رواية شمس تتحدي الغيوم الفصل الثاني عشر 12 - بقلم عبير سليم
الفصل الثانى عشر من رواية شمس تتحدى الغيوم
بقلمي :عبير سليم
💖💖💖💖💖💖💖💖
فى غرفة شاكر وهاله
شاكر:ياااه اخيرا عمر رجع أحمدك يارب كنت خاي*ف أوى ياهاله أم*وت قبل مااشوفه
هاله:بعد الشر عنك ياشاكر متقولش كده الله يخليك ربنا يجعل يومى قبل يومك يارب
شاكر :حبيبة قلبي ليه بتقولي كده انتى لسه صغيره ربنا يطول في عمرك يا رب
هاله :وهى حي*اتى من غير وجودك فيها حيكون لزمتها إيه ثم تبدأ في الب*كاء :شاكر ربنايخليك خد بالك من نفسك ومن صحتك ياحبيبي انت مش بس جوزى انت ابويا واخويا وحبيبي وعمرى كله ربنا يخليك لية يارب انا مش حقدر اعيش من غيرك ولا يوم واحد انا عايشه بس عشانك من غيرك أضيع ياشاكر.
شاكر:هاله انا عارف انك زع*لانه من عمر بس حقك علية متزع*ليش منه عشان خاطرى
هاله:والله العظيم انا مازع*لانه منه أنا بس نفسي اعرف انا عملتله ايه عشان يبقى كاره*نى اوى كده انا حاولت والله أقرب منه كتير حاولت أخليه يحبنى لكن مفيش فايده بيكر*هنى اوى ياشاكر كره*ه لية باين فى عيونه اوى
انا نفسي ربنا ياخدنى عشان مضايهوش بشوفته لية مش عارفه اريحه ازاى ياريت الحب كان بايدنا كنت عملت اى حاجه فى الدنيا بس يحبنى ثم تنهار فى الب*كاء
شاكر:طب بس عشان خاطرى يعنى هو حبنا ليكى كلنا مش كفايه ده البيت كله والعيله والجيران ده حتى الشجر اللى فى الجنينه بيحبك كل ده مش كفايه
هاله:غص*ب عني والله نظراته لية بتوج*عنى أوى مش عارفه انا إيه الغلطه اللى عملتها وهو بيعا*قبنى عليها
شاكر:سيبيها على ربنا ياهاله وياعالم مش يمكن ييجى اليوم اللى تلاقيه يحس بحبك ليه ويجيلك وهو بيترمى فى حض*نك.
هاله:عمر يااااه دى اخر حاجه ممكن اتوقعها انا والله ربنا يعلم فرحتى برجوعه لكن انت شفت مقابلته لية كانت ازاى
شاكر:طب ممكن حبيبتى بقى متع*يطش والا حتعب بقى وانا مش مسئول عن اللى حيجرالى
هاله :لا خلاص كله الا كده الف بعد الشر عنك يا سيد الناس
شاكر:بموت فى قلبك الطيب ياحبيبة قلبي
هاله:وانا بعشقك ياقلب هاله
💖💖💖💖💖💖💖💖💖💖
فى غرفة عاليه ويزيد
عاليه :سيف شكله انسان كويس أوى ياحبيبي
يزيد :عاقل ياحبيبتى مش زى المجنون بتاعنا تعرفي برغم انه اصغر من عمر فى السن بس تحسيه أكبر منه وراجل كده يعتمد عليه
ومحدش كان بيطمنى عليه غيره ولولا انه كان بيحاول دايما يساعدنى فى اقناعه انه يرجع عمر عمره ماكان فكر انه يرجع ابدا.
عاليه :غريبه مع ان شكلهم قريب اوى من بعض في السن وفى الشكل تعرف سبحان الله زى مايكونوا اخوات بجد الشبه بينهم كبير
يزيد:ههههههههه لا طبعا مش للدرجه دى بس دى حاجه بتحصل كتير ان لما يكونوا اتنين مرتبطين ببعض سواء أصحاب او متجوزين تحسيهم بقوا شبه بعض اوى زى ماتكون طباعهم وارواحهم بتتقابل
عاليه وهى تحت*ضنه:زيي انا وانت كده ياحبيبي كل الناس بتقول اننا شبه بعض أوى
يزيد :بقى معقوله انا بردو قمر ومسمسم كده
عاليه:انت أجمل راجل فى الدنيا كلها
يزيد :دى عيونك هى اللى حلوة عشان كده شايفانى حلو
عاليه:انا عيونى عمرها ما شافت ولا حتشوف غيرك ياحبيبي
يزيد:لاء بصي بقى انا مش قد الكلام الحلو ده انتى عارفانى بضعف قدامك ياقمر
عاليه:ههههههه حبيب قلبي بس فى حاجه حصلت ضاي*قتنى أوى
يزيد:خير ايه اللى حصل
عاليه :عمر أحرج ماما هاله اوى يا يزيد انا قلت اكيد اتغير وطباعه اختلفت لكن واضح انه زى ماهو
يزيد:محدش بيتغير ياعاليه الا اذا كان عاوز ده وانا والله مش عارف اعمل معاه ايه بس انتى متعرفيش الموضوع ده معكنن علية ازاى وانا والله حاولت معاه كتير لكن مفيش فايده فيه
عاليه:بصراحه انا كنت حسه الدم*وع بتجرى فى عينيها. هى ياحبيبتى كانت بتحاول تدارى بلعبها مع مليكه
يزيد :أيوة كنت واخد بالي ماما طول عمرها بتحاول ماتبينش زع*لها ادامنا عشان عارفه احنا اد ايه بنحبها وبنخاف على زع*لها فكانت بتحاول تلعب مع الولاد عشان ميبانش عليها
عاليه :طب ليه كل ده يحصل ليه عمر مش زيك انت ومروه مانتم بتحبوها اوى وبعدين عمى ماارتكبش جر*يمه لما اتجوزها ده شرع ربنا يبقى ليه كده.
يزيد :والله ياعاليه ماما الله يرحمها لما تعبت اوى بعد ولادة مروة وفضلت تعبانه بابا مقصرش معاها ابدا بالعكس ده كان بيراعيها بنفسه ولما ماتت ياعاليه احنا كنا صغيرين ومحتاجين أم تربينا وتخاف علينا وبابا كان شاب حرام لما نحكم عليه يعيش وحيد من غير زوجه
وانا فاكر وقتها بابا اتكلم معانا وقاللنا انه حيتجوز والكلام ده كان بعد وفاة ماما بسنه وانا متكلمتش لكن عمر برغم انه كان صغير الا انه فضل يعيط ومخاصم بابا ومش بيكلمه وطول الوقت ماسك صورة ماما الله يرحمها ويعيط اصله كان اكتر واحد فينا مرتبط بيها كان بيحبها بجنون مرتبط بيها بشكل مرضي وهى الله يرحمها كانت طيبه وحنينه اوى بس حنقول ايه ارادة ربنا
عاليه :ونعم بالله ربنا يرحمها يارب امال عمى اتجوز ماما هاله ازاى انتوا كنتوا تعرفوها
يزيد :ابدا ولا عمرنا كنا شفناها قبل كده هى كانت تقرب من بعيد لناس قرايبنا فى الصعيد
وعمى الكبير مرة بابا وهو بيكلمه فى التليفون عشان يطمن على جدى منه ساعتها عمى قالله معلش انا حكلمك وقت تانى عشان فى مشكله عندنا فى البلد ورايح احلها
ولما بابا سأله قالله بنت غلبانه قريبتهم أهلها جوزوها لواحد بس هو واهله طلعوا وحشين اوى ومبهدلين البنت وخصوصاً انها طلعت مبتخلفش وجوزها عاوز يتجوز فى الشقه اللى هى عايشه فيها وتنزل ها تعيش مع امه وهو رايح يوصل معاهم لحل ووعده انه حيكلمه اول مايرجع
عاليه:وبعدين ياحبيبي ايه اللى حصل اتجوز عليها فى الشفه فعلا
يزيد:لاءعمى وقفلهم وقاللهم الكلام ده مش حيحصل وطلقها منه ولما رجع حكى لبابا وبابا عادى اخد الكلام ومحطش حاجه فى دماغه
لحد ماجه يوم سنوية ماما الله يرحمها وجه عمى من البلد عشان يواسي بابا فى يوم زى ده ويوميها عرض عليه انه يشوف البنت دى ولو عجبته يتجوزها لأنها غلبانه وملهاش حد واهلها من وقت مااطلقت بيعاملوها معامله س*يئه وخلوها خدامه ليهم ومبهدلينها
بابا كان مستغرب اوى ازاى يتجوز واحده ميعرفهاش ولاعمره شافها قبل كده بس لما سافر معاه وشافها عجبته لانك زى مانتى شايفاها حلوة وكمان كانت اصغر منه بكتير واتجوزها وجابها
والشهاده لله من اول لحظه دخلت فيها البيت لمتنا حواليها حبتنا زى مانكون ولادها فعلا واحنا كمان حبيناها اوى اديتنا الحب والحنان كله انا فاكر كويس لما كانت بتسهر باى حد فينا يكون تعبان وكانت واقفه جمب بابا وعمرها ماطلبت حاجه وكان كل همها احنا وبس كلنا حبيناها اوى تعرفى ياعاليه انا فاكر اول مرة قلتلها ماما اخدتنى فى حضنها وفضلت تبوس فية وتعيط كانت فرحانه اوى انى ناديتها بماما من غير ماحد يطلب منى
ومروة حبتها اوى هى بالنسبه لها امها معرفتش حد غيرها كانت بنهتم بيها اهتمام غير عادى
ماعدا عمر هو الوحيد اللى عمره ماقبلها فى حياتنا حاولت كتير اتكلم معاه لكن هو رافض تماما فكرة انها اخدت مكان ماما وكان بيرفض اى حاجه تقدمهاله ويرفض اى هديه منها
لدرجة انها لما كانت تجيبله حاجه زينا كانت تطلب من بابا هو يديهاله عشان يرضى ياخدها
عاليه:هو عمر اللى طلب يكمل تعليمه برة مش كده
يزيد:ايوة بعد الحمد لله مافتحنا الشركه وفى عز بداية الشغل وتوتر اعصابنا وبابا كان محتاج هدوء عشان يعرف يفكر حنعمل ايه بالظبط
الحرب كانت قايمه بين عمر وماما هاله لدرجة انها مرة طلبت من بابا انه يطلقها عشان تريح عمرمن وجودها
لكن لا لابابا ولا احنا وافقنا على حاجه زى دى
هو طلب منى اقنع بابا انه يخليه يسافر يكمل تعليمه برة وانا طبعا اقنعت بابا لأن ده كان افضل قرار وقتها عشان النار تهدى شويه وفعلا سافر ياعاليه وبقى ييجى زيارات وسنه تجر سنه لحد ما العمر جرى وقلت يمكن تكون الغربه غيرت فيه حاجه لكن مفيش فايده عمر هو عمر
الظاهر لسه مجاش الأوان عشان يتغير
عاليه:ياااه تصدق اول مرة اعرف الموضوع ده انا كل اللى اعرفه انه سافر قلت عادى لكن مكنتش اعرف السبب
بس تفتكر ممكن ييجى اليوم اللى عمر يتغير فيه
يزيد:مفيش حاجه بعيد عن ربنا وانا احساسي بيقوللى انه حيتغير بس بعد ماياخد قلم على وشه يفوفه
عاليه:عمر ياخد قلم وياترى مين ده اللى ممكن يدي عمر المهدى قلم يفوقه
يزيد:والله ماعارف بكرة الايام حتبين مخبيالنا ايه
عاليه:ونعم بالله ياحبيبي
💖💖💖💖💖💖💖💖💖💖
فى غرفة عمر
سيف :اهلك دول بصراحه ناس فوق الوصف
عمر:طبعا يابنى مش أهلى وتربية إيدي
سيف:هههههههه تربية مين ضحكتنى وربنا هو انت متربي أصلا يابنى
عمر:اخس عليك ياصاحبي كده بردو تشكك فى اخلاقى مكنش العشم
سيف :ياعيني تصدق صعبت علية الدمعه حتفر من عينى ترانى أب*كى اهئ اهئ اهئ يابنى اللى ربى خير من اللى اشترى هو في حد عارف فضايحك زيي
عمر:طب استر علية الله يخليك ده انا اخوك الكبير
سيف :هههههههه فى السن بس يامعلم
عمر:ماشي ياكبير بس اعمل حسابك يومين وحننزل الشركه تمام
سيف :تمام التمام بس قللى حلاقى عندك فى الشركه عروسة
عمر:والله معرفش انت وحظك يامعلم وبعدين انت مالك داخل عالموضوع جد كده ليه
ده انا اللى اكبر منك بخمس سنين مش بفكر نهائى فى الموضوع ده
سيف:لا حتفكر وقريب اوى كمان
عمر:ياسلام جبت منين الثقه دى ان شاء الله
سيف:احساسي بيقوللى كده وانت عارف احساس صاحبك عمره مابيخيب أبدا
عمر:انت حتقوللى ياللا نام بقى انا تعبت من السفر
سيف :تصبح على خير يا عمورة
سيف :وانت من اهل الخير ياسيوفه
عمر وسيف :هههههههه هههههههه
💖💖💖💖💖💖💖💖💖💖💖
عهد:ساعه عشان تردى
حنين وهى تتثاءب:فى ايه يابنتى القيامه قامت حرام عليكى انا كنت فى سابع نومه
عهد :عمر رجع ياحنين رجع
حنين:انتى قلتى ايه دلوقتي
عهد:بقولك عمر رجع ياااه انا مش مصدقه نفسي يخرببيت جماله قمر عمرى ماشفت حد قمر كده
حنين:لا بقولك ايه واحده واحده كده واحكيلي بالتفصيل
عهد:مفيش تفاصيل هو رجع وبس
حنين:واتكلمتوا فى حاجه
عهد:كلام عام العيله كلها كانت قاعده بس هو قاللى انى كبرت واحلويت وهزر وضحك معايا كتير
حنين :طيب بشرة خير وانتى ناويه على ايه بقى
عهد :امال انا بتصل بيكى ليه دلوقتي مش عشان تشورى علية اعمل ايه انا مش عاوزة اضيع وقت عمر ده قمر يابنتى وخايفه يطير من ايدي
حنين:ههههههه مجنونه وربنا عهد اعقلي كده بلاش عبط انتى بنت ناس ياحبيبتى ومحترمه وكل الجامعه بتشهد باخلاقك وانا بحبك ياعهد ومش عاوزاكى تعملى حاجه تقلل منك او تنزل من كرامتك او تسئ لاهلك فاهمانى واللا لاء
عهد:لا طبعا ياحنين انا مش ممكن اخلاقى تسمحلى اعمل حاجه مش كويسه بس انا عاوزة الفت نظره لية اخليه يشوفنى ياخد باله منى يلتفت لية يحبنى زى مابحبه
حنين:خلاص سيبيتى دلوقتى انام والصبح بعد المحاضرات نتمشى عالبحر ونمخمخ فى الموضوع قشطه
عهد :قشطه
💖💖💖💖💖💖💖💖💖💖💖
تشرق الشمس بنور ربها لتعلن عن ميلاد يوم جديد
يستيقظ فى الصباح كعادته للذهاب لعمله وهو على يقين بانها مازالت نائمه كعادتها ولكنه يتفاجا بعدم وجودها بجانبه فينهض من فراشه وينادى عليها:هاجر
فيجدها تدخل عليه الغرفه والابتسامه على وجهها :صباح الفل والياسمين على عيون حبيبي الحلوين
عصام :صباح الفل ياست الكل بس ايه النشاط ده كله اول مرة قومى قبلي من النوم
هاجر وهى تحتضنه:مهانش علية حبيبي يروح الشغل من غير مايفطر قمت وحضرت احلى فطار لأجمل عصام فى الدنيا كلها
عصام :حبيبتى ربنا يخليكى لية بس اشمعنى النهارده يعنى
هاجر بدلع:مش كنت عروسه وبدلع عليك هو انا لو مكنتش ادلع على جوزى حبيبي حتدلع على مين يعنى
عصام :لا ياحبيبة قلبي ده انتى تدلعى براحتك بس انا لاحظت انك بتنامى كتير اوى ياهاجر عارفه فكرتينى بفيلم سعاد حسنى وحسن يوسف اللى كان اهله طول الفيلم نايمين
كان اسمه الزواج على الطريقه الحديثه هههههههه.
هاجر:هههههههه لا ياروحى مش للدرجه دى اصل انت ياحبيبي كنت بتسهرنى طول الليل عشان كده مكنتش بقدر اصحى لكن بعد كده ححاول اظبط مواعيد نومى عشان اقوم معاك كل يوم الصبح وافطرك بايديه قبل ماتنزل
عصام وهو يقبل يديها:تسلملى عيونك ويسلمولى ايديكى الحلوين ياحبيبة قلبي تعرفي انى كنت زعلان اوى اليومين اللى فاتوا
هاجر:ليه ياروحى بس
عصام :كنت خايف تكونى اتغيرتى وبقيت مستغرب معاملتك وكلامك اللى كنتي بتقوليه وقلت معقوله بقى دى هاجر حبيبتى اللى بعت الدنيا كلها عشانها
هاجر:ههههههه لا طبعا ياحبيبي انا هاجر حبيبتك اللى حتخليك أسعد انسان فى الدنيا كلها وانا قلتلك عاوزة احس بس انى عروسه وبدلع عليك
عصام ياحبيبي انا صحيح اتجوزت قبلك بس انا بعتبرك اول راجل فى حياتى الراجل اللى نفسي احس معاه انى عروسه وملكه انا بحبك اوى ياعصام
عصام:وانا بم*وت فيكي ياقلب عصام بس ياللا حدخل اجهز بسرعه عشان الحق افطر قبل ماانزل احسن اتأخر
هاجر :وانا منتظراك ياروحى
💖💖💖💖💖💖💖💖💖💖💖
يتجه فى طريقه للدخول إلى الشركه بينما كانت هى الاخرى تتجه نحو الباب ولكن للخروج حيث تتجه لموقع العمل لتشرف على العمال وتتأكد من تنفيذ ماصممته على أرض الواقع
ولكن فجأة يتوقف الزمن تزداد دقات القلب سرعة تدور بها الكرة الأرضية
تلتقى العيون ويتوقف الكلام فى الحلق لحظه سكون تام لم ينطق فيها اللسان بحرف فقط نظرة عين واحده كفيله بأن تحرق الأخضر واليابس نظرة واحده تغنى عن الف كلمه ممكن ان تقال
كان هذا أول لقاء، يجمع بينهم منذ اخر مرة رأته بها
نعم كان كل منهما يشفق على نفسه من هذا اللقاء ولهذا كانت تتعمد يوميا الذهاب إلى موقع العمل حتى لاتكون هناك فرصه لمثل هذه اللحطه ولكن لسوء الحظ أو لحسنه جاءت تلك اللحظة التى كانت ولا بد ان تاتى مهما طال الوقت
شمس وهى تقترب منه :مبروك ياعريس الف مبروك بجد فرحتلك أوى بس مش كنت تعزمنا ده هو احنا مش زمايل بردو
واكلين مع بعض عيش وملح وعشرة سنين واللا كنت خايف منعرفش نقوم بالواجب مع انك لو كنت عزمتنا كنت حرقصلك رقص عمرى مارقصته فى حياتى
الرقص اللى انا كنت شايلاه لجوزى حبيبي واللى محدش ينفع يشوفه غيره بس طبعا عمرى ماكنت حبخل بحاجه زى دى يوم فرحك طبعا مانت غالى علينا أوى وفرحك يفرحنا
ايه ساكت ليه معلش انا بردو مقدرة ظروفك وعارفه انك عملت حاجه عالقد كده بس غريبه اوى ليه معملتهوش فى المكان اللى كنت حاجزاه لفرحنا بس عالعموم معلش تبقى تعوضها المرة الجايه
اه ماهو مادام جت فرحه تانيه بكرة تيجى التالته والرابعه مش بيقولوا الفرح بيجيب فرح بردو
واللى يغ*در مرة بي*غدر التانيه والتالته مش كده بردو يا يا عريس
عصام :شمس ارجوكى كفايه كده انا عارف انك زعلانه منى و مجروحه و
شمس :هههههههههه هههههههههه تصدق ضحكتنى والله ضحكتنى انا زع*لانه منك انت انا لو كنت زع*لانه منك زى مابتقول مكنتش قدرت اقف قدامك دلوقتى واتكلم معاك
لا يااستاذ انت اقل بكتير من انى ازعل منك او حتى ازعل عليك انت خلاص بقيت بالنسبه لى خيال مش اكتر
عصام :بتضحكى علية واللا على نفسك بالكلام ده شمس انا عارف انتى حسه بايه وزعلانه منى ازاى والكلام ده بتقوليه بس من زعلك بس كل اللى في ايدي انى ادعيلك ان ربنا يعوض عليكى باللى يحبك ويعرف يقدرك
شمس :لا حنين واصيل والله طب مش كنت تقوللى انك بتدعيلي ياراجل
ياااه يعنى انا ابقى بدعي عليك وانت بتدعيلي ياااه ده انا طلعت قلبي قاسي قوى
عصام :لسه بتدعى علية ياشمس
شمس :ايوة بدعى عليك ياعصام وحفضل ادعى عليك لحد اخر يوم فى عمرى وانا متاكده من عدل ربنا ومتاكده من انه حيورينى فيك اليوم اللى بتمناه اليوم اللى حشوفك فيه مذلول ومتهان بس ابقى افتكر ساعتها ان دى دعوتى دعوة مظلومه لأن ربنا سبحانه وتعالى اقسم على نفسه وقال وعزتى وجلالى لانصرنك ولو بعد حين
وانا مؤمنه بربنا وعندى يقين انه حينصرنى عليك وحيجيبلى حقى منك حتى ولو بعد سنين
عن اذنك يايا عريس وابقى بارك للعروسه بالنيابه عنى
الا قللي صحيح الشقه اللى معموله على ذوقى عجبتها والعفش عجبها واللا يمكن يكون زوقى معجبهاش
كان نفسي اقولك ربنا يهنيك بس حقولها ازاى وانا بدعي عليك لاء بص انا حقولك ربنا يديك على اد ضميرك ونيتك السوده.
تتحرك من امامه فهى لن تستطيع الصمود اكثر من ذلك فلقد تحاملت على نفسها اكثر مما كانت تتوقع
كان يقف أمامها نعم كان أمامها بنفس هيئته التى طالما عشقتها واقف امامها باناقته بتلك الملابس التى طالما حلمت ان تساعده فى ارتدائها يوميا قبل خروجهم للعمل سويا
كان يقف امامها بعيناه التى أسرتها فى الماضي تللك العينان التى كانت تذوب فيهم عشقا
ياااه اللهم قف بجانبي اعنى على ما انا فيه ساعدنى ياالله انى احاول جاهدة الصمود والاستعانه بالصلاة والصبر
يارب انى صابرة كما دعوتنى فاعنى كما وعدتنى
تسير والدم*وع تنهمر على خديها تحاول ان تثبت نفسها وتقوى نفسها
بينما هو يدخل الشركه ومنظرها وهى تتحدث إليه لا يفارق عقله ولا تفكيره
اما هى فلقد توجهت الى موقع العمل لترمى به حمولها وتهلك به طاقتها ولا يعد لديها اى فرصه للتفكير فى اى شئ
حتى يأتي موعد رجوعها للمنزل
تدخل المنزل فتجد خالتها تضع الطعام على المائده:ياللا ياشموسه شفتك داخله العمارة حضرت الأكل
شمس:حاضر يا خالتو حغير واصلى العصر واجى
تجلس شمس على المائده شاردة العقل
سناء:مالك ياحبيبتى سرحانه فى ايه فى حاجه حصلت في الشغل
شمس :شفته النهارده ياخالتو
سناء :انتى تقصدى عصام
شمس :ايوة هو شفته الصبح كنت خارجه وهو داخل
سناء :وبعدين حصل إيه
شمس:حقولك ياخالتو
بينما هو الاخر يدخل شقته فيشم رائحة طعام لم يعهدها من قبل:هاجر ياهاجر
هاجر وهى خارجه من المطبخ :انا هنا ياحبيبي حمد الله على السلامة يا عصومى
عصام :ايه ريحة الأكل التحفه دى
هاجر :عاملالك الأكل اللى بتحبه بس يارب عمايل ايديه تعجبك
عصام وهو يقبل يديها:اى حاجه من ايديكى الحلوين دول حلوة بس ايه الرضا ده كله فطار وغدا لا ده انا امى دعيالي بقى
هاجر:طب ياللا ادخل غير هدو*مك على مااجهز الاكل
عصام:تمام ياقلبي
بخرج بعد قليل ليجد على السفرة كل مالذ وطاب
عصام :ايه ده كله كنتى مخبيه المواهب دى كلها فين
ملوخيه وارانب ومكرونه بشاميل كمان لا انا مش مصدق نفسي ده انا كنت قلت انى شربت مقلب
هاجر :ياسلام بقى كده طب انا مقموصه بقى انا مقلب بردو
عصام :احلى مقلب ياقلبي
هاجر:مانا قلتلك انى كنت عاوزة ادلع شويه مش حقى يعنى
عصام :لا طبعا ادلعى على راحتك ياقلبي
عصام وهو يأكل :بقولك ايه ياهاجر
هاجر:نعم ياحبيبي خير
عصام :كنت عاوز اخدك ونروح نزور بابا
هاجر :نزور باباك اللى هو اصلا رافض جوازنا طب تيجى ازاى دى
عصام :عشان خاطري حبيبتى وبعدين بابا رافض جوازنا عشان شمس وانه حاسس انى ظل*متها لكن فى الاول والاخر انا ابنه واهم حاجه عنده سعادتى ولما يشوفنى سعيد ازاى معاكى اكيد طبعا حيفرح وينبسط
هاجر:خلاص اللى تشوفه ياحبيبى انا اهم حاجه عندي راحتك
عصام :حبيبة قلبي ياناس
هاجر:بس ممكن واحنا رايحين يعنى لو ينفع تجيبلي حاجه نفسي فيها
عصام :عينيه ليكى ياقلبي عاوزة ايه
هاجر: خاتم دهب شفته فى محل الدهب اللى على اول الشارع وحم*وت عليه اصل خاتم الخطوبه بتاعنا واسع على صوباعى وخايفه البسه يقع من ايدي
عصام :خلاص مفيش مشكله ناخد الخاتم ونبدله بالخاتم اللى نفسك فيه
هاجر:لا نبدله إيه خليه ياحبيبي ده رسمته حلوة خسارة احنا نشترى التانى من غير مااغيره ولو معكش فلوس خلاص ياحبيبي ميهمكش
عصام :لا ياحبيبتى معايا الحمد لله خلاص حاضر ياهاجر نجيبه
هاجر :حبيب قلبي ربنا يخليك لية ومنحرمش منك يارب 💖
ببنما فى منزل شمس
سناء :ليه كده بس ياحبيبتى
شمس :هو ايه اللى ليه كده ياخالتو
سناء:مكنش فيه داعى للكلام اللى قلتيه ده ربنا يسهله بعيد عننا
شمس:كان جوايا نار ياخالتو نار نفسي اط*فيها
سناء :وارتحتى ياشمس
شمس:لا ماارتحتش ياخالتو وعمرى ماحرتاح غير لما ربنا ين*تقملى منه بحق ظلمه لية وغدره بية
خالتو معلش انا حدخل تعبانه وعاوزة ارتاح
سناء :ياحبيبتى انتى ماكلتيش
شمس:شبعت ياخالتو شبعت
تدخل غرفتها وتفتح الدولاب لتخرج منه البوم الذكريات ومابه من صور جمعت بينهم فى مواقف عديده اخذت تتصفحه وتتذكر كل صورة بينهما وذكراها
كانت تشاهد الصور والدم*وع تجرى فى عينيها وتنهمر على وجهها ولما لا وهى كانت تحبه بل تعشقه. ثم أمسكت به وقطعت الصور جميعها كانت تمز*قها وتمز*ق معها قلبها الذى احترق بلهيب عشقه عشق من لا يستحق
شمس:خلاص ياعصام دلوقتى بس اقدر اقول انك انتهيت بالنسبة لي
💖💖💖💖💖💖💖💖💖تستيقظ فى الصباح على صوت حبيبة قلبها واوفى الناس لها
شمس بنعاس:صباح الفل على احلى عروسه في الدنيا كلها
إيمان :مش مصدقة نفسي ياشمس قلبي حيقف من كتر الفرحه اخيرا حتخطب ياناس
شمس :ههههههههه مجنونه وربنا بس احلى مجنونه فى الدنيا
إيمان :اوعى تتاخرى احسن حز*عل وربنا
شمس :عيب عليكى حطلع من الشركه عليكى على طول هو انا عندى اغلى منك ياقمر ربنا يهنيكى ياحبيبتى يارب
تغلق معها الهاتف وتستعد للذهاب الى الشركه
تدخل الشركه وتبدا فى انجاز عملها سريعا قبل الاستئذان للذهاب الى ايمان
بينما كان يزيد فى مكتبه يجد من يفتح عليه الباب
يزيد:مش معقول انتوا شرفتوا الشركه نورت
💖💖💖💖💖💖💖💖💖💖💖
•تابع الفصل التالي "رواية شمس تتحدي الغيوم" اضغط على اسم الرواية