رواية اللقاء الثاني الفصل السابع 7 - بقلم منة محمد
في كافيه
مؤمن طلع ظرف وحدفه قدامها: امسكي دول 2000 جنيه اظن مبلغ مش شويه شوفيهم
كادي اخدتهم منه وبسخريه : انت طلعت غني اكتر مما توقعت سمعت انك عاطل عن العمل ولا اهلك دفعولك
مؤمن: شغلي اهلي ملهمش دعوة بيه وانتي اعملي حسابك المره الجايه تبصي كويس قبل ما تخبطي حد لان غيري مش هيسيبك تفلتي لمجرد انك بس بنت
كادي بأبتسامه عريضه: يعني عايز تقول ان شاب لطيف زيك عاملني برئفه بصراحه طريقتك لطيفه وبشكرك جدا عليها
مؤمن : والنبي بلاش تتريقي كده ع اي حال الي بينا انتهي هنا سلام
كادي : انت ماشي
مؤمن : امال اقعد اشيش معاكي مثلا
كادي مسكت الظرف وقالت بخبث : لا خدني اتسوق تسمح لي اخدك معايا ساعه
مؤمن : هو انتي عبيطه
كادي: لاء بس عمري ما شلت فلوس نقدي لوحدي لحد دلوقت افرض اتسرقت
مؤمن بنرفزه :وانا مالي دي مشكلتك
كادي :كدا امال فين الشهامه وجدعنه ولاد البلد
مؤمن: انتي بجد مزعجه اوي يله اتحركي
بالفعل مؤمن اخدها لقاها بتطلب منه يقف جنب مول للاغنياء ونزلت ودخلت وبقت تختار اغلي حاجه وكلها ماركات وبرندات
مؤمن : انتي من عايله غنيه يا( حدف الاكياس بغيظ) ها
كادي قلدته بطريقه جميله اوي: هاه
مؤمن بعصبيه: ازاي تصرفي 45 الف دفعه واحده في لفه واحده انتي اهلك مليونيرات اوي كده
كادي : ايوه احنا عيله غنيه شويه وبصراحه مش انا الي بكسب الفلوس انا الي بصرفها في الواقع
مؤمن :ده انتي صرفتي مرتب موظف اشتغل سنه وفخوره اوي بنفسك انتي عارفه انا عملت ايه عشان اجبلك 2000 جنيه
كادي :المهم متكنش سرقته وبعدين انا مشترتش كل الحاجه ليا عشانك كمان
مؤمن: بس انتي قلتيلي للبيست فريند
كادي: بالظبط وللسبب ده بدهملك
مؤمن بسخرية من كلامها : انتي تعبانه في دماغك
كادي : هما عيلتي في الواقع بينادوني يا مجنونه بس انا متفتحه شويه وصعب تلاقي بنت كيوت زي
مؤمن :جوابي هو لاء لاننا من طبقات اجتماعيه مختلفه تمام ممكن تشيلي حملك بنفسك وخلينا منشوفش خلقه بعض تاني سعيده
كادي دبدبت ع الارض برجليها : استني يا مؤمن هناكل سوي الاول انا جعانه
كادي تلفونها رن ردت :نعم يا باباتي
ابوها : متسأليش كتير خدي بعضك وروحي لـ اختك
كااي :منا بروحلها تفضل تقولي مشغوله من غير ما تبص لخلقتي حتي
ابوها : اختك مرحتش الشغل النهارده ودي اول مره تحصل
كادي برقت عيونها: معقول
ابوها :يله روحي شوفيها حالا واتصلي بيا
……………………………….قصص منه محمد كاتب…………………….
بسمله من بعد ما رفض اسامه يشتغل معاها نفسيتها تعبت ورقدت في السرير لحد ما لقت الباب بيخبط
كادي: افتحي يا بسمله انا كادي
بسمله قامت لبست الروب واتسندت ع الحيطه وطلعت فتحتلها
كادي بخضه: انتي كويسه
الداده نبره قلق : مالك يا حبيبتي حاسه بأيه
بسمله : انا كويسه.
كادي جثت جبهتها :لاء مش سخنه
بسمله بأبتسامه: انا بخير
الداده دخلت المطبخ الامريكاني وقالت لها :انا عملتلك شوربه خضار هحطلك ليمون اشربي منها شويه
بسمله: استني يا داده مليش نفس هاكل بعدين
كادي :كلي حاجه دافيه عشان تخفي باباتي كان بجد قلقان عليكي
بسمله : بلغيه اني كويسه انا بس مجهده شويه
كادي : وانا هفضل معاكي لحد ما تخفي استني هجبلك شوربه ماشي
الداده قعدت قدامها بحنان بالغ : انتي متأكده مش عايزه تروحي مستشفي
بسمله بهدوء:ايوه
الداده: معرفش اجبهالك ازاي بسمله انتي لازم تتجوزي يابنتي ماهو مش معقول هتفضلي عايشه كده في شقه لوحدك والفرصه لسه قدامك ليه تضيعيها وتلاقي نفسك بتكبري ومحدش جنبك
بسمله : صدقيني ياداده انا كده مرتاحه
الداده: نصيحه يا بنتي بلاش توقفي حياتك انتي الف شاب يتمناكي ولا انتي لسه مستنيه حبيبك
بسمله عيونها رغرغت بالدموع : ايوه يا داده مستنياه
الداده: بس هو اتجوز وعاش حياته وانتي لسه مكانك بجد مزهقتيش
بسمله بدموع مقهوره : انا وعدته مش هكون لراجل غيره لاني بجد مش عايزه غيره وعايشه ع ذكريتنا سوي لاني بجد مش قادره اتخيل نفسي مع راجل غيره فهماني ياداده
الداده طبطب عليها : فهماكي ياقلب داده وانا مكنش قصدي اقلب عليكي المواجع ربنا يسعدك وينولك مرادك يا بنتي
بسمله موبيلها رن بأسمه ابتسمت اوي وردت بلهفه: الو
اسامه : سمعت انك واخده اجازه اليوم انتي تعبانه
بسمله: اظاهر لازم اعمل مؤتمر صحفي واقول اني بخير انا بس محتاجه ارتاح شويه
اسامه : مش قلتي من قبل انك بتتعبي لو مشتغلتيش
بسمله :وهتيجي تطمن عليا
اسامه: لاء انا بس حبيت ابلغك ان الفندق الجوهره حلمك بيتباع وخالد حاطط عينه عليه
#فلاش
ماشين سوي ومره واحده بسمله وقفت قدام فندق
اسامه بصلها: في ايه يا روحي ووقفتي هنا ليه
بسمله : ابدا تعرف حلمي اشتري الفندق ده ويبقي بتاعنا انا وانت
اسامه شدها من ايدها: امشي يا ماما واحلمي ع قدنا
بسمله بغيظ: تصدق انا غلطانه طيب مش هقولك حاجه عن احلامي تاني ابدا
اسامه ضحك: خلاص خلاص بهزر معاكي قوليلي اشمعني الفندق ده يعني
بسمله: اصل ماما كانت بتحب تيجي فيه هنا كتير عشان كده نفسي اشتريه اوي
اسامه : طيب ايه الي حايشك كلمي ابوكي هو يشتريه
بسمله : لاء الفندق ده انا وانت ان شاء الله هنشتريه ونرقص فيه
اسامه : نرقص لا ارقصي فيه لوحدك انا مش برقص
بسمله بتخبطه في صدره بأيدها الاتنين: تصدق انا مش هكلمك تاني
اسامه مسك ايدها وضحك : طيب بقولك ايه
بسمله كشرت فيه : متقولش حاجه خلاص
اسامه بنبره كلها شغف : بحبك
بسمله بنعومه: ياخرابي وانا بحبك اكتر
اسامه بصلها وابتسم : بقول بعد ما اخلص الكليه واشتغل هروح اطلبك من ابوكي
بسمله : وانا بقولك موافقه عليك من دلوقت
اسامه: يعني مش هترجعي تندمي
بسمله: مستحيل لانك مش هتكرر تاني في حياتي وعمري وعارفه مفيش حد يملك عظمه روحك بحبك يا اسامه بكل حته فيك اوعي تسبني يا اسامه
اسامه مسكها من وسطها : اسيبك ازاي وانتي كل حياتي انا معاكي وعمري ما هسيبك انا مكنتش احلم اصلا بواحده زيك
…………………..قصص منه محمد كاتب………………
في مكتب خالد دخلت أأعدت وحطت رجل ع التانيه وقدمت له ورقه
خالد بستفهام: ايه ده
انغام بهدوء: افتحها في البيت قلت امك هتعمل مشكله فريحت دماغي وجتلك مكتبك
خالد: والا هتطلبي الطلاق ده الاحل الامثل عندك
انغام : انا مش مصممه ع الطلاق لاني عايزه اكمل حياتي معاك متنساش عندي منك بنتين
خالد بعد القراءه: وقصاده عايزه جزء من الاسهم
انغام : انا عايزه ابقي صريحه معاك وواضحه واعرف حق بناتي والي هياخدوه منك بعدين
خالد : وانتي معتقده امي هتوافق ع شرطك
انغام : عشان كدا محتاجه موافقتك وبالطريقه دي مش هتقدر تعمل حاجه وبعدين انا عايزك توقع دلوقت
خالد : وانتي شايفه ان ده حقك
انغام: انت شايف ايه هتجيب ابنك البيت وهتضيفه ع شجره عايلتك وانا موافقه تعمل كده من غير حرب عليه واقدر اخد فلوس وقت ما اعوز
خالد : يعني هتقبلي هادي لو بس وافقت ع شرطك
انغام بنظرات خبيثه: وانت هتحقق امنيتك ويعيش هادي معاك تحت سقف بيت واحد وهعامله زي بناتي الي هيعيشوا اميرات لما ائمن حياتهم بالفلوس دي
خالد رفع حاجب بغيظ: انتي ناصحه اوي يا انغام
انغام قامت وهي بتعلق شنطتها وقالت بلغه تهديد: ده افضل حاجه ممكن اعمله معاك في اسوء الحالات واتمني تاخد القرار السليم عشان المركب تمشي ولو قليت عقلك وغدرت بيا وطلقتني مش هسيبك يا خالد وهدمر سمعتك
……………………قصص منه محمد كاتب……………………..
اسامه راح لبيت حماه لانه قرر يبعد عن زينب لقاه خليل راجع من الشغل
خليل بضحكه: اهلا يا جوز بنتي ايه الي جابك لحد هنا
اسامه : انت نازل تاني ياعمي
خليل: لاء هروح فين ده انا لسه راجع بس انت عندك حاجه نوحينا
اسامه :جيت اشوفك واسلم عليك
خليل بتوجس: ليه خير
اسامه: انا مسافر بلد تانيه يومين كده
خليل :ليه لقيت شغل طمني يابني
اسامه هز دماغه: ايوه
خليل بسعاده ع ملامحه: الف مبروك وزينب قالت ايه لما قولتلها
اسامه: لسه مبلغتهاش
خليل :انت الحاجه الوحيده الي بنتي بتفكر فيها ولو ساعات بتتعصب عليك كبر عقلك انت
اسامه :والله انا بحاول دايما اكبر واعمل كده
خليل : وانا هسيبكم المره دي ع راحتكم عشان مش عايز ادخل ما بينكم لاني عارف انك بتحبها وانا مكنتش غلطان لما جوزتهالك وسامحني يابني اني مش عارف اساعد انت شايف الظروف
اسامه: ولا يهمك
خليل: اسامه زينب اتحملت مسؤليه البيت من وهي في اعدادي بدل امها الله يرحمها كانوا الاتنين اصحاب بيخرجوا يشتروا كل حاجه مع بعض وعمرها ما ابتسمت ابدا هي بتخاف تظهر مشاعرها وانا بصراحه معرفش من اول ما اتقدمتلها ودخلت حياتها اتغيرت وقتها بس ابتسمت زي الطفله لما طلعت من نصيبها
اسامه :الف شكر
خليل :ربنا يسعدكم وتعيشوا طول العمر في سعاده ده كل الي بتمناه من قلبي يابني
اسامه: ان شاء الله ياعمي
خليل: يله روح شوف شغلك
اسامه دخل اخد هدومه وكتب رساله لزينب محتواها (انا هسيب البيت الليله وبلغت ابوكي اني مسافر شغل في بلد تانيه انا مش هتظاهر اني كويس بعد دلوقت زي ما اتهمتيني هبعد عنك وافكر في علاقتنا وجوزنا والموضوع مش هيطول عشان كدا من فضلك استنيني
……………………….قصص منه محمد كاتب……………………………..
في شقه ابراهيم
ابراهيم نزل تحت اخد منه الشنط وطلع بيها لسلم ودخل حطها ع الارض: ايه يابني جبت الهدوم بالدولاب وبعدين مش كنت تقولي فيه زحمه مرور هنا
اسامه: منا عارف شقتك نفس المكان الي عشت فيه وانا طالب ولسه زي ماهي زريبه بهايم
ابراهيم وفع عليه الشنطه بغيظ وقال: تحب اضربك بالشنطه
اسامه ضحك: انا بهزر متعصبش ممكن افضل معاك هنا يومين
ابراهيم: دي مبقتش زريبه دي عشه فراخ مهاجره
اسامه بتريقه :وانت بقي الفرخه
ابراهيم: والله بحاول احافظ ع نضافه الشقه بس مش بعرف
اسامه: هي مراتك موحشتكش ما ترجعلها بقي
ابراهيم: هو انا ممكن الطشك بالقلم وقولي هتتألم ولا لاء انا وهي مستحيل نرجع لبعض تاني ابدا
اسامه: انا اسف كان سؤال غبي
ابراهيم بكل جدية: مالك يا صاحبي انت ومراتك المشاكل كبيره بينكم
اسامه اتنهد بعمق وقاله: دي حكايه طويله
ابراهيم : كل ما يبقي عندنا وقت فراغ احكيلي جزء منها اما دلوقت هدخل اعمل لقمه مع كوبيتين شاي ناكل وننزل نقعد ع القهوه
اسامه: وانا هقوم اخد دش واغير
ابراهيم لف ايده حوالين رقبته وبيضربه بهزار: اه تعال
…………………………………………..
فوقيه بسعاده : قلت ايه ياخالد عندك ولد وعنده ست سنين
خالد هز دماغه : ايوه
فوقيه: انا فرحانه كأني بسمع موسيقي وايه عن امه وهو فين واتربي فين
خالد ابتسم : هقولك واحده واحده خدي نفس
فوقيه: لا يمكن اتنفس انا مبسوطه ان ابني عنده ابن وهيخلد اسم ابوك ونضيفه لشجره العايله بقولك ايه مش لازم نتكلم هنا مراتك ممكن تسمع قوم نتكلم بره
خالد : ماما انغام عارفه
فوقيه بذهول: ايه ازاي
خالد حط ظرف قدامها وقال : وعايزني اوقع ع الشرط ده كمان عشان توافق اجيبه البيت هتاخد من اسهم الشركه ليها ولبناتها
فوقيه لبست النضاره ودققت في الورقه وحدفتها بغضب : هي مفكره نفسها مين بنت بياع اللحمه هي جاتلك بكام عشان تاخد اسهم انا مش هديها ولا مليم
خالد : خلينا نوافق ع الي بتقوله وخلاص عشان اجيب هادي البيت من غير مشاكل
فوقيه بزعيق: ابدا مش هيحصل
انغام نزلت وقعدت بغرور: ليه مش انا اتجوزته عشان طمعانه في فلوسه واخد منها وقت ما اعوز وانتي بقي عندك حفيد الي حلمتي كتير بيه وانا هكافئ نفسي بالفلوس عشان اربي عيل مش ابني والافضل بلاش نفتح في الموضوع كتير
فوقيه انفعلت : اه يا منحطه يا جشعه يا طماعه
انغام: قولي الي تقوليه لانه مبقاش بيهمني
………………………………
ع قوه بلدي
ابراهيم: يعني مبدئيا انت ساعدتها في شغلها واهتميت بيها
اسامه: بزمتك مش قصه حلوه
ابراهيم ضحك: هي حلوه لما تبقي جنب حبيبتك الي حبيتها وكمان قبضتك كويس
اسامه كشر: ده الي همك
ابراهيم: اقولك ايه بس بسمله هانم نجدتك من السجن بطريقه محترمه ومراتك فكرتك خنتها وقلبت الدنيا عليك بس قولي صحيح انت مراتك راحت فين لما سيبتها وقعدت مع بسمله
اسامه :رجعت قبلي
ابراهيم : وسابتك انت وبسمله لوحدكم
اسامه :ايوه
ابراهيم: واتخانقتوا بسبب كده
اسامه حرك دماغه بنفي: لاء
ابراهيم: امال حصل ايه
اسامه اتنهد بضيق :زينب مفكره حصل علاقه بيني وبين بسمله بس والله ما حصل
اسامه: انا مش مراتك ومصدقك بس مراتك حقها تفكر الظن فيك وسوء الفهم بيؤدي للشك والشك بيؤدي للتاكيد ده تخصص الحريم يا اسامه
اسامه :عشان كده اتمسكت
ابراهيم :ايه اتمسكت
اسامه: ايوه بعترف انا لسه بحب بسمله وكان نفسي اشوفها تاني حتي لو مره واحده بس مش بكرهه زينب لكن بسمله هي الي في عقلي وعايز ع طول اشوفها واكلمها
…………………………..
انغام دخلت تاخد شور وخالد قام مسك موبيله واتصل بزينب
زينب: الو يا مستر خالد
خالد: انتم بخير وهادي كويس
زينب: اه الحمد لله
خالد : انا اتصلت ابلغك اننا خلاص اتفاقنا ع كل حاجه مراتي هتيجي تاخد منك هادي
زينب: بس كان الافضل لو كنت جيت انت
خالد نفسي لكن يومي محجوز بالكامل
زينب: تمام همهدله الامر
خالد :مدام زينب
زينب: افندم
خالد :شكرا ليكي ع كل حاجه
زينب: ع ايه انا عملت شغلي
خالد : هنتقابل تاني عشان الحساب الي بينا
زينب: ان شاء الله انا هقفل دلوقت
انغام طلعت من التوالت وراحت قعدت قدام المرايا ولفت بصتله اتكلمت بحقد وقالت : لو عايز جيبها تشتغل هنا عشان الاولاد يتفرجوا وانت بتتغزل فيها مش عندي حق
خالد ملامحه جامده وجاده: هادي هيكون خايف من فضلك اهتمي بيه كويس لما تجبيه لحد هنا
انغام :طبعا هيجيلنا فرد جديد في العيله متقلقش عليه من بناتك هعمل كل الي في وسعي
خالد بقلق منها قال: انا بطلب منك في منتهي اللطف
انغام :متخافش مش هكون مراه اب متوحشه زي الي بنسمع عنها في الروايات الخياليه
………………………….قصص منه محمد كاتب…………………….
رايحه جايه ع نار منتظره وصوله بفارغ الصبر لحد ما دخل ووراه انغام
فوقيه جريت عليه بلهفه ومسكت وشه بين ايدها: انت جيت اهلا وسهلا نورت بيت ابوك ماشاء الله كلك ابوك الخالق الناطق انا متاكده انك من العيله دي مفيش ذره شك ابدا
هادي: ازيك
فوقيه مبتسمه: الحمد لله انا جدتك ام ابوك اهلا كنت فين طول الوقت ده ليه مجيتش بدري
انغام بتكشيره : يا بنات ليه لسه قاعدين تعالوا سلموا ع اخوكم
البنت الكبيره بصتله بكره شديد وطلعت تجري ع فوق
فوقيه بغيظ: اه يا جلابه المشاكل
بنت تانيه بغضب: خد بالك انا اتولدت الاول عشان كده انا اكبر منك
فوقيه طبطب ع هادي بحنان: متشغلش بالك بكره يتعودوا عليك انغام خديه فرجيه اوضته
انغام اخدته وطلعت وفتحت الدولاب وبدئت ترص هدومه بغيظ لحد ما موبيلها رن برقم خالد
انغام مدتهوله بحده : امسك ابوك عايز يكلمك
هادي اخد منها الموبيل وقال: ايوه يا بابا
خالد: ها شوفت جدتك
هادي: ايوه
خالد: قالت لك انت قد ايه وسيم
هادي: قالت لي اني بشبهك
خالد بضحكه عاليه: طبعا انت ابني الجميل شوفت اخواتك البنات
هادي: شوفتهم بس متكلمناش كتير
خالد: متقلقش بكره تقربوا اكتر من بعض اديني ماما انغام
هادي رحلها: اتفضلي التلفون
انغام حطته ع ودنها وبحده : خير
خالد: ممكن تتكلمي مع البنات يتعاملوا بحب مع اخوهم
انغام بغيظ : اظن دي مهمتك انت تيجي تكلمهم تديهم درس اعمل الي انت عايزه
انغام قفلت السكه ومسكت دماغها ولفت وبصت لهادي: الحمام اخر الطرقه اغسل ايدك
هادي بخوف: حاضر
انغام: هنا هيكون بيتك الحقيقي من اليوم انت خايف
هادي: شويه
انغام: مش اكتر مني انزل لما اندهلك ع العشي
…………………قصص منه محمد كاتب……….
قاعده في الارض ع ركبها ورافعه ايدها الاتنين لفوق
الداده: الحمد لله بسمله وصلت يا رؤف بيه
رؤف بنفعال : انتي الي اتصلتي بيها وخلتيها تضيع جدولها المزحوم
بسمله قعدت وبصتله بهدوء : بابا ممكن تهدأ كادي اتعاقبت ساعتين
رؤف شاور بالحزام الي في ايده: تلاثه شهور مش كفايه عشان تتعلم الادب عارفه مقصوفه الرقبه دي صرفت في المول كام عشان تشتري كل ده
الداده: هي قالت لي اخدت هديه من واحده صاحبتها
رؤف بصلها بغيظ : عايزه تتعاقبي انتي كمان
بسمله: بابا كادي مش طفله عشان تذنبها ترفع ايدها كعقاب
رؤف: ماهو ده الي معصبني انها مش طفله بقت شاحطه قوليلي الحاجات دي اتكلفت كام
كادي: 45 الف
رؤف: شايفه كل يومين تصرف مبالغ بالوفات
بسمله: بجد ياكادي
كادي: اعمل ايه لقتهم عاملين خصم بصراحه اغراني
رؤف ضربها بالحزام ع خفيف : مش عشان ليكي لسان يبقي من حقك تتكلمي انتي اصغر بنت في العيله وصرفتي فلوس زي الرز هتخربي بيتي وبيت اختك كمان
كادي: اختي معاها فلوس كتير مقدرش افلسها مهما صرفت
بسمله بتحذير: كادي اسكتي
رؤف: اختك من اول ما خلصت جامعه وهي بتشتغل وبتاكل مع الموظفين لما كانت اصغر منك برغم انتي حياتك عايشها في رفاهيه لان اختك اشتغلت ليل مع نهار حتي رفضت تتجوز وواصلت الشغل عشان شغلنا يوصل للمستوي ده
كادي قامت وبنفعال: هي مكنتش بتشتغل عشاني انا لوحدي ومش ذنبي انها متجوزتش
رؤف: انتي بتقولي ايه
بسمله : كادي قلت خلاص اسكتي
كادي: انتي ضيعتي حياتك بسببه رفضتي تتجوزي بسببه لكن لو قدامك راجل ياريت تلحقي نفسك وتتجوزيه عشان تعيشي حياتك
بسمله صرخت فيها : كادي
كادي بعصبية و صرخه: انا مش هفضل اتحمل يطلع غضبه منك فيا ( طلعت للباب)
الداده طلعت تجري وراها: كادي
رؤف بصوت عالي يخوف: سبيها تغور واقفلي الباب ومتخلهاش تدخل ( بص لبسمله) هي كانت تقصد ايه انتي بتحبي
بسمله: متخدش ع كلامها دي بتهرتل
رؤف قام من مكانه : انتي كمان مش عاقله حتي لو كنتي اكبر منها
…………….قصص منه محمد كاتب……………………………..
في شركه بسمله
الاستقبال ع التلفون : فيه ضيف عايز يشوفك اسمه اسامه عبد المجيد بس مش مكتوب اسمه في جدولك المفروض اعمل ايه
بسمله بهدوء: خاليه يدخل فورا
اسامه خبط ودخل بصلها شويه وهي كذالك وبعدين قرب من مكتبها ووقف
بسمله رجعت دهرها لوري وقالت: بجد مفاجاه بس هو احنا بينا حاجه تانيه نتكلم فيها
اسامه : سمعت انك بتعيني موظفين من فضلك خليني اساعدك في مشروعك الجديد
بسمله بتعجب: ليه دلوقت مش كنت رافض
اسامه :وقبلت هبيعلك وقتي لثلاثه شهور او تلات اسابيع موافقه تشتري وقتي تاني
بسمله بأكبر علامه استفهام: وايه السبب وري طلبك وانت استهانت بعرضي قبل كده اكيد فيه سبب خفي عشان تغير رآيك فجاه
اسامه: عايز احقق هدف ومش عايز منك مرتب انا عايز احط نفسي في اختبار واشوف انا لحد فين قادر اساعدك تاخدي الفندق الي هو حلمك وانتي عليكي تقرري لو كنت انا الشخص المطلوب الي محتاجاله جنبك وانتي بتحققي حلمك
بسمله بصتله شويه وقامت راحت له وقعدت : هتفضل واقف اقعد
اسامه قعد وبصلها
بسمله : انا متاكده ان مساعدتك هتفيدني جدا لو انضميت لفريقنا وبعترف انك الشخص المطلوب لتحقق حلمي بس عندي قواعد في الشركه هنا يعني لازم اعينك بسبب منطقي او لظروف خاصه
اسامه بكل ثقة: قوليلي مطلوب اعمل ايه وانا اعمله لو عايزه امكانيات اكتر انا مستعد لو عايزه تجربيني مستعد انتي قوليلي بس مطلوب مني ايه
بسمله ابتسمتله: واضح انك مش هتسلم ومصمم تبقي معايا
اسامه: بالظبط كده
بسمله : اوكيه شوف الفندق خالد حاطط عينه عليه وعايز يحاربني وياخده مني بس احنا معندناش اي معلومات عن صاحبه وانت مهمتك تجمعلي كل حاجه عنه وده هيكون بمثابه اختبار تاخد وظيفه تحت ظروف معينه
اسامه :ده بس الي عايزه تعرفيه
بسمله: متطمنش الموضوع مش هيبقي بالسهوله الي مفكرها
اسامه مره واحده قام وقف: وانا متاكد انك مش هتقولي ده لو المهمه مكنتش صعبه بس انا هبذل كل الي عندي واجبلك قراره
استوب ورايكم ونكمل ياتري اسامه وبسمله حكايتهم هتوصل لحد فين
انغام هتعمل ايه مع هادي وتعامله ازاي
زينب هتعمل ايه في بسمله لما تعرف ان اسامه شغال معاها
- يتبع الفصل التالي اضغط على ( رواية اللقاء الثاني) اسم الرواية