رواية ابيض و اسود (2) الفصل الثالث عشر 13 - بقلم منى محمود
ابيض واسود
الجزء الثاني
مني محمود بركات
الفصل الثالث عشر
==========
في البيت عند بهاء كان واقف هو وبكر في البلكونة بيشربوا سجائر وجوه قاعدة بدور وبسمة ومعتز اللي اندمج في اللعب مع تاليا
في البلكونة
ــ فيه ايه يا بهاء بقالك خمس دقائق مبتقلش غير جملة واحدة .. بكر إحنا صحاب صح وأنا قولك صح تسكت وترجع تعيدها وأرد وتعيد في ايه يا جدع قلقتني بجد
ــ 🙄 ما أنا لازم أمهد للكلام الأول براحة عليا يا بكر
ــ 😒 خلاص مهدت أنجز عشان خلقي ضيق ها ؟
ــ بصراحة أنا كنت عايز أخد بدور أختك أعزمها علي الغدا برا واتكلم معاها بعيد عن جو البيت وكدة
ــ نعم ! تعمل إيه ؟
ــ أخد بدور ونخرج في ايه ؟
ــ لا يا راجل مستغرب أنت إني بقولك نعم ؟ مجنون أنا صح ؟ أنت طبيعي يا بهاء ولا شارب ايه ع الصبح
ــ 🤨 نحترم نفسنا عشان مزعلكش
ــ متعصبنيش ببرودك دا .. عايز ايه من بدور وايه تخرجوا دي كمان
ــ إحنا هنستعبط علي بعض ما أنت عارف إني بحبها يا بكر ولولا الظروف إللي عمالين نمر بيها دي كان زمانها بقت مراتي
ــ😒 لا وأنت الصادق لولا التفكير ال
قاطعه بهاء وهو مكشر
ــ بقولك ايه بطل كلام في اللي فات المهم إني بحبها واللي حصل كله مغيرش مشاعري من ناحيتها وعايز فرصة أتكلم معاها براحتي بعيد عن البيت ف أنجز بقا خليني الحق اليوم من أوله
ــ يا بني يوم ايه اللي بتتكلم عليها دي أختي ينفع أقولك أنا كدة وأنت تبقي عادي ؟
ــ ☺️ طب والله فكره حلوة تعالي نخرج إحنا الأربعة نغير جو عشان كمان بدور متتحرجش إيه رايك ؟ بس لما ندخل المطعم أقعد انت وبسمة وتاليا ع ترابيزة وانا وبدور علي تربيزة ايه رايك ؟
ــ 😏 وأبوك هنعمل فيه ايه ؟
ــ بابا هيعتذر من نفسه وهيقولك اخرجوا انتو أنا مش قادر يلا بقا ولا أنت يا بكر مش موافق ع ارتباطي ببدور ؟
ــ عايز الصراحة ؟
ــ ياريت
ــ خايف تكون مش واثق من مشاعرك و
قاطعه تاني بصوت كله ثقة
ــ أنا واثق من مشاعري يا بكر واثق إني محتاج بدور تكمل معايا مشواري واثق من الخطوة دي ومن اللي بعدها كمان ومفيش قرار صح اخدته زي قرار ارتباطي ب أختك يا صاحبي
ــ تمام يا بهاء تعالي نقولهم
ــ هو أنت مش عايز تقولي حاجة قبل ما نتطلع برة ؟
ــ حاجة إيه ؟ ما قلتلك اللي كنت مقلق منه
ــ لا مش بخصوصي أنا وبدور
أتوتر بكر
ــ اومال أحم أومال بخصوص مين مش فاهم ؟
ــ بخصوصك أنت وبسمة مثلا
ــ 😳 أنا وبسمة ازاي ؟
ــ 😂 أهدي بس في ايه اقولك تعالي ننزل ونتكلم تحت يلا
بكر هز دماغه وخرج ورا بهاء وهو بيفكر في كلامه معناه ايه وممكن يكون عارف حاجة ولا مجرد شك بس والمفروض هو يتصرف ازاي في الحالتين ؟
بهاء
ــ بقولكم ايه تيجوا ننزل نخرج النهاردة نقعد في أي مكان ونتغدي برة كمان ؟ أهو تغيير شويه عن جو البيت والشغل وكدة
معتز
ــ اخرجوا أنتم أنا فطرت ولعبت مع توتي يادوب أخد العلاج واريح شويه مش هقدر أخرج
بسمة
ــ هنسيبك لوحدك ازاي يعني
معتز كشر
ــ هو أنا عيل صغير ولا ايه ... انزلوا يا حبيبتي وغيروا جو وهاتولي غدا حلو وأنتم راجعين يا دوب أكون صحيت من النوم انتي عارفة الدوا بينيمني إزاي
بهاء
ــ طب يلا قوموا اجهزوا بقا
بدور بصت ل بكر باستفسار وهو هز رأسه بموافقه ف خدت تاليا ودخلت تلبس وبسمة كمان دخلت اوضتها وعيون بكر محاوطها بهاء بص ل بكر اللي أول ما عيونهم اتقابلت بهاء غمزله وهو بيضحك ... ودا خلي بكر يهرب من قدامه بحجة أنه هيجهز هو كمان
**************************************
بعد وقت قليل كانوا الأربعة في طريقهم ل مكان هادئ وفيه ملاهي للاطفال عشان تاليا .. وصلوا المكان وبهاء أخد تاليا للملاهي وهما راحوا قعدو علي تربيزة كبيرة
بدور
ــ حلو أوي المكان دا ... بس أنا قلقانة علي تاليا
بسمة
ــ قلقانه ليه البنت مش هتطلع إلا لو بهاء راح اخدها المكان متأمن كويس واحنا قاعدين بين الكيدز ايريا والباب أهو في ايه تاني
بدور
ــ مش يمكن حد يضايقها ؟؟
بسمة
ــ لا متقلقيش حتي لو حصل الأمن هنا هياخد رقم بهاء ولو حصل أن توتي عايزة تخرج لاي سبب أو حد ضايقها بيتصلوا بيه يرحلهم فورا
في الوقت دا رجع بهاء وأول ما قرب منهم كشر
ــ إيه دا يا بكر ؟ دا اللي أتفقنا عليه ؟
بسمة
ــ أتفقوا على ايه ؟ مالك يا أبيه ؟ وما تقعد بتتكلم وانت واقف ليه ؟
بهاء بابتسامة
ــ لا يا حبيبتي أنا مش هقعد هنا أنا هشرب قهوة أنا وبدور علي التربيزة اللي جمب الشباك الأخيرة دي وأنتم شوفوا عايزين تشربوا إيه لحد ما توتي تخلص لعب ونبقي نتغدي سوا اوك .. يلا يا بدور
بسمة وبدور اتصدموا من كلام بهاء 😳
بكر ضحك علي شكلهم
ــ قومي يا بدور بهاء استأذن مني أنه عايز يتكلم معاكي شوية
بدور
ــ هه اقوم يعني ايه
بهاء 😂
ــ لا إحنا لسه هنعلمك تقومي معناها ايه قومي يا بدور مش وقت صدمات يلا ( وبص ل بكر ) وأنت في كلام متعلق بينك وبين بسمة هتخلصه دلوقتي يا بكر دلوقتي لأن بعد ما نقوم من هنا قرارك هيكون نهائي ومش هراجعك فيه ثانيه واحدة تمام 🤨
بكر للمرة الثانية ميعرفش يرد علي بهاء وبسمة ضحكت من قلبها علي شكله هو بدور والصدمة مسيطرة عليهم
بسمة قامت من مكانها وشدت بدور وقفتها عشان تفوقها من الصدمة واتحرك بهاء ووقف بالجنب وشاور بأيديه ل بدور عشان تتحرك ... وبدور تلقائي بصت علي بكر ورجعت بصت علي بهاء اللي كشر وهو بيقول
ــ بتبصيله تاني ليه ما قالك قومي يلا بقا
مشيت بدور مع بهاء لحد تربيزة في آخر المطعم وقعدت وهي متوترة ومش مستوعبه اللي بيحصل ودماغها بتحاول تفكر هو عايز منها إيه ؟ ومفروض ترد بايه ع أي كلام هيقولوا ؟
بهاء أبتسم
ــ أنا عارف إنك مش قادرة تخمني أنا عملت كدة ليه وعايز أقول ايه خايفة أكيد ومتوترة ... أنا مش عايزك تفكري في حاجة يا بدور ولا تقلقي عايزك تسمعيني وبس وقفي دماغك عن التفكير وأسمعيني وبس ممكن ؟
ــ ممكن
ــ مش عارف ابدأ منين ... بس هحاول أطلع في القاعدة دي كل اللي جوايا استحمليني بس لو كلامي ملخبط ... أنا .. أنا حياتي كانت كلها مطبات يا بدور وعيت علي الدنيا وأنا مش فاهم أهلي بيكرهوني أنا وأمي ليه أمي دي كانت ملاك نازل من السما مليانة حنية وطيبة مش موجودة في الناس دلوقتي .. ضحكتها كانت بتخلي الحياة كلها تهون في عينا لما بدأت اكبر وافهم بدأت أتعصب وأغضب والكره كان هيعرف طريق لقلبي وقتها امي وقفت في وشي كانت أول مرة في حياتي اشوف أمي مكشرة وفي عيونها دموع .. دموعها دي وقتها دبحتني ... قالتلي إلا الكره يا بهاء .. قلبك دا لازم يفضل أبيض مهما حصل ... دول أهلك .. لازم تبرهم وتعذرهم مهما عملوا ... ودا مش عشانهم يا بهاء دا عشان قلبك يفضل أبيض طول العمر ... وقتها مفهمتش أهميه كلامها بصراحة بس بعدت عنهم لأني مستحملتش أن أمي دموعها تنزل بسببي .. مع الوقت بدأت أهدي .. كنت بحفظ قرآن دايما واظبت علي الصلاة بدأت أشوف الدنيا بعيون أمي وأعرف إن مفيش حاجة فعلاً تستاهل إني قلبي يسود بسببها .. بس لما أمي ماتت ( صوته اتخنق ) الدنيا كلها يا بدور أسودت في وشي وبقيت تايه عايش لوحدي دفنت نفسي في الشغل وبس ليل نهار كنت بشتغل والحمد لله ولا مرة مسكت قضيه إلا وحليتها في خلال يومين تلاتة بالكتير ... أسمي أتعرف في الداخلية بقيت أقوي حتي علاقتي ب اهلي كانت زي ما امي عايزة ابرهم مهما حصل مكنتش علاقه قوية الا مع بسمة وبس ... بس بس كان في حته متدارية جوايا مقدرتش امحيها ... كان في غضب كتمته في قلبي عشان خاطر وصية أمي وكتمته أكتر وأكتر بعد ما نيرة عملت اللي عملته فيهم وكل ما كنت بكتم الغضب دا جوايا لانه مبقاش ينفع يطلع ... كل ما كنت بتغير للاسوء من غير ما أحس ... ويوم ما الغضب المكتوم دا طلع للاسف طلع للشخص الغلط خالص ( اتنهد بصوت عالي وكمل ) أنا بحبك يا بدور واللي عرفته مغيرش أي حاجة من مشاعري أنا منكرش اني اتصدمت وحسيت بمشاعر كتير غيره انك كنتي متجوزة عن حب معرفش ليه كنت متخيل إني أول حب في حياتك وإن أكيد وجوازك كان صالونات من غير مشاعر مش عارف ليه وهمت نفسي ب كدة ولما حسيت إنك كنتي بتحبيه غيرت أوي زعلت عليكي ومنك حسيت بمشاعر كتير عكس بعض بس والله العظيم الغضب والكلام اللي قولته ل بكر كان بسبب المشاعر اللي كاتمها جوايا أنا اندفعت وهبلت بكلام كتير مقصودش خالص والله أنا بحبك وفخور إنك قدرتي تعدي كل دا ولو مكنتش اول حب في حياتك يا بدور ف الأكيد أن شاء الله اني هكون الاخير ... قولتي ايه ؟
************************************
في تربيزة بسمة وبكر بعد ما بهاء وبدور مشيوا بصت بسمة ل بكر وهي عماله تضحك علي شكله
ــ 😠 ممكن تبطلي ضحك وتفهميني بهاء يقصد إيه ؟ إنتي حكيتله حاجة يا بسمة ؟؟ يا بت بطلي ضحك وفهميني في ايه ؟
ــ بصراحة أنا حكيت لأبيه كل حاجة
ــ 😳 كل حاجة ازاي يعني ؟
ــ كل حاجة يا بكر حصلت بينا مالك ؟
ــ 😠 أنتي بتستعبطي يقول عليا ايه دلوقتي خنت ثقته يعني هو من أول ما حس بمشاعر لاختي جالي واتكلم معايا حتي لو وقتها اختلافنا بس جالي لحد عندي وأنا مرحتش كلمته فاهمه دا معناه ايه فاهمة هو هيبصلي إزاي ؟ ليه كدة يا بسمه ليه ؟
ــ علي فكرة أبيه مفكرش كدة خالص بالعكس .. هو متفهم موقفك جدا اه شايف أن تفكيرك كله غلط في غلط بس متفهم والله ومش زعلان
ــ يا سلام
ــ والله مش زعلان أنا بحلفلك في ايه يا بكر أنت عايز تتخانق وخلاص
ــ أستغفر الله العظيم يارب ... ( اتنفس كذا مرة ورا بعض عشان يهدي ) ... يعني هو قالك ايه بالظبط ممكن تفهميني ؟
ــ قالي أنه لو لف الدنيا كلها مش هيلاقي راجل زيك يأمنه علي أخته الوحيدة اللي هي أنا يعني وإن تفكيرك كله غلط وملوش أساس لانه بيعتبرك صاحبه وأقرب شخص ليه وشايفك راجل محترم ويعتمد عليه وأن دي فرصتك الأخيرة عشان تتكلم أنت معاه وتاخد خطوة عشان أنا مش رمية يا أستاذ هقعد كل شوية اتحايل عليك عشان ترتبط بيه أه أنا العرسان علي الباب قد كدة بس نقول إيه بقا النفس وما تريد
ــ 😂😂 ثانية واحدة هي مش كانت القلب وما يريد ايه النفس دي ؟
ــ 🙄 أيا كان يعني المهم إنك فهمت قصدي ... ها يا بكر هتكمل معايا ؟ ولا عايز تبعد عني بدون أي أسباب بعد ما خلتني أحبك ؟
ــ أنا يا بسمة أنا ببعد من غير أسباب
ــ طبعا من غير أسباب
ــ يا سلام فرق السن الي بينا مش سبب ؟ فرق المستوي الإجتماعي بينا مش سبب ؟ مهنتي ومهنتك والفرق بينهم مش سبب ؟
ــ ثانية واحدة عشان بجد هوال اوي فرق سن ايه يا ابو فرق سن دول هما ٩ سنين يعني مش قصه في ناس بتتجوز والفرق بينهم اكبر من كدة عادي جداً دا أولا ثانيا بقا بلاش حوار المستوي الإجتماعي دا والنبي عشان إحنا حاليا شحاتين ولولا أبيه بهاء كان زمانا في الشارع خصوصاً أن كل فلوس عمتي متحفظ عليهم لحين إنتهاء التحقيقات ثالثا بقا لو المهنه يا بكر اللي هتبعدنا عن بعض أنا من بكرة أقدم استقاله وأرتاح واريحك بقا يا بكر حرام عليك أنا مش محتاجة كل دا كل اللي كنت محتاجة لاقيته فيك إنسان أحس معاه بالأمان يحبني وأشوف الحب دا جوة عينيه بوضوح اكون واثقة أنه هيراعي ربنا فيا جدع ومحترم دمة خفيف بموت في أخته وبنت أخته هعوز اي أنا تاني بس ها يا بكر قلت ايه ؟
**************************
نروح ل علا اللي كانت قاعدة قدام نجاة مش عارفة تستوعب اللي سمعته ... ضحكت وهي مش مصدقة أنها سمعت صح وسألتها وهي مصدومة
ــ معلش يا ماما عيدي كدة اللي قولتيه تاني لاني شكلي سمعت غلط
ــ لا يا حبيبتي سمعتي صح أنا مبقلكيش سيبي جوزك وقومي معايا بس من حقي أعرف لو اتحطيت أنا وأبوكي في أي وقت في كفة وجوزك وأمه في كفة هتختاري مين ؟
وهنا برقت علا لما أستوعبت كلام أمها و فهمته ... أمها غيرانة .. غيرانة علي بنتها الوحيدة اللي كانت شغلها الشاغل طول حياتها غيرانة أنها بقت تخص ناس تانية و بعدت عنهم ملامحها هديت و أبتسمت بحب لأمها عمره ما قل وهي بتقول
ــ ماما لو الدنيا كلها في كفة وانتي وبابا في كفه أنا هختاركم أنتم لو مليش خير فيكم مش هيكون ليا خير في أي حاجة تانيه خليكي واثقة في كدة ... وطالما أنتي اللي جيتي و فتحتي كلام في الموضوع دا تعالي نفضفض لبعض عشان النفوس تهدي و نقرب من بعض صح ممكن ؟ وأرجوكي يا ماما من غير عصبية ولا خناق ممكن ؟!!
كانت بتبصلها برجاء ... رجاء أخير لأنها حقيقي تعبت ومش هتقدر تكمل في الوضع دا ... ولأول مرة نجاة تخلف توقعتها وتهز رأسها بمواقفة وهي عينيها بتلمع بالدموع
ميادة كانت واقفة علي باب الصالة بالشاي لما سمعت كلامهم مدخلتش ولفت تاني رجعت الصينيه المطبخ ودخلت بهدوء أوضة نيجار وفضلت معاها وهي بتدعي من قلبها أن الأمور بينهم تتحل وتبقي بخير
نرجع ل علا ونجاة
علا مسحت دموعها اللى نزلت من عينيها وابتسمت لأمها كانت لسه هتتكلم قاطعتها نجاة وهي بتقول
ــ خليني أنا ابدأ يا علا ممكن
هزت علا رأسها بموافقة وسكتت كملت نجاة كلامها
ــ أنا وعيت علي وش الدنيا لأب متدين شديد وأم قاعدة في البيت تربي العيال ملهاش لا حس ولا صوت ... أبويا كان بيحبنا بس كان شديد أوي معانا ولما كان يلاقينا نعيط أنا ولا حد من أخواتي الصبيان كان يتكلم بكل هدوء ويقول عيطوا مش مهم المهم تطلعوا مؤدبين ومتربين كويس مش ولاد الشيخ محمد اللي حد يقول عليهم نص كلمة حتي ... وكبرنا و أبويا وأمي هما كمان كبروا ... أخواتي اول حاجة عمولها لما كبروا وعودهم شد سابوا البلد كلها وهاجروا ومن يوم ما هاجروا منعرفش عنهم أي حاجة كأنهم ما صدقوا خرجوا من بيت أبويا كنت وقتها أنا لسة متجوزة صبري جديد فضلت أروحلهم و أساعد أمي في شغل البيت لأنها كانت كبرت شفت أبويا الشديد اللي صوته كان بيخلينا نترعب بقا لا حول له ولا قوة فضل يضعف يضعف لحد ما أمي ماتت مستحملش وفي خلال شهر واحد كان محصلها هو كمان وبقيت بطولي في الدنيا مليش غير أبوكي اللي كان مقطوع من شجرة وإنتي وبس حاولنا نجبلك أخ أو أخت بس ربنا مارادش ... كنتي كل دنيتنا مبنعملش حاجة في حياتنا إلا عشانك أنتي ... كنتي بنت واحدة ومعرفتش أعمل غير اللي أتربيت عليه أن أهم حاجة تكوني مؤدبة ومحترمة وملكيش حس وأنك تفضلي تحت طوعنا أنا وأبوكي .. شقينا عليكي عشان تعيشي عيشة مرتاحة علمناكي أحسن علام وزي ما أخترتي دخلتي ماغصبناكيش علي أي حاجة لا في علام ولا جواز حتي ... يمكن أكون ربيتك صح بس بطريقة غلط يمكن أكون قصرت معاكي في إني أكون حنينة عليكي بس أنا ماأتعودتش علي الحنية مع أبويا وأمي شوفتها مع أبوكي وبس وكنت مقتنعة أن الطبيعي أن البنت تلاقي الحنية في جوزها مش أهلها تفكيري متخلف عارفة ابوكي حاول معايا كتير بس مكنش بيقدر عليا كان عارف إني بربيكي زي ما أتربيت وسكت يمكن غلطنا في طريقتنا يا علا لكن متنكريش يا بنتي إنك كل حياتنا إحنا من غيرك نموت يا علا ملناش غيرك يا بنتي لو بعدتي عننا وعيشتي حياتك مع جوزك وحماتك وبنتك وشيلتينا من حساباتك هنموت يا علا ... أنا ( دموعها نزلت ) بغير عليكي لما بلاقي ضحكتك منورة مع حماتك ومعانا لا دا أنا بغير من جوزك وبنتك عشان عايشين معاكي وأحنا لأ ... إحنا ملناش غيرك ومانعرفش نعيش من غيرك أوعي تخرجينا من حياتك يا علا وحياة غلاوة بنتك عندك ما تخرجينا من حياتك يا بنتي
علا هي كمان دموعها كانت نازلة من غير أي كلام دخلت في حضن أمها وبقى صوت عياطهم هما الأتنين عالي جداً لدرجة أنه وصل ل ميادة اللي خرجت بسرعة ل يكونوا بيتخانقوا لكن لاقيتهم حاضنين بعض جامد وهما بيعيطوا أبتسمت ورجعت دخلت الأوضة تاني
علا أخيراً قدرت تخرج من حضن أمها وهي بتمسح دموعها أبتسمت بحب
ــ هو أنا مكنتش محتاجة أي حاجة في الدنيا دي غير الحضن دا وبس يا ماما والله العظيم ما كنت عايزة غير حضن بس منك 🤍 وخلاص بعد ما خدتة بقيت كويسة جدا والله
ــ أنا بحبك يا بت طريقتي غلط بقا ولا منيلة بس بحبك أنتي أغلي عندي من روحي يا علا انتي النفس اللي بتنفسه والله أستحمليني يا بنتي اللي باقيلي من عمري وأنا أوعدك إني هحاول أتغير معاكي وأغير كل اللي بيضايقك مني يا حبيبتي بس أستحمليني يا علا أنا كبرت ودايما خايفة تسيبنا ونموت أنا وأبوكي من غير ما حد يحس بينا
ــ أنتي تعملي اللي أنتي عايزاه يا حبيبتي المهم إنك متحرمنيش من الحضن دا تاني ابدأ طول ما أنا في حضنك هقدر أكمل واعدي أي حاجة وعمري يا أمي عمري ما أخرج من حياتكم مهما حصل ومهما عملتوا أنتم أغلي الناس علي قلبي عمري ما أبعد عنكم ابدا ابدا
ــ أن شاء الله اللي جاي يبقي كله خير ... أنا هقوم أروح ل أبوكي لا يقلق عليا بقا
ــ لا أبدا تروحي ايه بعد الحضن الحلو دا إحنا هنتغدي كلنا سوا النهاردة بقولك ايه أنا نفسي في المحشي الكرنب من أيديك إحنا نكلم بابا يجلينا ومؤمن أنه ميتاخرش برة ونتغدي محشي وفراخ محمرة و ملوخية خضرا الله نفسي فيهم من أيديك أوي إيه رايك ؟
ــ أيوة بس
قاطعهم خروج ميادة وهي مبتسمة
ــ ها أجيب الشاي ولا ايه
علا
ــ أنا بقول ل ماما تقعد معانا وتعملنا محشي كرنب وفراخ محمرة وملوخية وبابا يجي ومؤمن ونتغدي سوا مش راضية
ميادة
ــ الله أيوة المحشي بتاعك يا نجاة لا يعلي عليه ولو مش هتقل عليكي يعني ممكن معاه محشي بتنجان بحبه أوي من ايديكي
نجاة أبتسمت
ــ عيني يا أختي يا خبر خلاص هقعد ونعمل النهاردة أحلي أكله محشي يا سلام انتم تؤمروا
ميادة براحة
ــ الأمر لله وحده ... الأمر لله
وفعلا علا كلمت صبري وهي فرحانة وفهمته أنها اتصافت مع أمها وأنهم هيتغدوا معاها النهاردة عشان نفسها في المحشي فرح صبري ووافق أما مؤمن ولأن علا عارفة أنه هيقلق ف دخلت أوضتها وقفلت الباب عليها وكلمته في التلفون وحكتله كل اللي حصل بالتفاصيل وطلبت منه لما يجي يرحب بيهم جامد ويمسك فيهم يباتوا لأنهم فهمت أن سبب المشاكل الأخيرة الكتير هي غيرة أمها عليها مش أكتر ومؤمن فرح ل فرحتها ووعدها أنه هينفذ طلباتها كلها بالحرف
***************************************
نرجع ل تربيزة بهاء وبدور ....
كانت بتسمعه وهي متأثرة بكل كلمة بيقولها ... لحد ما بدأ يتكلم عن مشاعره ناحيتها اتكسفت وقلبها بقى يدق بشده لدرجة تعبتها لحد ما قال آخر كلامه وبقا مستني ردها ... حاولت تتكلم لكن مكنتش عارفة ... أبتسم بهاء بهدوء
ــ أنا عارف إني فاجاءتك النهاردة! بس ارجوكي يا بدور أنا محتاج إننا نقول كل اللي جوانا النهاردة افتحيلي قلبك واتكلمي معايا
ــ ما .. ما أنا مش عارفة أقول ايه
ــ قولي كل اللي جواكي قولي ايه زعلك مني لما حصل الخلاف بيني وبين بكر قولي مشاعرك أيه بالظبط ليا وصلت ل درجة الحب ولا إعجاب قولي واثقة فيها ولا محتاجة وقت تفكري وتتاكدي من مشاعرك قولي مصدقاني إني بحبك ولا لأ أتكلمي يا بدور في كتير أوي أوي يتقال بينا
ــ مش هكدب عليك يا بهاء أنا فعلاً زعلت من اللي حصل حسيت يعني أن ا (صوتها اتخنق وسكتت خدت نفس ورجعت تتكلم تاني ) .. أنا مش هعرف أعمل زيك علي فكرة واتكلم عادي كدة بص أنا أه زعلت واتقهرت كمان مكنتش متخيلة إنك تشوفنا بالصورة دي من برة بس لكن لما رجعت وكلمت بكر واتصافيتم وبكر حكالي علي كلامك له وقتها أنا هديت وبدأت انسي فعلا اللي حصل بس محبتش أعشم نفسي أن ممكن يكون في حاجة بينا مش يمكن أنت رجعت مع صحبك بس يعني أقصد اتصافيت تجاه صاحبك بس لكن أنا لا بس يعني أنا ..
ــ كملي يا بدور أنتي إيه ؟
ــ أنت متاكد من مشاعرك يا بهاء ؟ أنا عارفة أن حكايتي صعبة وظروفي مش أحسن حاجة ومعايا بنت وأنت متجوزتش قبل كدة و
قاطعها
ــ بلاش كلام أهبل عشان متعصبش عليكي ممكن أنتي ست البنات يا بدور واي راجل في الدنيا يتمناكي وكونك تبقي ليا أنا في الآخر دا أكبر إنجاز هيبقي حققته في حياتي كلها
ــ ☺️ طيب خلاص براحه حتي وأنت مفروض بتقول كلام حلو متعصب
ــ طب ايه بعد الضحكة دي نقول مبروك ونطلع علي المأذون بقا ولا ايه
ــ 🙄 مأذون ايه ؟
ــ بدور من غير لف ولا دوران بتحبيني زي ما بحبك ولا لأ ؟
ــ يا بهاء
ــ بلا بهاء بلا بتاع ردي علي السؤال لو سمحتي بتحبيني زي ما بحبك ولا لأ ؟
نزلت وشها ل تحت وابتسمت وهي بتقول بصوت واطي
ــ أه يا بهاء
رفع وشها بأيديه وعيونهم اتعلقت ببعض
ــ أه ايه ؟ قوليها يا بدور وريحي قلبي عشان خاطري
ــ احم أه ا يعني أه بحبك
ــ الله أكبر اخييييرا سمعتها زي ما كنت بحلم يااااه ... بقولك اي احنا لازم نتجوز في أسرع وقت أنا خلاص عايزك معايا دايما مش هقدر أبعد عنك أكتر من كدة
ــ مجنون والله مجنون
ــ بس بحبك 😉❤️
***************************************
بسمه خلصت كلامها وسكتت وهي مستنيه رد بكر اللي فضل باصصلها بحب وساكت
ــ إيه ؟ هتفضل تبصلي وبس ولا إيه ؟
ــ بصراحة مش عارف أنا عملت ايه حلو في حياتي عشان ربنا يكفاءني ب احلي هدية
ــ أنا هدية ؟
ــ أحلي هدية يا بسمه طول عمري قافل قلبي دا بميت قفل قلت استحالة أحب أو اتجوز حتي ... لحد ما شوفتك خفه دمك وشقاوتك خطفتني ولاقيت ال ميت قفل بيتفتحوا كل يوم قفل ورا التاني لحد ما وقعت في حبك ومش هقدر أبعد عنك... أنا بس كنت خايف أنتي اللي بعد فترة تحسي انك أتسرعتي أو
قاطعته
ــ أنا واثقة في مشاعري يا بكر عشان خاطري كفاية كدة بقا وخلينا نكمل سوا ممكن
ــ ممكن يا حبيبتي أنا هتكلم مع بهاء النهاردة واطلب أيديك منه وبعدها هقعد مع عمي وأطلب أيديك رسمي يا ست البنات
وقبل ما بسمة ترد كان صوت بدور الغضبان هو اللي مسموع وهي بتقول من وراهم
ــ نعم يا استاذ بكر بقا لسه ع البر وبتقولها ست البنات اللي طول عمرك بتقولهالي أنا وبس لا لا الكلام دا مينفعش معايا
بهاء وهو مكشر
ــ يا سلام ما أنا لسه قايلاهاك يا ختي وبعدين صوتك طلع دلوقتي ماشاء الله اومال وانتي قاعدة معايا كنت بسمع كلمة وعشره لا ليه هه
ضحكو علي طريقته في الكلام وقبل ما كل واحد فيهم يطلب ايد اخت التاني تلفون بهاء رن برقم عز رد بسرعه وهو قلقان
ــ بابا انت كويس ؟ احنا
ــ أنا مهاب يا بهاء تعالي لو سمحت مفيش وقت لازم اتكلم معاك قبل ما نصر يوصلي بسرعه يا بهاء بسرعه
خلص كلامه ومستناش رد من بهاء وقفل السكة
يتبع ....
القادم الأخير أن شاء الله
•تابع الفصل التالي "رواية ابيض و اسود (2)" اضغط على اسم الرواية