رواية شمس تتحدي الغيوم الفصل السابع و العشرون 27 - بقلم عبير سليم
الفصل السابع والعشرون من رواية شمس تتحدى الغيوم
بقلمي :عبير سليم
💖💖💖💖💖💖💖💖
لمتى سيظل الحزن والآلام قدرنا الذى كتب علينا رغم ارادتنا اما آن الأوان بعد لنحطم تلك الاحزان ونقهر الحزن ونتغلب على تلك الآلام التى تصيبنا بالياس من الحياة
تلك الحياة التى لم نذق طعم سعادتها بعد
تجرعنا كأس المرارة وارتوينا منه بقدر كاف فلما لانروى طمأنا من كأس الحياة الحلو المذاق بعد
كفى بالله عليك ياقدر كفى بنا لهذا الحد لم تعد تتحمل قلوبنا أكثر من ذلك فلقد اصبحت كالهشيم
فلترحمنا وتطيب قلوبنا وتقدر لنا نصيبا من تلك السعاده التى رايناها على وجوه الاخرين ولم ننعم بها حتى الآن
فالترحمنا وارحم ضعفنا قبل ان يتملك اليأس منا ونفقد شهوة الحياة والرغبة فى تذوق مذاقها.
ينتهى الحفل ويسلم عمار وزوجته على كل من شاركوهم فرحتهم ويودعونهم
بينما تحتضنه ماسه:بحبك اوى يابابي
عمار:وانا بموت فيكى ياقلب بابي
أشرقت :امال الشباب فين مختفيين من بدري هو مش انت قلتلهم يباتوا معانا الليلادى فى الفيلا
عمار :ايوة قلت لعمر بس هو اعتذر وقال لازم يروحوا عشان يحضروا حاجتهم ويجهزوا نفسهم
بس المفروض انهم لسه هنا لأنى أكدت عليهم ميمشوش دلوقتى
أشرقت :خلاص يمكن يكونوا بيتمشوا عالبحر واللا حاجه بس كان يوم حلو اوى ياحبيبي
عمار:ربنا يجعل ايامنا كلها حلوة
أشرقت :بس بصراحه شمس وايمان عملوا شغل حلو اوى فى الحفله
ماسه:مامى هى ايمان دى مجنونه
أشرقت :اه مجنونه قصدى لاء ليه بتقولي كده ياماسه
ماسه :مش عارفه يامامي انا بحبها والله بس اول ماقلتلها ياطنط تحولت وخوفتنى اوى وقالتلي حقتلك بصراحه انا خايفه منها
عمار واشرقت :ههههههههه ههههههههه ههههههههه
عمار وهو يضحك:ايمان دى عسل وسكر ياماسه متخافيش دى بتهزر معاكى
ماسه :لا والله يابابي مش بتهزر دى كانت بتبرء لى وعينها كلها شرار انا خفت منها اوى
عمار:متخافيش هى بتقلب فثانيه هما برج الجوزاء كده يا قلبي
أشرقت :ومالهم بقى برج الجوزاء ان شاء الله ده احنا عسل وسكر ودمنا شربات واللى فقلبنا على لساننا
عمار:ههههههه فى دى ابصم بالعشره
أشرقت :بصي ياماسه كل واحد وليه شخصيته ياروحى عارفه لو كنتى قلتى لشمس ياطنط مكنتش زعلت منك لانها عاقله وعارفه انك محترمه فرق السنه اللى بينكم مش اكتر
لكن ايمان بتحب دايما تشوف نفسها صغيرة وطبعا كلمة طنط دى تحسسها انها كبرت اوى عشان كده انتى اتفاجئتى من رد فعلها لكن هى اكيد متقصدش دى مونى دى سكر ياقلبي💖💖
مانا عارفه انى سكر ياحسونتى
حسن :هههههههههه سكر وعسل نحل يامونتى المهم انتوا ماشيين بكرة بالليل مش كده؟
إيمان :ايوة خلاص ياحسونتى ياااه الايام جريت بسرعه اوى
حسن:هى دايما الأيام الحلوة بتجري من غير مانحس بيها لكن الأيام السوده يالهوى بيبقى اليوم بسنه
إيمان :طب تفتكر بقى ياحبي الوحيد ايامنا حتبقى بيضه واللا سوده؟
حسن:دى حتبقى بيضه وابيض من لبن الحليب ياااه يابت ياايمان ده انا مستني اليوم اللى حنتجوز فيه بفارغ الصبر
إيمان :بجد ياحسونتى مع انى مش عارفه قلبي مش مطمنلك ليه
حسن:ههههههه ياعبيطه ده شغلى مينفعش اكشر في وش الناس ولا اعاملهم وحش وبعدين انا عمري ماعملت حاجه غلط انا بخاف ربنا ياايمان وعارف ان اللى بيعمل حاجه غلط بتتردله فى اعز ماليه وانا معنديش اى استعداد انك انتى واللا حد من اخواتى يحصلكم حاجه
ده غير كمان انك مسيطرة على قلبي وروحى مش مخليانى عندى حرمان عشان ابص لواحده غيرك
صحيح انتى مجنونه وحتخلبنى اشد فشعري بس انا بحب جنانك وبموت فى هبلك
إيمان :بحبك ياحسونتى
حسن :بموت فيكى ياقلب حسونتى
بقولك ايه كنت عاوز أسألك عن حاجه بس خايف تصوتى وتفضحينا
إيمان :لا متخافش انا ستر وغطا عليك قر واعترف
حسن :هههههههه مجنونه وربنا مجنونه
ايمان هو عصام اخباره إيه؟
إيمان :وليه السيرة الزفت دى عالمسا الله يحرقه
حسن:ايمان انتى عارفه انى قاطع علاقتى بيه لكن ده احنا بردو كنا صحاب فيوم من الايام وكان بيننا عيش وملح
إيمان :من يوم مااتجوز محدش يعرف عنه حاجه طول اليوم فى مكتبه مبيخرجش منه غير بعد مايخلص شغله ولما بيكون عنده تسليم شغل زميله محمد اللى معاه هو اللى بيسلمه بدل منه
تحسه زى مايكون مش عارف يورى وشه لحد
حسن :مش عارف ليه قلبي مش مطمن حاسس ان فى حاجه مخبياها عنى
إيمان ده انتى تعرفى دبة النمله عشان خاطري قوليلي بس واطمنى وغلاوتك ماحتصل بيه
إيمان :طلب اكتر من سلفه من وقت مااتجوز وطبعا السلفات بتتخصم من مرتبه واضح ان الهانم اللى اتجوزها مصاريفها كتير عارف ياحسن والله العظيم لما كان خاطب شمس عمره مااستلف جنيه واحد وكانت بتعمل الجمعيات عشان خاطره وتقبضه هو اول واحد عشان يظبط الدنيا ويخلص الشقه اللى فى الاخر استخسرها فيها وجاب واحده تانيه تتمتع بيها الهى باعصام ماتتهنى ولا تفرح ولا تشوف السعاده بعينك بحق ماعملته فى الغلبانه دى.
انت عارف عشان تساعده يشطب الشقه لفت على الموظفين كلهم تتحايل عليهم يدخلوا الجمعيه ودخلوا عشان خاطرها هيا بس
ده حتى البشمهندس على اللى هو صاحب الشركه والله دخل معاها ووقتها مبقناش مصدقين
وسبحان الله زى مايكون قلبه كان حاسس كان كل شويه يقوللى انا مستخسر شمس فى اللى اسمه عصام ده انا مش عارف بتحب فيه ايه؟
حسن :ليه كده طيب وبعدين ماهى مراته خريجة جامعه ليه ماتشتغلش وتساعده؟
😍😍تشتغل مين دى اللى تشتغل ياحبيبي لا طبعا انت عاوز تمرمطنى واللا ايه احنا متفقناش على كده؟
عصام :خلاص يبقى تخفي شويه فى المصاريف حرام عليكى ارحمينى شويه انا مبقتش ملاحق
هاجر :وهو انا بطلب ايه يعنى انت اللى مش اد فتح بيت عشان كده كنت خاطب واحده بتشتغل عشان تساعدك مش كده ودلوقتى بقى جه الدور علية عشان انا كمان تنزلنى الشغل مش عيب عليك لما تطلب منى طلب زى ده امال لو مكنتش شايفنى عامله ازاى كنت عملت فية ايه
عصام :احترمى نفسك ياهاجر انا بقولك اهوه ومتجيبيش سيرة حد على لسانك انتى فاهمه
هاجر :لا مش فاهمه ياسي عصام وعاوزاك تفهمنى ياللا ورينى الشطارة ورينى حتعمل ايه؟
فلا بشعر عصام بنفسه الا وهو يصفعها على وجهها
هاجر:انت بتمد ايدك علية ياعصام بتضرب مراتك ام بنتك عشان خاطر واحده كنت خاطبها وانت اصلا مكنتش بتحبها
عصام :الواحده اللى بتتكلمى عنها دى كانت صينانى وصاينه قرشي اللى هى عارفه انى تعبان وشقيان فيه
الواحده دى لما كنت بتحايل عليها نتفسح واللا اشتريلهاحاجه واللا حتى ابقى عاوز اعزمها على حاجه كانت بترفض عمرها ماحملتنى فوق طاقتى لكن انتى من يوم مااتجوزنا وانتى مش مخلية لاورايا ولا قدامى وصلتينى لدرجة انى بقيت بستلف من الشركه ومن زمايلي عشان الاحق على طلباتك ياهانم طلباتك اللى مبتخلصش ابدا
هاجر :ولما انت زعلان ومقهور اوى كده عليها متجوزتهاش ليه هاه
عصام :عشان عبيط عشان بحبك بحبك انتى لكن للاسف انتى اللى مقدرتيش الحب ده مشوفتش معاكى الحلو اد ماشفت معاكى الوحش والتعب والارف فين السعاده اللى وعدتينى بيها انا مش لاقى ولا شايف حاجه
زى ماتكونى كنتى بتتمسكنى لحد ماتتمكني
بقى انتى هاجر اللى انا كنت بعشقها زمان انتى هاجر اللى كنت عاوز انتحر لما عمك غصبك تتجوزى ابنه
انتى هاجر اللى انا عشانهاسيبت خطيبتى قبل الفرح بكام يوم وكسرت قلبها وجبتلها انهيار عصبي
انتى اللى انا خسرت وبعت صاحب عمرى وابويا عشان خاطرها
انتى هاجر اللى انا استحملت نظرات زمايلي فى الشركه لية عشانها
ده انا مبقتش عارف اتكلم مع حد من يومها الكل بيعاملنى على انى خاين مليش أمان
لا انا اللى شايفه قدامى واحده تانيه خالص بنى ادمه لاعندها احساس بالمسئوليه ولا احساس بحاجه خالص كل همك فى الدنيا هاجر وبس مبتفكريش غير فى نفسك وبس
طلبات طلبات طلبات ناقص اسرق واجيبلك
هاجر:خلاص ياسيدي مادمت شايفنى وحشه كده طلقنى
عصام :ههههههههه لا وربنا اطلقك عشان اشمت فية الناس مش كده وافرحهم فية وفى اختياري الزفت اللى اختارته
واللا عشان تاخدى الشقه بحجة انك حاضنه ويروح علية تعبي وشقايا اللى شقيته كل السنين دى
واللا عشان تاخدى بنتى وتحرمينى منها لا ياهانم انتى حتفضلي مراتى بس حتشوفى واحد تانى خالص غير عصام اللى كنتى تعرفيه زمان
واعملى حسابك يااما تتعدلي وتحافظى على بيتك يااما حتشوفى منى ايام سوده على دماغك انتى سامعه؟
ثم يتركها ويدخل غرفة الاطفال ويبكى على الاطلال ويعيد ذكرياته مع شمس
عصام :مش كفايه سرير واحد فى اوضة الاطفال ياشمس
شمس:لا ياحبيبي مينفعش لازم سريرين عشان جورى وحور يناموا على سرير ومالك ويونس يناموا على السرير التانى
عصام :مين اللى قلتى عليهم دول
شمس :ولادنا ياعصومتى ان شاء الله
عصام :كل دول ياشمس كده مش حنلاحق على مصاريفهم
شمس :ربنا اللى بيرزق ياحبيبي وبعدين متخافش طول مانا معاك اوعى تشيل هم حاجه حفضل جمبك وقرشك على قرشي حنبقى احسن الناس وولادنا يكبروا ويكبرونا معاهم ومنلاحقش على مشاكلهم وناخدهم ونروح مطروح عشان نصيف كل سنه
عصام :ياااه مطروح كل حلمك مطروح طب قوللى شرم الغردقه
شمس :ومالها مطروح ماهى زى الفل وبعدين مش مهم المكان المهم الناس اللى معانا فى المكان
وانت وولادنا حتبقوا كل ناسي
يفيق من تلك الذكريات وهو يحدث نفسه:مش عارف كان عقلي فين لما سيبتك ياشمس
ازاى مقدرتش الجوهرة اللى كانت معايا ازاى قدرت اجرحك بالشكل ده يااه لو كنت كملت معاكى اكيد حياتى حتكون افضل من دلوقتى مليون مرة
عالعموم اطمنى ياشمس شكل كده دعوتك اللى دعيتيها علية حتتحقق خلاص حتتحقق بدري اوى اسرع ماكنت أتخيل
💖💖💖💖💖💖💖💖💖💖💖
يقوم حسن بتوصيل إيمان الى الفندق بعد ان بحثت عنها ولم تجدها او تجد عمر وهاتف كل منهما مغلق
تصعد للغرفه وقبل ان تفتحها فتجد اتصالا من يزيد :ايوة ياباشا مساء الفل
يزيد :ايه ياايمان عاوز انام ومستنيكى تتصلي مكلمتنيش ليه
ايمان :معلش وربنا بابرنس انشغلنا طول اليوم فى الحفله
يزيد:طب طمنينى ايه الاخبار عندك
ايمان:الاخبار والله لسه مفيش اخبار جديده
فتجد من يتحدث خلفها:لاء فى اخبار جديده ياايمان ثم ياخذ التليفون من يدها:اطمن يايزيد انا طلبت من شمس الجواز وهى رفضت رفضت تتجوزنى يايزيد خلاص ارتحت
ثم يقدم لها التليفون:اتفضلي عيشي حياتك
تاخذه منه وهى فى حالة صدمه مما سمعته
يزيد :عمر يا عمر فهمنى ايه الكلام ده
إيمان :عمر مشى دخل اوضته وقفلها
يزيد :ايمان افهمى فى ايه وفهمينى انا عاوزة اعرف ايه اللى حصل بالظبط
إيمان :حاضر حاضر والله
تفتح ايمان باب الغرفه فتجد شمس جالسه على السرير ضامه ركبتيها الى راسها وتبكى بشده
ايمان تجري عليها وترفع رأسها وتبعد شعرها الملتصق يوجهها من كثرة الدموع التى ملئته:مالك ياقلبي فيكى ايه ياحبيبتى وايه الكلام اللى عمر قاله ده
هو فعلا عمر طلبك الجواز وانتى رفضتيه
شمس دون ان تتكلم تهز راسها بمعنى نعم
إيمان :طب ليه ليه بس ياشمس ده عمر بيحبك اوى ياحبيبتى
شمس :وانا كمان بحبه وبحبه اوى كمان
ايمان:ولما انتى بتحبيه يبقى ايه سبب رفضك ليه فهمينى
شمس وهى تتحدث ببكاء شديد:مانا قبل كده كنت بحب عصام وهو بردو كان بيحبنى أو بالاصح كان بيقول انه بيحبنى اخدت انا ايه من الحب ده غير الغدر وطلع كان فى حب قديم فى حياته ومهنتش عليه ولا هانت عليه العشرة اللى كانت بيننا رمانى كانى زباله بيرميها فى اقرب خرابه تقابله عشان يرتاح منها
اضمن انا منين ان اللى حصل ميتكررش تانى مع عمر اضمن منين انه ميجيش قبل الفرح ويقوللى اسف اصلي رجعت لحبي القديم تانى
إيمان :طب اهدى اهدي عشان خاطري شمس مش كل الناس زى بعضها ياقلبي عمر مش عصام
شنس:كلهم زى بعض مبيفكروش غير فى نفسهم وسعادتهم وبس
بابا اول ماما ماماتت راح دور على سعادته ونسانى
جوز خالتو لما لقاها مبتخلفش راح دور على سعادته ورماها ومسالش عنها
عصام سابنى وهان عليه حبي ليه ودور على سعادته ورمانى
وانا تعبت تعبت خلاص ومبقتش حمل وجع قلب تانى خلاص
انا تعبانه تعبانه اوى ياايمان كفايه علية كده كفايه مش حقدر استحمل اى ضربه تانيه انا لحد دلوقتي واقفه على رجلي لكن لو اتاذيت تانى حتكون دى نهايتى ياايمان
ايمان وهى تحاول تهدئتها:طب بصي ممكن تبطلي عياط وبعدين تعالي هنا لما انتى رفضاه بتعيطى ليه ممكن اعرف ايه سبب الدموع دى دلوقتى
شمس :عشان بحبه بحبه ياايمان وترتمى فى حضنها
تظل هكذا في حضن ايمان حتى تغفو عيناها فتضعها ايمان فى الفراش وتفكر فيما حدث
تخرج من الغرفه وتتجه لغرفة عمر
يفتح لها الغرفه فيلفت نظرها منظر غرفته فتزيحه وتدخل الغرفه فتجدها محطمه :يالهوي ايه اللى انت عملته ده
عمر:إيمان الله يخليكى سيبينى فحالي
إيمان :لا مش حسيبك فحالك انت عبيط واللا ايه حالكم هو حالي
عمر:رفضتنى ياايمان شمس رفضتنى قالتلي لاء مش موافقه اتجوزك
إيمان :طب ممكن تغير هدومك وتحصلنى تحت عاوزة اتكلم معاك شويه
💖💖💖💖💖💖💖💖💖💖
بعد قليل يجلس عمر وايمان
إيمان :متزعلش من شمس ياعمر
عمر:انا زعلان عليها مش منها ياايمان
ايمان :بس منظر التكسير والبهدله اللى فى اوضتك بيقولوا انك زعلان منها
عمر:مكدبش عليكى ياايمان انا اول ماردت شمس علية وقالتلي لاء انا مش موافقه اتجوزك وسابتنى وطلعت تجري انا فعلا كنت متضايق بس مش منها لاء من كل اللى اذوها فحياتها وخلوها تفقد الثقه فى اى حد من باباها اللى نساها ومن الزفت اللى سابها
لكن سبحان الله بعد ماكسرت الأوضة بالشكل اللى شفتيه ده وقعدت واستهديت بالله
فكرت ياايمان ايوة والله فكرت واتاكدت انها رفضتنى من خوفها ان اللى حصلها مع الحيوان اللى سابها يتكرر معايا تانى
بس هى مش فاهمه انى بحبها بحبها بجد وعمري ماحسيبها او ابيعها فيوم من الأيام
ايمان :طب ودلوقتى حتسيبها ياعمر حتسيب شمس
عمر:اسيبها شمس دى بقت كل حياتى انا مبقتش بحبها لاء انا بقيت بعشقها وخلاص مش حقدر ابعد عنها مهما حصل
إيمان :بجد بجد ياعمر مش حتسيبها طب حتعمل ايه فهمنى
عمر:حعمل ايه دى لعبتى بقى بس اكيدححتاج منك مساعده
إيمان :انا مستعده لأى حاجه تطلبها مني ياعمر المهم أشوف شمس فرحانه وضحكتها ماليه الدنيازى زمان
عمر:اوعدك اوعدك ياايمان انك حتشوفى شمس أسعد إنسانه فى الدنيا
💞💞💞💞💞💞💞💞💞💞💞
أتى صباح يوم جديد ولكنه غير كل صباح كانت شمس وايمان يرتبان اشياءهما استعدادا للسفر
إيمان :يااه فاكرة واحنا لسه جايين فى السكه كنا بنحلم امتى حنوصل ونشوف شرم دى اللى مكناش بنشوفها غير فى الأفلام دلوقتى خلاص ماشيين هى ليه الايام الحلوة دايما بتخلص بسرعه كده
شمس:هى الأيام الحلوة دايما عمرها قصير ياايمان
ايمان:بس احنا نقدر نحقق سعادتنا لنفسنا ياقلب ايمان
شمس :إيمان الله يخليكى انا تعبانه مش عاوزة اتكلم فى حاجه
إيمان :حاضر يا قلبي
شموستى النهارده اخر يوم لينا انا حروح افطر مع حسن ماشي وبعد كده هو حييجى يتغدى معانا ويفضل لحد مانركب الطيارة
شمس :ماشي ياحبيبتى روحى ربنا يهنيكم يارب
تخرج ايمان من الغرفه وقبل ان تنزل تطرق الباب على عمر:صباح الخير يا عمر انا رايحه لحسن افطر معاه شمس جوة هاه
عمر:تمام مع السلامة انتى بس حاولى تتاخرى شويه
بينما كانت شمس جالسه لا تفعل شيئا غير التفكير فقط وجدت هاتفها يرن
صباح الخير ياشمهندس
يزيد :صباح الفل والياسمين على عيونك يا شموستى يارب تكونى انبسطتى فى شرم
شمس :طبعا انبسطت جدا يابشمهندس دى كانت احلى حاجه حصلتلي فى حياتى كلها
يزيد :ان شاء الله لسه الجاى احلى واحلى كمان خصوصا لما تكونى بتعيشي الحلو ده مع اللي بيحبك وقتها حتشوفى معاه السعاده بمعناها الحقيقي
شمس :الحمد لله يابشمهندس انا اخدت نصيبي من السعاده وراضيه باللى ربنا كتبهولى ومش طمعانه فاكتر من كده
يزيد :وهو انتى اخدتى ايه ياشمس من الدنيا عشان تكتفى منه
شمس :اخدت القهرة والغدر يابشمهندس مش كفايه دول علية عشان يخللونى اكتفى
يزيد :شمس مش كل الناس زى بعضها ياحبيبتى الدنيا فيها الحلو وفيها الوحش
شمس :بس انا مشوفتش منهاغير الوحش بس
يزيد :يبقى ان الاوان انك تشوفى الحلو
شمس انا كنت ممكن استنى لما ترجعوا واتكلم معاكى ياحبيبتى بس انا مقدرتش اشوفكم راجعين وانتوا زعلانين ومبتكلموش بعض بالعكس انا عاوزكم ترجعوا وايدكم فايدين بعض فاتحين دراعاتكم للدنيا تواجهوا كل العالم وتتحدوا نفسكم انكم حتحققوا السعاده اللى كان نفسكم فيها
دى لحظة الحب اللى بنعيشها عمر تانى ياشمس
وقتها حتحبي الدنيا حتتغير فى عينيكى حتاخديها فاحضانك وتبقي مش عاوزة تسيبيها تانى
شمس عمر اخويا ياشمس وانا اكتر واحد فى الدنيا فاهمه عمر ممكن يبان عنيد وقاسي لكن لما بيحب بيبقى ارق من العصفور اللى مستنية مامته تيجى تاكله فى بؤه
اديله وادي نفسك فرصه تعيشوا الحياة سوى متحرموش نفسكم من الفرصه دى
عمر مافرحش ياشمس موت ماما الله يرحمها كسره خلاه ميقدرش يحب تانى بقى يخاف يحب حد او يتعلق بيه يروح ويسيبه زى ماما عاوزة انتى كمان تسيبيه ياشمس
شمس :بشمهندس الله يخليك افهمنى
يزيد :وهو مين عمره فهمك ادي ياشمس ده انتى اختى التانيه بعد مروة وانتى عارفه ان انتى عندى اهم مليون مرة منه
واقسم بالله العظيم وغلاوة مراتى وبنتى عندى لو مكنت متاكد من حب عمر ليكى كنت انا اللى حبعده عنك واقولك لاء متتجوزيهوش ياشمس
يابت الواد بيحبك وبيموت فيكى حتشيللينى
ياعبيطه خديه وربيه ومرمطي بكرامته الأرض بس وانتى معاه حافظى عليه وعلى حبك ياهبله ماتسيبيهوش لواحده غيرك والواد حلو وامور والف مين حطه عينها عليه
عمر محتاجك ياشمس اديله فرصه عشان خاطرى واوعدك انك مش حتندمي
شمس :هو حضرتك عرفت انى بحبه ازاى طب نقول ان عمر هو اللى اتصل بيك وحكالك لكن ده هو نفسه ميعرفش انى بحبه يبقى حضرتك اللى فى اسكندريه عرفت ازاى
يزيد :من العصفورة هههههههههه
شمس :العصفورة اه قلتلي العصفورة اللى راحت تفطر مع خطيبها عشان حضرتك تكلمنى
يزيد :العصفورة اللى بتحبك وتتمنالك السعاده وانتى عارفه كده كويس
تسكت شمس ولاترد
يزيد :انا مش عاوز اسمع منك رد انا حعرف كل حاجه بنفسي لما ترجعوا ان شاء الله
وتاكدى سواء قبلتى او صممتى على رايك انتى مكانتك عندي زى ماهى شموسه اختى وحبيبتى
يغلق معها الهاتف ليتركها فى حيرتها
عاليه :يعنى ماكنتش قادر تستنى لما يرجعوا النهارده وتكلمها وجها لوجه احسن
يزيد :لاء مكنش ينفع يالولو لانهم بمجرد مايرجعوا هى حتلهي نفسها فى الشغل وحتتهرب دى تربيتى وانا حافظها لكن دلوقتى هما لسه هناك وادامهم فرصه يتكلموا تانى لوحدهم
عاليه:وايمان اللى لزقالهم دى
يزيد :لا منا وزعتها تروح تفطر مع خطيبها وتسيبهم على راحتهم
عاليه :عارف يايزيد انت وايمان كابل ملكمش حل سبحان الله برغم انكم ابعد ماتكونوا عن شخصية بعض وفرق السما والأرض بينكم بس دماغكم دايما قريبه من بعض وبتفهموا بعض جدا
يزيد :حبيبتى غيرانه واللا ايه
عاليه :حبيبي طبعا انا بغير عليك واموت اموت لو حسيت ان عينك شافت واحده غيري
لكن انا بجد والله بستغرب علاقتك بايمان اوى
عارف لما بكون جمبك وانت بتبقى أوقات فانح الاسبيكر واسمعها واسمعك وانتوا بتكلموا بعض ده انتوا ولا اتنين بتلعبوا طاوله عالقهوة بحس انكم بتشيلوا التكليف بينكم نهائى بستغرب جدا ازاى تكلم مديرها بالطريقه دى ههههههه
منكرش انها عسل ودمها شربات بس جريئه اوى بس بردو بحبها اوى
يزيد :إيمان دى حاله خاصه بجد شخصيه متتكررش كتير مكسب لأى حد يعرفها تسد فى اى موقف تبقى قده وقدود
جريئه بس على حق تقول للاعور انت اعور فى عينه بس بادب مش ببجاحه
صاحب صاحبه عندها استعداد تولع الدنيا لو حد جاب سيرة شمس بكلمه
جدعه بألف راجل بس طبعا مقدرش اقولها كده يالهوي
تتحول اصلها معتزة بانوثتها اوى دايما متشيكه وعلى سنجة عشرة عمرك ماتشوفيها متبهدله او مش مهتمه بنفسها اطلاقا مضيعه نص فلوسها على هدومها واناقتها
وخدومه جدا عندها استعداد تشيل شغل الشركه كله على دماغها لا بتكل ولا بتمل لكن لو حد جرحها بكلمه او زعلها تلاقيها قلبت قطه سيامى تلزق فى الحيطه وتعيط زى الأطفال وتمسح دموعها بكم ايديها كمان
مفيش حد فى الدنيا اتعامل معاها ومحبهاش ده حتى عمر اللى مكنش بيطيقها تعالي شوفيهم دلوقتى بقوا صحاب ازاى
طب تعرفي ان شمس غلاوتها عندى ملهاش وصف بس عمرها مااتكلمت معايا زى ايمان ايمان دى حاله استثنائيه
عاليه :ماشي ياعم الاستثنائي اطلع انا منها بقى
يزيد :تطلعي من ايه ياقلبي ده انتى معشسه جوة قلبي ياباشا
عاليه :باشا مش دى كلمة ايمان هههههههههه اتعديت منها ياقلبي
يزيد :ههههههههه فقريه بتنشر عدوتها فى اى مكان
عاليه :تفتكر شمس تكون اقتنعت بكلامك
يزيد :اه وبنسبه كبيرة كمان وان شاء الله عمر حيكمل الباقى
💞💞💞💞💞💞💞💞💞
بينما كانت شمس جالسه تفكر فى كلام يزيد لها تشعر بصداع من كثرة التفكير ولأنها لم تذق طعم النوم الا قليلا
تبحث فى كل الحقائب عن دواء للصداع فلا تجد ياربي اجيب مسكن منين دلوقتى والصيدليات اكيد لسه مفتحتش حاسه ان راسي حتنفجر
اه مش قادرة راسي اااه
ياترى ممكن شمس تكون اقتنعت بكلام يزيد واللا لاء
وايه اللى حيحصل بعد كده ده اللى حنعرفه ان شاء الله
انا حاولت متاخرش عنكم عشان متزعلوش
ياريت متزعلونيش انتوا كمان وتقدر ونى زى مابقدركم
وبحبكم من كل قلبي
وانا بصراحه اخدت قرار انى حوقف نشر الروايه فى اى جروب او مكان مفيهوش تفاعل والقراء فيه مش بيقدروا تعبي ومجهودى
وبوجه شكر خاص لصاحبتى وحبيبة قلبي نجلاء عامر على تعيقاتها وتحليلاتها الرائعه على كل بارت ومناقشتها معايا فى التحداق
بجد انسانه رائعه ربنا يفرح قلبك زى مابتفرحينى يانوجه يارب
وكمان بدعى من قلبي لهبه محمد حبيبة قلبي وصاحبة جروب كوكب الروايات ان ربنا يصبرها ويلهمها الصبر فى وفاة اختها وترجعلنا تانى تنورنا قريب ان شاء الله
مع الف سلامه واشوفكم البارت الجاى ان شاء الله وربنا ميحرمنى منكم ولا يحرمكم منى ان شاء الله
💞💞💞💞💞💞💞💞💞💞💞💞💞
💞💞💞💞💞💞💞💞💞💞💞💞💞
القصه هنا فقط اعمل متابعة ليصلك كل جديد 👇
عشاق الروايات
•تابع الفصل التالي "رواية شمس تتحدي الغيوم" اضغط على اسم الرواية