و أوفر و ادخل جمعيات علشان أسدد الديون. ربنا مديني نعمه إني باعرف أمشي مصروف البيت، و باعرف أوفر و امشي الأمور. وكنت ماسكه ميزانيه البيت، وماعرفش إيه اللي حصل، أخذ مني الفيزا و رجع هو يصرف وخرب الدنيا ثاني.
بعد ما وقفنا على رجلينا واشتريت ليه عربيه، وأخذنا بيت ملك في حته نظيفه، العربيه بإسمي، وللأسف قليل لما باستفيد منها، لأنه على طول عنده مشاوير عليها، بحكم إني مش باسوق من زمان، هو اللي مستحوذ عليها على طول.
شهرزاد: طيب كل اللي حكيتيه لينا ده، هل هو يعرف بيه هل تحاورت معاه؟؟
منار : كثير والله من غير فايده. يا بيعتبر نفسه مش غلطان و انا اللي أوفر زياده عن اللزوم، وإنه هو طبيعي ومافيهش حاجه، او يتغير شويه و ترجع ريما لعادتها القديمه.
وصلنا مرحله ممكن مانتكلمش فتره طويله توصل لشهور، هو بيكون مرتاح، بس أنا باموت من جوايا. تعبت نفسيا وجسديا، بقى عندي مشاكل كثيره جدا، بقوا بييجوا ليا جلطات و أزمات صحيه، كل ده وهو آه بيوديني المستشفى وكل حاجه بس كواجب بس، مافيش حنيه. طلبت الطلاق كثير لأني خلاص قلت أعيش ليا و لبناتي، بس لقيته مش حل، لازم أصبر علشانهم، هما مالهمش دعوه باختيارنا.
رحت دكتور نفسي، و عملت جلسات، غيرت من نفسي، غيرت طريقه لبسي، وأنا اصلا وحده باهتم بنفسي جدا جدا، مش عارفه ليه بيعمل معايا كده؟؟
شهرزاد : لأنه ببساطه مش بيحبك.
بقلم نسرين بلعجيلي
منار : لا، بيحبني. هو قالي بيحبني.
شهرزاد : بصي يا منار، إنت مش عايزه تقتنعي إنه مش بيحبك، وأكيد لازم يقولك بحبك لأنه لا يعقل يقول حاجه غير كده. مش هيكون عنده الجرأه يقول الحقيقه، بس ده مش كويس، لأنه هنا أناني، هو عايز يعمل أسره و أولاد و بيت، وانت وفرت ده، وكمان جوزك عنده مشكله من خلال كلامك إنه عنده نقص، مش عارف يحضن، ومش عارف إيه هو الحضن، و فاقد الشيء لا يعطيه.
جوزك فاقد الحنان حيديك ويدي بناته الحنان إزاي؟ انا ماسمعتش منه لأنه أكيد عنده أسبابه،بس اللي حقولك عليه، حرام عليك نفسك، بسبب نفسيتك بتيجي ليك جلطات و أمراض صحيه. ما تتحمليش فوق طاقتك، إعملي اللي تقدري عليه، ديونه يسددهم هو، ليه تسددي انت ؟؟؟
و السؤال اللي محيرني هو إنت متأكده إنك بتحبيه؟؟ الحب بيوصل للطرف الثاني، إحساسنا روحنا، بيكون فيه تخاطر وأحاسيس، وانا شايفه جوزك فاقد الإحساس ده.
إيه اللي عمله يخليك تحبيه؟؟
منار : وقف مع اخواتي في حاجات كثيره، وقف معايا في تعبي، إنسان محترم الكل بيشكر فيه، بيعمل خير كثير، محبوب عند الناس،ما عندوش علاقات، ولا بيخوني، وانا متأكده من ده.
منار: اللي قلت عليه ده، واجب عليه يوقف معاك، إنت مراته. وقف مع اخواتك؟ دول اخواتك واكيد هو عارف بيعمل ده ليه.
إنت عايزه إيه يا منار؟؟
منار : مش عارفه والله مش، فاهمه حاجه، بيحبني ولا لأ. هو عايز يكمل حياته كده، بس أنا ما بقاش عندي طاقه أكمل، فيه إهمال لمشاعري وإهانه لأنوثتي. أوحش احساس هو إني أنا اللي أطلب جوزي، أشحت حضنه. تصدقي، بينام جنبي، ألزق فيه، باحسه مضايق. وصلنا مرحله مابقاش ينام جنبي بالشهور. هل هي دي الحياه الزوجيه ؟؟
آخر مره عملت مشكله كبيره جدا، بقيت عصبيه جدا، بقيت أرد ردود وحشه. أنا ماكنتش كده، وصلني مرحله وحشه، بقيت أقلل منه وأقلل أدبي عليه ومايردش عليا، يقولي ربنا يهديك.
أنا كرهت نفسي، بقيت أقول شكلي وحش علشان كده مش بيقرب مني. بقيت آكل كثير لحد ما تخنت و مش عارفه أنزل. أنا بعذب نفسي. طلبت الطلاق و رفض. نسيت نقطه مهمه، في فتره من حياتنا كان بياخذ العلاج، وكنا مبسوطين وفرحانين ومافيش مشاكل خالص، وما اعرفش إيه اللي حصل ليه ثاني. وآخر مره حصلت علاقه كنت راضيه عنها أخذ الدوا، واتفقنا إن حياتنا تمشي كويس واتراجعت عن الطلاق، وهو يحاول يتغير لأني دخلت حتى كبار العيله وعملوا قعدة عرب، بس من غير نتيجه. وفيه اللي شايف إن هو كويس، المشكله فيا أنا، مش راضية بنصيبي. بس أقول إيه، عارفه المثل اللي بيقول قليل البخت يلاقي العظمه في كرشه، هو أنا.
بعد 20 سنه وافق ياخد العلاج بس للأسف طلع عنده حساسيه منه، و وقف العلاج. يعني مش هعرف اعيش معاه حياة طبيعيه كأي زوجين.
الحمدلله على كل حال. نفسي أعرف أراء الناس، أعمل إيه؟ ولا إيه هو الحل؟ آسفه طولت عليك. و كل سنه وانتم طيبين
Nisrine Bellaajili
شهرزاد : وانت طيبه يا منار.
بصراحه وجعت قلبي ومش عارفه اقول إيه، ولا انصحك بإيه. ياريت لو جوزك يروح معاك عند استشاري اسري تتكلموا انتم الاثنين علشان تلاقوا حل. اللي شايفه، هو راجل أناني، ليه مش عايز ياخذ العلاج طول السنين دي؟ ودلوقتي بقى عنده حساسيه؟ مش فاهمه الراجل ده، بس اللي متأكده منه مش بيحبك خالص. المشكله حتى لو مش بيحبك لازم المعامله تكون أحسن من كده، فيه موده و رحمه، والكلمه الطيبه صدقه.
يا راجل دي مراتك لو ما حضنتهاش إنت مين يحصنها؟؟ هو إنت عارف الحضن بيعمل إيه ؟؟
تعب مراتك إنت السبب فيه، كفايه اللي شافته في حياتها. وكمان مش عايزه آجي عليه لأني مش عارفه أسبابه.
طبعا وقت الحلقه مش هيسمح إننا ناخذ مكالمات، بس هقرأ بعض التعاليق اللي وصلت في الصفحه…
أول تعليق..
دي ست مفتريه، عايزه ايه من الراجل شقيان و تعبان؟؟
أكيد ست نكديه. الله يكون في عون الراجل، مهما عمل مش عاجب.
لا لو أنا مكانها أطلق. ليه تستحمل راجل زي ده؟
شهرزاد : في حرب في التعاليق، كل واحد شايف من منظوره الخاص. بس أكيد هنرجع ليكم في حلقه ثانيه، خاصه عن إهمال الحياة الزوجيه، وناخذ منار ثاني معانا بتفاصيل أدق.
أعزائي المشاهدين، شكرا ليكم، وعايزه منكم آراء للمشكله دي، وياريت يتواصل معانا ناس مختصه،
نفهم سيكولوجية نفسيه الراجل ده.
ياريت تسيبوا لينا تعاليقكم في الصفحه، لو انتم مكان منار تعملوا إيه؟؟
كل سنه وانتم طيبين وبخير…
مع ألف سلامه، أشوفكم في حلقه ثانيه مع راديو شهرزاد…
عصام : زي ما توقعت، الحلقه عامله ترند جامد.
شهرزاد : ربنا يستر، خايفه لا تكون تعاليق وحشه والست نفسيتها مش هتستحمل.
أنا همشي بقى مع السلامه.
نزلت تحت لقت حسام مستنيها في العربيه، فتحت الباب.
شهرزاد : سلام عليكم.
حسام : وعليكم السلام، كل سنه وانت طيبه.
وقدم ليها بوكيه ورد.
شهرزاد : وانت طيب، شكرا.
حسام : ممكن أحضنك؟
شهرزاد : و بعدين معاك؟
حسام : ده إنت لسه قايله كلام عن الحضن، وانا بجد محتاج حضنك، محتاج أحس بيك جنبي، وقريبه مني.
شهرزاد : لما نتجوز.
حسام : شهرزاد، أنا خطيبك وابن عمك، عادي أحضنك. وكمان إنت الي رافضه نكتب كتابنا، أنا زهقت من معاملتك. عارفه وانت بتتكلمي على جوز الست دي، شفتك إنت وقلت أكيد شهرزاد مش بتحبني، لأنك لو بتحبيني إنت هتكوني مشتاقه تكوني في حضني.
شهرزاد اتخضت من كلامه.
شهرزاد : إنت بتقول إيه؟ يعني احضنك علشان تعرف إن كنت بحبك او لأ؟
حسام : مش القصد، ومش هتفهمي كلامي. نمشي نتعشا، أنا حجزت في مطعم حلو، ولا مالكيش مزاج؟ مع إني قلتلك قبلها، و شايفك لابسه هدوم عاديه مش لايقه على السهره.
شهرزاد نسيت…
شهرزاد : أكيد مش هاجي بفستان للاستوديو، وصلني البيت آخد شاور ونروح.
حسام فرح و أخذها على البيت، أخذت شاور ولبست فستان أحمر، وحطت شوية ميكاب وطلعت قمر.
وقفت قدام المرايا وقالت، لازم أعيش لحظات حلوه لأني استحق ده
وطلعت عنده. كان منبهر من شكلها، من غير ما يحس أخذها في حضنه،
وأمها فرحت، ومن غير ما تحس زغرتت.
- يتبع الفصل التالي اضغط على ( رواية راديو شهرزاد) اسم الرواية