رواية وصفولي الصبر (2) الفصل السابع 7 - بقلم نداء علي
بسم الله الرحمن الرحيم
بسم الله العلي العظيم
البارت السابع
في الصعيد يجلس صفوت مع شقيقته يخبرها برغبته في تزويج ولده الوحيد مبكرا حتي يرزقه الله بذرية تعوضه عن كونه وحيدا
هدي بتعقل:ان شاء الله تفرح بيه يا خوي بس يكمل جامعته الاول ياصفوت
صفوت:مش باقيله غير سنه ياهدي.. يتجوز وافرح بيه ياعالم هعيش للسنه الجايه ولا لا
هدي بخوف:بعيد الشر عنك يا ابو حسن ده انت اللي باقيلي ياصفوت ربنا يطول عمرك.. خلاص ياحبيبي اللي يريحك المهم يكون هو راضي
صفوت :راضي ياستي بيحب بنت خاله بهجت.. السنه دي داخله الجامعه بت حلوة ومؤدبه... بس نحل موضوع مي وجوزها ونروح نخطب لحسن ان شاء الله..
جاسمين مع عمار ببيتهم
جاسمين:برغم السنين اللي فاتت.. بحس نداء بعيدة عني ياعمار.. بتحاول تتجنب الكلام معايا لو انا ماتكلمتش هي مبتبدأش كلام.. نفسي اعوضها عن اللي فات.. نفسي تسامحني بجد انا عارفه اني غلطت اوووي في حقها.. اليوم اللي وقعت فيه كنت هموت عليها.. هي بترفض تخليني اعمل حاجه لولادها بتنكسف تطلب مساعدتي اعمل ايه معاها ازاي ارجعها لحضني تاني
عمار:اللي فات مش هنقدر نغيره ياجيجي هو خلص وانتهي بحلوة ومره حاولي انتي تقربي منها وتعوضيها اد ماتقدري وتعوضيني معاها
جاسمين:انت.. اه منك ياعمار.. انت اجمل واحن انسان في الكون
عمار بحنان وحب: ربنا يخليكي ليا ياجاسمين ويعوضنا خير باولادنا واحفادنا
ببيت عبدالرحمن العزبي تتحدث ناريمان الي اختها بالهاتف تخبرها عن احوالها
ناريمان :انا اول مرة قلبي يدق لحد بالشكل ده... انا حبيته بجد يادنيا الموضوع مبقاش عند ولا تحدي... سليم ده مش طبيعي بيجذبني غصب عني نفسي اشوفه كل يوم.. نفسي يحس بيا
دنيا:بلاش ياناريمان... سليم بيحب مراته.. بيحبها جدا وهي كمان حلوة وصغيرة وانتي بتقولي خلفت منه.. يعني صعب يبص لواحدة غيرها
ناريمان :صعب.. بس مش مستحيل..
في الجامعه يقوم سليم بشرح محاضرة حول القانون الجنائي ويستمع اليه الجميع بانصات فهو رغم محبة الجميع له ذو هيبه ووقار بالجامعه يحبه ويخشاه الطلبه
احد الطلاب:بس حضرتك القانون فيه ثغرات ولازم المحامي الشاطر يستغلها
سليم:اكيد طبعا.. المهم يستغلها لصالح المظلوم مش العكس.. والا بتكون شريك بالجريمه يعني حضرتك جايلك واحد ارتكب جريمة قتل وانت عارف الكلام ده واستغليت خطأ بالاجراءات الخاصه بالضبط والاحضار او شككت بالأدلة تفتكر لو هو خرج من القضيه ومتحاكمش.. ايه الفرق بينك وبينه.. حسابك قدام ربنا هيكون ازاي.. هتقول لربك ايه.. كنت بستغل الثغرات القانونية؟
اعتقد ان القاتل مش بس الشخص اللي بينفذ الجريمه.. الساكت عن الجريمه قاتل واللي بيساعد ان المجرم يهرب من العدالة ميقلش ابدا في اجرامه عن القاتل
طالب اخر:هل ده السبب ان حضرتك مشتغلتش بالمحاماة
سليم:لا.. مش ده السبب الاساسي انا فعلا بمارس مهنة المحاماة بس لو قضايا بعيدة عن الشبهات او شؤون قانونيه... انا عشقي الاكبر هو التدريس....
قامت طالبه اخري برفع يدها لتوجيه سؤال لسليم
سليم:اتفضلي
البنت:حضرتك فعلا متجوز من طالبة كنت بتدرسلها بالجامعه
بدأ الطلاب بالتهليل وابداء اعجابهم بالسؤال
سليم مبتسما:مع انه سؤال خارج الموضوع.. بس ايوة زوجتي كانت طالبه عندي.. وكانت الاولي علي الدفعه كمان
احدي الطالبات:حضرتك لسه بتحبها؟
سليم:اكتر من الاول بمراحل.. وكفايه عليكم كده الاسبوع الجاية هنتظر تسليم البحوث وياريت تبهروني بابحاث جديدة ومميزة...
استقبل مهاب ضيوفه مرغما فقد جاء اكرم ومعه اخوته ووالده للاعتذار عما بدر منه واصلاح علاقته بزوجته
بينما كانت زينه نائمه بغرفتها ولم تعلم بمجيئهم
مهاب:اهلا ياجماعه منورين.. تشربو ايه لحد ما الغدا يجهز
والد اكرم:تسلم ياولدي.. احنا جايين نهدي النفوس ونرجع بنتنا لبيتها
مهاب:ولما هي بنتكم.. ازاي تنضرب وتتهان ببيتك ياحج؟
والد اكرم:انا مكنتش موجود واظن اختك موجودة وتقدر تسألها انا ازاي بعاملها انا والحجه يا مهاب وابني غلط وانت خدت حق اختك.. يبقي خلصين
اكرم بحدة:لا مش خالصين كل الرجالة بتضرب نسوانهم كنت متعصب شوية ومحستش بنفسي
مهاب ببرود:وانا كمان كنت متعصب شوية.. بس كنت حاسس بنفسي لاني لما مبحسش بنفسي ممكن اقتل اللي قدامي يا أكرم ومباخدش بالي.. ولعلمك اخواتي التلاته ليهم راجل يترد عليه لو غلطوا.. مع انهم متربيين كويس وبيراعو بيوتهم
قاطع نقاشهم دخول زينه ترتدي قميص بيتي قصير ويبدو عليها النوم... كانت تبحث عن ابنتها الصغيرة ولم تدرك وجودهم الا عندما رأت ملامح مهاب المرعبة.. اختفت من امامهم مسرعه بينما استأذن مهاب منهم
اكرم بشماته:يروح يلم مراته بدل ماهو عامل عليا دكر
والد اكرم بحدة:لم لسانك ياكلب.. الست في بيتها ومعندهاش خبر بوجودنا احنا طبينا عليهم فجأة.. وانت غلطان والغلط راكبك وبتكابر
صعدت زينه مسرعه تعلم ان مهاب لن يمرر الامر بسهولة وجدته يدخل الي الغرفه والغضب يبدو عليه بشدة
مهاب:انت اتهبلتي نازله تحت بقميص نوم
زينه بخوف شديد:انا معرفش ان في حد في البيت كنت نايمه وصحيت علي صوت طفله بتصرخ فكرت ندا حصلها حاجه.. والله معرفش ان في ناس
مهاب وهو يمسك يديها بقوة:اقول للناس ايه دلوقتي مش عارف المك.. مش مالي عينك ها... ردي
زينه بملامح متألمه :سيب ايدي بقولك معرفش معرفش
تركها مهاب بعنف ليختل توازنها وتقع بقوة.. تفاجأ مهاب.. بينما صرخت زينه بخفوت... الحقني يامهاب انا اتخبطت..
في احدي المستشفيات بالمنيا ينتظر الجميع خروج الطبيبه
الطبيبه:ان شاء الله خير احنا هنولدها بس هنفتح قيصري لانها نزفت كتير ومش هنقدر نستني ولاده طبيعية
مهاب:مش مهم.. حتي المولود مش مهم المهم زينه
الطبيبه:ان شاء الله الاتنين هيكونو بخير يادكتور مهاب متقلقش
والدة زينه بتعجب:هو حصل ايه مش لسه شهر علي ولادتها
هدي وهي تنظر باتجاه مهاب:محصلش حاجه يام مازن هي تعبت فجاة وان شاء الله تقوم بالسلامه.. وبعد ماتقوم ربنا يحلها
بعد عدة ساعات افاقت زينه لتبحث بيعينيها عن طفلها لتجد هدي تحمله بمحبة وتقربه اليها
هدي:سمي الله يابنتي وشوفي ابنك
زينه :هو كويس ياماما؟
هدي :زي الفل الله اكبر.. اطمني ياحبيبتي
حملت زينه ابنها لتبدأ في البكاء بقوة.. بدأت والدتها في الشعور بشئ بينها وبين مهاب
نادية :مش هتطمن علي مراتك يا دكتور مهاب
مهاب :حمد الله علي سلامتك يازينه
زينه :فين بنتي نداء؟
هدي :في البيت مع عمتها متخافيش.. المهم سلامتك يام مراد
زينه:متشكرة ياماما.. بس بعد اذنكم محتاجه انام لاني تعبانه
هدي بتفهم:حاضر ياحبيبتي يلا يامهاب هنروح نجيب لبس زينه وشنطة النونو ونرجع...
مر اسبوع بعد ولادة زينه.. اقامت الحجه هدي سبوعا يليق بحفيدها الغالي.. لكنها تعلم ان زينه لن تسكت طويلا
زينه:لو سمحت يامهاب.. انا عايزة اروح بيت امي
مهاب:هتروحي ازاي وانتي لسه والدة وجرحك ملحقش يلم
زينه:متشغلش بالك بجرحي.. طول مانا هنا معتقدش ان جرحي هيلم.. لازم ابعد
مهاب:ارجوكي يازينه انا اتأسفت كتير انا مقدرش علي بعدك مقدرش ندا تبعد عني... بلاش انا.. فكرتي في أمي.. اعتقد انها عمرها مازعلتك ولا ضايقتك بالعكس انتي بتقولي انها في نفس مقام والدتك.. تهون عليكي ترجع وحيدة تاني دي روحها فيكي انتي والولاد
زينه :المفروض اعمل ايه.. انا بقيت بخاف اقعد معاك في مكان لوحدنا بخاف اتكلم واقول حاجه متعجبكش انت كنت هتتسبب في موت ابنك.. للاسف يامهاب انا علشان خاطر ولادي اتحملت عصبيتك الزياده كتير بس خلاص لو مش هتسبني اروح لماما... يبقي ننفصل وكل واحد يروح لحاله
مهاب:معقول.. قدرتي تطلبي الانفصال يازينه.. نسيتي كل اللي بينا.. عموما براحتك جهزي نفسك وانا هوصلكم بيت والدتك
استعدت زينه وجهزت اطفالها.. كانت هدي تشعر بالحزن يخيم عالبيت ولكنها ارادت ان تهدأ زينه وتبتعد قليلا حتي لا تسوء علاقتها بمهاب اكثر
اصطحب مهاب زوجته واطفاله دون كلام يعلم ان خطأه هذه المرة كبير.. وصلا الي القاهرة وساعدها علي الصعود لبيت والدتها التي كانت تنتظرها.. استأذن مهاب سريعا متعللا بذهابه لعمله.. تاركه روحه معها ومع اطفاله
نادية محتضنه زينه بمحبة:حمد الله علي سلامتك ياروح ماما.. قومي غيري هدومك وريحي شوية من السفر.. نداء نايمه وشكلها تعبت من الطريق ومراد انا هخلي بالي منه
زينه:مش هتسأليني جيت ليه ياماما
ناديه:يوم فرحك قلتلك سرك انتي وجوزك لو خرج برة حياتكم هتخرب.. اللي حصل بينكم ياحبيبتي ان شاء الله هيتصلح وربنا يبعد عنكم الشيطان.. لو انا او حد من اخواتك قلوبنا اتغيرت من مهاب عمرنا ماهنحبه تاني او نصفاله.. لكن انتي حبك ليه هيشفعله عندك
زينه:وحبك لبابا ليه مشفعلهوش عندك؟
نادية:اولا لان مشكلتك مع مهاب معتقدش انها خيانه والا كنتي طلبتي الطلاق بدون تردد صح
اومأت زينه براسها دون كلام
نادية:ثانيا والدك للاسف من وقت ماخطبني كل تصرفاته كانت بتقول انه اه بيحبني ومعجب بشكلي.. لكني كنت فرصه اكتر مني زوجه وحبيبه واحدة هترفعه بفلوسها اللي ورثتها ومعارف ابوها الكتير.. مكنش بيفوت فرصه وميحاولش يستفيد من جدك الله يرحمه وسمعته الطبيه وانا كنت بعمل نفسي مش فاهمه واقول ده طموح
لكن اول ماحقق طموحه.. رماني
علي العكس مهاب مواصفاته افضل مننا ياحبيبة ماما ومع ذلك بيبصلك بحب وتقدير من اول ماجه كلمني وطلب ايدك ومعتقدش انه حاول يستغلك باي شكل
زينة:فعلا ياماما مهاب واهله ناس اصيله جدا ويعرفو ربنا.. تخيلي الفلوس اللي مازن كان بيبعتها مهاب فتحلي بيها حساب في البنك وقالي ممدش ايدي عليها
بس ده ميمنعش انه عصبي وبينسي نفسه وقت مابيغضب
نادية:انا قلتلك اسراركم مش عايزة اعرفها... اقعدي في بيتك لما تهدي وترتاحي وتصفي من ناحيته خالص واهو اشبع منك يازينه ده انتي وحشتيني اووووي ياقلبي
زينه:ربنا مايحرمنيش منك ياماما.. بس ايه الحلاوة دي اللي يشوفك يقول عملتي بوتكس وشد ونفخ
ناديه:اه يابنت وجدي.. انا طول عمري حلوة يابت. بس الحق لله فريدة مرات اخوكي دي ربنا يحفظها حنينه وبنت اصول.. الحمد لله ربنا عوض مازن بيها.. يلا قومي نامي قبل ما ولادك يصحو
زينه :حاضر ياماما
مر اليوم واستيقظت زينه مبكرا فهي لم تشعر بالراحه بعيدا عن مهاب وبيته كما اعتقدت بل تشعر بغربه وحنين اليه.. اغمضت عينيها تحاول ان تتماسك من اجل الاهتمام بطفليها وحتي لا تحزن والدتها
اتصلت بنداء لكي تخبرها بوجودها بالقاهرة وتقابلها فلن يشعر بما داخلها سوي صديقتها الوحيدة
نداء بكسل:صباح الخير يازوزو... وحشاني اووووي
زينه :انا عند ماما يانونو.. انتي كمان وحشاني ونفسي اشوفك
نداء بابتسامه:خلاص هكلم سليم واجيلك ان شاء الله اخر اليوم..
بحثت عنه لكنه كعادته مختفي.. تنهدت بقلة حيله.. لتجده بعد قليل يدخل الي الغرفه ويبدو عليه الاجهاد
نداء:لو سمحت يادكتور عاوزة اروح لزينه اخر اليوم
سليم: قلتلك مفيش حركة يانداء وبلاش تعصبيني عالصبح
نداء وهي تحاول الا تبكي :اوك زي ما تحب.. لتغمض عينيها وتدعي النوم.. ليغلبه قلبه فيقترب منها
سليم:انا خايف عليكي.. يبقي زعلانه ليه
نداء:انا مش زعلانه.. اللي انت عاوزة هعمله في حاجه تاني
سليم:قومي افطري معايا وبعدين كملي نوم
نداء:لا هنام ولو سمحت طفي النور
سليم:مفيش نوم يانونو يا عنيدة غير لما تصالحيني
نداء ببكاء وصوت متقطع:اه انا كمان اللي هصالحك
سليم وهو يحتويها بيديه:ايوة انتي اتغيرتي خالص وبقيتي تشخطي فيا كتير وبقيتي وحشه
نداء:ابعد عني ياسليم احسنلك
سليم:اه منك انت ياعمري.. نفسي اقسي عليكي وقلبي ميضعفش
نداء:تقسي عليا ليه انا عملت حاجه.. انت بطلت تحبني ياسليم ليه اتغيرت
سليم:بقسي عليكي من خوفي اسيبك في يوم ومتقدريش تكملي لوحدك.. الحياة صعبة يانداء عايزك قوية.. وبطلت احبك فانا من زمان بعشقك بتنفسك الحب ده كان اول مرة قابلتك فيها انا معاكي معرفتش مرحلة الاعجاب.. وقعت في حبك من اول لحظة وكل يوم بيزيد الحب ده لما بقي جنون.
.. مصممه تروحي لزينه قومي افطري الاول وانا افكر
نداء:لا مش رايحه ومش فاطرة
سليم:هنفطر بس تصالحيني الاول..
بالمشفي التي يعمل بها مهاب.. يتحدث اليه بعض زملائه بعد ان تشاجر مهاب مع احد المرافقين لحالة مرضيه كان يتابعها مهاب
شريف:اهدي شوية يامهاب.. معروف ان بعض الاهالي بيتكلمو اوقات بحدة وقلة ذوق بس معاهم عذرهم واحد جايب حد من اهله وحالته خطر لازم غصب عنه يتعصب ويفقد اعصابه.. لكن انت مينفعش تعمل زيه
مهاب:ليه.. مش بني ادم وليا طاقه.. معنديش مشاكل
شريف:ياسيدي فاهم.. بس المرضي واهلهم بالنسبه لهم احنا طوق النجاة.. اخر امل ممكن يطمنهم.. مينفعش احنا كمان نيجي عليهم
مهاب:ياشريف انا مغلطتش انا بكلمه وبقوله لسه مش متأكدين من التشخيص انفجر فيا وفي الاخر بيقولي حسبي الله فيك وفي ولادك... هي ناقصه مش كفايه اللي حصل
شريف بقلق حقيقي:خير يارب مالهم ولادك
مهاب:مراتي زعلانه مني واخدتهم وراحت بيت اهلها.. لاول مرة يبعدو عني.. اول مرة نودي تنام بعيد عن حضني
شريف:معلش والله مراتي هي كمان بقالي اسبوع زعلانه لاني مشغول علطول وبتقول انها زهقت
ابتسم مهاب بمحبه لان زينة مطلقا لم تشتكي من انشغاله علي العكس يعود مرهقا يجد تلك الابتسامه المرحه.. روحها المشاكسه تنسيه تعب اليوم
مهاب:ربنا يهدينا ويهديهم.. خليني اروح اطيب خاطر الراجل هو مهما كان سنه كبير.
انتظروا بكرة حلقة دمار شامل وقلب في موازين القصة
•تابع الفصل التالي "رواية وصفولي الصبر" اضغط على اسم الرواية