رواية ابيض و اسود (2) الفصل الثاني عشر 12 - بقلم منى محمود
ابيض واسود
الجزء الثاني
مني محمود بركات
الفصل الثاني عشر
=============
في عربية مهاب كان موجه المسدس علي رأس أحمد وهو بيقول هي فين
أحمد كان متوقع رد فعل مهاب عشان كدة أتصرف ببرود وهدوء... أبتسم ابتسامة خفيفة وهو بيقول
ــ شيل بس المسدس دا كدة لانه ملوش أي لازمة أنا اللي جتلك وأنا واللي قلتلك هعرفك الحقيقة ف أهدي كدة وأسمعني عشان مفيش وقت
ــ أنطق ؟
ــ نيرة رجعت مصر من يومين بس ... وخد الكبيرة كمان نصر عارف إنها في مصر وعارف مكانها بس عمره ما هيقولك
اتصدم مهاب إن نصر يعرف معلومة زي دي وقبل ما يفوق من صدمته كمل أحمد
ــ أنا قلتلك قبل ما نخرج من القصر أن أي كلمة هقولهالك هيكون معاها أكتر من دليل وأنا قد كلامي يا مهاب
طلع ورق مطبق من جيبة وأداهولو وهو بيقول
- أتفضل دا عنوان الشقة اللي قاعدة فيها نيرة واللي حكايتها غير ما حكالك نصر خالص علي فكرة
- وأنت بقا اللي عارف حكايتها الحقيقية ؟
- أه يا مهاب لأني أنا اللي كنت مسؤل عن كل كلمة أتقالتلك و صدقتها
- إزاي ؟
- نيرة أنتقمت منك أنت و عيلتك بسبب اللي حصل لابوها وأمها نيرة عارفة اللي أهلك عملوه وإنك كنت عارف وساكت عشان تتجوزها وقررت تنتقم منكم كلكم ولما حققت أنتقامها سافرت ل حبيبها أمريكا واللي بالمناسبة متجوزاه هناك بورق مضروب ومخلفة منه كمان بنت
- أنت بتقول ايه أنت بتخرف يا أحمد
- متقاطعنيش و خليني أحكيلك كل حاجة مفيش وقت قلتلك
- كمل
- لما سافرت أهلك حطوك في مصحة تتعالج رغم إن نصر قدر يوصل للدكتور واداله مبلغ عشان يقولهم إن حالتك ميؤس منها و ملهاش علاج إلا إن بهاء مسكتش وفضل مكمل في علاجك نصر وقتها فكر فعلاً في قتلك عشان يوجع بهاء بس تراجع ف آخر لحظة ودبر موضوع موتك و دفنك ووقتها دا مكنش صعب خالص عليه ولما أنت فوقت ولاقيت نفسك في مكان غريب
فلاش باك
فاق مهاب وهو حاسس بصداع شديد لدرجة إنه مكنش قادر يفتح عينيه ... بعد كذا محاولة فتح عينيه لاقي انه جوة اوضة مختلفة عن الاوضة اللي كان قاعد فيها ف المصحة وقدامة راجل أول مرة يشوفه أتكلم بتعب شديد
- أنا فين ؟ وأنت مين ؟
- أنا إسمي نصر عبد الرحمن وأنت في مستشفي تانية غير اللي كنت فيها تقدر تقول كدة إني أنقذت حياتك من الموت مرتين رغم إنك متعرفنيش
- أنا حاسس بصداع شديد أول مرة يجيلي آآآه انت مين يا عم أنت وفين بهاء ( بدء ينادى بصوت عالي ) بهااااااااااء يا بهااااااااااااء
ضحك نصر بسخرية
- معقول بتنده علي اللي كان السبب في كل اللي حصلك
أتكلم مهاب المرة دي بعصبية شديدة
- بقولك ايه يا تقول أنت مين علي طول يا تطلع بره وتبعتلي بهاء
- ما قلتلك أنا نصر عبد الرحمن
- مين يعني نصر عبد الرحمن مش فاهم بردوا
حكاله نصر حكايته مع بهاء كاملة من غير أى كذب فيها و كمل
- أنا حكيتلك كل اللي حصل عشان أقولك إن تارنا واحد من عيلة الدميري وقبل ما تقولي وأنت مالك وتار ايه اللي ليك عندهم خليني أعرفك اللي متعرفوش ... نيرة مراتك عملت كل دا عشان تاخد الثروة كلها لنفسها لما أنت تنهار وتموت بالبطيء أبوك هيموت وراك وعمتك هي كانت مظبطاها مع شريف أنه يمضيها علي تنازل عن نصيبها وقبل ما تسال مين شريف هخليه هو بنفسه يحكيلك عشان تصدقني المهم نيرة خططت لكل حاجة صح عشان تبقي هي صاحبة الكلمة الاولي والأخيرة وتقدر تاخد توكيل من معتز بك والدك وتبيع لنفسها كل حاجة بس اللي مكنتش عاملة حسابه إن شريف لما شاف حالتك عاملة ازاي صعبت عليه ومقدرش يكمل في اللي بيعمله أنهي مع عمتك كل حاجة ورجعلها كل فلوسها وراح ل بهاء ومعتز بك و حكالهم كل حاجة عشان يخلص ضميره قدام ربنا وهما بقا رد فعلهم كان إيه تخيل ؟
مهاب ساكت ومستنيه يكمل كلامة مكنش قادر حتي يرد عليه
- أكملك أنا ... أبوك و عمتك و أخوك خافوا من الفضايح وأسمهم اللي هيتهز في السوق وقرروا يواجهوا نيرة ويحاولوا معاها ولأنهم عارفين إنها هتخاف تروح القصر خلوا المقابلة ف بيت بهاء
طلع تليفونه من جيبه وشغل فيديو من غير صوت ل نيرة وهو في شقة بهاء وبتتكلم معاه
- شوفت شوفت بهاء واقف بكل هدوء إزاي يتكلم مع اللي دمرت حياتك شوفت لا متعصب ولا غضبان إزاي للأسف أنا حاولت أوصل ل صوت الفيديو بس مقدرتش ... المهم نيرة رفضت وقالتله انها باعت كل حاجة خلاص و سابت البلد وسافرت وهما رضيوا باللي حصل وكملوا ب نصيب عمتك اللي شريف رجعهولها وسابك بهاء ف المصحة اللي كنت فيها واللي كانت نيرة موصية عليك فيها عشان تقضي عليك للأبد ولما ممرض هناك حاول يوصل لأهلك و يقولهم إن في حد بيحاول يخلص منك رفضوا يسمعوه و طردوه و الممرض دا بره علي فكرة هتسمعه هو كمان بنفسك وقتها أنا بصراحة كنت بفكر أنتقم من بهاء فيك بس لما عرفت اللي حصلك كله ولما وصلت للممرض وقالي إن أهلك مش مهتمين ب حالتك أصلآ هما شايفين إنهم عملوا اللي عليهم برميتك جوة المصحة وخلاص قررت أنقذك أنا وأعرفك حقيقتهم كلهم واحد واحد
باك
كمل احمد ..
ــ دا اللي قالوهولك لكنها مش الحقيقة الحقيقه هقولهالك بالتفصيل
وحكاله أحمد كل اللي حصل حقيقي من وقفة أهله جمبه لآخر لحظة ووقفة بهاء مع الكل .. ل هروب نيره ووصول نصر ليها وخطة إنتقامه من بهاء
أحمد
ــ نصر مغلول من بهاء وعايز قبل ما يقضي عليه يكسره رغم إنه عارف إن علاقتكم ببعض يعتبر منعدمة لكن عايز يوريله أن أهو أخوك كمان بقا قاتل ومجرم هتعمل ايه معاه ... العملية اللي أنت رايحها دي تمويه يا احمد نصر حاطط في المكان دا جثتين ومسدس عليه بصماتك في اللحظة اللي هتدخل فيها المكان البوليس هيكون وراك وزي ما عمل بهاء ولجأ للسوشيال ميديا نصر مجهز كذا بلوجر هيطلعوا يتكلموا على أخوك أنه دبر حادثة موتك وهو ظابط عشان يداري علي إدمانك والسكة الشمال اللي مشيت فيها ويجيبوا سيرة فيديو نعمة والكلام اللي قالته علي بهاء وبكده يبقي فاضل الضربة القاضية ودي للأسف تخص أختك بسمة
مهاب كان حاسس إنه مشلول عايز يتحرك مش قادر عايز يتكلم لسانه تقيل ومش مطواعه دموعه بس اللي نازلة ونظراته بتحكي عن كل الوجع اللي جواه ...
أحمد حس أنه وصل للي هو عايزة كان فاضل نقطة واحدة ويبقي خلص من مهاب ونصر في خطوة واحدة .. كان واثق أن نصر لو عرف اللي عمله واعترافاته ل مهاب هيصفيه في لحظة عشان كدة كان مقرر يطلع هو الطرف الوحيد الكسبان من كل دا
ــ أنا معرفش ناوي لأختك علي إيه مقالش قدامي وحاولت كتير معاه أننا نركز في شغلنا و يسيبه من عيلتك كلها لكنه رفض وقالي مش هيهدي غير لما يقضي عليكم كلكم وبالنسبة ل نيرة هي اللي اتواصلت مع نصر عشان يردلها جميله الفيديو اللي ادتهولوا من بيت بهاء والجميله دي أنها تحضر لحظة موتك الحقيقي وتحضر عزاك الحقيقي ولو أبوك فضل عايش بعدها هتشوفه وتشفي غليلها تاني منه وعشان كدة هي هنا ودا نسخة من مفتاح الشقه اللي هي قاعدة فيها لاني أنا اللي أجرتهالها وعملت نسخة من المفتاح قبل ما اسلمهولها ... أنا كدة عملت اللي عليا يا مهاب أنا هنزل هنا وانت شوف عايز تعمل إيه معاك عنوان الشقه وتقدر تواجهها بنفسك وتعرف الحقيقة لو شاكك في كلامي سلام يا مهاب
نزل من العربية وهو مبتسم و حاسس أنه كسب أول جولة وساب مهاب باصص للورقة اللي في ايديه بتوهان مش قادر يصدق أن كل اللي كان عارفه ومصدقه طلع وهم وسراب مش قادر يصدق أنه قتل عمته وهي اكتر حد كان بيحبه بعد ابوه مش قادر يصدق أنه ظلم بهاء السنين دي كلها ... اتنفس بسرعه كذا مرة ورا بعض ومسح دموعه بعصبية ودور العربيه وطلع علي العنوان ... لازم يواجهها مش هسمع من أحمد وبس لازم يواجهها
ـــــــــــــــــــــــــــــــــــــــــــــــــــــــــــــ
مهاب وصل العنوان ... كانت شقه في كمبوند جديد في التجمع منطقه هاديه وعدد السكان اللي فيها قليل ... بس قبل ما يتحرك وينزل من عربيته شاف عربية نصر قدام البيت والبودي جارد واقفين حوليها
ركن بعيد شوية ونزل ولف من ضهر العمارة ونط سور بتاع الجاردن وطلع بهدوء من غير ما حد يحس بيه
طلع علي الدور الثامن ولما وصل قدام باب الشقة وفتح بهدوووء ودخل وهو حريص أنه ميطلعش أي صوت عشان يسمع إيه بيتقال بينهم
نيرة
ــ طيب أنت جتلي بنفسك ليه ؟ كنت بعتلي لوكيشين ع مكان مهاب وأنا كنت هعرف أروح لوحدي
نصر
ــ لا طبعا المكان هناك خطر أخاف عليكي يا قطة أنا سايب رجالتي هناك هتصورلك كل حاجة مباشر صوت وصورة كمان وجيت بنفسي عشان نتفرج سوا
نيرة
ــ شكراً يا نصر وعدتني تخليني أكمل أنتقامي للآخر والنهاردة هتوفي بوعدك ليا أنا أه شوفته وهو زي المجنون وأهله محسورين عليه قبل ما أسافر لكن النهاردة هشوف روحه وهي بتطلع وهشوف أبوه تاني والمرة دي هعرفه اني عارفة كل حاجة هقف قدامه واقوله دا حق أبويا وأمي واخيرا جبته ... بجد مش عارفة أشكرك إزاي
نصر
ــ بصراحة في طريقه تقدري تشكريني بيها وتستفادي كمان دا لو حابه فعلا تشكريني
نيرة
ــ طريقة ايه دي
نصر
ـ جهاز صغير أوي هتحطيه وسط أدوات الميكب اب بتاعتك وإنتي مسافرة وتسلميه لحد هناك في أمريكا ونظير الخدمة دي فوق الشكر بتاعك هتاخدي نص مليون جنيه ايه رأيك ؟
نيرة 🙄
ـ دا جهاز ايه ؟ وأشمعني حاجات الميكب أب بتاعتي ؟
نصر
ــ هو مصمم علي شكل مربع زي علبة الآي شادو بالظبط هيتحط وسط الميكب أب مش هيبان أما بقا دا جهاز ايه ف بلاش تعرفي أحسن عشان سلامتك صدقيني حماية ليكي إنك متعرفيش حاجة عملية سهلة وبسيطة منها تشكريني ومنها تاخدي مبلغ حلو تدلعي نفسك أنتي وبنوتك بيه
نيره
ــ بس أنا معايا فلوس يا نصر مش محتاجة حاجة أنت ناسي إني خدت من عيلة مهاب كل حاجة قبل ما أسافر ولا إيه
نصر
ــ مش ناسي طبعاً بس نص مليون مش قليل يا نيرة والبحر يحب الزيادة
نيرة
ــ ولما اتمسك بيه بقى وأروح ورا الشمس هستفاد ايه أضيع كل اللي وصلت له عشان نص مليون بس نوو سوري مش موافقة
مهاب مستحملش يسمع اكتر من كدة ظهر قدامهم وهو موجه المسدس ليهم
مهاب
ــ أهلا أهلا بالناس الواطية
نيره ونصر اتصدموا من وجوده قدامهم وقبل ما مهاب ينطق أي كلمة تانيه وقبل ما نيرة نفسها تفوق من صدمتها كان نصر أسرع منهم هما الأتنين في ثانيه كان زاقق نيرة ناحية مهاب بقوة وخرج من الباب اللي مهاب كان سايبه مفتوح مهاب زق نيرة وكان هيجري ورا نصر بس ف لحظة غير قراره وبص تاني ل نيرة بشر
نيرة كانت مرعوبة حاولت تقوم وتجري منه لكنه كان أسرع منها رمي المسدس ومسكها من شعرها
وكل اللي حصل كان نظرة ... نظرة واحدة كل واحد بصها للتاني ... هي نظرة خوف وهو نظرة كره وفي لحظة كان متحكم في رأسها كويس وبحركة واحدة وقعت من ايديه ميتة
ضحك بسخرية وهو عيونه بتملع بالدموع
ـــ هه سبحان الله جايه تحضري لحظة موتي قتلتك أنا بأيديا
نزل من العمارة وأستغرب لما ملاقاش عربيه نصر كان متوقع أن نصر يبعت البودي جارد بتوعه علي شقه نيرة يخلصوا عليه محاولش يفكر كتير خلاص وقت التفكير عدا وراح أتحرك بعربيته وهو محدد آخر مكان هيروحه قبل ما ينهي كل المهزلة دي اللي نصر بدأها وهو هينهيها أكيد بس قبل ما يعمل كدة لازم يشوف أهله لآخر مرة لازم يطلب منهم يحاولوا يسامحوه لازم لكن للحظة غير مسار عربيته وقرر يختفي الليله دي مش بعيد نصر يكون مراقب بيت بهاء بلاش يضر أهله في آخر ظهور ليه
ـــــــــــــــــــــــــــــــــــــــــــــــــــــــــــــ
عدت الليله بكل أحداثها وصباح يوم جديد كانت بدور صاحية وتاليا بتلعب قدامها خرج بكر من اوضته
ــ صباح الخير يا دودو
ــ صباح الخير
ــ مالك عامله كدة ليه ؟
ــ منمتش خالص كنت سهرانة طول الليل وأستاذة تاليا صحيت من بعد الفجر كلها نشاط زي ما أنت شايف
قعد جمبها علي الكنبة
ــ وايه اللي منيمكيش طول الليل بقى ؟ أوعي تقوليلى موضوع أم أمجد في دماغك
قاطعته
ــ لا لا خالص مش دا اللي شاغلني يا بكر
ــ أومال في إيه ؟
ــ أنا عايزة أعمل مشروع بس المرة دي بجد مش من البيت
كشر وهو بيرد عليها
ــ تاني يا بدور
أتكلمت بهدوء
ــ تاني وتالت يا بكر ... أنا بقيت كويسه وبنتي في حضني وانت جنبي أنا مش زي زمان يا حبيبي خلينا نكمل حياتنا صح بقا بلاش نفضل واقفين كدة زي ما إحنا
ــ إحنا واقفين إزاي يعني ما إحنا عايشين أهو
ــ يا حبيبي إيه مشكلتك لو بدأنا مشروع صغير سوا أنا شاطرة في الاكل وانت شاطر في التجارة والإدارة ليه منعملش حاجة صغيرة كدة ونجرب حظنا فيها ؟ ليه منحاولش نكبر في الحاجات اللي بنحبها ؟ نشوف الدنيا ونتعامل مع الناس نعيش يا بكر نعيش زي الناس يا حبيبي خلاص كل اللي كنا بنخاف منهم راحو عند اللي أحسن مني ومنك عشان خاطري فكر في كلامي كويس ممكن
ــ أنتي فاكرة أن الموضوع هيبقي سهل يا بدور دا ما بين المطعم والمطعم دلوقتي مطعم كل اللي مش لاقي شغل ومعاه قرشين بيروح للاكل علي طول
ــ ما إحنا نفكر في مكان جديد ميكنش بين المطعم والمطعم مطعم زي ما قولت ونجيب دليفري ونعمل دعايه حلوة
قاطعها
ــ المكان الجديد هيبقي بعيد عن بيتنا هتاخدي وقت ومجهود وفلوس عشان توصلي له كل يوم
كشرت واتكلمت بزعل
ــ أنت عايز تقفلها في وشي يا بكر
ــ والله أبدا يا حبيبتي بس الموضوع مش بسيط صدقيني
ــ أنا عارفة أنه مش بسيط بس نقدر نحاول يا بكر ع الأقل نحاول نفكر نشوف بدائل مش كل ما أقول كلمة تقفلها في وشي كدة حرام عليك
ــ وإنتي عايزاني أعمل كل دا وإنتي. مش مفطراني أصلآ ؟ أفكر إزاي يعني وأنا جعان كدة هه
ــ 😅😅 هي دي مشكلتك يعني
ــ أه طبعا أنا مبعرفش أفكر الا وأنا شبعان
ــ ماشي يا سيدي عشر دقائق والفطار يكون جاهز
ــ ماشي ع ما أدخل اخد شاور تكوني خلصتي وأحنا بنشرب القهوة نتكلم يا ستي زي ما أنتي عايزة
ــ تمام يا حبيبي
قام بكر دخل الحمام وبدور لسه هتدخل المطبخ جرس الباب رن راحت تشوف مين وهي متوقعه أنها بسمة بس أتفاجأت ب بهاء واقف قدامها ومبتسم اوي
بهاء
ــ صباح الخير
ــ صباح النور .. ا اتفضل ادخل
ــ لا انتم اللي هتتفضلو عندنا أنا اللي حضرت الفطار انهاردة خلينا نفطر سوا ممكن ؟
كان بيتكلم وهو بيبصلها بحب نظرته ليها خلتها مرتبكة مش عارفه ترد حاولت تتكلم بثبات بس صوتها خانها وطلع مهزوز
ــ ت تعبت نفسك ليه
ــ مفيش تعب ولا حاجة وحشتوني وقلت نتجمع سوا علي سفرة واحدة يلا هاتي توتي وبكر فين صحيح ؟ اوعي تقولي لسه نايم
بكر من واره وهو بينشف شعره
ــ لا بكر صحي وكان بيستحمي علي ما الفطار يجهز
ــ طب يلا يا خفيف هات توتي وبدور و
قاطعه صوت بسمة من جوة
ــ والله هقعد اكل أنا ومش هستني حد في اي الطعميييييه هتبرد ومش بتبقي حلوة لو بردت الله هيتحايل عليكم ولا ايييييه
بهاء 😂
ــ سمعتم ؟
بكر
ــ دي العماره كلها سمعت حضرتك في اي
خرجت بسمة قدام باب الشقه وهي بتاكل سندوتش طعميه ومكشره
ــ بقالك ربع ساعه بتقولهم يلا نفطر اومال لو مش كل يوم بناكل سوا اصلا كنت هتغيب اد ايه
بهاء 😂
ــ انتي بتاكلي اصلا ومش مستنيه حد ومش عجبك كمان
بسمه 😒
ــ اي يا ست بدور سنه ع ما تيجي دا انتي هتشيلي البت وتخرجي من الباب تدخلي الباب اللي في وشه في اي
بكر
ــ طب ابلعي الاكل الاول وبعدين اتكلمي
بدور 😂
ــ أنا هدخل اجيب توتي قبل ما بسمة تتحول عليا
دخلت بدور وبكر وبهاء بيضحكو علي شكل بسمة اللي رغم أنها مكشره لكن بردو بتاكل في السندوتش عادي
بعد وقت قليل كانو قاعدين كلهم بيشربو شاي بنعناع وبيضحكو وقاعد وسطهم عز اللي التعب والزعل بقو مأثرين اوي عليه لكن كان مبسوط بالقاعدة والضحك حس بالدفا اللي من زمان بطل يحس بيه
بعد شويه بهاء خد بكر البلكونه وطلب منه حاجة غريبه خلت بكر يتصدم ويفضل علي الريأكشن دا 😳😳 من غير اي رد
ـــــــــــــــــــــــــــــــــــــــــــــــ
الصباح في بيت علا ومؤمن كان مختلف بعد ما فطرو سوا ونزل مؤمن علي شغله كانت علا قاعدة مع ميادة وبيفكرو هيتغدو ايه جرس الباب رن وفتحت علا واتفاجات أن أمها قدامها وشكلها يغني عن اي كلام
علا 😳
ــ ماما !! في حاجة ؟ انتم كويسين ؟ اتفضلي اتفضلي
نجاة 😒
ــ ايه هو كان لازم اتصل قبل ما اجي بيت بنتي ولا ايه ؟
ميادة بابتسامة
ــ اهلا اهلا ايه المفاجأة الحلوه دي تعالي يا حبيبتي تعالي
نجاة
ــ ازيك يا ام مؤمن عامله ايه
ميادة
ــ الحمد لله بخير والله انتي عامله ايه وأستاذ صبري عامل اي ؟
نجاة
ــ الحمد لله ... اي يا علا واقفه ساكته يعني لو مضايقه من وجودي اقوم امشي
علا وهي بتقعد جمبها
ــ اي اللي بتقوليه دا يا ماما أنا بس اتخضيت يا حبيبتي عليكم مش اكتر لكن دا بيتك تيجي فيه اي وقت
نجاة
ــ شكرا
علا
ــ اومال بابا فين ؟
نجاة
ــ نايم أنا بصراحة سبته نايم وجتلك عشان لو كنت قلتله مكنش هيرضي
علا
ــ منكش هيرضي ليه يا ماما ؟ هو في اي ؟
ميادة حست أن نجاة عايزة علا لوحدها
ــ طب انا هقوم اعمل دور شاي واجيلك عن ازنكم
نجاة
ــ اتفضلي يا حبيبتي
علا
ــ ماما قوليلي في اي أنا بجد بدأت اقلق
نجاة
ــ عايزة أسألك سؤال واحد يا علا وهسمع إجابته يا بنتي وهمشي علي طول
علا
ــ سؤال اي دا ؟
نجاة
ــ لو خيرتك دلوقتي بيني أنا وابوكي وبين جوزك وحماتك تختاري مين ؟
علا 😳😳😳
•تابع الفصل التالي "رواية ابيض و اسود (2)" اضغط على اسم الرواية