رواية شمس تتحدي الغيوم الفصل الثاني و العشرون 22 - بقلم عبير سليم
الفصل الثانى والعشرون من رواية شمس تتحدى الغيوم
بقلمي :عبير سليم
💖💖💖💖💖💖💖💖
لو اطلعتم على الغيب لاخترتم الواقع
كثيرا ماسمعنا هذه المقوله ولم ندرك معناها نعم صدقت تلك المقوله فكل مايحدث لنا اختيار مقدر من رب العالمين فالله يعلم مافى نفوسنا وتسير أمور حياتنا وقفا لطبيعتنا البشريه التى يعلمها الله تمام اليقين ولما لا فهو رب العباد وهو خالقها ويعلم ماتخفى الصدور وماتبدبه .
ولو وضعت امامنا كل الاختيارات لن نختار سوى ماقدره الله لنا ولن تقع أعيننا إلا على قدرنا الذى كتبه الله لنا والذى نعيشه الآن
ولهذا الأمر يحب ان نتيقن تمام اليقين انه لو اطلعنا على القدر وعلى الغيب الذى لا نعلمه لن نختار سوى الذى نعيشه الآن.
فى شقة سناء
سناء:عارفه ياايمان لو مااخدتيش بالك من شمس حعمل فيكى إيه
إيمان :ياربي حرام عليكى ياسناء انا تعبت منك وربنا انتى قلتيلي كده سبعتلاف مرة متخافيش ياسنسن ياحبيبتى شمس فى عينيه من جوة مش حسيبها لحظه واحده ارحمي امى بقى.
سناء :أيوة كده مش تروحى تتسرمحى مع حسن وتسيبي البت لوحدها ودينى اقطم رقبتك.
إيمان :اخس عليكى ياسناء طب تصدقي بقى انى زعلت منك
سناء:تزعلى واللا تتفلقى المهم البت يالهوى انا مش عارفه عقلي كان فين لما وافقتك يامقصوفة الرقبه.
إيمان :ارحمينى ياحاجه ارحمينى بقى ابوس ايدك وبعدين مش البشمهندس عمار اتصل بيكى بنفسه وطلب منك تسافري معانا وقالك انه عازمك وانتى اللى مردتيش.
سناء: لا ياحبيبتى انا عمرى لارحت ولا جيت ولا سافرت قبل كده انا كل اللى بتمناه من الدنيا انى اجوز شمس واطمن عليها وبعد كده ربنا بكرمنى بحجه واللا عمرة واموت هناك
شمس:الف بعد الشر عليكي يا حبيبة قلبي وتسيبينى لمين ياخالتو
سناء:مانا حكون اطمنت عليكى ياحبيبتى وبعدين دى دعوتى اللى بدعي ربنا بيها فى كل صلاة نفسي اموت عند النبي
شمس وإيمان :عليه الصلاة والسلام
شمس :ربنا يخليكي ليا يا خالتو ومنحرمش منك يارب
سناء :شمس انتى عارفه انى موافقتش على سفرك ده غير مابعد الزفته دى مافضلت تزن وانا عارفه انها هي اللى ليها غرض تسافر
وكمان بعد ماكلمت البشمهندس عمار وامنته عليكى وكمان خليتك اتصلتيلي بعمر وامنته عليكى هو كمان
تخللى بالك من نفسك وتكلمينى كل ساعه
شمس:حاضر والله ياخالتو
سناء:ربنا يجعلكم فى كل خطوة سلامه ويسلمكم من كل شر ويبعد عنكم شر ولاد الحرام ويكتبلكم الخير من عنده يارب وتروحوا وتيجوا بألف سلامه ثم تنظر لايمان :إيمان
إيمان :قطيعه تقطع إيمان إيمان وربنا زهقت من عيشتها خلاص حفظت كل شويه اسمعلك ده لو امتحان وربنا كنت جبت فيه الدرجه النهائيه يالهوى ده انا حتشل.
💖بينما على الجانب الآخر كان يستعد للذهاب فلقد اتم تجهيز حقائبه وقام باغلاقها وخرج من غرفته فوجدها أمامه :صباح الخير ياعمر
عمر:صباح الفل والياسمين على اجمل بنوته فى الدنيا كلها
عهد:بجد انا أجمل بنوته ياعمر
عمر:طبعا اجمل بنوته كفايه عينيكى الحلوين دول وشعرك الاصفر ده عارفه ياعهد بتفكرينى بالبنات الاجانب قمر يادودو ربنا يحميكى يارب
عهد :ربنا يخليك يا عمر انا فرحانه اوى انك شايفنى حلوة
عمر:ههههههه طبعا لازم اشوفك حلوة هى دى محتاجه كلام عارفه وانتى صغيرة ياعهد كنتى لما تعاكسينا انا وعلى واحنا بنذاكر كنت اقعدك على رجلى واقعد العب فى شعرك واقول لعلى انت وعاليه شعركم اسود لكن عهد شعرها اصفر واغيظهم ههههههه.
عهد : ههههههه بجد ياعمر يعنى انا عجباك
عمر:عجبانى اه طبعا اكيد مش اختى الصغنتوته لازم تعجبينى ياسكر ياللا قوليلي بقى عاوزانى اجيبلك ايه وانا جاى من شرم
عهد :انا مش عاوزة غير انك تيجى بالف سلامه البيت حيبقى وحش أوى من غيرك ياعمر
عمر :الله يسلمك ياعهد وبعدين البيت منور بوجودكم فيه ياحبيبتى
تشعر عهد بازدياد ضربات قلبها عند سماعها لتلك الكلمه
تكاد ان تقفز من شدة الفرحه
طب ياللا بقى انا لازم انزل حالا عشان حتاخر
عهد:عمر
عمر:نعم ياعهد
عهد:ولا حاجه خلاص مع السلامه
عهد :عمر
عمر:فى ايه ياعهد لو عاوزة حاجه قولي متتكسفيش
عهد:يعنى هو ينفع ابقى أكلمك اطمن عليك
عمر:اه طبعا ينفع ياللا بقى حتاخر يا عهد
ينزل عمر ويسلم على الجميع عدا هاله حيث كانت جالسه فى غرفتها فهى تحاول الإبتعاد عنه قدر المستطاع حتى لاترى فى عينيه تلك النطرة التى تقهرها وتقطع قلبها
يزيد :ياللا بينا ياعمر البنات مستنيينا
عمر:ياللا يايزيد
يتجهان لمنزل شمس ويقفان تحت المنزل حتى تنزل الفتياتان يركبان فى الخلف حتى يقوم بتوصيلهما للمطار
فى المطار يجلسون جميعا فى انتظار طائراتهم
كان عمر يجلس بجوار شمس التى كانت تتحدث لخالتها لتطمئنها على وصولهم للمطار وتستمع لنصائحها للمرة الألف بدون ضيق او ضجر
وكان الاخر يستمع إليها وهو شديد الإعجاب بادبها واخلاقها وحسن ردها على خالتها.
بينما كانت ايمان جالسه بجوار يزيد يتحدثان بصوت منخفض
يزيد:إيمان
إيمان :اؤمرنى يابشمهندس
يزيد :اللى اتفقنا عليه اوعي تنسي
إيمان :وهو احنا اتفقنا على حاجه حضرتك
يزيد:ايمان متعصبينيش أحسن وربي اخدك معايا ونرجع تانى
إيمان :خلاص ياباشا متقفش كده بهزر ياربي عليك هو انا معرفش اهزر معاك خالص
يزيد:ايمان انا بتكلم جد دلوقتى
ايمان:اطمن يابشمهندس عاوزاك تطمئن على الآخر كله حيبقى تحت السيطرة
يزيد :طب سمعينى كده حتعملى إيه
إيمان :حنام معاها فنفس الاوضه مش حسيبها ولا لحظه رجلي على رجليها ولو حسن كلمنى حقولله
يزيد :ايه اللى انتى بتقوليه ده احنا متفقناش على كده
إيمان :يادى النيله دى القصيده اللى لسه مسمعاها لسناء لغبطونى حرام عليكم انتوا بتعملوا فية كده ليه هو انتوا شاريينى من سوق العبيد
يزيد :إيمان اخلصي ووطى صوتك ياجذمه حيسمعونا
إيمان :حاضر بس من غير متتعصب صحتك مهمه عندنا هدي نفسك كده استنى حفتكر اهوه ايوة بص ياسيدي حقدملك تقرير اخباري كل ساعتين تمام
حقرب بينهم على اد مااقدر ومكبسش على نفسهم طبعا
واديهم فرصه يتكلموا مع بعض
يزيد :عارفه لو لزقتى لحبيب القلب ونسيتى اللى اتفقنا عليه حعمل فيكى ايه.
إيمان :حتعملنى بطاطس محمرة ياباشا عارفه وربنا
بقولك ايه تحب اعملك بث مباشر بالمرة اه وربنا بص اخليه على الهوا مباشرة زى حفلات ليالي التليفزيون بتاعة زمان دى فاكرها
يزيد :ايمان انا نفذتلك طلبك وعملتلك كل اللى انتى رتبتيله لكن وربنا لو خالفتى الاتفاق لحيكون حسابك معايا كبير
ايمان :هو انتوا بتعاملونى المعامله دى ليه حرام عليكم ده انا بنت ناس وربنا
يزيد :من عشمنا فيكى يامونى
إيمان :بتخجلنى بجد والله بادبك ده يابشمهندس حاضر والله كن مطمئنا ستسير الامور على خير وجه
سيري يانورماندى على بركة الله نورمامدي تو
يزيد: الصبر من عندك يارب حتجننيني أقسم بالله ماشي ياايمان خليكى هزرى كده لحد ماحدقك واعملك كفته ان شاء الله
إيمان :بس خليها كفته عالفحم والنبي ومعاها طحينة وشويه سلطات يااه تصدق جعت
يزيد :يخرببيت معرفتك السوده هو انتى كل عقلك فى حسن والاكل مفيش حاجه فى دماغك غيرهم.
إيمان :طبعا ياباشا حسونه ده روح قلبي من جوة. اما الاكل ده بصراحه مشوفناش منه غير كل خير.
يزيد :ههههههههههه تعرفي يامونة برغم انك دايما بتعصبينى وبتعليلي الضغط بجنانك ده بس مبقدرش ازعل منك ولا ازعلك مش عارف ليه
إيمان :عشان انت بتحبني اعترف اعترف وقول انك بتحبنى
وانا مش حقول لحد هههههههه
يزيد:ههههههههه مجنونه وربنا طبعا بحبك يامونه ده انتى اختى الصغيرة يابت
إيمان :وحضرتك والله يابشمهندس اخويا الكبير اللى ربنا يعلم محبتك فى قلبي اد ايه
ربنا يخليك يارب ويخليك مدام عاليه وعشق القمر
يزيد :يارب ياايمان يارب
إيمان :طب بقولك ايه ياكابتن
يزيد :نعم ياهمى الكبير
ايمان :ايه رايك تجيبهم وتيجى شرم ونتلم كلنا كده ويمكن ربنا يكرم ونقرا فاتحه واحنا هناك بالمرة
يزيد:لا يامونة انا لية ترتيبات تانيه خالص
إيمان :ترتيبات ترتيبات ايه قللى ياللا قول ومتخافش سرك في بير انا ستر وغطا عليك
يزيد:غطا ايه وحلة ايه ياتحفه انتى انا اصلي الأسبوع الجاى عيد جوازى وعاوز احتفل بيه مع عاليه ان شاء الله بس فى مكان لوحدينا
إيمان :ماشي ياعم هنياله
يزيد:هههههههههه مجرمه
عمر:ايه يايزيد انت وام لسانين بقالكم ساعه ونص بتتكلموا فى إيه
إيمان :خير يابشمهندس كل خير ان شاء الله
بيوصينى عليكم ياسيدي اصلي انا الراعى الرسمى بتاعكم
عمر:ده انتى منورانا يامونى والله
إيمان :سبحان مغير الأحوال ياربي
يزيد :هو انتى مش عاجبك حاجه لاكويس عاجبك ولا بيتخانق عاجبك.
ايمان :اصله بقى النقيض تماما وبقت معاملته لية كويسه اوى مش عارفه ليه قلبي مش مرتاحله خايفه يكون ناويلي على نية
يزيد :حيغرقك فى البحر مثلا
ايمان:لا ياباشا اللى حيغرقنى الواد حسن ان شاء الله
يزيد :صحيح قلتيله انك مسافراله
إيمان :لا طبعا وانا عبيطه ده انا حعمل عليه كبسه اه عشان اشوف بيهبب ايه من ورايا ده حتبقى سنته سوده لو لقيته بيلعب بديله كده واللا كده اه مانا لازم اطمن بردو ليكون بيستغفلنى.
يزيد :هههههههههه ربنا يستر عليك ياحسن لا اطمنى معقوله بردو يبقى معاه العسل ده وعينه تزوغ
ايمان :اه مانا بقول كده بردو وهو والله طيب وغلبان
يزيد :يابنتى انتى مجنونه بتقولي الكلمه وعكسها فنفس اللحظه
ايمان:جوزائيه مجنونه بقى حتقول ايه
يزيد:حقول ربنا يخليكى لينا ياستى ومننحرموش من وجودك فى حياتنا اللى بيهون علينا كتير أوى
إيمان :أصيل يابشمهندس وربنا اصيل
عمر:يزيد بينادوا على طيارتنا
يسلم عليهم يزيد ويودعهم على امل اللقاء القريب بامر الله
ثم يعود مرة ثانيه الى عمله بالشركه وهو يدعو لهم الله من قلبه ان يؤلف بين قلوبهم وان يكون القدر رحيما بهم ويعطيهم فرصه للحياة.
ويمنح عمر الفرصه ليعترف بحبه وعشقه الكامن بداخله ويأبى قلبه الاعتراف به
ثم يضحك من قلبه كلما تذكر تلك المجنونه وكلامها الذى يجعل الضحكه تخرج من القلب ويدعو لها الله ان يعطيها بقدر نيتها الصافيه وقلبها الطيب
💖💖💖💖💖💖💖💖
فى شرم الشيخ
عمار:اهلا وسهلا شرم نورت والله ياجماعه
عمر:منورة بأهلها يابشمهندس
عمار:منورة ياايمان بجد انا مبسوط اوى انك جيتى
إيمان :شكرا يا بشمهندس
ثم يلتفت لشمس :منورانا ياشمس انا حاسس ان وجودك فى شرم رسم الضحكه فى كل مكان
عمر:ممكن ندخل فى الشغل عشان مفيش وقت
عمار:طب مش لما تستريحوا من السفر الاوض بتاعتكم جاهزة شمس وايمان فى اوضه زى ماطلبوا وحضرتك يابشمهمدس فى غرفه لوحدك تمام كده
عمر:تمام ياللا قدامى ياانسه انتى وهيا
تصعد الاثنتان معه ويدخلان الغرفه
تتفحص إيمان المكان وهى مبهورة به وتفتح الفرانده المشرفه على البحر وتتمتع بمنظر المياه الصافيه بينما تتصل شمس على خالتها لتطمئنها على سلامة وصولها بينما عمر لا يستطيع ابعادها عن عقله لحظه فلقد استطاعت ان تستحوذ على تفكيره
قام بتغيير ملابسه والاستلقاء على ظهره ورافعا وجهه لسقف الغرفه ليسال نفسه:ليه شدتينى ليكى كده ليه معلقانى بيكى بالشكل ده انا عمر مافى بنت قدرت تستحوذ على عقلي وتفكيري بالمنظر ده
كل يوم بيعدى بحس بيكى اكتر من اليوم اللي قبله كل كلمه كل حركه كل ابتسامة بتخلينى ادوب فيكى
ياربي اعمل ايه بس معقول اللى انا فيه ده معقوله كمية الاحاسيس اللى جوايا دى تكون كدب تكون مش حقيقة طب ازاى ده انا مبطقش اشوف الزفت اللى اسمه عمار ده بيكلمها نص كلمه ياترى ايه اللى مخبياه ليك الايام ياعمر
💖💖💖💖💖💖💖💖💖💖💖💖
فى داخل الشركه
سيف:عيب عليك ياعلى متقلش كده انت لو عاوزنى ابات فى الشركه معنديش مانع
على:ده عشمنا فيك والله ياسيف اصل انت الوحيد دلوقتى اللى اقدر تنفذ الشغل بتاع إيمان
سيف :حاضر من عينيه كل اللى انتوا عاوزينه المهم ربنا يجعل المشوار ده بفايده
على:يارب ياسيف يارب نفسنا بقى نفرح بيه
سيف :ان شاء الله تفرحوا بيه عمر ابن حلال والله وقلبه طيب بس هو عنيد وبيكابر
عارف يا على واحنا فى لندن عمرى ماصاحبت ولا اتعلقت بحد غيره برغم ان طباعنا كانت مختلفه والكل كان مستغرب احنا ازاى اصحاب كده لكن دايما كنت بحسه طيب وكويس هو بس اللى بيحب يرسم الدور
على :كلنا عارفين ان عمر عنيد ودماغه ناشفه ربنا يقدر شمس وتكسرهاله
سيف :ههههههههه ان شاء الله
على:وانت ياسيف مش ناوى انت كمان واللا إيه عاوزين نفرح بيك
سيف :ايه اه ان شاء الله ربنا يسهل
على:طب ايه حاطط عينك على حد واللا تحب اشوفلك واحده قمر كده على ذوقى
سيف :لاء هو بصراحه يعنى مش عارف بس
على :مالك يابنى في ايه بتتلجلج كده ليه فى الكلام
سيف :طب انا حقوم اشوف الشغل
على:لاء ياسيف انا مش حسيبك تقوم تشوف الشغل غير لما تتكلم معايا وتطلع كل اللى جواك
سيف :فى ايه ياعلى مفيش حاجه والله
على :بتحبها اوى كده ياسيف
سيف:هى مين دى اللى بحبها اوى كده
على :اللى مخلياك متلخبط كده ومش على بعضك
سيف :اه ياعلى بحبها اوى
على:وعلى كده بقى هى بتحبك زى مابتحبها
سيف:ماعتقدش هى اصلا متعرفش انى بحبها ولو عرفت معرفش حتقبل مشاعري ليها واللا حترفضها
سيف :معلش هى حتتعبك شويه لحد ماتحس بيك اعذرها هى لسه صغيرة و ملهاش تجارب لكن لما تلاقى انسان بيحبها بالشكل ده اكيد هى كمان حتبادله نفس المشاعر
سيف :انت بتتكلم عن مين ياعلي
على:سيف مش عاوزك تلف وتدور علية عشان مزعلش منك انا بحبك وبحترمك وبقدرك ومش عاوز ثقتي تهتز فيك
واوعى تختبر ذكائى لأنى فاهم كويس اوى وعارف انت بتحب مين
سيف :انا اسف ياعلي
على :اسف على ايه يابنى هو الحب فيه اسف
سيف:اسف على انى حبتها من غير مااستئذنكم
على:هههههه هههههه وربنا انت عسل وهو الحب فيه استئذان ياسيف الحب لما بيدخل مبيخبطش ده بيقتحم مرة واحده من غير استئذان
سيف :بس فى فرق كبير فى الماديات بينى وبينكم انا يادوب موظف عندكم فى الشركه وعندى شقه صحيح فى مكان كويس بس شقه مش فله زى اللى عهد ساكنه فيها
على:انت بتقول ايه ياسيف احنا عمرنا مابنقدر البنى ادم بعنده ايه ومعندوش ايه عهد دى اختى وبنتى اللى ربيتها من وهى عيله صغيرة ياما شيلتها على كتفى ولاعبتها زى مابلاعب مليكه وعمرى ماحلمت ليها بزوج غنى ولا يكون عمده قصور لا لا نهائى انا كل اللى بتمناه لاختي راجل راجل بجد يحبها ويقدرها ويخاف عليها ابقى مطمن عليها وهى معاه انت بتحبها واللا لاء ياسيف
سيف:بحبها وربنا يحبها اوى ومستعد اعمل اى حاجه فى الدنيا عشان اوصل لقلبها
على:طب ولو قلتلك انك حتتعب معاها شويه حتستحمل
سيف :انا مستعد أخوض معركه عشان اكون لها الفارس اللي يستحقها
على :يبقى اتفضل خض المعركه وورينى شطارتك
سيف:على انت بتتكلم جد ورحمةابوك بتتكلم جد
على:ههههههه ورحمة امى وابويا بتكلم جد انا عمري ماحلاقى لعهد احسن منك ياسيف وده شرف لينا قبل مايكون شرف ليك
يقبله سبف من خده:حبيبي ياعلى انا بجد مش عارف اقولك ايه انا فرحان فرحان اوى انا مش مصدق نفسي يعنى انت موافق صح صح واللا انا بحلم
على :يالهوى علية خلصت من إيمان طلعلى سيف هو انا ياربي حيفضل مكتوب علية اعاشر المجانين على طول
سيف هههههه هههههه هههههه مش مصدق نفسي اقسم بالله مامصدق
على:لاصدق يااخويا خلاص واتفضل بقى على شغلك مش ناقصين كلمتين من يزيد الله يباركلك
يخرج سيف من المكتب ليباشر العمل وهو فى قمة سعادته بينما يحادث على نفسه فى الداخل:ربنا يهديكى ياعهد يارب وتشيلي من دماغك الاوهام اللى انت معيشة نفسك فيها وتحسي بالانسان اللى بيحبك بجد
💖💖💖💖💖💖💖💖💖💖
تتجه إيمان الى المكان الذى يعمل به حسن وتسأل عنه زملاءه فيخبرونها عن مكان تواجده فتذهب اليه لتفاجئه بوجودها
إيمان وهى تبحث بعينيها عن حسن فتلمحه من بعيد واقف مع احدى السائحات
يانهارك اسود ومنيل ياحسن بقى هو ده الشغل اللى انت بتشتغله ده انت يومك مش فايت اتشاهد على نفسك ياحلو
تقترب منه فتسمعه يتحدث بالانجليزيه الى تلك السائحه
فيلتفت الى تلك الواقفه وراءه:لا انت تكلمها واحده واحده عشان افهم انت بتقولها ايه بالظبط
حسن:ايمان مش ممكن ايه المفاجأه الحلوة دى
إيمان :دى مفاجأه سوده على دماغك ان شاء الله
حسن:إيمان هو فى ايه مالك وايه اللى جابك فجاة كده طمنينى في ايه
إيمان :جايه عشان اقفشك يابصباص ياابوعين زايغه بتخوننى ياحسن بتخوني من دلوقتى امال لما نتجوز حتعمل ايه
حسن:بخونك هههههههههه بخونك ايه يامجنونه ده شغلى انتى ناسيه انى مرشد سياحي يخربببتك
إيمان :اه بتشتغل مرشد سياحى للسياح كلهم يانور عينى مش لواحده وواقفلي معاها لوحديكم انا عاوزة اعرف انت ازاى تسمح لنفسك تقف ادامها وهى بالمنظر ده
حسن :وانا مالى ياايمان هى لابسه ايه هو انا ححاسبها انا لية شغلي وبس
كانت تتحدث اليه السائحه بالانجليزيه ليوضح لها الأمر
إيمان :لاء تعاليلي انا ياحلوة حلو اوى حتة الفتله اللى انتى لابساها دى ياحلاوة ياولاد ده انت بتشوف كل حاجه بالالوان الطبيعية اهوه اتاريك بتغلبنى على ماتاخد اجازة
حسن :إيمان بطلي تهريج بقى اللى انتى بتعمليه ده مينفعش انتى جايه فى مكان شغلى تعمليلي مشاكل لامن فضلك ياايمان بقى اتفضلي ياللا.
إيمان :بقى كده ياحسن انت بتطردنى عشان خاطر المسلوعه دى طب ايه رايك بقى خلاص انا مش عاوزاك واتفضل اشبع بيها وانسى نهائى حد اسمه ايمان.
وفلحظه قلعت الدبله وحطبتها فى ايده وطلعت تجرى اما حسن كان واقف مذهول من اللى بيحصل مش فاهم ولا مدرك فى ايه وايه اللى حصل ده هو معقول ايمان كانت هنا دلوقتى واتخانقت معايا ومشيت طب هى جايه فين ومع مين أساساً يانهار اسود ومنيل عليكى يابت المجنونه
طبعا ساب السايحه النايحه واقفه مع نفسها وطلع يجري بشورته وفانلته وكابه اللى على راسه ورا المجنونه اللى ربنا وعده بيها دى
انتى يابنى ادمه انتى استنى يازفته الله يخرببيتك بص لقاها دخلت اوتيل طبعا هو عارف الاوتيل كويس ماهو شغله هنا فى شرم وعارف كل شبر فيها
دخل وراها بسرعه بص لقى ناس بينادوا عليها وهى ولا هنا ولا ردت عليهم طلعت جرى وسابتهم
عمر:شمس هى ايمان مالها اخده فى وشها كده ليه هى مش قالتلك انها رايحه لخطيبها
شمس:والله ماعارفه ياعمر فى ايه
فجأة تجد حسن امامها:ازيك ياشمس انتوا بتعملوا ايه هنا فى شرم
شمس:احنا جايين مع البشمهمدس عمر لتنفيذ مشروع تبع الشركه هو انت اتقابلت مع ايمان
حسن:ايوة ورميتلي الدبله وطلعت تجرى
شمس:ايمان لا مش ممكن ازاى ده حصل فهمنىبالراحه ده انا كنت لسه حطلع اشوفها مالها.
حسن :مجنونه حتقولي ايه ربنا رزقنى بواحده مجنونه ليه وليه شافتنى واقف مع واحده من السياح انا عاوز اعرف هى مش عارفه انى زفت مرشد سياحى يبقى في ايه يعنى هى شافت ايه تتفاجئ بيه واقف معاها قدام البحر وقدام الناس كلها فين المشكله تقوم ترميلي الدبله وتطلع تجري كده
عمر:معلش يااستاذ حسن هى إيمان كده تطلع تطلع وتنزل على مفيش هو انت مش عارفها يعنى
حسن مين ده ياشمس
شمس:بشمهندس عمر صاحب الشركه واللى احنا جايين معاه
حسن:اهلا وسهلا يابشمهندس معلش والله كان نفسي اقابلكم فى ظروف احسن من كده بس حقول ايه بقى استغفر الله العظيم ياربي
شمس:بقولك ايه انت تقعد هنا مع البشمهندس عمر وانا طلعالها ومش حنزل غير وهى فى ايدي
يجلس حسن مع عمر ويتحدثان سويا وبالفعل بعد قليل تنزل شمس وفى ايدها إيمان
شمس:حسن ايمان اهيه اتفضلوا بقى عيشوا حياتكم مع بعض
حسن:ينفع التهريج اللى حصل ده ثم ازاى يطاوعك قلبك انك تقلعى الدبله من صوبعك كده
إيمان :ياسلام يعنى عاوزنى كنت اشوف اللى شفته ده واصقفلك مش كده
حسن :يابنتي شغل شغل ياناس افهمها ازاى دى
إيمان :لاء انا مليش دعوة انا مش عاوزاك تشوف حد غيري
حسن:طب مانا مبشوفش حد غيرك ياقلبي
إيمان :ياسلام يابصباص يابوعين زايغه ده انت كنت واقف معاها وعبنك حتطلع عليها
حسن :انا وربنا ماحصل وهو انا فى واحده ممكن تحرك مشاعري غيرك انتى يابيضه يامجنونه ياام شعر اصفر
ايمان:هههههههههه هو فين الشعر الاصفر ده انا شعري اسود وصبغاه اصفر
حسن:وايه يعنى المهم انى شايفه اصفر بحبك ياقدري
إيمان :وانا بحبك يا اخرة صبري
حسن وهو يضع الدبله فى اصبعها:الدبله دى حتطلع مرة واحده بس يوم ماتتنقل على الصوبع اللى فى ايدك الشمال غير كده لاء انتى فاهمه احسن ودينى اولع فيكى يازفته انتى
إيمان :بتحبنى اوى كده ياسونه
حسن:بحبك بس ده انا بعشق امك الله يخرببيتك على بيت اليوم اللى شفت وشك فيه
إيمان :بقى كده طب انا مقموصه
حسن :لا تتقمصي ده ايه طب ده انا حفسحك فسح عمرك مااتفسحتيها فى حياتك
إيمان :بجد ياحسونتى
حسن:طبعا ياروح قلب حسونتك
اما بقى عمر وشمس كانوابيتفرجوا عليهم وعمالين يضحكواعلى منظرهم هما الاتنين ويبصوا لبعض ويضحكوا
وفعلا صدقت ايمان لما قالت ليزيد ان لما عمر وشمس يشوفوها هى وحسن وهما هايمانين مع بعض والحب مولع فى الدرا قلوبهم حتحس بالحب والغيرة
وبدا عمر وشمس يبصوا لبعض ويضحكوا على الاتنين المجانين اللى واقفين عمالين يتغازلوا في بعض وكأنهم فى كوكب لوحديهم
💖💖💖💖💖💖💖💖💖💖💖💖
بصوا بقى ياجماعه انا كتبت الفصل ده وانا تقريبا بجرى وحسه ان حد بيجري ورايا معلش ياحبايبي لو كنت اتاخرت عليكم ظروف والله وقلت وربنا ماحنام ولا يغمضلي جفن غير لما انزلهم البارت الأول معلش بقى لو كان فيه شوية لخبطه اصلي كنت مستعجله اوى وانا بكتبه
بس ان شاء الله البارتالجاى حيعجبكم اوى اوى
ونشوف بقى ايمان ومغامراتها فشرم وياترى الهدف حيتحقق واللا لاء
وحنعرف كمان حاجات كتير عن عمار تمام ياحبايبي ياللا بقى حنشرلكم الفصل بسرعه واخد السرير بالاحضان
💖💖💖💖💖💖💖💖💖💖💖💖
القصه هنا فقط اعمل متابعة ليصلك كل جديد 👇
عشاق الروايات
•تابع الفصل التالي "رواية شمس تتحدي الغيوم" اضغط على اسم الرواية