رواية موضوع عائلي الجزء(3) الفصل الخامس عشر 15 - بقلم رحاب القاضي
#موضوع_عائلي
“بيت الهنا”
_الحلقه الـ 15
ــــــــــــــــــــــــــــــــــــــــــــــــــــــ
وقالت:
يَكفيني منه قلبٌ صادقٌ
وحُبٌّ طاهرٌ، لا ينضبُ أبدًا.
ـــــــــــــــــــــــــــــــــــــــــــ
سيف بقلق
انا كنت هقولك يا ريناد بس كنت مستني اطمن عليكي عشان ابننا وو..
ريناد بسخريه
من سنتين مستني تطمن عليا عشان ابننا، سنتين بحالهم بتنام جنبي وعايش معايا وهي في حياتك واكيد قبل كده برضو كنتو تعرفو بعض يعني..
بص سيف للارض وهي دموعها نزلت بحزن وقالت
هو بس انا عندي سؤال واحد، انا ازاي هونت عليك كده هو انت يعني ما كنتش شايف اللي بعمله عشانك، ما كنتش شايف انا بضحي بأيه عشان ارضيك وعشان ما تحصلش بينا مشاكل يا سيف، قولتلي اوعي تفكري في شغل انا مراتي ما تشتغلش وافقت وما اشتغلتش وقولتلي بطلي تخرجي مع صحابك قولتلك حاضر وقولتلي صحابك دول مش كويسين وبيتك اهم بالوقت اللي بتضيعيه معاهم وخلتني قطعت علاقتي بيهم وقولت حاضر عشانك..
وبصت لشرين ببكاء وقالت
هي مش دي اللي سابتك زمان وراحت اتجوزت قريبها عشان تسافر معاه بره مصر وانا اللي وقفت جنبك ولا كنت بتنساها بيا بس بقي الموضوع قلب بجد واتدبست فيا صح؟..
وتابعت بنبره مهزوزه ومليانه حزن
قولي صح هي بتشتغل مش كده هي بتطبخلك بتزعقلها لما الاكل بيبقي نااقص ملح، لا لا الضوافر دي مش بتاعت. طبيخ ولا غسيل، طيب لو نسيت تصحيك في معاد شغلك بتتخانق معاها وتنكد عليها بتفضل تقولها انها نكديه علي طول، بتقولها ان حياتك معاها قرف ولا القرف ده كان معايا انا بس..
قرب منها سيف وقال بحزن
انا اسف عارف ان ما فيش مبرر بس انا ما كنتش هسيبك..
بعدت عنه وقالت بحده
ياريتك كنت سيبتني واتجوزتها بس انك تغفلني وتكدب عليا ده انا مش هقدر اسامحك عليه، كنت بتنكد عليا بالقصد عشان تسيب البيت وتبات بره كنت بتخليني افضل الليل كله اعيط عشان تلاقي حجه تروحلها صح، انا عرفت كل حاجه يا سيف وخلاص ما بقيتش البنت الصغيره العبيطه اللي هتصدقك تاني وتمشي وراااك..
سيف
طيب بصي اهدي دلوقتي وادخلي جوه وهي هتمشي وهنتكلم وكل حاجه هتتحل..
جات شرين تمشي بس ريناد قالتلها بسرعه
استني يا دكتوره شرين ده بيتك انتي وده جوزك انتي انا هسيبهولك ما بقتش عايزااه، ما بقيتش عايزه غير انه يطلقني…
سيف بجديه
انا مش هطلقك يا ريناد وبلاش افوره انا ما عملتش حاجه حرام انا اتجوزت علي سنة الله ورسوله..
ريناد بحده ودموع
سيبني امشي يا سيف بدل ما اكلم طارق وعمو عز يجو ياخدوني من هنا وتبقي مشكله، لو لسه عندك شوية احترام ليا خلي الموضوع يخلص من غير تجريح اكتر من كده..
_وسابته فعلا واخدت شنطتها وطلعت وقفلت الباب ومشيت، وهو قعد علي الكنبه اللي في الصاله وحط راسه بين ايديه وقعدت جنبيه شرين وقالت..
شرين
ليه عملنا كده يا سيف، بجد صعبت عليا انا ما كنتش عايزه اخدك منها ياريتني ما سمعت كلامك..
بصلها سيف بحده وقال
انتي السبب انتي اللي سبتيني وخلتيني ادخلها حياتي واتدبس فعلا في جوازه مش عايزها، انا عمري ما حبيتها اللي بينا دلوقتي ده عشره عشان البيت وتيا والبيبي اللي في بطنها، وعشان مقدر انها وقفت جنبي لما انتي سبتيني بس انا للاسف ما حبيتش غيرك ومش عارف ولا هعرف ابعد عنك..
شرين بحزن
مش هلومك علي الكلام ده، بس رجع مراتك حتي لو طلبت انك تطلقني اسمع كلامها بيتك وولادك والبنت اللي بتحبك بالطريقه دي اولي بيك، انا هتعود علي غيابك اكيد هتعود..
سيف بضيق
بطلي كلامك ده يا شرين انا لا هطلقك ولا هطلقها، وهخلي ماما بكره تروح تكلمها هي بنت خالي في الاول والاخر واهلها طيبين مش هتوصل للطلاق اكيد..
شرين
اوكي انا همشي بقي انت هتيجي معايا مش هينفع اسيبك لوحدك في الحاله دي وده مش بيتي انا مش هينفع اقعد هنا..
سيف
اوكي يلا بينا من هنا..
ــــــــــ #بقلم_الكاتبه_رحاب_القاضي ــــــــ
_وفي بيت خلف دخل هنااك عبدالله مع رجالته اللي مسكو الحراس بتوع خلف وكسرو الباب ودخلو، وكانت هنيه قاعده واول ما شافته قامت بسرعه وقالت بخوف..
هنيه
خبريه في حد يدخل بيت في حريم اكده يا ولد الاصول..
عبدالله
انا عشان ابن اصول هعتبرك ما اتكلمتيش عشان حقي مش عند الحريم، جوزك فين؟..
هنيه بخوف
فووق ناايم هو ماليهش صالح باللي حصل والله..
_ما ردش عليها عبدالله وطلع فوق وفتح اكتر من اوضه وما لقيش خلف لحد ما دخل اوضته وكان في سابع نومه فقرب منه وحاوط رقبته بأيديه الاتنين، ففنح خلف عينيه بسرعه واول ما شاف عبدالله قدامه ونظراته كلها شر اتنفض بخوف وحاول يفك ايديه من علي رقبته وهو بيقوله برجاء وصوت مخنوق..
خلف
احب علي يدك ما تقتلنيش يا عبدالله..
_بعد عنه عبدالله فقام خلف بسرعه وهو ماسك رقبته بألم وبيبص لعبدالله بخوف وجه يطلع بسرعه بس عبدالله كان الاسرع لما طلع سلاحه وقاله..
عبدالله
اوقف عندك ده لو مش عايزها تخلص بسرعه يا خلف..
وقف خلف وبصله برعب وقال
انا ما عملتش حاجه يا عبدالله والله ما قتلتله والله يا ولدي..
عبدالله بنبره غاضبه
ولدك.؟!.. مش محتاج تحلف انا متأكد انك انت اللي عملتها زي ما انا شايفك كده قدااامي يا خلف.. انا طول عمري بعاملك بالاصول وجدع وطيب معاك مش خوف منك لا كان احترام لعمر اللي انت قتلته وعشان ابويا علمني احترم الاكبر مني، بس من النهارده يا خلف تقدر تعتبر ان اللي كنت تعرفه واحد تاني غير عبدالله القاضي واللي هيتعامل معاك واحد لا يعرف اصول ولا شاف تربيه وما فيش اوسخ منه، وان ما خليتك تدفع تمن كل لحظة الم شافها عمر اللي فداني بموته ما يبقاش اسمي راجل..
خلف بقوه مصطنعه
خبريه يا ولد القاضي انت فاكر ايه هي البلد ما فيهااش قانون ده انا اا..
قاطعه عبدالله لما قال بحده
لا ما فيش ياخلف لو كان في قانون ما كانش زمانك نايم علي حرير وبيتك اكبر بيت في البلد، والناس الغلابه اللي بتاكل وبتشرب بالحلال حالها يصعب علي الكافر، والقانون اللي هيمشي بينا يا خلف بعد كده هو نفس القانون اللي خلاك توصل للي انت فيه دلوقتي،قانون الرشاوي والظلم واللعب من تحت الترابيزه،القانون اللي بيجي علي المظلوم وبيعليك انت واللي زيك..
خلف بغيظ
ماشي انت عايز ايه دلوقتي عايز تقتلني انا قدامك اهه..
شال عبدالله سلاحه تاني وقال
لا مش بالسرعه دي اومال مين اللي هزله واطفي ناري بجوعه وفقره وهي بيشحت هو وعياله وكل اللي ليه..
_بصله خلف بخوف وعبدالله طلع علي موبيله صورة شعبان ابن خلف وهو متكتف علي الارض ووشه كله دم، بصله خلف بصدمه وقال بخوف حقيقي..
خلف
لااه يا عبدالله والله العظيم ولدي ماليهش صالح اوعي تعمل فيه حاجه والله انا اللي اتفقت مع الواد يروح يقتلك ليلة دخلتك عشان اخلص منك واكسب الانتخابات ولدي ماليهش صالح والله…
عبدالله بجمود
بكره تروح وتتنازل عن الترشيح وانا قبلك هكون متنازل برضو وبعدها هرجعلك ولدك غير كده يبقي تترحم عليه..
خلف بعدم فهم
كيف يعني انت هتتنازل وانا كمان اومال مين اللي هياخدها..
عبدالله بحقد
اللي ياخده بقي، اصل انا عايز افضي عشان اللي جاي، وعايزك انت كمان تفضي عشان تقابل رد فعلي علي قتلك لاخويا وصاحب عمري ووجعي عليه مش بالساهل يا خلف ان ما حرقت قلبك بدل المره مليون ما ابقاش انا..
وجه يطلع بس بصله وقال بجمود
انا مش بحب اكرر كلامي وانت اكيد سمعته يا خلف مستني خبر الانسحاب يا خلف بيه…
_قال كلامه وطلع وخلف قعد علي السرير وهو حاطط ايده علي رقبته وكانت ملامحه بتعبر عن خوفه ورعبه من اللي حصل، ودخلت عنده هنيه وقالت وهي بتندب علي وشها..
هنيه
عجبك اكده اللي حصل يا خلف، هيفيدك بأيه الكرسي اللي عامل عليه الحزن ده كله، هيفيد بأيه بعد ما كسبت عداوة عبدالله القاضي، وشعبان بكلمه علي المحمول ما ايردش عليا، يا خوفي ليكون عمل فيه حاجه..
خلف بحده
همليني لحااالي روحي ولولي في حته تاني انا ما ناقصش…
ــــــــــ #بقلم_الكاتبه_رحاب_القاضي ــــــــ
_وفي المكان اللي بتقعد فيه رضوي ديما مع حسن علي النيل كانت قااعده لوحدها وهي بتعيط، وفجأه جه يوسف عندها وقال بقلق..
يوسف
في ايه يا رضوي مالك، كلمتيني وانتي بتعيطي وقعتي قلبي..
مسحت دموعها وبصتله بجزن وقالت
اقعد وما تتكلمش…
يوسف بعد فهم
يا بنتي في ايه مالك..
رضوي بحده ودموع
ما تسمع الكلام بقي ما تتعبنيش انت كمان..
يوسف
خلاص هقعد اهو..
_قعد جنبيها وهو ساكت وهي لتعيط وباصه للمايه قدامها بحزن وهو بصلها بقلق وقال..
يوسف
طيب هو سؤال واحد بس، انتي بتعيطي عشان باباكي ولا عشان حاجه تانيه..
ردت عليه ببكاء وقالت
لا مش عشان بابا الحمد لله بابا بقي كويس، كل الحكايه اني بقالي سنين عايشه في خازوق كبير..
يوسف بسخريه
ايه طلع متجوز ولا ايه؟..
بصتله رضوي بحده وقالت
ايه ده انت كنت تعرف ومخبي عليا ده انت يومك اسود كلكم شبه بعض كلكم حيوانات كلكم مصطفي ابو حجر..
يوسف بصدمه
ايه الطرش اللي في وشي ده انا بخمن كنت وحجر ايه وظلط مين..
وتابع بابتسامه بخبيثه
بس استني هو طلع متجوز بجد؟..
رضوي بأحراج
ايوه طلع متجوز وكمان عنده بنت لا والبارد مسميها رضوي..
يوسف بفرحه كبيره
يا بركة دعاكي يا ست الحبايب، والله انتي من نصيبي خلصاانه وحياة امك ما حد هيتجوزك غيري..
بصتله بغيظ وقالت
انت فرحان فيا وده وقت تشقطني فيه، قوم امشي يا يوسف انا غلطاانه اني كلمتك تيجي تهون عليا..
يوسف بنبره كلها سعاده
استني خلاص مش ههزر تاني هتكلم بجد.، قوليلي انتي ليه كلمتيني انا بالذاات يلا فرحيني..
رضوي بخبث
اهو مشيت ورا مثل بيقول قرد يسليني ولا غزال يطلع عيني..
يوسف بهدوء
قرد قرد المهم تبقي مبسوطه وانتي معايا..
ابتسمت غصب عنها وقالت
يا ابني سيبني اكتئب شويه والنبي، ده. طلع متجوز يا يوسف مرااته جاتلي البيت بتقولي اتجوزها اصلا قبل ما يسافر عشان باباها يساعده يسافر عشان كده هو كان رافض يتجوزني وياخدني معاه، باعني عشان حلمه وسابني متعلقه جنبيه وهو اتجوز وخلف، قدر يتجوز واحده غيري وانا كنت حتي النظره لغيره محرماها علي نفسي رفضت ناس احسن منه بكتير عشان مستنيااه كبرت وبقيت بسمع كلام زي الزفت اني خلاص هبور ومش هتجوز، انا حتي بغبائي كنت مستنيااه بعد ما رجع يجي ويصالحني قدام الكل وكنت هسامحه..
يوسف بحزن
كمتي هتسامحيه بجد وهترجعيله حتي بعد ااا بعد ما اعترفتلك بحبي ليكي؟..
نزلت دموعها وقالت بحزن.
للاسف ايوه يا يوسف، بس طلع كداااب واناني ونفسي اعمل اي جاجه انتقم منه فيها..
.
يوسف كتم حزنه وابتسم بهدوء وقال
وانا معاكي انتي بس اسمعي كلامي في اللي هقولك عليه وهتنتقمي منه اشد انتقااام.د..
رضوي بحماااس
بجد طيب ازاي قول بسرعه..
يوسف بخبث
قوليلي الاول اشمعنا انا اللي كلمتيه وانتي مدااايقه،هو انا مهم اووي كده بالنسبالك؟..
رضوي بندوء
بص هو المكان ده بتاعي انا وبابا انت تاني حد بعد بابا يجي معايا هنا بعد. عمو عز، بقالنا اربع سنين بنيجي هنا بس والمره دي جيت وانا لوحدي ولما فكرت في حد. يشاركني اللحظه دي مالقيتش غيرك بصراحه ما اعرفش ليه مع ان بينا ماضي زي الزفت انا وانت..
يوسف
ما بنقولش كده يا رضوي زفت ايه بس دي كانت بدايه ننساها ونبدأ من النهارده، قوليلي بس من الاول هو طلع متجوز ازاي؟…
وفضل يضحك وقال
هههههههههه انا مش شمتان بس عشان اعرف افكر في طريقه تنتنقمي بيها هههههههه مش قادر خازوق معتبر بصراحه..
رضوي بغيظ
قوم من هنا يالااا بدل ما اقل منك..
يوسف بضحك
هههههههه كنتي اتشطري عليه هو…
رضوي بغيظ ودموع
بس بقي يا يوسف والله هعيط تاني..
كتم ضحكته بصعوبه وقال
خلاص سكت اهو، انا بقي هقولك تعملي ايه بس تاخدي مني وما تراجعيش ورايا…
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن رجع طارق من بره وقبل ما يدخل بيتهم طلع عز من شقته وقال بضيق..
عز
ابوك عامل ايه؟..
طارق
خضيتني يا عز اتنحنح كده وانت طالع..
عز ضربه علي كتفه وقال
اتلمم يا زفت ايه اتنحنح دي، ورد عليا ابوك كويس؟..
طارق
زي الفل هيقعد بس حبه في المستشفي وهيطلع بس الدكتور قالي انه بعد كده صحته مش هتكون زي الاول، يعني شغل بابا اللي هو 8 سعات ده ما ينفعش…
عز
ما تقلقش انا هظبطله حاجه كده تبقي ملكه ويشتغل فيها براحته.
طارق
لييه مش مخلف راجل هو، انا ابويا يقعد ويحط رجل علي رجل وانا اللي هشيل كل حاجه مكانه..
عز بحده
وابوك ما بقااش عاجز عشان نقوله يقعد عاطل، ومش عجوز هو عشان نقعده برضو في السن ده في البيت ابوك يادوب 50 سنه فاضله عشر سنين عشان يطلع معاش هو بس خلفته الكتيره كبرته قبل معاده….
طارق
طيب اللي حصل دلوقتي يا عمي نتعبه اكتر ونقوله ارجع اشتغل ولا نريحه..
عز
خلينا بعدين نتكلم في الموضوع ده وكلنا معاه ومش هنسيبه، ادخل انت صح شوف الصايعه اختك اللي طلعت من شويه وما رجعتش لدلوقتي والتانيه اللي نكدت علي سيف وجابت شنطها وجات شيل يا حبيبي زي ما انت عايز اهو..
طارق بضيق
مين دي اللي طلعت ولسه ما رجعتش اوعي تقول رضوي.
عز
ايوه هي وبكلمها مش بترد وبعتتلي رساله قالتلي شويه وجايه..شيل بقي يا راجل البيت وانا داخل اناام..
طارق
راجل البيت ايه والهانم بره لدلوقتي ده يومها اسود..
_ودخل بيتهم وقفل الباب ولقي هنا واقفه قدامه في الصاله وهي لابسه بجامه طويله وشايله تيا علي ايدها بتنيم فيها..
طارق
بتعملي ايه انتي كمان و..
قاطعته بسرعه وقالت
ششش اسكت والنبي انا ما صدقت انها تنام….
طارق بصوت واطي
هي امها فين اصلا؟….
هنا بنفس صوتها الواطي
شكلها تعباان اووي واخدت علاج كده شكله منوم ونامت…
طارق بقلق
منوم.. ريناد بتاخد منوم ليه؟..
هنا
هو انا استغربت انها اخدته ونامت علي طول، المهم انا هاخد تيا تنام جنبي.
طارق
طيب الست رضوي هانم فين؟..
هنا
هي جات واحده كده هشكه وقعدت معاها شويه وو..
طارق
استني مين هشكه دي ولا ده وصف؟..
هنا
قصدي حلوه يعني وجامده كده نافخه فوق وتحت..
ابتسم هو بهدوء وهي قالت
وقعدت معاها بتاع خمس دقايق كده ومشيت وبعدها اختك فضلت متنحه كده ومصدومه وبعدين قالتلي اقولك لو سألت عليها انها راحت تجيب ورق مهم من واحده صاحبتها في الشغل.
طارق
اممم طيب انا جعان في ايه اكل..
هنا
وانا مالي ده بيتكم كمان انا اللي هعزم عليك، وسع كده من قداامي..
طارق
لا استني. انا واقع في عرضك تعالي اعمليلي اي حاجه اكلها انا ما بعرفش حتي اعمل شاي..
هنا بغيظ
بتاع ايه انا اعملك اكل، وبعدين انا مش طايقه نفسي كفايه بنت اختك اللي علي ايدي دي وكمان اجهزلك اكل..
طارق
علي فكره في ستات متجوزين بيعملو كده عادي بيبقي معاهم اطفال وبيعملو اكل وبيعملو كل حاجه..
هنا بحده
انت قولت اهو متجوزين انما انا لسه 17 سنه وعمري ما شلت طفله بالحجم ده وكمان انا نفسيتي متدمره انا امي ماتت من اقل من شهرين واهو ابويا انتو ايه ما بتحسوش ولا عشان ما بعرفش ابين حزني واقفش زيكم هتفتكروني حلوفه..
طارق
خلاص يا هنا روحي نامي انا هجهز اي حاجه اكلها..
.
هنا
في بيتزا في التلاجه عندك، تصبح علي خير..
طارق
وانتي من اهل الخير يا هنا..
دخلت هنا اوضتها وطلع طارق موبيله وقال في رساله لرضوي
ردي يا زفته انتي واخلصي وتعالي علي البيت بسرعه احسنلك..
_في الوقت ده وقفت رضوي بعربيتها قداام البيت ونزلت منها وهي بتتكلم في الفون وبصت ليوسف اللي كان ماشي وراها بعربيته وبيكلمها في الفون وقالت..
رضوي
اديني اهو وصلت اقفل بقي وامشي..
يوسف
حاضر وبلاش بقي خروج بالليل ده انا لو يارا اختي عملتها كنت نفختها..
رضوي
لا انت تمشي كلامك علي اختك براحتك هتمشي كلامك عليا انا ليه؟..
يوسف بخبث
عشان حبيبتي..
رضوي بتوتر
اتلمم بقي وبعدين مش وقته يا يوسف كلامك ده..
اتنهد بضيق وقال
امم عارف المهم اعملي زي ما قولتلك وخلي بالك من نفسك..
رضوي
هو انا رايحه احااارب ايه خلي بالك من نفسك دي، علي فكره انا ماليش في التلزيق ده..
يوسف بغيظ
يا بت ده انا كل البنات اللي عرفتهم كانو يتمنو ربع المعامله دي وانتي تقوليلي تلزيق تعبتيني معاااكي يا شربيني..
ابتسمت بهدوء وقالت
طيب خلاص امشي بقي ونتقابل بكره في الشغل تصبح علي خير..
قفلت معاه وهو بصلها وهي طالعه بيتهم وقال بهدوء
وانتي من اهلي ان شاء الله يا رضوي، ما انا والله العظيم ما هسيبك..
_وطلعت رضوي بيتهم واول ما دخلت لقيت طارق قااعد بياكل ولما شافها قال بعصبيه..
طارق
كنتي فين يا بت انتي؟..
رضوي
كنت بجيب حاجه مهمه تبع الشغل، في ايه يا طارق اتعدل يا سكر انا اختك الكبيره ووطي صوتك وانت بتكلمني..
طارق بحده
انا اتكلم براحتي ويا كبيره يا عاقله في بنت محترمه ترجع البيت بعد الساعه 12..
رضوي
مش هتتكرر تاني يا طارق ممكن تسيبني ادخل انااام..
طارق بضيق
طيب في ايه مالك كده شكلك مش تمام واختك التانيه مالها هنا بتقول انها تعباانه واخدت منوم..
رضوي بصدمه
اييه منوم ايه دي حامل يعني ممكن البرشاام ده يأثر علي ابنها اللي في بطنها..
طارق بضيق
والله انا صعبانه عليا من اللي بتعمله في نفسها ده وفي جوزها ما كلنا عارفين ان سيف بيحبها ومستحيل يخونها زي ما هي فاكره..
رضوي
المشكله ان ماما مش موجوده دلوقتي هي وبابا، هبقي اكلمها انا بس بكره بقي لاني هموت وانااام وعندي شغل الصبح..
_وسابته ودخلت اوضتها وهو كمل اكله وطلعت روفان من اوضتها وقعدت حنبيه وقالتله بحزن..
روفان
طارق..
طارق وهو بيقلب في موبيله
ايه يا روفان؟..
روفان بدموع
هما بابا وماما هيجو امتي البيت وحش من غيرهم..
طارق بحزن
معاكي حق بس انتي عندك مدرسه الصبح ولازم تنامي..
روفان
طيب قول لرضوي تروح تنام عند ريناد وانا انام عند هنا..
طارق
اشمعنا يعني هتنامي عند هنا ما انتي عندك ريناد وروز جوه..
روفان بصوت واطي
اصل انا سمعت في المسلسل الهندي اللي بتتفرج عليه ماما انك كل ما تقعد مع حد شكله حلو بتبقي حلو زيه، وهنا حلوه وانا عايزه ابقي حلوه..
ضحك بهدوء ورد عليها
طيب مش مهم تنامي جنب هنا هاخدك تنامي جنبي النهارده..
روفان بصتله بضيق وقالت
وانت فاكر نفسك كده شكلك حلوو؟..
طارق بغيظ
غوري نااامي يا بت انتي عند اخواتك..
كانت لسه هتتكلم بس قالها بحده
ولا كلمه غوري يا رخمه..
_وخلص اكل وبعدين راااح ناام في اوضته…
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي رجع بالليل متأخر واول ما دخل اوضته كانت شهد قااعده مستنياااه..
يونس بجمود
مش عايز اسمع صوتك خااالص يا شهد، وتعباان وعايز انام..
شهد
انت كنت فين دلوقتي؟..
يونس بحده
كنت مكان ما كنت مالكيش دعوه، مش انتي قاعده معايا عشان ولادك يبقي مالكيش دعوه بأي حاجه اعملها بعد كده..
شهد بغيظ
حاضر وانت كمان مالكش دعوه بأي حاجه بعملها بعد كده، ويارا مش هتبعد عن صاحبتها ولا هتسيب مدرستها يا يونس ، وقعدتي في البيت ده كوم وانك تيجي علي يارا بالذاات ده كوم تاني، مش هسمحلك تعقدها وتعمل فيها زي ما عملت فيا زمان..
قام يونس من علي الكنبه ووقف قدامها وقال بحده
دي بنتي انتي بتقولي ايه، لا انتي ولا حد في الدنيا بيخااف عليها قد ما انا بخااف عليها وعايز مصلحتها..
شهد بغضب
مصلحة اي انك تبعدها عن صاحبتها الوحيده، بنتك في سنها ده ما عندهااش غير صاحبه واحده ما بتعرفش تتعامل مع حد غريب لو طلعت لوحدها هيضحك عليها، بنتك عشان خايف عليها تروح تخطبها وهي لسه عيله صغيره لابن اخوك اللي قدها في العمر مرتين كفايه جهل وتخلف بقي..
يونس بعصبيه
انا متخلف وجااهل وبنتي مش هتتجوز غير اللي انا عايزه ومش هتتعلم غير بالطريقه اللي انا عايزها وانتي لو اتكلمتي ورحمة ابويا يا شهد ما هخليكي تشوفيها في عمرك كله تاني وانتي عارفه اني ممكن اعمل كده كويس بأي طريقه، والكلام خلص كده ومش عايز اسمع صوتك تاني..
_قال كلامه وسابها ورااح ناام علي السرير، وهي طلعت وقفت في البلكونه وهي بتعيط وقالت لنفسها بسخريه.
شهد
عادته ولا هيغيرها غلطان وبجح كمان يا يونس، بس مش هخليك تتحكم في يارا ولا تعقدها بتفكيرك ده وهتشوف انا هعمل ايه…
ــــــــــ #بقلم_الكاتبه_رحاب_القاضي ــــــــ
_وتاني يوم في بيت الاستاذ حسن كانت ريناد قااعده هي وهنا بيفطرو وهنا شايله تياا وبتأكلها بهدوء..
ريناد ابتسمت وقالتلها
ده انا اخواتي مش بيعملو ربع اللي عملتيه ده يا هنا مجهزالي الفطار وكمان اهتميتي بتيا من امبارح..
هنا
عادي انتي تعباانه ويبقي ما عنديش دم لو سيبتك لوحدك، وكمان رضوي مشغوله في روفان وروز عشان يروحو المدرسه..
ريناد
عندك. اختي روان اهو جوزها مسافر و مش موجود مش تيجي تطمن علينا هنا لا راحت لبابا زي الغريبه والله واعلم فين وبتعمل ايه..
هنا
بصراحه كده الله يكون في عونها واكيد نفسيتها وحشه بسبب اللي حصل في فرحها..
ريناد
بس كويس انك معايا وقاعده معانا انا ما بحبش اقعد لوحدي وانا زعلانه..
ورن موبيلها في الوقت ده برقم عمها عز فردت عليه وقالت
الو صباح الفل يا زيزو تعالي افطر معانا..
عز بجمود
تعالي يا ريناد حماتك هنا عندي وعايزااكي..
ريناد بدموع
لو سمحت يا عمو انا مش عايزه اقابل حد دلوقتي..
عز بجديه
هي البجحه عمتك قالتلي كل حاجه وانا بقولك تعالي وما تخافيش دا هي وابنها اللي يخافو تعالي يلا انا مستنيكي يلااا..
قغلت معاه ريناد وقالت لهنا
هنا معلش خليكي مع تيا انا رايحه عند عمي شويه وجايه..
هنا بهدوء
حاضر ماشي ما تقلقيش عليها..
_ابتسمت ريناد بهدوء وراحت عند عز ودخلت علي طول لان الباب مفتوح واتصدمت اول ما لقيت ليلي قاعده مع معاهم..
عز
تعالي يا ريناد ما تخفيش احنا بقينا نعرف كل حاجه..
ليلي بحده
يعني ايه عارفه من زمان وساكته..
ريناد بدموع
ما عشان فرح روان يا ماما كان يتم علي خير..
ليلي بعصبيه
واهو فرح اختك جه وخلص وكان هيخلص برضو، ايه اللي دخل دي في دي؟..
لمياء بتوتر
انا بقول ما نكبرش الموضوع يا ليلي يا حبيبتي، وانا والله هخليه يطلق الزفته اللي اتجوزها دي، هي تيجي ايه في بنت اخويا حبيبتي وكمان عشان حسن اللي تعبان ده..
ليلي بحده
ومن امتي الرقه دي يا روح امك انتي كمان، ما كنتي بتمسكي في اقل غلطه للبت وتنكدي عليها انتي وابنك، دلوقتي جايه تتكلمي بالعقل بعد اللي عملو ابنك فيها ده..
قامت لمياء اتخبت ورا عز اللي قال بقلق
ليلي اهدي وانا هروح اديه بالجزمه، هو احنا نقدر علي زعل ريناد برضو..
ليلي بغضب مسحت دموع ريناد وقالت
ومين قالك بقي انها زعلانه، بطلي عياط اوعي دموعك دي تنزل علي الواطي ابن الواطيه ده، ولو كان ابوكي تعبان فامك موجوده وانا هعرف ازاي اخليه يندم علي اللحظه اللي فكر يوجع قلب بنت ليلي فيها..
_قالت كلامها واخدت شنطتها وخرجت بره البيت تحت خوف ريناد ولمياء اللي قالت..
لمياء
عز الحقها انا خايفه علي ابني..
عز بخبث
لا لا ليلي عاقله ومش هتعمل حاجه وسيف هيعرف يحل الموقف..
قعدت لمياء جنب ريناد وقالت
ينفع كده. يا ريناد، الموضوع مش مستاهل..
ريناد بسخريه
اصله دااس علي صباع رجلي بالغلط ده خاني وكدب عليا، وانا عندي اموت ولا اني اسامحه ولا ارجعله، بعد اذنك يا عمتي لا قصدي يا حماتي..
_سابتهم ريناد ومشيت لشقة باباها وعز قال لـ لمياء بغيظ..
عزالدين
جاتك. نيله في ربايتك يا خايبه، اشربي بقي انتي وابنك..
لمياء بغيظ
هيجيبه من بره طالع لخاله يا اخويا..
عز بحده
طيب اطلعي بره يا لميااء من شقتي، ده انتي وليه تخنق انا ما حدش عقدني في الجواز غيرك باللي كنتي عملاه في جوزك وخلتيه انتحر ومات ناقص عمر يا وش الفقر..
ـــــــــــــــــــــــ
_وبعد شويه في الشركه بتاعت سيف وعبدالله اللي ماسكها سيف، دخلت ليلي ووقفت في نص الشركه وقالت بعصبيه وصوت عالي..
ليلي
هووو فين انت يا زفت؟..
قرب منها موظف وقال
لو سمحتي يا مدام دي شركه محترمه..
ليلي بحده
طيب اوعي يا محترم من قدااامي عشان ما اقلش منك، انت يا زفت الطين ياللي اسمك سيف..
_طلع سيف من مكتبه فوق واتصدم من اللي بتعمله ونزل بسرعه عندها وقال بقلق..
سيف
اهدي يا طنط ليلي ما ينفعش كده تعالي نتكلم فوق..
مسكته ليلي من هدومه وقالت بحده
بقي انت يا ابن الجزمه تعمل كده في بنتي، تخونها وتتجوز عليها وتبهدلها وهي علي وش ولاده..
سيف بص للموظفين بأحراج وقالها
يا طنط مش هينفع كده نتكلم هنا..
ليلي بحده
قال بتخاف اووي يا واد يا كدااب ده انا كنت باجي علي بنتي واغصبها ترجعلك واقول لااا الواد متربي وبنتي غلطاانه تقوم تعمل كده، بس الحق علينا اننا رفضنا نجوزها لسيد سيدك وروحنا حطينا ايدينا في الزباله وطلعنااك وجوزنهالك كمان يا زباله..
سيف بغضب
لو سمحتي يا طنط ليلي ما يصحش كده وياريت تتفضلي معايا فوق يا تمشي..
ليلي بعصبيه
معاك حق هو ما يصحش كده انت الكلام معاك مش هيخليني اهدي..
_وميلت علي الارض وقلعت الجزمه بتاعتها وضربته بيها كذا ضربه قدام الموظفين اللي كانو مصدومين من اللي بيحصل وليلي بتضرب فيه…
جري سيف منها وقال بخوف
انتو واقفين تتفرجو ما تحشوها عني..
في الوقت ده دخلت شرين الشركه وقالت بقلق
في ايه بيحصل هنا، سيف مالك يا بيبي؟..
سيف بخوف
وقتك ده ايه اللي جابك..
شمرت ليلي اكمام بلوزتها وقالت بخبث
يا اهلا وسهلا بالعروسه تعالي اما اباركلك بقي يا خطافة الرجاله..
ــــــــــ #بقلم_الكاتبه_رحاب_القاضي ــــــــ
_وفي الوقت ده في شركة الصاوي كان يزن قااعد في مكتبه وبيقلب في صوره هو وسدره وعيونه ملياانه دموع، ودخل يوسف عنده واول ما شافه يزن مسح دموعه بسرعه وقال..
يزن
انت ايه يا ابني مش تخبط الاول..
يوسف بهدوء
هو انا داخل علي حد غريب، وكنت جاي اقولك المستثمر جاي امتي عشان نرتب امورنا واخد رئيك في كام حاجه بالنيابه عن رضوي وكده..
يزن بجمود
طيب تعالي وريني، والمستثمر جااي بعد شهر شهرين كده تكونو انجزتو في المشروع اكتر من كده..
قعد يوسف قدامه وقاله بنبره حزينه
لو عايز ترجع سدره انا هساعدك وعادي يعني سدره برضو قريبتنا وو..
يزن بحده
مستحيل خلصت الحكايه دي خلاص يا يوسف وانا مش زعلان عليها عادي اصلا.
يوسف
بلاش تكابر يا يزن ده انت بتحبها من طفولتك يا اخي، انا فاكر كويس لهفتك عليها لما كانت تيجي عندنا مع عمو يوسف وطنط بطه زمان و..
يزن بضيق
وطلعت واحده كداابه وخاينه لثقتي فيها، انا ضحيت كتير وسامحتها علي مليون غلطه بس المره دي هي جات عليا بزياااده وما فيش راجل هيقبل علي نفسه اللي هي بتعمله ده، فانا لو هعمل حاجه دلوقتي هيبقي اني انساها وهنجح في كده وهتشوف وهتجوز ست ستها كمان واحده كده تكون محترمه وبنت نااس وتعرف تقدرني وتكون قد ثقتي..
جه يتكلم يوسف بس يزن قال بجديه
اقفل الموضوع ده خلاص وخلينا في شغلنا يلااا..
_وبعد شويه خلص يوسف شغل مع يزن وكان راجع تاني عند شغله مع رضوي، واول ما اتفتح الاسانسير شاف عائشه قدامه اللي اول ما شافته اتنهدت بضيق وبصت للناحيه التانيه..
طلع يوسف من الاسانسير وقال بهدوء
ازيك يا عائشه عامله ايه؟..
ما ردتش عليه وجات تمشي من قدامه بس وقف قدامها وقال
انا اسف انا ماليش عين والله اشوفك ولا اتكلم معاكي بعد اللي حصل..
ردت عليه بحده وقالت
لا عادي ده اللي كان متوقع من واحد زيك بس انا اللي كنت بكدب نفسي..
يوسف بجديه
هيجي وقت وهتعرفي انا بعدت عشان ما اتعبكيش معايا يا عائشه، عشان ما تتظلميش معايا…
عائشه بدموع
انت تعبتني اصلا بكدبك عليا في كل مره كنت بتقولي انك بتحبني فيها تعبتني، وفي كل مره بشوف نظرة الشفقه في عيون اهلي وصحابي بسبب اللي عملته فيا بتعب، وفي الاخر جاي تقولي كلمتين كنت بتقولهم لكل واحده تتسلي بيها شويه ولما تحب تخلع تقولهم، للاسف شوفتك علي حقيقتك بعد سنين كنت مغفله فيها، بس برضو ارجع واقول الحمد لله اهو اتعلمت درس عمري في حياتي ما هنسااه..
بص للارض بأحراج وجات تمشي بس رجعت تاني وقالت بهدوء
قولي بس معلش هو انت ايه اللي خلاك تسيبني دلوقتي ليه مش زمان، وياريت تكون المره دي صريح معايا..
اتنهد بضيق وقال
بلاش هتزعلي اكتر..
عائشه
ما بقيتش تفرق اصلا..
يوسف بجمود
حبيت بجد قابلت واحده حسيت معاها بحاجات عمري ما حسيتها لا معاكي ولا مع اي واحده تانيه، كنت هترضي اتجوزك وانا مشاعري راحت لواحده تانيه..
_بصتله من فوق لتحت بسخريه وسابته وطلعت الاسانسير، وهو اتنهد بضيق ومشي راح شغله واول ما وصل لقي رضوي واقفه مع العمال فبصلها بحزن وقال لنفسه بسخريه..
يوسف
يا خوفي بعد كل ده ما تبقيش من نصيبي يا رضوي..
وفجأه وقفت جنبيه نورا وقالت ببكاء
يوسف انا مش عايزه اشتغل هنا انا ماشيه..
يوسف بفزع
في ايه يا وليه خضتيني…
نورا ببكاء
محمود واسلام وميلاد دول انا مش عايزه اشتغل معاهم، هما اصلا بيحقدو عليا عشان انا كنت بطلع الاولي وما كانوش عارفين يوصلولي..
وقفت رضوي معاهم وقالت
يوسف روح اعمل.. ايه ده مالك يا نورا..
يوسف
البغال التلاته رخمو عليها وعايزه تسيب الشغل..
رضوي بحده
في ايه يا بت انتي ما تنشفي كده هو كل ما حد.يقولك.كلمه تعيطي، وبعدين قوليلي عملولك ايه وانا ههزأهم ليكي دلوقتي..
يوسف
اهدي يا شبح اعصاابك مش كده انا راجل وهتعامل معاهم..
رضوي
والنبي اتنيل انت كمان اسكت دول كانو زي الفل ما حدش خربهم غيرك، قولي يا نورا عملو ايه؟..
نورا بأحراج ودموع
بيتنمرو عليا عشان قصيره، وكنا عايزين نقيس المتر راح اسلام وقفني انا وقال المتر ونص اهو نقيس بيها اسهل وهما فضلو يضحكو..
كتم يوسف ضحكته ورضوي قالت بغيظ
تعالي معايا يا نورا..
وراحت رضوي مع نورا ووقفت قدام البغال التلاته وقالت
سيبو اللي في ايدكم كده يا شباب وركزو معايا..
ميلاد
خير يا بشمهندسه؟..
رضوي بجديه
جو الهرجله اللي انتو فيه ده مش شغل رجاله ومهندسين قد المسؤليه ده شغل عيال صغيره..
اسلام بص لنورا بحده وقال
لحقتي تسخنيها علينا يا شبر ونص انتي..
رضوي بحده
اخرس يالااا والشبر ونص دي عملت شغل طول الفتره اللي عدت دي انتو التلاته ما عملتوش نصه، وانا هخليها تبقي المشرفه عليكم انتو التلاته واقل غلطه هتيجي منها لاي واحد فيكم هقوله بره مالكش شغل معايا مفهوم يا بشمهندس منك ليه؟..
بصولها هما التلاته بأحترام وقالو
مفهوم..
ميلاد بحزن
بس علي فكره انا يدوب ضحكت بس هما اللي اتريقو عليها..
رضوي
مش هكرر كلامي تاني يا ميلاااد، يلا كل واحد. يشوف شغله..
وسابتهم وراحت ليوسف وقالت
ها عملت ايه مع البشمهندس يزن..
يوسف بأبتسامه واسعه
قولي يزن عادي ده هيبقي سلفك..
رضوي بحده
ايه اللي انت بتقوله ده..
يوسف بسرعه قال
عجبته التصميمات وقال نبدأ فالمرحله التالته والمستثمر هيجي بعد شهر..
رضوي
طيب تمام عايزين بقي نركز يا يوسف لان دي اهم مرحله في الانشااء كله..
يوسف
تمام هنشتغل عليها انا وانتي سوا مش كده..
رضوي بصدمه
يا نهار ابوك اسود يا ابن الجزمه..
يوسف
في ايه يا سكر انتي ما تحترمي نفسك..
رضوي بدموع
مش انت بص يا يوسف انا همش دلوقتي ونبقي نتقابل بالليل اليومين دول في اي مكان نخلص الشغل ده عشان دلوقتي هروح لبابا وكمان..
. يوسف بقلق
اهدي طيب وقوليلي في ايه، الزفت الخازوق بتاعك ده عمل حاجه جديده؟..
رضوي بحزن ودموع
لا مش هو بس جوز اختي طلع الحيوان متجوز عليها، عشان تصدق ان الرجاله كلهم خاينين..
يوسف بغيظ
حبكت يتجوز عليها دلوقتي علي وشي، رضوي انا والله مش وحش انا بحبك بجد..
اتوترت رضوي وقالت
هو ده وقته يا يوسف الله..
يوسف بغيظ
اومال امتي وقته قوليلي علي وقت كده اعرف اتكلم معاكي براحتي واجيب اهلي واجي اخطبك..
رضوي بتوتر وصدمه
ايه تخطبني انا؟!…
ابتسم يوسف وقال
ايوه طبعا هخطبك وهتجوز وهنخلف صبيان وبنات وهنبقي احلي زوجين في الدنيا..
رضوي بضيق
ده اللي هو ازاي، بص اولا انا اكبر منك وكمان انا طالعه من حاله عاطفيه صعبه ولسه كمان ما طلعتش منها، وبابا تعبان في المستشفي وقريبنا اتقتل وكمان عم سيد مات واختي جوزها اتجوز عليها فلو بورااك بتاع تركيا بنفسه جه وعرض عليا الجواز دلوقتي هرفض..
يوسف
استني استني انتي بتقارنيني انا بواحد بفخاااد من تركيا..
رضوي
اييه؟
يوسف
مش انتي بتقولي بـ ورااك والواراك هي الفخاد..
ضحكت غضب عنها وقالت
هههههه وربنا فصلان انا ماشيه يا يوسف و..
يوسف
هنأجل الكلام في الموضوع ده بس مش هيتقفل يا رضوي اتفقنا..
رضوي بتوتر
ان شاء الله يلا باي باي..
_مشيت رضوي ويوسف كان بيبصلها وهو مبتسم ووقف جنبيه ميلاد وقال..
ميلاد
بتحبها مش كده؟
يوسف بتنهيده
اااه اووي بحبها اووي..
ميلاد
كلنا والله..
يوسف بحده
هو ايه اللي كلنا علي شغلك يا ميلااااد يلااا يا بابا…
. ــــــــــ #بقلم_الكاتبه_رحاب_القاضي ــــــــ
_وفي بيت عبدالله القاضي دخل عنده خلف لوحده وهو بيحاول يداري خوفه وكان عبدالله قاعد مع حمدي وفي ايده ورق..
خلف
انسحبت يا ولد القاضي، وينه ولدي؟.
بصله عبدالله بجمود وقال
حمدي خلي الرجاله تجيبله ولده، وقول للراجاله تبدأ في الشغل اللي اتفقنا عليه..
حمدي قام وقال
امر جنابك..
طلع حمدي وخلف بص لعبدالله بخوف وقال
ما كنتش اقصد عمر وانت عارف اني ما كنتش عايز اموت ولد اختي..
عبدالله بجمود
انت منحوس يا خلف عشان لو كانت جات فيا كنت هتخلص مني وماكانش حد هيدور ياخد حقي عمر غلبااان ومش بتاع مشاكل كان هيدور يجيب حقي بالقانون، وكمال اخويا مالوش دعوه بحاجه ومش بيفرق معاه حد، بس انت حرفياً منحوس لانها جات في اقرب حد ليا وخليتني اتحول من واحد طيب وعايش بالاصول للي انت شايفه ده..
جه حمدي وقال
شعبان بره يا عبدالله بيه..
_طلع خلف بسرعه واتصدم اول ما شاف ابنه اللي كان وشه كله كدمات ومتكتف بهدوومه الداخليه، جري عليه خلف وفكه بسرعه واخده وخلاه يركب العربيه وقبل ما يركب جنبيه جه واحد من حراس خلف وهو بيجري وقال..
الحارس
الحقنا يا خلف بيه الارض بالمحصول بيولعوو، النار مسكت في كل حاجه..
اتصدم خلف وطلع عبدالله في الوقت ده وقاله بنبره كلها حقد
كده احنا بدأنا يا خلف واللي عندك اعمله بس المره دي خليك جاهز لرد فعلي..
_ركب خلف عربيته ومشي بسرعه هو ورجالته، وعبدالله رجع البيت ودخل مكتبه واتملت عيونه دموع اول ما افتكر عمر اللي ديما كان معاه في اي حاجه بيعملها من صغره، ورن موبيله في الوقت ده برقم علياء فرد عليها وقال..
عبدالله
ايوه يا امي..
علياء
عامل ايه يا حبيبي انت كويس؟..
عبدالله مسح دموعه وقال
بخير انت كويسين؟..
علياء
ايوه روان راحت شافت ابوها ورجعت تاني وطول الوقت قااعده في اوضتها، كلمها راضيها دي غلباانه ومعذوره في زعلها..
عبدالله بجمود
حاضر يا امي هبقي اكلمها، كمال عندكم؟..
علياء
ايوه جه الصبح بس اسرار قالتله انها عايزه تروح لامها واخدها وراحو المستشفي..
عبدالله
تأكدي عليه يا امي ما يسيبهاش لوحدها انا مش ضامن اللي اسمه خلف ده ممكن يعمل ايه فيها..
علياء
ربنا يسترها بس مرت عمك حالتها وحشه، وكمان سيف طلع متجوز في السر علي ريناد والدنيا كلها مشاكل في بيت خالك..
اتنهد عبدالله بضيق وقال
رينا يستر يا امي، بقولك انا مش هاجي اليومين دول هظبط الدنيا هنا عشان اقدر اجيبكم في امان وبعدين هبقي اجي.
علياء
طيب وعروستك يا ابني بقي ده ينفع..
عبدالله
ينفع يا امي الظروف جات كده، وخلي بالك من روان واسرار وانا هكلمكم علي طول..
علياء
مااشي يا ولدي ربنا يعينك علي حالك..
_قفلت معاه علياء وفضلت قااعده مدايقه ودخل عندها في الوقت ده كمال ومعاه أسرار اللي قعدت جنبيها وكان باين عليها الحزن بشكل كبير..
علياء
حمدلله علي سلامتكم، امك عامله ايه يا بتي مش كويسه دلوقتي؟..
اسرار ببكاء
لا يا مرت عمي الدكتور قال الفتره دي صعبه قووي عليها..
كمال
ان شاء الله تقوم بالسلامه يا اسرار ادعيلها..
_طلعت روان من اوضتها وهي لابسه بنطلون جينز واسع وبلوزه دايقه جداً وعليها جاكيت مفتوح وحاطه ميكآب كتير كعادتها وقالت..
روان
انا طالعه يا عمتو عايزه حاجه..
علياء بضيق
علي فين يا بنتي وايه الالوان اللي انتي لابساها دي ما حدش قالك ان عندنا حالة وفااه..
روان
بس الحزن في القلب يا عمتو وبعدين اتخنقت من القعده في البيت وطالعه مع صحابي ومش هتأخر..
كمال
بتعرفي تسوقي لو عايزه تاخدي عربيتي خديها..
بصتله علياء بضيق وروان قالتله بابتسامه واسعه
للاسف يا كوكو مش بعرف اسوق هبقي اخليك تعلمني…
وبصت لاسرار بخبث وقالت
واخلي عبدالله يجيبلي عربيه..
كمال
اوكي وخلي بالك من نفسك..
_ابتسمت روان ومشيت وهي متجاهله وجود اسرار تماماً، وقالت علياء لكمال بحده..
علياء
ده اللي قدرك عليه ربنا ده بدل ما تمنعها تخرج بالليل كده..
كمال
وانا مالي انا يا امي، وبعدين فيها ايه لو البنت خرجت تغير جو وعلي فكره بقي هي مش شبه عبدالله وحرام عليكم انكم تجوزوها لابنك القفل ده..
علياء بغيظ
ما تقولش علي اخوك كده بالعكس ده راجل وكله دم مش لامؤخذه..
بصلها كمال بغيظ واسرار كتمت ابتسامتها وهو قال بغيظ
طيب جعان يا ست الكل، عايز اكل واروح لرضوي اصلها وحشتني اووي وانا مش معاها خالص بسبب الدوشه دي..
علياء
اذا كان كده هتروح لرضوي فهقوم اجهزلك الاكل…
أسرار
خليكي مرتاحه يا مرت عمي انا هقوم اجهزله..
علياء
مش عايزه اتعبك يا حبيبتي، ادخلي انتي ارتاحي..
اسرار
عادي يا مرت عمي خليكي بس انتي مرتاحه وانا هجهزله الوكل..
وقامت فعلا دخلت المطبخ وابتسمت علياء وقالت
تعرف يا كمال انا بحب روان وولاد اخواتي كلهم في غلاوتك انت واخوك، بس انا كنت بتمني اسرار تبقي مرات ابني، ولو كان عندي ابن تالت كنت هجوزهاله..
كمال بضيق وهو بيبص في موبيله
ماما انا كنت عايز اقولك اني كنت متجوز وعندي بنت عندها 4 سنين بس ما حدش يعرف غيرك ومش عايز حد يعرف وخصوصا رضوي دلوقتي..
علياء بصدمه وعصبيه
انت راجع عشان تولع الدنيا اكتر ما هي والعه يا واد انت، ولا راجع عشان تجلطني ومدام متنيل متجوز ومخلف ما قولتش ليه من زمان معلق رضوي جنبك ليه، ايه قلة الادب دي انا ربيتك علي اللعب ببنات الناس كده..
كمال بهدوء
اهدي يا ماما وانا هفهمك كل حاجه بس ارجوكي اهدي..
ــــــــــ #بقلم_الكاتبه_رحاب_القاضي ــــــــ
_وفي كافي هادي كانت قااعده شهد هناك لوحدها، وفجأه قعد قدامها زين وقال بأبتسامه هادئه..
زين
جيت في معادي اهو يا طنط، حضرتك عامله ايه؟..
ابتسمت شهد وقالت
انا كويسه الحمد لله..
وبصتله وهي مبتسمه وهو قال بقلق
في ايه هو حضرتك بتبصيلي كده ليه؟..
شهد ضحكت بهدوء وقالت
ههههه مستغربه ازاي عزالدين يبقي عنده ولد جميل زيك كده، بس باباك طيب، علي فكره انا اعرف عز من زمان قبل ما اعرف مامتك كمان..
زين
ايوه ما هو قالي لما كان في المقابر وكنتي بتروحي هناك انتي وعمو يونس..
شهد
بالظبط كده كانت عليه حركات اكتر من المجنونه، بس انت طالع غيرهم بصراحه يعني ايوه شبه باباك بس طبعك غيرهم هما الاتنين..
زين
سبحااانه بقي، انا هطلب عصير مانجا تحبي تشربي ايه؟..
شهد
لا انا شربت قهوه خلاص مش هقدر اشرب حاجه تاني..
طلب زين العصير وقال لشهد
نفسي بجد اشرب قهوه بس الدكتور مانعني منها، المهم حضرتك قولتي عايزاني في حاجه مهمه خير ان شاء الله؟..
شهد بجديه
بص يا زين انت زي ابني، وانا دلوقتي عايزه نتكلم بصراحه انا لما بسأل يارا انتو ايه تقولي زمايل يا ماما احنا صحاب يا ماما وبرغم اني منعتها اكتر من مره انها تكلمك علي الوضع ده او غيره بس هي ما كانتش بتسمع مني، فانا بسألك انت وبقولك انت بتكلمها علي اساس ايه وهي بالنسبالك ايه؟..
زين بجديه
يارا ما كدبتش عليكي والله انا وهي بنتكلم كل فتره مش ديما علي فكره بس علي اننا صحاب واحنا كده فعلا من اول ما اتعرفنا من قبل ما اعرف هي مين وبنت مين، انما لو علي سؤال هي بالنسبالي ايه فهي كل حاجه برغم انها صغيره الا انها عرفت تخليني احبها بطريقه عمري ما هحب حد بيها ابدا..
ابتسمت شهد وقالت
طيب وبعدين هتفضلو كده لامتي، لو باباها عرف ما اقدرش اقولك وقتها ممكن يعمل فيها ايه وانا مش هقدر اعمل حاجه وهيبقي غصب عني، وكمان هو مصمم انها تتجوز ابن عمها دول محددين معاد الفرح بعد سنتين..
زين بضيق
تقصدي حامد ابن الشيخ محمد الصاوي مش كده؟..
شهد
ايوه اقصده هو بس يارا صغيره ومش موافقه ولا انا كمان موافقه لان بنتي مش هتكون مرتاحه، وعشان كده قابلتك عشان اتاكد من مشاعرك ناحيتها واقولك انك لو عايزها فتروح لباباها علي طول وتخطبها وما تفكرش في اي حاجه لا في سن ولا تعبك ولا اي حاجه وانا هقف جنبك، انما الموضوع بالنسبالك كلام في الفون والشات ومن بعيد كده فانا اسفه بنتي مش لعبه في ايد حد وبرضاكم او غصب عنكم مش هيكون في تواصل تاني..
اتنهد زين بضيق وقال
طيب هو انا لو روحت واتقدمت دلوقتي يونس بيه الصاوي هيوافق يخطب بنته في السن ده ليا انا اللي لسه طالب وكمان هعمل قريب عملية قلب مفتوح وخطر جدا كمان انا مش ضامن عمري فيها؟..
شهد
ولا انا كمان ضامنه عمري ولا اي حد في الدنيا ضامن عمره لان ده مش بأدينا، بيكون ماشي وزي الفل ويقع يموت وبتكون فيه امراض الدنيا وتحصله مليون حادثه ويعيش وبيتجوز وبيخلف وبيجوز احفااده كمان بلاش الفكره دي تكون هي الحجه..
زين
انا ما بتحججش والله، انا اكتر واحد بتمني ان يارا تبقي ليا ولو هتمني ما اموتش عشان حااجه واحده هتبقي يارا..
شهد بخبث
افهم ايه من كلامك ده.؟..
زين بجديه
هروح اخطب يارا ومش مجرد كلام هقوله لباباها، لا اوعدك كمان اني هعمل المستحيل عشان يوافق ولو رفض هتقدم تاني وتالت وربنا يطول عمري ووقتها والله ما هسيبها..
ابتسمت شهد بهدوء وقالت
اتفقنا وانا معاك وهساعدك، قولي بقي اخبار الدراسه معاك ايه وقعدتك مع المجنون ابوك ده عامل ايه معاه؟..
_ضحك زين بهدوء وفضلو يتكلمو مع بعض..
ــــــــــ #بقلم_الكاتبه_رحاب_القاضي ــــــــ
_في بيت يونس الصاوي كانت يارا قااعده في اوضتها مدايقه وقافله الفون بتاعها عشان ما تردش علي ياسمين بسبب خوفها من ابوها، وخبط يزن في الوقت ده علي باب اوضتها ودخل وقال..
يزن
حابسه نفسك هنا ليه يا صغنن؟..
يارا بدموع
هو انا قولتلك تدخل، انا عايزه اقعد لوحدي لو سمحت..
يزن
ما عندناش احنا بنات تقعد لوحدها قومي معايا يلاا عاملك مفجأه حلوه تحت..
يارا بحزن
لا مش عايزه حاجه وما تهزرش بجد انا عايزه اقعد لوحدي..
مسك ايدها وخلاها تقوم غصب عنها وقال
وانا اخوكي الكبير تسمعي كلامي، وبعدين ده انا جايبلك حاجه حلوه تحت..
واخدها ووقفو عند السلم فوق وقال
جيبتلك ياسمين اللي بسببها قافله علي نفسك ومنكده علينا كلنا..
يارا بخوف
انت جيبتها ليه بابا هيزعل..
يزن
عيب عليكي كلمته وقولتله ما يتدخلش في علاقتك بصحابك هو كل الحكايه قالي انه غيران هلي ماما من باباها بس انا ظبطلك الدنيا المهم ما تزعليش ولا عمرك تزعلي طول ما انا جنبك…
حضنته يارا وقالت بسعاده
ربنا يخليك ليا يا قلب اختك الصغننه انت..
يارا بحماس
هنزل بقي اقعد مع ياسمين عشان ما اتأخرش عليها..
_ونزلت بسرعه وهو راح اوضته القديمه اللي كان قااعد فيها قبل ما يتجوز وقرر انه مش هيطلع تاني شقته اللي كانت بتجمعه بسدرا…
ــــــــــ #بقلم_الكاتبه_رحاب_القاضي ــــــــ
_والمستشفي عند حسن كان نايم علي السرير بتاعه وروفان قااعده جنبيه وبتقوله..
روفان
بس بقي يا ابو علي وقامت ماما راحت عند سيف واتخانقت معاه وكمان ضربت البنت الشريره اللي اتجوزها علي ريناد وزيزو اتخانق معاها وقالها ان اللي عملته غلط وكمان ريناد فضلت تعيط اووي، بس هما قالو مش هيقلولك لحد ما تخف..
حسن بدموع
انا بنتي يحصل فيها كل ده وانا مش جنبيها..
روفان
خلاص قوم بقي بسرعه عشان تبقي جنبيها، انا اصلا قولتلك عشان تقوم وتروح معايا يا بابا..
ابتسم حسن ومسح دموعه وقال
ما تخفيش يا حبيبتي هقوم وهرجع معاكم البيت ومش هخلي حد يزعلك انتي واخواتك ابدا..
دخلت عنده في الوقت ده رضوي ومعاها هنا وقالت
ايه رئيك بقي في المفجأه دي جيبتلك هنا ووو البت دي بتعمل ايه هنا مين جابك يا بت؟..
حسن
جابها زين معاه هو عنده متابعه مع الدكتور بتاعه، تعالي يا هنا يا بنتي اقعدي هنا..
رضوي
انت كويس يا حبيبي النهارده؟..
حسن بجمود
ريناد اختك كويسه يا رضوي..
بصت رضوي لروفان بغيظ وقالت
كويسه يا بابا قوم انت بالسلامه وكل حاجه هتتحل..
حسن بضيق
اوعي تخلي سيف يقابلها ولا امك تعمل حاجه لحد ما ارجع البيت الموضوع يتقفل لحد ما انا اتصرف وتخليكم مع اختكم وتهونو عليها ريناد حساسه اووي ما تفضلوش تحكو قدامها في اي حاحه فهماني يا رضوي؟..
رضوي
حاضر يا بابا فاهمه، انا هاخد روفان واروح اشوف الدكتور واطمن عليك ونشوف هنخرج امتي وكده..
حسن
ياريت عشان انا عايز اقعد مع هنا لوحدنا..
_ابتسمت رضوي واخدت روفان وطلعو وسابو هنا قاعده مع حسن اللي اتعدل بصعوبه من نومته وقعد علي سريره وقالها بهدوء..
حسن
انا اسف..
هنا
علي ايه؟..
حسن
عشان اللي عملو ابوكي، عارف اني سخيف وما فيش حاجه هتهون عليكي..
هنا بدموع
هو فعلا ما فيش حاجه هتهون غيابه، بس انت ذنبك ايه تتأسف يعني هو انت غصبته علي اللي عمله ده كله نصيب..
حسن بنبره حزينه
ابوكي ده ما كانش بواب عندنا وخلاص ده كان جزء من عيلتي وحياتي واللي بينا عشرة عمر بحاله من اول ما جه من بلدكم واتوظف عندنا في الشركه وحصلت مشكله ومشي وقتها جه معايا البيت كنت لسه بجهز فيه قبل ما اي حد يسكن فيه كتبت الشقه بتاعت الدور الارضي بأسمه وكان بيخاف علي بيتي وسمعته وعلي عيالي زي ما انا بخااف كانت لما الدنيا تضيق بيا بروحله وافضل اتكلم معاه ونروح نصلي مع بعض، موته لو وجعك واحد في المبه فهيفضل طول عمري موجوع عليه لاني ما كنتش اتخيل انه بيحبني اووي كده لدرجة انه..
ما كملش كلامه ودموعه نزلت بحزن وهنا قالت ببكاء
ما تعيطش حضرتك عشان ما تتعبش ونبقي خسرنا من الناحيتين بقي..
ضحك حسن بهدوء وقال
طيب ما تعيطيش انتي الاول اصل انا دمعتي قريبه ولما بشوف حد. بيعيط هعيط معاه ونفضل بقي نوزع مناديل طول اليوم..
ابتسمت هنا وقالتله بهدوء
انا بجد. مش زعلانه والله منكم كل الحكايه ان ضربتين في الراس بتوجع امي وبعدها ابويا وانا ماليش حد يعني وهرجع لخالتي وللبلد وو..
حسن بجديه
لا مش هترجعي البلد ابوكي وصي بنتي قبل العمليه انك ما تروحيش لخالتك وانتي برضاكي او غصب عنك هتفضلي قاعده عندي تتعلمي وتتجوزي وانتي برضو مسؤله مني انا زي باقي بناتي..
هنا بضيق
انا فاهمه انك عايزين تعوضو اللي عملو بابا، بس انا مش عايزه منكم حاجه وعادي هعتمد علي نفسي وهعرف اعيش.
حسن بجديه
بصي يا هنا لو ابوكي ما كانش اتبرعلي وحصلت حاجه واتوفي برضو وقتها وحياة ولادي انا ما كنتش هسيبك تعيشي لوحدك او تروحي لخالتك وجوزها خلاص كل حاجه بانت واحنا هنا اهلك رضوي وريناد وروان وروز وروفان وطارق دول اخواتك وانا وليلي بالعافيه هنبقالك اب وام ومع الوقت هتتعودي علينا والبيت بيتك زي ما هو بيتنا كلنا، انا دلوقتي عايز منك طلب واحد وهتنغذيه..
بصتله بفضول وهو قال
تركزي في مذاكرتك وانا هخلي عبدالله ابن اختي يتصرف بأي طريقه هو وعز ويخلوكي تمتحني من هنا وما تروحيش البلد دي تاني، بس انا عايزك شاطره ومتفوقه وتدخلي الكليه اللي نفسك فيها..
هنا بهدوء
ان شاء الله المهم حضرتك ارتاح بقي انت بتتكلم بالعافيه وانا اعصابي تعبت ممكن تسكت لو سمحت..
ابتسم حسن وقال
حاضر هسكت بس تسمعي الكلام..
هنا
حاضر هسمع الكلام اصلا انا مهما كابرت في الموضوع بصراحه كده انا بخاف اقعد لوحدي برضو دلوقتي، تعرف حضرتك انا كنت بخلي ماما لحد ما ماتت تنام جنبي ولما صحيت في يوم ولقيتها ما بتتحركش كرهت اكتر اني ابقي لوحدي عشان وقتها حسيت بأوحش احساس في الدنيا..
حسن بهدوء
اولا انا ما اسميش حضرتك انا يتقالي يا بابا حسن من النهارده، يتقال ايه يا هنا؟..
ابتسمت هنا بدموع وقالت
بابا حسن..
كمل حسن كلامه وقال
وانا اوعدك ان من النهارده ما فيش حاجه وحشه تاني هتحصل معاكي، بس تسمعي الكلام وتبقي بنتي حبيبتي..وتعالي اعدليلي المخده دي عشان اناام..
هنا بأبتسامه واسعه
حاضر..
حسن
حاضر يا ايه؟..
ضحكت بهدوء وردت عليه
حاضر يا بابا حسن..
_ وجات رضوي وروفاان وقعدو معاهم، وبعد شويه دخل عندهم طارق وعزالدين اللي كان ماسك سبحه في ايده وقال..
عزالدين
عسااك بخير يا اخي العزيز..
حسن بحده
والنبي حتي لو دخلت عليا وانت امام جامع هتتنفخ يا عز علي الرقاصه اللي جيبتها في الفرح، انا عيالي وعيال اخواتي يشوفو المسخره دي..
عز بغيظ لطارق
امسك يا عم الشبحه بتاعت امك دي وانا امشي احسن انا اصلا كنت خايف اجي، قصدي مش عايز اجي..
طارق
خلاص يا زيزو بقي بابا تعباان نستحمله..
حسن بحده
لا والبيه اللي كان عمال يترقص معاها..
بص طارق للسقف وقال حسن بغيظ
بس اقوملكم يا عيله ما فيهااش راجل..
عز
كلم ابوك..
طارق
لا ده بيكلمك انت..
عز
فيها عبدالله علي فكره طالعلك..
حسن
انت بتعمل ايه يا عز عندي ما انا بقيت كويس، سايب ولاد اختك في الحاله دي لوحدهم ليه؟..
عز
وانا كنت اعملهم ايه يعني، وبعدين كمال هنا في القاهره مع امه وبنت عمه وروان معاهم، عبدالله لوحده هناااك….
حسن بقلق
كلمه خليه يجي يا تسافرله واوعي يا عز تخليه يتهور ويعمل حاجه تضيعه..
طارق
انسحب من الانتخابات علي فكره وكمان خلف انسحب كمال قالي..
حسن بخوف
عبدالله مش هيسكت تسافرله يا عز ما تخليهوش يبقي لوحده اومال انا وانت لازمتنا ايه..
عز
بقولك ايه انت عارف من زمان اني ماليش في الاكشن، قوم انت يا حسن واعمل اللي عايزه..
اتنهد حسن بضيق وقال
وسيف فين دلوقتي؟..
عز
كان عايز يجي بس ليلي حالفه لو جه عندنا البيت هتعشي بيه القطط والكلاب..
حسن
ما تخلهوش يروح هناك ولا يجي هنا لما ابقي اخف ابقي اروحله.. المهم خد يا عز البنات وروحو البيت وانت يا طارق خليك معايا، وايوه صح طارق انت تلم هدومك وحاجتك وتشوف اوضه عند عمك تقعد فيها..
عز بغيظ
عم مين هو انا خلفته ونسيته انا طايق ابني بالعافيه هتقعد ده كمان عندي..
حسن بحده
ما تتعبنيش يا عز واسمع الكلام واوضتك يا طارق هتاخدها ريناد وبنتها ورضوي وهنا هيقعدو في اوضة وروز وروفان زي ما هما وانت بعد كده يا دكتور طارق ما اشوفش وشك غير وقت الاكل وبس ويستحسن تاكل عند عمك عشان هنا تاخد راحتها في البيت..
طارق
علي فكره انا وعمي ما بنتفقش واخوك رخم انا مش هقعد عنده..
هنا بأحراج
خلاص انا هقعد في شقة ابويا تحت..
حسن بحده
انتي حد قالك تتكلمي وانا اللي اقرر واوضتك من النهارده مع رضوي وهو هينفذ كلامي..
طارق
حاضر يا بابا اللي تشوفه..
عز
طيب ما تجيب هنا عندي وخد انت طارق وعليه زين..
بصله حسن بحده وقرب منه طارق وقال بغيظ
مش عايز اغلط فيك يا عمي اسكت..
عز بخبث
ايه ده احنا بنغير ولا ايه؟..
طارق
مالكش دعوه خليك في حالك..
حسن
مستني ايه يا عز روح يلا خد البنات روحهم..
قامت رضوي وبااست ايد وراس حسن وقالت
الف سلامه عليك يا بابا ان شاء الله قريب ترجعلنا بالسلامه..
حسن بصوت واطي
ان شاء الله يا حبيبتي خلي بالك من اخواتك يا رضوي وهنا تبقي في عيونكم تتعاملو معاها عادي عايزها تحس انها فعلا بقيت واحده مننا..
رضوي
من عينيا يا بابا حاضر..
_تفتكرو بقي هيحصل ايه؟
•تابع الفصل التالي "رواية موضوع عائلي" اضغط على اسم الرواية