رواية جمرية الصقر الفصل الخامس والثلاثون والاخير 35 - بقلم سلوى عوض
بارت 35 والاخير ( الجزء الاول)
بعد مرور شهر....
في نجع الصائغ
استيقظ محمود ليصلي الفجر، فوجد غزالة توضئ نجاة
محمود : هتصلو الفجر؟
نجاة: إن شاء الله، وأنت الإمام بتاعنا.
محمود: حاضر.
صلى محمود بهم، وبعد الصلاة...
غزالة: هصحي البنته، النهارده الحنة بتاعتهم.
محمود: الحمد لله، البيت خلص واتفرش على خير، ونقلنا كل حاجتنا هناك.
نجاة: الفرح هيتعمل هنا ولا هناك؟
محمود: هناك إن شاء الله. من عشية، الجزارين شغالين يدبحوا ويوزعوا.
غزالة: يلا يا بنته، جوموا! يومنا طويل عشان تفطروا وتجهزوا، الحنانة جاية.
محمود: غزالة، شيعي لجمرية ولخطيبة يوسف وأمها عشان يتحنوا مع البنته، وعشان كمان البنية عروسة يوسف. تخرج عروسة من حدانا. البنيه غريبة.
غزالة: هو أنت متعرفيش أن صجر شيّع للجصر لخوال أمها وخوالها؟ ياجوا وقالوا إنهم جايين.
محمود: وماله، بردك تخرج من حدانا.
يمر الوقت سريعًا، ويذهب الجميع للبيت الكبير الذي أصبح أجمل من أي قصر في الصعيد.
• الدور الأول: محمود، غزالة، ونجاها.
• الدور الثاني: صقر وجمرية.
• الدور الثالث: زيدان ونجمة.
• الدور الرابع: عمار ومحاسن.
• الدور الأخير: مخصص لطارق وأولاده إذا جاءوا في أي وقت.
امتلأ البيت بالناس الذين جاؤوا يهنئون ويباركون للكبير، وبدأت الموسيقى الشعبية تعم المكان. الحنانة وصلت لتحني البنات جميعًا.
عمّت الفرحة القرية كلها، والرقصات التقليدية أضفت بهجة خاصة. بعد أن انتهت الحنة وبدأ الناس بالمغادرة...
محمود: يوسف، اعمل حسابك. بكرة إن شاء الله تاخد عروستك من هنا بعد كتب الكتاب والفرح.
صابرين: ربنا يخليك يا حج، ويسترك ويفرحك زي ما فرحت بنتي.
محمود: بنتك بنتي، ولو يوسف بس ضايجك، تاجيني على طول وشوفي هعمله فيه إيه.
لارا: ربنا يخليك ليا. شفت بقى يا يوسف؟ أنا ليا ضهر، يعني مش هتقدر تزعلني أبدًا.
يوسف: وأنا عمري ما هزعلك.
في زاوية أخرى...
جمرية: بت يا نجمة، إنتِ رسمتي إيه؟
نجمة: وإنتِ مالك؟ ده إنتِ حشرية جوي.
جمرية: أنا مرت الكبير، أعمل اللي عاوزاه.
نجمة: وأنا عمتك، مش أخت جوزك.
عمار : الله يكملك بعقلك يا زينة البنات، يا حبة جلب عمار.
غزالة: اطلعوا ناموا عشان تصحوا فايجين للفرح.
جمرية: حاضر يا خالَه.
صقر: هتروحوا الكوافير، وبعد المغرب هناجي ناخدكوا.
نجمة: ميته ياجي بكره.
محاسن: عياجي يا خيتي، عيروح فين؟
نجمة: أحلى حاجة إن مافيش واحدة شافت فستان التانية. وأنت يا زيدان، عتلبس بدلة؟
زيدان: اتحشمي يا بت، بدلة إيه ديتي بلا جلة جيمة!
يوسف: كتر خيرك، أنا هلبس بدلة.
لارا: بليز يوسف، عاوزاك تلبس زيهم.
صقر: احنا نلبس جلاليب وعبي.
لارا: إيه عبي ديه؟
صقر: جصدي عبايات رجالي، يعني فصلناهم مع بعض.
لارا: ويوسف كمان زيكم؟
عمار: مافيش وجت.
صقر: خلاص، هكلم الخياط ياجي يفصلها هنيه.
لارا: شكرا يا صقر.
يوسف: من دلوقتي بتمشي كلامها عليا.
عمار (مازحًا): لارا، ليكي هنيه تلت إخوان رجالة، وتلت أخوات بنات، وسبحان الله تلت أمهات وأب واحد.
لارا: أنا فرحانة أوي بيكم، ربنا كريم وعوضه كبير أوي.
___________________________________
ويمر الليل على أبطالنا مليئًا بالفرحة، وفي الصباح كان يوسف يجهز السيارة ليأخذهم إلى الكوافير.
جمريه: استنى يا يوسف، عناخدوا حور ورضوى وبناتها معانا.
يوسف: حاضر.
وبينما يوسف يستعد، جاء زيدان ليتحدث مع نجمة.
زيدان: أوعاكِ تكتري المكياج، ما أعاوزش حد يشوف جمالك غيري.
نجمة (بابتسامة): حاضر يا سبع الرجال.
يوسف، الذي كان يستمع...
يوسف (مازحًا): سمعتي يا لارا زيدان قال إيه لنجمة؟ انتي كمان كده.
محاسن: أمال فينه عمار؟
جمريه: وصجر؟ فينه؟ أشمعنى انتوا بس اللي جيتوا؟
زيدان: صجر وعمار بيعملوا مفاجأة.
يوسف: زيدان، إياك تتكلم.
زيدان: حاضر روحوا بجى
وينطلق يوسف ليأخذهم إلى الكوافير، ويوصلهم هناك. البنات قالوا له:
جمريه: تعالوا بعد المغرب، وإياكم تتأخروا.
عاد يوسف ليجهز نفسه، وفي نفس الوقت وصلت قسمت، خطيبة زياد ، إلى البلد. كان زياد قد أرسل لها عنوان البيت. استقبلتها غزالة ورحبت بها هي وأخوها الصغير ريان
نجاه (تخرج من الغرفة مع صابرين): يا مرحب يا بنتي، نورتي البلد.
قسمت: شكرًا يا طنط، ألف مبروك، ربنا يتمم بخير.
غزالة: عجبال ما نفرح بيكم، أنتِ وزياد.
ريان أخو قسمت الصغير، تساءل:
ريان: هو مافيش حد هنا ألعب معاه؟
نجاه: إزاي؟ فيه ولاد بتي، ياسين ويزن، اطلع لهم فوج العب معاهم.
غزالة: تعالَ، أنا هوديك ليهم.
وأثناء ذلك، تعرفت قسمت أكثر على العائلة.
زياد: فكي كده يا قسمت، البيت هنا بيتك.
زياد (مقدمًا): دي ست الكل أمي نجاة، واللي طلعت مع ريان تبقى خالتي غزالة اللي حكيتلك عنها. ودي خالتك صابرين، مامت لارا عروسة يوسف.
قسمت لم تتمالك نفسها، ودمعت عيناها.
قسمت: الحمد لله، ربنا عوضني بعيلة كبيرة بدل عيلتي اللي اتوفوا.
نجاه: يا حبيبتي يابتي، أهلك وناسك متوفيين؟
قسمت: والدي ووالدتي اتوفوا في حادثة وإحنا في الكويت من سنتين، وأنا جبت ريان وجيت على مصر.
نجاه: احنا أهلك وناسك يا بتي. خدها على الكوافير خليها تتزين زي البنات، ونعمل لكم الخطوبة بتاعتكم النهارده.
زياد: حاضر يا أمي.
ذهب زياد برفقة قسمت إلى الكوافير. وهناك، تعرفت قسمت على البنات، بينما كان الشادر الخاص بالفرح قد جهز بالكامل.
وبعد المغرب، ذهب العرسان ليأخذوا العرائس من الكوافير. البنات كنَّ طالعين مثل القمر.
صقر (وهو يأخذ جمرية): الله أكبر، جمر يا قلبي.
جمريه (تتظاهر بالزعل): لأ، أنا زعلانة منك. كنت فين من الصبح؟
صقر: كنت بحضرلك مفاجأة.
ثم ركبوا السيارة معًا.
عمار (أول ما رأى محاسن): يا لهوي يا ناس! أجمل بنت في الصعيد.
محاسن (بخجل): بطل بس! كنت فين بجى انت كمان؟
عمار: تعالي بس، لما نوصل هتعرفي.
وركب العرائس مع عرسانهم في جو مليء بالفرحة.
______________________________________
في العربية كانت الأجواء مليئة بالمرح والرومانسية.
لارا: انت خطفتني يا يوسف، شكلك قمر في اللبس الصعيدي.
يوسف (بابتسامة): والله انتي اللي جمر يا جلب يوسف.
لارا: وكلامك الصعيدي قمرين.
يوسف: بس بجى أنا عتكسف.
وفي السيارة الأخرى:
جمريه: مش عتجولي على المفاجأة يا صجر؟
صقر: وتبقى مفاجأة كيف؟
جمريه (متظاهرة بالزعل): خلاص، مش عتجوزك.
صقر: كلها دجايج وتبجي حرمي المصون.
وبيوصلوا جميعهم إلى المنزل، ليجدوا شادرًا كبيرًا مليئًا بالناس، وأهل نجع الصائغ ونجع الصياد كلهم موجودين. العرائس بتنزل من العربيات وسط الزغاريد، والشاشات بتشتغل بالأغاني. فجأة صقر قال بصوت عالي:
صقر: وقفوا الأغاني عشان كتب الكتاب.
وفعلًا، كتب المأذون كتب الكتاب وسط فرحة الجميع وزغاريد النساء. بعدها أعلن صقر عن المفاجأة:
صقر: وهنا جيه ميعاد المفاجأة.
وفجأة ظهر المغني الصعيدي أحمد عادل.
جمريه (بفرحة): الله! أنا بحبه جوي.
صقر: عشان كده هو اللي هيغني في الفرح.
بدأ أحمد عادل يغني بأغنيته المشهورة:
"ببص بين الصبايا حبيبي مابينش ليه
لما سألت ايه الحكاية؟ جالو ناسه حاجرين عليه
متعود دايمًا أشوفه ف الجعدة من جدام
واليوم مالمحت طيفه ايه اللي حصل ياسلام."
وبعدها قال أحمد عادل:
أحمد عادل: ألف مبروك للعرسان، والأغنية دي من صقر الصعيد إهداء للعروسة.
ثم غنى:
"شعرها أسود سائح
شمال يمين تلقاه رايح
وجننتيني يا بت الناس."
وبعدها بدأ يغني:
"عشقت السمراء
سمار جميل
شمس وجمرة."
وبدأت رقصة التحطيب بين العرسان وسط تصفيق وفرحة الجميع. واستمر الفرح حتى النهاية.
_____________________________________
بعد انتهاء الفرح، تقدم محمود ليسلم لارا ليوسف.
محمود: ألف مبروك، خلي بالك على بتي يا يوسف.
وسلم محمود بناته لعرسانهم، ووقفت جمرية بجانب صقر.
محمود: صجر...
صقر: عارف يا أبوي، ف عيوني وقلبي.
وفي هذه اللحظة، جاء زياد وقال بحماس:
زياد: وأنا كمان عاوز أتجوز.
صقر (مازحًا): بس يا حلو، لما احنا نتجوز الأول.
زياد: ما انتو اتجوزتو!
محمود: خلاص، بكرة بعد الصباحية إن شاء الله نبعتو للجاضي ونكتب كتابكم.
زياد: حبيبي يا أبوي!
____________________________________
وبيطلعو العرسان لغرفهم في أجواء مليانة حب وفرحة.
صقر: غيري هدومك وتعالي نصلّي ركعتين لله شكرًا على النعمة دي.
جمريه (بابتسامة): مش عتشيلي الطرحة الأول؟
صقر: من عيوني، بجيتي مرتي يا جلبي.
وفعلًا، بيصلوا ركعتين شكر لله.
عند عمار ومحاسن:
عمار (بنظرة حب): أخيرًا يا بت، بجيتي حلالي.
محاسن (بخجل): عتكسف أنا.
عمار: أوعدك إنّي عمري ما هزعلك.
محاسن: وأنا أوعدك إني عخليك أسعد راجل في الدنيا.
عند زيدان ونجمه:
زيدان: والله وبجيتي مرتي يا أم لسانين، عشان أكسر راسك الناشفة وأجصلك لسانك الطويل ديتي.
نجمه (بضحكة): وأنا تحت أمرك يا سبعي.
زيدان : من ميته الأدب والعجل دوله؟
نجمه: النهارده بس.
زيدان : يارب تفضلي عاجلة على طول.
نجمه: ياك، جالولك عليا مجنونة.
زيدان: لاه العفو يا ست العاجلين، هو أنا حببني فيكي غير جنانك.
نجمه : وبعدين يعني، عنبتدوها كده؟ والله أنزل أجول لأبوي.
زيدان : طب رجلك تخطي العتبة وأنا أكسرها.
نجمه : عتكسر رجل مين؟ طيب جرّب كده وأنا أوريك شغلك.
(زيدان يقترب منها بابتسامة ماكرة).
زيدان: اديني جرّبت أهه.
نجمه (بضحك): جلبك أبيض يا زيزو.
زيدان: أيوه كده، ما تجيش غير بالعين الحمرا.
ويمر الليل على العرسان وسط ضحك وحب وفرحة ، وأصبحوا أزواجًا قولا وفعلا.
_____________________________________
وف الصباح أتى المأذون وكتب كتاب قسمت وزياد
وزياد قال وهو يبتسم: "ممكن إحنا كمان نتجوز بالفعل
محمود رد عليه ضاحكًا: "اصبر شوية، مش وجته دلوك يا بني!"
_____________________________________
(بعد مرور سنة)
وفي أحد الأيام في غرفة جمريه...
جمريه (تصرخ): الحجني يا صجر! عولد! عولد!
صقر: نامي دلوك واولدي الصبح، بجولك نامي!
جمريه (تصرخ أكتر): بجولك بولد يا راجل، الحجني!
صقر : ياربي، عاوز أنام..
جمريه، عموت ياصجر جوم فز.
صقر: (يقفز من السرير بسرعة) مالك يابت، بتصرخي كده ليه؟
جمريه: بولد بجولك بولد!
صقر : حاضر حاضر، هحضر العربية ونروح المستشفى.
(يتمتم وهو ينزل): كان مالي ياربي بالجواز والنيلة دي... ماكت مرتاح!
وبينما كان ينزل بسرعة، فوجئ بزيدان وعمار يجرون على السلم.
صقر: مالكم انتو كمان؟
زيدان: البنته كلهم بيولدوا!
عمار: طب اتصل بيوسف، شوف مرته يمكن هي كمان بتولد!
صقر: بعدين واحنا في الطريق...
وجهزوا العربيات، والبنات كلهم كانوا بيصرخوا من ألم الولادة. أول ما وصلوا المستشفى، لقوا يوسف ومعاه لارا، وكانت هي كمان بتولد.
صقر (بدهشة): بصره.. كلنا هنبجى ابهات النهاردة!
وبدأ عمال المستشفى يحضروا التروليات، وكل واحدة دخلت غرفة العمليات. أول واحدة ولدت كانت جمريه، وجابت ولد وبنت.
الممرضة (تخرج مبتسمة): فين جوز مدام جمريه؟
صقر (بتوتر): أنا... مالها؟
الممرضة: مبروك، جابت ولد وبنت!
سجد صقر ركعتين شكرًا لله. بعد كده، دخل دور محاسن، اللي جابت ولدين. فرح عمار جدًا لما بلّغته الممرضة. بعدها نجمة جابت ولد وبنت، وزيدان كان طاير من الفرحة. أما لارا، فكانت آخر واحدة، وجابت بنت، ويوسف كان مبسوط جدًا.
عمار (مبتسم): هتسموا العيال إيه؟
صقر : بالامر كلنا هنسمّي محمود يعني محمود صجر ومحمود زيدان ومحمود عمار
والواد التاني ياعمار انت حر فيه
عمار عسميه امين علي اسم ابوي
زيدان: وأنا بتي عسميها غزالة.
صقر: بتي هيام.
يوسف: وبنتي جمريه، على اسم عمتها.
صقر : لاه، هي جمريه واحدة بس!
يوسف: وأنت مالك؟ أختي وانا حر!
ضحك الجميع وهم يطمئنون على زوجاتهم. اتصل صقر بوالده محمود ليبشره.
صقر: أبوي الحمد لله، جاموا بالسلامة.
محمود: الحمد لله... عندكم كام؟
صقر: عندنا ثلاثة: محمود وهيام وجمريه، وعند عمار محمود ونجاة، وزيدان خلف غزالة، ويوسف خلف جمريه.
محمود (بحماس): زغرطوا يا ناس! جاموا بالسلامة، وما شاء الله جابوا عيال كتير!
نجاة : كتير كيف؟
محمود: صجر خلف محمود وهيام، وعمار خلف محمود وامين ، وزيدان خلف محمود و غزالة، ويوسف خلف جمريه.
غزالة (بفرحة): صلاة النبي، ما شاء الله!
محمود: أنا نادر ندر، هدبح لكل عيل وعيلة عجل على اسمهم!
نجاة: عجبال متجوزهم يا محمود وتفرح بيهم.
محمود: الفرح حلو جوي يا أولاد، ربنا يفرح الناس كلها.
يتبع....
يتصل صقر بطارق:
صقر: أيوه يا طارج محمود الصغير وهيام الصغيرة وصلوا.
طارق: ألف ألف مبروك يا صاحبي!
صقر : ومحاسن جابت ولدين، ونجمة جابت بنت وولد.
طارق: أوعى تخلي نجمة تسمي نجاه، عشان رضوى في بطنها بنت وهسميها نجاه.
صقر: بس خليتهم كلهم يسموا محمود بالأمر.
طارق: ربنا يخلي محمود الكبير والكام محمود الصغيرين. البيت هيبجى حضانة .
طارق: أنا بحجز هيام الصغيرة ليزن، وغزالة الصغيرة لياسين.
صقر: واحنا هناخدو نجاه الصغيرة لمحمود ولدي.
طارق: ده أجيبها لك لحد عندك
صقر: وانا اشور هيام الصغيرة وأحليها، واجيبها لك اجفل بجى خليني اطمن علي ام العيال
بعد المكالمة، يدخل صقر عند جمريه في الغرفة.
صقر: حمد لله على السلامة يا أم محمود.
جمريه: الله يسلمك يا صجري، كيف عيالي؟
صقر: بخير الحمد لله، خدوهم يسبحوهم وهيجيبوهم تشوفيهم.
جمريه: ومحاسن عاملة إيه؟
صقر: جابت محمود وأمين، ونجمة جابت محمود وغزالة.
جمريه: ما شاء الله، ربنا يخلي ويبارك.
صقر: شدي حيلك لسه عاوزين نجيب عيال كتير.
جمريه: ولارا خلفت إيه؟
صقر: جابت بنية.
جمريه: ربنا يخلي. كنت بتجول إيه يا صجري؟
صقر: عاوزين عيال كتير.
جمريه: لا يا حبيبي خلاص، شطبنا. مفيش عيال تاني، انت عاوز تجنني؟ ربنا يجدرني على دول بس!
صقر: لاه دول إيه؟ أنا ناوي على دستة عيال إن شاء الله.
جمريه: روح يا صجر، أنا تعبانه ومش جادرة.
صقر: فيه إيه؟ من أول عيلين تعبتي؟ أمال فين بت الصياد الجويه اللي عرفتها؟
جمريه: هو أنا مجلتلكش؟ مش هد حيلها صجر ود الصايغ.
ليضحك صقر عليها: عسل يا أم محمود.
جمريه: قوللي، محمود طالع حلو كيف أبوه؟
صقر: إيه حلو دي؟ ولدي راجل كيف أبوه!
تضحك جمريه: وسيد الرجالة كمان؟ طيب، وهيام الصغيرة؟
صقر: جمر كيف أمها.
_____________________________________
في غرفة محاسن:
عمار: كيفك يا أم الولاد؟
محاسن: الحمد لله يا حبيبي.
عمار: كنت خايف عليكِ جوي يا حبة قلبي.
محاسن: ربنا يخليك لينا يا رب.
عمار: صقر صمم يسمي ولد من ولادنا محمود، وأنا سميت التاني أمين، ولا كنتِ عاوزة اسم تاني؟
محاسن: لا، زانين الأسمين. ربنا يخليهم ويحفظهم يا رب.
_____________________________________
في غرفة نجمة:
زيدان: حمد الله على سلامتك يا حبيبتي.
نجمة: الله يسلمك. والله عيالك دول ولاد كلب تعبوني جوي وأنا عولد.
زيدان: لسه بردك لسانك طويل؟
نجمة: هما كانوا عيولدوني ولا هيقطعوا لساني؟
زيدان: ربنا يهديكِ، أخوكي صجر سمى الواد محمود، وأنا سميت غزالة.
نجمة: يعني عيبقى اسمي أم محمود؟ لا يا أخوي، أنا عاوزة ولدي يبقى اسمه جديد، مازن. هسميه مازن.
زيدان: مخيّرة انتي وأخوكي، أنا ليش صالح.
نجمة: بقولك إيه، هاتلي صجر.
زيدان: اهدي طيب يا مجنونة.
نجمة: لا، رن عليه.
زيدان: بيطمن على مرته.
نجمة: بجولك رن عليه.
ليتصل زيدان على صقر:
صقر: انت مجنون؟ بترن عليا واحنا في مستشفى؟
زيدان: تعالي كلم أختك المجنونة دي.
صقر: جايلك أهوه.
جمريه: في حاجة ولا إيه؟
صقر: مش عارف تلاجيهم، اتخانقوا، ما انتي عارفة نجمة.
جمريه: روحلها وطمني.
صقر: حاضر.
ليذهب صقر إلى غرفة نجمة:
صقر: حمد الله على السلامة يا أم محمود.
نجمة: الله يسلمك. طبعًا تلجاك سميت ولدك مازن اسم جديد، وأنا ولدي سميته محمود، صح يا صجر، عشان ولدك يغيظ ولدي؟
صقر: يا مجنونة، كل الولاد سميتهم محمود على اسم أبوكي.
نجمة: صح يا صجر؟
صقر: صح يا مجنونة.
نجمة: إن كان كده، ماشي. وأشمعنى محاسن تجيب ولدين؟
زيدان: أنا هسيب المستشفى كلها وماشي، مش ناجص جنان.
صقر: استحمل الجنان الأصلي بجى، وأكيد عيالها هيبقوا زيها.
نجمة: كده بردك يا صجر، يا أخوي يا سندي، بتوجف مع صاحبك ضد أختك؟
زيدان: والله مجنونة رسمي.
صقر: أروح أشوف عيالي، يا أبوي الله يكون في عونك يا صاحبي.
ليذهب صقر إلى غرفة جمريه، ليجدها تحمل محمود والممرضة تحمل هيام الصغيرة:
جمريه: طالع جمر وملون كيف أبوك. الحمد لله، ماطلعش شبه عمتك نجمة.
صقر: نجمة منكدة على زيدان عشان عاوزة تسمي مازن.
لتضحك جمريه: مجنونة أختك دي.
_______________________________________
عند لارا ويوسف:
يوسف: حمد الله على السلامة يا روحي.
لارا: الله يسلمك. شوفت بنتنا؟ قمر، ازاي؟
يوسف: جمريه الصغيرة، وغريبة إنها طالعة شبهها أوي.
لارا: سبحان الله. ربنا يخليها لينا يا رب.
يوسف: هاروح أطمن على جمريه وارجعلك.
يدخل يوسف غرفة جمريه:
يوسف: حمد الله على السلامة يا قلب اخوكي.
جمريه: الله يسلمك. لارا عاملة إيه هي والبنية؟
يوسف: حلوين، الحمد لله. والبنت طالعة شبهك أوي، عشان كده سميتها جمريه كمان.
جمريه: حبيبي يا أخويا، ربنا ما يحرمني منك.
صقر: اطلع برا يا يوسف، ليكش صالح بمراتي.
يوسف: دي أختي يا صقر، حبيبتي، مش محتاج إذنك.
ينظر يوسف إلى محمود الصغير:
يوسف: الواد طالع حلو زي خاله.
جمريه: لا يا أخوي، ده طالع جمر كيف أبوه وملون زيه.
يوسف: يعني أنا أبيض وأسود؟
لتضحك جمريه: وهيام طالعة كيف عمتها محاسن.
يوسف: أحسن ما طلعتش شبه نجمة.
ليضحك صقر: نجمة جننت زيدان خالص.
جمريه: احنا مش هنروحوا بجى
صقر: عمار بيخلص الإجراءات عشان نروح كلنا، وطارق وعياله جايين يقعدوا معانا لغاية السبوع.
جمريه: صح؟ حور حبيبتي جاية؟ وحشتني، كلهم وحشوني.
_________________________________________
وفعلاً، الكل يخرج من المستشفى ويروح البيت. الكل كان فرحان جدًا. صقر، لما شاف ابنه محمود، ركع وسجد لله من الفرحة وقال للجزارين:
صقر: عاوز كل البلد تاكل لحم. جبل السبوع بيوم، هندبح ونوكل كل النجع.
صقر: أنا يا أبوي هبني جامع شكر لله، وأكسي الغلابة، وأي حد عاوز حاجة يجي. الخير كتير.
نجمة لنجاة : طارج قال محدش يسمي نجاة، عشان هو هيسمي نجاة.
وصل طارق:
طارق: ألف مبروك لكل اللي خلفوا.
صقر: الله يبارك فيك يا حبيبي.
حور: خالو، صح؟ انت عندك بنوتة صغيرة وولد صغير ألعب معاهم؟
صقر: آه يا حبيبتي.
يزن: أنا هتجوز النونة بتاعت خالو صقر.
صقر: وأنا موافج.
يزن: هي فين خطيبتي طيب؟
صقر: مع أمها، دخلت ترضعها جوه.
ياسين: وأنا هتجوز مين؟
نجمة: هتتجوز غزالة بنتي.
ياسين: لأ، انتي مجنونة، وممكن تاكليني.
نجمة: خد هنا يا واد، مين اللي جالك كده؟ أنا خالتك حبيبتك.
ياسين: عمو زيدان هو اللي قاللي كده.
صقر: والله وهنترحم عليك يا زيدان.
زيدان: أنا برضه جلتلك كده يا حبيبي؟
ياسين: آه، قلتلي.
نجمة: زيدان، خد عيالك غير لهم، أحسن تشوف الجنان على أصله.
زيدان: آه طبعًا، عيالي حبايبي، تعالوا، ربنا يهدي الجو.
نجمة: عتقول حاجة؟
زيدان: أبدًا يا حبيبتي.
_______________________________________
تمر الأيام سريعًا، وفي اليوم المنتظر، يوم السبوع، الجميع متجمع في المنزل كانت الأجواء مليئة بالفرح والسرور.
جمريه: "ممكن يا صجر، بعد السبوع أروح الجبّانة أزور المرحوم أبوي؟"
صقر: "حاضر يا حبيبتي، إن شاء الله نزوره ونزور هيام بس انتي لسه نفسه وهتتعبي."
جمريه: "لا، أنا زينة والله
ذهبت جمريه لتجلس مع رضوى
جمريه :ميته عتولدي والبالونه ديتي تخف شكلك عامله زي الكوره
رضوي تضحك : عندك حق تتريقي ما انتي خلاص ولدتي أنا لولا الحمل اللى قبل ده نزل كان زماني والده قبلك وانا اللي بتريق عليكي
جمريه: عضحك معاكي إن شاءالله تجومي بالسلامه وربنا يكملك حملك علي خير وتجيبلنا احلي نجاه الصغيره
رضوى: يارب ياحبيبتي
في الأثناء، كان صوت نجمة يعكر أجواء الفرح قليلاً، حيث كانت تصرخ في المطبخ.
نجمة: "أما تعالي شيلي غزالة، عما تبكي!
غزالة :يا بت عما نحضّر الأكل للناس!"
نجمة: "والله أغير اسمها، مش كفاية مسمينها على اسمك ."
غزالة: "أبوها هو اللي سماها على اسمي. مالك يا بت، خلجك ضيق ليه كده؟ ما تتحمّليش عيالك."
محاسن: "أما يا أما
غزالة : عاوزة إيه انتي كمان؟
محاسن:شوفي عمار جابلي إيه، مصحف دهب كبير عشان السبوع!"
نجمة: "أشمعنى أنا؟ زيدان ما جابليش حاجة ليه؟"
زيدان: "سامعك، خدي يا ستي، جبتلك جوز غوايش، يا رب يتمر فيكي."
نجمة: "هات طيب، أحسن من عينك."
زيدان :نجمه وبعدين معاكي
محاسن :تعالي نشوفو صجر جاب ايه لجمريه
نجمه: لو علي صجر يجيبلها الدنيا كلها
وفعلا بيروحو لجمريه
نجمه: شوفتي المدهول علي عينه زيدان جابلي ايه جمريه: الف مبروك
محاسن :وعمار جابلي ديتي وانتي بجى صجر اخوي جابلك ايه
جمريه :أنا كفايه عليا صجر وعيالي الدنيا وما فيها محاسن: العشج حراج جوي
جمريه: اتحشمي يابت
لياأتي صقر
صقر: جمريه الصجر فينها
جمريه: أنا اهه ياصجري
صقر :هديتك يا ام الغاليين
نجمه: عاوزين نشوفوها مش احنا ورناكي حاجتنا
صقر :وريهم يا ام الغاليين
جمريه: بتفتح الهديه بتلاقي سلسله كبيره ومكتوب عليها جمريه الصقر
انتهت قصتنا مع لحظات من الفرح والذكريات الجميلة. رغم التحديات، كانت العائلة دائمًا مع بعضها في كل لحظة. الحب والدعم بين أفرادها أقوى من أي شيء. القصص قد تنتهي، لكن الذكريات تظل حية في القلب.
تمت بحمد الله
( مستنيه رئيكم ) ❤❤
يتبع الفصل كاملا اضغط هنا ملحوظه اكتب في جوجل "رواية جمرية الصقر دليل الروايات" لكي تظهر لك كاملة
•تابع الفصل التالي "رواية جمرية الصقر" اضغط على اسم الرواية