رواية شمس تتحدي الغيوم الفصل الحادي عشر 11 - بقلم عبير سليم
الفصل الحادي عشر من رواية شمس تتحدى الغيوم
بقلمي :عبير سليم
💖💖💖💖💖💖💖💖💖💖
تمر الأيام وكل منا منغمس فى حياته بحلوها ومرها الكل يحاول ان يتعايش مع ما كتبه القدر وقدره له فلاحيله لنا فى شئ سوى الرضا لأن ليس لنا من الأمر شئ
فى لندن فى شقة عمر
عمر :يعنى كده خلاص كله تمام ياسيف واللا لسه فى حاجه
سيف:لا ياسيدي كله تمام انا خلاص سلمت كل الشغل اللى كان مسئوليتنا وكمان قفلت حساباتنا ومضيت على الأوراق وخلصت كل مستحقاتنا الماليه وكل الحاجات اللى تخصك
خلاص خلصت
عمر:ياااه يعنى انا كنت بحاول دايما أهرب من فكرة رجوعى دلوقتى اتحطيت قدام الأمر الواقع خلاص
سيف:خلاص بقى ياعمر ارمى ورا ضهرك وكبر دماغك ان آجلا أو عاجلت كنت حتنزل واحنا كلها كام يوم وحنبقى فى مصر خلاص
عمر:تمام ياسيف بس نفسي فى حاجه أعملها قبل ماانزل
سيف :نفسك فى إيه قوللى ياباشا وانا اجيبلك اللى نفسك فيه لحد عندك
عمر:حبيبي ياصاحبي منحرمش منك بس اللى نفسي فيه خايف متقدرش عليه
سيف :قلبي مش مطمنلك يابطل.
عمر:نفسي أرن جينا علقه جامده قبل مااسافر
سيف:ترن مين ياعنيه شكلك كده عاوز تنزل مصر على كرسي هو انت محرمتش يابنى
عمر:متغاظ ياسيف بقى حتة بت زى دى تعمل فية انا كده وتجبرنى أعمل حاجه مش عاوزها واخد قرار غصب عنى اه بس لو تقع تحت ايدي ودينى لولع فيها.
سيف:كيد النسا بقى حنقول ايه بقى
وبعدين انت لازم تحمد ربنا انها جت على اد كده وادينا خلاص سايبينهالها بالسلامه بقولك صحيح مش حتبلغهم فى مصر بنزولك
عمر:لاء مش حبلغهم أنا عاوز اعملهالهم مفاجأة
سيف :ماشي ياعمر براحتك المهم اننا كده تمام فى السليم
انا مش مصدق انى راجع بلدى خلاص مصر وحشتنى اوى ياعمر
عمر :خلاص يافالح ادينا راجعين
💖💖💖💖💖💖💖💖💖
تمر الأيام وتحاول شمس أن تنهمك فى عملها بالشركه حتى لاتترك لعقلها المجال للتفكير فى اى شئ وتعمل بجد ونشاط
فى مكتب يزيد
على: انا قلقان اوى يايزيد من الصفقه الجديده
يزيد:سيبها على الله ياعلى احنا مقدمين عروض ممتازه يبقى إيه سبب القلق ده
على:السوق بقى فيه منافسين كتير يايزيد ومجال المقاولات اتوسع الفترة الأخيرة واحنا بقى لينا اعداء وده مخوفنى
يزيد:اى حد ناجح لازم يكونله أعداء ياعلى واحنا الحمد لله شغلنا نضيف وكل الشركات والعملاء اللى اتعاملوا مع شركتنا بيحلفوا بينا فى السوق متقلقش ياعلى
تدق منى الباب وتفتحه
يزيد:ايوة يامنى
منى: شمس من شويه مرت علية وقالتلي أبلغ حضرتك انها راحت الموقع ولو فى اى أوامر من حضرتك تتصل عليها
يزيد:ماشي يامنى اتفضلي انتى
على:وايه اللى وداها الموقع من نفسها
يزيد:بتهرب ياعلي
على:بجد الله يكون فى عونها اللى حصللها مش شويه والغريبه انها من وقت ما رجعت وبقى شغلها أحسن من الاول كمان وكل يوم بتبقى أفضل من اليوم اللى قبله
وده بصراحه عكس توقعى خالص
يزيد :ليه بتقول كده
على:بصراحه بعد اللى حصل قلت اكيد بقى حتسرح وتعيط وتتاخر ومتركزش زى الاول لكن بالعكس دى تفوقت على نفسها
يزيد :تعرف ياعلى انا عمر وجهة نظرى ماخيبت فيها ابدا
على:انا بس قلقان لما عصام ينزل الشركه تحصل بينهم مشاكل واللا حاجه
يزيد :لا من الناحيه دى اطمن مش شمس االى تعمل كده وان شاء الله انا متأكد انها حتقف على رجلها تانى
على:ان شاء الله طب بقولك ايه تحب اعدى عليها فى الموقع واطمن معاها عالشغل
يزيد:اه ياريت ياعلى عشان انا عاوز اراجع التصميمات اللى معايا
على:تمام يبقى حخلص الشغل واعدى عليها
تطرق منى الباب وتفتحه
يزيد :أيوة يامنى خير
منى:إيمان عاوزة تدخل
على:دخلي الهانم نشوفها عملت ايه عشان انا عارفها مابتستئذنش كده وترسم الدور غير لما يكون وراها حاجه
منى:ههههههه حاضر
إيمان :احم ازيك يابشمنهدس على ازيك يابشمنهدس يزيد
يزيد:اهلا ياايمان خير ان شاء الله
إيمان :خير طبعا هو انا عمرى ييجى من ورايا غير الخير
على:على يدى اه بأمارة العلقه اللى اديتيها لمياده
ايمان :ههههههه هو حضرتك لسه فاكر ميبقاش قلبك اسود بقى
على:اسود ايه وبمبي ايه ده انا كل مااشوفها اقسم بالله ببقى ماسك نفسي من الضحك بالعافيه دى العضه فى خدها اد كده يخرببيتك حد يعض حد من خده يامفتريه
إيمان :تستاهل وغلاوتك عندى يابشمهندس انا لو علية كنت عاوزة اولع فيها
يزيد:بس بقى وجعتولى دماغى عاوزه ايه ياايمان سمعينى
ايمان:اجازة يومين
يزيد:نعم ليه ان شاء الله
إيمان :حقولكم بس سر بيننا مش عاوزة حد يعرف
يزيد:اطمنى يامونى بس انطقى فى ايه
إيمان :جايلي عريس
على:بجد اخيرا حنرتاح منك ونلاقى حد يشيل عننا شويه
ايمان بقمصه:بقى كده يابشمهندس يعنى انا حمل عليكم مكنش العشم والله
على:ههههههههه بهزر معاكى ياتحفه طب والله ده من بخته وامه دعياله كفايه انه حياخد السكر ده
إيمان :ان شالله يخليك يارب عقبال ماتفرح بولادك ان شاء الله
يزيد:لاء لو كده منقدرش نقول حاجه طبعا ده اليوم اللى بنتمناه بس انتى بتقولى جاي يتقدم ليه يومين
ايمان:يعنى بقى حعمل شوية حاجات كده
على:قوليلي طيب حتعملى ايه عشان لو محتاجه مساعده
إيمان :ههههههههه لا دى حاجات بنات كده عاوزة اضربلي عشرة عشرين ماسك على وشي واعمل شعرى بقى وادلع نفسي وكده يعنى
على:فى كوافير حلو اوى المدام بتروحه علطول تحبي اسألها واقولك
إيمان :لا ربنا يخليك اكيد طبعا المدام بتروح مكان سعره حيبقى عالي اوى انا اعرف مكان كويس وسعره على ادى
على:لا يامونى عيب عليكى ده انتى اختى روحى واعملى اللى نفسك فيه والحساب عندى
إيمان :ربنا يخليك يا رب منحرمش منك
على:يابنتى والله مابعزم عليكى
يزيد:صدعتونى يخرببيتكم خدوا بعضكم واطلعوا اتكلموا برة
مش عاوز وجع دماغ وانتى ياايمان خدى ياستى اليومين واختارى هدية الخطوبه اللى عاوزاها واللى تحبي اجيبلك هديه على زوقى
إيمان :لا يابشمهندس ربنا يخليك يارب
على:انتى عبيطه يابنتى هى الشركه فيها كام إيمان
ايمان:بجد مش عارفه اقولكم ايه ربنا يخليكم لية يارب
يزيد:بصى انتى حتقوليلي اتفقتوا على ايه تمام وبعد كده ححدد الهديه ماشي
ايمان :ماشي بعد اذنكم
على:بعد اذنك انا كمان يايزيد حروح الموقع اتابع المهندسين والعمال
يزيد:ماشي يا على
💖💖💖💖💖💖💖💖💖💖💖
بعد الظهيرة فى منزل يزيد
يدخل يزيد فيجد الأسرة منتظرة قدومه لتناول وجبة الغداء
يزيد :السلام عليكم ورحمة الله وبركاته
الجميع :وعليكم السلام ورحمة الله وبركاته
يحتضن عاليه ويقبلها كعادته كل يوم:عامله ايه يالولو
عاليه:مادمت انت كويس يبقى انا كويسه ياحبيبي
يزيد:ربنا يخليكى لية ياست الكل
يجد أنس جالسا على المائده
يزيد:اهلا بالباشا انت هنا يا أنس
أنس :ايوة ياخالو جدو تعبان وجيت عشان أشوفه
يزيد :ماشي ياسيدي ربنا يخليلنا جدو يارب حضرتك عامل ايه يابابا النهارده
شاكر:الحمد لله ياحبيبي أحسن والله
يجلس الجميع لتناول الغداء ويمر الوقت عليهم وهم يتحدثون فى عدة موضوعات
يزيد :اللهم دمها نعمه بعد اذنكم انا حطلع اغير وانزلكم
هاله:اطلع ياحبيبي فتصعد معه عاليه
عاليه:حبيبي انت كويس
يزيد:اه ياحبيبتى كويس طمنيني انتى عليكى بتاخدى العلاج فى معاده
عاليه:باخده ياحبيبي متقلقش
يزيد:مقلقش ازاى وهو انا لو مقلقتش عليكى حقلق على مين عاليه الله يخليكى انتى لازم تاخدى بالك من نفسك كويس عشانى انتى سامعه
عاليه:مالك يايزيد فى ايه ياحبيبي انت غريب اوى النهارده
هو فى حاجه حصلت احكيلي ياحبيبي فضفض معايا
يزيد:مش عارف ياعاليه بس حاسس انى تعبان اوى ومجهد حاسس انى نفسي اخد اجازة وارتاح شويه الشغل بقى ضاغط علية اوى ومشاكل السوق مبتخلصش
عاليه:وعلى فين
يزيد:على شايل الحمل واكتر منى كمان بس الشغل نفسه بقى صعب ولازم نبقى مصحصحين طول الوقت واللا حنضيع فى وسط السوق
هو صحيح الحمد لله شركتنا سمعتها زى الفل ومسمعه فى السوق كله بس المشاكل كتيرة
عاليه:حبيبي اشتغل على ادك ومترهقش نفسك وانت عارف كويس ان لاحيله فى الرزق متجيش على صحتك وعلى اعصابك احنا كلنا عاوزينك ياابوعشق وكلنا عايشين تحت جناحك ياحبيبي
يزيد:ربنا يخليكى لية ياحبيبة قلبي بقولك إيه انتى وحشتينى اوى ماتيجى اقولك كلمه سر
عاليه :هههههههه حبيبي هو ده وقته انت جاى تعبان
يزيد:لا مانا كده حفوق وابقى كويس
بعد مرور اكثر من ساعه ينزل يزيد وبصحبته عاليه فيجد هاله جالسه وحدها دون احد
يزيد:هو بابا طلع ياامى
هاله:ايوة ياحبيبي طلع يرتاح شويه
يزيد:فين عشق وأنس يعنى مش شايفهم
هاله:كانوا لسه بيلعبوا والله صليت ببص ملقتهومش يمكن يكونوا فى الجنينه بيلعبوا واللا حاجه
يزيد:لا انا خلاص تعبت وحجيب اخرى اقسم بالله وشكلى كده ححلف على الزفت ده ميجيش هنا تانى
عاليه :فى ايه بس يايزيد معصب نفسك ليه
يزيد:يعنى ياخد البنت ويختفي ومحدش واخد باله ده ينفع ده يصح الولد ده مش لاقى حد يربيه انا بقى اللى حربيه
يخرج سريعا وهو فى قمة غضبه للبحث عنهم ومعه عاليه وهاله
وفجاة يسمعون صوتهم فيشير لهم يزيد بالا يتحدثون ليفهم ماذا يفعلان والام يرتبان هما الاثنين
أنس :لأ كده غلط ياعشق ارفعى رجلك صح
عشق:الحوض عالى ياانس وخايفه اقع
انس:متخافيش انا معاكى مش حتقعى
انس :ايوه شاطرة ياللا بقى تنزلى عليها المياه كويس ولازم المياه تدخل بين صوابعك كويس
عشق :كده ياانس
انس:ايوة شاطرة ياعشق متخافيش نزلى رجلك بالراحه انا ماسكك كويس
تنزل عشق قدميها من اعلى الحوض الموجود بالجنينه
أنس :فهمتى ياعشق اللى قولتهولك كويس
عشق:ايوة والله ياانس انا فهمت خلاص وحفظت كل حاجه
انس:طب اتفضلى سمعيلي تانى اللى قلته
عشق:اول حاجه حقول بسم الله الرحمن الرحيم فى سري
وبعد كده حغسل ايدى كويس واتمضمض واغسل مناخيري وحغسل وشي بالمياه وحغسل دراعى وشعري وودانى واخر حاجه رجلي وكل حاجه ٣مرات صح كده
أنس :برافو عليكى ياعشق
عشق:بس انا صغيرة ياانس لما اكبر مامى تعلمني
أنس :لاء ياعشق انتى عندك سبع سنين ووانا بصلى الجمعه مع بابا فى الجامع الشيخ كان بيقول اول مانكمل سبع سنين لازم نتعلم نصلى عشان ربنا ميزعلش مننا
عشق:انا عاوزة ربنا يحبنى وميزعلش منى ابدا
أنس :اللى عاوز ربنا يحبه ميعملش حاجه تزعله
عشق:انا مش بعمل حاجه والله ومش بزعل مامى ولا بابي وانا مش نوتى
أنس :ايوة ياعشق صح انتى مش بتعملى حاجه وحشه بس لازم كمان تصللى عشان ربنا يدخلنا الجنه
عشق:الميس فى الكلاس كانت بتقوللنا الجنه فيها حاجات حلوة اوى احلى من الجنينه دى
أنس :ايوة طبعا الجنه جميله اوى
بس قوليلي الأول حافظه إيه من السور
عشق:انا حافظه سورة الفاتحه وقل هو الله احد وقل اعوذ برب الناس وقل اعوذ برب الفلق وحافظه كمان سورة الكوثر والفيل
انس :برافو عليكى ياعشق بس انتى حافظه التشهد
عشق:لاء ياانس مش حافظاه
أنس :خلاص ياعشق انا حقول لجدو حبيبي يحفظهولك
ولما اجى المرة الجايه حتتوضي لوحدك وحعلمك تصللى ازاى
وحتصل بيكى كل يوم اقولك تقومى تصللي ماشي
عشق :ماشي يانس
أنس :طب ياللا ندخل بسرعه عشان خالو ميزعلش منى وانا وعدت جدو مش حخللى خالو يزعل مني تانى
فيمسك يديها ويدخلان سريعا دون ان ينتبها الى وجود احد.
عاليه:ياحبيبي ياانس شفت بقى يايزيد انس بيحب عشق ازاى وكان بيعلمها الوضوء
يزيد:بجد انا اتفاجئت باللى شفته دلوقتى معقوله أنس كان بيعلم عشق الوضوء وحيعلمها الصلاه
هاله:شفت بقى ان باباك عنده حق فى اللى بيعمله معاهم وانه متأكد فعلا من حب انس وخوفه على عشق
يزيد:الحمد لله انا بجد فرحان اوى بيه ربنا يبارك فيه ويجعله من الصالحين يارب
بس بردو مكنش المفروض ياخدها ويختفي كده ويسيبنا نقعد ندور عليهم
عاليه:فى دى معاك حق ياحبيبي وابقى فهمه براحتك
يزيد:ماشي ياللا ندخل
💖💖💖💖💖💖💖💖💖💖
يأتى صباح يوم جديد
عصام :صباح الفل ياقمر
هاجر وهى تتثاءب:صباح الخير ياحبيبي
عصام :ياللا ياقلبي انا حقوم اخد دش والبس على ماتحضريلي الفطار ثم يقبلها ياللا قومى بقى
يدخل الحمام فتضع هاجر الغطاء ، على وجهها وتستكمل نومها
يخرج عصام من الحمام ويدخل غرفته لارتداء ملابسه فيتفاجا بانها مازالت نائمه
عصام وهو يرفع عنها الغطاء:هاجر هاجر انتى مقمتيش
هاجر:يييه بقى عاوز ايه سيبنى أنام
عصام :هو انا مش لسه مصحيكى عشان تحضريلي الفطار نمتى تانى ليه
هاجر:انا سقعانه وعاوزة انام الاكل عندك فى التلاجه طلع وافطر انت
عصام :نعم وهو انا كنت بتجوز عشان اطلع الأكل وافطر نفسي انتى ياماما مش بكلمك رد علية.
هاجر:هشش طفى النور واطلع البس برة انا عاوزة أنام
عصام وهو يرفع عنها الغطاء:هاجر قومى كده وكلمينى زى مابكلمك.
هاجر وهى تجلس بانفعال:فى ايه ياعصام عالصبح هو انت عاوز تقرفنى وخلاص مش هاين عليك تسيبنى ارتاح شويه
عصام :اقرفك هو لما اطلب منك تفطرينى زى اى ست فى الجنبا مابتعمل ابقى بقرفك
وبعدين مانا سايبك من يوم مااتجوزنا على راحتك ومدلعك عالاخر وتقريبا انا اللى بعمل كل حاجه
هاجر:على اساس اننا متجوزين من سنه ده احنا مكملناش تلت أسابيع.
عصام :هاجر انا قبل مااتجوز كانت ماما الله يرحمها بتقوم تفطرنى وبعد وفاتها بابا احيانا كان يعمللى الفطار واحيانا نيرة دلوقتى انا اتجوزت وواجب عليكى انتى اللى تقومى تحضريلي الفطار
هاجر:يعنى انت عاوزنى كل يوم اقوم عشان احضر لسيادتك الفطار يعنى انت مش حتعرف تطلع الجبنه والمربى من التلاجه وتسخن العيش وتاكل
عصام :طب حتى اعمليلي كوباية شاي اشربها قبل ماانزل هاجر :هو انت مش بتشرب فى الشغل خلاص يبقى إيه اللازمه انك تشربه هنا
عصام :نامى ياهاجر نامى مش عاوز منك حاجه بس لما ارجع حيبقى لينا كلام تانى
يرتدى ملابسه على عجل دون ان يفطر فلقد تاخر عن ميعاده وهذا اول يوم لرجوعه العمل
بعد حوالى ساعه يدخل الشركه ويسلم عليه الزملاء ويقدمون له التهنئه بزواجه ثم يدخل مكتبه وقد علم بخبر نقل شمس الى مكان اخر وهذا الأمر أراحه نفسيا خوفا من المواجهه بينهم
يدخل مكتبه فيجد مياده وزميلا اخر يجلس مكان شمس
مياده :حمد الله على السلامة ألف مبروك ياعريس
عصام :الله يبارك فيكي يامياده عقبالك
مياده:يارب
ثم ينظر لزميله الذى يضع وجهه فى الكمبيوتر الذى يعمل عليه :ازيك يامحمد
محمد :ازيك انت يا عصام حمدلله على السلامه
عصام :الله يسلمك ياسيدي مفيش مبروك
محمد :مبروك ياعصام
ثم يضع وجهه فيم يعمل دون توجيه أى حديث لأحد
ويبدأ عصام فى ممارسة عمله كما اعتاد فى السابق.
يمر الوقت فى العمل وقد بدأ يشعر بالجوع فهو لم يعتاد من قبل أن يخرج من البيت دون تناول الإفطار وكانت شمس ايضا تحضر له مجموعة من السندويتشات والكيك مع كوب الشاي الذى كانت تضعه أمامه دون ان يطلب منها.
حتى انه اوقاتا كثيرة كان يرجع البيت وهو لا يشعر بالجوع نهائيا
مياده :عصام انا حعمل شاي اعملك معايا
عصام :ياريت يامياده
ينتهى اليوم دون ان يتقابل مع شمس أو يراها
وياتى موعد عودته الى المنزل بعد يوم شاق متعب يشعر بالجوع الشديد فهو لم يأكل شيئا ولم يشرب سوى كوب الشاي الذى اعدته مياده حتى عندما عرضت عليه سندويتشا اعتذر :ربنا يخليكي يا مياده بألف هنا انا فطرت فى الببت قبل ماانزل
مياده :اه طبعا ياعم تلاقى المدام فطرتك قبل ماتنزل
عصام :اه الحمد لله
فيفتح الباب ويدخل :هاجر حبيبتى انتى فين
يدخل غرفة النوم فيجدها فى الفراش نائمه فيهزها لتفيق
هاجر انتى يابنتى قومى انا جيت
هاجر:حمد الله على السلامة رجعت امتى
عصام :لسه جاى انتى نايمه ليه
هاجر :لقيت نفسي سقعانه قلت انام
عصام :سقعانه ايه ده حتى الجو جميل جدا
بقولك إيه ياللا قومى حضريلنا الغدا احسن انا جاى واقع من الجوع على مااخد دش واغير هدومى
هاجر:انت جبت اكل إيه معاك
فيلتفت لها عصام :اكل انا مجبتش اكل معايا مش انتى طبختي
هاجر :طبخت طبخت ايه لا انا معملتش حاجه طبعا
عصام :نعم انتى بتهزرى يعنى ايه معملتيش حاجه امال كنتي بتعملى ايه طول اليوم
هاجر :فى ايه ياعصام مالك انت عاوز تعمل مشكله عالفاضى واللا ايه انت ناسي اننا عرسان والمفروض متعبش نفسي فى عمايل الأكل وانا قلت انت اكيد حتجيب حاجه جاهزة معاك واللا انت عاوز تهدنى فى البيت من دلوقتى
عصام :مااحنا من يوم مااتجوزنا معملتيش حاجه وبجيبلك كل يوم اكل جاهز بس خلاص كفايه كده بقى وانتى المفروض كنتي عملتى من نفسك وانا ماليللك التلاجه خضار ولحمه وسمك وفراخ يبقى ليه متعمليش
هاجر :بص بقى اعمل حسابك طول مااحنا فى شهر العسل انا مش حطبخ حاجه خالص و اتفضل اطلب ديليفرى
مش كفايه انك ضحكت علية وبدل مانقضي شهر العسل فى شرم ضحكت علية بأسبوع فى الغردقه
عصام :وهى الغردقه وحشه ياهاجر غيرك كان راضي باقل منها ولو مفيش خالص كان حيقول حاضر بردو ويحمد ربنا.
هاجر :تقصد مين بغيري بقى اكيد طبعا شمس مش كده
عصام :هاجر انا مجبتش سيرتها ومن فضلك ياريت سيرتها متجيش على لسانك تانى
و بصي بقى يابنت الناس عشان نبقى على ىنور من الأول اكل من برة تانى مفيش انا طاوعتك الفترة اللى فاتت قلت عروسه وبتدلع لكن من النهارده حتطبخى وتعملى الاكل فى البيت زى كل الستات انا موظف فاهمه يعنى ايه يعنى محيلتيش غير مرتبي
يعنى لازم ناكل اكل بيتى عشان المصاريف الدليفرى ده حيخرب بيتنا فى المصاريف وكمان اكل مش صحى
هاجر:ييه بقى يعني انا مش من حقى ادلع زى اى واحده عروسه
عصام :حبيبتى مانا بدلعك وبجيبلك اللي نفسك فيه بس بالمعقول مش كده
هاجر:طب عشان خاطرى جيب دليفرى وبعد كده نتكلم فى الموضوع ده انا مش حقدر اقوم اعمل اكل دلوقتى
عصام :ماشي ياهاجر حاضر امااشوف اخرتها معاكى إيه
💖💖💖💖💖💖💖💖💖
يتجمع جميع افراد عائلة يزيد حيث يحتفلون بعيد ميلاد مروة
شاكر :حبيبة قلبي كل سنه وانتى طيبه
مروة:وحضرتك طيب يابابا الله دى حلوة اوى ربنا يخليك ليا يا رب
تحتضنها هاله بكل حب:حبيبة قلبي كل سنه وانتي طيبه وربنا يجعل ايامك كلها سعاده وفرح وتتمتعى بصحتك ويخليلك ولادك وتفرحى بيهم يا رب
مروة :ربنا يخليكى لية ياماما ثم تفتح الهديه:حلوه اوى
هاله:بجد عجبتك
مروة:طبعا ياماما دى تحفه ربنا يخليكي ليا يا رب
ويعطيها يزيد وعاليه و عهد هديتهم وتشكرهم جميعا
مروة:ربنا يخليكم ليه يا رب مفيش سنه بتنسوا عيد ميلادى
يزيد:هو احنا عندنا كام مروة
على :ياللا بقى نطفى الشمع
تطفئ مروة شموع سنه انتهت ومرت من حياتها وتستعد لاستقبال سنه قادمه
جلست الاسرة مع بعضها فى جو يملؤه الحب والسعاده وفجأة يدق جرس الباب وتذهب الخادمه لفتحه
الخادمه :لووووووولى لوووولى ألف حمد الله على السلامة يا عمر يابنى
عمر وهو يسلم عليها بحب:الله يسلمك ياداده ياحبيبتى وحشتينى اوى
الخادمه :انت اكتر ياضنايا ده البيت نور
على:هى الزغاريد دى عندنا
يزيد:ايوة متهيالي فيجدون من يدخل عليهم فيندهش الجميع
على:عمر مش ممكن مش معقول إيه المفاجأة الحلوة دى
يسلم عليهم جميعابحرارة
يجرى على ابيه:بابا حبيبي وحشتنى اوى
شاكر:حمد الله على سلامتك ياابنى كنت خايف اموت قبل مااشوفك
عمر:الف بعد الشر عنك بابا ربنا يطول فى عمرك يارب
يزيد وهو يفتح له ذراعيه ليأخذه بين احضانه:حبيبي لاء بجد مش مصدق عينيه
عمر:شفت بقى عشان تعرف انى مقدرش اكسرلك كلمه عد الجمايل بقى يامعلم
ثم يأخذ مروة فى حضنه:حبيبة قلبي كل سنه وانتى طيبه ياقلب اخوكى
مروة:وانت طيب ياعمورة ياحبيبي
ويسلم على عاليه ويقبل الاولاد بكل حب واشتياق
عهد:حمد الله على السلامة يا عمر بجد انا مبسوطه اوى انك رجعت
عمر:الله يسلمك يا عهد ايه ده احنا كبرنا وبقينا عرايس حلوين اهوه فتفرح عهد بهذا الكلام
حتى ياتى دور هاله للسلام عليها
هاله :الف حمدالله على السلامه يا حبيبي
عمر وهو يمد لها يديه دون ان يحتضنها كالجميع:الله يسلمك
فتشعر بالاحراج من استقباله البارد لها
على:ايه ياعم كده بردو تخلينا مناخدش بالنا من صاحبك ازيك ياسيف عامل ايه
سيف :الحمد لله والله
شاكر:نورتوا بلدكم ياولاد أيوة كده
بدأ الجميع فى التحدث وكان الحديث يدور حول عمر ورجوعه بالسلامه
عشق وهى تجلس على قدم عمر :جبتلى معاك لعبه ياعمو
عمر:جبتلك حاجات حلوة اوى فيجد أنس ينظر إليه :وأنس حبيبي جبتله هو كمان حاجات جميله جدا
بصوا شايفين الشنطه الكبيرة دى
كلها حاجات عشانكم ياللا روحوا افتحوها وخدوا اللعب العبوا
يجرى الصغيران ويفتحان الشنطه ويلعبون بالألعاب
يزيد :اعمل حسابك تستريح من السفر وتنزل معانا الشركه علطول
عمر:انت مالك داخل علية حامى كده ليه اهدى علية شويه
على:وانت ياسيف مكانك معانا فى الشركه ان شاء الله
سيف :ده شئ يشرفني طبعا
عمر:وانتى ياعهد فى سنه كام دلوقتى
عهد:انا فى سنه تالته
عمر:ياااه معقوله الأيام جريت بسرعه كده فين لما كنتي عيله صغيرة وبتلعبي على رجلى وتيجى تعاكسينا انا وعلى واحنابنذاكر
فيضحك الجميع على هذا الكلام
يزيد:سيف انت حتبات معانا النهارده
سيف:لاشكرا ربنا يخليك انا حروح شقتى
يزيد:شقة إيه ياسيف دى زمانها مليانه تراب انت حتقعد معانا كام يوم لحد ماحد يظبطهالك وبعد كده تبقى تروح
سيف:بس يعنى
شاكر:مفيش بس هو انت مش زى عمر واللا ايه يابنى ده احنا كنا مطمنين على عمر بوجودك معاه ومحدش كان واخد باله منه غيرك
سيف:عمر ده اخويا
كانت عين عهد معلقه على عمر لا تحيد عنه وكان الجميع يتحدث بينما كان سيف شارد عنهم فى عالم اخر
عمر :ايه ياعم فينك مش معانا انت مش معانا خالص
سيف:ايه لا انا معاكم اهوه
💖💖💖💖💖💖💖💖💖💖💖💖💖
•تابع الفصل التالي "رواية شمس تتحدي الغيوم" اضغط على اسم الرواية