رواية شمس تتحدي الغيوم الفصل العشرون 20 - بقلم عبير سليم

 رواية شمس تتحدي الغيوم الفصل العشرون 20 - بقلم عبير سليم 

الفصل العشرون من رواية شمس تتحدى الغيوم بقلمي :عبير سليم

💖💖💖💖💖💖💖💖

اللهم لك الحمد حمداً كثيراً طيباً مباركاً كما ينبغى لجلال وجهك ولعظيم سلطانك

اللهم لك الحمد ياصاحب النعم يامدبر الأمور يامفرج الهموم اللهم لا تدع لنا ذنباً الاغفرته ولاهما إلا فرجته

ترفع يديها الى الله وهى تتوسله بكل ماتحفظه عن ظهر قلب من ادعية ادعيه خارجه من قلب أم مفطور على حال ابنتها

تلتفت إليها حيث تجدها تائهه تنظر الى اللا شئ

تقترب منها وتقبل جبينها:حبيبة قلب خالتو عامله ايه

شمس :هو انا ليه بيحصلي كده ياخالتو هو انا عملت ايه فى دنيتى ربنا بيعاقبنى عليه عشان يحصللى كل ده

ليه اشمعنى انا ما كل البنات بيتخطبوا وبيتجوزوا اشمعنى انا اللى خطيبي يسيبنى ويخللى سيرتى على كل لسان

كل البنات والستات بيمشوا وبيركبوا تكاسي اشمعنى انا اللى اركب مع واحد حقير زى ده

ليه ياخالتو ليه ليه انا عملت ايه بس ياربي عملت إيه

بتعاقب عليه انا عمري مااذيت حد يبقى ليه اتاذى

سناء وهى تحتضنها:استغفري ربنا ياشمس ربنا مينفعش نقولله ليه ياحبيبتى مينفعش واتأكدى انه أكيد ليه حكمه فكده

شمس :استغفرالله العظيم واتوب اليه بس انا تعبت ياخالتو تعبت خلاص ومبقتش قادرة استحمل كتير علية اللى بيحصللي ده والله كتير

يطرق الباب فتقوم سناء بفتحه

سناء:اتفضل يابشمهندس عمار

وقع عليه الاسم كالصاعقه:عمار

عمار الكاشف لم  بالتحديد هو  الذى ينقذها وماعلاقته بشمس ليقوم بانقاذها وكيف له أن ينقذها وقد خرجت بعده من الشركه أكان منتظرها فى الخارج نعم ولما لا فهو لم يحيد بعينيه عنها طوال وجوده معهم نعم اذن هو انتظرها وحينما خرجت اتبعها

يزيد :هو انا مش بكلمك مبتردش علية ليه

عمر:هاه معاك يايزيد معاك يعنى انت عاوز تقوللى ان عمار الكاشف هو اللى انقذ شمس

يزيد :أيوة هو اللى انقذها ياأستاذ الراجل الغريب اللى ميعرفهاش انقذها واحنا اللى كنا حنضيعها

عمر:يزيد ارجوك انا عارف انك بتعز شمس وانك مضايق بسبب اللى حصل لكن متفضلش ترمى اللوم والعتاب علية انا كنت حعرف منين ان كل ده ممكن يحصلها

يزيد :هو انت لازم تكابر وخلاص المهم متعترفش بغلطك اعمل فيك ايه حتفضل كده لحد امتى انت كبرت مبقتش عمر العيل الصغير انت بقيت راجل هو علي ده مش ادك وفاتح ببت ومخلف عيلين انت فين انت بتعمل ايه صح فى حياتك

غير  الجرى والصرمحه ولا عندك اى تحمل للمسئوليه صغير انت عالعمايل دى ده انت عندك خمسه وتلاتين سنه حتعقل امتى مستنى ايه عشان تعقل هاه فهمنى

عمر:خلاص يايزيد والله ماكنت اقصد ان يحصلها حاجه

يزيد ارجوك انا مش وحش اوى كده انا اسف اسف يايزيد

يزيد:انت مغلطش فية عشان تتاسفلي انت غلطت فى اللى مرميه فى المستسفى والله اعلم حالتها النفسيه عامله ايه دلوقتي

واسمع ياعمر قسما بالله العظيم لو حد خد خبر باللى حصل ده ماحيحصلك كويس الموضوع ده مش عاوز حد نهائى يعرفه انت فاهم حتى على ميعرفش حاجه

عمر :غريبه اوى مع انك مبتخبيش عن على حاجه

يزيد :انا فعلا مبخبيش عنه حاجه بس انا متاكد انه لو عرف حيقول لمروة وده طبعا لانه حيبان عليه الزعل واختك طبعا مش حتسيبه غير لما تقرره وبعد كده حتطلع تجري تحكى لعاليه وانا مش عاوز اى حد يعرف حاجه عن الموضوع ده البنت نفسيتها مش مستحمله كفايه اللي هى فيه

عمر:حاضر يايزيد والله ماحنطق بكلمه بس انا كنت عاوز اعرف حاجه

يزيد :خير عاوز إيه 

عمر: انا عاوز اعرف بقى هو عمار ده انقذها ازاى أصلا وهو مشى قبلها 

يزيد :وانت عاوز تعرف اوى عمار انقذها ازاى ليه ها؟

هى يعنى مهمه عندك اوى كده عشان تحب تعرف هو انقذها ازاى

عمر:مهمه مهمه ازاى يعنى لاعادى بس انا مستغرب هو مش انت خرجت توصله وهى مشيت بعده يبقى ازاى شافها وانقذها والا هو بقى كان قاصد يراقبها

يزيد وهو ينظر لبؤرة عينيه والتى تحاول الهروب حتى لا ينكشف مابداخلها:اه هو كان قاصد يراقبها ياعمر

عمر:نعم وده ليه بقى ان شاء الله وهو مال اهله بيها

يزيد:والله ابقى اسأله انت السؤال ده

عمر:يزيد قللى الله يخليك ليه كان بيراقبها

يزيد :حقولك ياعمر حقولك اللى عمار قالهولى واحنا فى المستشفى

انا لما خرجت من الاوتيل وخرج معايا البشمهندس يزيد عشان يوصلنى لقيته وقف معايا قدام باب العربيه وبدأ يتكلم معايا شويه كان بيحاول بفتح اى موضوع بس انا لقيت رجلى وجعتنى لأنى مش بقدر اقف عليها كتير فاستئذنته امشي ونكمل كلامنا وقت تانى

وأول مابدا يتحرك ناحية الاوتيل وانا بلف عشان افتح باب العربيه شفتك خارجه ووشك كان بيقول ان فى حاجه والغريبه انه مااخدش باله منك ودخل على طول

وانا مكدبش عليكى استغربت قلت ازاى اتنين رجاله يسيبوكى تمشي لوحدك فى وقت زى ده

بدات اتحرك ناحيتك عشان اعرض عليكى اوصلك بس ملحقتش يادوب بتحرك كنتى وقفتى تاكسي

معرفش ليه مشيت وراكى ولا إيه اللى خلانى اقرر انى لازم اطمن انك نزلتى قدام بيتك بالسلامه يمكن عشان الوقت متأخر والسكه ضلمه  مشيت وراكم بالعربيه والشك بدأ يدخل قلبي لما لاحظت انه مشى من طريق زراعى بس قلت انا معرفش انتى ساكنه فين ويمكن ده طريقك وفضلت وراكم

جالى تليفون وكان لازم ارد وانا برد وبقفل السكه ببص ملقيتش التاكسي قلقت اوى فضلت ادور وابص يمين وشمال لحد مالمحت التاكسي راكن على جنب وباب التاكسي مفتوح وقفت بالعرببه ونزلت اللى كان ماخرنى عنك ان حركتى بطيئه ومبقدرش اتحرك بسرعه بدأت انتبه لصوت صريخك كنت حاسس انى حتجنن وانى لازم الحقك مهما كان التمن

 المشكله ان الدنيا كانت  ضلمه والشجر كتير والأرض مش مساعدانى اتحرك بسهوله لحد الحمد لله ماربنا وفقنى وقدرت أوصلك والحقك

 الف حمد الله على سلامتك ياشمس

شمس :الله يسلمك يا بشمهندس وبجد انا عمرى ماحنسالك الجميل ده وان لولاك كان زمانى دلوقتى ضعت

حضرتك متعرفش انا اول ماعينى وقعت عليك وشفتك ادامى حسيت انى فأمان خلاص وكل الرعب والخوف اللى كانوا مسيطرين علية راحوا فلحظه

ومحستش بعد كده باى حاجه غير وانا هنا وكان نفسي اوى اعرف حضرتك شفتنى وانقذتنى ازاى

سناء:ماهو البشمهندس حكالنا وانتى نايمه ياحبيبتى

عمار:متقوليش كده ياشمس ربنا سبحانه وتعالى  هو اللى قدر كده عشان اقدر الحقك

شمس :الحمد لله بس حضرتك معايا من امبارح ممكن حضرتك تتفضل وانا اصلا حمشي على اخر النهار

عمار:لا طبعا انا مش حمشي من هنا غير لما اطمن عليكى انك بقيتى زى الفل

شمس :والله انا بقيت كويسه الحمد لله

 

تدخل ايمان ومعها بعض الأكياس  تضعها على الطاوله الموجوده بالغرفه :ممكن حضرتك تتفضل تفطر يابشمهندس

عمار:فطار فطار ايه بس انا مش عاوز اكل

إيمان :لاء طبعا مينفعش الكلام ده حضرتك هنا من امبارح واكيد مااكلتش حاجه

عمار:بس مكنش ليه لزوم والله التعب ده

إيمان :ياسلام شوف ازاى على اساس اننا بخلا يعنى واللا يمكن مش اد المقام 

عمار:استغفر الله العظيم لا والله مقصدش بس يعنى

إيمان :مفيش بس وبعدين حضرتك اصلا لو دقت السندويتشات اللى انا جايبهالك مش حتقدر تقاومها

عمار:انا فعلا شامم ريحه حلوة

إيمان :حلوة بس دى تجنن يابشمهندس ياللا ياللا قوم تعالى كده وسم الله

سناء:معلش يابشمهمدس هى إيمان كده بتاخد عالناس بسرعه

عمار:بالعكس دى ماشاء الله عليها زى العسل قوليلي ياايمان انتى برج إيه شكلك جوزاء

إيمان :بالظبط كده جوزائيه وافتخر

شمس :برج المجانين يعنى ههههههه 

عمار :ايوة فعلا انا اعرف انه برج المجانين وهما عارفين انهم مجانين وكمان عارفين ان احنا عارفين انهم مجانين بس بصراحه جنانهم احلى جنان واخف دم فى الابراج كلها

هوائيين مبيثبتوش على حاجه يعيطوا ويضحكوا فنفس الوقت الشئ وعكسه بمعنى الكلمه

إيمان :اه فعلا اوعى وشك احنا يوم معاك ويوم عليك ممكن نقلب فثانيه بنحب الشئ وعكسه فى نفس اللحظه مجانين بقى حتقول إيه

عمار:هههههههه عارف عارف انتى حتقوليلي عليهم ده انا حافظهم

شمس :وحضرتك تعرف ايه عنهم كمان قول قول يابشمهندس

عمار:زى ماقالت بالظبط بيحبوا الشئ وعكسه يعنى مثلا تتصل بيكى وتبقى عاوزة تكلمك وممكن تقول يارب متردش

تبقى عاوزة تخرج و ملهاش نفس تتفق معاكى على خروجه وتقنعك بيها تتحايل عليكى كمان وبينها وبين نفسها تدعى ربنا ان يحصل حاجه عشان الخروجه تبوظ

إيمان :ههههههههه فعلا وربنا مش ممكن ده فعلا اللى بيحصل معايا بالظبط

سناء:وانا اللى طول عمرى بقول عليكى مجنونه طلع برجك هو اللى ظالمك واحنا مش عارفين

فيضحكون جميعا وتشاركهم شمس الضحك حتى انها نسيت للحظات ماهى فيه

إيمان :هو حضرتك خبير فى الأبراج يابشمهندس

عمار :ابدا والله

إيمان :امال عرفت كل الكلام ده عن الجوزاء، ازاى

عمار :يعنى اصل فى حد اعرفه جوزاء وكنت بهتم اعرف كل حاجه تخصه

إيمان :ومين بقى  سعيد الحظ ده

عمار وهو بحاول تغيير الموضوع :مقولتليش بقى جايبه ايه تصدقى انا جعت فعلا

ايمان وهى تضع امامه الطاوله :كبده وكفته  وسدق اسكندراني وشوية مخلل  حتاكل صوابعك وراهم

عمار:الله هو ده الكلام

سناء:بالف هنا وشفا يابنى

عمار :بس انا مش حاكل لوحدى لازم ناكل كلنا سوى عشان يبقى بيننا عيش وملح

إيمان :طبعا حناكل كلنا سوا خدى ياسوسو ياحبيبتى

يبدأ الجميع فى تناول السندويتشات و يضحكون حتى ان شمس قد تناولت معهم الطعام وبدأ يشعر عمار بينهم بالفه ومحبه لم يعهدها من قبل

كان يقيم بينه وبين نفسه شخصية كل منهم ينظر لشمس ورقتها وجمالها الهادئ وابتسامتها وضحكتها الصافيه ويعجب بايمان وشقاوتها وخفة دمها ويريد ان يقبل يد تلك الخاله التى بمثابة الام الحقيقيه التى تخشى على ابنتها من اى شئ 

بعد ان انتهوا من تناول الفطور

إيمان :قللى بقى بصراحه السندويتشات عجبتك

عمار:تحفه بجد تسلم ايدك

إيمان :ربنا يخليك يارب انا عارفه طبعا ان حضرتك متعود تاكل بالشوكه والسكينه وكده بقى

عمار:ليه يعنى لاعادى والله انا باكل بعيش وبغمس عادى

إيمان :بجد طب بتحب تاكل ايه بقى

عمار:بحب اوى الملوخيه والباميه والدتى الله يرحمها كانت بتعملهم حلو اوى

سناء:ربنا يرحمها ويرحم كل اموات المسلمين

إيمان :يالهوي لو دقت ملوخية سنسن حبيبتى مقولكش عليها طشة ملوخيه  واللا الباميه دمار وربنا عارف دقية الباميه بتاعتها ريحتها بتوصل للجيران بتجيب لاخر الشارع والله بيبقوا صعبانين علية الناس اوى ومعاهم بقى بدنجان مخلل لاء لاء مش قادرة اقولك تصدق انى جعت

عمار:ههههههههه ههههههههه لا وربنا مش قادر حرام عليكى ياايمان انا عمرى ماضحكت كده

انتى بجد ملكيش حل ايه ياشمس العسل دى

شمس:إيمان دى حبيبة قلبي 

عمار:ربنا يخليكم لبعض ويديم بينكم المحبه وبعدين بقى انتى كده شوقتينى ادوق الاكل الطعم ده

سناء:ده حضرتك تشرفنا وتنورنا اتفضل انت بس وانا اعملك الحلو كله

عمار:ربنا يخليكى ياامى

طيب ياجماعه بصوا انا حنزل بس اسلم على الدكتور جمال صاحبي واطلعلكم كمان شويه

سناء:خد راحتك بابنى

يخرج عمار بينما تتحدث سناء:ابن حلال اوى الراجل ده ربنا يكرمه يارب

عامله ايه دلوقتي ياحبيبتى لسه فى وجع فى جسمك

شمس :الحمد لله والله ياخالتو أحسن شويه 

يدق عليهم الباب:السلام عليكم

الجميع :وعليكم السلام ورحمة الله وبركاته

يزيد:شموستى عامله ايه دلوقتي ياست البنات 

شمس :الحمد لله والله يابشمهندس

يزيد:شمس معايا واحد برة عاوز يشوفك

سناء:ياخبر يابشمهندس هو حضرتك بتستئذن مننا

يفتح يزيد الباب فيدخل:مساء الخير

فيردون جميعا:مساء النور

يزيد:اعرفك باخويا عمر ياامى

سناء:اهلا يابنى اتفضل

عمر وهو فى قمة الحرج يمد يده ببوكيه الورد لشمس :ألف حمد الله على السلامة يا شمس

شمس :الله يسلمك يابشمهندس بس مكنش فيه داعى انك  تتعب نفسك وتيجى

عمر :انا اسف ياشمس

شمس :آسف على إيه

عمر:انا السبب فى اللى حصلك لو مكنتش قلتلك تمشي مكنش كل ده حصل

شمس :الحذر لا يمنع القدر يابشمهندس والمكتوب ممنوش مهروب والحمد لله قدر ولطف

عمر:الحمد لله انها جت سليمه ارجوكى تقبلي اعتذارى ومتزعليش منى انا والله ماكنت اقصد حقك علية

شمس:مش زعلانه منك يابشمهندس

عمر:بجد ياشمس مش زعلانه

فياتيه صوت من خلفه :ماهى قالتلك مش زعلانه خلاص بقى

عمر وهو يلتفت لها :سلام قول من رب رحيم

إيمان :على أساس انك شفت عفريت تما تقول انصرف احسن ولا تأذينا ولا نأذيك

يزيد :ههههههههه يابت لمى لسانك ده شويه

إيمان :حقك علية ياباشا وبعدين ده بشمهندس عمر ده على راسنا ده انا بحب اناغشه بس ده غالي عندنا أوى مش اوى يعنى بس غالى بردو بعدين هو فى حد فرقته ولطفه

عمر:هو انتى مالك عامله شبه عفريت العلبه كده ليه فكل حته تطلعيلى

إيمان :ليه بس كده تصدق انى زعلت اه وربنا زعلت ومش حكلمك تانى انا غلطانه انى بهزر معاك وعاوزاك تفك شويه بدل الخنقه اللى انت خانقها لنفسك دى

عمر:انا خانق نفسي

ايمان :يالهوى طب بص كده شوف البشمنهدس يزيد والبشمهندس على ضحكتهم ترد الروح ازاى

ده حتى صاحبك اللى جاى معاك والمصحف عسل

عمر:وانا بقى اللى بصل ياست إيمان

إيمان :لا بصل ايه فشر ده انت كريز يابشمهندس بس 

 مش عارفه مالك زى ماتكون مخنوق متضايق حاجه فى الرينج ده كده

يزيد :هههههههه هههههههه

سناء:بت ياايمان اتلمى بقى متزوديهاش الهزار ليه حدود والبشمهندس ضيفنامنورنا والله يابنى حقك علية هى مقصوفة الرقبه دى مبتسترش نفسها فحته ولسه عامله الشويتين دول مع البشمهندس عمار بردو

يغضب عمر من سماع هذا الاسم ويمسح على جبينه:عمار عمار طلعلى منين ده كمان ياربي

وهو البشمهندس عمار كان هنا

شمس:هو موجود هنا يابشمهندس

يزيد وهو مبتسم:والله هو لسه موجود ده انا قلت انه اكيد مشى والله الراجل ده زوق جدا ربنا يقدرنا على رد جميله

امال هو فين طيب

ينظر له عمر بغضب وكأنه يتوعده على هذا المديح لذلك العمار

سناء :قال حينزل يسلم على دكتور صاحبه وطالع كمان شويه

عمر:وهو بقى طالع داخل مش ناوى يمشي يعنى واللا إيه

إيمان :لاء مش حيمشي مصمم انه ميروحش غير بعد مايطمن على شموستى حبيبتى

عمر:صبرنى يارب

إيمان وهى تقدم له العصير :اتفضل يابشمهندس

عمر:شكرا ياست ايمان

ايمان:بقولك ايه فى سندويتشات تحفه اجيبلك تفطر

عمر:شكرا  بالهنا والشفا

إيمان :والله دى تحفه حتعجبك اوى دى حتى عجبت البشمهندس عمار جدا

عمر وهو يقف بانفعال:يزيد انا حمشي

سناء :مستعجل ليه يابنى لسه بدرى

عمر:ربنا يخليكى ياطنط بس انا لازم ارجع الشغل والف حمد الله على سلامتك ياشمس

شمس :الله يسلمك يا بشمهندس

إيمان :نورتنا اقسم بالله

فينظر لها عمر بغيظ وينسحب دون الرد عليها

اما يزيد فينظر لها  ويتحدث اليها وهو يضحك:برافو عليكى

إيمان :عجبتك ياباشا

يزيد:عجبتينى اوى بس خفى شويه انا مش ضامنه ده ممكن يشيلك يحدفك من الشباك

ايمان :ههههههه حاضر

يخرج عمر وهو فى قمة غضبه فيقابله وجهالوجه

عمار:بشمهندس عمر ازيك

عمر:اهلا بحضرتك يا بشمهندس

عمار:هو حضرتك ماشي

عمر:عندى شغل وحضرتك مش ناوى تمشي والا ايه

عمار:حطمن على شمس وامشي على طول

عمر:بقت كويسة الحمد لله

عمار:الحمد لله

عمر:عن اذنك ويتحرك من امامه وهو يسب ويلعن ويتحدث الى نفسه:فى ايه مالك ايه اللى مضايقك من وجوده اوى كده

مش عارف مش عارف مالي بس انا مش عاوزه ييجى ناحيتها ولا يكونله علاقه بيها من أساسه

بينما فى الداخل يتحدث اليهم عمار:الحمد لله انى اطمنت عليكى وان شاء الله حنتقابل قريب

شمس :ان شاء الله يا بشمهندس

يزيد:طب استنى حروح بس الحسابات وارجعلك على طول

عمار :حسابات ايه يابشمهندس حضرتك بتشتمني واللا ايه

يزيد:ليه بس كده مش كفايه انك انت اللى انقذتها

عمار:عيب يابشمهندس ده حضرتك كلك ذوق حتى ودى اقل حاجه ممكن اعملها لشمس

يزيد وهو يسلم عليه::جميلك ده حيفضل فى رقبتنا العمر كله

عمار :ليه كل ده انا معملتش حاجه

يزيد:معملتش حاجه انت عملت كل حاجه ربنا يقدرنا ونردلك الجميل ده

عمار:نتقابل ان شاء الله على خير سلام عليكم ويسلم على الجميع بحرارة

سناء :انا حستناك ان شاء الله  زى ماوعدتنى

عمار:ان شاء الله يا امى

يخرج معه يزيد لتوصيله للخارج بينما تدعو سناء له الله ان ينجيه من كل شر

💖💖💖💖💖💖💖💖💖

يدخل الشركه وهو لايطيق  أن يتحدث إليه أحد فيجدها فى وجهه فيحيد النظر عنها ويتجه نحو مكتبه مباشرة 

فتشعر بالغضب تجاه ردة فعله عندما رآها فهى لم تعهده الا ضاحكا مبتسما فى وجهها دائما

فتقرر الذهاب نحو مكتبه من باب معرفة مااذا كان هناك سبب لضيقه تأخذ فنجانا من القهوة وتهندم من نفسها وتطرق الباب عليه ثم تقوم بفتحه

صباح الفل يا بشمهندس

عمر:صباح النور يا مياده

مياده وهى تقترب منه باغراء: لقيتك داخل وشكلك مش مظبوط قلت اكيد محتاج فنجان قهوة

عمر وهو ينظر إليها وكأنه يعلمها بأنه يعلم مايدور بخلدها ويفهمها جيدا ولكنه فى ذات الحين غير متضايق من تلك الافعال:انا فعلا كنت محتاج فنجان الفهوة ده اوى تسلم ايدك يامياده

مياده:بألف هنا

عمر:ماشي يامياده ممكن تتفضلى تشوفى شغلك عشان انا عندى شغل دلوقتي

مياده :اه ماشي بس كنت عاوزة اتكلم معاك

عمر:بعدين يامياده ياللا اتفضلى دلوقتى

تخرج مياده بينما ينظر عليها وهو يبتسم فى قرارة نفسه وياخذ رشفه من القهوة ويضعها على المكتب ويبدأ فى التفكير فى ذلك الملاك الذى بدأ يتسلل الى داخل قلبه من غير أن يشعر بذلك او يرتب له

وعلى الحانب الاخر نجد عاشقا اخر يقف امام باب الخروج للجامعه يقف ولا يعرف لما يقف فى هذا المكان ومن المفترض أن يكون الان بالشركه حتى انه لايعلم مافائدة وقوفه هكذا فهو لايعلم مااذا كانت بالداخل ام خرجت ام لم تذهب من الاساس

ياربي ماذا افعل فلقد اصاب سهم الهوى قلبي ولكن متى ستحن هى على ذلك القلب الذى اهلكه حبه لها متى سيشعر قلبها بهذا المحب الذى عذبه حبه لها

يقف فترة دون جدوى ثم يقرر ان بعود مرة ثانيه الى محل عمله

بينما كانت هى وصديقتها فى نادى اخر يقدمون فيه ويملئون بياناتهم الشخصيه بعد ان قررا ذلك

عهد:نونه إيه رأيك في الجيم ده

حنين:كويس ياعهد

عهد :طب بقولك ايه تيجى نروح ناكل فى اى مكان انا مش عاوزة اروح دلوقتى

حنين :غريبه يعنى ده انتى كل يوم مابتصدقى نخلص وتجرى على البيت

عهد :ايوة فعلا بس مش عارفه ليه عاوزة اتاخر النهارده نفسي اشوف غيابي حيفرق معاه واللا لاء

حنين :ماشي ياستى ياللا بينا

💖💖💖💖💖💖💖💖💖💖💖

فى شقة وليد وأمل

يجلس وليد على الكرسي المتحرك وعلى قدمه ولده زياد يهدهده ويضحك له الصغير ضحكات تذيب القلب وتنسي مابه من أحزان بينما كانت أمل بداخل المطبخ تصنع لهم الطعام

فجاة  يعلن جرس الباب عن قادم إليهم فتجدحبيبه ام جنى جارتهم

أمل :اهلا ياحبيبه اتفضلي

حبيبه:ازيك يااموله عامله ايه ياحبيبتى

أمل :الحمد لله والله ماتدخلى ياحبيبه واقفه كده ليه

حبببه :انتى شكلك مش فاضيه

أمل :بعمل الغدا ماتدخلى يابنتى هو انتى غريبه

حبيبه :لا مش عاوزة اعطلك حبقى اجيلك كمان شويه او بصي لما وليد  ينام ابقى نادى علية عاوزة اتكلم معاكى شويه ومش عاوزاه يسمعنى

امل:خير ياحبيبتى قلقتينى فى حاجه

حبيبه:ابقى نادينى بس ولما اجى حبقى اقولك

امل:طيب ماشي حاضر هو متعود يتغدى ويريح شويه وبعد كده حنادى عليكى

تغلق الباب وتدخل

وليد:مالها ام جنى يا امل  مدخلتش ليه فى حاجه؟ 

امل:والله مااعرف ياوليد بتقول عاوزانى فحاجه معرفش مالها

انا حروح اكمل الاكل

وليد:روحى ياامل

بعد مرور حوالى ساعتين تجلس حبيبه ام جنى مع امل

امل:مالك بقى ياحبيبه فى ايه ياحبيبتى

حبيبه وهى تبكى مخنوقه اوى ياامل ومش عارفه اتكلم مع مين مفيش حد عاوز يسمعنى ولا فى حد حاسس بية انا عارفه ان اللى فيكى مكفيكى ومش ناقصانى انا كمان بس والله ملقيت حد غيرك اشتكيله همى واطلع اللى جوايا ليه بدل مانا حسه انى حنفجر وحموت

امل :بعد الشر عنك ياحبيبه ربنا يحميكى لشبابك ويخليكى لبنتك يارب فى ايه حصل ايه بس احكى ياحبيبتى فضفضي مالك فى ايه؟ 

حبيبه:تعبت تعبت خلاص ياامل ومبقتش قادرة استحمل اكتر من كده انا مش عارفه اعمله ايه اكتر من اللى انا بعمله ده انا قايداله صوابعى العشرة شمع مخلية بيته زى الفل وانا والله مبهملش فنفسي خالص ودايما بستحمى وبهتم بنفسي

وحتى البت بنيمها قبل مايرجع اقول عشان بردو لما بيرجع بيكون تعبان وعاوز يستريح ومينفعش ييجى يلاقى البت بتزن وبتعيط وادخل اغير هدومى واقعد استناه

وبردو مفيش فايده تعبت منه ومن قرفه خلاص والله العظيم ماقادرة مش قادرة استحمله اكتر من كده

امل:طب بس عشان خاطرى ياحبيبه متعمليش فى نفسك كده اهدى شويه ياحبيبتى

طب هو مزعلك فى ايه طيب عملك ايه؟

حبيبه :بيشتمنى ويضربنى ويهيننى ومبيستحملش منى الكلمه وعلى طول مش طايقنى ولا طايق البنت طب كان بيتجوز وبيخلف ليه لما هو مش عاوزنا

واجى على نفسي واقول معلش لكن لحد امتى انا تعبت منه خلاص كل يوم  يتغدى ويخرج يفضل قاعد عالقهوة لحد نص الليل ولو محتاجه حاجه واللا البنت كان فيها حاجه وكلمته يقوللى انزلى انتى اتصرفي انا قاعد مع صحابي

ويرجع مش طايقنا وكل كلمه يقوللى هو انتى فاكرة نفسك ست ده انتى تحمدى ربنا انى اتجوزتك من أساسه روحى شوفى الستات اللى تفتح النفس

أمل :ضرب إيه وإهانة ايه لا الكلام ده ميتسكتش عليه وبعدين يعنى ايه انتى فاكرة نفسك ست دى لا ياحبيبه ده انتى ست وست الستات كمان  هو كان يطول ضافرك واللا ايه عالاقل انتى متعلمه ومعاكى دبلوم لكن هو يادوب كل اللى حيلته شهادة الميلاد

وبعدين ده انتى ماشاء الله عليكى زى الفل ونضيفه فنفسك وفبيتك ومش مخلياه عاوز حاجه

بصي ياحبيبه انا مش بقويكى عليه ولا عاوزالك خراب البيت  لكن اللى زى جوزك ده لازم حد يقف له عشان ميتماداش فيها

حبيبه :حد حد مين اللى حيقفلى ياامل انا لما قلت لاهلى قالولى كل واحده تعرف طبع جوزها وتمشي عليه ولازم تستحملى عشان  بنتك ومعندناش حاجه اسمها تطلقى انتى عاوزة تفضحينا ويقولوا بنتهم اتطلقت

أمل :يبقى ليه حق بقى يعمل كده ماهو مش لاقى حد يصده ماهو على رأي المثل قالوا لفرعون ايه فرعنك قال حكمت وظلمت وماانفتح حنك

لا ياامل اللى زى جوزك ده لو محدش عرفه غلطه حيزيد فيها ولما الراجل يلاقى محدش سائل فى مراته وسايبينه يعمل فيها مابدالهم بيدلدل رجليه ويستعبط ويسوء، فيها عالاخر

واهلك طبعا  زيهم زى معظم الناس اللى يفضلوا يضغطوا على بنتهم عشان تعيش لحد ياحبة عينى مايحصللها حاجه وبعد كده يقعدوا يعيطوا ويقولوا ياريت اللى جرا ماكان

بس غريبه يعنى مع ان اللى يشوفه يقول عليه راجل محترم

حبيبه :هو مع الناس اللى برة كده يضحك ويتكلم بادب وكريم لكن معايا انا وبنته يكفيكى الشر كلامه كله شتيمه وبخيل علينا مع ان ربنا كارمه من وسع لكن فالح بس يروح يضيع فلوسه على قعدة القهاوى وعلى صحابه الصيع وعالقرف اللى بيشربه معاهم 

 وانا بيحاسبنى حساب الملكين وكل كلامه بمد الايد

انا تعبت خلاص ياامل تعبت والله العظيم اعمل ايه بس ياربي

أمل :تحبي اخللى وليد يتكلم معاه

حبيبه :لا بلاش والنبي احسن حيعرف انى اشتكيتلكم وحيبهدلنى

أمل :متخافيش ياحبيبتى وليد حيتكلم معاه من تحت لتحت كده من غير مايحسسه انك قلتى حاجه يمكن حاله يتعدل

حبيبه :يارب ياامل يارب أحسن انا تعبت خلاص والله ومش قادرة اتحمل العيشه دى خلاص

أمل :ربنا عنده خير ياما ادعيله ربنا يهديه

حبيبه :بدعيله والله ياامل فى كل صلاة  ربنا يهديه ويصلح حاله

،💖💖💖💖💖💖💖💖💖💖💖💖💖

انتهى الفصل يارب يكون عجبكم

تعليقاتكم وتوقعاتكم ياحلوين

مع ألف سلامة واشوفكم على خير ان شاء الله

القصه هنا فقط اعمل متابعة ليصلك كل جديد 👇 

عشاق الروايات

 •تابع الفصل التالي "رواية شمس تتحدي الغيوم" اضغط على اسم الرواية