رواية الضيف الخفي الفصل الثامن والعشرون 28 - بقلم فاطمة عيد
الفصل الثامن والعشرون:
جلست ميرال في الحديقه لتتناول فنجان من القهوة وبيدها كتاب جديد تقرأ فيه لتقطع ذلك الانسجام صبا وهي تقول :والله عال اتخطبتي من ورانا
ميرال :انا مكنتش اعرف أن فهد هيعلن خطوبتنا ياصبا وبعدين فيها اي انا اختك الكبيره علي فكره مش الصغيره كمان تقدري تقوليلي لو كنتي ف دبي كنتي هتيجي مخصوص عشاني الاجابه لا طبعا اكيد مش هتسيبي جوزك لوحدو عارفه اي خلاني اوافق عليه من غير تردد عشان اخلص من معايرتك ليا ياصبا من احساسي بالنقص اللي انتي اتسببتي في
اتت لينا إليهم لتقول:اي يابنات مالكم بس
صبا وهي تستعد للمغادره:مفيش شوفي صاحبتك وابقي تعالي اقعدي معايا شويه هستناكي فالاوضه بتاعي
لينا: حاضر
انتظروا مغادره صبا لتقول لينا :بت مالك بتزعقي ليه مع اختك
ميرال:بما انك كنتي سامعه مش هعيد الكلام
لينا:طب ممكن تهدي وتفهميني
ميرال:اديني هديت
لينا:انتي كانت نفسيتك تعبانه اما هو كان بعيد دلوقتي بقا ملكك اي مزعلك تاني
ميرال: يالينا افهميني الصراع منتهاش ف عقلي مش متأكده من قراري ولا متأكده من مشاعري تجاه فهد أما بيكون معايا ببقي مبسوطه بس لما بيبعد برجع افكر فالماضي تفتكري واحده زيي تستاهل مستقبل جديد
لينا :صحيح انتي فاكره الماضي لكن بقيتي كرهتيه كرهتي الماضي وكرهتي امير
ميرال بحزن:ورغم كده مش عارفه أبدأ من جديد
لينا:انتي قويه بس تايهه شويه اعتبري الماضي خيال واللي جاي هو اللي حقيقه
ميرال:فكك من الكلام ده كله اي حوار حسام ده اتعرفتو ازاي
لينا:بصي ياستي هو عنده 30سنه تمام وهو بزنس مان مشهور ف كندا ونزل مصر مع عمتو اللي هي غيداء ابو طالب دي
ميرال:صحيح دي كانت حابه تتعرف عليا بس انا نسيت
لينا:مش مهم تتعوض المهم بقا وانا واقفه كان رجلي بتوجعني ومش عارفه اقف ف حته واحده بسبب الكعب راح هو خبط فيا رجلي اتلوت والكعب أتكسر اتخانقت معاه شويه بعدها اتكلمنا
ميرال:اممم وسكتي أما اعجبتي بيه يعني
لينا:مش لدرجه اعجاب احنا اتفقنا نبقي صحاب بس حاسه أنه معجب بيا اوي واديني هشوف
ميرال:انتي كمان معجبه بيه وانتو الاتنين حلوين اوي مع بعض والله يبقي متخليش عمر يسيطر علي تفكيرك
لينا :لا عمر مين حسام يعترف بس وانا اللي هروح اتقدمله
ميرال:اي دا اي دا انتي بقيتي اجتماعية كده ليه
لينا:واخوات فهد حلوين بصراحه ودمهم خفيف
ميرال:اها جدا
لينا :لا وأخوه بالذات بطل كده
ميرال:انتي كده هتشقطي اللي كانو فالحفله كلهم
لينا:اصلي حبيت الموضوع اوي في اي مالك دي معاكسه بريئه
ميرال:اتلمي يامهزقه وبعدين أخوه مرتبط يعني عيب
لينا:برضو بطل
ألقت ميرال الكتاب عليها وقالت:طب غوري بقا بدل ما اوريكي بطوله فالملاكمه
لينا بابتسامه:الله وانا عملت اي ياميرا
علي الجانب الآخر في ڤيلا الصياد:
منتصر:منكرش خطوبتك من ميرال فرحتني بس انت استعجلت
فهد:لقيتها فرصه واللي شجعني الخاتم اللي كان معايا
منتصر:متأكد من قرارك ده
فهد:انا متأكد من حبي ليها لكن خايف
منتصر:متخافش كل حاجه هتبقي كويسه
أما غيداء فظلت شارده لفتره طويله وكانت تلوم نفسها علي ذلك الأسلوب الجاف مع منتصر ليأتي حسام من خلفها وهو يقول:عمتو مينفعش العناد ده
غيداء:في اي ياحسام
حسام: حضرتك فاهمه قصدي كويس اوي بس بجد مينفعش طريقتك مع المتر بصي ياعمتو لو انتي بتحبيه يبقي سيبك من جو التقل والعناد ده لو مش بتحبيه خلاص من بكره نشوف محامي جديد ونشوف ليه اصلا مدام مش هتشتري الكومنتي اللي كنتي عايزاه وانا قولتلك من الاول الحاجات دي من الافضل اننا نشرف عليها من بدايه إنشاءها مش نشتريها جاهزه
غيداء:طب هستسمر فلوسي فين دلوقتي
حسام:انتي ناسيه مشاريع كندا لسه شغاله وليكي ارباح منها كبيره كمان يبقي بلاش تبدأي في اي بزنس جديد الا اما تكوني مقتنعه بيه تماما
في ڤيلا البحيري
صعدت لينا الي غرفه صبا طرقت الباب ودلفت الي الداخل لتقول لها صبا:يرضيكي طريقتها معايا
لينا:لا بس طريقتك برضو مترضنيش
صبا:يابنتي انا عايزه مصلحتها
لينا:حلو وانا واثقه ف ده بس مش معني كده تدوسي علي ايدها اللي بتوجعها مينفعش تقفي قدام واحد مشلول وتقوليلو انت مشلول ليه مش بتمشي زيي بطريقه أبسط مينفعش واحده متجوزه تقف قصادك وتقولك ليه مخلفتيش زيي اكيد هتضايقي
صبا: بس انا
لينا:متبرريش موقفك ياصبا انتي حتي الحزن بان علي وشك أما قولتلك المثل مابالك انتي كل شويه تقوليلها فالحقيقة بصي ياصبا الجواز رزق من عند ربنا بس مش من حقك تفتخري بيه زياده عن اللزوم قصاد واحده مش متجوزه زي ما واحد غني يجيب كل حاجه فالدنيا ويستعرضها قدام فقير
صبا:فيها اي أما افتخر بنعمه من نعم ربنا ربنا بيقول واما بنعمه ربك فحدث
لينا:صدق الله العظيم بس المقصود انك تحمدي ربنا وتشكريه علي نعمه مش تستعرضي جوزك قدام واحده متجوزتش ابنك قدام واحده مخلفتش فلوسك قدام واحد فقير وضعيف محتاج مساعده ربنا مخلقش حد كامل مش معني انك متجوزه يبقي كلنا لازم نتجوز ونبقي زيك في بنات كتير رافضه الجواز وهما في مستوي اجتماعي عالي جدا لأسباب شخصية تخصهم هما اللي لاقيه أن الشغل هو الأهم واللي اتعقدت من ماضي واتعودت علي الوحده وغيره كتير دورك انك متحسيش أنهم ناقصين حاجه انتي اتخلقتي زيهم بالظبط ربنا لو رضاكي بزوج صالح اكيد رضاهم ف حاجه تانيه بعيد عن الجواز مش لازم هو اها هو مهم وسبب في استمرار البشريه بس عدم وجوده مش عيب ده نصيب
فضلت صبا الصمت بعد كل ما سمعته
لتكمل لينا:الناس اللي بتنسي فضل ربنا عليها وبتعاير الناس بنعمته بيرجع ياخدها منها ك عقاب ليها عشان كده بلاش غرور وكبرياء وافتخار جوازك مش انجاز ياصبا جوازك شئ طبيعي ميستاهلش الافتخار
قالت كلماتها وغادرت لتذهب الي غرفتها وتخلد الي النوم
يتابع......
•تابع الفصل التالي "رواية الضيف الخفي" اضغط على اسم الرواية