رواية شمس تتحدي الغيوم الفصل السابع عشر 17 - بقلم عبير سليم
الفصل السابع عشر من رواية شمس تتحدى الغيوم
بقلمي :عبير سليم
💖💖💖💖💖💖💖💖
يسيران فى الشارع وهما يتحدثان سويا
شمس:تورتة إيه بس ياايمان اللى حنجيبها
إيمان :ياسلام ومالها التورته يااختى وبعدين هو احنا حنجيبها من المخبز ده احنا حنجيبها من لابوار يعنى حاجه متكلفه وممكن كمان ناخد معاها كيلو شيكولاته اظنى مفيش أحسن من كده
شمس :بصي فكرة الشيكولاته حلوة بس نجيب علبة شيك وغاليه وناخد معاها بوكيه ورد إيه رأيك يامونتى
إيمان :ورد إيه بس ياشمس هو احنا رايحين مستشفى وبعدين دول عندهم جنينه مليانه ورد يعنى حيبقى تكلفه عالفاضي
شمس :يخرببيت سنينك امال حنجيب إيه بس
إيمان :والله ماعارفه انا احتارت مااحنا لو كنا رايحين لحد من جيرانا كان اخرهم معانا ازازتين حاجه ساقعه واتنين كيلو فاكهه وكانوا حيموتوا من الفرحه لكن الناس اللى زي دول تبقي محتارة تاخديلهم ايه
بس فعلا فكرة التورته دى مش حلوة يعنى هما محرومين من التورته ده تلاقيهم بياكلوها كل يوم مش زينا بناكلوها في المناسبات بس
شمس :ههههههه هههههههه
إيمان :بتضحكى على إيه ياقلبي
شمس :أصلي افتكرت وانا صغيرة لما كنت اروح مع ماما او خالتو فرح كنت كل شويه اقولهم هما حيدونا الجاتوه امتى هههههههه هههههههه هههههههه
إيمان :ههههههه أيوة فعلا وأول ماالناس تاكل الجاتوه تلاقى نص المعازيم طاروا زي مايكونوا كانوا رايحين الفرح عشان الجاتوه
شمس :خالتو دايماً تقول الضيف المجنون ياكل ويقوم هههههههه
إيمان وشمس :هههههههه هههههههه
وفجأة تلمح إيمان عصام وبصحبته زوجته يمشيان وهو يمسك بيدها فتخاف أن تراهم شمس فيعكر صفو هذه اللحظات الجميله التى تضحك فيها
إيمان :شمس بصي تعالي ندخل المحل ده بسرعه
شمس :وهو ده وقته ياايمان كده حنتاخر
إيمان :ثانيه واحده بس فى بلوزة عجبانى وعاوزة اوريهالك وتاخذها وتدخل سريعا ثم يخرجان بعد مده
شمس :هو احنا يعنى ناقصين تأخير عشان تعطلينا كده
إيمان :مش كنت بدور عليها
شمس:تلاقيها اتباعت ويمشيان وقد اطمأن قلب ايمان بعدم وجود عصام فى هذا المكان
إيمان بينها وبين نفسها:ربنا ينتقم منك ياعصام بقى تسيب شمس عشان الجربوعه دى
شمس :ياللا نجيب ورد من المحل ده
💖💖💖💖💖💖💖💖💖
عصام :انتى ليه جايبانا من هنا احنا كده بعدنا اوى عن البيت
هاجر:اصل الشارع ده في محل شنط تحفه وانا محتاجه شنطه جديده
عصام :شنطة إيه ياهاجر مانتى دولابك مليان شنط
هاجر:خلاص خلاص متنرفزش نفسك مش عاوزة خلاص حاجه
عصام :هاجر هو احنا كل خروجه لازم تشتري حاجه
هاجر :هو انا يعنى بطلب إيه أنا لا طلبت عربيه ولاشقه عالبحر انا طلباتى بسيطه أوى
عصام :وانا لو معايا حجيبلك حته من السما بس انتى عارفه الظروف وبعدين مين قالك انى منفسيش اجيب عرببه بس كنين واللى جاى على اد اللي رايح احنا لو مسكنا ايدنا شويه فى المصاريف ممكن نشتري عربيه
هاجر:عصام الحقنى انا دايخه
عصام :مالك ياهاجر فى إيه
هاجر:مش عارفه الظاهر انى اخدت دور برد حسه انى دايخه أوى
عصام :يمكن تكونى حامل
هاجر:حامل مش عارفه بس ممكن والله
عصام :خلاص على أول الشارع عندنا فى معنل تحاليل نطاع نعمل تحليل حمل ونشوف
هاجر:طب ياللا بينا
💖💖💖💖💖💖💖💖💖💖💖💖💖
بعد مرور بعض الوقت فى منزل يزيد
عاليه :منورين والله يابنات كان لازم بعنى انس يتعب عشان تيجوا
ايمان :ده نورك والله يامدام عاليه ان شاء الله المرة الجايه نيجى فى مناسبه حلوة
عاليه: اسمي عاليه ياايمان متعمليش تكليف بيننا ياحبيبتى ده ربنا يعلم والله غلاوتكم عندنا
إيمان :ماشي يالولو
عاليه :هههههههه عسل وربنا ياايمان انتى متعرفيش على ويزيد بيعزوكى اد ايه
إيمان :وهو فى حد زي البشمهندس على و البشمهندس يزيد بس بصراحه كده البشمهندس عمر مش شبههم خالص خنيئ اوى انتوا جايبينه منين ده.
عاليه:ليه بس يامونى عمر كويس والله
إيمان :كويس ايه بس ده كأنه جاى من كوكب آخر
عاليه :ههههههههه معلش بقى استحملوه شويه وان شاء الله حياخد عليكم وانتى ياشموسه عامله ايه يا حبيبتي
شمس :الحمد لله والله بخير
عاليه :يارب دايماً
طب بقولكم ايه تعالوا نطلع لانس عشان مش حيقدر ينزل هنا
شمس :طب لو تعبان واللا نايم مش مهم والله المهم إننا اطمنا عليه
عاليه :لا طبعا لازم تطلعوا تشوفوه ياللا اتفضلوا وعشان تديله الورد الجميل ده بنفسك
معلش مروة وعلى راحوا يجيبوا شوية حاجات من البيت عندهم ويزيد وعمر زمانهم على وصول
ايمان وهى تهمس لشمس:ربنا يستر ونلحق نمشي قبل البنى ادم اللى اسمه عمر ده ماييجى
شمس:على رأيك بصي احنا نقعد حبه صغيرين ونمشي على طول ومتقعديش ترغى انا عارفاكى
إيمان :ماشي ماشي
تطرق عاليه الباب وتفتحه فتجد هاله وشاكر وعشق جالسين معه حيث كانت هاله تطعمه ليتناول الدواء
عاليه :اتفضلوا يابنات ادخلوا
شمس :مساء الخير
هاله:مساء النور ياحبيبتى
شاكر: اهلا أهلا بالبنات الهرابين
شمس :ليه بس كده حضرتك
شاكر: مش لما كنت عندكم في الشركه قلتلك تيجى تزورينا انتى والعسل دى وطنشتونى
إيمان :ههههههههه واحنا نقدر على زعلك بردو بس ارهاق والله وبعدين هو حضرتك لسه فاكر ده الكلام ده من زمان
شاكر :على اساس انى كبير وعندى زهايمر يعنى
شمس :لا وربنا إيمان متقصدش
شاكر :ههههههه لاياستى اطمنى انا ذاكرتي حديد
صحيح نسيت اعرفكم هاله القمر دى تبقى شمس والعفريته دى إيمان أجمل بنوتين في الشركه
هاله :اهلا يابنات نورتونا والله ده انا كان نفسي اشوفكم من زمان
إيمان :ربنا يخليكى ياطنط
شمس :حمد الله على السلامة يا بطل
أنس :الله يسلمك ياشمس
بس انا مش بطل البطل مابيوقعش لكن انا طرت ووقعت على وشي
إيمان :مايوقعش الا الشاطر ياقمر و ان شاء الله لما تكبر تبقى طيار وتسوق انت الطيارة بنفسك
أنس :أنا ابقى طيار
هاله:احلى طيار فى الدنيا ياحبيبي
عشق:وانا اطير معاك ياانس
أنس :خلاص انا موافق انا عاوز ابقى طيار واشتري طيارة اطير بيها انا وعشق
إيمان :تطير انت وعشق يالهوي لا ده انا لازم اجيب حسن يقعد جمبك وتعلمه الكلام الحلو ده
عاليه :ههههههه حبيبة قلبي ربنا يسعدك يا رب
عشق :شمس ياشمس
شمس :نعم ياقلبي
عشق :هو احنا ليه مش بنطير زى العصافير والطيارات
شمس :العصافير ربنا خلقها بتطير لأن جسمها خفيف بيساعدها تطير
عشق :طيب مانا كمان صغيرة وبابى دايما يقولى انى خفيفه يبقى اقدر اطير
شمس :بس انتى معندكيش جناح تطيري بيه ياحبيبتى
عشق:حشتري جناح واطير
إيمان :زى عباس بن فرناس كده
أنس :مين عباس ده يامونى
إيمان :ده ياسيدي كان واحد موسيقي وشاعر من زمان أوى وكان نفسه أوى يطير راح جايب قماش وعمله زى الجناحات ونط من فوق الجامع الاموى فى دمشق
عشق:وطار يامونى
إيمان :اه طار بس طار عالاخرة
أنس :يعنى ايه طار عالاخرة يعنى طار فى الهوا
إيمان :لا ياحبيبي طبعا ده دريب راح واقع هههههههههه
عشق:وقع زى أنس وراح المستشفى
إيمان :لحد هنا ومعرفش اللى حصل هما حكولى كده
أخذوا يتبادلون الضحكات بأصوات عاليه حتى وجدوا الباب يفتح عليهم
يزيد:متجمعين عند النبي ان شاء الله
شاكر :ان شاء الله يا حبيبي
حمد الله على السلامة يا يزيد
يزيد :الله يسلمك يا امى
عمر:مساء الخير
الجميع يرد :مساء النور
ايمان لشمس :ياللا بينا نقوم
شمس :طب احنا حنستئذن بقى ياجماعه وألف حمد الله على السلامة يا قمر
يزيد:هو اذا حضرت الشياطين غابت الملائكه واللا إيه يابنات
إيمان :ياخبر ابيض بقى حضرتك شياطين بردو يا بشمهندس بس احنا هنا من بدرى ولازم نمشي عشان منتاخرش
يزيد :لاء اقعدوا انا لسه مقعدتش معاكم
عمر:ماتسيبهم يمشوا براحتهم يايزيد فينظر له والده بغضب
عمر:قصدي يعنى عشان ميتاخروش
شاكر:مفيش مشي من هنا غير بعد ماناكل كلنا سوا
شمس :ناكل لا ناكل إيه حضرتك مش حينفع خالص
يزيد :كلام بابا لازم يتنفذ ياشمس
إيمان :والله يابشمهندس احنا اصلا يادوب اكلنا وجينا على طول
هاله:عشان خاطرى انا يابنات انا عاوزة اقعد معاكم شويه كمان قعدتكم جميله اوى مبتشبعش منها.
شمس :إيمان هى اللى بتخللى القعده حلوة
هاله :وانتى كمان ياحبيبتى ماشاء الله عليكم ربنا يسعدكم يارب
يزيد:طب قولوا للجماعه تحت يحضروا الأكل على مايبجى على ومروة وعهد كمان على وصول
عمر اتصل على سيف قلله ييجى بسرعه عاوزين نتلم كلنا
عمر:هو احنا عندنا فرح واللا حاجه
عاليه:وهو فى فرح احلى من وجود شمس وايمان هنا
عمر :حاضر ثم ينظر لايمان بغضب:صبرنى يارب
يخرج عمر بينما يضحك يزيد على منظر ايمان
يزيد:مالك يابنتى فى إيه
إيمان :هو حضرتك متاكد انه اخوك
يزيد:ايوة طبعا
إيمان :بس ده حالته صعبه اوى هو تعبان واللا فيه حاجه على طول قرفان ومش طايق نفسه وبيتخانق مع دبان وشه
شاكر :معلش ياايمان بكرة لما ياخد عليكم اكيد حيتغير
إيمان:يامسهل يارب اما نشوف
هاله:ياللا ياجماعه اتفضلوا
عشق :بابى انا ممكن اقعد مع انس عشان ميقعدش لوحده
يزيد:لا ياحبيبتى انا حشيله واخليه يقعد معانا عاوزه يفرفش شويه كده
عاليه:يفرفش اوى ده انا خايفه ايمان وعمر يمسكوا فى بعض وتقلب خناقه
يزيد:لا متقلقيش اطمنى وبعدين انا كنت مستنى الفرصه دى من زمان وبابا سهلها عالاخر
عاليه :حبيبي انت بتقول ايه انا مش فاهمه حاجه
يزيد:حفهمك ياقلبي بس مش دلوقتى ياللا بينا
يدخل على ومروة ومعهم عهد ويسلمون على إيمان وشمس
إيمان وهى تحمل مليكه من هاله :الله اكبر ايه الطعامه دى مروة :ربنا يخليكى يامونى
شمس :أمورة اوى شبهك اوى يامروة
مروة:ملوكتى دى روح قلبي من جوة
ثم يجلس الجميع حول المائده وبعد قليل يصل سيف ايضا
يبدأ شاكر فى فتح بعض الموضوعات ويتبادلون الحوار
عاليه :فى إيه يابنات انتوا مبتاكلوش ليه هو الاكل مش عاجبكم
شمس :لا والله ابدا احنا بناكل اهوه وبعدين الأكل حلو جدا
مروة:بألف هنا وشفا منورة يامونى
انتى عارفه ياايمان على طول ماهو فى البيت بيفضل يحكيلي على مغامراتك فى الشركه ويموتنى على نفسي من الضحك
إيمان :ههههههه وهو فى زى البشمهندس على فتجد عمر ينظر لها بشر
إيمان بصوت منخفض :ياساتر يارب اللهم احفظنا
ثم تنظر له بابتسامه :حضرتك عامل إيه دلوقتي يابشمهندس
عمر:عامل إيه فى إيه
ايمان :قصدى يعنى بعد ماالشاي وقع عليك والله متعرفش الموضوع ده ضايقنى ازاى وفضلت طول اليوم كل ماافتكر اضحك قصدى اعيط
كان الجميع ينظرون لبعضهم البعض ويكتمون ضحكاتهم خوفا من رد فعل عمر
عمر:صبرنى يارب الحمد لله كويس
إيمان :معلش بقى يابشمهندس اوعى تكون لسه زعلان واللا شايل فى نفسيتك منى واللا حاجه ده انا عسل وربنا
عمر:عسل اه عسل خالص
سيف :ياخسارة فاتنى الموقف ده كان نفسي احضره
على:ده انت فاتك نص عمرك
عمر:هه هه هه على اساس اني كنت فرجه يعنى
على:بصراحه اه كنت فرجه ده انت شكلك كان يضحك
وشمس كمان ماكنتش موجوده
عمر:ماعدم وجودها ده كان السبب
يزيد:ممكن تاكلوا وانتوا ساكتين الأكل ليه احترامه
فتنظر إيمان لمروة وتضحك
مروة:عسل ياايمان وربنا
ظلوا يتبادلون الاحاديث حتى فرغوا من تناول الطعام
شمس:معلش بقى ياجماعه الوقت أتأخر والله ولازم نمشي
يزيد:تمام على ممكن توصلهم عشان انا والله مش قادر
إيمان :لا يوصلنا ايه هو احنا صغيرين احنا حنروح لوحدنا
شاكر:لا والله ابدا أحسن حد يضايقكم واللا حاجه الوقت أتأخر
على:ياللا يابنات
يسلمون على الجميع ويدعون لأنس بتمام الشفاء 💖💖💖
بعد خروجهم من المنزل استأذن سيف ومشى هو الآخر بينما صعد عمر إلى غرفته ليستريح
عاليه :انا افتكرتك حتطلب من عمر او سيف يوصلهم اشمعنى على ماسيف كان كده كده ماشي كان خدهم على طريقه
يزيد :أولا ماينفعش عمر أنا مضمنش ممكن يحصل ايه فى العربيه اخاف هو وإيمان يمسكوا فبعض
وبالنسبه لسيف لا طبعا ميصحش دى فى ضيافتنا احنا يعنى لازم احنا اللى نوصلها مش كده يابابا
شاكر :الله ينور عليك ياحبيبي طول عمرك بتفهم فى الأصول
يزيد:بس إيه رأيك ياامى فى شمس وايمان
هاله :بنات زى العسل وايمان دى اقسم بالله ماليها حل كل كلامها يموت من الضحك انا كنت حسه انى فى فيلم كوميدي عندها خفة روح وخفة دم عمرى ماشفتها قبل كده واللا وهى بتعاكس عمر بالكلام انا كنت ماسكه نفسي بالعافيه
شاكر :"هو انتى بس كلنا كنا ماسكين نفسنا من الضحك
هاله:اما شمس دى بقى مؤدبه اوى وجميله وزى النسمه تحسها حاجه زى البسكوته
يزيد:شمس دى مفيش زيها
شاكر:تعرفوا ان فى حاجه جت فبالي دلوقتى
هاله:حاجة إيه ياحبيبي
شاكر:مش عارف ليه جه فى بالي فكرة ان عمر يخطب شمس
عهد سريعا:عمر يخطب شمس لاطبعا مش ممكن
مروة :وليه مش ممكن ياعهد
عهد:يعنى دى مش التيم بتاع عمر وبعدين واضح انه مبيطيقهاش
عاليه:بالعكس بقى انا شايفه انها مناسبه جدا ليه اولا سنهم قريب من بعض وبيشتغلوا فى نفس المكان والأهم من كل ده انها فعلا مؤدبه ومحترمه وعمر محتاج واحده زى دى فى حياته تنسيه العك اللى بيعكه واللا انت ايه رايك يايزيد
يزيد:والله اهى قدامه فى الشركه لو عاوزها نخطبهاله هو احنا يعنى حتمناله واحده أحسن من كده
شمس اى حد فى الدنيا يتمناها وسعيد الحظ هو اللى شمس حتكون من نصيبه
شاكر:ربنا يقدم اللى فيه الخير
تتركهم عهد وتصعد الى غرفتها
مروة:عاليه هى عهد مالها فى حاجه
عاليه معرفش ليه بتقولى كده
مروة:مش عارفه بس حساها متضايقه من حاجه حتى والبنات هنا كانت قاعده مسهمه
عاليه:طب انا طالعه لها
تصعد عاليه للغرفه التى تقيم بها عهد عندهم تفتح عليها الباب فتجدها جالسه على المكتب وواضعه راسها عليه وتبكى بشده
فتجرى عليها عاليه وترفع رأسها :عهد مالك باحبيبتى فى إيه
عهد:حبيبتك انا لو فعلا اختك وحبيبتك مكنتش هنت عليكى تعملى فية كده
عاليه :وهو انا عملت فيكى إيه بس ياعهد
عهد :ياااه للدرجه ده مشاعر أختك مش فارقه معاكى امال لو مكنتيش عارفه كل حاجه كنتى عملتى ايه اكتر من كده يعنى بدل ماتحاولى تلفتى نظرهم لية بتشجيعهم على انهم يقربوه من البنت اللى اسمها شمس دى
عهد :والله يعنى انتى عاوزانى اقولهم والنبي جوزوا ابنكم لاختي على اساس انك واحده اى كلام لا ياعهد انتى زيك زى عشق واللى مارضهوش ليها مش ممكن ارضاه عليكى
واقسم لك بالله انتى ما فى دماغه فوقى ياحبيبتى فوقى ياعهد من الأوهام دى متخليهاش تأثر عليكى ياحبيبتى ده انتى ست البنات وألف مين يتمناكى ليه تربطى نفسك بواحد عمره ماشافك غير عيله صغيرةمش اكتر.
عهد وهى تبكى فى حضن اختها:بحبه بحبه اوى ياعاليه
فتفتح عليهم مروة الباب :مالك ياعهد فى إيه ياحبيبتى؟
💖💖💖💖💖💖💖💖💖💖
فى اليوم التالي بالشركه
على:يعنى الحوار كله امبارح كان على شمس و عمر
يزيد :أيوة ياسيدي
على:بس انت ممكن تعتقد ان عمر ممكن فعلا يحب شمس
يزيد:ان شاء الله حيحبها
على:ومالك متاكد كده ليه
يزيد:عشان ده أخويا وانا عارفه كويس عارف واحنا صغيرين كان لما يدخل محل ملابس كانت تبقى عينه على الموضه والحاجه اللى كله لابسها لكن عمره ماكان بيرضى يشتريها ولما كنت اقولله مادام عاجبك خده بقوللى انا مااخدش حاجه كل الناس لبستها وكان دايما يشتري الحاجه المختلفه حتى لو حيدفع مبلغ كبير وده مبدأ عمر فى الحياة كلها هو ممكن يعجب ببنات كتير لأن دى حلوة ودى شيك ودى برستيج ودى ماعرفش ايه لكن انا متاكد انه يوم ماحيحب حيحب واحده زى شمس مختلفه فى كل حاجه عن كل اللى عرفهم وشافهم قبل كده
على:ايوه يايزيد بس عشان يحصل كده لازم يجمعهم مكان يتكلموا فيه بعيد عن الشغل لانك عارف انهم هنا طول الوقت ناقر ونقير
يزيد :مانا طلبت من ايمان تلطف الجو بينهم شويه
على:ههههههههه إيمان تلطف الجو دى ممكن تشعللها اكتر
يزيد:لاء إيمان جدعه وحتنفذ اللى قلتلها عليه وبعدين فى حاجه فى دماغى
على:حاجة إيه
يزيد:مش احنا معادنا بعد يومين مع العميل الجديد
على:ايوة انت قصدك إيه
يزيد :حناخدهم معانا مش هما مسئولى المكتب التنفيذى عندنا ونديهم مساحه يتكلموا فيها مع بعض ايه رأيك
على:فكرة حلوة طبعا ونشوف إيه اللى حيحصل
فى داخل مكتب شمس
تجتمع شمس وعمر وسيف ويعملون بكل نشاط فى جو يسوده الهدوء بينما كانت إيمان جالسه على مكتبها تباشر عملها
عمر:إيمان اطلبيلنا قهوة
إيمان :على أساس انى الخدامه بتاعتك واللا ايه
عمر:لا والله مااقصد ده انا قلت اتكلم معاكى ياغبيه بدل مانتى قاعده محدش معبرك
إيمان :هى مين دى اللى غبيه ماتحسن ملافظك يااستاذ انت
سيف:يالهوى خلاص الله يخليكم اسكتوا مش كل يوم فضايح
شمس:ايمان مفيش حاجه حبيبتى وانت يابشمهندس فى بوفيه هنا بنطلب منه اللى احنا عاوزينه ومن فضلك ملكش دعوة باايمان
عمر:خلاص يعنى غلطت فى البرنسيسه إيمان
إيمان :ايوة برنسيسه واللا عندك اعتراض
عمر:اعتراض ايه لا على راسي ياباشا احنا نقدر نزعل العسل بتاع الشركه
إيمان :ايوة كده اتعدل ها عالعموم ماشي عشان خاطر البشمهندس سيف بس انا حروح اجيبلكم قهوة
عمر:تما كان من الأول لازم يعنى تعمليلنا فيها فيلم
إيمان :ايوة وان كان عاجبك
عمر:لا عاجبنى ونص طبعا انا مش عا ف بيجيبوا البلاوى دى منين
شمس:بشمهندس من فضلك إيمان قالتلك حتجيب القهوة يبقى ملوش لزوم الكلام الكتير
عمر:هو فى ايه ياجدعان هو انا قاعد مع ريا وسكينه واللا ايه
انا مش عاوز حاجه انا خارج برة اشم شوية هوا ياباي
يخرح من المكتب بينما شمس وإيمان وسيف يضحكون على منظر
سيف :خفوا شويه يابنات عليه مش كده
إيمان :ماهو مستفز الصراحه فرحان اوى بشبابه ومحسسنا انه الكونت دى مونت كريستو على ايه يعنى ده كله
شمس وسيف:ههههههههه مفيش فايده
يخرج من المكتب وهو يسب ويلعن فيجدها امامه
ايه الجمال والطعامه دى كلها المفروض كنت اشتغل معاكى انتى مش مع اللى جوة دول والله ماحد فاتح نفسي فى الشركه دى غيرك ياقمر
مياده :ههههههه ياريت والله يابشمهندس ده حضرتك غالي علينا اوى
عمر:انتوا اكتر والله بقولك ايه ماتيجى نجيب قهوة من البوفيه
مياده:ياخبر ده حضرتك تروح مكتبك وانا اجيبلك احلى فنجان قهوة لحد عندك هو احنا عندنا كام بشمهندس عمر
عمر:تمام ياقمر وانا حروح استنى فنجان القهوة
يدخل عمر مكتبه فتاتى اليه مياده بالقهوة وتتمايل امامه لتعرض له مفاتنها:اتفضل يابشمهندس
عمر:اقعدى يامياده
مياده:اشرب بس القهوة وقللى ايه رأيك فيها الأول
عمر:زى العسل طبعا مش انتى اللى جايباها
مياده:ههههههههه
عمر:لاء بقولك ايه انا بضعف قدام الضحكه الحلوة دى
انتى بقالك اد ايه فى الشركه هنا
مياده :حوالى ست شهور
عمر:مرتبطه
مياده :عندك عريس
عمر:وهو حد يطول الجمال ده كله
مياده:مانا اصلي مش اى حد يعجبنى
ثم يفتح سيف الباب عليهم:ساعه ياعمر
انتى بتعملى ايه هنا ايه يااستاذه مش عندك مكتب
مياده وهى تقف:بعد إذنك يابشمهندس ثم تخطو بخطوات بطيئه امامهم
سيف:البت دى انا مبرتحلهاش
عمر:مش احسن من جوز الغفر اللى جوة
سيف:لا معلش بقى انا مش معاك فى دى ايه جاب دى لشمس وايمان فرق السما للأرض
ايمان وشمس دول حاجه تانيه خالص ولاد ناس متربيين لكن دى تدب فى عينها رصاصه
عمر:طب ياعم ايمان دى مخطوبه لكن اللى اسمها شمس دى خطيبها قلبها واتجوز واحده غيرها روح ياللا اتجوزها وهى ماحتصدق
سيف :ياريت والله ماكنت اتأخرت بس للأسف مش حينفع
عمر :ومش حينفع ليه ان شاء الله
سيف:قلبي مشغول
عمر:من ورايا ياجذمه ومين بقى سعيدة الحظ دى
سيف:حقولك فى الوقت المناسب
💖💖💖💖💖💖💖💖💖💖
فى النادى الرياضي
كمال:الجيم نور ياعهد
عهد :ربنا يخليك ياكابتن وشكرا لاتصال حضرتك
كمال:انتى بتقولي إيه ياعهد انا لو علية كان نفسي اجي بنفسي اشوفه واطمن عليه لكن طبعا مينفعش
عهد :ليه باكابتن ده حضرتك تشرفنا
كمال:وهو عامل إيه دلوقتي
عهد :الحمد لله والله بس لسه حيقعد فى الجبس فترة
كمال:وممكن بعد مايفكه يحتاج جلسات علاج طبيعى
عهد :لو كده ابقى اجيبه هنا فى قسم العلاج الطبيعى
كمال::ياخبر ده ينور طبعا وربنا يكمل شفاه على خير يارب
عهد:يارب ياكابتن
كمال :وعامله ايه فى مذاكرتك
عهد :ماشيه الحمد لله
امال فين حنين مش شايفاها يعنى ده انا قلت بلاش اقولها انى جايه عشان اعملها لها مفاجأة
كمال:حنين مجاتش النهارده
عهد :غريبه يعنى دى مش ممكن تفوت مرة ده أكيد حصل حاجه خليتها متجيش
كمال:يمكن يكون عندها ظروف واللا حاجه
عهد: لاانا قلبي مش مطمن حتصل عليها اشوفها مالها عن اذنك
تتصل عهد على حنين
حنين:أيوة ياعهد
عهد :فينك يابنتى مجيتيش الجيم ليه
حنين:انتى رحتى ياعهد
عهد:ايوة انا فى الجيم وسألت عنك الكابتن قاللى انك مجيتيش
حنين:مليش نفس اروح و شكلى مش حروح الجيم تانى
عهد :ليه ياحنين خير حصل حاجه
حنين:بعدين ياعهد انا مخنوقه دلوقتى ومش قادرة انكلم
عهد :خلاص انا جايالك سلام
ثم تتحرك نحو باب الخروج
كمال:عهد ياعهد
عهد:نعم ياكابتن
كمال:انتى رايحه فين
عهد:حنين بتقوللى احتمال متجيش الجيم تانى وحساها فى مشكله لازم اروحلها اشوفها
كمال:عهد طب قبل ماتمشي ممكن اسالك عن حاجه
عهد :اتفضل ياكابتن خير
كمال:من فترة كده قبل حادثة ابن اخوكى على طول كنت شفتك فى عربية مع واحد انا اسف طبعا انى بتدخل فى حياتك بس لو مفيهاش مشكله بالنسبه لك ممكن اعرف مين ده
عهد :ده صاحب اخويا وبيشتغل معاه فى الشركه وانا كنت مروحه وهو وصلنى هو فى حاجه ياكابتن
كمال :لا ابدا ياعهد اتفضلي
عهد :طب حضرتك مسالتنيش يعنى عن حنين ولا قلتلي طمنينى عليها ولا استغربت انها حتسيب الجيم هو فى حاجه حصلت وانا مش موجوده ضايقتها
كمال:لا ابدا محصلش حاجه حيكون حصل ايه يعنى هى كانت بتيجى تتمرن وتمشي كالعاده
وبعدين بالنسبه انها ممكن تسيب الجيم فبراحتها يعنى دى حاجه ترجعلها يمكن فى جيم تانى عاوزة تروحه واللا حاجه
عهد :غريبه أوى
كمال:وإيه الغريب فى كده
عهد:مش عارفه بس مستغربه احنا مع حضرتك بقالنا اكتر من سنه وده اول مكان نقضي فيه الفترة دى كلها واكلنا مع بعض واتكلمنا وضحكنا مع بعض وفى بيننا عشرة زى مابيقولوا يبقى ازاى حضرتك متضايقش ان حنين ممكن متجيش ويبقى عادى بالنسبه لك انها تروح نادى تانى وحضرتك عارف اننا اصدقاء واكيد لو راحت نادى تانى انا حروح معاها
كمال:لاء انتى لاء،
عهد :انا لاء ازاى يعنى مش فاهمه
افرق ايه انا عن حنين
كمال:تفرقى كتير ياعهد
عهد:افرق كتير ازاى يعنى ممكن حضرتك توضح كلامك ياكابتن
كمال:عهد معقوله مش حسه بقيمتك عندي وانك مختلفه عن كل اللى هنا معقوله مش حسه بية ولا بمشاعرى ناحيتك
عهد :كابتن كمال ايه اللى حضرتك بتقوله ده ومعناه إيه الكلام ده
كمال:عهد انا بحبك
💖💖💖💖💖💖💖💖💖💖💖💖
انتهى الفصل النهارده يارب يكون عجبكم وياريت بقى تعليقاتكم وتوقعاتكم فى الفصول الجايه
القصه هنا فقط اعمل متابعة ليصلك كل جديد 👇
عشاق الروايات
•تابع الفصل التالي "رواية شمس تتحدي الغيوم" اضغط على اسم الرواية