رواية راديو شهرزاد الفصل الثاني 2 - بقلم نسرين بلعجيلي
حلقه اليوم الإهمال الزوجي.
تكمله لحلقه عيد الحب.
حكمت دخلت عند بنتها الأوضه.
حكمت : يا شهرزاد، إصحي بقا.
شهرزاد : يا ماما في إيه؟؟
حكمت : قومي كلميني، رجعتى إمتى؟؟و إيه اللي حصل؟
شهرزاد : مافيش حاجه حصلت. أرجوكى يا ماما سيبيني أنام شويه، أنا ماصدقت إني نمت.
حكمت : ماشي، هتروحي مني فين؟ وراكى طول اليوم..
شهرزاد حاولت تنام تاني بس ماعرفتش.. حاسه بحاجه مش تمام،
مش عارفه ليه إحساسها مختلف من ناحية حسام. هو لطيف وجينتل مان معاها و بيحبها وبيخاف عليها، بس هي مش قادره توصل معاه لإحساس الحب اللي هي عايزاه. هي حاسه إن في حاجه غلط. إحساسها بيه مجرد تعود، وإنه إبن عمها وبس، مش قادره تشوفه حبيبها.
رن تليفونها فصلها من سرحانها.
عزه : إيه يابنتي؟ سنه علشان تردي؟
شهرزاد : كنت نايمه، في إيه على الصبح؟
عزه : ممم، طيب حصل إيه امبارح ؟؟
شهرزاد : مافيش، روحنا اتعشينا بس…
عزه : ياعيني يا ليلي، قولي بقا التفاصيل.
شهرزاد : يابنتي أقول إيه؟؟
عزه : الفرح إمتى؟؟
شهرزاد : بصي يا عزه، خليني أكمل نوم وبعد البرنامج ممكن نروح أي مكان واحكيلك كل حاجه لأني بجد محتاجه أتكلم معاكى.
عزه : ماشي يا ستي.
شهرزاد حاولت تنام بس ماعرفتش. قامت أخذت شاور، وراحت تفطر مع أمها.
حكمت : ماشاء الله، شهيتك مفتوحه.
شهرزاد : الحمدلله.
حكمت : إتفقتوا على إيه؟
شهرزاد : ولا حاجه.
حكمت : يعني إيه ولا حاجه؟؟
شهرزاد : عايزانا نتفق على إيه؟؟
حكمت : على الفرح، وكتب الكتاب.
شهرزاد : ماما لو سمحت ماتشغليش بالك. لما نتفق هبقى اقولك.
حكمت : يا بنتي مش فاهمه ليه كل التأخير ده، الشقه جاهزه وجهازك كمان، وانا عايزه أفرح بيكى.
شهرزاد : يا ماما أنا لسه مش مستعده اتجوز، أفهمها لك إزاي؟
حكمت : نعم يا ختي؟ مش مستعده للجواز؟؟ هو إيه ياختي الاستعداد ده ؟؟
شهرزاد : قلتلك كثير أنا شايفه حسام إبن عمي وبس، لسه مش شايفه نفسي مراته. هو متفهم الوضع، إنت مالك بقى؟؟؟
حكمت : خلاص خلاص إهدي.
شهرزاد قامت ودخلت أوضتها. فضلت فيها لحد ما راحت الاستوديو.
عصام : مساء الورد.
شهرزاد : مساء الخير، فيه جديد؟؟
عصام : الحلقه امبارح عملت ضجه، قصة منار حطت إيدها على الجرح. فيه ستات كثير اتفاعلوا معاها عايشين نفس الوضع. وفيه ناس هاجمتها على أساس إن الغلط فيها هي.
شهرزاد : إزاي الغلط فيها؟؟
عصام : بمعنى إن هي شايفه نفسها على جوزها، ودايما شايفه إنها تستاهل حد أحسن منه، وهو حاسس بده وهو اللي صابر.
شهرزاد : مممممم! ماشي يا عصام.
عصام : حضرتي حلقه النهارده؟
شهرزاد : بصراحه لأ.
عصام : ياه! دي أول مره تحصل.
شهرزاد : ماتخافش، نكمل الحلقه بتاعت إمبارح.
منار بعتت رساله قبل ما آجي، عايزه توضح بعض الأمور.
الحلقه نسميها الإهمال الزوجي.
عصام : برافو عليك.
إبتدت تجهز نفسها علشان تطلع على الهواء.
عصام : جاهزه ؟
شهرزاد : جاهزه.
شهرزاد : يا مساء الخير على أحلى جمهور في الدنيا. إزيكم ؟ طمنوني عليكم، قضيتوا عيد الحب ازاي؟
بعد حلقه امبارح قررت اعمل حلقه عن الإهمال الزوجي، يعني حلقة امبارح فجرت قنبله عند كل الستات.
فيه ستات بتقول ده عادي، مع الجواز والعشرة و المسؤوليه ومتاعب الحياه الحب بيموت، الراجل بيرجع تعبان كل همه يصرف على بيته وبينسي إن في زوجه مستنياه، هي كمان طول اليوم تعبانه من شغل البيت والعيال والهموم. بس ده مش مبرر، الحياه بنعيشها مره وحده، ومن وجهة نظري المتواضعه، لازم الحب. من غير الحب مافيش حاجه، من غير الحب كل حاجه تبقى سوده.
أبتدي الحلقه مع منار، أكيد فاكرينها. من امبارح عايزه اعرف حصل إيه بعد ما الحلقه اتذاعت.
وناخذ إتصال….
شهرزاد : ألو !
منار : السلام عليكم.
شهرزاد : وعليكم السلام، إزيك يا منار؟ عامله إيه؟
منار : الحمدلله على كل حال.
شهرزاد : مممممم! صوتك مش عاجبني، حصل حاجه؟ إحكيلي.
منار : والله مش عارفه أقول إيه. قبل الحلقه كلمته، كان في العربيه، وقولتله حط الإذاعة واسمع راديو شهرزاد، قالي حاضر، بعد مكالمتي ليكى ولما انتهت الحلقه، فضلت متابعه السوشيال ميديا وشفت التعليقات، فيها اللي فرحتني، وفيها اللي زعلتني. وخاصه اللي بيقولوا إني شايفه نفسي عليه، وإني أنا اللي قبلت الوضع ده، واللي شايف أبويا ظلمني. وحبيت أقول إن أبويا أحسن راجل في العالم، كان شايف الدنيا صح، و ماكانش عايزنا نتبهدل، ووفر لينا حياه كريمه، حتى بعد مامته الله يرحمه. أنا فهمت الكلام ده بعدين، هو ماكنش بيفرض علينا حاجه او عليا، بس أنا كنت شايفه العكس. بالنسبه لجوزي أنا فعلا أحسن منه وقبلت علشان الوضع كان كده. وانا اتجوزت وكان كل أملي أبني اسره سعيده، وجوزي يعوضني عن أبويا وأمي وعلى كل سنين العذاب اللي عشتها. كنت عايزه أعيش قصه حب مع جوزي، بس اتصدمت بالحقيقه المره من أول يوم، وحمايا كسر نفسي وأنا عروسه وقال إني معيوبه،
بس علشان يبين إن إبنه راجل وإنه قبل بيا، رغم إني مافهمتش ساعتها كان قصده إيه.
أنا كنت بنت ناس ومتربيه، وحلوه، ومن عيله كويسه، ومستوايا المادي كويس، عكسه هو. وانا اللي قبلت بيه مش هو اللي قبل بيا. والناس اللي شايفيني إنى شايفه نفسي عليه فمن حقي لأني استحق. المهم لما رجع كنت محضره عشاء رومانسي وقلت أديه فرصه واصلح اللي ممكن يتصلح، بس اتصدمت إنه مارجعش، راح عند أبوه، وزي كل مره وفي كل مناسبه أبوه بينكد عليا، ده لو كانت حماتي عايشه مكانتش عملت معايا الشغل ده. مش عارفه ليه مش بيطيقني ولا بيحبني، وعلى طول شايفني إني مقصره في حق إبنه. أخذت شاور، وعملت قعده مع نفسي، وعاتبت نفسي على كل التنازلات. اللي فهمته ومن النهارده مافيش غير نفسي و أولادي. اللي مش بيديني قيمتي مالوش لازمه عندي. تاني يوم رجع مكشر، قال إيه، ماعجبوش كلامي عليه، وإني ظلمته، وإني أنا اللي مفتريه ومش برضى بنصيبي، وإنه عامل اللي عليه، وانه بيحبني بس شخصيته كده. وانا حقول هو بيحبني وقت مايكون عايز حاجه مني، ساعتها بياخذ الدوا ويأدي واجبه الزوجي، وبيعرف يقول كلام حلو، وبيعرف يحضن، غير كده لأ. قرار الطلاق مش قادره آخذه لأن أولادي متعلقين بيه، مش عايزه أظلمهم. المهم ظل راجل ولا ظل حيطه. معلش طولت عليك.
شهرزاد : لا بالعكس أنا اديتك الحق تردي. بصي يا منار، إحنا سمعنا منك وماسمعناش منه، أكيد هو كمان عنده كلام كثير. فا عايزاك ماتتأثريش بالكلام ولا التعليقات، لأن الناس شافت اللي قولتيه.
اللي عجبني فيكى إنك بتحبي نفسك، و وقفتى مع نفسك، وفهمتى لوحدك، إنتى الوحيده اللي في الموضوع، واللي تقدري تحكمي على علاقتك بيه، وانتى اللي تاخذي قرار الطلاق.
إلي أنصحك بيه تخلي بالك من صحتك النفسيه، دي مهمه جدا ، ومن صحتك الجسدية، وعيشي لنفسك. إعملي أي حاجه تبسطك. سعادتنا بإيدينا إحنا، ماتخليش سعادتك ونكدك وزعلك بإيدين جوزك. عامليه بما يرضي الله، وافرضي عليه يتعالج، واقسمي معاه المصاريف وفهميه إنك لو ساعدتيه دا خير منك، إنتى مش ملزمه بده. الرجال قوامون على النساء.
ناخذ فاصل غنائي ونرجع ليكم….
شهرزاد : ورجعنا ليكم أعزائي المستمعين.
كلنا سمعنا حكايه منار، وأكيد فيه كثير منها في المجتمع بتاعنا. وزي ما قلت، عنوان الحلقه: الإهمال الزوجي، ليه بنوصل للمرحله دي؟؟ العيب فين؟ في الراجل ولا الست؟؟ هو احنا ليه مش عارفين نعيش ؟؟
وناخذ معانا اتصال ونقول الوووووو!
المتصله : مساء الورد يا أحلى شهرزاد.
شهرزاد : مساء النور.
نور : معاك نور.
شهرزاد : أهلا بيك يا نور.
نور : بصي حضرتك، حلقه النهارده حلوه أوي وحبيت أشارك فيها. بتتكلم عن مشاكل ستات كثير، الإهمال الزوجي.
أنا بقالي 15 سنه متجوزه، معايا ولد وبنت، يتيمه الأب و الأم. إتجوزت نقول عن حب، أول سنه نقدر نقول كانت تمام، بعد أول ولاده ابتدا الإهمال، بمعنى كل واحد فينا عايش حياته. أنا انشغلت مع العيال، وهو كل ما بيزيد الوقت كل ما بيبعد.
15 سنه جواز ماعرفش جوزي مرتبه كام، ولا عنده أد إيه. كتوم جدا معايا، بيعاملني بإحتياط وحذر. المصروف على الأد، ومافيش مصروف ليا خالص وانا مش بشتغل.
اتبهدلت وعجزت قبل الوقت. لو إتعزمنا مع بعض، وده طبعا نادرا، اللي يشوفنا يقول إني أنا أكبر منه.
هو بقى مهتم بنفسه وبلبسه وشياكته والبيرفيوم بتاعه، وانا لأ. ما أنا معنديش فلوس، مش شغاله ولا ليا مرتب ولا ورثت حاجه من أهلي. وكل ما اقوله إديني فلوس أو عايزه أشتري حاجه، على طول معندوش. يعني ينزل يجيب ليه و للعيال لبس وانا مش بيفتكرني حتى بشبشب.
هدومي بقت قديمه، بقيت أوفر من فلوس المصروف علشان اجيب لنفسي حاجه. لما حس بكده نقص عليا الفلوس. ليه يعمل كده معرفش؟
هتقوليلى كلميه، كلمته كتير من غير فايده. حياتنا بقت شبه منعدمه، هو عايش حياته يشتغل، يطلع، يسافر،
والبيت عندي أوتيل، ياكل وينام فيه
وانا الشغاله عنده. وبالليل لما بيكون عايز غرضه مني يقضيه، خلصنا على كده. وحتى في ده مش مبسوطه لأنه مش بيحبني ولا أنا بحبه. هتقوليلى إيه اللي مصبرك ؟؟ حقولك جملة منار: ظل راجل ولا ظل حيطه. على الأقل منار أحسن مني، شغاله وفلوسها في جيبها، أنا لأ. وكمان رافض إني أشتغل ولا اطلع بره البيت. وأكيد مش هفكر في الطلاق لأني معنديش مكان أروحه.
هي دي قصتي…..
شهرزاد : لا حول ولا قوة إلا بالله العلي العظيم. مش عارفه أقول إيه. اللي شايفاه إنك تنازلتي كثير يا نور،
وسكتي كثير. جوزك مجبر إنه يجيبلك هدوم ويصرف عليكى. كلمي أهله ، كلمي حد كبير يتدخل في الموضوع ده، لازم حل، ده حقك، وكمان نصيحه، إشتغلي وانتى في البيت، فيه شغل كثير. لو بتعرفي تطبخي، إعملي أكل وبعيه، وحلويات أو تجارة الهدوم، أو أي حاجه. فكري تشتغلي تدخلي فلوس. مش عايزه أقولك انزلي اشتغلي من وراه، بس لازم تدافعي عن حقك، لأن دي بصراحه مش عيشه خالص. فين الحياه هنا ؟؟ هل دورك بس تطبخي وتربي أولاد؟ فين حقك؟ ليه الرجاله أنانيه كده؟ إزاي يجيب ليه ولعياله هدوم و لمراته لأ؟ فين الرجوله؟ فين القوامه؟
سيبي رقمك في الكنترول واتصل بيك بعد الحلقه.
ناخذ استراحه ونرجع تاني…..
شهرزاد مسكت راسها.
عصام : مالك؟
شهرزاد : راسي واجعني بجد.
عصام : إهدي، الحلقه لسه مخلصتش وانتى متعصبه وصوتك اتغير.
شهرزاد : غصب عني يا عصام، أحاول اهدا شويه.
ورجعنا ليكم ونقول ألوووووو!
المتصل : ألو! أخت شهرزاد.
شهرزاد : مساء الخير يا فندم.
المتصل : معاكى محمد، متجوز بقالي فتره، مش عايز حتى أعد السنين.
شهرزاد : تشرفنا أخ محمد. عندي سؤال ليك، أو لكل الرجاله: ليه الراجل بيهمل زوجته بعد الجواز ؟
محمد : والله في زوجات كثير بتهمل أزواجها بعد الجواز. مثلا، أنا اتعرفت على مراتي في الشغل، كانت مهتمه بنفسها ومهتميه بيا. كنا نفطر مع بعض، ونتغدا مع بعض، واتخطبنا، وكانت واخذه بالها من كل حاجه تخصني، فوق ما تتخيلي. فضلنا سنتين مخطوبين، وبعد كده اتجوزنا. وعلشان أكون صادق، فضلت كويسه معايا 6 شهور، وبعدها إبتدا الإهمال. مابقتش تهتم بنفسها ولا بيتها، على طول تعبانه، بقينا ناكل ديليفيري. إتكلمت مره و اثنين، وعرفت إنها حامل، قلت خلاص لازم استحمل لحد ما تولد، لأ الأمور زادت وزادت بعد الولاده، و السهر و الرضاعه. وهنا حياتنا اتقلبت، نسيت نفسها تماما، أرجع من الشغل ألاقيها نايمه، مابقاش حوار، مابقتش حياة. حسيت إنها خدعتني، قبل الزواج حاجه، وبعد الزواج حاجه تانيه، كإنها خلاص ضمنت إننا اتجوزنا. وانا بصراحه مابقتش طايق الحياة دي، بافكر أطلقها واشوف حياتي.
2
شهرزاد : معلش، حضرتك كلامك استفزني. يعني إيه تطلقها وتشوف حياتك؟ وحياتها هي راحت فين؟؟؟
محمد : ما انا عايز أعيش معاها الحياه، بس هي في دنيا و أنا في دنيا ثانية. مديها كل مصروف البيت، مش بانقص عليها حاجه. طبعا مع العيال قعدت في البيت، وانا الحمدلله اترقيت في شغلي وباصرف كويس على البيت. بقيت للأسف أتحرج أطلع معاها لأنها بقت تلبس عبايات سمره، لا ليها شكل ولا ستايل. قال إيه لقت راحتها في العبايه، من غير وزنها الي زاد، ووشها اللي كله تصبغات.
شهرزاد : كفايه يا أستاذ محمد، رسالتك وصلت. إسمعني كويس،
هل سألت نفسك مراتك إتغيرت ليه؟ إيه اللي حصل ليها ؟ ليه وزنها زاد ؟
ليه مابقتش مهتميه بنفسها ؟ طبعا لأ.
معلش، بس أنا شايفه إن دي أنانيه من حضرتك إنك بتلموها على ده.
فيه حاجه كنت باسمعها زمان إن الست مرايه الراجل، بمعنى لما نشوف ست شيك ومهتميه بنفسها يبقى جوزها راجل كويس معاها،
ولما نشوف ست ذبلت كده و وشها شايل الهم، يبقى الراجل منكد عليها. الست اتجوزتها كانت شغاله وقعدت تربي ليك العيال، هل انت مشارك معاها في مهام التربيه ولا مسؤوليه البيت؟ أكيد لأ، علشان كده إنت اترقيت في شغلك.
وكلامي لمدام حضرتك ولأي زوجه و أم: إوعوا تنسوا نفسكم مهما حصل، اهتموا بنفسكم وصحتكم وجمالكم و رشاقتكم علشان فيه رجاله للأسف، لو شافك أهملتى نفسك حيطلقك ويشوف حياته.
كلام للستات:
نفسك ثم نفسك ثم نفسك ثم الآخرين. الحياه الزوجيه مشاركه بين الراجل والست، وأساس العلاقه الاحترام والاهتمام و الحب، بس لو الاثنين ناقصين يبقى الحب مالوش لازمه. الحياه نقسمها بينا، مش الزوجه تشيل المسؤوليه والراجل لأ. البيت كمان شغل للراجل مش تخصص الست لوحدها، يعني مهام البيت نقسمها.
إوعى إوعي تدخلي على إنك super woman اللي حتشيل كل حاجه،
لأ لازم الراجل يشارك.
معانا مكالمه….
شهرزاد : ألو!
المتصله : أول حاجه يسلم فمك على الكلام ده، بس للأسف مين هيعمل بيه؟؟ إحنا اتربينا إن البيت مسؤولية الست، تطبخ، وتكنس، وتنظف، وتنزل تجيب طلبات البيت، وتربي. الراجل ليه شغله، لازم يرجع البيت يلاقيه فله، الأكل جاهز، الأولاد كويسين، وهي عروسه وتضحك في وشه. يدخل ينام ويصحى ياكل ويرجع ينام، ولازم الست تلبي رغباته فأي وقت هو عايز، ماهو الراجل!!! و يوم عن يوم، الست بتتعب، بتذبل، وهي اللي بتكون شايله هم العيال، ومصاريف البيت، يديها اللي فيه النصيب ويقولها اتصرفي انتي،
وهي تدخل جمعيات، وتوفر ليه.
يا شهرزاد، ده إحنا لازم لينا سنوات ضوئية علشان نوصل لمستوى عالي من الفهم إن الحياه الزوجيه مشاركه لكل حاجه.
شهرزاد : شكرا على مداخلتك. للأسف وقت الحلقه بيخلص. عايزه اقول آخر حاجه: الست كائن حساس، كلمه حلوه تطلعها سابع سما، وكلمه وحشه تنزلها الارض. لو الراجل مهتم بمشاعر مراته أكيد الست تبقى مبسوطه يديها طاقه حب. إوعوا تهملوا إن الكلمه الطيبه صدقه، سواء للراجل او للست. الحياة مشاركه، مانسيبش قطار الحياه ياخذنا. أي راجل ومراته يعيشوا، يغيروا روتين، يسافروا، يطلعوا يتفسحوا حتى لو الإمكانيات مش تمام. يتمشوا بس على الكورنيش، يتكلموا، يكون في حوار بينهم. عارفين لو عملوا بس جلسه روحانيه ونفسيه مع بعضهم مره في الشهر، الحياه تمشي. وبلاش تراكمات، يعني نتخانق ومايكونش فيه حوار أو حل للمشكله، والست او الراجل يشيل في نفسه. الموضوع دا نقطه مهمه.
واقولكم أستودعكم الله، وتصبحون على خير.
عصام : برافو، كلام جميل جدا.
شهرزاد : مش عارفه مالي.
عصام : على فكره، كانت فيه مدخلات كثيره من رجاله بعد مكالمة محمد، بس أنا ماحبتش اذيعهم لأني شايفك بتردي بهجوم.
مش عايز أتدخل، بس إنت متخانقه ما خطيبك؟؟
شهرزاد : للأسف لأ. حامشي علشان مصدعه. سلام.
طلعت من الإذاعة ولقت عزه في العربيه مستنياها. فتحت الباب و ركبت.
عزه : مساء الورد، إيه الحلقه الجامده دي؟
شهرزاد : لا والله ماكنتش في أحسن حالاتي، كان ماسكني صداع هيفرتك نفوخي، كنت عايزه الحلقه تخلص وبس.
عزه : ألف سلامه عليك. أخذتى حاجه للصداع؟
شهرزاد : أخذت مسكن. بس معملش عايزه أعدي على الصيدليه آخذ حاجه لأني بجد مش قادره أفتح عيني.
عزه: مالك يا حبيبتي؟ إحكيلي.
شهرزاد : وديني الصيدليه.
عزه : حاضر
شهرزاد غمضت عينيها وماسكه دماغها. وصلت عزه الصيدليه.
عزه : أنزل أنا اجيب لك حاجه؟
شهرزاد : حانزل معاك.
نزلت أخذت أقوى مسكن ورجعوا العربيه.
عزه: على شكلك ده، أرجعك البيت. سمعتي الدكتور قال إيه ؟ ضغطك عالي.
شهرزاد : ماتزعليش مني يا عزه، بس بجد مش قادره.
عزه : إنتى بتقولي إيه، صحتك أهم حاجه، وانا شايفاكى مش قادره تفتحي عينيكى.
شهرزاد : إطلعي على البيت. أنا بجد تعبت من الضغط، البرنامج بقى بيأثر عليا بالسلب. أنا مش عايزه أتجوز، مش عايزه بجد. ومن غير إني مش حاسه بحاجه مع حسام، مش مرتاحه، مش عارفه، حاسه إني باظلمه معايا. بصي إمبارح جهزت نفسي وقلت أعيش الحب و أدي نفسي فرصه. طلعت وحضنته، ودا كان أول تقارب جسدي بينا، بس حسيت بالخوف وبعدت عنه بسرعه. طلعنا واتعشينا في مكان راقي، وجاب ليا برفيوم غالي وسلسله دهب، بس بجد ماكنتش مبسوطه. فى حاجه جوه مني مش قادره أفسرها.
عزه : بصي يا حبيبتي، فاهماكى وعارفه إنك مش متقبلاه ولا بتحبيه. إنتى كنتى مجبره عليه بوصيه والدك و ضغط طنط حكمت و عمك. مهما عمل إنتى مش شايفاه.
شهرزاد : معقوله إني مش بحبه ؟؟
عزه : أنا متأكده من كلامي، لو كنتى بتحبيه كانت عينيكى بتلمع، و كنتى هتتمني يقرب منك وتستعجلي تتجوزيه، بس إنتى لأ. وطالما مش مرتاحه، يبقى فيه حاجه غلط. إحساسك إن فيه حاجه في الموضوع. على فكره، إحنا الستات عندنا الحاسه السادسه، ماتشغليش بالك إطلعي اتوضي و صلي صلاة الاستخاره ونامي.
شهرزاد : ما تيجي تنامي معايا.
عزه : قولي إنك عايزه تخلصي من طنط حكمت، ماهي كلمتني.
شهرزاد : بكره أجازه، نامي عندي وبكره نطلع نتفسح طول اليوم.
عزه : ماشي يا جميل.
مع السلامه في حلقه جديده من سلسله راديو شهرزاد..
- يتبع الفصل التالي اضغط على ( رواية راديو شهرزاد) اسم الرواية