رواية شمس تتحدي الغيوم (كاملة جميع الفصول) حصريا عبر دليل الروايات بقلم عبير سليم
رواية شمس تتحدي الغيوم الفصل الاول 1 - بقلم عبير سليم
بسم الله الرحمن الرحيم
نحن الآن في مدينه من أجمل مدن مصر الحبيبة عروس البحر المتوسط مدينة الإسكندرية
تحديدا في احدى ليالي الشتاء البارده حيث هطول الأمطار بشده لتتلاقى مع مياه البحر فى جوف الظلام فيختلط غيث السماء بهذه المياه ويصبحان مزيجا لاينفصلان فتندفع الأمواج بشدة وتضرب بعضها بعضا
تنغلق الأبواب والبيوت على اصحابها تخفى ما بها من اسرار يجتمع كل حبيب بحبيبه وكل ام باطفالها يود كل محب ان يضع احباءه فى قلبه ليحميهم من برودة الشتاء ويمنحهم من حرارة قلبه مايشعرهم بالدفء والأمان
تفتح الباب وهى ترتجف من شدة البرد تلتصق ملابسها عليها بشده من كثرة ماتشربته من أمطار السماء لتجد خالتها الحبيبه سناء بانتظارها
سناء:شمس اخيرا جيتى حمد الله على السلامة يا بنتى قلقتينى عليكى أوى اتاخرتى كده ليه بس وتليفونك مقفول كمان
شمس وهى ترتجف من شدة البرد وترتعش شفاهها بشده:ادخل اغير بس ياخالتو حسه انى حموت من البرد وبعدين نتكلم براحتنا
سناء:ياحبيبتى ده انتى مية ادخلى ادخلى بسرعه قبل ماتبردى وانتي مناعتك ضعيفه وانا حروح احضرلك الاكل حالا
تدخل شمس غرفتها وتقوم باستبدال ملابسها وتأخذ حماما دافئا لتزيل ماتشعر به من بروده وتخرج لتتناول وجبة العشاء الساخنه التى احضرتها لها خالتها
شمس :الله ريحة الأكل حلوة اوى ربنا يخليكى لية يارب ياسوسو
سناء:ويخليكى لية ياشموسه
هاه قوليلي بقى ايه اللى رجعك متاخر كده وتليفونك مقفول ليه حرام عليكى ياشمس ده انا كنت حتشل وكل شويه اروح ابص من الشباك ومش عارفه اعمل ايه ولا اتصرف ازاى واتصلت على إيمان هى كمان مردتش الجذمه
شمس وهى تضع فى فمها الطعام :هههههههه حبيبتى ياسوسو الف بعد الشر عنك ياحبيبتى منحرمش منك يارب اهدى كده ياسوسو وصللى عالنبي وبعدين نفسي افهم يعنى لما تروحى تقفى فى الشباك انا كده حاجى
سناء :عليه افضل الصلاة والسلام اعمل ايه ماهو ده اللى فى ايدي والشيطان عمال يودى ويجيب بية واقول ياترى ياهل ترى ايه اللى حصل
شمس:هو انا صغيره ياخالتو ده انا عندى ٢٨سنه وحيحصل ايه بس ياسوسو هو حد غاوى يجيب لنفسه المصايب
سناء:ولاد الحرام ماسابوش لولاد الحلال حاجه وربنا يسترها معاكى يابنت اختى يارب اتكلمى بقى ياجذمه وقوليلي ايه اخرك كل ده
شمس:كان عندى شغل كتير اوى والله ياخالتو ومكنش ينفع يستنى لبكرة وكمان ياسوسو ياحبيبتى البشمهندس يزيد بيدينى اوفر تايم لما اتاخر وانتى عارفه بقى احنا اليومين دول محتاجين كل مليم عشان اقدر أكمل الحاجات اللى ناقصانى
سناء:طب وعصام كان معاكى ياشمس
شمس:لاء ياخالتو عصام خلص شغله ومشى
سناء:ازاى يعنى يخلص شغله ويمشي ويسيبك فى الشركه لوحدك ده ينفع برضو
شمس :ياخالتو ياحبيبتى عصام صحيح معايا فى نفس القسم بس انا شغلى غير شغله وهو ملوش ذنب يقعد عالفاضي ده غير انك ناسيه انه احيانا بيقف مع باباه فى المحل عشان يعرف يكمل الشقه ونخلص بقية الحاجات اللى ورانا حقك علية ياحبيبتى انا اسفه والله مكنش قصدى اقلقك علية ياخالتو
سناء:اه يااختى كلى بعقلي حلاوة طب مطمنتنيش ليه بالتليفون
شمس :والله العظيم فصل شحن ومااخدتش بالي غير بعد فترة وسألت اللى كانوا موجودين على شاحن محدش معاه خلاص بقى ياسوسو قلبك ابيض
سناء:طيب ياحبيبتى ربنا يطمنى عليكى يارب نفسي اوى اطمن عليكى واشوفك فى بيت جوزك وقلبي يرتاح من ناحيتك
شمس:انتى عاوزة تخلصي منى واللا ايه ياقلبي
سناء :اخس عليكى ياشمس ده انتى نور عينيه ولو علية مش عاوزاكى تفارقينى ابدا والله انا ماعارفه حعمل ايه لما تتجوزى والاقى نفسي لوحدى بس بردو نفسي اطمن عليكى فى بيت جوزك واحس ان قلبي ارتاح وصنت الأمانه اللى اختي سابتهالى
شمس :حبيبتى ياخالتو منحرمش منك يارب وربنا يخليكى لية ياست الكل هو انا لية مين غيرك ياحبيبتى من وقت وفاة ماما الله يرحمها وبعد مابابا راح اتجوز وخلف وانا ولا فى دماغه ولاكانى بنته ده نسانى خالص ياخالتو
سناء :لا ياشمس متقوليش كده على ابوكى ده طول عمره غلبان والله وكان بيحب أمك الله يرحمها اوى كله من الحربايه اللى اتجوزها دى هى السبب فى بعدكم عن بعض
شمس:طب انا استفدت ايه من طيبته دى ده زى الخاتم فى صوباعها تعرفى ياخالتو لما بروح عشان ازوره واشوف اخواتى بحس فى وسطهم انى غريبه عنهم بيعاملونى كانى ضيفه حقعدلى ساعه وامشي ولو حاولت افتح معاهم سيرة اى موضوع يفضلوا يبصوا لبعض وميردوش ولو ردوا تبقى اجابات مختصره بقيت بكره اروحلهم وما عاوزة اشوف حد فيهم بس بقول عشان صلة الرحم وعشان ربنا
سناء:معلش ياحبيبتى متزعليش نفسك وخلاص ياستى هانت خلاص وحتبقى فى بيت جوزك ويبقى عندك حياتك وربنا يتمم على خير يارب واشوف ولادك ياشمس يابنت نجوى يارب
شمس :يارب ياخالتو يارب
سناء:بتحبيه اوى كده ياشموسه
شمس:بحبه كلمة بحبه دى قليله اوى على احساسي بيه انا عمر قلبي مادق لحد غيره من اول لحظه شفته فيها وعينى جت فى عينه وانا حبيته واسعد يوم فى حياتى لما جه وخطبنى وبحلم باليوم اللى حكون فيه مراته بس
سناء:بس ايه ياشمس مالك فى حاجه ياحبيبتى
شمس :مش عارفه والله ياخالتو بس عصام بقاله كام يوم كده متغير ودايما سرحان واحيانا كتير اكون بكلمه الاقيه مش معايا خالص مش عارفه ماله
سناء:يمكن فى حاجه مضايقاه واللا حاجه هو فاضلله كتير فى الشقه
شمس :لا ياخالتو خلاص الحمد لله هو تقريبا خلصها خلاص
سناء :معلش حبيبتى هما العرسان كده قبل الفرح بيبقوا متوترين وقلقانين فتح البيوت مش بالساهل ياشمس
شمس :يمكن ياخالتو ربنا يطمن قلبك زى مابتطمنينى
طيب ياحبيبتى انا حقوم اغسل الأطباق عشان ادخل انام
سناء:لا ياحبيبتى ادخلى انتى نامى وادفى وانا حقوم اغسلهم.
شمس:ربنا يخليكى لية مش عارفه من غيرك كنت عملت ايه
سناء:ربنا يخليكي ليا انتى ياحبيبتى ده انتى والله اللى منورة حياتى كلها خصوصا بعد
ثم تبدا فى البكاء
فتحتضنها شمس بكل حب:تانى بردو ياخالتو تانى ياحبيبتى مش كنتى نسيتى خلاص
سناء:نسيت انا عمرى مانسيت ولاحنسى ياشمس انسى ايه انسى حياتى وعمرى اللى راحوا هدر
انسى ان الراجل اللى حبيته واتجوزته واديته كل حاجه راح اتجوز و سابنى ورمانى وطلقنى
شمس:مش انتى ياخالتو اللى سمحتيله يتجوز
سناء:ويبقى ده جزائى ياشمس يعنى انا مهنش علية اشوفه نفسه فى طفل وانا مش قادرة اجيبهوله وقلتله يتجوز بس عمرى ماتخيلت انه أول ماحيخلف حيسيبنى ويطلقنى بالسهوله دى
شمس وهو تمسح لها دموعها:والله هو الخسران ياحبيبتى هو فى حد يفرط فى حد بيحبه غير لو كان مالوش فى الطيب نصيب
سناء :شمس انا عاوزاكى تبقى قويه واوعى تخللى مشاعرك وعواطفك تسيطر عليكى ابدا تحطى حبك فى كفه وكرامتك وشخصيتك فى الكفه التانيه انتى فاهمه
انا مش باسيكى والله يابنتى بس عاوزاكى تتعلمى من تجارب اللى حواليكى واللى اتعود ياخد مبيديش ابدا
وعلى اد ماتحبي وتدى لازم تلاقى المقابل وتاخدى احنا مش ملايكه احنا بنى ادمين واوعى تعملى ضهرك قنطرة لكل من هب ودب.
شمس :فاهماكى ياخالتو بس عشان خاطرى مش عاوزاكى تزعلى نفسك عشان متتعبيش انا مليش غيرك فى الدنيا
سناء:حاضر يا حبيبتي ياللا بقى قومى نامى عشان تعرفى تصحى الصبح بدل ماتغلبينى زى كل يوم
شمس وهى تقبلها من راسها:تصبحي على خير يا ست الكل
سناء :وانتى من أهل الخير يا شمس ياحبيبتى
وتحدث نفسها:والله انا ماخايفه عليكى غير من طيبة قلبك وانك دايما جاية على نفسك عشان تسعدى غيرك
ربنا يطمنى عليكى يارب.
��������
يأتى الصباح وقد غسل المطر شوارع الاسكندريه وجعلها تلمع وتضئ لتحمل معها التفاؤل لبدء يوم جديد
فى داخل احدى شركات المقاولات
شمس:حنروح نشوف الموبيليا امتى ياعصام عصام. عصام
عصام:ايه انتى بتكلمينى ياشمس
شمس :بكلمك ايوة طبعا بقالى ساعه بكلمك رحت فين بقى اللى واخد عقلك ياسيدي
عصام :لا ابدا مفيش سرحت بس شويه
شمس:سرحت فى ايه فى حاجه حصلت انا حساك بقالك كام يوم مش مظبوط كده ومتغير مالك ياحبيبي فى حاجه مضايقاك او حصلت حاجه فى البيت
عصام :لا ابدا ياشمس مفيش حاجه متشغليش بالك انتى
شمس :مشغلش بالى وهو انا لو مشغلتش بالى بيك حشغل بالى بمين بس هو انا عندي اغلى منك ياعصام
عصام :طب قوليلي كنتى بتقولى ايه
شمس :كنت بقولك عاوزين
وفجاة تفتح إيمان صديقتها الباب الزجاجى
إيمان :صباح الخير ياجماعه
شمس وعصام :صباح النور ياايمان
إيمان : شمس البشمهندس يزيد عاوزك حالا فى مكتبه
شمس:حاضر انا رايحاله حالا
تخرج شمس سريعا بينما تنظر إيمان لعصام نظرة لها مغزى معين
عصام :فى ايه ياايمان عاوزة حاجه
إيمان :عاوزة سلامتك ياعصام انت اللى فى حاجه
عصام :بقولك ايه شكلك فايقة ورايقه عالصبح وانا عندى شغل كتير
إيمان :ماشي ياعصام على راحتك
تخرج إيمان وتتجه الى مكتبها باحد أقسام الشركه وهى تكاد ان تنفجر من الغيظ
بينما تستئذن شمس فى الدخول للبشمهندس يزيد
السكرتيرة:ادخلى ياشمس البشمهندس يزيد منتظرك
فى داخل المكتب
يزيد:بجد ياشمس انا مش عارف اقولك ايه ولا اشكرك ازاى
شمس :ياخبر يابشمهندس حضرتك تؤمرنى وانا معملتش حاجه يعنى
يزيد :نعم ماعملتيش حاجه كل ده ومعملتيش حاجه مش كفايه اننا كلنا كنا نايمين فى بيوتنا والدنيا شتا وبرد وانتى سهرانه هنا تخلصي الشغل
شمس :انا المهم عندى يكون الشغل والتصميمات عجبت حضرتك
يزيد :عحبتنى دى تحفه يابنتى وانا امرتلك بشهر مكافأة
شمس :ده كتير اوى يابشمهندس حضرتك مغرقنى بجمايلك والله
يزيد :ده حقك ياشمس انتى متفوقه فى شغلك ومميزة فى مجالك وانتى مكسب لينا وللشركه كلها وانا فخور بيكى جدا وان شاء الله حيكونلك مستقبل كبير
شمس وهى فى قمة سعادتها :انا بجد مش عارفه اقول لحضرتك ايه والله انا لية الشرف اسمع من حضرتك الكلام١ ده
يزيد:عاوزك تقوليلي حنفرح بيكم امتى ان شاء الله
بقالكم كتير مخطوبين مش كفايه كده بقى
شمس:خلاص هانت ان شاء الله
يزيد :ربنا يوفقكم ياشمس بس اوعى الجواز يخليكى تقصرى فى شغلك
شمس :استحاله يابشمهندس الشغل حاجه والبيت حاجه
يزيد :وده املى فيكى ان شاء الله تقدرى تتفضلى
تفتح شمس الباب لتجد امامها البشمهندس على (على ابن عم يزيد وشريكه فى الشركه ومتجوز اخته مروة
ويزيد كمان متجوز اخت على التوأم عاليه)
يزيد:ازيك ياشمس عامله ايه
شمس :الحمد لله والله يا بشمهندس ربنا يخليك
على:صباح الخير ياباشا
يزيد :صباح الفل ياعلى طمنى ايه الاخبار
على:أخبار زى الفل ان شاءالله
يزيد:بجد ياعلى مش معقول يعنى ممكن المناقصه دى ناخدها
على:عيب عليك يامعلم ده انا على سليم المهدى و لازم أسهم الشركه نوصلها للسما
يزيد:ان شاء الله ياابو أنس
صحيح بالمناسبه متنساش يوم الخميس الجاى ان شاء الله انا مش جاي الشركه
على:عارف
يزيد:وايه اللى عرفك انى مش جاى
على:عيب عليك والله لما تسأل على السؤال ده
تفتكر انى لو انا نسيت ان الخميس الجاى عيد ميلاد الأميرة عشق ممكن أنس ينسى حاجه زى دى
يزيد:عارف ان أنس مش ممكن ينسى عيد ميلاد عشق
وياترى جابلها هدية كل سنه واللا لسه
على :اهوه امبارح بالليل كان بيقول لمروة تنزل معاه عشان يشترولها الهديه مانت عارف بقى دى حبيبة القلب و روحه فيها
يزيد:لسه عيال ياعلى وبكرة يكبروا ومشاعرهم تتغير
على:ماافتكرش يايزيد الواد طالع حبيب
يزيد:انت حتقوللى طبعا طالع لأبوه
على:ماله ابوه يامعلم
يزيد :مش فضلت قارفنا سنين عشان خاطر الست مروة
على :لا من فضلك رمانه لما تيجى تتكلم عنها تتكلم عنها بأدب انت فاهم اه دى حبيبة القلب
يزيد:انت حتقوللى طب يافالح ياللا اتفضل على مكتبك متعطلناش ورانا شغل كتير النهارده
على:ايه الشغل اللى قدامك ده
يزيد:التصميمات اللى عملتها شمس
على وهو يفتحها:بصراحه شمس دى فنانه هايله بجد والله انا مستخسرها فى اللى اسمه عصام ده
يزيد:الحب بقى حتقول ايه
على:ماشي ياباشا ياللا انا حروح اشوف شغلى لو عوزت حاحه كلمنى سلام
���������
فى احد المولات بالإسكندرية
فى ايه ياعشق كل الفساتين دى مش عاجبك منهم ولا فستان انا تعبت خلاص
مروة:مالك ياعاليه بتزعقى للبنت كده ليه بس بالراحه عليها
عاليه:تعبت يامروه والله من كتر اللف وحسه انى اتخنقت خلاص انا مش حمل اللف ده كله
مروة:طب تعالى نقعد نشرب حاجه وبعدين نكمل
وانتى باعشق متتعبيش ماما بقى انا مش عارفه دماغك الناشفه دى بقى كل الموديلات دى ومش عاجبك حاجه يامقروضه انتى
عشق:والله ياعمتو مروة انا مليش دعوة أنس هو اللى كل شويه يبصلى ويقوللى لاء، وحش متاخديهوش وانا بخاف ازعله
مروة:وانت مالك ياانس باللى حتلبسه عشق
أنس :ياسلام يعنى انتى عاوزانى اخليها تلبس حاجه قصيرة وعريانه والعيال تقعد تعاكسها هو انا مش راجل واللا ايه
مروة:راجل ايه يابتاع انت ياابو عشر سنين
بقولك ايه عشق صغيرة كل اللى عندها سبع سنين يعنى تلبس وتدلع براحتها
أنس :لاء مش حتجيب حاجه غير اللى انا اختارها
عاليه:أنس ياحبيبي عشان خاطرى انا ياحبيب عمتك خليها تجيب اى حاجه عمتك تعبانه والا وربي حرجع البيت وحخليها تلبس فستان السنه اللي فاتت
مروة :فى ايه ياعالية انتى كمان انتى حتعومى على عومه واللا ايه انت يازفت وربنا انا غلطانه انى جبتك معايا اصلا ياريتنى كنت سيبتك فى البيت مع عهد عمتك واختك مليكه
عاليه:اه صحيح هى عهد مجتش معاكم ليه دى بتموت فى الشوبنج وقلت اكيد حتيجى معاكم
مروة:رجعت من النادى تعبانه وملهاش مزاج وقالتلي عاوزة انام
عاليه :وحشانى اوى بقالها فترة مجاتليش
مروة:مانتى عارفه بقى من الكليه للجيم للمذاكرة متزعليش منها حبيبتى
عاليه:انا أزعل من عهد استحاله طبعا دى مش اختى الصغيرة دى بنتى يامروة بس بتوحشنى اوى
مروة:خلاص انا حقولها تعدى عليكى بكرة وهى راجعه من الجامعه
المهم قوليلي بقى انتى شكلك تعبان ياعاليه مالك ياحبيبتى فيكى حاجه
عاليه:لا يامروة متشغليش بالك انا كويسه الحمد لله
مروة:عاليه اوعى تكونى تعبانه ومخبية علية
عاليه:لاوالله انا الحمد لله كويسه بس مش عارفه ليه حسه باجهاد كانى مشيت مية كيلو
مروة:طب قوليلي بصراحه هو اخويا مزعلك فى حاجه
عاليه:يزيد وهو فى حد فى طيبة يزيد يامروة ربنا يخليهولى يارب
مروة:ربنا يخليكم لبعض ويخليلكم عشق يارب
عاليه :يارب يامروة ده هى دى اللى طلعت بيها من الدنيا
بقولك ايه ياللا نقوم بقى عشان نخلص عاوزة اروح
مروة:طب ياللا بينا وانت يابنى ادم اقسم بالله لو فتحت بؤك بكلمه لحرنك علقه وححلف مانت حاضر عيد الميلاد وانت عارفنى مجنونه مناقصش غير العيال كمان اللى يمشوا كلامهم علينا
عشق:هههه هههههه شفت ياانس عمتو بتقول على نفسها مجنونه
أنس :ايوة يابنتى ماهى كل شويه فى البيت تقعد تقول كده انا زهقت منها اصلا انا مستنى اكبر بس وانا حاخدك ونعيش لوحدنا بقى
مروة:سامعاك يامقصوف الرقبه انت بتقول ايه ياتحفه انت
أنس :ماما من فضلك تحترمينى قدام خطيبتى
عاليه ومروة:ههههههههههه
���������
فى داخل الشركه
شمس:بقولك ايه يامونتى وراكى حاجه النهارده بعد الشغل
إيمان :حيكون ورايا إيه يعنى انتى عاوزة حاجه ياشموستى
شمس:اه اصل البشمهندس يزيد صرفلي شهر مكافأة ولقيت استاذ عبد المحسن مدير الحسابات بيتصل علية عشان اروح اخد المكافأة
فانا عاوزة اروح اشتري شوية حاجات ناقصين ثم تهمس لها فى اذنها:وعاوزة اشتري شوية حاجات لعصام
إيمان :ياسيدي ياسيدى عالحب اوعدنا يارب ربنا يديكى على اد ضميرك ونيتك الطيبه يارب ياشمس واشوفك سعيده ومتهنيه ياحبيبة قلبي يارب
عالعموم انا لو مش فاضيه افضيلك نفسي ياقلبي عينيه ليكى ياشموستى
شمس:تسلملي عيونك ياايمان يارب عقبال ما افرح بيكى ياحبيبتى انتى كمان يارب
إيمان :ان شاء الله ياشموستى حيكون قريب بامر الله وقريب اوى كمان
شمس:ياجذمه وتخبي علية ومتقوليليش
إيمان :مانتى اللى طول الوقت مشغوله وبتروحى تنامى زى القتيله ويوم الاجازة بنقضيه مع حبيب القلب مش لاقيه وقت اتكلم معاكى خالص ولا عارفه اتلم عليكى
شمس :خلاص يبقى بعد مانشتري الحاجه حعزمك عالغدا ونتكلم براحتنا
إيمان :وانا موافقه طبعا ياللا بقى حروح اشوف شغلى وقت الراحه خلص
شمس:تمام نتقابل عند الامضا ان شاء الله
تخرج ايمان وهى تلقى نظرة أخرى على عصام
عصام:هى مالها دى
شمس :مالك ياحبيبي فى حاجه
عصام :معرفش مالها دى كمان بية رايحه جايه من الصبح تبصلى مش عارف فى ايه
شمس :وهى ايمان حتبصلك ليه ياعصام هو فى حاجه حصلت انا معرفهاش
عصام :اساليها هى وانا مالي
شمس :ماشي ياعصام انا لما اخرج معاها النهارده حسالها بس انا متاكده ان مفيش حاجه انت اللى مش عارفه مالك فى ايه
عصام :ايه مجنون انا يعنى
شمس :انا مقصدش طبعا ياعصام بس حالك مش عاجبنى بقالك فترة حساك مضايق ومتوتر ودايما حسه ان فى كلام على لسانك عاوز تقوله ومش قادر
سرحان اكلمك الاقيك مش معايا وكل مااسالك تقوللى مفيش
ثم تقوم وتجلس على الكرسي المقابل له :عصام مش انا شمس خطيبتك وحبيبتك احكيلي ياعصام قللى ايه مضايقك ارمى حمولك علية
عصام:شمس انا
تفتح الباب وتدخل احدى الزميلات الجدد فى المكتب
مياده:ايه انا دخلت فى وقت غير مناسب واللا ايه
شمس:ليه يامياده بتقولى كده هو انتى شوفتينا فى وضع مش كويس واللا ايه
مياده:لاء طبعا اكيد مقصدش بس يعنى شايفاكم بتتكلموا بصوت واطى
شمس:المرة الجايه حنبقى نمسك ميكريفون ونتكلم فيه
واحد وخطيبته بيتكلموا مع بعض اكيد حيتكلموا بصوت واطى واللا انتى عندك اعتراض
مياده:خلاص فى ايه انا مقلتش حاجه لده كله انا عاوزة اشتغل وبس
ثم تجلس على مكتبها بينما تبدا شمس فى استكمال عملها
وهى تشعر بالغيظ من تلك الفتاه التي استلمت عملها فى المكتب الذى يجمعها بخطيبها منذ عدة اشهر قليله
���������
فى داخل مكتب على
على:كل ده ولسه مخلصتوش يامروة ليه يعنى هو كان فستان فرح
مروة:خلاص الحمد لله خلصنا اهوه ومروحين حالا
بس بص ياعلى عاليه حساها تعبانه شويه حروح معاها وانت تعدى تاخدنا تمام
على بخضه على اخته التوأم :عاليه تعبانه مالها يامروة عاليه فيها حاجه اجىلكم
مروة:حبيبي متقلقش مفيش حاجه والله بس انت عارف هى بتتعب من أقل مجهود والزفت ابنك هد حيلنا لحد ماوافق على فستان نشتريه لعشق
على:هههههههه اقسم بالله الواد ده مجنون مش عارف طالع لمين
مروة:بقى بزمتك مش عارف طالع لمين
طب ياللا سلام دلوقتى عشان حسوق تعالى بقى مع يزيد عشان تاخدنا ياللا سلام
تقود السيارة وبجانبها عاليه ابنة عمها واخت زوجها على
وبالخلف يجلس العاشقان الصغيران أنس وعشق.
أنس :عجبك الفستان اللي اختارتهولك ياعشق
عشق وهى تضحك:ايوة عجبنى اوى ياانس بيلف بية جامد
عشان اعرف ارقص بيه
أنس :وانا حرقص معاكى
عشق :هههههه ههههههه
مروة:حتشل ياناس العيال دول حيشلونى
عاليه:ياستى سيبيهم انتى زعلانه ليه
مروة:يالهوي عليكى انتى كمان بس هو انتى حتجيبيه من برة مانت اخت على النحنوح
عاليه:طب سوقى سوقى خلينا نروح كفايه الهده دى علية النهارده
�����������
انتهى الفصل الأول يارب يكون عجبكم طبعا الاحداث لسه فى البدايه لكن بعد كده حتكون الاحداث مشوقه ان شاء الله
متنسوش بقى اراءكم وتعليقاتكم الجميله
واشوفكم الفصل الجاى ان شاء الله
وان شاء الله البارت حينزل كل يوم
القصه هنا فقط اعمل متابعة ليصلك كل جديد 👇
عشاق الروايات
•تابع الفصل التالي "رواية شمس تتحدي الغيوم" اضغط على اسم الرواية