رواية شمس تتحدي الغيوم الفصل السادس و العشرون 26 - بقلم عبير سليم
الفصل السادس والعشرون من رواية شمس تتحدى الغيوم
بقلمي :عبير سليم
💖💖💖💖💖💖💖💖
الحب مثل الورد ان لم تسقه بالاهتمام وقصدت اهماله ذبل وماتت ريحته وان اهتميت فيه وراعته فاح عطره فى كل مكان
ولقد ان الاوان لنسقى ذاك الورد الذى استغاث بنا واستعاذ من جمود قلوبنا ودعانا لسقياه قبل فوات الأوان
فى فيلا عمار الكاشف
ينهي عمار اتصالاته التليفونيه ويتجه الى الجناح الخاص به هو وزوجته وقد عزم أمره واتخذ أصح قرار وهو تنفيذ مانصحه به عمر.
قرر أن يتحدث معها بكلام يجمع فيه شتات قلب بقايا حب قد أوشك على الضياع والاندثار.
يفتح الباب فتاخذه الدهشه مما يرى ماهذا ادخلت مكانا اخر غير ذلك المكان الذى انطفا منذ سنوات والذى ساده الحزن والآلام وسمعت حوائطه الآهات التى كادت أن تصرخ من وجع قلوبنا
عجبا ثم عجبا نعم هى غرفتى انا ومن تيم بها الفؤاد ولكن ماهذا الذى تراه عينى
نور احمر خافت ورود وشمع وعشاء رومانسي أيعقل هذا منذ متى هذا؟
وفجأة يستعيد عقله الواقع ويلتفت ليجدها امامه اقل مايقال عنها حوريه مالهذا الجمال نعم انتى جميله ولم اعهدك من قبل سوى ايه من الجمال ولكن الليله ازددتى جمالا على جمالك سبحان الخلاق فيما ابدع وصور.
أشرقت وهى تقترب منه:حتفضل ساكت كده كتير ياعمار
عمار:اصلك حلوة اوى الليلادى يااشرقت
أشرقت وهى تحيطه بذراعيها وتضمه لصدرها وتشتم رائحته:حلوة الليله دى بس يعنى قبل كده كنت وحشه
عمار وهو ينظر لعينيها التى تشبه البحر بامواجه الصاخبه بحر يتوه فيه بحر بلا شطئان لايعرف كيف القى بنفسه بين امواجه المتلاطمه التى لا تهدأ ولا تستقر هائجه يضرب بعضها بعضا
ولا يريد النجاه بل يريد ان يشده البحر اليه مرات ومرات فهو مهما شرب منه ومهما نهل منه لن يشبع ولن يرتوي أيعقل ان يروي احد ظماه من ماء البحر؟
لم ينطق فمه بكلمه واحده فقط يدقق النظر فى تلك العينين التى اسرته فى الماضي وجعلته عاشقا لها بكل جوارحه
أشرقت وهى ترتمى بنفسها داخل احضانه الدافئه التى حرمت نفسها منها لسنوات:عمار انا اسفه سامحنى ياحبيبي سامحنى على كل لحظه بعدت فيها عنك.
عمار:انا اللى اسف ياحبيبتى
أشرقت :لسه حبيبتك ياعمار بس انا سيبتك لوحدك مفكرتش غير فى راحتي وبس.
عمار وهو يضع اصابعه على شفاهها:هشش مش عاوز كلام ولا عتاب يعكر صفو اللحظه الجميله دى احنا الاتنين غلطنا فحق بعض لكن دلوقتى انا حاسس انى اسعد واحد فى الدنيا كلها.
أشرقت :ان شاء الله السعاده حتفضل معانا على طول اوعدك ياحبيبي انى مش حسيبك بعد النهارده لحظه واحده حفضل على قلبك كده لحد اخر يوم فى عمري.
عمار وهو يشدد من احتضانها حتى كادت ضلوعها تتكسر بين يديه:يااه وحشتينى اوى يااشرقت وحشتينى يا قلب عمار اه لو تعرفى قلبي حاسس بايه دلوقتى
أشرقت :انت اللى وحشتنى اوى ياحبيبي يااه ده انا كنت غبيه اوى ازاى قدرت احرم نفسي من السعاده اللى بين ايديه دى ياااه ياحبيبي انا عمري ماكنت سعيده فبعدك عنى عمري ماحسيت بالفرحه وانا وانت كل واحد فينا فمكان بس خلاص من النهارده احنا مش حنفارق بعض ثانيه.
عمار:ياه كنتى فين من زمان غيبتى عنى اوى انا كنت خلاص ياست من اننا نرجع تانى
أشرقت :حنرجع واحسن من الاول كمان وحنعوض كل لحظه راحت مننا فبعد وخصام
عمار:لو بايدى كنت شيلتك ولفيت بيكى بس
أشرقت :انا مش محتاجاك تشيلنى بايدك لانى واثقه انى متشاله جوة قلبك وهو ده المهم ياحبيبي.
قلبك اللى عمرى ماشفت فى حنانه قلبك اللى محاوطنى من كل مكان مهما رحت وجيت مبحسش انى قويه غير لما استخبسى فى حضنك وجوة قلبك ياحبيبي
فى حضنك بحس انى طفله بضفاير ليه بتفتح عيونها للحياه
احضنى ياعمار احضنى اوى وحشنى حضنك اوى ياحبيبي
مااحلى واجمل الصفح والغفران بعد العتاب ليس عيبا ان نخطئ فى حق من احببنا فجميعنا جئنا لهذه الدنيا لنخطئ ونتعلم من اخطائنا ونحاول الا تتكرر ثانية
تمر الأيام والأيام يقترب كل حبيب وحبيبة تلتقى القلوب تفصح بما بداخلها وعما تعجز عنه الالسنه من الافصاح به
تزداد العلاقه قوة بين الجميع اصبحوا جميعا اسرة واحده
💖💖💖💖💖💖💖💖💖💖
بعد مرور شهر
فى احدالشقق السكنيه التى تدل طابعها على بساطة من يسكنون بها
دق على الباب فتذهب صاحبة البيت لرؤية من الطارق تفتح الباب فتندهش من رؤيتها:هاجر مش معقول اتفضلي ادخلى
تدخل هاجر وتسلم عليها:ازيك ياسلمى عامله ايه وحشتينى اوى
سلمى :الحمد لله والله نحمد ربنا على كل حال وانتى عامله ايه واخبارك ايه
هاجر:عايشه
سلمى:ومالك بتقوليها من غير نفس كده ليه هو مش انتى اتجوزتى اللى كنت بتحبيه ومخطوباله زمان عاوزة ايه تانى
واديكى اهوه ماشاء الله بطنك قدامك ربنا يكملك على خير وابقى خللى بالك بقى من اللى جاى ده مفيش اغلى من الضنا
هاجر:كده بردو ياسلمى وانا اللى قلت انى اكيد وحشتك زى ماوحشتينى
سلمى:وانا قلتلك حاجه ياهاجر انا بنصحك بس
تحبي تشربي ايه
هاجر:لا مش عاوزة انا عاوزاكى تطمنينى علاء عامل ايه واخباره ايه اتجوز واللا لاء ورجع مصر واللا لسه
سلمى :وانتى مالك بعلاء ياهاجر بتسألى عنه ليه مش كل واحد فيكم راح لحاله يرجع ميرجعش بتجوز ميتجوزش ملكيش فيه ودى حاجه متخصكيش
اعقلي ياهاجر اعقلي كده وخدي بالك من جوزك وابنك اللى جاى
هاجر:قصدك بنتى
سلمى:بنت ياااه الله يرحمك يااسيل ياحبيبتى كان زمانها دلوقتى فى المدرسه
قومى قومى ياهاجر روحى بيتك وحافظى عليه مفيش قدامك غيره
هاجر :انتى بتطردينى ياسلمى
سلمى:لا انا مبطردكيش ياهاجر ده بيت عمك لكن انا علاء حالف علية لاابقى أخته ولا حيعرفنى لو سمحتلك تدخلى البيت هنا
هاجر :حاضر حقوم والله بس ريحي قلبي وقوليلي هو عامل ايه
سلمى :استغفر الله العظيم ياربي كويس كويس اوى كمان وان شاء الله راجع مصر قريب
هاجر:بجد بجد ياسلمى علاء راجع
سلمى :ايوة راجع بس تقدري تقوليلي ده حيفيدك بايه ياللا على بيتك ياهاجر واعقلي انتى مبقيتيش صغيرة
توصلها للباب وتفتحه لها وتغلقه خلفها :انا عمري ماشفت بجاحه كده طب تحترم حتى الراجل اللي هى متجوزاه منك لله ياهاجر
ربنا يعوضك ويكتبلك الخير ياعلاء يااخويا يارب
💞💞💞💞💞💞💞💞💞💞💞💞💞
يقف سيف كما اعتاد امام الجامعه على امل لقياها فزياراته لبيتهم قلت كثيرا لعدم تواجد عمر
اشتاق لها نعم اشتاق قلبه لرؤياها يريد التحدث اليها مهما كلفه الأمر يدعو الله ان يطمئن قلبه برؤيتها
اخذ يحدث نفسه :خلاص بقى ياسيف ارحم نفسك بقى وامشي انا مش فاهم انت واقف ليه اصلا هو انت تعرف هى فين اصلا مايمكن متكونش هنا
بس وحشتنى اوى كل حاجه فيها وحشانى
خلاص خلاص حمشي اهوه
يتجه ناحية الباب ليفتحه ويركب وفجاة وهو يفتح باب السيارة يتفاجا بخروجها من الجامعه
دقات قلبه تزداد يشعر بانه سيخرج من بين ضلوعه
يقترب منها حتى تراه قبل ان تذهب
عهد
عهد:سيف ازيك ياسيف عامل ايه وايه اخبارك
سيف :الحمد لله والله وانتى اخبارك ايه
عهد:الحمد لله والله بخير بس ايه اللى جابك الجامعه هنا
سيف :ابدا كنت معدي من هنا بالصدفه نزلت اشتري حاجه ورايح اركب العربيه لمحتك انتى مروحه
عهد :ايوة مروحه
سيف :طب ممكن تسمحيلي اوصلك
عهد :مش عاوزة اتعبك انا بركب الترام
سيف :لا طبعا مفيش تعب ولا حاجه بالعكس ده شئ يسعدنى
كان واقفا امامها وهو يشعر بقلبه الذى سيعلن تمرده ويشق صدره ليخرج منه ويصرخ باعلى صوته معلنا حبه لها
تركب بجواره ياه لهذه الفرحه التى أشعر بها الان كم انا سعيد
سيف:ممكن تسمحيلي اعزمك على حاجه فى اى مكان
عهد :اى حاجه ازاى يعنى
سيف:يعنى عالغدا مثلا
عهد:لا مينفعش والله ياسيف انا اسفه بجد
سيف :طب وليه مينفعش ياعهد هو انا غربب عنكم
عهد:لا والله مقصدش بس على ممكن يزعل منى لو اتصرفت تصرف زى ده لانى حقولله اكيد انا متعودتش اخبي عنه حاجه
سيف :ومين قالك تخبي عنه تسمحيلي انا اللى اكلمه واستئذنه
عهد :طب ليه ده كله ياسيف ماتيجى انت معايا وتتغدى عندنا فى البيت
سيف :لا انازهقت من جو البيوت عهد من فضلك مترفضيش طلبي
عهد :خلاص ياسيف اتصل بعلى
سيف وقلبه شديد الفرحه يتصل على علي الذى كان جالسا فى حجرته يهدهد صغيرته
حبيبة بابا لوكه امورة بابا لوكه روح قلب بابا لوكه
وكانت الصغيرة تصحك بقهقهة تهز قلبه من الفرحه فيعلن هاتفه عن اتصال :ايوة ياسيف خير
سيف :ازيك ياعلى بص انا كنت معدي من قدام الجامعه بالصدفه واتقابلت مع عهد وكنت عاوز استئذن منك نتغدى سوى
على:بقى انت اتقابلت معاها بالصدفه اقطع دراعى اما كنت واقف عندك من ساعة مامشيت من الشركه مش علية انا الكلام ده ياسيف عيب عليك لما تبيع مياه فى حارة السقايين
بس انا حعديهابمزاجى واعتبرها صدفه اصلي بحب الصدف دى اوى وياما عملتها قبلك يامعلم
بس على الله تفلح وتورينا شطارتك
سيف:دعواتك معانا بقى
على:داعيلكم من قلب مؤمن وربنا بس الرك عليك انت يامعلم عاوز اشوف شطارتك بس خد بالك اولا حتحكيلي اللى حصل بالحرف وثانيا قدامك ساعتين زمن وتكون عهد ادامى انت فاهم والا وربي
سيف :حاضر والله متشكر ياعلى سلام
على:سلام يااخويا
يغلق معه الهاتف ويتحدث لمليكه:شوفتى ياملوكتى الواد سيف دايب فى عمتك الهبله ازاى االلى مش شايفه غير واحد عمره ماشافها ولا حيشوفها غير اخته وبس
بس انا متاكد ان سيف حيقدر يكسب قلبها
مروة وهى خارجه من الحمام:سلامة عقلك ياحبيبي بتكلم مليكه
على:ياخارجه من باب الحمام وكل خد عليه خوخه خوخه خوخه مشيتى حافيه وخدتى زكام ورابطه راسك ماالوخه ودوخه دوخه
مروة :هههههههههه هههههههههه هههههههههه مجنون ياناس
على :طبعا مجنون هى العيله دى وراها غير جنانى مش كفاياا ان الكل عايش حياته واحنا اللى قاعدين واحد بيحب فى شرم واستحلى القعده هناك ومش عاوز ينزل
والتانى راح انبسط مع حبيبة القلب واحنا قاعدين ناكل لب ونشرب شاي فى الفرانده
مروة:ههههههههه حبيبي انا اى مكان معاك فيه ابقى فجنه
على:طب بقولك ايه ماتشغليلنا حاجه كده وترقصي شويه
مروة:ارقص ايه بس ولما يسمعوا برة ناقصه انا بقى تهزئ ويقعدوا يقولوا معندكمش دم ولا احساس
على:بقولك ايه هما كده كده بيقولوا هما وراهم حاجه غير تهزيئنا كل شويه نخليه على حق بقى
مروة :خلاص من عينيه ياقلبي اوامرك ياسى على
على:ياحلاوتك يارمانتى وانتى رايقه اتفرجى على المعلمه يالوكه واتعلمى ياقلبي من امك
تعلو الاغانى والضحكات بينهما غيرمدركين انهم ليسوا فرادى فى هذا البيت.
💖💖💖💖💖💖💖💖💖💖💖
نذهب الى ذاك المريض الذى مازال ينتظر فرج الله له لعله يزيح عنه الألم
يجدون طرقا على الباب فتتجه امل لفتحه فتتفاجا به امامه:مش معقول بشمهندس يزيد اتفضل حضرتك يابشمهمدس اتفضل
يزيد :انا اسف لو كنت جيت من غير معاد
امل:يالهوى حضرتك بتقول ايه بس ده البيت نور وربنا ولو انه يعنى مش اد المقام
يزيد :البيت مقامه عالى بوجودكم فيه ياام زياد هو وليد صاحى
فيخرج اليه وليد على صوته بذاك الكرسي الجالس عليه :مش معقول بشمهندس يزيد ده كتير علية والله
يزيد :البطل بتاعنا عامل إيه
وليد :الحمد والشكر لله
يزيد:خلاص شده وحتزول بامر الله الدكتور الالمانى حيوصل بامر الله بعد بكرة وحتعمل العمليه وان شاء الله حترجع تقف على رجليك تانى
امل :بجد بجد والنبي يابشمهندس يامانت كريم يارب
يزيد :معلش حقك علية انا عارف انى اتاخرت عليك بس انا والله خفت اسلمك لحد مش واثقين فيه وده احسن دكتور فى جراحات العمود الفقري
وليد :يعنى فى امل يابشمهندس
يزيد:قول يارب
وليد :يارب يابشمهندس يارب ده انا لحلم باليوم اللى ارجع اقف فيه تانى على رجلي واروح شغلي واكل لقمتى انا وولادى من عرق جبينى
يزيد :ان شاء الله ياوليد خللى ثقتك فربنا كبيرة
وليد:ونعم بالله
أمل :امال البشمهندسه شمس رجعت واللا لسه وحشتنى اوى
يزيد :راجعه خلاص ان شاء الله
أمل :تيجى بالف سلامه بت حلال اوى ربنا يسعدها ويفرح قلبها يارب
يزيد:اللهم امين
يستئذن يزيد ويمشي بينما كانت امل ووليد يدعون الله له
ويتناول وليد علاجه الذي يستسلم بعده للنوم
وتذهب أمل لمراعاة شئون بيتها
تسمع طرقا على الباب فتذهب لترى من الطارق فتجده فتحى ابو جنى :ابو جنى معلش والله وليد اخد العلاج ونام
فتحى:ازيك ياام زياد عامله ايه وايه اخبارك انا عاوز اطمن بس عليكم
أمل :الحمد لله والله احنا بخير
فتحى:طب خدي الحاجات الحلوة دى لزياد
أمل :مكنش ليه لزوم الحاجات اللي كل شويه بتجيبها دى بيتك اولى بيها ياابوجنى
فتحي :ايه الكلام ده وهو يعنى يزيد مش زى جنى
أمل :مفيش حد زى الضنا ياابوجنى ربنا يخليهالك هى وحبيبه زينة الستات
فتحى :زينة الستات فين بس ياريتها كنت حفرح اوى مفيش ست الستات غيرك ياام زياد
امل:نعم
فتحي :قصدي يعنى إنك شايله جوزك فى تعبه ومستحملاه وهو عاجز وانتى حلوة وصغيرة ولو واحده غيرك كانت قالت اشوف حالي
أمل :دى لو واحده قليلة الأصل ده جذمة جوزى فوق دماغى العمر كله والست اللى ماتشيلش جوزها فتعبه تستاهل الموت.
فتحى:والله انا بحسده عليكى ياام زياد ربنا يبارك فيكى
امل :ربنا يباركلك فى مراتك اختى وحبيبتى الاصيله اللى واقفه معايا فى شدتنا
معلش يااخويا حستئذنك عشان اشوف زياد
فتحى:اتفضلي يا زياد ادخلى واقفلي باب الشقه عليكم كويس
تغلق امل الباب بينما يحدث نفسه:الصبر طيب وانا وراكى ومش حسيبك ياامل
💞💞💞💞💞💞💞💞💞
بعد مرور يومين
فى شرم الشيخ حيث تقام حفله كبيرة فى فيلا عمار بمناسبة رجوع ابنته ماسه من السفر واحتفالا بعودة الحياة بينه وبين حبيبته
الكل فرح وسعيد بهذه المناسبه الجميله التى تجمع بين قلبين كاد ان يضيع الحب بينهما لولا تدخل القدر وابنتهم التى رجعت لاحضانهم
ماسه :بابي انا مبسوطه اوى يابابي انى مش حسافر تاني
عمار :خلاص ياماستى انا وانتى ومامى مش حنسيب بعض تانى
كان عمار يتحرك بين الناس وفى يديه زوجته وحبيبته بينما كانت ماسه تتعرف على الجميع
ماسه :ازيك ياشموسه
شمس :الحمد لله ياقلبي مصر نورت
ماسه:كان نفسي اوى ارجع من زمان بس مامي هى اللى كانت مصرة انى اتعلم برة
شمس :غريبه اوى مع انى اعرف اللى بيسافر برة بيبقى مش عاوز يرجع تانى وخصوصا انك كنتى فى امريكا
ماسه :لاء انا مكنتش مبسوطه كنت حاسه انى غريبه فوسطهم انا حتى مكنتش بحب اتكلم انجلش خالص انا بحب بلدى مصر اجمل بلد فى الدنيا كلها
عمر وهو قادم عليهم:فقريه ياماسه هههههههههههه
ماسه :دى وجهة نظري يابشمهندس امال فين طنط ايمان مش شايفاها
شمس وهى تهمس لعمر:يالهوى لو سمعتها وهى بتقول عليها طنط حتمسك فى زمارة رقبتها
عمر:دي مش بعيد تجيبها من شعرها وتعضها عض وتعمل زى قطاطه لما طلعت شعر اوشه في بقها
شمس :هههههههههه هههههههههه
ثم ترد على ماسه :مونى تلاقيها مع خطيبها ياروحى هنا واللاهنا دلوقتى تظهر متقلقيش
إيمان وهى واقفه مع أشرقت :يالهوى على جمال الفيلا
أشرقت :عجبتك الفيلا يامونى
إيمان :اوى اوى ياشوشو عندك حق الصراحه متحبيش تقعدى فى الفندق ماهو مش معقول حد يسيب الجمال ده ويقعد فى فندق
أشرقت :الفيلا دى شهدت على احلى سنين عمري مع عمار بحبها اوى وبعشق كل ركن فيها
إيمان :ليكى حق طبعا تحبيها اذا كنت انا نفسي حبتها
أشرقت :ههههههههه سكر وربنا سكر يامونى
إيمان :ان شالله يخليكى ياشوشو يارب
أشرقت :مالك شايفاكى عماله تبصي يمين وشمال
ايمان :سونه مش شايفاه بقولك انا حروح ادور عليه اشوفه بيهبب ايه من ورايا
أشرقت :ههههههه ماشي ياقلبي
تجد من بحتضنها:سيبتينى ورحتى فين ياقلبي
اشرقت والضحكه على وجهها :كنت برحب بالناس ياحبيبي
عمار:هو انا مش كل الناس ياقلبي
أشرقت :انت كل الناس وكل دنيتى يا قلب أشرقت
بينما كانت ايمان تبحث عن حسن :راح فين ده كمان ودينى لو كنت واقف مع حد غيري لخنقك بايدي ان شاء الله
يأتى الى سمعها صوته وضحكته
ايه ده اللى انا سامعاه ده ايوة هو وصوت ضحكته يومك مش فايت ياحسن انت اللى جنيت على نفسك
تذهب اليه فتراه من ظهره وهو يضحك مع احد ما:لا مش ممكن دمك عسل ياماسه
إيمان:زيي كده يعنى ياسونه
حسن:مونتى تعالي ياقلبي شفتى ماسه دمها زى السكر
إيمان :ماسه ازيك ياقلبي عامله ايه يا قطه
ماسه :كويسه طنط إيمان انا كنت لسه بسأل عنك طنط شمس
إيمان :طنط هى مين دى اللى طنط ياقلبي
ماسه :حضرتك ياطنط ايمان واللا تحبي اقولك يامونى
إيمان :لاء بصى انا بحبك كده حتخلينى اكرهك يابطه سامعه واللا مش سامعه
انا حعديها المرة دى لكن المرة الجايه انتى اللى حتبقي جنيتى على نفسك
ماسه :ليه بس ياطنط حضرتك اكبر منى ولازم احترمك
إيمان :ومين قالك انى محترمه قصدي يعنى لاء ياستى متحترمنيش لكن عارفه لو سمعنك بتقولي طنط دى تانى حخنقك بايدي فاهمه واللا اقول تانى
ماسه:يامامي لاء خلاص حاضر بعد اذنكم سلام ياحسن
ايمان:طنط لما تنططك ال طنط ال جتك ضربه
حسن :هههههههههه هههههههههه هههههههههه
أشرقت :لا وربنا عجبتك اوى يااخويا
حسن:اصلك مشوفتيش شكلك وانتى بتكلميها حرام عليكى فجعتيها هههههههه
ايمان :حرمت عليها عيشتها وربنا لو ماكنت بعز ابوها وامها لكنت جيبتها من شعرها الجذمه دى
حسن :كل ده عشان قالتلك طنط
إيمان :بقولك ايه متعصنيش انت كمان ثم انت كمان كنت واقف معاها ليه هاه وضحكتك بترن فى الفيلا
حسن :ابدا والله انا كنت واقف وهى جت وقفت معايا
إيمان :وقفت المياه فزورها
حسن :حرامزعليكى البت حيحصلها حاجه
إيمان :ياحنين طب امشي انجر قدامى وبعدين خلاص يعنيه انا سايبهالك مخضرة وماشيه خلاص أشبع بالسياح بتوعك بفتلهم ومايوهاتهم
حسن:اخس عليكى يامونتى ده انتى حتاخدى قلبي وانتى ماشيه
إيمان :سلامة قلبك ياقلبي حوحشك ياحسونتى
حسن:حتوحشينى موت بس اطمنى اسبوع وراجعلك يامزتى
يقف عمار امام الجميع ويتحدث فى المايك:اولا انا بشكر كل الحاضرين الليلادى على تلبيتهم لدعوتنا ليهم
واحب اقولكم ان الليلادى أسعد ليله فى حياتى كلها فى عمرى كله لدرجة انى حاسس انى خلاص مش عاوز حاجه من الدنيا اكتر من كده
والفضل للسعاده اللى انا فيها دى لربنا سبحانه وتعالى ثم للشباب دول :عمر وشمس وايمان وحسن
وانا حابب اوجهلهم كلمه :انتوا أحسن واحلى حاجه حصلت فى حياتنا ربنا يسعد قلوبكم زى مااسعدتونا
بالرغم من المده القصيرة اللى قضتوها معانا فشرم الا انكم
قدرتوا تعملوا اللى كنا عاجزين عنه سنين وسنين
لميتوا شملنا ورجعتوا الحب جوة قلوبنا تانى وعشان كده انا حفضل مديونلكم العمر كله بالسعاده اللى انتم كنتم السبب فيها
أخذ الجميع يصفق لهذا الكلام وخاصة بعد ان تقدم لهم ايضا بالشكر عما بذلوه من مجهود فى الموقع والعمل
كان جميعهم يشعر بالسعاده تجاه هذين الزوجين
ويتم استكمال الحفل بينما تتجه شمس للوقوف بمفردها بعيدا عن الكل فتجد من يهمس خلفها :مبسوطه ياشمس
شمس :ياااه ياعمر متعرفش انا مبسوطه النهارده اد ايه انا حسه ان الدنيا مش سيعانى من الفرحه مش قادرة اصدق اننا قدرنا نرجع الحب تانى لاتنين كانوا ممكن يموتوا من غير بعض
عمر:شمس
شمس :نعم ياعمر
عمر:بحبك ياشمس
شمس :ايه
عمر:بحبك بحبك ياشمس
شمس تقبلي تتجوزيني💞
انتهى الفصل ياترى شمس حتوافق على طلب عمر واللا لاء
وياترى ايه حكاية هاجر بالظبط وعاوزة توصل لايه
وربنا يحمى امل من فتحى وامثاله
متنسوش بقى لايكاتكم وتعليقاتكم وتوقعاتكم
وتكاتكم وحركاتكم واللا خسارة فية هههههههههه
تصبحوا على حب وسعاده وهنا بااجمل قراء فى الدنبا
💙💙💙💙💙💙💙💙💙💙💙💙💙💙💙
القصه هنا فقط اعمل متابعة ليصلك كل جديد 👇
عشاق الروايات
•تابع الفصل التالي "رواية شمس تتحدي الغيوم" اضغط على اسم الرواية