رواية سر زائرة الجبل الفصل الثاني 2 - بقلم زهرة الربيع

  رواية سر زائرة الجبل الفصل الثاني 2 - بقلم زهرة الربيع 

🌹شافها طالعه من البيت بتداري وشها بطرحتها في عز الليل بقى يمشي وراها بترقب وهو خايف تشوفه

رحيل بقت تبص وراها كل شويه وحاسه بحد وراها بس جاسم كان يستخبى بسرعه كل ما تلتفتلوا 

اتنهدت وكملت مشي لحد ما طلعت على اول الجبل وبقت تمشي كتير في منطقه مقطوعه ومخيفه

جاسم استغرب اكتر ازاي بنت وفي السن ده تيجي مكان بالخطوره دي كل ليله وايه السبب بقى مصر يكمل ويعرف سرها

فضل وراها لحد ما قطعو مسافه كبيره بس فجأه ملقهاش قدامو زي ما تكوني اختفت...بص حواليه بزهول وبلع ريقه بتوتر ولسه هيتحرك اتصدم لما حد مسكو من وراه وحس بشيئ حاد على رقبته 

جاسم اتخض جدا ورفع اديه بخوف ولسه هيتكلم سمع صوتها الجميل بتقول بحده..اثبت مكانك لأعشي ديابة الجبل لحم البندر النضيف..اثبت

جاسم اتنهد بإرتياح لما عرف انها هيه وابتسم وقال....تقدري تعمليها يا بنت الجبل..معتقدش الأدين الناعمين دول يتجرأو يقتلوا

رحيل شددت من مسكتها ليه وقالت بغضب...انت متعرفش حاجه عن الادين دول علشان تحكم عليهم يا ابن الذوات...متحكيش كتير انت قاطرني ليه

جاسم قال باستغراب...قاطرك ..قاطرك يعني ايه

قالت بضيق وغضب....يا مصبر الوحش على الجحش يا رب...بقولك ماشي وراي ليه

جاسم قال..اااه...تمام هقولك اكيد بس سيبيني ...يعني ميصحش كده تفضلي مسكاني زي قطاع الطرق كده ده انا في بلدكم حتى

ابتسمت بسخريه وسابتو وخبت خنجر صغير بتاعها في هدومها وقالت....الضيف في بلدنا له احترامه طالما احترم حالو يا إبن البندر

جاسم ابتسم لها وهو بيمشي ايده على رقبته وقال...ولو ان ابن البندر طالعه من شفايفك زي العسل لكن نتعرف احسن 

ومد ايده وقال انا جاسم...جاسم الراسي... وانتي

ابتسمت بسخريه وقالت..مبسلمش

جاسم قال باستغراب...ده اسمك... امال ليه قالولي اسمك رحيل

رحيل قالت بضيق...يعني عارف اسمي كمان يعني صوح مراقبني 

جاسم ابتسم وقال ..الصراحه اه..من وقت ما شوفتك وانا مش بفكر غير فيكي...هو انتي مش بتشيلي الطرحه دي من على وشك ليه..انتي واخده دور برد ولا شكلك مش عاجبك ولا ده فلكلور

رحيل اتنهدت بخنقه وقالت..ملكش صالح لا بلبسي ولا بشكلي ولا اي حاجه وارجع من مكان ماجيت .... يلا عاود متجبش لنفسك المشاكل كلها مترين ونوصل لرجال الجبل ووقتها مهيسموش عليك

جاسم ضحك بخفه وقال..لا مهعاودش ..انا اصلا عارف بوجود رجالة الجبل من قبل ما اطلع يعني مش هخاف من كلامك ده

رحيل قالت بسخريه...لاه متعرفش حاجه واصل ..لو كنت تعرف ايه اللي ممكن يجرالك لو مسكوك مكانش قلبك قواك وجابك لحد هنه

جاسم ابتسم وقرب منها خطوات وقال...انا قلبي قواني لاني هشوفك...مفكرتش غير في كده....ودي الحاجه اللي نفسي فيها من اول ما صادفت عيونك

رحيل استغربتوا قوي وارتبكت من كلامو وقالت ...احم...على راحتك يا ولد البندر كمل وراي وشوف اللي هيجرالك

ولسه هتمشي مسك ايدها وقال...استني بس

لكن دفعت ايده بغضب وقالت...بتعمل ايه...وه اياك فاكر الدنيا ليل وانا طالعه هنه لحالي وهتقل ادبك... ده انا اقطع يدك دي واعلقها على اول الكفر

قال بسرعه...ايه ده حيلك حيلك انا مقصدتش الي وصلك...انا بس كنت حابب نتكلم عادي..قوليلي هو انتي طالعه الجبل ليه..انا سألت وقالولي انك بتطلعي كل ليله..ليه بقى

رحيل قالت بضيق..ومسألتش ليه عن سبب طلوعي مدام داير تسأل عني وتتطقص

سر زائرة الجبل حصريه بقلم...زهرة الربيع

جاسم ابتسم وقال...ما انا سألت بس محدش يعرف

رحيل قالت بغضب..يبقى الاحسن ليك متعرفش...بلاش تجيب لحالك المشاكل 

ومشيت بغضب من قدامو بس فضل مكمل وراها وهو بيقول...طب استني احنا بنتكلم...بقولك ايه انا محتاج دليل هنا في البلد اصل انا هكتب كتاب عن المكان تحبي تساعديني هدفعلك اللي تطلبيه بس تبقي معايا

رحيل التفتتلوا بغضب وهيه مكمله مشي وقالت ....بقولك عاود ...ارجع احسنلك هتتأذي

بس جاسم فضل مكمل وراها وهيه مش راضيه تقف لحد ما قال...مين اللي بتقابليه فوق....اوعي يكون حبيب....انا ممكن تجرالي حاجه

رحيل وقفت وبلعت ريقها بتوتر وقالت....انا مبقابلش حد...رجالة الجبل اصحاب اخوي الله يرحمو...وبطلع اوديلهم اللي ينقصهم ارتحت كده يلا عاود

جاسم ضحك وقال...وهو كل اللي ينقص رجالة الجبل كلهم في الشنطه الصغيره اللي في ايدك دي

رحيل نفخت بخنقه وقالت..انت طلعتلي منين ...احنا داخلين على الريس وهدان ورجالته انزل يا ولد الناس والله معوزاش اذيتك

جاسم قرب منها وبص لعيونها جامد وقال....وهدان ده هو اللي بتطلعي تقابليه...اوعي تكوني زي ما سمعت

رحيل قالت بغضب..تصدق وتأمن بالله انا الغلطانه اللي تاعبه روحي معاك...استحمل بقى اللي هيجرالك ومتقولش ذنبي عند رحبل ومشيت خطوات وقالت بصوت عالي ...يا ريس وهدان...ريس وهداان

اتقدمو عليها رجاله كتير بسلاح وواحد منهم قال...اهلا يا ست رحيل الريس مستنيكي و

بس اتفاجأوا بجاسم واقف بيبص للموقف باستغراب 

بس اتصدم لما رفعو كلهم اسلحتهم في وشو وواحد منهم قال...الجدع ده جاي وياكي يا ست

رحيل التفتتلوا وابتسمت بخبث

جاسم بلع ريقه بتوتر من نظرتها وبصلها برجاء 

وهيه ضحكت بخفه وقالت..لاه ولا اعرفه.... لقيتو قريب من المكان

جاسم بصلها بزهول وقال...لا يا رحيل وانبي بلاش نداله

بصتلو بسخريه وقالت...واه بيناديني باسمي كمان شكلو مهفوف ده ولا متسلط

الرجاله مسكوه بقوه وقالو...تعالى معانا..خلي الريس يشوفلك صرفه 

رحيل مشيت شويه وهما جايبينوا وراها 

 بعد مسافه صغيره كان فيه شاب في التلاتين لابس جلابيه وعبايه وله طله قويه تهز ابتسم اول ما شافها وقال...رحيل ...استعوقتك قوي فكرتك مهتاجيش الليله و

بس قطع كلامو لما شاف الرجالة جايبين جاسم معاهم

 طلع سلاحه فورا وقال بغضب...مين ده يا رحيل وكيف تطلعيه هنه وانتي عارفه اوامري

رحيل لسه هترد جاسم سبقها وقال بقلق عليها.... هيه ملهاش ذنب والله يا ريس انا طلعت لوحدي...طلعت وراها وهيه اتفاجئت بيا زيكم بالظبط

رحيل بصتلوا بدهشه لانو دافع عنها كده من غير ما يهتم لنفسه

وهدان رفع سلاحه عليه بغضب وقال...وكمان مجايش معاها ده انت ليلتك هباب 

 رحيل قالت بسرعه....همله يا ريس...انا..انا محكتلكش الي حصل...هو انا صوح جيت لحالي بس هو مش من هنه من البندر وميعرفش حاجه عن الجبل كان طالع يتفرج على المكان وانا قولتلوا يوصلني لحد هنه

وهدان بصلها باستغراب وقال ..يوصلك من ميته بتعوزي حد يوصلك وازاي تجبيه هنه

رحيل قالت بتوتر ..اصل..اصل انا قابلوني جماعه رحاله وبقم يقلوا ادبهم علي ويعاكسو وفجأه الجدع ده نجدني منهم كتر خيره فطلبت منو يوصلني بس كده

جاسم ابتسم لما قالت كده 

ووهدان استغرب ومكانش مصدق قوي بس قلق من كلامها وقال..حد منهم قربلك ولا ضايقك 

رحيل قالت بسرعه..لا متقلقش انا زينه 

وهدان اتنهد وبص لجاسم وقال..انهارده هتعاود سليم لجل عيون رحيل ولجل انك نجدتها بس اياك تفكر تطلع الجبل تاني مهرحمكش ...سامع

جاسم هز راسو بسرعه وقال...سامع يا ريس..سامع

وهدان بص لرحيل وقال بنبره فيها حزن...احم انتي ادخلي اعملي اللي جايه علشانو لجل تلحقي تعاودي ومتتأخريش

رحيل هزت راسها بالموافقه ومشيت ومعاها الشنطه الي كانت في ايدها ودخلت بيت صغير مبني بالطوب وقفلت الباب وراها

سر زائرة الجبل بقلم زهرة الربيع

جاسم استغرب قوي وبص لوهدان وقال..هيه راحت فين

وهدان ربت فوق كتفو بالسلاح وقال بتحذير...نورتنا...شاي للافندي يا هريدي

جاسم بلع ريقه بقلق وفضل ساكت وهو هيموت ويعرف رحيل دخلت لمين جوه ومستغرب ان محدش راح وراها ولا سألها وكانو الرجاله قاعدين عادي بهدوء

 اما وهدان كانت عيونه على البيت اللي دخلتو طول الوقت وساكت مش بيتكلم مع حد

بعد شويه خرجت وهيه مبسوطه ومش معاها الشنطه وقربت من وهدان وقالت..انا هعاود يا ريس محتاجين حاجه اجبهالكم معاي بكره

وهدان ابتسم وهو بيبصلها بنظرات اعجاب واضحه وقال ..تسلمي يا ست البنات عايزين راحتك ورضاكي وبس

رحيل حمحمت وقالت...يرضى عليك ربك يا ريس.. بالاذن

ولسه هتمشي وقفها وقال...مهتوافقيش على طلبي يا رحيل...انا هفضل اطلبوا منك طول عمري ومهيأسش واصل

اتنهدت وبصت لجاسم اللي كان بيسمعهم وبيحاول يفهم اي حاجه وقالت بضيق..كل شيئ نصيب يا ريس نتكلم بعدين بالاذن دلوك

قالت كده ومشيت هيه وجاسم ووهدان كان متابعها بعيونه لحد ما بعدت عن المكان

على الطريق جاسم بصلها وقال باستغراب....انتي دخلتي عند مين... انا مش مستوعب اني روحت معاكي الجبل وارجعنا وانا مش فاهم برضو بتروحي لمين...وازاي كلهم قاعدين عادي كده مستنينك تخرجي ..هو فيه ايه.. انا مش فاهم و

رحيل قاطعتو بغضب وقالت...ايه يا جدع انت ايه كل الاسأله دي هو انت مفكر حالك من بقية اهلي فيه ايه صدعتني

جاسم قال بضيق...طب جاوبي على اي سؤال هو انتي معبراني اصلا....طب بلاش كل ده انتي فيه ايه بينك وبين الريس وهدان كان بيبصلك بنظرات واضح اوي مغزاها

رحيل قالت بخنقه...لو مسكتش ههملك هنه في نص الجبل لحالك 

جاسم ضحك بسخريه وقال... يا سلام....يعني هخاف مثلا على فكره انتي اللي المفروض تخافي انا راجل يا ماما وحاليا انتي اللي المفروض تدعي اني مسبكيش لوحدك هنا

رحيل ضحكت ضحكه جميله وقالت....والله ...طيب انا مستغنيه عن حمايتك يا حامي الحما كمل لحالك بقى ومشيت بسرعه وبقت تجري منه 

جاسر بص حواليه بقلق وهو سامع صوت الديابه ومش عارف الطريق منين اصلا جري وراها وهو بيقول رحيل ..انتي بتتكلمي جد ولا ايه...يا بت استني انا مش عارف الطريق والله مش عارف هرجع من اي مكان ...يا بت والله تهت بجد اقفي قطعتي نفسي

بس رحيل كانت بتضحك على كلامه وكملت جري لحد ما حصلها ومسكها من ايدها شدها عليه بقوه والطرحه اتفكت من على وشها 

جاسم اتجمد قدامها وهو بيتأمل ملامحها الجميله وابتسم وقال..سبحان المبدع فيما ابدع

رحيل ارتبكت نظراتها وجذبت الطرحه تاني على وشها وقالت..لم روحك يا جدع انت انا جبت اخري منيك في الليله المطينه دي

جاسم ابتسم وقال..بنسبالي اجمل ليله عدت عليا ...ليلة ظهور القمر يوم اكتمالوا 

رحيل ابتسمت لا اراديا على كلامه واتنهدت وقالت..اسمع يا افندي باين عليك جدع طيب وهقولك نصيحه لوجه الله.... متحشرش مناخيرك الزينه دي في امور الناس البيوت اسرار يا ولد البندر وهمل كل واحد في سره أضمن ليك

قالت كده ومشيت وهو ابتسم وقال بصوت عالي نسبيا...بس انا مش عايز اعرف غير سرك انتي وبس يا بنت الجبل ...وهعرفه 

رحيل هزت راسها بيأس منو وكملت طريقها وهو حصلها وكان طول الطريق بيتكلم ويمشي حواليها بسعاده وهو بيحكلها عن حياتو وطفولته وعن حاجات كتير مطلبتش اصلا تعرفها

رحيل كانت بتسمعه بملل شديد واوقات يضحكها بكلاموا غصب عنها وأوقات تزعق معاه علشان يسكت لحد ما وصلت لبيتها 

بصتلو وقالت..الحمد لله وصلنا... يلا عاود دارك اديني وصلت اها ربنا يهديك

جاسم ابتسم وقال ..ربنا هداني خلاص بس فاضل يهدي عليا..بقولك ايه تاخدي رقمي ممكن تحتاجيني اوصلك مره تانيه

بصتلو بضيق وقالت ..لا تشكر بوصل لحالي..يلا ارجع مكانك عاد هنه الناس مبتسكتش احسن حد يشوفك وياي متجبلناش الكلام

جاسم اتنهد وقال..تمام ..بس هرجع اشوفك يا رحيل...صحيح نسيت اقولك إن اسمك حلو اوي

رحيل بعدت عيونها عنه وابتسمت بارتباك 

وهو ابتسم وقال...على فكره الطرحه اللي على وشك دي مش مخبيه حاجه ...عيونك بيفسرو كل ملامحك كويس ...يعني دلوقتي لما ابتسمتي عيونك ابتسموا ولما بتغضبي النار بتطاير منهم ولما بتزعلي بيترسم الحزن جواهم وقرب وقال..وحتى لما بتتكسفي بيلمعو زي نجوم السما بخجل مشوفتش اجمل منو...يعني عيونك فضاحه قوي ومن رأيي تخبيهم هما اولى 

رحيل ابتسمت وقالت..واه...هو انت مصوراتي ولا شاعر

جاسم ضحك وقال..ايه ايه مصوراتي...اه علشان كنت بصور الاماكن يعني... لا ياستي انا لا مصوراتي ولا شاعر انا بس مشروع كاتب مبتدأ ...وبحاول أكتب كتاب عن المكان وهيساعدني في دراستي ...صحيح هو انتي بتدرسي ايه

رحيل اتنهدت بحزن وقالت..احم..لاه انا مكملتش بعد الثانويه عمي قالي كفياكي كده

ابتسم وقال...هو الصراحه معاه حق اللي زيك المفروض يتقفل عليها في علبه قطيفه زي المجوهرات... بس برضو كان لازم تكملي تعليمك بس انا هبقى اساعدك في الموضوع ده و

بس قطع كلامو لما سمع صوت راجل بيقول بغضب...رحيل..مين اللي معاكي ده

رحيل قالت بتوتر..ده ..احم ده الافندي الي جاي يصور البلد بيسأل على الجامع يا عمي

جاسم بصلها بدهشه وقال ...جامع

عمها قرب منها راجل في الخمسين بلبس صعيدي وقال...امم الجامع ...طب فوتي انتي انا رايح اصلي وهاخدو وياي

جاسم ابتسم وقال ..تمام نصلي

وبص لرحيل وكمل وقال...انا فعلا مقصر في حق ربي مع انو ديما بيراضي قلبي من غير ما احس

رحيل ابتسمت وبعدت عيونها بكسوف 

وعمها بصلها وقال بضيق... روحتي مشوارك

رحيل هزت راسها بالموافقه

وعمها قال بضيق....طيب ادخلي انتي مرت عمك مستنياكي 

رحيل دخلت بسرعه وجاسم مشي مع عمها وهو مستغرب انو سألها خلصت مشوارها معنى كده انو عارف هيه بتروح فين وموافق ابتسم بارتياح واتأكد نسبيا انو مش عشيق زي ما الناس بتقول

وراح مع عمها وصلو الفجر سوا

اول ما طلعو من الجامع وعمها بصلو وقال..ارجع على دارك الصبح هيطلع ....ولما تحب تسأل عن اي حاجه هنه وقف راجل واسألوا مفهوم

قال كده ومشي من غير ما يستنى رده حتي

جاسم اتنهد وقال...ايه الراجل ده...انا ناقص رعب

ورجع على البيت وهو بيتسحب على اطراف صوابعو علشان احمد ميحسش بيه ويسألو كان فين 

اتنهد بارتياح لما لقاه لسه نايم واترمى على السرير بتعب وبص للسقف وبقى يفكر فيها وخصوصا لما نزلت الطرحه من على وشها ابتسم واخد نفس عميق وقال..رحيييل..حتى الاسم غالي وتقيل

في اليوم التاني كان جاسم قاعد مع احمد اللي هيتجنن منو لما حكالو اللي حصل لانو مش متعود يخبي عنو

بس احمد كان مش مستوعب وقال بزعيق..يعني خلتني نمت وطلعت وراها برضو مجنون انت مجنوووون والله مجنون اتجننت خلاص وناوي اتجنني

جاسم اتنهد وقال..ايه كمية الجنان اللي في الجمله دي ...وبعدين يعني يا احمد هو انا كل ما اكلمك هتتعصب انا غلطان اني حكتلك يا اخي... خلاص اللي حصل بقى

احمد قال بغضب....اللي حصل ازاي يعني ها... انا مش حذرتك ان الجبل خطر ومتطلعش ... فيه ايه.....ليه بتعمل فيا كده ليه عايز تدبسني مع اهلك

جاسم ضحك وقال.... يا ابني هو انا عيل ليه محسسني انهم باعتينك تحرس ابن اختك

واخد نفس عميق وقال بابتسامه.... وبعدين متقلقش عليا مفيش بعد سهام عيونها خطر

احمد قال بزهول وغضب..يا حنين..وايه كمان يا عندليب...يا بني ادم افهم انت ربنا بيحبك خلاها انقذتك من رجالة الجبل وقالت انك وصلتها... ولا عمها ده كمان لو عرف انك بتعا،،كسها كان صلى عليك مش معاك

جاسم ضحك وقال..ده جزاتي اني حكتلك ..تقولي بتعا،،كسها انا وش ذالك ...خلاص يا حموده بقى متزعلش مش هطلع تاني وحياة عيونك

احمد قال بغضب..لا يا اخويا احلف بعيونها هيه انا عيوني شايف بيهم طشاش

جاسم ابتسم وهو بيفتكرها وقال بتوهان...عيونها ..اه وخمسين اه من عيونها... بتوصف كل الي في قلبها ويترسم ببراعه على ملامحها..بيعكسوا غموض الجبل اللي بتزوره كل ليله مزيج من القوه والشجاعه ...صابوا القلب بكل سهوله.. زي طلقات الرصاص.. من قاتل بارع وقناص

احمد اتنهد وشاف ان مفيش فايده من الغضب وقعد جمبه وقال بهدوء... يا جاسم يا حبيبي انا ابن عمتك وتهمني مصلحتك انت زي اخويا... يا حبيبي البنت دي شمال ..واضح من كلامك دخلت عند حد وقعدت معاه مده لوحدهم والباب مقفول ...مش محتاجه تفسير يعني شغل عقلك

جاسم وقف وقال بسرعه وهو بيحاول يرفض الكلام ده حتى قدام نفسو.... لا يا احمد ...لا البنت عمها عارف بطلوعها ..وغير كده الريس اللي هناك ده قلها وافقي على طلبي وقالتولوا كل شيئ نصيب اللي استنتجتو انو عايز يتجوزها وهيه رافضه لو فيه حاجه من اللي انت بتقولها اكيد مش هيبقى عايز يتجوزها ...حتى نظراتو ليها اللي كنت هموت واخذقهم بيقولو انو معجب بيها لا لا لاء مفيش حاجه من اللي في دماغك ..رحيل عندها سر كبير بيخليها تزور الجبل بالشكل المستمر ده وانا مش ههدى الا لما اعرفوا

وعدى اليوم وهو بيكمل في كتابتو وبيلف في القريه وكان يتعمد يقف عند بيتها كتير يمكن تطلعلو او يلمحها بس كل محاولاتو فشلت وكمل في شغله بيأس

بالليل رحيل طلعت زي العاده وهيه بتبص حواليها وراحت تاني الجبل

وجاسم كان مستنيها وطلع وراها تاني وكان في ايده علبه غريبه بس المره دي عمل كل جهده علشان متشفهوش ولا تحس بيه 

سر زائرة الجبل بقلم زهرة الربيع

فضل يراقبها من بعيد لحد ما وصلت لرجالة الجبل واتكلمت شويه مع وهدان وسمحلها تدخل البيت تاني

جاسم استغرب اكتر وقال ....وبعدين بقى ...فيه ايه في الييت ده

 وراح بحذر من الناحيه التانيه للبيت وكان عليه ٣ رجاله متفرقين بيحمو الناحيه الخلفيه للبيت

جاسم ابتسم وبص للعلبه اللي في ايده وقال.... كويس اني جبتك معايا كنت متخيل اني هستخدمك للديابه..اعذروني بقى 

وقرب منهم واحد واحد بحذر ورش عليهم من الاسبري اللي في ايده وكان فيه مخدر قوي بمجرد ما يوصل لانف الشخص يقع فورا

اول ما اغمى عليهم التلاته بقى يدور ناحيه البيت وكان متقفل كويس لحد ما شاف فتحه صغيره اصغر من الشباك بص منها علشان يشوفها بتعمل ايه

 وياريتو ما عمل كده اتصدم بشده من اللي شافو كانت رحيل قاعده بشعرها وكاشفه وشها 

بس المصيبه اللي خلته هيقع من طوله كانت لما رفعت عبايتها لفوق قدام الشخص اللي معاها و هيه بتضحك 

جاسم حس الارض بتدور بيه وقبل ما يفهم اي حاجه انتفض بخضه لما وهدان لف ايده اللي ماسك بيها العلبه ورا ضهره بقوه وقال ...والله ورزق ديابة الجبل ...هتتعشى لحم ولاد الذوات وووو

😱 😱 😱

لو فاكرين ان ده تشويق ومفاجأت احب اطمنكم لسه مشفتوش اي حاجه الللي جاي دمااااااار🤫🤫 🏃‍♀️🏃‍♀️🏃‍♀️🏃‍♀️

 •تابع الفصل التالي "رواية سر زائرة الجبل" اضغط على اسم الرواية