رواية شمس تتحدي الغيوم الفصل التاسع و العشرون 29 - بقلم عبير سليم
الفصل التاسع والعشرون من رواية شمس تتحدى الغيوم
بقلمي :عبير سليم
💖💖💖💖💖💖💖💖
مابك ياقلب وماالذى أصابك لتنتابك كل هذه الأحزان احقا كنت تعشقهم لهذه الدرجه؟
نعم كنا نعشقه حد الجنون فكم من ليال طوال مرت علينا ونحن لا نتوانى فى الانشغال بهم لحظه واحده.
كم من مرات ومرات اشتقنا لضحكاتهم وهمساتهم التى تحيي القلوب وتشعلها بنيران العشق.
أيعقل أن يصبح كل ذاك أوهام؟ أيعقل ان من احببناهم كانوا يعشقون غيرنا ونحن بعيدون كل البعد عنهم ؟
لا لا تلمه فالقلوب لا تتخير من تحب وتعشق بل تجبر على ذلك الإختيار وان كان من حقك اللوم فيحب ان تلوم قلبك انت
هل سألت يوما نبضات ذاك القلب لمن كانت مصوبه؟
وهل سيسمعها ويشعر بها وهى تفتك بجوفه؟
أم انها كانت مصوبه تجاه من عميت عيناهم وصمت اذانهم وتوقف القلب بدقاته عننا؟
أيعقل أن يكون ذاك الحب من وحى الخيال كما يدعون؟
أيعقل ان يكون مجرد اوهام صدقناها حتى تجسدت كالحقيقه؟
ولكن فليكن مايكن وليصير مايريده القدر فلقد عزمت على ان أقص جذور ذاك الحب من اعماق قلبي
ولكن فلترق بنا ياقدر وكن رحيما بقلوبنا كفانا مانحن فيه قدر لنا الخير مع من يحبونا وقلوبهم تنبض بعشقنا فلتجعلنا رفقاء بهم ولا تأخذهم بذنب غيرهم.
على وهو يحتضن أخته الصغيرة ويمسح لها دموعها بيديه التى طالما كانت حنونه عليها فتلك الايدي هى التى ربت وكبرت وتحملت مسئولية طفله صغيرة مات ابواها وتركوها:
عهد ممكن تهدي شويه ياحبيبة قلبي
عهد:هو مش حضرتك اتجوزت مروة وابيه يزيد اتجوز عاليه ليه عمر مايتجوزنيش انا كمان هو انا وحشه؟
على:يالهوي ياناس بقى معقوله الشعر الاصفر ده والعيون الملونه دى ووحشه دا نا حمدت ربنا وسجدتله شكر لما مليكه طلعت شبهك ياقمري
عهد ممكن تسمعينى ياحبيبة قلب اخوكى.
عهدودموعها لا تتوقف :حاضر ياابيه
على:عهد انتى عارفه انى بحب مروة من أول مافتحت عينها عالدنيا اما بالنسبه ليزيد فعاليه مكنتش اول حب فحياته بس هو اتجوزها عشان تعبانه وقال بنت عمى ومحدش حيحافظ عليها غيرى لكن طبعا مع العشرة حبها اوى وبقوا اتنين عشاق
اما بالنسبه لعمر الوضع بالنسبه له مختلف نهائي
عهد :ليه اشمعنى أنا هى جت علية
على:عهد انتى عارفه انتى إيه بالنسبه لى واللا مش عارفه
عهد :عارفه طبعا ياابيه.
على:عارفه انك بنتى قبل ماتكونى اختى عارفه ان كل املي فى الدنيا انى اشوفك سعيده ومتهنيه وقلبي يكون مطمن من ناحيتك.
اوعى تكونى فاكرة انى مكنتش حاسس بيكى ولا عارف مشاعرك رايحه ناحية مين مبقاش استحق ابقى اخوكى اللى رباكى وكبرك لحد مابقيتى ست البنات كلهم لو مكنتش أحس بيكي.
انا متكلمتش معاكى مش عشان متجاهل مشاعرك لا والله ابدا لكن عشان مجرحكيش ياقلبي كنت عاوز احترم خصوصياتك ومقدر انك بنت كبرت وبتتكسف
لكن فى نفس الوقت انا كنت متابع كل حاجه عنك من عاليه
انتى بنتنا واحنا اكتر ناس تتمنالك الخير ياحبيبتي.
وانا لو كنت متاكد من انك حتلاقى السعاده مع عمر اقسم بالله وحياة مليكه بنتى اللى غلاوتك من غلاوتها لكنت انا اللى قلتله بنفسي يتجوزك لكن انا اقرب واحد لعمر
احنا مرينا بكل سنين عمرنا مع بعض كبرنا سوى مفارقناش بعض غير لما سافر وحتى لما سافر كنت على اتصال دائم بيه.
عارف بيعمل ايه ومضيها ازاى.
عمر مش اى واحده تقدر تحتويه ياحبيبتى
أيوة صدقينى هى دى الحقيقه عمر محتاج اللى يحتويه
لكن انتى يانور عينيه محتاجه اللى يحتويكى ويغرقك فحبه وحنانه
عمر مش الزوج اللى اتمنهولك ياعهد مش عشان هو وحش لاوربنا ابدا ده ابن عمى واخويا وحبيبي لكن هو شخصيته مختلفه عنك نهائى مش حتبقى مرتاحه معاه
وهو عمره ماشافك غير اخته الصغيرة اللى كانت بتقوله شيلنى ابح وهى صغيرة واللى كان بيجيبلها معاه الشيكولاتة والشيبسي وهو جاى عندنا
انتى عمرك ماخطرتى على باله ترضيها على نفسك وعلى كرامتك ياعهد انك تعلقي نفسك بواحد انتى مش على باله
بقى عهد سليم المهدى ست البنات واللى يتمنوها كبرات البلد تهين نفسها ليه ووعشان إيه يااخي ملعون ابو الحب اللى يذل صاحبه ويهينه.
واللى انا واثق منه ان اللى جواكى ناحية عمر مش حب حقيقى لا خالص ده حب مراهقه انتى بس عاجبك طريقة لبسه وبرفانه وشياكته وشكله لكن ده مش حب ياعهد انتى لسه صغيره ياحبيبتى والدنيا فاتحالك دراعاتها ليه تربطى نفسك بواحد اكبر منك ب١٥ سنه ليه
وانتى ممكن ترتبطى بواحد اصغر منه وكمان يكون بيحبك حب حقيقي والمثل بيقول خدى اللى بيحبك متاخديش اللى بتحبيه اللى بيحبك ده حيقيدلك صوابعه العشرة شمع عشان تحسي بيه وبمشاعره لكن اللى بتحبيه وهو مبيحبكيش بتلاقى نفسك مهانه فمشارعك يبقى ليه ياحبيبتى ليه
عهد شيلي عمر من دماغك نهائى واوعى تزعلى من عاليه ولا تزعليها انتى عارفه هى بتحبك اد ايه ونفسها تشوفك اسعد واحده فى الدنيا
يعنى دلوقتى يبقى كويس لما تتعب واللا يحصللها حاجه وتحسي بالذنب ناحيتها وانتى عارفه ان ممنوع عنها الزعل
عهد :انا مقصدتش والله ازعلها انا بس
على وهو يمسح لها دموعها :مبسش ولا حاجه خلاص يا روحي اهدي وانا وعاليه معاكى مش حنسيبك غير لما تفوقي وتخلصي من الوهم اللى انتى معيشه نفسك فيه
وترجعيلنا تانى عهد بنتنا حبيبتنا اللى عاوزينها تكون أسعد إنسانه في الدنيا كلها.
يأخذها فى احضانه ويمسح على شعرها :اوعدينى ياعهد انك حتفوقى وتبقي كويسه
عهد :انا كنت فاكرة انطول ماانتوا جمبي انا لازم ابقى كويسه ربنا يخليكم لية
بينما كان الجميع فى الأسفل يهنئون عمر ويتمنون له السعاده
كان سيف فى عالمه الخاص مشغولا بتلك التى خطفت قلبه وهى قلبها معلق بآخر ومن اقرب الأصدقاء إليه وأحب الناس الى قلبه
كان يحدث نفسه :أنا كان قلبي حاسس انها بتحبك ياعمر كنت بحاول اكدب نفسي واقول يمكن بيتهيألي بحكم انكم ولاد عم لكن دلوقتى اتاكدت خلاص من حبها ليك
طب اعمل ايه دلوقتى ياربي
انا محتار بجد انا لاحقدر اتخللى عن حبي ليها واسيبها ولا حقدر افرض مشاعري عليها وهى قلبها متعلق بواحد تانى
وياريته كان بيحبها زى مابتحبه وقتها كنت حنسحب تماما واتمنى لها السعاده.
لكن هو قلبه مع واحده تانيه خالص
وفجاة يفيق على صوت عمر:
عمر:سيف ياسيف
سيف :ايوة ياعمر
عمر:فى ايه يابنى مالك رحت فين
سيف :انا معاكم اهوه
عمر :طب اعمل حسابك انك جاى معانا بكرة
سيف :ده اكيد طبعا يا عمر الف مبروك يا حبيبى وربنا يتمم على خير يارب
على وهو نازل من الأعلى :عقبالك ياسيف ان شاء الله
سيف بحزن:ان شاء الله
عشق :يعنى انت وشمس حتتجوزوا ياعمر
عمر :ايوة ياعشق وحتعيش معانا هنا
عشق :هيييبه وحلعب معاها
أنس :ده على اساس انها عيله صغيرة وبعدين هو مش انا بلعب معاكى
عشق :بس انت رجليك وجعاك ومش بتقدر تلعب معايا
على:خلاص ياحبيبتى انس حيفك الجبس الأسبوع الجاي ان شاء الله عشان يبقى منور فى خطوبة خاله
سيف :طب ياجماعه انا حستئذنكم بس
عمر:ليه ياسيف ما لسه بدري
سيف:معلش ياعمر عندي صداع بس ومحتاج ارتاح شويه
عمر:مانت كنت زى القرد واللا تلاقيك غيران طب ياللا اتجدعن بقى عشان نعملها فى ليله واحده
سيف :بعد اذنكم ياجماعه ياللا تصبحوا على خير
ويخرج سريعا فهو غير محتمل أكثر من ذلك
عمر :هو ماله سيف ايه اللى ضايقه
يزيد :ماله بس ياعمر مش قالك مصدع
عمر:ده صاحبي يايزيد سيف مبيجيلوش صداع غير لو حصلت حاجه ضايقته
وانا شايف ان محصلش حاجه غير موضوعى انا وشمس اللى هو عارفه اصلا وفرحان بيه جدا يبقى ايه اللى مضايقه بس
بينما كان سيف يتجه للبوابه يجد من ينادي عليه :سيف استنى ياسيف
سيف وهو يلتفت له :أيوة ياعلى
على:سيف ممكن نقعد نتكلم شويه
سيف :بتحبه ياعلى بتحبه انا قلبي كان حاسس بس كنت بكدب نفسي ليه مقلتليش ياعلي ليه
على:ولو كنت قلتلك كنت حتبطل تحبها خصوصا لو كنت قلتلك ان الحب ده من طرفها هى بس وان عمر ولا على باله
سيف :مش عارف ياعلى مش عارف بس اللى انا عارفه ومتأكد منه انى بحبها أوى
على :واللى بيحب حد مش بيتمسك بيه واللا انت عندك راى تانى؟
سيف :بس هى قلبها مع حد تانى ياعلى
على :كدب مش حقيقة مشاعر مزيفه لكن حبك انت هو اللى حيبقى اكبر حقيقه فى حياتها
سيف انا مش بقولك كده عشان عاوز اشيلك فوق طاقتك لاء عهد مقامها عالي اوى عندى وانا عمرى ماحجبرك على انك تقف جمبها انا اللى مخلينى اتكلم معاك بحريه كده هو انى متاكد من حبك ليها لكن انت لو ليك وجهة نظر تانيه اكيد ححترمها ياسيف
سيف:على انت بتقول ايه انا اصلا كل حلمى فى الدنيا عهد مش عاوز حاجه تانيه اكتر من كده
انا مستعد احارب علشانها بس مينفعش ادخل حرب من غير سيف مينفعش احارب عشان افك أسر واحده هى مش عاوزة قيدها يتفك
على:سيفك هو قلبك ياسيف قلبك اللى بيحب ويعشق.
القيد ده محدش حيقدر يكسره غيرك لكن لو انت عاوز غيرك هو اللى يخوض المعركه دى ويفوز بيها يبقى خلاص ياسيف على راحتك.
سيف :غيري ده مين ان شاء الله طب يبقى حد يقرب منها غيري
على انا مش حتنازل عن حبي ليها مهما حصل لو حمشي بلاد وبلاد عشان اوصل لقلبها مش حقول تعبت ولا حمل انا مستعد افضل العمر كله احارب عشان اوصل لقلبها وان شاء الله ربنا حيقدرنى ويخلينى اقدر اخليها تحبنى
على:هو ده سيف والا كنت حقلق على انس الصراحه
سيف :تقلق على انس مش فاهم ايه علاقته بالموضوع.
على:انت ناسي ان دمك بيجري فدمه واللا ايه وان انت لو اتخليت عن عهد هو ممكن يتخللى عن عشق فيوم من الأيام
سيف :ههههههه لا اطمن خالص انا عمرى ماحتخللى عن عهد ابدا.
على:ايوة كده عاوز اشوف سيف الراجل اللى انا متمنتش غيره لاختى
سيف :وده شرف كبير اوى لية ياعلى انك تثق فية وان شاء الله ثقتك فية حتكون فى محلها
يصعد على لغرفة عاليه يفتح الباب فيجدها تبكي
يزيد بلهفه :عاليه حبيبتى مالك فى ايه حصل حاجه مع عهد
عاليه وهي منهارة :عهد زعلانه منى عشان مقولتلهاش يايزيد ياريتنى كنت قلتلها عشان متعشمش نفسها انا غلطانه يايزيد انا جرحت اختى من غير مااقصد
يزيد وهى يحاول تهدئتها:طب بس اهدي عشان خاطري واطمنى خالص علي حيحل معاها الموضوع انا مش عاوز ادخل نفسي عشان مجرحهاش
لكن اطمنى عهد بتحبك ياعاليه هى بس عشان زعلانه شويه لكن حتروق وتهدى وسيف حيعرف يخليها تحبه
عاليه :يارب يايزيد يارب
يزيد :ان شاء الله يا قلبي والله العظيم ياعاليه انا لو كنت عارف ان عمر مناسب لعهد لكنت جوزتهاله لكن عهد دى بنتى اللى بتمنى لها السعاده وانا عارف ان عمر مش حيقدر يسعدها
عهد محتاجه اللى يحتويها مش هى اللى تحتويه وعمر عاوز اللى يحتويه مش حيقدر يسعدها
وكمان السن ياعاليه عمر اكبر منها بكتير ليه حرام دى عيله
اهدي ياحبيبتى اهدى والله عهد حتتفهم الموضوع وحتجتاز المحنه على خير ان شاء الله
يسمعون دقا على الباب
يزيد :اراهنك انها عهد بصي انا حنزل عشان محرجهاش وتتكلموا براحتكم
يفتح الباب فيجدها امامه:لولو صاحيه
يزيد:ولو نايمه تصحالك ياست البنات
ينزل يزيد بينما تدخل عهد فتفتح لها عاليه احضانها
💖💖💖💖💖💖💖💖💖💖💖💖💖
فى اليوم التالي فى غرفة شمس
لا ياايمان كده اوفر أوى خفيه شويه
ايمان :بقولك ايه متشيلينيش انتى عروسه ياقلبي يعنى لازم تبقي متألقه
شمس :بس انا حسه انى مش انا
إيمان :لا اله الا الله بقولك ايه ممكن تسيبيلي نفسك وملكيش دعوة
تدخل عليهم سناء:خلصتوا يابنات
بسم الله ماشاء الله الله اكبر عليكى ياحبيبتى
إيمان :إيه رأيك بقى ياسناء فى عروستنا
عشان الهانم مش عاجبها المكياج
سناء:تسلم ايديكى ياايمان سيبك منها انا عاوزاها تلعلط كده
شمس وهى تتحرك أمامها :انا حلوه ياخالتو
سناء :قمر قمر الله اكبر عليكى ربنا يبعد عنك شر العين يارب ويحرسك ويحميكى يارب ويكمللك على خير ياحبيبتى
شمس :بابا اتأخر اوى ياخالتو
سناء :لسه مكلمنى وقاللى انه جاى فى السكه متقلقيش ياحبيبتى
شمس :تفتكري حد من اخواتى حييجى معاه ياخالتو
سناء :يارب ماييجو احنا عاوزين فرحتنا تكمل على خير
حييجوا بقى ويقعدوا ينوءوا خليهم مكانهم احسن
شمس :فرحانه ياخالتو
سناء:فرحانه بس ده انا الدنيا مش سايعانى من الفرحه ياااه يامانت كريم يارب أحمدك يارب واشكر فضلك
شفتى ربك كريم ازاى ياحبيبتى شوفتى ان ربنا ادرى بينا من نفسنا وبعد عنك الشر عشان شايلك الخير
شمس :بس انا خايفه اوى ياخالتو
سناء:متخافيش ياحبيبتى ان شاء الله ربنا حيفرح قلبك ويعوضك خير بأمر الله
شمس :يارب ياخالتو يارب
بعد مرور ساعه
يجلس الجميع شاكر وهاله ويزيد وعاليه وعلى ومروة وسيف وعمر وعشق بينما ظلت عهد فى البيت متحججه بانس وجاءت حنين لتجلس معها
كان عمر جالسا بجوار شمس :ايه الجمال ده كله كنتى مخبيه الجمال ده كله فين
إيمان :قللها والنبي ياعمر احسن مكنش عاجبها
عمر:معقوله بردو هو فى حد يقدر يعدل عليكى يامونى عقبال مانتعبلك يوم فرحك
ايمان :يارب ياعمر يارب
شاكر وهو يوجه كلامه لوالد شمس :احنا جايين النهارده عشان نطلب ايد شمس لابنى عمر
والدها :والله لو هى موافقه فأكيد مش حيكون عندى ماتع طبعا
هاه ياشمس موافقه ياحبيبتى
فتنظر شمس فى الأرض خجلا
والدها :يبقى نقول الف مبروك
شاكر :طبعا الدور بتاع عمر عندنا فى الفيلا جاهز من كله مش ناقص غير ان عرسانا الحلوين ينقوا عفشهم براحتهم وان شاء الله الفرح عاوزينه بعد شهر بالكتير
سناء:بسرعه كده طب سيبوهالي شويه
فيتقدم عمر نحوها ويجد نفسه تلقائيا يسحب يدها ويقبلها:معلش بقى حقك علية سيبيهالي عاوز افرح معاها وافرحها ممكن تسمحيلي بده
سناء:ربنا يسعدكم يابنى ويهنيكم يارب
عمر:ويخليكى لينا ياست الكل
سناء :مش حوصيك على شمس يابنى دى نور عينيه من جوة
عمر:فى عينيه ياست الكل متقلقيش عليها وحبك ليها وخوفك عليها وترببتك ليها انا حكمله معاها ان شاء الله
شاكر :طب نقرا الفاتحه
يرفع الجميع يدهم لقراءة الفاتحه ويقوم الجميع للسلام على عمر وشمس بينما تطلق ايمان الزغاريد
مروة:عسل يامونى وربنا
إيمان :ان شالله يخليكى يارب
سلم عمر وشمس على الجميع وعندما أتى الدور على هاله
مدت يديها اليه:الف مبروك ياعمر ربنا يكمل فرحتك على خير
عمر :مش كده ياست الكل
ثم يرتمى عمر فى حضنها :الله يبارك فيكى يارب ويخليكى لينا
ياااه حضنك حلو اوى هو انا ازاى كنت حارم نفسي من الحضن ده ده انا غبي أوى
لا تكاد هاله تصدق عينيها احقا ماحدث الان احقا كان عمر يحتضنها الآن فلاول مرة يحتضنها عمر منذ ان دخلت بيتهم
كانت الدموع تنهمر على وجهها بشده تتحسس وجهه بيديها كأنها تريد ان تتاكد ان مافيه حقيقه وليس من نسج الخيال
ياحبيبي ياعمر الف الف مبروك يابنى ربنا يسعدك ةيهنيك ياحبيبي يارب
يزيد :عقبالك يامونى
إيمان :يارب ياباشا يارب
سناء :شوف البت حتموت ازاى عالجواز
مروة :ههههههه خليها تفرح ياطنط
إيمان :عاوزة الحق اعيشلي يومين ياناس
فيضحك الجميع على كلام ايمان والجو المرح الذى احدثته فى وجود الجميع ثم يقوم عمر بتلبيس شمس خاتم الخطبه
وبعد الانتهاء ياخذهم يزيد للاحتفال بتلك الليله فيخرج الجميع حتى سناء اصروا على حضورها
عمر :مبسوطه ياشمس
شمس :مبسوطه اوى ياعمر
عمر :ربنا يخليكي ليا ومنحرمش من وجودك فحياتى
شمس:ولا يحرمنى منك يارب 🌹🌹🌹🌹🌹
سناء وهو تتحدث لايمان :بت ياايمان
إيمان :عاوزة ايه ياسناء
سناء :بقولك ايه عاوزين نداري على شمعتنا عشان تقيد
إيمان :نداري ياسناء منداريش ليه
سناء:بت انتى متشيللينيش مش عاوزة حد يعرف فهمتى
إيمان :وهو انا بردوعبيطه عشان أقول لحد ياسناء ده انا الود ودى افضل مكتمه لحد الفرح ان شاء الله
ثم تحدث شمس :شفتى خالتك فكرانى حقول فى الشركه بتهزر دى واللا ايه
دى فرصتى اللى كنت مستنياها بفارغ الصبر وجتلى لتحت ايدي واستحاله افوتها
تتحرك إيمان فى الشركه بعد ان كتبت الخبر على جروب الشركه
تدخل جميع الاقسام ومعها عامل البوفيه وهو يفتح علب الجاتوه والحلويات والمشروبات ليضعه امام الجميع
كان البعض يقدم التهنئه ويتمنى لهم دوام السعاده بينما كان البعض الآخر حاقد ولما لا وهى ارتبطت باحد الشركاء الذين يمتلكون الشركه كانوا يقدمون التهانى لايمان وكأنها هى العروسه ولكن الجميع على علم بمدى الارتباط بينها وبين شمس
عقبال فرحك ياايمان
إيمان :لما اجوز شمس وافرح بيها الاول ياحبايبي
يتحدث أحدهم :بس صاحبتك ما شاء الله صبرت ونالت
دى امها داعيالها
إيمان :وحياتك يااختى دى امه هى اللى داعياله ده حفا وراها لغاية مارضيت بيه
دى شمس ياقلبي حتنور حياته
كلي يااختى كلي الجاتوه واشربي الحاجه الساقعه عشان تبلعي
ثم تحدث العامل:ياللا بينا ياجميل عشان نروح للحبايب
تفتح عليهم الباب وتدخل :صباح الخير ياجماعه
محمد :صباح الفل يا إيمان
إيمان :عقبال حبايبكم وحبايب حبايبكم لووووولي لوووولي
محمد :عقبال فرحك يامونى
إيمان : عقبال ماتفرح بولادك يامحمد
ثم توجه كلامها لعصام :اتفضل ياعصام جاتوه شمس وعمر ربنا يسعدهم ويهنيهم يارب
عصام :شكرا ياايمان
إيمان :عقبال كده لما نجاملك يوم مامراتك حبيبة قلبك تقوم بالسلامه ان شاء الله
عصام :ان شاء الله
إيمان :مبسوط يا عصام
عصام :الحمد لله
ايمان :اه طبعا مااحنا لازم نحمد ربنا فى كل لاحوال فى السراء والضراء
ثم تضحك بسخريه هههههههه بس بصراحه شكلك بيقول انها الحمد لله من بتاعة الضراء
عصام :إيمان انتى عاوزة حاجه
إيمان :حعوز ايه بس ياعصام هو انا حعوز ايه غير انى افرح فيك قصدي افرح بيك مع حبيبة قلبك
بس شوف يااخى ربك كريم ازاى اهي صبرت ونالت الحمد لله ربنا يبعد عنهم العين يارب
لم يتحمل عصام أكثر من ذلك فاخذ الأوراق التى كان يعمل بها وخرج
محمد :بقولك ايه ياايمان انا حروح اكل الجاتوه مع هشام وارحع تانى
إيمان :بالف صحه وهنا على قلبك استنى خد دول كمان
محمد :ربنا يخليكي يا ايمان كفايه كده والله
إيمان :بالف هنا يامحمد خير ربنا كتير عاوزة الكل ياكل وينبسط
تلتفت لحبيبة قلبها :مياده حبيبتى عقبالك ياقلبي متعرفيش داعتلك اد ايه عارفه داعيالك من قلبي ومن جوة جوة قلبي
يااه لو دعايا يتحقق تولعي كده مكانك
قصدى تولع الدنيا من فرحتها بيكى ياقلبي
فتعوج مياده فمها دون ان تتحدث
إيمان وهى تميل عليها:هاه تحبي تاكلى جاتوه ايه كريمه واللا شيكولاته
مياده:شكرا عامله دايت
إيمان :دايت ايه بس ده احنا عندنا مناسبه حلوة وانا عارفه انك كان نفسك تفرحى فشمس قصدي تفرحي بيها
وبعدين انتى مزة ياقلبي انا مش عارفه والله الرجاله اتعمت فعينيها واللا ايه معقوله بردو حد بالجمال والطعامه والشياكه دى كلها وتبقى عانس كده مش لاقيه حد يبصلها ولا يلمها
مياده :عانس فى عينك مين دى اللى عانس العانس هى اللى فضلت مرميه لحد مابقت فى التلاتين عشان تلاقى حد يعبرها لكن انا لسه صغيرة ياقلبي والف مين يتمنانى
إيمان :اه فعلا فى دى معاكى حق انتى قمر ومزة بس الجمال مش كل حاجه ياعنيه والراجل يحب يضحك ويتمايص اه لكن وقت مايقرر يتجوز مابيتجوزش غير المحترمه بنت الأصول.
و نصيحه منى اتقلي كده شويه اعمليلك منظر يااختى عشان الراجل مبيحبش اللى ترمي نفسها عليه بترخص فى نظره بيبقى ملهاش قيمه ياقلبي
اه انتى حبيبتى وانا عاوزة مصلحتك ياقلبي ونفسي اشوفك مبسوطه ولو انى اشك فده
مياده:ايمان احترمي نفسك مين دى اللى بترخص نفسها ياماما لافوقي كده والزمي حدودك معايا انتى فاهمه واللا تحبي افهمك
إيمان :هههههههه يالهوي تصدقى خفت وربنا خفت اه والله خفت
بقولك ايه بلاش الشويتين دول هاه دى الشركه كلها عارفاكى ياقلبي
وبعدين مقولتليش عاوزة شيكولاته واللا كريمه.
بصي بصراحه انا من رايي تاخدى شيكولاته عشان تبقى لون قلبك الاسود اللي مليان غل وكره لكل اللى حواليه واللا انتى ايه رايك
وبالمرة خدى كوكا كولا عشان تكمل طقم السواد اللى جواكى
مياده :ودينى لو ماخادتى اللى انتى جايباه ده وطلعتى برة لكون ملزقاه فى وشك انتى فاهمه واللا ايه
إيمان :ههههههه تصدقى ضحكتينى بس بجد صعبانه علية أوى مش قادرة اقولك انا لو مكانك اعيط اه وربنا واتكسف على دمى ومجيش هنا تانى
بصراحه شكلك وحش اوى مكسوفالك ياعنيه وشكلك كمان وحشك الضرب اللى بضربهولك بس اطمنى انا النهارده مش حضربك عارفه ليه عشان انتى ياعينى مش ناقصه اه والله صعبانه علية بجد
ثم تميل عليها وتهمس فى اذنها:اخدتى حتة بمبه حتطلع من نافوخك كنتى فاكرة انه حيقع فى دباديبك مش كده ويقولك لحبك ياقلبي وعاوز اتجوزك ههههههه ده بعينك
مياده :انتى سافله
إيمان :انا اللى سافله يا واطيه فاكرة لما كنتي شمتانه فى شمس عشان عصام سابها دلوقتى بقى انا اللى شمتانه فيكى وحطلعلك لسانى كمان
اتفرسي اتغاظى عاوزاكى تموتى كده من الغيظ عمر معبركيش يالمامه لكن حب شمس المؤدبه المتربيه بنت الاصول
بقولك ايه تصدقى خسارة فيكى الجاتوه ده غالي ومن مكان نضيف مش مقامك ياروحى انتى مقامك المخبز عارفه الجاتوه بتاعه وحش اوى طعمه شبه العيش البايت شبهك كده يااختى جتك ضربه
وتصدقى والله ده كمان خسارة فيكى انتى أحسن حاجه تاكلي فنفسك لحد ماتتقهري وتموتى وتريحينى من وشك يابومه
اه صحيح نسيت اقولك مش هشام خطب اديكى اهوه لاطولتى بلح الشام ولا عنب اليمن جتك داهيه
وتتركها وتخرج من المكتب سريعا فكفاها ماقذفته بها من شتائم
بينما كانت مياده فى اشد غضبها لو لمس احد وجهها لوجده يشتعل نيرانا
بقى انا يحصل معايا كده بقى الحيوانه دى تكلمنى انا كده بس ماشي ياايمان بكرة نشوف مين اللى حيضحك في الآخر
اللعبه لسه مخلصتش
وانا بقى حعرفكم اصول اللعب يبقى ازاى وانت ياعمر انا وراك وراك ومش حسكت غير لما تبقى خاتم فى صوباعي
ومش حتكون لحد غيري مهما كان التمن غالي
مش مياده اللى يتلعب بيها الكورة ياسي عمر
وحتكون اية يعنى حتكون لية
ووقتها انا اللى حتحكم واما كانت نهايتك على ايدى ياايمان انتى وشمس مبقاش انا مياده
اخذت حقيبتها وغادرت المكان فورا حتى رآها على وهى على وجهها الغضب الشديد
بت ياايمان انتى يازفته
ايمان وهى تاكل الجاتوه :خير يابشمهندس عاوز حاجه
على:البت مياده شايفها خارجه من الشركه وشكلها صعب اوى هو فى حاجه
ايمان :اممممم الجاتوه حلو اوى هو ده اللى يتقال عليه جاتوه صحيح مش الجاتوه اللى بجيبه ده بصراحه اخره يتقال عليه كيكه وملهاش طعم كمان
على:الله يخرببيتك ياشيخه انتى حتجنينى يابنتى ماتسيبك من الجاتوه ده دلوقتى وتردي علية
إيمان :ييييه بقى مالها المدعوقه دى الله يحرقها
ماتروح فى داهيه واللاتغور فى مصيبه تاخدها الهى يارب تخطبها مقطورة ويكون صاحبها اعمى ومنشوفوش وشها تانى والدنيا ترتاح منها ومن شرها
على:كفايه حرام عليكي زمانها ولعت
إيمان :الهى تولع وماتلاقى حد يطفيها
على:يابنتى حرام عليكى والله انا حاسس انك السبب فى مشيها بالشكل ده اقطع دراعى اما كنتى ظبطيها بكلمتين صح واللا غلط
إيمان :وانت عمرك تقول حاجه غلط ياابوانس صح
الصح كمان وبعدين ده انا حتى مردتش اتقل عليها اديتها كلمتين وخلاص صعبت علية ياعينى قلت حبقى انا كمان عليها
كفايه المقلب اللى شربته مفيش اكتر من كدا
بس مش قادرة اقولك شكلها كان صعب اوى ياعينى ماهى معذورة العصفور طار من العش هههههه
خدت حتة بمبه يا لهوي مش قادرة حساها حتفرقع ان شاء الله
مش قادرة اقولك فرحانه فيها ازاى هاين علية ااحدفها بالطوب زى ماكنت بعمل فى الناس اللى مبحبهمش وانا صغيرة انشها واحده فى دماغها يمكن تفقد الذاكرة وتنسانا وتبعد عننا بقى
وبعدين بينى وبينك مرضتش اتقل عليها العيار احسن تجر شكلي وانت عارفنى مبعرفش اسيطر على اعصابي وكان ممكن اجيبها من شعرها بس بصراحه انا النهارده فرحانه ومش ضاربه معايا خناء نهائي
على :قلبك أبيض يامونى
إيمان :وهو انا فى حاجه تعبانى غير طيبة قلبي ياللا مش مهم
وبعدين تعالى هنا قللي
على:اقولك ايه يامعلمه
ايمان :هى الأخت دى ازاى تاخد بعضها وتمشي كده من غير ماتستئذن من حد هى وكاله من غير بواب واللا ايه دى المفروض يتعمللها خروج بدون اذن ويتخصم منها ٣ايام اه احنا مش وكالة البلح
على :إيمان انا عمري ماشفتك كده انتى مافورة معاها اوى كده ليه ده انتى بتتحملى سخافات كتير وبتعديها اشمعنى دى اللى مزوداها معاها اوى كده
إيمان :عشان وحشه وحشه اوى يابشمهندس من جواها مش صافى
عارف برغم انها ملهاش كتير معانا فى الشركه بس من اول مادخلت الشركه وانا قلبي مش مستريح لها حسوده وحقوده وطماعه مبتحبش الخير لحد بتكره كل اللى حواليها عارف دى تلاقيها حتى بتكره نفسها
جواها كمية غل عمري ماشفتها فى حد اللى زى دى لو بلعت ريقها ممكن تتسمم
وعمرها ماحتشوف الخير ابدا
وعمري ماحنسالها لما شمتت فى شمس وكان نفسي اردهالها والحمد والشكر لله جاتلي الفرصه اردلها القلم قلمين اقوم اسيبها تعدي كده لا وربنا مايحصل
وعلى
•تابع الفصل التالي "رواية شمس تتحدي الغيوم" اضغط على اسم الرواية