رواية شمس تتحدي الغيوم الفصل الرابع عشر 14 - بقلم عبير سليم
الفصل الرابع عشر من رواية شمس تتحدى الغيوم
بقلمي :عبير سليم
💖💖💖💖💖💖💖💖
يزيد:خير يادكتور طمنا الله يخليك
الدكتور :كان بودى اطمنكم بس للاسف
شمس وهى منهارة :للأسف إيه يادكتور اوعى الله يخليك تقول انه مات
الدكتور :لاء هو الحمد لله عايش مماتش لكن حصل تهتك فى النخاع الشوكى اللى فالعمود الفقرى وده للأسف سببله لشلل نصفى
على:شلل لا حول ولا قوة الا بالله
يزيد:قدر الله وما شاء فعل طب والحل ايه دلوقتي حضرتك انا ممكن اعمله عملية ولو اضطر الأمر نسفره مفيش مشكله
الدكتور :هو فعلا حيحتاج عمليه وكمان نتيجتها مش مضمونه بس الكلام ده سابق لاوانه ومش حينفع عالاقل دلوقتى لازم ننتظر بعض الوقت
على:مش المفروض ان كل مانسرع يبقى افضل
الدكتور :مش فى كل الحالات حضرتك كل حاله وليها ظروفها
يزيد :اللى تشوفه يادكتور ولو محتاجين نجيب دكتور من برة يتابع الحاله مفيش اى مشكله
الدكتور :متقلقش حضرتك أن شاء الله خير احنا عندنا دكاترة ممتازين وحتى لو اضضطرينا نسفره لازم فى إجراءات وترتيبات ادعوله ياجماعه بعد اذنكم
كانت شمس تبكى بانهيار شديد على هذا العامل
ينصرف الدكتور بينما تجلس شمس وتضع يديها على وجهها وهى تبكى بقهرة
عمر لعلى بصوت منخفض:هى بتعيط بحرقه اوى كده ليه هو العامل ده يقربلها
على:لاء ياعمر بس هى شمس حساسه جدا
دى مرة شافت قطه ضربتها عربيه ادام باب الشركه فضلت تعيط طول اليوم واستئذنت من الشغل
عمر:ياااه معقوله فى حد كده
يزيد يجلس بجوار شمس ويطمئنها:اهدى ياشمس مش نقول الحمد لله انه عايش
شمس:بس اتشل يابشمهندس ده شاب صغير لسه فأول حياته ازاى حيكمل حياته وهو بالمنظر ده
يزيد :ومين قالك بس انى حسيبه او ممكن اتخللى عنه ان شاء الله حيعمل عمليه ولو اضطر الأمر حسفره يعملها برة
شمس :يارب يابشمهندس
فجأة يجدون شابه ومعها رجلان يجريان عليهما
الرجلان:طمنونا الله يخليكم وليد أخباره إيه
على:عايش الحمد لله
يزيد:انتوا قرايبه
الرجل:حضرتك انا صاحبه وده جاره ودى مراته
المرأة :يعنى جوزى مماتش جوزى عايش بجد
شمس:ايوة والله عايش اطمنى اطمنى ياحبيبتى ان شاء الله حيبقى زى الفل
المرأة :اطمن ازاى لا انا قلبي مش مطمن شكلك بيقول ان وليد حصلله حاجه والنبي الله يخليكى قوليلي جوزى جراله ايه الله يخليكى متخبيش عنى
الرجل:اهدى ياامل مش قالولك انه كويس
على:بصوا هو الحقيقه انه
أمل بصويت:مات اوعى تقول انه مات
الرجل:ودينى لو ماسكتتى لحقتلك فهمنا الله يخليك فى ايه بالظبط فهمنا وضعه إيه
على:هو للأسف الوقعه اثرت على العمود الفقري ومش حيقدر يمشي على رجليه فى الوقت الحالي
أمل وهى تلطم على وجهها :يعنى جوزى اتشل جوزى اتشل يالهوى يالهوى يامصيبتك ياامل ياحبيبي ياوليد ياريت كنت أنا وانت لاء لا ياحبيبي
شمس :اهدى الله يخليكى اهدى والله حيبقى كويس احنا مش حنسيبه البشمهندس حيعملله عمليه وحيرجع يقف على رجليه تانى
تمسك امل يد يزيد وتحاول تقبيلها فيسحب يده سريعا:لا حول ولا قوة الا بالله استغفر الله العظيم ايه اللى انتى بتعمليه ده بس
امل وهى منهارة من البكاء :الله يخليك وحياة أغلى حاجه عندك فى الدنيا متسبهوش ده وليد طول عمره غلبان ومالوش حد وابنه لسه ملحقش يفرح بيه ده الواد لسه مقالهوش يابابا
احنا ملناش غيره والنبي ماتسيبنا الله يخليك احب على رجلك
انا مستعده اجى امسحلكم بلاط الشركه مستعده ابقى خدامه عندكم بس جوزى يخف ويقف على رجله تانى ياحبيبي ياوليد كان مستخبيلنا بس فين ده ياربي
اااه ياوجع قلبي عليك ياحبيبي
كانت كلماتها تقطع القلب جعلت الكل يتاثر بشده لهذا الكلام وتلك الدموع التى تنهمر على وجهها وبشده
كان الجميع يحاول تهدئتها والحد من روعها وطمئنتها
بعد مرور ساعه فى غرفة المريض
وليد :اااه مش قادر ضهرى واجعنى اوى
امل تجلس بجوار زوجها وتقبل يديه :الف بعد الشر عنك يا سيد الناس سلامتك من الاه يانور عينيه
وليد :اااه الله يسلمك ياامل امال فين زياد سيبتيه فين
امل:اطمن ياابو زياد ياغالي انا سيباه مع ام جنى
أحمد صاحبه:الف بعد الشر عنك ياوليد كده بردو ياراجل تخضنا عليك
فتحى جاره:حمد الله على سلامتك ياوليد شده وتزول ان شاء الله
وليد:ربنا يخليكم يارب تعبتم نفسكم والله
فتحى :واحنا عندنا اعز منكم بردو ده انت اخويا وام زياد زى اختى
ثم يتقدم على ويزيد ليطمئنوا عليه:الف حمد الله على السلامة
وليد:الله يسلمكم بس حضرتكم تعبتوا نفسكم ليه بس ده كتير علية والله
يزيد :عيب عليك ياوليد متقولش كده ربنا يكمل شفاك على خير يارب
وليد:بس هو انا مش حاسس برجلى ليه
أمل وهى تبكى:معلش ياحبيبي يمكن من البنج واللا حاجه
وليد:بنج لا انا فقت خلاص من البنج الله انا مش حاسس بيها خالص
اه ضهرى بيوجعنى اوى مش قادر هو انا حصللى ايه انا جرالى ايه
فتبكى امل بشده:متتحركش والنبي يااخويا عشان متتعبش الله يخليك
وليد:طب فهمونى حد يرد علية مالها رجلية فيها ايه
على وهو يحاول تهدئته:بص هو يعنى انت مش حتقدر تمشي فى الوقت الحالى لكن ان شاء الله حتبقى كويس وتقف على رجلك تانى
وليد وقد نزلت عليه هذه الكلمات كالصاعقه:اتشليت يعنى انا اتشليت خلاص
امل وهى منهارة:بعد الشر عنك من الشلل ياحبيبي ده انا افديك بروحى حتبقى كويس وحتخف ان شاء الله حتخف والله
وليد بانهيار شديد:أخف اخف ايه انا اتشليت ياامل عارفه يعنى ايه يعنى بقيت عاجز خلاص يعني مش حيبقى لية لزمه فى الدنيا وخسارة فية اللقمه
امل:لا ياحبيبي لا ياوليد اوعى تقول كده ده انت سيد الناس كلها ده انت على راسي يااخويا انت حتخف وترجع تقف على رجليك تانى
وليد:أخف هو فى حد بيتشل ويرجع يخف ياريتنى كنت مت بدل ماييجى اليوم اللى ابقى مش قادر فيه أقف على رجلى
أمل :ألف بعد الشر عنك عاوز تموت وتسيبنى ياوليد تسيب امل حبيبتك وابنك عاوز تسيبه لمين ياوليد هو احنا لينا مين غيرك ياحبيبي اوعى تقول الكلام ده تانى ده انت نفسك فى الدنيا كفايه
يزيد:شمس من فضلك خدى أمل طلعيها برة شويه
تأخذ شمس أمل وتخرج بها للخارج حيث كان يوجد عمر وسيف بينما ظل فى الداخل معه على وصديقه وجاره
يزيد:بص بقى انا سيبتك تتكلم ب احتك وتطلع كل اللى جواك لكن دلوقتى جه دورى انا بقى حتسمعنى واللا اخد بعضى وأمشي
وليد وهو يمسح دموعه كالاطفال:اتفضل يابشمهندس
يزيد:وليد انت راجل مؤمن بربنا وعارف ان المؤمن مصاب وان اى حد فينا معرض تحصلله اى حاجه فى اى وقت واحنا منقدرش نقول غير قدر الله وماشاء فعل
وندعى ربنا انه يقف جمبنا ويخرجنا من المحنه اللى احنا فيها على خير
وانت حتخف ان شاء الله احنا مش حنسيبك ياوليد انا مش بقول كلام والسلام لا ياوليد انت حتتعالج ولو لزم الأمر حسفرك برة وبامر الله حتقف على رجليك تانى
انا عمرى مااتخليت عن اى حد اتشغل معايا ياوليد
ولازم تكون ثقتك فى ربنا كبيرة ربنا بيقول أنا عند ظن عبدى بي فلازم تظن بالله خير عشان ربنا يشفيك أن شاء الله
وكمان النبي صلى الله عليه وسلم بيقول بشروا ولا تنفروا
يبقى لازم نستبشر خير بربنا
هاه ياراجل يامؤمن حنقول ايه دلوقتي
وليد:الحمد لله اللهم انا لا نسألك رد القضاء ولكن نسألك اللطف فيه
يزيد وهو يطبطب على يديه:ونعمه بالله
انت حتفضل هنا لحد مايصرحولنا بالخروج وانا حاجى بنفسي اوصلك للبيت وحنشوف بعد كده ايه اللى حيتعمل ان شاء الله
وليد :انا مش عارف أقول لحضرتك إيه يابشمهندس
يزيد :تدعيلي ربنا يشفيلي مراتى ويخليلي بنتى اللى طلعت بيها من الدنيا
وليد:ده انا حدعيلك ليل ونهار ربنا يباركلك فيهم يارب💖
💖💖💖💖💖💖💖💖💖
تمر الأيام ويبدأ عمر وسيف فى ممارسة عملهما بالشركه
حيث يقومان بالاعمال التى كلفهما بها يزيد
شمس :من فضلك يابشمهندس اللى بيحصل ده مش صح
عمر:ياسلام وانتى بقى اللى حتعرفينى الصح والغلط
سيف:فى ايه بس ياجماعه التفاهم مش كده ممكن نهدى شويه احنا فريق واحد ولازم نشوف اللى فى صالح الشركه ونعمله
شمس :الشركه دى بالتحديد لو اتاخرنا عن تحديد معاد التسليم بيوم واحد بيطبقوا الشرط الجزائى فورا
يعنى مينفعش نحط معاد قريب تحسبا لاى ظرف طارئ لازم ناخر المعاد شويه
عمر: وليه منشدش على العمال ويشتغلوا وقت اضافى وبالتالي نسلم بدرى
سيف :لا طبعا ياعمر حتى لو اشتغلوا وقت اضافى مانت عارف اصول البناء وان فى وقت زمنى بين كل دور والتانى عشان صحة البناء
شمس :قولله يابشمهندس عشان الظاهر انه اول مرة يشتغل فى المجال ده
عمر:بقولك ايه انتى تلتزمى حدودك معايا وانتى بتتكلمى انتى فاهمه
شمس :انا ملتزمه حدودى على فكرة ومش محتاجه حد يعرفنى اتكلم ازاى لكن مينفعش يبقى فيه غلط ونسكت عليه
على وهو يدخل عليهم:فى ايه باشباب صوتكم جايب للشارع من امتى ياشمس واحنا صوتنا بيعلى كده
شمس :الفضل للبشمهندس عمر:عن اذنكم
على:فى ايه ياعمر ايه اللى حصل
سيف:انا حفهمك ياعلى
يجلس عمر وسيف يتناقشان مع علي
💖💖💖💖💖💖💖💖💖
فى منزل يزيد المهدى
عاليه :وحشتينى اوى ياعهد طمنينى عليكى عامله إيه فى الدراسه يا حبيبتي
عهد:تمام والله يالولو اختك شطورة انتى عارفه
تجرى عشق عليها:عهد حبيبتى وحشتينى اوى
عهد وهى تحتضنها:انتى وحشتينى اكتر ياحبيبة قلبي
امال فين طنط هاله وعمو شاكر
عاليه :فوق ياحبيبتى اصل عمى تعبان شويه وانتى عارفه ماما هاله مبتحبش تسيبه وهو تعبان
عهد:عارفه يالولو الحب ده احلي حاجه فى الدنيا بيخللى الحبيبين مع بعض دايما ميقدروش يبعدوا عن بعض ولا يستغنوا عن بعض ابدا
عاليه:ايوة ياحبيبتى مظبوط بس ده لما يكون حب من طرفين مش من طرف واحد
عهد:تقصدى إيه يالولو بالكلام ده
عاليه :عهد انتى عارفه انتى ايه بالنسبه لى انتى مش اختى ياعهد انتى بنتى الصغيرة اللى ربيتها من وهى فى اللفه
واكتر حاجه تهمنى فى الدنيا كلها مصلحتك ياحبيبتى
عهد :...................
عاليه:عهداوعى تكونى فاكرانى مش حسه بيكى ولا عارفه بتفكرى ازاى لا انا فهماكى وحسه بيكى اوى
بس كل اللى فداماغك ده أوهام عمرها ماحتبقى حقيقه ابدا
عهد:ابله عاليه أنا
عاليه:ايوة صح انا ابله وعلى:ابيه وعمر كمان ابيه ياعهد ومش حيكون غير كده انتى فاهمه
عهد :أبله عاليه ايه الكلام اللى حضرتك بتقوليه ده انا مش فاهمه حاجه
عاليه:عهد انتى عارفانى انا مبحبش اللف والدوران خليكى صريحه معايا بدل وربي لحتشوفى وش تانى مشوفتيهوش قبل كده
عهد : انا بحبه بحبه اوى
عاليه :مش حقيقي ياعهد انتى بس منبهرة بيه وبشخصيته لكن صدقينى مش حب ياحبيبتى
عهد انتى لسه صغيرة وحتقابلي اللى تحبيه بجد
عهد:لاء انا بحب عمر ومش حقدر أحب حد غيره وهو لازم يحس بحبي ليه
عاليه:لا ده انتى تبقى اتجننتى خلاص خللى بالك لو على عرف حاجه زى دى مش حيحصل كويس ومش بعيد يمنعك تيجى هنا
عهد:ليه هو انا عملت ايه غلط هو حرام انى احب
عاليه:لا طبعا مش حرام انك تحبي بس لازم يكون فى تكافؤ بينكم فى حاجات كتير
عهد:عشان السن مش كده بس انا الموضوع ده مش فدماغى
عاليه:مش السن بس يابنتى انتوا تفكيركم مختلف تماما عمر طبعه صعب غير على ويزيد هو مش وحش بس جاف فى مشاعره مش حيعرف يحتويكى انتى معجبه بشكله وطريقته لكن مش هو الشخص اللى ممكن يسعدك
صحيح هو ليه علاقات كتير بس من غير حب وقت بيقضيه وخلاص
ده غير بقى انك مش فدماغه اصلا ولا عمره حيبصلك لو عملتى قرده لأنه مش شايفك غير البنت الصغيره اللى كانت بتقعد على رجله
عهد :والبنت الصغيرة كبرت خلاص وانا حعرف ازاى اخليه يحس بية ويحبنى وبعدين حضرتك لسه قايله انه محبش قبل كده يعنى مفيش حد. فحياته يبقى ليه مكونش انا وليه محاولش اقرب منه واخليه يحبنى
عاليه:عاوزه تجرى وراه واالا ايه يا هانم انتى ناسيه انتى متربيه ازاى ودينى وايمانى ياعهد اما عقلتى وطلعتى الكلام الفارغ ده من دماغك لكون قايله لعلى واسيبه يتصرف هو معاكى بطريقته
عهد:ليه بس كده ياعاليه وانا اللى كنت فاكرة انك حتساعدينى وتقفى جمبي هو انا مش اختك ويهمك سعادتي
عاليه :أساعدك لما اكون مقتنعه باللى بتعمليه
عهد انتى حبيبتى ياعهد انتى غلاوتك من غلاوة عشق واللى بتمنهولها بتمنهولك ياحبيبتى وأقسم بالله انا لو عندى أمل بنسبة واحد فالمليون انك ممكن تيجى فدماغ عمر كنت وقفت جمبك وساعدتك
بصى ياعهد انا صحيح معاشرتش عمر ومقعدتش معاه كتير لكن يزيد معرفنى كل حاجه عنه وانا لاحظت صدق يزيد فى كل كلمه قاللها لما كنت بشوفه فى اى مرة بييجى فيها
فوقى فوقى ياحبيبتى وانتبهى لمذاكرتك وشوفى مستقبلك وبكرة تحبي وتتحبي
عهد :طب ولو اثبتلك ان عمر ممكن يحبنى وهو بنفسه اللى حيطلب يتجوزنى حيكون ايه ردك وقتها
عاليه:ده لما يكون من نفسه مش لما انتى تجرى وراه وتقللى من هيبتنا قدامه
عهد انا قلتلك اللى عندى عشان لما تعملى حاجه غلط ورد
فعلى ميعجبكيش متبقيش تلومى غير نفسك
💖💖💖💖💖💖💖💖💖
فى داخل مكتب يزيد حيث يقوم بامضاء بعض الأوراق
يفتح عمر عليه الباب ويدخل
يزيد وهو ينظر إليه :خدى يامنى
منى:شكرا يابشمنهدس اى اوامر تانيه
يزيد :شكرا يامنى تقدرى تتفضلى وألف سلامه على القمر الصغنون
متى:الله يسلم حضرتك
يزيد:هو مش فى باب يابنى ادم انت تخبط عليه
عمر:انا عاوز اعرف انا وظيفتى ايه فى الشركه دى بالظبط
يزيد:ممكن توطى صوتك وتتكلم بالراحه
عمر:يزيد انت لما طلبت منى ارجع حسستنى ان حيبقالى مكان فالشركه وان وجودى حيكونله اهميه لكن اللى انا شايفه عكس اللى فهمته وواللى انت حسستنى بيه
يزيد:وإيه اللى انت شايفه ان شاء الله
عمر:شايف انى كيس جوافه قرطاس لب مليش اى تلاتين لزمه ولا كلمتى حد بيسمعها
يزيد :عمر اتعدل كده واتكلم صح يعنى ايه ملكش لزمه امال انا مشغلك ليه ان شاء الله وجبتك ليه من برة
عمر:على اساس انك مش عارف ان البت اللى اسمها شمس دى حاشرة مناخيرها فى كل حاجه
يزيد:اولا مسمهاش بت دى مهندسه وثانيا انا مش عاوز مشاكل بينكم بالعكس انا عاوزك تستفيد من خبراتها فى الشركه شمس معانامن عشر سنين وعارفه كل كبيرة وصغيرة وفاهمه السوق ماشى ازاى
عمر:وانا بقى مش عاوز اشتغل معاها انا مسكت نفسي عنها بالعافيه واعمل حسابك من دلوقتى مفيش مكان حيجمعنى بيها
ويتركه ويخرج فيجد مياده بالخارج
عمر:وانتى واقفه كده ليه انتى كمان ياللا اتفضلي على مكتبك
مياده :الحق علية لمحتك خارج متعصب من مكتبها قلت استناك اشوف مالك وايه اللى مزعلك ابقى غلطانه
عمر:هههههه لا ياقمر مش غلطانه طبعا هو انا اطول ان القمر ده يقف يطمن علية
بس الحمد لله ان عندكم حد هنا بيضحك احسن اللى جوة دى عقدتنى فى النوع كله
مياده:انت قصدك شمس هههههههههه لا دى اصلها متعقده من الرجاله وبطلع عقدها على اى راجل تشوفه
عمر:دى متعقده دى تعقد بلد
مياده :اصل كلام فى سرك خطيبها سابها قبل الفرح باسبوعين فياعينى جاتلها حاله نفسيه وبقت بتكره كل الرجاله
عمر :اه قلتيلي بقى اتاريها بتقول شكل للبيع بص بصراحه عنده حق يسيبها ده انا كل مااشوفها الاقيها بتعيط دى شكلها نكديه اوى
اوعى تكونى انتى كمان نكديه زيها
مياده :مين انا فشر لا طبعا ده انا عسل
عمر:عسل بس ده انتى سكر مكرر
بينما فى الداخل يتحدث يزيد لعلى
يزيد:على تعالالي حالا
فيتجه اليه على فى مكتبه
على:ايوة يا يزيد عمر طبعا جالك مش كده
يزيد:إيه اللى حصل بالظبط
على:مش متفقين يايزيد وواضح ان فكرتك انك تخليهم يشتغلوا مع بعض غلط
يزيد:ممكن متدخلش بينهم تانى
على:ازاى يعنى ده صوتهم كان جايب لآخر الشارع
يزيد :خليها تربيه مفيش حد حيجيب مناخيره الأرض ولا يعلمه الادب غيرها
على:عمر انت متاكد من اللى بتقوله ده
يزيد:لما يزيد يقول حاجه يبقى لازم يكون متاكد منها
💖💖💖💖💖💖💖💖💖
@الجميع
•تابع الفصل التالي "رواية شمس تتحدي الغيوم" اضغط على اسم الرواية