رواية ممرضة دمرت حياتي الفصل الثالث و العشرون 23 - بقلم شيماء سعيد
الحلقة الثالثة والعشرون والأخيرة
ممرضة دمـ.رت حياتي
...............
بسم الله والصلاة والسلام على رسول الله ❤️.
داخل كل محنة منحة وبعد كل صبر جبر، فهذا وعد الرحمن وما علينا إلا التوكل عليه .
.......
رفضت كريمة فى البداية الذهاب للعمرة خوفا على حكيم من حنين أن تستحوذ عليه وقالت: لا يمكن اسبهولها تاخده منى
ولا كمان تقوله يا أنا يا أمك فى البيت .
ولا تخليه يخدلها شقة بعيد عنى .
لا دا انا أموت بحسرتى .
فتدخلت والدة حنين وقالت بإقناع ...دى فرصة متتعوضش يا كريمة ،وعلى حساب غنيم .
مش هتتكلفى حاجة خالص ، هو فيه حد يرفض زيارة بيت الله برده .
كريمة ...لا طبعا بس .
حكيم بفرحة ...بس ايه يا امى .
إذ كان انا فرحان اوى .
كريمة ...اه ما انت مصدقت تخلص منى .
حكيم ...لا ابدا متقوليش كده .
ده حتى هتوحشينى اوى .
تروحى وترجعى بالسلامة يا ست الكل .
فوافقت كريمة على مضض ،من الحرج لا اكثر .
...........
ثم بالفعل سافرت باكية ، رغما عنها .
وودعها حكيم مصطنعا البكاء ولكنه ما أن غادرت ، امسك بيد حنين مبتسما قائلا ....الليلة ليلتك يا عروسة ..
حنين بخجل ....يوه ، مش كنت سافرت معاها تونسها يا بعلى.
حكيم ....لا انا عايز أتونس بحنونة .
والود ودى أشيلك من المطار لغاية عش الزوجية .
حنين بضحك ....لا أهمد مش كده .
حكيم ...لا أهمد مين ! كفاية اللى حصل .
يلا يا موزتى ، إلى البيت أعلمك درس فى الأحياء .
بس على الله تكونى تلميذة نجيبة .
فضحكت حنين ،وبالفعل عادوا للمنزل ، لتقضى اول ليلة سعيدة مع حب عمرها ، ليلة الاحلام .
ليلة طالما حلما به كل محب مع من يحب ..
استنشق حكيم عبيرها ،واغمرها بحبه ، حتى ذابت بين يديه ،واصبحا روحا واحدة .
لتثمر تلك الليلة عن نبتة صغيرة ، سيسعدا بخبر وجودها فى رحم حنين بعد عدة أسابيع .
قضوا منها اثنين فى سعادة غامرة ، لا يكاد الاثنان يفترقا بهم ، واشبعوا بعضهم البعض حبا .
ولكن جاء خبر قدوم والدته من السفر ،عليه كالصاعقة .
حيث أوشكت سعادتهم أن تنتهى سريعا .
حكيم ...يارب يا ماما ، تكونى ربنا هداكى هناك ،وتيجى كويسة ،ومتقفيش بينى وبينها تانى .
ولا يعلم أن والدته .
كانت كثيرة البكاء فى الحرم وتدعوا بسبب الغيرة من حنين ، أن يفرق الله بينهم .
فكانت تقول. ..يارب عقله وتخليه يطلق البت دى ، اللى بتاكل بعقله حلاوه ،وهتخليه ينسانى.
ده انا مليش غيره ، هو كل حياتى .
لذا عادت من العمرة ، وكأن الله قد ختم على قلبها بسبب ظلمها .
فعادت أكثر عدواة وأشرس ..
استقبلها حكيم فى المطار ولم تأتى معه حنين ، ففرحت وحدثت نفسها ، ربما استجاب الله لدعوتها وفارقها فقالت .....ايه يا ضنايا ، امال فين مراتك !
شكلها غضبانة ولا ايه ؟.
اه منا عارفة بنات اليومين دول ميعرفوش معنى الجواز والبيت وفكرهم ،ان الجواز دلع وبس .
صدم حكيم من كلام والدته وايقن أنها مازالت على تفكيرها نحو حنين ، فقال....لا يا امى غضبانة ايه بس .
كل الحكاية أنها بقلها كام يوم تعبانة ودايخة شوية .
فقولتلها خليكى ،وكفاية انا اروح .
فحركت كريمة شفتيها يمينا ويسارا بسخرية قائلة....تعبانة ، ايه اشتغلنا السهوكة كده من اولها .
لا انا معنديش الكلام ده .
لما اوصل هوريها مقامها كويس ، وهعرف ازاى ؟
مخلهاش تشتكى تانى .
وفعلا عادت كريمة ، لتبدء تنغص حياة حنين من جديد .
سمعت حنين صوت كريمة وكانت فى فراشها ، فقامت على الفور تستقبلها بابتسامة مشرقة ، ثم مدت ذراعيها لتحتضنها قائلة ....الف حمد لله على السلامة يا خالتى .
ولكنها فوجئت بها تبعدها عنها بغلظة قائلة ....والله يختى عاملة نفسك فرحانة انى جيت صح !
لا باين عليكى اوى .
ده تلاقيكى مصدقتى سافرت ، وتلاقيكى كنتى بتدعى مرجعش تانى .
عشان يخلالك الجو مع ابنى .
تمعضت حنين قائلة ....ايه بس الكلام دى يا خالتى .
ربنا يعلم معزتك عندى ، وانى فرحتلك انك زورتى بيت الله .
ودعيت ربنا يرجعك بالسلامة .
ثم نظرت كريمة حولها ، فوجدت البيت غير مرتب على النحو الذى ينبغى .
فغضبت وقالت بصوت عالى ....وايه اللى انا شيفاه ده !
انا امشى من هنا .
وتقومى تعملى البيت زريبة ، لا انا مينفعنيش الكلام ده .
فزى يلا ، عقبال مدخل اتشطف ، اطلع ألاقى الشقة على سنجة عشرة .
اه انا بحب النضافة .
حكيم بحرج ...يا ماما ، معلش ، حنين بس كانت تعبانة شوية ، بس كانت برده بتنضف على قد ما تقدر .
وحتى عملالك كل الاكل اللى بتحبيه .
بمناسبة رجوعك بالسلامة .
كريمة ..لا والله .
طيب تشد حلها وتنضف كده المكان ، عشان حتى اكل بنفس.
فحركت حنين رأسها بآسى ، ثم بدئت التنظيف ، حتى انهكها الإجهاد والتعب .
وعندما أراد حكيم أن يساعدها ، قامت كريمة بالنداء عليه قائلة ....حكيم ، سيب اللى فى ايدك وهات كياس وتعال نحط فيها الهدايا اللى جيبنها للناس .
فاستمع لأمرها وفعل ما أرادت .
وعندما انتهت حنين من التنظيف ، عادت للمطبخ تجهز الطعام من أجل الغذاء ولكن فجأة شعرت بدوار فأمسكت رأسها وحاولت الأستناد على الحائط ولكن خارت قواها فجأة فسقطت على الأرض مغشى عليها .
وبعد أن انتهى حكيم مع والدته فى تحضير الهدايا .
قالت كريمة له ....روح شوف المعدولة مراتك ، اتأخرت ليه فى الاكل ؟
انا على لحم بطنى من الصبح !
حكيم ...الله يكرمك يا امى خفى عليها شوية .
حنين بنت أختك ، يعنى مش غريبة .
فعامليها بما يرضى الله ، ده أنتِ لسه جاية من بيت ربنا .
كريمة بغضب.....ليه شايفنى مجرمة ولا حاجة !
ايه الكلام الملهوش لزمة ده .
كل ده عشان قولت جعانة .
ثم اصطنعت البكاء قائلة....خلاص مش عايزة حاجة ولا منك ولا منها .
وناولنى التليفون اتصل اجيب اون لاين .
بدل الحوجة ليك ولمراتك .
حكيم ...يا امى مش قصدى .
بس فعلا حنين غلبانة واليومين دول مش عارف ملها تعبانة ، فارجوكى متكتريش عليها .
وانا هروح أشوفها .
كريمة ...روح يا ابنى ، ما انا عارفة خلاص ، اكلت عقلك .
وانا بقيت درجة تانية .
فضرب حكيم كفا بكف ثم ذهب لرؤية حنين .
ليصدم عند رؤيتها مغشى عليها ، ليردد....حنين حنين
مالك يا حبيبتى .
ثم ينحنى إليها محاولا افاقتها ، وعندما سمع انينها .
حمد الله ثم حملها على الفراش .
وجلس بجانبها وأمسك يدها يقبلها قائلا ...انا اسف فعلا يا حبيبتى .
أنتِ اصلا مكنش لازم تقومى من السرير عشان تعبانة .
انا آسف بجد .
فولجت إليهم كريمة ، وعندما وجدته على هذا النحو نهرته بغلظة قائلة ....يا خيبتى التقيلة .
ايه يا ولا الضعف ده كله قدام الست هانم .
متتخوشن شوية وتكون راجل كده .
كل ده عشان ايه ؟
حكيم ...يا ماما ، عشان تعبانة مش شايفة وشها اصفر ازاى!
كريمة ...يا سلام ، وانت بيخيل عليك برده كهن الحريم ده .
ده كله دلع ماسخ.
وروح كده هات دكتورة وخليها تكشف عليها ، هتقولك زى الحصان ، عشان تبقا تصدق امك .
حكيم ...حاضر ، هروح اجيب دكتورة ، يمكن يا أمى ترحميها شوية .
فذهب حكيم بالفعل وأحضر دكتورة .
وقامت بالكشف عليها ، ثم ابتسمت قائلة....الف مبروك .
المدام حامل .
فتعال وجه حكيم وانحنى إليها وقبلها قائلا ....الف مبروك يا حبيبتى .
ده احلى خبر سمعته فى حياتى .
فابتسمت حنين ...الحمد لله.
ولكن كريمة وقع عليها الخبر كالصدمة محدثة نفسها ...حامل ، يعنى هيمسك فيها بإيده وسنانه اكتر .
اه ، ده كان نفسى يسبها اللى واكله عقله دى .
ولكنها اصطنعت الفرحة قائلة ....الف مبروك يا ولاد .
ربنا يتمه على خير.
حكيم ....من النهاردة اظن حنين تستريح شوية من شغل البيت ، صح ولا ايه يا ماما .
كريمة بغيظ ....يا سلام ، هى أول وحدة تحمل ولا ايه ؟
ما كنا حوامل قبلها ،وكنا بنعمل كل حاجة .
بلاش سهوكة حريم .
فابتلعت حنين ريقها بغصة مريرة من تلك الخالة التى انعدمت فى قلبها الرحمة لهذه الدرجة .
حكيم ...على الأقل فى الاول يعنى يا ماما .
عشان الحمل يثبت .
كريمة ...اه اه ، إن شاءالله .
ولكن كانت كريمة لها بالمرصاد .
فكان يذهب حكيم للعمل ، وتأمرها بكل أعمال المنزل .
واذا وجدها فى الليل حكيم مجهدة ، لا تستطيع أن تخبره بشىء كى لا يغضب من والدته .
.......
أرادت كريمة زيارة جارة لها لتبارك لها على زواج ابنتها .
ولكن يشاء القدر عند نزولها على درجات السلم أن تقع .
وكأنه عقاب من الله عز وجل لما تفعله مع حنين .
وأدت تلك السقطة ، لكسر فى قدميها الاثنين .
واضطرت لإجراء عملية فيهما ثم تجبيرهم .
فأصبحت عاجزة عن الحركة ولزمت الفراش .
ولكن هذا أدى إلى ثقل على كاهل حنين أكثر .
حيث كانت تقوم بخدمتها من كل شىء ، نظافة واهتمام لملابسها وقضاء حاجتها فى السرير .
حتى جاء يوم حكيم ووجدها غارقة فى دمائها ومغشى عليها فى غرفة النوم .
ففزع ، وحاول أن يوقظها من غفلتها تلك بالكاد ، وغير لها ملابسها وذهب بها إلى المستشفى سريعا .
الطبيبة .....الحمد لله الجنين لسه فيه نبض .
ولكن هى محتاجة راحة ، متقومش من السرير خالص .
والا اتعرضت لإجهاض لا سمح الله .
حكيم ...تمام بإذن الله ،با دكتورة هتستريح .
وبينما هما يتحدثان هكذا حتى ولجت إليهم
وجه ليس بالغريب على حنين !
وجه تعرفه جيدا
نعم إنها هي من كانت صديقة الدرب لسنوات، إنها روان .
التي كانت من أفضل صديقات حنين ولكن انقطعت صلتها بها منذ زمن بعيد ولا تعلم عنها أي شيء .
تلاقت أعين روان وحنين ولكن شتان بين النظرتين .
فـ حنين طيبة القلب ، كانت نظرة حانية مفرحة للقاء من جديد .
أما روان ...فكانت تنظر لحنين نظرة قاسية مفعمة بالعيد والحقد الدفين المخفي وراء ابتسامة صفراء .
حتى لا ينكشف أمرها .
حنين ...معقول روان ، عاش من شافك يا بنتي .
روان ...حنون القمر ، والله وحشتيني .
هاتي بوسة يا بت .
وقبلتها روان قبلة غيظ .
لتنظر إلى الطبيبة تارة وإلى حكيم تارة .
فرددت....إيه خير يا جماعة طمنوني .
الطبيبة....أنتم شكلكم أصحاب ، طيب وصي صاحبتك تستريح عشان البيبي يثبت .
روان بصدمة....حنين حاااااامل؟
حكيم ....آه إحنا اتجوزنا من حوالي تلت أسابيع كده .
روان ....والله ألف ألف مبروك .
ربنا يتمه على خير يا حبيبتي .
حنين...الله يبارك في عمرك.
ثم رددت ...وأنتِ عاملة إيه يا روان ؟
اتجوزتي !
حنين بإنكسار ...آه اتجوزت بس ملحقتش أفرح ، طب ساكت مات .
حنين بحزن ...لا حول ولا قوة إلا بالله
ربنا يعوضك خير يا حبيبتي .
روان ...يارب .
وأنتِ شدي حيلك كده وريحي، عشان الحمل يكمل على خير .
حنين ...بس المشكلة حماتي تعبانة ومش بتقوم من السرير عشان الجبس .
ومينفعش أسيبها ، لازم أقوم باحتياجتها وطلباتها.
حكيم ...ملكيش دعوة أنتِ ، أنا من النهاردة هاخد إجازة
من الشغل .
وهقعد بيكي وبـ ماما ، متشليش هم .
وأنتِ عليكي تستريحي بس .
فدبت الغيرة في قلب روان ، من نظرات حكيم المحبة وصدق اهتمامه بها .
غير الحمل أيضا ، فكم تمنت روان بحياة مستقرة من زوج وبيت وأولاد .
ولكن لم يعرفها أحد إلا وطمع في جسدها فقط ، ولم ينظر أحد لروحها.
ففكرت سريعا كيف تدخل بينهما لتفرق شملهما بأسلوب الحية
التي تضع السم في العسل .
فباغتتهما بقولها ...وأنا روحت فين يا حنين ؟
ده إحنا عشرة عمر يا بنتي .
والله محدش هيخدمك ويخدم أم حكيم إلا أنا ، لغاية متشدي حيلك وتقدري توقفي على رجلك كده .
حنين بحرج ...ربنا يخليكي يا رورو .
عارفة قدها وقدود يا بنتي .
بس يعني شغلك ومش عايزة أتعبك .
روان ...لا متقوليش كده ، تعبك راحة يا حبيبتي.
وأنا أصلا كنت في إجازة وجيت عشان أمدها شوية
ففاضية متقلقيش .
يلا يلا قومي بينا نروح عندكم ، وإحنا إخوات يا قلبي .
وأنتِ يا باشمهندس حكيم ، شوف شغلك.
ولا تقلق على حد فيهم ، في عينيه الاتنين يا هندسة .
فابتسم حكيم ، لأنه بالفعل كان سيصعب عليه خدمة والدته وزوجته في آن واحد وهو لم يتعود على الخدمة من قبل .
لأنَّ أمه دللته كثيرا
وبالفعل عادت روان معهما للمنزل .
ثم استأذن حكيم للذهاب لعمله وتركهما بعد أن اطمئن على والدته .
ولجت روان إلى كريمة في بادئ الأمر ،واصطنعت الخجل والرقة في الأسلوب ، لكي تكسب قلبها سريعا .
روان ....ألف سلامة عليكي يا ماما الحاجة .
معلش فترة وتعدي ، وإن شاء الله تقومي بألف سلامة.
وتجري على رجلك دي زي الرهوان .
أعجبت كريمة بـ روان وكلامها المعسول فقالت... ماشاء الله عليكي يا بنتي ، زي القمر ولا كلامك يدخل القلب على طول .
تصوري أنا حبيتك أوي .
روان بمكر ...وأنا كمان خالص يا ماما الحاجة ويشهد ربنا .
وعايزاكي تعتبريني زي بنتك بالظبط .
ومتتكسفيش مني ، وأنا طول ما أنا موجودة هنا ، هريحك على الآخر وأعملك كل اللي أنتِ عايزاه .
كريمة بابتسامة ...إن شاء الله يخليكي يا عسل أنتِ .
هي دي البنات ولا بلاش .
أنا مش عارفة كانت عينيك فين يا حكيم ،لما تسيب العسل ده وتبص على المسهوكة حنين .
يلا النصيب بقا .
روان ...طيب بعد إذنك هسيب حضرتك ، أجهز الأكل اللي اشتراه البشمهندس حكيم وإحنا جايين .
الفراخ وشوربة الخضار عشان تتغذوا بيها .
كريمة ...بس أنا مش بحب المسلوق يا بنتى .
روان ... المسلوق مفيد بس .
كريمة ...عارفة بس مش بعرف أبلعه والله .
أقولك تعرفي تحشي الفرخة رز أحسن ،واعملي الخضار يخني كده .
هيبقى تمام التمام .
فضحكت روان بخبث قائلة...بس كده عيوني يا ماما الحاجة .
أنا على فكرة طباخة أسطة ،وهيعجبك أوي طبيخي.
كريمة ...والله أنتِ، كلك على بعضك كده عجباني.
حاجة لوز صح .
وعندما استأذنتها روان لتذهب إلى المطبخ .
حدثت نفسها ..يخربيت حلاوتك يا روان ، البت بتلعب لعب ،وكمان شاطرة أوي وخفيفة ،مش التقيلة حنين .
يسلام لو يحصل اللي في بالي وقعدتها معانا الشوية دول
يخلوا حكيم ، يميل ليها .
وتزغلل عنيه ، ده يبقى يوم المنى .
ولجت روان للمطبخ لتحضر طعام الغذاء ، والغيظ يملؤها من الحياة الهادئة التي تعيش بها حنين .
روان محدثة نفسها ...اشمعنا هي عندها راجل يحبها وبيت وطفل جي في السكة .
وأنا معنديش حاجة خالص .
طول عمرها محظوظة البت حنين دي.
وانا للأسف الدنيا جت عليا بزيادة .
بس خلاص كفاية عليها أوي كده ، وحكيم لازم يكون ليا .
وعشان كده مش لازم الحمل ده يكمل ، عشان ميكنش ليها صلة بيها بعد كده ،ويكون ليا أنا وحدي .
حتى أمه العقربة دي، هخليه يرميها في أي دار مسنين.
عشان أعيش معاه على راحتي، ومتزهقنيش في عيشتي.
بس إزاي أسقطها كده طبيعي من غير ما حد يحس .
آه هو اليانسون وعصير الأناناس كمان حكاية بيفتح الرحم بسرعة وهي أصلا بتنزف يعني فل هيخلص بسرعة .
لما أقوم أعملها حتى قبل ما أعمل الأكل .
وبالفعل أحضرت العصير وبينما هي تتقدم من غرفة حنين لتقدم لها العصير .
سمعتها تتحدث في الهاتف قائلة ...وبعدين معاك ،أنا مش فهمتك أكتر من مرة أني ست مجوزة وبحب جوزي .
طلعت ...سامحيني يا حنين ، أنا فعلا عارف ده ، بس غصب عني ، أنتِ مش بتروحي عن بالي أبداً .
حنين ...مسمحلكش يا دكتور طلعت .
واتفضل بقا مع ألف سلامة ،وياريت تنسى رقمي ده .
ثم أغلقت الخط .
لتبتسم روان بمكر ....يلا وأدي كرت جامد ، نفركش بيه الجوازة بسرعة .
وعايز نلعب بيه ، على تقيل .
ثم ولجت إليها مع ابتسامتها التي تشبه الحية مرددة ...أنا قولت أعملك كوباية عصير جامدة كده ،تبلي ريقك عقبال ما أخلص الغدا يا قلبي أنا .
إلتقطت حنين العصير قائلة بإمتنان ...والله مش عارفة أشكرك إزاي على كل اللي عملتيه معايا .
غير إني أدعيلك ،ربنا يديكي على قد نيتك .
فامتعضت روان بتلك الدعوة محدثة نفسها ....يا لهوتي ملقتش غير الدعوة دي.
المهم خليها تشرب ونشوف مين يفوز المرة دي .
فشربت حنين ، ثم قالت لها ...تسلم إيدك الحلوة.
أنا فعلا كنت محتجاها أوي ، جت في الوقت المناسب .
وأنا فعلا بحب عصير الأناناس جدا .
بس بشربه وأنام .
فضحكت روان ....ليه مخدر .
بس ماشي ريحي شوية لغاية ما أجهز الغدا .
حنين... تسلميلي يا أحلى رورو.
ثم أطفأت روان الضوء وخرجت .
لتسرع للمطبخ لتحضر الغذاء قبل مجيء حكيم .
وبالفعل أتمت الأكل على أفضل ما يجب ، ثم ولجت المرحاض تغتسل وارتدت أفضل ما لديها من ملابس تظهر مفاتنها وأسدلت شعرها على ظهرها ، ووضعت مساحيق بنسبة بسيطة زادتها جمالا .
كمظهر خارجي ولكن من داخلها ، قبيحة مسودة كالليل المظلم .
ثم ولجت إلى كريمة .
وعندما رأتها بتلك الحالة ، لمعت عينيها إعجابا بها قائلة ...بسم الله ماشاء الله ، عليكي يا ست البنات .
وفعلا شكله جوزك من جمالك مستحملش ومات .
ضحكت روان قائلة ...والله أنتِ بتجامليني .
لو أنا حلوة صح ،مكنتش قعدت من غير جواز بعد المرحوم لدلوقتي.
بس والله مخبيش عليكي .
نفس أوي أعيش في ظل راجل يحميني وأعيش خدامته العمر كله ،هو وأهله كمان .
كريمة ...والله أصيلة يا بت يا روان .
يسلام لو كنت شوفتك بس بدري شوية .
بس أقول إيه النصيب .
روان ...آه النصيب ، أن بنت شريفة زي حالاتي ، عمرها ما كلمت راجل كده ولا كده يكون ده حالها.
أما اللي بتكلم طوب الأرض ، قعدة ومتستتة وجوزها كمان بيموت فيها .
كريمة بتعجب ...ازاي ده ، تلاقيه مش راجل عشان يسيب مراته كده .
روان ...لا متقوليش على الباشمهندس كده ،ده مفيش زيه .
فجحظت عيني كريمة مرددة باندهاش ...أنتِ قصدك على مين ؟
معقول تكوني قصدك حنين !!
روان ....أستغفر الله العظيم ، ربنا يستر على ولايانا.
لا مقدرش أتكلم حتى لو سمعت بودني .
أنا مش خرابة بيوت أبداً .
بس صعبان عليا العيل اللي جاي في السكة ، وعايزة تموته ، عشان تخلص من الجوازة دي، وتجوز اللي عينيها عليه .
فضربت كريمة على صدرها ...تخلص من العيل كمان هي حصلت !!
إزاي ده ؟
روان ...لسه طالبة مني عصير أناناس ، ولما قولتها لا ده وحش على الحمل خصوصا أنك بتنزفي .
قلتلي ملكيش فيه ، روحي اعمليه عشان خاطري أصلي بحبه أوي .
ومش عارفه قصدها العصير ولا الراجل اللي كانت بتكلمه
في التليفون من شوية .
كريمة ...هي حصلت ، بنت كذا ،وبنت كذا .
كان يوم ما طلعتهوش شمس ، لما فكر حكيم يجوزها .
لازم يرمي عليها اليمين النهاردة.
وإلا أنا لا أمه ولا أعرفه .
روان ...لا حرام يا ماما الحاجة ، خراب البيوت مش بالساهل كده .
كريمة ...أسكتي أنتِ طيبة وعلى نياتك .
ثم سمعت كريمة صوت مفتاح الباب ، فقالت ،أهو جه سبع البرمبة اللي نايم على ودانه .
ولج حكيم إلى والدته وقبل يدها قائلا ...عاملة إيه يا ست الكل .
ثم تنحنح بخجل لرؤيته روان بهذه الملابس وكاشفة الشعر قائلا...أنا آسف ،والله معرفش أن حضرتك مش لابسة الطرحة .
أنا طالع على العموم ، أطمن على حنين .
وأنتِ خدي راحتك .
كريمة ...تتطمن على مين يا ضنايا .
تتطمن على اللي عايزة تنزل ابنك عشان يخلالها الجو ،مع حبيبها ، اللي أنت تنزل من هنا ،وهي هاتك حب ودلع في التليفون معاه .
نظر حكيم إلى والدته بصدمة غير مصدق ما تقوله فقال والدماء تجري في عروقه...أنتِ بتقولي إيه يا ماما ؟
لا أكيد بتهزري ، لأني عارف مراتي كويس .
ويستحيل تعمل كده .
كريمة ...أنا ههزر برده في المواضيع دي.
روح بص على تليفونها وشوف كانت بتكلم مين ؟
وكانت بتشرب إيه من شوية ، مع أنه خطر على الحمل .
كتمت روان ضحكتها وأظهرت الحزن .
أما حكيم فأسرع إلى حنين ، ليجدها نائمة ، ولكنها شعرت به ، ففتحت عينيها وابتسمت قائلة....حكيم .
حمد لله على السلامة، وحشتني.
ولكنه لم يجبها ونظر نحو العصير بجانبها ، ثم أمسك بهاتفها والغضب يملؤه .
لينظر إلى آخر مكالمتها .
ليجد اسم طلعت ،فثار كالوحش الهائج قائلا ...كنتي بتكلمى طلعت يا حنين ؟
بتستغفليني، ما هو كان قدامك ،متجوزتهوش ليه ؟
ولا حلي في عينيكي دلوقتي !
بتخونيني بعد الحب ده كله !!
يا خسارة حبي ليكي يا حنين .
حركت حنين رأسها بصدمة غير مستوعبة ما يقوله حكيم ، أو غير مصدقة أذنيها .
فرددت وهي تحاول الاعتدال من نومتها...أنت بتقول إيه يا حكيم ؟
طلعت إيه اللي أنا بحبه ، أمال أنا اتجوزتك وسبته ليه؟
حكيم ... آه ما أنتِ تلاقيكي حنيتي ليه ، عشان تخلصي من القعدة مع أمي .
بس مكنتش متصور أنك بالدناءة دي .
فقامت حنين بانهيار من ذلك الاتهام القاسي لها ،ولكنها شعرت بالآلام تجتاح بطنها ، فأمسكت بها متأوهة ...آاااه.
ثم سيل من الدماء تسرب منها .
ليفزع حكيم قائلا ...كمان فعلا حصل اللي كنتي عايزاه .
نزلتي الولد ، عشان تخلصي مني ، للدرجاتي كرهاني .
أنا ازاي اتخدعت فيكي للدرجاتي .
بس خلاص ، روحي في ستين داهية .
أنتِ طالق يا حنين .
يلا مش عايزة أشوف وشك تاني .
فصرخت حنين ....لاااااااا حرام .
وفي تلك اللحظة ولجت إليهما روان قائلة ...ليه كده بس يا حنين ، أنتِ عمرك ما كنتِي كده .
وحنين تنظر إليها بأنكسار وألم.
ثم قالت روان لحكيم ...بس كنت صبرت ، شوية يا حكيم مش كده .
على الأقل لما نطمن على حالتها .
ثم حدثت حنين ...تعالي يا حبيبتي، ألبسك ونروح المستشفى ، عشان النزيف ده وحش عليكي.
فابعدت حنين يدها قائلة ...ابعدي عني .
أنتِ اللي عملتي فيه كده .
حسبي الله ونعم الوكيل
روان ...أنتِ هترمي بلاكي عليا ولا إيه .
حنين ...مش هقول غير ربنا ما بيسيبش .
وبكرة هيجي اليوم اللي تدوقي فيه من نفس الكاس .
ثم التقطت هاتفها لتتصل بأختها لتنقذها .
فأتت حلا على الفور ، وغادرت معها حلا إلى أقرب مستشفى .
ليخبرها الطبيب أنها فقدت جنينها بالفعل ، فيصيبها ذلك نوبة هلع وصراخ .
ليحقنها بمهدىء لتنام على الفور .
روان مصطنعة الحزن...أنا آسفة والله على اللي حصل .
وأظن دلوقتي مليش مكان .
فمعلش اسمحولي أمشي .
كريمة ...تمشي فين يا روان ، لا أنا محتاجاكي يا حبيبتي .
روان ... بس يعني هقعد بصفتي إيه ؟
أنا كنت جاية عشان صاحبة حنين .
لكن دلوقتي ...
قاطعت كريمة كلام روان قائلة ...دلوقتي أنتِ مرات ابني الغالية
فاتسعت عيني حكيم قائلا باندهاش ...إيه ؟؟
كريمة....أيوه ، هتكتب عليها الليلة .
حكيم ...ازاي ده ، أنتِ بتقولي إيه يا ماما ؟
أنا مش ناقص ،كفايا اللي حصل .
كريمة ...بقولك هتكتب عليها وإلا أنت ولا ابني ولا أعرفك .
أنت حكمت دماغك مرة وشوفت النتيجة .
اسمع بقا كلام أمك المرة دي تكسب .
حكيم ....بس يعني..!
كريمة ...مفيش بس .
هتنام الليلة على سرير اللي ما تسمى .
واحمد ربنا ، أنه كشفها على حقيقتها بدري بدري .
حكيم بغصة مريرة ....أنا مش قادر أصدق يا أمي .
ثم بدأ في البكاء بنحيب ...دي كانت الحب كله .
فما كان من روان إلا أن اقتربت منه وربتت على كتفه بحنان قائلة ...متعملش في نفسك كده .
دموعك دي غالية عليا أوي .
فنظر لها حكيم قائلا ..بجد !
روان بدلال ...أيوا .
حكيم ..يعني موافقة على كلام أمي؟
روان ...وأنا أطول ناس زيكم .
ده أنا هعيش خدامة ليك وليها .
حرك حكيم رأسه بأسى قائلا ... .تمام .
.............
وبينما قضت حنين ليلة حزينة ،مملوءة بالقهر والظلم وكان سلاحها الوحيد هو الدعاء وأن ينصرها على من ظلمها ويظهر الحق.
كان حكيم يقضى ليلته مع روان ، ولكنه كان يتخيلها حنين ولا يصدق أن تلك التي بين يديه ليست حب عمره بل هي صديقتها .
وعندما انتهى منها ، ونظر إليها فتذكر أنها ليست حنين ولكن روان .
فابتعد سريعا عنها ،وقام يؤنب نفسه ،كيف فعل هذا ؟
كيف في ليلة واحدة أن يستبدل حب العمر بتلك التي كانت أقرب الناس إليها .
روان ...إيه يا روحى ، قومت ليه ، متخليك جمبي شوية .
حكيم بحرج ...هروح أشوف ماما، ممكن تكون محتاجة حاجة ..
فتأففت روان قائلة ...أمك دلوقتي وأنت عريس !
ثم اقتربت منه ومسحت على ظهره بحنو مرددة بدلال ...تعال بس هي أكيد نايمة دلوقتي .
ثم حدثت نفسها ...يارب تنام ما تقوم الكركوبة دي .
حكيم ..طيب هبص عليها حتى، لو نايمة خلاص وأرجع.
فأمسكت روان يده قائلة...بعدين بعدين .
ساعة الحظ متتعوضش .
فوجد نفسه معها مرة أخرى وكأنها سحرته .
أما كريمة فقد كانت تشعر بالعطش الشديد بعد فراغ كوب الماء الذي بجانبها .
ثم أخذت تنادي على حكيم ولكنه لم يسمع .
كريمة ...إيه الحكاية ، ده أنا بس لما كنت بقول حكيم ، كنت بلاقي حنين قبليه بتقول نعم يا خالتي .
ودلوقتي ناديت كذا مرة ومش سامعني .
إيه للدرجاتي غرقان في العسل ومش سامعني .
بس أنا اللي غلطانة ، أنا مصدقت تطفش حنين ، أروح مجوازه ،كان قعد جمبي أحسن.
وبعدين أنا عطشانة ،وكمان عايزة المبولة مش قادرة .
ثم أخذت تنادي ولم تجد استجابة .
فشعرت بالمياه تتسرب منها .
فبكت بمرارة قائلة ...يا لهوي، معقول أكون ..!!
هي دي أخرتها يا حكيم .
ثم بكت بمرارة ..وظلت هكذا طول الليل .
حتى جاء الصباح .
فخرج حكيم من غرفته وترك روان نائمة .
ليلج إلى غرفة والدته، ليجدها على تلك الحالة المزرية.
ففجع قائلا ...ماما ، إيه اللي حصلك ؟
فنظرت له كريمة بعين اللوم قائلة ...كده يا حكيم ، تنسى أمك لغاية ...ثم بكت بكاء مرير .
حكيم بندم....آسف آسف يا أمي .
طيب ليه مناديتيش عليه .
كريمة....ناديت كتير .
بس أنت ولا هنا .
إيه خلاص نسيتني ، ولحقت مراتك الجديدة تقسيك عليا .
تنهد حكيم بمرارة ...مراتي الجديدة .
مش دي شورتك برده .
كريمة ...آه شورتي ، بس أنت مالك ، مجتش ليه تطل على أمك ؟
حكيم ...فكرتك نايمة ، معلش سامحيني.
وهروح أصحي روان ،تيجي تساعدك ،وتتنظف المكان .
فذهب إليها ليوقظها ، فقالت ...إيه سبنى شوية يا حبيبي
لسه عايزة أنام .
حكيم ...قومي يا روان .
ربنا يسامحك قولتلك أمبارح أروح أطمن على ماما .
قولتيلي سبها نايمة.
وأتاريها كانت عطشانة وعايز الحمام .
ودلوقتي محتاجة تحميها وتغيري الفرشة .
روان بتأفف....إيه أنا أغير الأرف ده ، يستحيل .
روح أنت ، اعملها اللي تحبه .
أنا مليش فيه ، أنا كفاية أعملها الأكل وبس .
اندهش حكيم من أسلوبها قائلا ...إيه؟ ارف؟ .
مش هو ده كلامك امبارح ، أنك هتخدميها بعينيكي.
روان ...هو كلام الليل معروف مدهون بزبدة .
وأنا كتر خيري هأكلها ،مش أكتر من كده .
ويلا بقا روحلها وسبني أنام .
ليتركها حكيم ويتجه نحو والدته ، فقام على تنظيفها بنفسه وتغيير الفراش .
وإعداد الإفطار لها واطعامها .
قبل أن يغادر لعمله ثم أوصى روان عليها قبل أن ينصرف .
وعندما غادر حكيم صاحت كريمة منادية على روان...يا بنتي ياريت تعمليلي كوباية لمون، إلا حاسة ضغطي واطي شوية ودايخة.
روان بسخرية ...يمكن هتموتي، ثم ضحكت .
كريمة بغضب ...بتقولي إيه يا بت أنتِ.
ما توقفي عوج وتتكلمي عدل كده .
لتثور روان في وجهها...إيه يا ولية أنتِ ، إيه بت دي؟
ما تلمي لسانك ألا اقطعهولك .
كريمة بخوف منها ....أنتِ حصلك إيه يا روان ؟
امبارح كنتي عاملة زي الملاك ،والنهاردة حاسه أني شايفة شيطان قدامي .
لا أنتِ يستحيل تكملي مع ابني ،دي كانت حنين برقبتك على كده .
روان بتحدى ...ليه وأنتِ فكراني حنين الطيبة ، عشان أسكتلك ، لا اصحي ، ده أنا روان والأجر على الله .
وبقولك إيه ؟
لو عايزة تعيشي معانا أنا وابنك ، يبقا تحطي لسانك اللي عايز قطعه ده في بوقك .
وإلا وجلال الله ، أخليه يرميكي في دار مسنين .
ونخلص من قرفك .
فشهقت كريمة عند سماعها هذا قائلة ...أنا خلفت وتعبت وربيت وشقيت لغاية ما بقا راجل وباشمهندس قد الدنيا .
يرميني في دار مسنين .
لا ابني ما يعملش كده أبداً .
أنا لما يجي هخليه يطلقك ويرميكي في الشارع .
فضيقت روان عينيها ،وحركت رأسها قائلة ...يبقا لسه متعرفيش روان .
أنا اللي بيضايقني بخلص منه للأبد .
من غير ما حد يحس ولا يدري ، وشكل الدور عليكي .
يا ولية .
ثم أمسكت بالسكيـ.ن وأخذته ووضعته على رقبتها ..لتخيفها
قائلة ....بصي لو نطقتي بأى حاجة قدام حكيم .
لكون مخلصة عليكم أنتم الاتنين ، زي ما خلصت من كل واحد آذاني قبل كده .
وفي هذا الوقت كان حكيم قد عاد مرة أخرى للبيت ، بعد أن تذكر أنه نسي أوراقا هامة خاصة بالشغل في البيت فعاد ليأخذها .
ليتطرق لأذنه حديث روان .
روان ...خلصت أول حاجة من مرات أبويا اللي كانت بتذلني
في الطلعة والخارجة وبعدين دكتور أمجد ، اللي بعت ليه نفسي بالفلوس .
وبعدين سبب دمـ.اري كله ،دكتور خالد .
أما المحروسة حنين ، اللي طول عمرها محظوظة وشايفة نفسها، خلصت منها وقولت أنها بتحب غير جوزها ، مع أنها كانت عمالة تهزق فيه وتقوله ما تتصلش تاني ، أنا بحب جوزي .
وشربتها عصير الأناناس بايدى عشان تسقط العيل .
وجه الدور عليكي يا ولية أنتِ .
بتفكريني بمرات أبويا ، في نفس كلامها وحركاتها .
فها هتلمي الدور وتحطي لسانك جوا بوقك .
ولا نخلص كده بدري بدري .
......
لتتفاجىء روان بمن يقف من ورائها وينزع منها السـ.كين من يدها قائلا بهدر .....آه يا مجر.مة ، يا قتـ.الة القـ.تلة .
عايزة تموتي أمي كمان ، وخونتي ثقة صاحبتك من كتر الغل والحقد اللي في قلبك ليها .
وأنا غلطان اللي شكيت في مراتي ، من غير متأكد بالدليل .
وهي العفيفة الطاهرة .
اللي مهما أمي عملت فيها ، عمرها ما اتكلمت .
كريمة ببكاء ....آه والله .
أنا اللي ظلمتها بنت الأصول .
روان بصراخ وحكيم ممسك بيدها بقوة ....سبني أنا معملتش حاجة .
هما اللي قتلوني ألف مرة ، قبل ما أقتلهم .
هما اللي عملوا في نفسهم كده .
مش أنا .
أنا بكرهكم كلكم ، وهموتكم كلكم .
ولكن استطاع حكيم التمكن منها .
واتصل بالشرطة ، لتأتي سريعا وقامت بالقبض عليها .
ثم رمى عليها يمين الطلاق وجلس يبكي لما فعله بحبيبة قلبه حنين.
كريمة ...قاعد ليه يا ابني ، روح رجع مراتك .
وبوس على ايديها الاتنين عشان ترضى .
وقولها خالتك بتطلب أنك تسامحيها .
ومن النهاردة ، هتكون أم ليكي بعد أمك .
ومش هزعلها أبداً .
وبالفعل ذهب حكيم إلى حنين منكسرا مذلولا وخجلا .
حكيم بندم: أنا مش عارف اقولك ايه يا حنين لأنى عارف نفسى غلطت وكنت انسان سلبى .
بس معنديش حاجة اقدمهالك عشان تسامحينى اكتر من قلبى اللى بيحبك واوعدك لو سامحتينى هتلاقينى انسان تانى من النهاردة ولا يمكن اخذلك تانى .
وامى كمان عرفت غلطتها وندمت ومستنياكِ تبوس ايديكِ عشان تسامحيها وتعتبريها أمك من النهاردة .
وقفت حنين عاجزة عن الرد للحظات وودت أن تصرخ لكرامتها وترفض العودة له .
ولكنها من فرط حبها عندما وجدت الدموع تلمع في عينيه .
وهو يرجوها أن تسامحه .
سامحته على الفور .
فقلبها طيب حقا ، لا يعرف الهجر أو الخصام .
لا يعرف سوى التسامح .
........
لتعود الحياة لمجاريها مرة أخرى بين حنين وحكيم .
ولكن تلك المرة بسعادة مفرطة .
وأصبحت كريمة أمًّا ثانية حقا لـ لحنين .
تحبها وتكرمها وتدللها.
حتى اكرمهم الله بالعوض وانجبوا ولد وبنت توؤم.
لتسعد بهم كريمة وأصبحت لا تفارقهم وترعاهم .
فأعز الولد ولد الولد .
وهنا خلصت الرواية اتمنى انها تكون عجبتكم رغم بساطة الأداء لكن حبيت انها تكون قريبة من القلب اكتر .
أترككم في حفظ الله وأمنه .
واتمنى اشوف تفاعل وتعليقات مبهجة تفرح القلب على قد التعب فى الرواية .
وارجوا أن يجمعنا الله جميعا على حوض نبيه محمد يوم لا ظل الا ظله، لنشرب من يده الكريمة شربة ماء لا نظمأ بعدها ابدا .
.........
أم فاطمة ❤️ شيماء سعيد
- يتبع الفصل كاملا اضغط هنا ملحوظة اكتب في جوجل " رواية ممرضة دمرت حياتي دليل الروايات" لكي يظهر لك الفصل كاملا
- يتبع الفصل التالي اضغط على ( رواية ممرضة دمرت حياتي ) اسم الرواية