رواية شمس تتحدي الغيوم الفصل الرابع و العشرون 24 - بقلم عبير سليم
الفصل الرابع والعشرون من رواية شمس تتحدى الغيوم
بقلمي :عبير سليم
🌺🌺🌺🌺🌺🌺🌺🌺
يالها من مفاجأة غير متوقعه زوجته احقا يمتلك زوجه لماذا لم يقل من قبل؟
ليس مهم المهم انه لديه زوجه بالفعل ويالها من زوجه، فهى امرأة بكل ما تحمل الكلمه من معنى تمتلك كل مقومات الجمال واقل مايقال عنها انها أميرة هبطت من الاساطير اليونانية.
ولكن هل من عاقل يمتلك امرأة كهذه وعيناه تنظر لغيرها فلا بد وان تعمى عن جميع النساء.
فلم اذن تلك النظرات والاعجاب الكامن بعينيه ولقد صرح بالصباح بأنه لو باستطاعته لسعى وراءها بلادا وبلاد ولكنه لايستطيع نعم بالفعل لا يستطيع فكيف يستطيع ذلك وهو لديه انثى نعم انثى فضحكتها وصوتها يشعان ويبعثان البهجه فى المكان
تدور الكثير والكثير من الافكار فى عقله ويجد نفسه يبتسم ووجهه يضحك دون شعور منه بذلك ولما لا وقد تيقن من انه لن ينافسه على حب شمس.
حب اتقل حب ماهذا الذى تقوله ايها الرجل الم تقل انك لن تمنح لقلبك الفرصه لأن يخضع لأى حب ولن يسمح لأى امرأة ان تمتلك ذلك القلب؟ .
نعم قلت ذلك ولكنها الشمس التى اضاءت حياتى ففى قلبها من الحنان ماجعلنى احبها رغما عنى لم اقصد ولم اتعمد ولم يسع قلبي لذلك انما تسلل حبها بداخلى دون أشعر
شمس بالفعل شمس تسلل نورها بداخلي رويدا رويدا حتى شع النور وطغى على كل شي سواها.
يالك من سعيد الحظ ياقلبي ولكن مهلا لا تسمح لقلبك بالتوغل فى تلك الاحاسيس قبل معرفة مشاعرها فقد تكون مازالت تعشق ذلك الوغد الذى تركها قبل الفرح ياله من حظ سعيد فانا اريد أن أذهب إليه واشكره على تلك الفعله التى فعلها ليتركها لى و تكون من حظى أنا .
تجلس معهم وابتسامتها لا تغادر وجهها الأبيض الذى يشع نورا وحيويه وضحكتها التى تعكس أنوثتها تفرض سيطرتها على ذلك المكان. لم تنزل عينا زوجها عنها وكأنه يريد ان يمتع نفسه بتلك الضحكات التى قد حرم منها منذ سنوات.
مش ممكن يامونى دمك زى العسل انتى ملكيش حل
إيمان :انتى كمان دمك سكر ياشوشو ثم تنظر لعمار :شكلك كده جوزائيه زيي واللا إيه
أشرقت :أيوة انا جوزاء ياروحى
إيمان :سبحان الله القلوب بتتقابل ياقلبي
سهرة سعيده تجمع بينهم حوارات متعدده بين الجميع وكانت السهرة لا تخلو من روح الفكاهه التى تضيف للمكان بهجه والتى كانت مصدرها إيمان.
بينما كان عمر يختلس النظرات لشمس وكانت السعاده تملاء قلبه كلما راها تضحك
تنتهى الليله ويصعد كل منهم الى غرفته ويذهب حسن الى المكان الذى يقيم فيه استعدادا ليوم الغد الذى وعدهم به.
🌺🌺🌺🌺🌺🌺🌺🌺🌺
فى غرفة شمس وايمان
إيمان :شفتى مراة عمار يابت ياشمس يالهوى عالجمال هو فى كده
شمس :هى فعلا امورة أوى ماشاء الله عليها
إيمان :وشها بينور لوحده دى حاجه كده ملهاش حل.
شمس :ههههههههه ماشي ياتحفه طب ياللا بقى نامى عشان حبيبك حيصحينا من الفجر
إيمان :بس واضح ان عمار بيحبها اوى عينه منزلتش من عليها طول السهرة.
شمس :مش مراته يابنتى
إيمان :بس اذاكنت انا نفسي اللى ست زيها كنت ببصلها كل شويه مابالك بقى بجوزها ده المنيل حسن لقيت بيبصلها ضربته ضربه فرجله حط وشه فى الأرض لحد ماقاموا.
شمس :يامفتريه ده الواد طيب وبيحبك
إيمان :اه بس ميمنعش بردو انهم يبصوا يابنتى ده داء، فيهم يموتوا لو مبصوش بس بينى وبينك هى يتبصلها
شمس وهى تتثاءب:بقولك ايه انا حنام تصبحي على خير
إيمان :وانتى من أهل الخير يا قلبي.
تنظر اليها حتى تجدها ذهبت فى سبات عميق فتاخذ هاتفها وتخرج من الغرفه من اجل التقرير اليومى
فيرد عليها :مونى مستنيكى تتصلي يابطه
إيمان :اليك اهم واخر الأخبار
يزيد :قولي ياللا طمنيني
إيمان :اسكت اسكت مش طلع متجوز
يزيد :هو مين ده يابت اللى طلع متجوز
إيمان :عمر
يزيد:ايه
إيمان :ييه معلش معلش غلطت عمار اقصد عمار طلع متجوز
يزيد :الله يخرببيتك ياشيخه خضيتينى
إيمان :سلامتك من الخضه ياباشا معلش بقى اصلكم لغبطونى والله.
يزيد :طب وايه المشكله مااكيد متجوز؟
إيمان :اصله مكنش باين عليه السهون ده ولا جاب سيرة بصينا لقيناه داخل علينا وفى ايده واحده بس إيه مش قادرة اقولك يالهوى تقول للقمر لا قمر ايه دى تقول للقمر والشمس والنجوم بص المجرة كلها بالكواكب المحيطه قوموا كده كلكم وانا اقعد مطرحكم ياحبايبي.
يزيد :ههههههه يخرببيت فقرك ماتقولى حلوه وخلاص
إيمان :لاحلوة ايه دى رهيبه يخرببيتها عقدت الواحد فى شكله انا من ساعة ماشفتها وانا عاوزة اولع فى نفسي.
يزيد:ليه بس يامونى مانتى زى القمر وكفايه دمك اللى زى العسل
إيمان :لا مانا مقولتلكش ماهى بردو دمها زى العسل اصلها طلعت برج الجوزاء زيي.
يزيد :ههههههههه ماشي ياستى المهم بس سيبك من كل ده وطمنينى الاخبار ايه
إيمان :قشطه ياباشا واحنا تحت دلوقتى مبطلوش كلام وصاحبك عينه منزلتش من عليها طبعا هو فاكر محدش واخد باله بس على مين ده انا مراقباه
واللا وهى بتاكل كان الود وده يقوم يأكلها بايده.
يزيد :وشمس ياايمان ايه الاخبار عندها؟
إيمان :بص هى لحد دلوقتي بتحاول تبان ان مفيش حاجه فى دماغها لكن بكرة ان شاء الله حيبقى يوم عالمى والحجر حينطق بأمر الله.
يزيد :ليه ايه اللي حيحصل بكرة؟
إيمان :بكرة ان شاء الله الواد حسن اه بس الجذمه لما اشوفه حخزقله عنيه
يزيد :ليه بس عملك ايه مش الراجل اكلك ايس كريم
ايمان :عينه كانت حتطلع على مراة عمار
يزيد :ياسلام على اساس انه مش عايش فى وسط الاجانب واكيد طول اليوم بيبص يعنى وعايش حياته
ايمان :لما يبقى من ورايا وانا عامله نفسي نايمه حاجه ولما يكون قدامى يبقى حاجه تانيه ده يومه اسود بكرة بس سيبك انت المهم انه حيفسحنا فى شرم وحنقضى اليوم كله برة اظنى بقى مفيش احسن من كده
يزيد :تمام ياباشا ومش حوصيكى بقى
إيمان :يالهوى انا باشا ده انت اللى باشا ياباشا
بقولك ايه ياللا بقى سلام انا بكلمك من قدام الأوضة احسن حد يسمعنى
يزيد :سلام ياستى ومتنسيش
إيمان :عيب عليك يابشبوشتى حكلمك طبعا.
يغلق معها فيجد عاليه تتحدث اليه :خلاص ايمان بلغتك التقرير اليومى
يزيد :اه تمام ياروحى تعالي بقى نامى فحضنى
تنهى المكالمه معه وتستدير لترجع للغرفه فتجده أمامها:ياساتر يارب طب اتنحنح كح اعمل اي حاجه مش كده يعنى حرام عليك دنا عروسه وداخله على جواز.
عمر:كنتى بتكلمى يزيد ليه ياهانم
إيمان :يزيد مين انت عرفت منين انى بكلم يزيد؟
عمر:عشان قلتيله ياباشا وانتى مبتقوليش لحد باشا غير يزيد
إيمان :اه تصدق معاك حق عادى يعنى حقولك اصلي يعنى كنت بعرفه ان الشغل تمام فى الموقع وكل شئ على مايرام.
عمر:ياسلام تما انا مبلغه بكل شئ
إيمان :لا ماهو مبيثقش غير فى كلامى انا
عمر :اشمعنى يعنى ان شاء الله؟
إيمان :وانا ايش عرفنى بقى ابقى اسأله وبعدين بقولك ايه ميصحش تقف معايا كده اه يااخويا انا اخاف على سمعتى.
وانت اصلا شبهه ياللا اتفضل على اوضتك
عمر :بقى كده يا إيمان؟ يعنى مش عاوزة تقولى كنتى بتكلمى يزيد ليه؟
إيمان :حقولك بس اوعى تقول لحد
عمر :عيب عليكى سرك فى بير
إيمان :اصل اخوك عينه منى ونفسه اوى انى اسيب حسن واتجوزه وهو بقى كان عمال يقوللى طب فكرى وانا اقولله كان على عيني ياباشا كله الا سونه.
عمر :هههههه هههههه لا وربنا بت انتى حتلفى بية واللا ايه فاكرانى عيل قدامك بتشتغلينى بكلمتين اتكلمى وقولي
إيمان :ايوة بقى جه دورك انت كمان ماهى اصلها كانت ناقصاك انت عاوز ايه هاه ثم انت مالك اصلا اكلمه واللا مكلمهوش دى حاجه بيننا ده ايه ده
قرفتونى جتكم القرف والهم انا عارفه انا كان ايه اللى جابنى معاكم ماكان زمانى بقزقز لب وسودانى فى البلكونه على انغام بتاع البطاطس والطماطم والاربعه بعشرة جنيه يااللى عاوزة تحمرى بطاطس. والخمسه كيلو بردو بعشرة جنيه ياطماطم ياحمرا وياخيار يابتاع التمليح.
عمر :خلاص انسدي ياباي انا داخل
إيمان :ناس متجيش الا بالعين الحمرا
وتدخل سريعا وتغلق الباب وتتنفس:يادى النيله كنت حتقفش. ياللا معلش كله بثوابه.وعشان خاطر عيونك ياشموستى على الله بس يطلع عدل ومتشربيش مقلب ياقطتى
بينما عمر يحدث نفسه بالخارج:بقى انت بقى مخللى ايمان جاسوسه علينا يايزيد ماشي ياباشا بس اما اشوفك.
🌺🌺🌺🌺🌺🌺🌺🌺🌺🌺
فى الجناح الخاص بعمار واشرقت
أشرقت :هو انت خلاص سيبت الفيلا وبقيت مقيم هنا على طول ياعمار
عمار:وانا حقعد فى الفيلا اعمل فيها ايه لوحدى اذاكنتى انتي معظم السنه مسافرة ولما بتنزلى بتكونى بردو معظم الوقت مش معايا
أشرقت :وهو انا يعنى قاعده برة بدلع مش قاعده مع بنتك
عمار :وليه بنتى مترجعش وتكمل دراستها فى بلدها
أشرقت :عمار انت عاوز تجيب تعليم برة لهنا
عمار:ياسلام على اساس انها لما تكمل تعليمها برة حتبقى احمد زويل واللا سميرة موسى المفروض ترجع بلدها انا خايف عالبنت يااشرقت
أشرقت :خايف عليها من ايه بس ياعمار؟
عمار:البنت لازم تتربى فبلدها على عاداتنا وتقاليدنا انا مش حستنى لما الاقيها داخله علية بواحد فى ايدها وتقوللى ده البوى فريند
أشرقت :ههههههههه مش للدرجه دى ياقلبي بنتك متربيه كويس. كانت تتحدث اليه وهى تعبث بلحيته.
عمار:وحشتنى ضحكتك اوى
أشرقت :ضحكتى بس اللى وحشتك ياعمار
عمر:كل حاجه فيكى وحشانى يااشرقت.
فتقترب منه لتأخذه فى عالم تتحدث فيه القلوب بما فى داخلها من عشق كامن تغلف بالقسوة والجمود ولكن بداخله العشق والحياة
🌺🌺🌺🌺🌺🌺🌺🌺
تعلن الشمس عن بداية يوم جديد يحمل معه الأمل والتفاؤل للجميع
الأربعه على شاطئ البحر عمر وشمس وحسن وايمان
شمس :لا انا مش حركب اركبوا انتوا وانا حستناكم هنا
ايمان :ياسلام ازاى يعنى
عمر:مالك ياشمس فى ايه وإيه المشكله؟
شمس :انا عمرى ماركبت يخت ودخلت بيه المية انا اخري العب على الشط
عمر:ههههههه معقوله دى امال اسكندرانيه ازاى بس
شمس :اسكندرانيه ايه بس ده انا مبعرفش اعوم أصلا
حسن :معقوله دى وانتى يامونتى بتعرفي واللا ايه؟
ايمان :ولا انا ياروحى تقدر تقوللى حنعمل ايه لو حصل حاجه لليخت وغرقنا
عمر:ده احنا لبسنا يامعلم وقعنا مع اتنين ابيض ياورد
خلاص ولا تزعلى ياستى لو وقعنا فى الميا حسن حيشيلك وانا حشيل شمس
فيجد شمس تنظر له باستغراب مما قاله فيرد سريعا:متقلقوش يعنى حنتصرف وبعدين يخت ايه بس اللى يغرق بقولكم ايه مش عاوزين دلع حسن عاملنا بروجرام تحفه والوقت بيضيع بسرعه ممكن تثقوا فينا
ثم ينظر فى عيون شمس:شمس ممكن تثقى فية؟
شمس:ايه اه ماشي خلاص ياايمان ياللا بينا وربنا يستر
يصعد الجميع على اليخت ويبدأ فى التحرك فى عرض البحر للاستمتاع بمناظر المياه الجميله نعم فمياه البحر الاحمر رائعه
إيمان :فاكرين مسلسل سنبل بتاع محمد صبحى لما واحد قالله عالبحر الاحمر فين حماره ده؟
شمس :ههههههه ايوة تخيللى بقى لو فعلا ميته كانت حمرا
إيمان :ده كان يبقى شكله مرعب اوى يالهوى
عمر :ماهو اسمه البحر الأحمر بسبب كثرة الشعاب المرجانيه والاسماك الملونه
اجمل منظر فى العالم كله تعرفوا برغم انى عشت سنين برة لكن عمرى مااستمتعت غير فى بلدى هنا
شمس :كنت عايش فين ياعمر؟
عمر:فى لندن
شمس :وقعدت فيها كتير
عمر: من وانا عندى ١٩سنه وانا دلوقتى عندى ٣٥ شوفى انتى بقى
شمس :يااه يعنى حوالى ١٦ سنه ومفكرتش ترجع مصر
عمر:بصراحه مكنتش عاوز كنت مرتاح هناك اكتر لكن يزيد فضل يزن علية لحد مارجعت
بس بصراحه الحمد لله انى سمعت كلامه ورجعت
شمس :ليه
عمر :عشان لو مكنتش رجعت كنت ححرم نفسي من انى اشوفك واعرفك ياشمس
تنظر شمس فى الأرض ثم تتحدث:امال فين ايمان وحسن اختفوا فجأة.
عمر:تعالي نقوم نشوفهم فين ونعمل عليهم كبسه
فيقومان فيجدان الاثنان واقفان وايمان ممسكه بملابسه:عارف لو لمحتك بتبص كده ولا كده تانى ودينى لخزقهملك هو انا مش ماليه عينك واللا ايه
حسن :ياساتر يارب عليكى يابنتى ان الله جميل يحب الجمال
إيمان :لا والنبي شوف ازاى على اساس انى كيس مخلل
حسن :فشر ياقلبي ده انتى كوز درة
إيمان :حسن
حسن:ياقلب حسن ياعيون حسن من جوة
إيمان :بتحبنى ياحسن
حسن :شايفه السما شو بعيده بعد السما بحبك
شايفه البحر شو كبير كبر البحر بحبك
عمر :ياسيدي ياسيدي هنيالكم ياعم
حسن :عقبالك يا عمر لما تحب وتدوق طعم الحب خصوصا بقى لو ربنا رزقك بواحده مجنونه زى دى
فيتكلم عمر وعينيه مسلطه على شمس :انا حبيبتى لازم تكون عاقله
فتشعر شمس بالحرج الشديد وتحاول التحدث فى اى موضوع
بعد فترة يقضيناها فى البحر وهم يستمتعون بالطبيعه على انغام الموسيقى والاغانى الرومانسيه
يذهبون الى الصحراء حيث التمتع بسياحة السفاري
شمس :لا مش حينفع
حسن:ارحمينى بقى انتى كل حاجه مش حينفع
شمس :وربنا ما حينفع انا مبعرفش اسوق عربيات
ايمان :وانا كمان ياسونه مبعرفش اسوق ياقلبي
حسن :هو انتوا متعرفوش تعملوا حاجه خالص امال انتم كنتوا بتعملوا ايه قبل كده
إيمان :ولا حاجه وغلاوتك احنا كان اخرنا خالتى سناء تاخدنا وتجيبنا البحر وتعملنا كام سندويتش كده وننزل نبلبط شويه فى الميا ونروح
حسن :تبلبطوا
إيمان :اه نبلبط عندك مانع
حسن :لا معنديش مانع نهائى يا بطتى ثم ينظر لعمر:وايه الحل دلوقتى
الجماعه دول حيبوظوا علينا الفسحه
عمر:ليه مفيش مشكله انا حاخد معايا شمس وانت خد إيمان
شمس :ايه تاخدنى فين
عمر:تركبي ورايا يا شمس
شمس :لا لا مينفعش خالص اركب وراك ده ايه خلاص مش مهم روحوا انتوا وانا حستناكم
حسن :والنبي ياشيخه ماتعصبينى تستنينا فين يابنتى دى السفاري دى احلى حاجه فشرم خليكوا كده كل مكان تعملولنا عليه مشكله وحوار لحد مااليوم حيخلص
عمر:شمس خلاص عشان خاطرى مفيش حاجه ماحنا كلنا مع بعض ياللا بقى
إيمان :ياللا بقى والنبي ياشموسه
شمس :حاضر
تجلس كل من ايمان وشمس خلف عمر وحسن على العربه المخصصة للجري فى الصحراء وعلى الجبال وذلك بعد ان ارتدوا الايشاربات على وجوهم لمنع وصول الاتربه الى انفهم ولشدة حرارة الشمس
عمر:امسكي فية ياشمس متخافيش
بينما كانت ايمان تمسك فى حسن بشده
حسن:مالك مكلبشه فية كده ليه يابت يخرببيتك
إيمان وهى تضربه على ضهره :بقى كده طب نزلنى مش عاوزة اركب معاك
حسن:هههههههه بضحك معاكى ياقلبي ده انتى تكلبشي براحتك ياروح قلبي
بينما كانت شمس تشعر بالحرج الشديد ولكن عند تحرك العربات سريعا فى الصحراء اضطرت ان تمسك به وبشده خوفا من السقوط
حسن :يالا بقى عشان نركب الجمل
شمس :الله كان نفسي اركبه من زمان
حسن :أحمدك يارب اول مرة توافقى على حاجه من غير ماتتعبينا
يصعد كل منهم على جمل ويتكلمون مع بعضهم ويضحكون ضحكات نابعه من القلب وعندما برك الجمل ونزل عمر من عليه جرى سريعا على شمس ليمسك بيديها واثناء نزولها تكاد ان تسقط على الارض فيلحق بها عمر سريعا فكادت ان تسقط فى احضانه
يااه لها من صدفه جميله لحظات يخطفونها من الزمن تبدأ القلوب فى النبض
ترتعش الأيدي يتوقف اللسان عن التفوه بحرف
شمس :شكرا
عمر :اطمنى ياشمس طول مانا معاكى عمرى ماحسيبك تقعى ابدا
اما بقى الحلوين حسن وإيمان فدول بقى حكايه لوحدهم
إيمان :يالهوي ياحسن انا حاسه انى حقع
حسن :متخافيش يابطتى
إيمان :لا لا يالهوى ده انا الدنيا بنلف بية ودينى لو وقعت حقتلك ياحسن
حسن:ههههههههه تعالي بس هاتى ايدك ايوة انزلى ياللا
مجرلكيش حاجه يعنى
فتضربه على صدره:وانت كنت عاوز يجرالي ايه هاه انطق
حسن :بصراحه كان نفسي تقعى عشان اشيلك
إيمان :تشيلنى عشان يجيلك الغضروف لا ياقلبي انا اخاف عليك
حسن :حبيبتى يامونتى
يوما جميلا يمر عليهم ياكلون ويلعبون على الرمال كانت نطرات عمر وشمس تبعث السعاده والطمأنينه بداخلهم كانا يستمتعان باليوم وكأنه لهم وحدهم جميعهم يختطفون من الزمن لحظات سعاده
ولم تنس شمس فى وسط تلك الرحله ان تتصل على خالتها وتطمئنها مما اسعد عمر اكثر واكثر بها
🌺🌺🌺🌺🌺🌺🌺🌺🌺
يعودون مسآء ليجدوا عمار واشرقت جالسين فى الريسيبشن
عمر:مساء الخير
عمار واشرقت :مساء النور
عمار:اتفضلوا اقعدوا شويه
عمر:لا معلش والله مش حينفع اصلنا تعبنا اوى النهارده بحر وسفارى ورمل رجلينا اتكسرت
فعند ذكر كلمة ارجل نظر عمار لاشرقت التى تسمرت عند سماع تلك الكلمه
عمر:حنستئذنكم بقى ونشوفكم بكرة ان شاء الله
عمار:اوكيه تصبحوا على خير
شمس وإيمان :وانتوا من اهل الخير
امام الغرف:انا مش قادرة خلاص انا حسه ان دماغى حتنفجر وتتركهم وتدخل سريعا
بينما وقفت شمس تتحدث لعمر
شمس :عمر
عمر:نعم ياشمس
شمس :متشكرة اوى عالفسحه الجميله دى وبجد انا محرجه منك
عمر:اولا انا اللى متشكر اوى على اليوم الجميل ده ده كان احلى يوم فى حياتى كلها
بس ممكن اعرف محرجه ليه؟
شمس :بعنى كنت عاملالكم قلق طول الوقت معلش والله اصل خالتو
عمر:خالتو دى اعظم ام فى الدنيا انا نفسي ابوس راسها وايديها واشكرها على ترببتها ليكى
شمس :بجد يعنى انت متضايقتش
عمر:اتضايق شمس انا مكنتش عاوز اليوم ينتهى اصلا
تفرح شمس لهذه الكلمات
شمس :طيب انا حدخل بقى
عمر:شمس
شمس :نعم ياعمر
عمر:تصبحي على خير
شمس :وانت من اهل الخير
تدخل شمس وتغلق خلفها الباب وهى تتنهد فتجد ايمان تغط فى نوم عميق
🌺🌺🌺🌺🌺🌺🌺🌺🌺🌺🌺
بينما فى الجناح الخاص بعمار واشرقت
عمار:فى ايه مالك ايه اللى حصل
أشرقت :حصل حصل ايه محصلش حاجه
عمار:كنا قاعدين كويسين واول ماالجماعه رجعوا حسيتك قلبتى مرة واحده
أشرقت :لا خالص بس حسيت انى عاوزة انام
عمار:لا يااشرقت انا فاهم كويس اوى ايه اللى خلاكى زعلتى مرة واحده
أشرقت :انتى خلتنى زعلت كمان
عمار :اشرقت مش علية الكلام ده انتى متضايقتيش غير بعد ما سمعتى عمر بيتكلم عن رجليهم اللى وجعتهم
أشرقت وهى تنام على السرير :واضح انك فايق ورايق ومش لاقى حاجه تقولهاوانا عاوزة انام
عمار :انا لما اكون بكلمك تسمعينى ده واجبك انا جوزك ياهانم واللا انتى خلاص مبقتيش تعتبرينى جوزك
أشرقت :ايه الكلام ده انت عاوز تعمل مشكله وخلاص فى ايه وليه ده كله انا لا اتكلمت ولا فتحت بؤي بكلمه عاوز ايه
عمار:انتى صحيح متكلمتيش بلسانك لكن عيونك بتتكلم أشرقت انا عارف انى مبقتش قادر اعيشك الحب والفسح والجرى اللى كنا بنعمله زمان وقلتلك اكتر مرة لو حابه اننا
أشرقت :حابه ايه حابه اننا نسيب بعض مش كده
انا خلاص حفظت الاسطوانه المشروخه اللى كل شويه تسمعهالي دى منك وزهقت منك ومن الكلام معاك بص انا حريحك وحريح نفسي انا ححجز أول طياره على امريكا وحسافر تانى
عمار :مفيش سفر انتى فاهمه مفيش سفر
عاوزة تسافري ليه عشان تبعدي و تهربي زى كل مرة مش كده
أشرقت :ييه مش حنبطل كلام فى الموضوع ده تصدق انى بكون مبسوطه وانا مسافرة عشان معكننش على نفسي كل شويه بكلامك ده
عمار:ولما انتى بتبقى مبسوطه كده ايه اللى رجعك كنتى فضلتى هناك
أشرقت :رجعت عشانك ياعمار عشان وحشتنى
عمار :وحشتك اه مانا عارف قولي كلام غيرده ياهانم
أشرقت :انت ليه بتقول كده عمار انت عندك شك فمشاعري ناحيتك
عمار:زمان زمان فعلا مكنش عندى شك لحظه واحده في مشاعرك ناحيتى لكن دلوقتى
أشرقت :دلوقتى ايه ياعمار عمار حرام عليك انا عمرى ماحبيت حد غيرك انت الراجل الوحيد اللى انا بحبه
عمار:كان زمان قبل
أشرقت :قبل ايه ياعمار اتكلم سكت ليه قصدك قبل الحادثه مش كده
عمار :ايوة قبل الحادثه كانت كل حاجه جميله ضحكتك كانت مالية علية حياتى كنت بحب شقاوتك وجنونك مكنتيش بتبعدى عنى لحظه واحده كنتى زى ضلى معايا فكل مكان رجليكى على رجلي
رجلي رجلي اللى خلاص مبقتش موجوده من وقتها وانتى اتغيرتى من ناحيتى مشاعرك بقت جافه بقيتى بتدوري على اى سبب او اى حجه يبعدوكى عنى حتى تعليم ماسه انتى اللى قررتى انه يكون برة عشان تسافري معاها ويكون حجه ليكى عشان تقدري تبعدي.
أشرقت :دى وجهة نظرك انت لكن الحقيقه مش كده انا لو مكنتش بحبك كنت سيبتك زى ماطلبت منى بعد الحادثه لكن انا رفضت لكن انت اللى بقيت عايش طول الوقت فى دور الضحيه
عمار:انا يااشرقت بالعكس انا عمري ماعشت فى دور الضحيه انا واجهت الدنيا كلها بعد الحادثه
الحادثه اللى قررت فيها انى اموت مش مهم المهم انتى تعيشي وميحصلكيش حاجه فاكرةواللا تحبي افكرك
أشرقت :فاكرة فاكرة ياعمار فاكرة ان لولاك كان زمانى ميته دلوقتى ولولا انك انت اللى لحقتنى ورمتنى من العربيه كان زمان العربيه وقعت بية انا مش بيك ومكنش حصل اللى حصل
يحتضنها عمار بقلب عاشق :خلاص اهدى متعيطيش اشرقت انتى حياتى كلها عمرى كله انا قلبي ده عمره مادق لواحده غيرك عمره ماعرف يعني ايه حب غير معاكى انتى أشرقت انا بتنفس حبك
أشرقت :وانا حبي ليك مش اقل من حبك لية انا ببعد عنك عشانك انت عشان اديك مساحه تتحرك من غير ماتحس بالحرج
انا حتى لما بحاول اساعدك فى اى حاجه بتاخد الموضوع بحساسية وبتبقى فاكر انى عاوزة افكرك بعجزك
انا منكرش انى احيانا بغلط فى اختيار كلماتى وبسئ التصرف لكن انت كمان دايما بتسئ الظن فية وبتحور فى الكلام
عمار :خلاص يااشرقت شوفى اللى يريحك وانا تحت امرك انا الظاهر فعلا زى مابتقولى كده بقيت معقد بس ده غصب عنى مش بايدي انا مكنتش بقعد على رجلى وانتى عارفه ده كده كويس أوى
أشرقت :انا والله العظيم وحياة بنتنا ماسه عمرى ماحبيت غيرك ياعمار لكن انا نفسي معرفش ايه اللى حصل وليه بعدنا عن بعض بالشكل ده عمار متنساش انى كنت معاك فنفس الحادثه وانى قعدت كذا يوم فاقده الوعى ولما فوقت وعرفت ان الدكاترة
اضطروا يعملوا بتر لرجلك اليمين بسبب الغرغرينه اللى حصلتلها انا كنت بتعذب اكتر منك مليون مرة
لكن انت اللى مكنتش مستحمل اى كلمه من حد سافرت ايوة سافرت مش عشان خلاص مبقتش عاوزاك لكن عشان اديك فرصه تفكر كويس وتتقبل الحياة من تانى
عمار :وسنه تجر سنه لحد مااتبنت بيننا حواجز طغت على حبنا ومشاعرنا
وانا بقولهالك تانى يااشرقت لو انتى عاوزانا ننفصل انا حعملك اللى يريحك المهم انك متحسيش انك بقيتى عايشه مع واحد عاجز وان حياتك وقفت معاه
أشرقت :تصبح على خير ياعمار
تعطيه ظهرها لتنام بينما هو كيف له ان ينام وقلبه ينفطر حزنا على احساسه بالعجز تجاه من يعشقها الفؤاد
🌺🌺🌺🌺🌺🌺🌺🌺🌺🌺🌺🌺🌺🌺
انتهى فصلنا النهارده وعلى موعد بلقاء جديد
تعليقاتكم بقى ولايكاتكم وتوقعاتكم ياقمرات
•تابع الفصل التالي "رواية شمس تتحدي الغيوم" اضغط على اسم الرواية