رواية شمس تتحدي الغيوم الفصل الثالث و العشرون 23 - بقلم عبير سليم
الفصل الثالث والعشرون من رواية شمس تتحدى الغيوم
بقلمي :عبير سليم
💖💖💖💖💖💖💖💖
اما آنت للقلوب أن تعشق وتتذوق طعم الحب والغرام ألم يأت الوقت بعد ليستشعر كل منا برغبته فى الحياة مع من هواه القلب أم سنظل نكذب على قلوبنا ونخفي ماتكنه وتخبئ بداخلها عكس ما تبديه الالسنه
ندعي نكران الحب بينما قلوبنا تنبض به وتصرخ من لوعته
هل عندما يحن علينا القدر ويمنحنا فرصه للحياة هل سنكون طوعه أم سنثور ونعلن الحرب على تلك القلوب التى لا قدرة لها على شئ سوى الخضوع والاعتراف بالحب؟
فيا حب كن رحيما بنا فقلوبنا تعبت من كثرة الآلام وياقدر ان اردت لنا الغرام وكتبت علينا الهوى وقدرت لنا العشق فلتكتبه لمن يستحق تلك القلوب الضعيفه والتى لاتحتمل الآهات
تمرح مع حبيبها الذى هواه قلبها واحست معه بالحب والحنان وتمنح له ولقلبها فرصه للحياة يختطفاها من الزمن ولكن مااتت من أجله لن يتركها هكذا
وهاهى لا تدرى ماذا تفعل اتسخر نفسها فى تلك المهمه التى من المفترض انها جاءت من اجلها ام تترك الجميع يتخبط وتتمتع بتلك اللحظات مع حبيب قلبها
يادى النيله على إيمان وعلى عيشة إيمان السوده هو انا خلفتهم ونسيتهم ياربي طب انا حبلغهم اقولهم ايه دول كمان ده انا معرفش عنهم حاجه من الصبح انا شكلي ورطت نفسي توريطه مايعلم بيها الا ربنا ياربي دول مبيبطلوش رن.
حسن وهو ياتى اليها حاملا اتنين من الايس كريم:خدى ياقلبي احلى ايس كريم لاحلى ايمان فى الدنيا
إيمان :استنى بس ياسونه لما اشوف الخيبه اللى انا فيها دى
ثم تتحدث للموبيل وهو يعلن عن مكالمه من أحدهم :اهدوا علية اما افكر حقولكم ايه انتوا كمان
ثم ترد على سناء :ايوة ياسناء عامله ايه يا قلبي
سناء:جتك ضربه فقلبك ياشيخه انتى ياجذمه مبترديش علية ليه هاه
إيمان :كده بردو بتدعى علية اهون عليكى بردو ياسناء
سناء:حقك علية ياايمان والنبي مااقصد ربنا يحميكى ياحبيبتى بس انا برن على شمس تليفونها مقفول وانتى ياللى تنقصف رقبتك جرس ومبترديش الفار لعب فى عبي
إيمان :فار ايه بس ياخالتى وقطة ايه اطمنى ياحبيبتى شمس فى الموقع والمكان اللى هيا فيه مفيهوش شبكه
واحنا كويسين وزى الفل
سناء:واشمعنى انتى اللى تليفونك فيه شبكه تبقي مش معاها صح سايبه البت وسارحه مع حسن مش كده
إيمان :لا وغلاوتك انا معاها بس لقيت عندى مغص ورحت الحمام لا وحياتك مع حسن ايه بس اسكتى شفتى من كتر نقك حسن قاللى عندى شغل طول النهار واياكى تجيلي شغلى يعنى مفيش قدامى غير شمس اطمنى
سناء :ماشي يا ايمان بس تخللى شمس تسمعنى صوتها انتى فاهمه
إيمان :حاضر حاضر ارحميني بقى ياللا سلام اصلي بكلمك من الحمام وبطنى وجعانى
سناء:جتك الارف مع السلامه يا زفته
حسن:انتى ياست ايمان الايس كريم حيسيح
إيمان :اصبىر لازم أكلم الراس الكبيرة والا هو اللي حيسيح دمى
فتتصل على يزيد:ايوة ياريس
يزيد :انتى مبترديش ليه يازفته
إيمان :كنت برتب حقولك ايه قصدى كنت بفكر يادى النيله بقولكم ايه ماتعبطونيش التانيه لسه مسمعانى قصيدة ردح ارحمونى بقى
يزيد :بقى كده طب ودينى لاجيك اسحبك من قفاكى
ايمان :هههه عيب عليك والله ياعم اصبر بس مانا كتت حكلمك بس انا قلت انك فى الشركه دلوقتى مفيش داعى يعنى ازعجك
يزيد:لا ياحبيبتى عادى وبعدين مانتى طول عمرك بتزعحينى ايه الجديد ياللا قولي ياهانم إيه الاخبار
إيمان :فل الفل قشطه ياباشا
يزيد :اشرحي بالتفصيل
إيمان :اهم فى الموقع هما الاتنين بيشتغلوا تمام
يزيد :وانتى فين بقى تلاقيكى لبده لحبيب القلب. إيمان :استغفرك يارب وأتوب إليك هو مش حضرتك اللى قلتلي اسيبهم لوحدهم مش ده اتفاقنا وادينى سايباهم اهوه اعملكم إيه بس اولعلكم فى نفسي عشان ترتاحوا
يزيد :انتى بتاكلى ياايمان
إيمان :ده حسونتى جايبلي ايس كريم تاخد لحسه
يزيد:ههههههههه ههههههههه اقسم بالله حتعبطينى انا مش عارف انتى معموله من ايه
إيمان :من عسل بزمتك عمرك شفت حد فى حلاوتى
يزيد:بصراحه لاء انت ياباشا مفيش منك اتنين
إيمان :اخجلتم تواضعنا يابرنس والله وبعدين ده انت الباشا ياباشا
فتجد حسن ينظر لها بغضب:اه طب تمام يا بشمهندس كن مطمئن الامور تسير على مايرام وسوف اتصل بك بعد قليل لاوفيك اخر واهم الاخبار
يزيد :ماشي ياايمان تكلميني بالليل فاهمه
إيمان :طبعا يابرنس هو انا بردو ممكن يجيلي نوم قبل مااسمع صوتك وانشكح كده وانت بتهزئنى
تغلق معه الهاتف ليمسكها حسن من كحكتها:وده اسمه ايه بقى ان شاء الله ده ايه الكلام اللى بتقولوه لبعض ده ده انتوا ولا كانكم اتنين صحاب وانا واقف جمبك شبه كوز الدرا
ايمان:الله نفسي فى الدرا المشوي والنبي
حسن:ايمان اتلمى انا محبكيش تهزرى مع حد كده
إيمان :حد مين بس ياحسونتى ده يزيد يعنى اخويا الكبير وهو بيعتبرنى اخته والله
حسن :ماشي ياايمان اما اشوف اخرتها معاكى ايه امشي انجري ادامى
إيمان :ايه حتودينى فين اوعى تكون حتشربني حاحه اصفرا
حسن :ياريت واخطفك بقى
إيمان :بس ياقليل الأدب
حسن :بصي نيتك وحشه ازاى ده انا عاوز اخطفك عشان نتفسح ونلعب ومحدش يضايقنا ولا يزعجنا وخصوصا ام التليفون ده اللى انا عاوز اكسره
إيمان :معلش ياسونه اصل الجماعه عاوزين يطمنوا
حسن :وملقوش غيرك ياقلبي ده انتى عاوزة اللى ياخد باله منك
إيمان :لاء اوعى ده انا اعجبك اوى
حسن:مانتى عجبانى على طول ياقلب حسن
إيمان :بجد ياحسن
حسن:قولي تانى كده
إيمان :اقول ايه
حسن:قولي حسن
إيمان :حسن هههههههههه
حسن:يالهوي تعالي الحقينى يااما احلى حسن فى الدنيا
ثم ياخذها من يديها ويجرون
إيمان :على فين واخدنى ياسونه
حسن:حاكلك ياقلب سونه
إيمان :هو ده الكلام ياقلبي
🌺 في الموقع الكل يعمل بكل جد ونشاط والجميع يعمل على قدم وساق وكانت شمس تتحرك بين العمال بخفه وكأنها فراشه تتنقل بين الأزهار لتمتص رحيقها وتحولها عسلا لذيذا يشفي من الأمراض
كانت أعين عمر لا تغفل عنها لحظه واحده كان يعمل هو الآخر ويختلف معها احيانا ويتفق معها أحيانآ اخرى
كل ثانيه تمر عليهما وهما معا بالموقع كان يتفحصها بشكل اكبر وادق كان يندهش من طريقة تعاملها مع العمال فقد كانت تجمع بين الشده والانضباط وعدم السماح بالتقصير وبين الليونه والتسامح والابتسامه الجميله وكلمة الشكر التى تجعل الكل يخضع لاوامرها بكل حب وليس بكره
يأتى إليهم عمار فيلمحه عمر
عمار:بشمهندس عمر ممكن تتفضل انت والبشمهندسه شمس عشان الغدا
عمر:ايوة بس احنا لسه مخلصناش شغل
عمار:انا شايف ماشاء الله العمال شغالين كويس ومش مقصرين ده النهارده اول يوم وانجزوا بشكل كبير
عمر:شمس
شمس:ايوة يابشمنهندس خير
عمار:الغدا جاهز ياشمس ياللا عشان تاكلوا
شمس :طب وايمان فين
عمر:بتسألى سؤال غير منطقى اكيد طبعا مع حسن
شمس :ههههههههه دى مش حتسيبه
يذهب عمر وشمس بصحبة عمار الى الاوتيل ليتناولا الغداء
عمار:تحبي تاكلى ايه ياشمس
شمس:اى حاجه يابشمهندس
عمار:وانت يابشمهندس تحب تاكل ايه
عمر:اى حاجه بردوا
عمار:تمام يبقى حطلبلكم اكلة سمك وحمبري تحفه حتعجبكم اوى
يأتى الطعام ويبداون فى تناوله وكان عمار يفتح الكثير من الموضوعات وكانت شمس ترد بكل ادب واحترام وكان عمر ايضا يشاركهم الحوار ولكنه كان يتضايق كلما رأى نظرة اعجاب من عمار تجاه شمس
وعلى قدر ماهو سعيد بهذا المكان الذى يجمع بينهم بعيدا عن جو الشركه بقدر مايتمنى ان ياخذها بعيدا عن هذا المكان الذى يوجد به عمار فهو لا يطيق نظرة واحده من عمار تجاهها
عمار:انتى بطلتى تاكلى ليه ياشمس لو الأكل مش عاجبك اجيبلك حاجه تانيه
شمس:شبعت والله الحمد لله وبعدين الاكل حلو اوى
عمار:شبعتى ازاى انتى ماكلتيش حاجه
عمر:ماهى قالتلك شبعت يابشمهندس وبعدين سيبها على راحتها شمس اكلتها كده
فتنظر له شمس وكأنها تتعجب من كونه يذكر شيئا عنها لا يعرفه ولكنها لا ترد
عمار:ايه رايك بقى فشرم ياشمس عجبتك
شمس :طبعا أكيد الطبيعه جميله أوى
عمار:انتوا ممكن تخلصوا شغل فى الموقع وافسحكم احلى فسح
عمر:شكرا مش عاوزين نتعب حضرتك انا حافظ شرم وحبقى اخدهم وهى وإيمان وافسحهم
عمار:تمام اللى يريحكم مفيش مشكله
كانت شمس متعحبه من الطريقه التى يتحدث بها عمر تجاه عمار.
وفجأة يجدونها امامهم:هلو هلو ازيكم وحشتونى
عمار:هههههههههه اللى لقى احبابه نسى اصحابه ياايمان
إيمان وهى تجلس معهم:احبابه بس قول حياته كلها يابشمهندس
عمار:ياعينى عالحب وعمايله
إيمان :طبعا الحب جميل احلى حاجه فى الدنيا
عمار:طبعا هو فى احلى من الحب واللا انتى ايه رايك ياشمس
فتسكت شمس ولاترد
عمر:غريبه يعنى يامونى اول مرة تشوفى الاكل ومتاكليش
إيمان :شبعانه الواد حسن عزمنى على الغدا واكلت نفس اللى
انتوا بتاكلوه ده
شمس :بألف هنا يا حبيبتي
إيمان :إيه الاخبار الشغل ماشي كويس
شمس :ايوة الحمد لله
اخذوا يتبادلون الحديث فى عدة موضوعات تخص المشروع وبعض الموضوعات العامه وكان معظم كلام عمار يوجهه لشمس مما كان هذا الامر يثير الغيرة من عمر يود لو تنشق الارض وتبتلع عمار
🌺🌺🌺🌺🌺🌺🌺🌺🌺🌺🌺🌺
على شاطئ البحر بالإسكندرية
حنين :عهد انا عاوزة اقولك حاجه وخايفه تزعلى منى
عهد :انا مش ممكن ازعل منك ياحبيبتى قولي يانونه عاوزة إيه
حنين :عاوزة ارجع الجيم عند كمال
عهد :ياربي عليكى ياحنين تانى حنعيده تانى
حنين :وحشنى اوى ياعهد نفسي اشوفه
عهد:بس انتى موحشتيهوش ياحنين بدليل انه حتى لا أهتم ولا اتصل بينا يعرف احنا مبقناش نروح عنده ليه
يبقى ليه نذل نفسنا كده حنين ياقلبي انتى زى القمر وفي شباب كتير فى الكليه يتمنوا نظرة منك ليه ده اشمعنى ده
حنين :معرفش ياعهد بحبه هبله مجنونه معرفش بحبه وخلاص
عهد :طب ممكن تدي لنفسك فرصه بس يمكن تقدرى تنسيه
هى اى حاجه فى اولها بتبقى صعبه وبعد كده بنتعود
حنين :تفتكري ياعهد طب وانتى اخبارك ايه مع عمر
عهد :سافر شرم امبارح
حنين :لوحده
عهد:معرفش عنده شغل تبع الشركه
حنين :ومفيش جديد
عهد :امبارح قبل مايمشي اتكلم معايا وقاللى انى اجمل بنوته
حنين :ايه التقدم ده كله
عهد :مكدبش عليكى انا كنت طايرة من الفرحه بس خايفه تكون مجامله منه مش اكتر
حنين:طب وبعدين حتعملي ايه
عهد :حعمل ايه يعنى ادينى حقعد معاكى ونقعدوا نعيطوا على حظنا
حنين :طب ياللا نروح احنا بقالنا فترة ماشيين رجلى وجعتنى
🌺🌺🌺🌺🌺🌺🌺🌺
يحل الليل وتقف فى الفرانده وتتامل جمال الطبيعه ثم تلقى نظرة على الفراش لتجد ايمان نائمه
شمس:ايمان مونى
إيمان :ايه ياشمس عاوزة ايه ياقلبي
شمس:بقولك ايه ماتيجى ننزل نتمشى تحت شويه الجو جميل
ايمان :لا يااختى انا الشمس ضربت فى دماغى وعاوزة انام مش قادرة
شمس:طب انا حنزل شويه
إيمان :انزلي براحتك وطفى النور
ترتدي فستانا رقيقا وتترك لشعرها العنان وتنزل
تأخذها قدماها الى البحر فتجد نفسها امامه تنظر اليه وتكاد الدموع ان تجري فى عينيها عندما راودها الماضي ببعض الذكريات التى يحملها وعندما تذكرت كلمة عمار لها وسؤاله عن رأيها فى الحب فبم كانت ستجيب عليه ماذا كانت ستقول له اتقول له انه اذاقها كاس المرارة وانها لم تكره فى حياتها سوى كلمة الحب التى اوصلتها لما هى فيه الآن؟
وفجأة تجد من يتحدث اليها: إيه اللى نزلك دلوقتى يا شمس
تلتفت شمس اليه:لقيت نفسي زهقانه قلت انزل اتمشى شويه
🌺يقوم من نومه على تليفون منها:فى ايه حصلكم حاجه
إيمان :هههههه هههههه هههههه حصل وربنا حصل
يزيد :ازاى وامتى وفين انطقى
إيمان :قاعدين دلوقتى عالبحر ياباشا مفيش قدامهم غير الميا والسما
يزيد:ازاى ده حصل احكيلي ياتحفه
ايمان :هى قالتلى انها زهقانه وعاوزة تنزل وانا قلتلها انا عاوزة انام بعد مانزلت انا بينى وبينك قلقت عليها لبست بسرعه وقلت اروحلها
بس لسه نازله لقيتلك صاحبك شافها وخرج وراها انا طبعا مكدبتش خرج ومشيت وراهم من غير مايحسوا بية ودلوقتى هما الاتنين قاعدين مع بعض عالبحر
وانا رجعت بسرعه قبل مايلمحونى وقلت وربنا ماحنام غير لما افرحك ياباشا
يزيد:فرحتينى ياايمان منحرمش منك يامونتى
إيمان :اى خدمه ماشي ياباشا
يزيد:بقولك
ايمان:من غير ما تقول وربنا الصبح حيكون عندك اخر الاخبار
تصبح على خير يا بشمهندس
يزيد :وانتى من اهل الخير ياست البنات
عاليه :شكل المكالمه كده بتقول فى اخبار حلوة
يزيد :والله مافى حد حلو غيرك ياقلبي
عاليه :حبيبي ربنا يخليك لية يارب
يزيد :ويخليكى لية ياست الستات
عاليه:بس ايمان دى مجنونه اوى يعنى مكنتش عارفه تستنى تكلمك الصبح انا والله قلقت لما لقيت تليفونك بيرن
يزيد :ليه بس ياروحى
عاليه:طول عمرى بقلق اوي من تليفونات الصبح بدري وبالليل متأخر
يزيد :معلش يا روحى مانتى عارفاها مجنونه وهى كانت عاوزة تفرحنى
عاليه :ياااه للدرجه دى الموضوع ده فارق معاك اوى كده
يزيد :اوى ياعاليه عارفه ليه لانى متاكد من ان عمر بيحبها ودى اول مرة عمر يحب فحياته ومفيش واحده حتقدر تخليه يتغير ويعيش الحب غير شمس
عاليه :ربنا يكتبلهم الخير يا رب
يزيد :انتى قمتى ليه رايحه فين
عاليه :حروح ابص على بنتك
يزيد :لاء خليكى انتى انا اللى حروح وبالمرة اطمن على انس
يتحه الى غرفة ابنته فلا يجدها
فيتجه لغرفة انس فيسمع صوتها بداخل حجرته فيستمع الى مايتحدثان به فيسمعها تتلو ايات من الذكر الحكيم وانس يصحح لها بعض الكلمات التى تنطقها خطأ
انس:بصي على التشكيل وانتى بتقولى ياعشق
عشق:حاضر ياانس بس الكلمات صعبه علية
أنس :لا باحبيبتى واعملى حسابك بعد مااخف حنروح دار بتحفظ القران
عشق:بس بابي مش حيوافق ياانس
لاء حوافق ياعشقى اى حاجه يطلبها انس حوافق عليها
أنس وهو غير مصدق:بجد ياخالو بجد
يزيد :ايوة بجد ياحبيبي لأن كل يوم بيمر بتاكد فيه ان كل كلمه بيقولها جدك فى حقك صح انت راجل ياانس وانا عمرى ماحخاف على عشق وهى معاك
انس :ياحبيبي ياخالو انا بحبك اوى
يزيد :وانا كمان بحبك اوى ياحبيبي بس عاوزك توعدنى وعد ماتخالفهوش ابدا
أنس :حاضر ياخالو انا اوعدك باى حاجه
يزيد:عاوزك توعدنى انك تخللى بالك من عشق وتفضل تحبها وتحافظ عليها ومتزعلهاش فيوم من الايام ومشوفش فى عينها فى يوم دمعه واحده
أنس :حاضر يا خالو اوعدك ان عشق حتكون سعيده واسعد واحده فى الدنيا كلها
فيجدون من يتحدث خلفهم:وانا متاكد انك حتنفذ وعدك ياانس
يزيد:بابا
شاكر:ايوة ياحبيبي قمت عشان استعد لصلاة الفجر سمعت صوتكم
يزيد :بابا هو حضرتك كويس
شاكر:طول ماانتو كويسين انا لازم اكون كويس
ياللا حسيبكم بقى عشان اروح اصلي
تخرج عشق مع ابيها وتتجه الى غرفتها وتنام امام عيناه ويضع قبله على جبينها ويتجه لحبيبته فياخذها في احضانه ويستكمل نومه وقد بدات السكينه تدخل قلبه
🌺يتحدثان وشعرها الأسود يتطاير على وجهها :الجو هنا جميل اوى ومنطر البحر بالليل تحفه
عمر:انتى عمرك ماجيتى شرم قبل كده
شمس :انا عمري ماخرجت برة اسكندريه
عمر:ملكيش صحاب غير ايمان
شمس :لاء إيمان هى صاحبتى الوحيده حبيبتى وكل دنيتى
عمر:وهى كمان بتحبك اوى
شمس :عارفه مفيش حد فى الدنيا زى ايمان ياريت كل الناس زيها
عمر:فعلا انا فى الاول كنت بتضايق منها لكن بعد كده ربنا يعلم بقيت بعزها اوى
شمس :ايمان مينفعش حد يزعل منها دى جواها حنان يكفى الدنيا كلها
عمر :بقولك ايه تيجى نقعد على الرمله شويه
شمس :مفيش مشكله
يفترشان الرمل وتحاول شمس ان تلم فستانها حولها جيدا حتى لا تنكشف ساقيها
شمس :بس ايه اللى نزلك انت كمان فى الوقت ده؟
عمر:بصراحه انا كنت فى الفرانده قاعد زهقان بردو قلت انزل الريسيبشن اشرب حاجه لمحتك وانتى خارجه لقيتنى خرجت وراكى مش عارف ليه حسيت انى قلقت عليكي
شمس:قلقت علية
عمر:ايوة ياشمس قلقت عليكى انتى ليه مستغربه كده
شمس :اصل انا محدش عمره قلق علية غير خالتو وإيمان بس
عمر:انتى باباكى موجود ياشمس
شمس :موجود ومش موجود
عمر:مسافر يعنى
شمس :لاء هو بعد وفاة ماما اتجوز والدنيا اخدته ومشاكل ولاده نسته ان فى بنت ليه اسمها شمس
عمر:انا كمان والدتى متوفيه
شمس :امال طنط هاله مش مامتك
عمر:هاله مش ام حد فينا احنا امنا ماتت واحنا صغيرين وبابا اتجوزها
شمس :معقوله دى انا طول عمرى فاكراها مامتكم عمري ماشكيت انها ممكن متكونش مامتكم
عمر:ليه يعنى
شمس:يعنى دايما لما بسمع البشمهندس يزيد بيكلمها بسمعه يقولها ماما ولما بتيجى سيرتها بيذكرها بكل خير وبحسه بيحبها اوى فعادى اعتقدت انها مامتكم
عمر:يزيد ومروة بينادوها بماما
شمس :وانت بتناديها بايه
عمر:ولا حاجه انا مبكلمهاش اصلا
شمس :ليه مبتكلمهاش ليه انتوا زعلانين مع بعض
عمر:انا عمرى ماتقبلت وجودها فى حياتنا عمرى ماتقبلت فكرة ان بابا يتجوز غير ماما
مفيش حد زى ماما ابدا ولا ممكن اى ست فى الدنيا مهما كانت طيبتها تاخد مكانها ابدا انا عارف انها طيبه ومتاكد من ده كويس وعارف انها بتحبنا وبتخاف علينا كمان وعمرها ماقصرت فى حاجه تخصنا لكن غصب عنى مش بايدي قلبي رافض وجودها فى حياتنا مش قادر اتقبلها ابدا
شمس:بس ده غلط مش صح يابشمهندس
عمر:غصب عنى كل مااشوفها واخده مكان ماما فحياتنا كل مااشوف بابا وهو بيعاملها نفس المعامله اللى كان بيعاملها لامى قلبي يوجعنى أوى
شمس :بس هى ملهاش ذنب عشان تكرهها بالعكس انت المفروض تفرح ان ربنا قدر باباكم واتجوز انسانه كويسه حبتكم وربتكم مش كده واللا ايه يابشمهندس؟
عمر:شمس ممكن اطلب منك طلب
شمس:اتفضل يابشمهندس
عمر:ممكن تنادينى عمر من غير القاب
شمس :بس
عمر:من غير بس انا عاوز اخد راحتى معاكى فى الكلام نفسي نبقى اصدقاء تقبلينى اكون صديق ليكى ياشمس
شمس :طبعا اقبل ده شئ بشرفنى يا بش
عمر:يا ايه
شمس:ياعمر
عمر :هههههههههه ايوة كده قوليلي بقى ياشمس ايه اللى غلط من وجهة نظرك
شمس:طريقة التفكير اللي بتفكر بيها هى اللى غلط ياعمر
عمر:ليه ياشمس هو انا مش من حقى انى ارفض وجود حد عاوز ياخد مكان امى
شمس:محدش بياخد مكان حد ياعمر كل واحد ليه مكانه الخاص بيه يعنى مثلا شوف علاقتك باخوك ازاى وبيحبك ازاى لكن اكيد علاقته بمراته مختلفه طب هل ممكن حد فيكم ياخد مكان التانى استحاله لان كل واحد فيكم ليه مكانه غير التانى
لكن ربنا سبحانه وتعالى بيقدر الامور احسن مننا بكتير وهو اللى عالم بحالنا مين فين مكنش نفسه يكبر ويتربى فى حضن امه وابوه لكن ده قدر ربنا منقدرش نعترض لازم نفهم ده كويس ونحمد ربنا انه وضع فى طريقنا ناس تعوضنا يعنى انا مثلا لولا خالتى تقدر تقوللى كنت حعمل ايه حعيش ازاى هل كنت ممكن ابقى البشمهندسه شمس واللا كان حيبقى اخري اخد دبلوم واقعد خدامه لمراة بابا وولادها اللى عمرهم مااعتبرونى اختهم
لكن الحمد لله ربنا عوصنى بالقلب الحنين اللى خاف علية ويحافظ علية واديك شفت بنفسك اما كلمتك عشان تامنك علية يبقى ربنا بيعوض واللا لاء
وانت كمان ياعمر نفترض ان باباك اتجوز واحده مش كويسه مش كانت ممكن تفرق بينكم وبين ابوكم وتعمل مشاكل جامده فحياتكم لكن بالعكس دى بتحبكم اوى وانا شفت ده وحسيته يوم ماجيت عندكم البيت حبها للكل باين في عيونها اللى بتشع طيبه
انا مش قصدي انك تنسى مامتك بالعكس افتكرها ادعيلها ربنا طلع صدقه ليها هو ده حبك الحقيقي ليها لكن الست اللى صانتكم وحبتكم واعتبرتكم ولادها ليها حق كبير اوى عليكم
عمر:انتى ازاى كده
شمس :ازاى كده ازاى يعنى
عمر:كلامك بيمس القلب أوى
شمس:عشان انا مش بنافقك ياعمر انا بقول اللى قلبي حاسس بيه
أخذوا يتحدثون فى عدة موضوعات متفرفه ياخذهم الكلام حتى يجدون نور النهار اضاء كل مكان
شمس:ياااه ده النهار طلع واحنا قاعدين
عمر:الوقت جرى بسرعه من غير مانحس
شمس:فعلا ده زمان ايمان صحيت من من النوم وبتدور علية
عمر:طب انتى منمتيش حتروحى الموقع ازاى
شمس :لا ياعمر متقلقش احنا جامدين اوى هو دش وفنجان فهوة والدنيا حتبقى تمام وبعد مانخلص شغل ابقى ارتاح شويه ان شاء الله
عمر وهو ينظر لها باعجاب:تمام ياللا بينا يقف سريعا ويمد لها يده ليمسك بيديها فتحرج بشده ولكنها تجد نفسها تلقائيا تمد له يدها:تقف امامه فتلتقى اعينهم معا تعلن عن بداية ماتحمله القلوب ثوانى تمر عليهم وهما ينظران لبعضهما دون اى كلمه تخرج من افواههم
شمس:مش ياللا
عمر:اه طبعا ياللا بينا
بينما فى الأعلى تتحدث الى يزيد :صباح الفل ياباشا صحابك لسه مرجعوش لحد دلوقتي
يزيد :انتى بتتكلمى جد
إيمان :اه وربنا ده انا عينيه غمضت شويه وقمت وهما لسه مجوش بس انا من شويه نزلت اتسحبت اه ماخفت يكون عمل في البت حاجه بتاع بلاد برة ده
يزيد :احترمى نفسك يازفته
إيمان :لا بصراحه طلع محترم نزلت واتسحبت بالراحه بصيت عليهم من بعيد لقيتهم قاعدين عالرمله بيتكلموا وشايفه الضحكه على وشوشهم من الودن دى للودن دى
فرجعت بسرعه قبل مايلمحونى وقلت لازم اقولك اخر الأخبار
يزيد :لاء بصراحه خبرحلو عالصبح
تجد ايمان شمس تفتح الباب :طب ياحسونتى ماشي ياروح قلبي شويه بس وحكلمك سلاموياقلبي
فيفهم يزيد بقدوم شمس إليها :طيب ماشي ياايمان سلام
ايمان :كنتى فين ياشمس ده انا كنت نازله ادور عليكى
شمس:كنت على البحر قاعده مع عمر
إيمان :عمر هو بقى عمر
شمس:اه اصله طلب نكون اصدقاء
إيمان :وماله اصدقاء اصدقاء ميضرش
شمس :بقولك ايه انا حاخد دش وننزل نشرب قهوة ونطلع عالموقع
إيمان :تمام ياقلبي
بينما فى الاسفل كان عمر يجلس فى الريسيبشن يشرب كوبا من القهوة
فيجد عمار امامه:صباح الخير
عمر:صباح النور يابشمهندس
عمار:يارب تكونوا مبسوطين معانا
عمر:اه الحمد لله اهم حاجه الشغل يتظبط عشان نرجع
عمار:ايوة بس الكلام ده لسه سابق لأ وانه انتوا عارفين اننا حنحتاج وجودكم حوالى شهر تقريبا
عمر:مااحنا اكيد مش حنمشي غير لما نطمن على الشغل يابشمهندس
عمار:ربنا يوفقكم أن شاء الله امال شمس منزلتش ليه لحد دلوقتي
عمر:حضرتك ممكن يكون التعامل معايا انا وملكش دعوة بشمس
عمار:مش فاهم تقصد إيه
عمر:مقصدش حاجه شمس بتريح شويه ونازله دلوقتى انا حروح الموقع وحظبط الشغل لحد هى ماتيجى براحتها تمام كده واللا عندك مشكله
عمار:مفيش مشكله ولاحاجه انا اهم حاجه عندي الشغل
بس فى حاجه كنت عاوز اتكلم معاك فيها
عمر:اتفضل يابشمهندس
عمار:انا ملاحظ ان عندك مشكله فى التعامل معايا ممكن اعرف السبب
عمر:لا طبعا مفيش حاجه كده خالص حضرتك ليك كل احترام وتقدير
عمار:ههههههههه عيب يابشمهندس انا مش صغير انا اكبرمنك يمكن بحوالى عشر سنين وعارف كويس اوى ايه اللى انت حاسس بيه
عمر:انا مش فاهم حضرتك تقصد ايه
عمار:اقصد ان عيونك فضحاك يابشمهندس والحب باين فيهم اوى وهى بصراحه تستحق الحب ده
وانا لو كان بايدي او كان ينفع كنت احارب الدنيا كلها علشانها لكن للأسف مينفعش نهائى
وفجأة يجدون من يتحدثان خلفهم :صباح الخير
فيرد عمر وعمار:صباح النور
عمر:ايه اللى نزلك دلوقتى ياشمس اطلعى استريحى انتى وانا حروح الموقع
شمس :لا والله انا مش تعبانه انا زى القرده اهوه
عمار:ياااه لو كل القرود حلوين كده وينظر لعمر فيجد الشرار يتطاير من عيونه
عمار:مونى عامله ايه ياقمر ناويه على ايه النهارده ان شاء الله
إيمان بقمصه :حروح معاهم الموقع
عمار:ليه يعنى طب وخطيبك
إيمان :قلبنى قاللى عندى شغل ياما النهارده ومش فاضيلك
عمر:طب وانتى مقموصه كده ليه يامونى
إيمان :كنت عاوزاه يفسحنى ياعمر مش انا ممكن اقولك ياعمر بردو
ففهم عمر ان شمس حكت لها :طبعا يامونى انتى تقولي اللى انتى عاوزاه ده انا حتى اول مرة اعرف ان اسمى حلو كده
إيمان :ايه العسل ده ياناس لا ده احنا اتغيرنا خالص
عمار:تمام ياجماعه انا عندى مشوار حروحه ونتقابل بالليل ان شاء الله
عمر:بالليل ليه مش حنتقابل عالغدا
عمار:حروح المطار استقبل ناس مهمه ونتقابل بالليل ان
شاء الله
يتوجه عمر وشمس وايمان للموقع حيث يجدون العمال يبدا كل منهم في العمل وتجلس شمس وعمر تحت المظله لرؤية التصميمات والتاكد من دقة الزوابا بينما كانت ايمان غاضبه من حسن
يقف عمار فى المطار ينتظر قدوم شحص ما
عمار:حمد الله على السلامه
_الله يسلمك مكنش فى داعى تسيب شغلك وتتعب نفسك وتيجى
عمار:وانا عمر حاجه فى الدنيا اخرتنى عنك
_اخبارك ايه والمشروع الجديد اشتغلتوا فيه واللا لسه
عمار :الحمد لله كله تمام والمشروع بدانا فيه من امبارح الصبح وفى خلال ٣شهور حيكون جاهز بامر الله
_طيب كويس
عمار:ماسه اخبارها إيه
_كويسه عندها امتحانات الشهر الجاي حتخلص وتنزل مصر ان شاء الله
عمار:ان شاء الله
_خليك انت ارتاح وانا اسوق
عمار وهو يعلم مغزى الكلام :انا كويس الحمد لله وبعرف اسوق كويس وبعرف اعمل كل حاجه كويس انا لسه واقف على رجلية ولسه مجاش الاوان انى اضرب بالنار زى خيل الحكومه
_ليه كل كده انا مقصدتش حاجه انا كنت بدور على راحتك مش اكتر
عمار:راحتى اه يمكن ثم يتحرك بالسيارة تجاه الاوتيل
🌺🌺🌺🌺🌺🌺🌺🌺🌺🌺🌺
فى ال
•تابع الفصل التالي "رواية شمس تتحدي الغيوم" اضغط على اسم الرواية