رواية شمس تتحدي الغيوم الفصل الثاني 2 - بقلم عبير سليم
الفصل الثانى من رواية شمس تتحدى الغيوم
بقلمي: عبير سليم
❤️❤️❤️❤️❤️❤️❤️❤️
العشق يالها من كلمه جميله تطرب لها الاذان وتخفق لها الافئده بشده. تهيم باصحابها وتاخذهم لعالم لايشعرون فيه بأحد سواهم لايريدون التحدث سوى بقلوبهم الالسنه ليس لها مكان فالقلوب هى التى تصدق الحديث وليس غيرها
ولكن كم من عاشق اتعبه العشق وارهق قلبه الهوى والغرام ، وكم من محب فقد حبيبه وعانى فراقه، وكم من محب اتعب نفسه لينال قلب من أحب.
نعم فهذه هى الحياة التى تعطينا ماتعطى وتأخذ منا ماتاخذ
وليس لنا من الأمر شيء
فالقلوب ليست بأيدينا وانما يقلبها الرحمن كيفما يشاء
فى لندن عاصمة الضباب
_ رجل يتحدث الى امراة انجليزيه
المرأة :? why didn, t you come yesterday
الرجل: .l, m sorry Jina l, am very basy
Jina my brother want, s to speak to me lwill
speak to you latter.
يغلق معها الهاتف ليرد على أخيه الكبير والذى يعتبره بمثابة الأب له لاعتنائه به وشدة خوفه عليه وحبه له:حبيب قلبي الباشا بنفسه بيتصل بية.
يزيد:ماشي يابكاش فينك يا عم انت
بقالك اسبوع ماتصلتس ولا سألت يعنى
عمر:حقك علينا ياسيادة البشمهندس كنت مشغول اوى الفترة دى.
يزيد:وحشتنا اوى ياعمورة مش ناوى بقى تنزل مصر شويه بقالك اكتر من سنه مانزلتش احنا ماوحشنكش واللا إيه.
عمر:وحشتونى اوى والله ياحبيبى بس انت عارف يايزيد انا مش بحب اقعد فى مصر ومرتاح هنا اكتر.
يزيد:هوفى حد يرتاح فى الغربه ياعمر واللا انت عجبتك الحياة اللى انت عايشها.
عمر:عادى يايزيد. متكبرش الموضوع.
يزيد:لا مش عادى ياعمر انا مش عجبانى الحياة اللى انت عايشها دى سهر وشرب وعلاقات وكل فلوسك مضيعها فى الهوا مينفعش كده لازم تستقر بقى
عمر انا محتاجلك جمبي انت حتنزل مصر يعنى حتنزل وده اخر كلامى عندى.
عمر:فى ايه يايزيد مالك انت اول مرة تكلمنى باللهجه دى.
يزيد:عشان تعبت منك ياعمر وجبت اخرى معاك فى الاول قلت عاوز تكمل تعليمك برة وانا معترضتش وقلت ماشي واقنعت بابا انك تسافر على أساس انك حترجع بعد كده وتساعدنى وتقف جمبي فى الشركه لكن لقيتك استحليت الموضوع وسنه تمر وتمر السنه اللى وراها وانت مش عاوز ترجع لحد امتى لحد امتى ياعمر مينفعش كده انت لازم ترجع بقى وتستقر معانا وتقف جمبي انا محتاجك ياعمر
عمر:مانت معاك على يايزيد عاوزين منى انا ايه سيبونى فى حالي
يزيد:عمر انت عارف كويس ان على بالنسبه لى مش مجرد ابن عمى واللا جوز اختى لاء
على اخويا زيه زيك وشايل الشغل على دماغه ويمكن بيتعب فى الشركة اكتر منى كمان بس هو كمان تعب يااخى وايه رايك بقى ان هو اللى اصر علية انى اطلب منك ترجع
عمر افهمنى الحمد لله الشركه بتكبر واسمها مسمع فى الشرق الأوسط كله واحنا محتاجين نبقى ايد واحده عشان الشركه تفضل واقفه على رجلها الشركه محتاجانا كلنا افهمنى ياعمر
عمر انا زمان قدرت حالتك النفسيه اللى ماكنش لها اى أساس من الصحه وقلت معلش لسه صغير ومتاثر باللى حصل مع ان دى كانت ارادة ربنا لكن خلاص انت كبرت وبقيت راجل لازم تفوق بقى وتتحمل معانا المسئوليه.
عمر:ياربي يزيد انت عارف ان الدنيا كلها عندى فى كفه وانت فى الكفه التانيه وطلباتك أوامر بس الكلام فى المواضيع المصيريه دى ميتاخدش بالشكل ده
بقولك ايه ياباشا مش انت المفروض دلوقتى فى الشركه
يزيد:ايوة طبعاانا فى الشركه امال حكون فين يعنى
عمر:طب روح شوف شغلك وحكلمك بالليل وحريحك يايزيد
يزيد:ماشي ياعمر اما اشوف اخرتها معاك ايه حتفضل طول عمرك تاعب قلبي بس اعمل حسابك ياعمر انى المرة دى مصمم ومش حتعرف تضحك علية بكلمتين زى كل مرة
عمر:سلامة قلبك ياحبيب قلبي خلاص بقى قلتلك حنتكلم والله وحعمل اللى يريحك ان شاء الله
صحيح كل سنه وعشق طيبه وعقبال ماتشوفها احلى عروسه في الدنيا كلها
يزيد :انت فاكر عيد ميلاد عشق طب والله كويس ده انا قلت أكيد ناسي
عمر:معقوله بردو أنسى حبيبتنا كلنا حبيبة قلب عمها
يزيد :طب مش المفروض تنزل وتقولها كل سنه وانتي طيبه
عمر:ومين قالك انى مش حقولها كل سنه وانتى طيبه آكيد طبعا حقولها
يزيد :ماشي ياعمر انا حقفل معاك دلوقتى بس اعمل حسابك تخلص كل اللى وراك عشان حتنزل يعنى حتنزل
أبوك تعبان يابارد
عمر:بابا تعبان ماله بابا ياعمر متخبيش علية بابا فيه حاجه.
يزيد:كبر ياعمر وبقت صحته فى النازل ومحتاج ولاده يكونوا جمبه وانت عارف غلاوتك عنده اد إيه واللا انت عندك شك فكده
عمر:ليه الهجوم ده يايزيد انت ليه جاى علية أوى كده
خلاص يايزيد حريحكم كلكم ان شاء الله
يزيد :ان شاء الله يا عمر ياللا انا حسيبك دلوقتى ونكمل كلامنا وقت تانى
عمر:بوسلي عشق وقللها كل سنه وهى طيبه
يزيد:انا مليش فيه انت اللى تكلمها وتقولها بنفسك
عمر:بس كده من عينيه هو انا عندى اغلى من عشق
يغلق معه الهاتف ويدعو له الله:ربنا يهديك يا عمر يااخويا يارب.
فيجد على يفتح عليه الباب:خلصت يايزيد انا حموت من الجوع والجماعه مستنيينا فى البيت.
يزيد:ايوة ياعلى خلصت ياللا بينا
💗💗💗💗💗💗💗💗💗💗
فى داخل احدى الفيلات الراقيه التى تحيطها الأشجار والزهور من كل ناحيه تلك الفيلا التى يسكنها عائلة يزيد المهدى حيث تجلس عائلته لتناول وجبة الغداء
يجلس شاكر على رأس المائده وبجانبه زوجته هاله
ويجلس يزيد بجوار عاليه ويجلس على بجوار مروة
بينما أنس العاشق الصغير يجلس بجوار عشقه وحبيبته الصغيره عشق:عشق كلى دى كمان
عشق:شبعت ياانس مش قادرة خلاص
أنس :طب خدى دى عشان خاطرى
عشق:حاضر ياانس
مروة:الحقينى ياعاليه العيال دول حيموتونى صبرنى يارب
عاليه:هههههه ياستى خليهم ينبسطوا
على:لا من ناحية ينبسطوا فهما مبسوطين عالاخر
أنس :خالو يزيد انا عاوزك فى موضوع خاص بينى وبينك ونقعد لوحدينا مش عاوز حد يقعد معانا
شاكر :ولا انا ياانس
أنس :لا ياجدو انت حبيبي انت تقعد معانا انت كمان
على: طب وابوك ياحبيبي ملوش فى الليله دى
أنس :بابا معلش حضرتك وماما وعمتو عاليه تقعدوا هنا محدش منكم يدخل معانا
عاليه:ليه بس ياحبيبي احنا زعلناك فى حاجه
أنس :سورى ياعمتو بس دى حاجه خاصه واوعدكم حبقى اعرفكم بعدين
هاله:بقى انت يامقروض ياصغير يطلع منك الكلام ده
أنس :ياتيته هاله انا اسمى أنس مش مقروض انا راجل
الكل يضحك على كلامه:هههههههههه هههههههه
مروة:الواد ده حيعلليلي الضغط.
هاله:بعد الشر عنك ياحبيبتى وبعدين أنس ده سكر عسل
مروة:ماما حرام عليكى انتى مش شايفه بيتكلم ازاى
بقولك ايه مش هو حبيب قلبك خليه عندك عالاقل ارتاح من دوشته شويه
انس :ايوة ياماما سيبينى هنا مش عاوز ارجع معاكم البيت
عاليه:طبعا عشان تفضل لازق لعشق مش كده
أنس :ايوة انا عاوز افضل قاعد مع عشق على طول ومش عاوز اسيبها ابدا
يزيد:هههههه حبيب قلبي انت ياانس
أنس :وانت حبيبي ياخالو هاه قلت ايه فى الطلب اللى طلبته منك
يزيد :طلب ايه هو انت طلبت منى حاجه
أنس :ياربي عليك ياخالو كده بردو لحقت تنسى بقولك عاوزك فى موضوع من فضلك ياخالو نفذ طلبي.
يزيد:حاضر ياحبيبي بس بقولك ايه ممكن استئذنك نتكلم هنا مفيش حد غريب ياحبيبي
عاليه:اه والنبي عشان خاطرى ياانس عشان خاطر عمتو حبيبتك عاوزة اعرف الموضوع ده.
مروة:انا مامتك ياحبيبي يرضيك مامتك حبيبتك متعرفش
الموضوع الخطير اللى حيقف عليه مستقبل العيله الكريمه
أنس :ماما بتتريق علية ياخالو طب انا مش حقول حاجه
مروة:خلاص ياحبيبي مقصدش ياقلب مامتك بس قول بقى
أنس :ياربي عليكم ماشي خلاص موافق بس بشرط مش عاوز حد يدخل بينا احنا حنتكلم كلام كبار.
هاله:حاضر ياحبيبي محدش حيتدخل بس قول بقى
يزيد:خير ياحبيبي عاوز ايه
أنس :خالو انا عاوز اتجوز عشق.
يزيد:تتجوزها كده على طول ياانس.
أنس :ايوة ياخالو على طول ايه رأيك موافق اتجوزها واللا اتجوزها من وراكم
الجميع يضحك على هذا الكلام:هههههههه
على:وانت رايح تتقدم من نفسك كده من غير ماتاخد راي ابوك واللا ايه يااستاذ انت
أنس :مانت اكيد كنت حتعرف يابابا امال مين اللى حيشترى الشبكه ويشتريلي الشقه اللى حنتجوز فيها مش انت
على:لا والله كتر خيرك يابنى
أنس :ها ياخالو رأيك ايه قول بقى
يزيد:رأيي فى ايه ياتحفه انت
انتوا لسه صغيرين ياحبيبي لما تكبروا وتخلصوا دراستكم نبقى نتكلم فى الموضوع ده أن شاء الله
أنس :انا مش صغير ياخالو انا عندى ١١سنه انا مليش دعوة انا عاوز اتجوز عشق دلوقتى
يزيد:لا مش ممكن أفهمه ازاى ده بس افهم ياحبيبي مينفعش ياانس و بعدين انت لسه مكملتش ال١١سنه
مروة وهى تضع الطعام فى فمها:سيبك منه يايزيد ده عيل اهبل انت حتاخد على كلامه
شاكر:من شابه اباه فما ظلم
هو حيجيبه من برة ماابوه عملها قبل كده واللا نسيتي ياست مروة انتى والاستاذ على
على:ايوة فعلا حصل ياعمى بس انا كنت اكبر منه انا كنت فى اعدادى
شاكر:بص ياحبيب جدو مبدأيا انا موافق بس ممكن نأجل الموضوع ده شويه بس
أنس :بجد ياجدو موافق
شاكر:ايوة طبعا موافق ياحبيبي بس زى ماقلتلك لسه بدرى تمام
أنس :حاضر يا جدو بس بشرط
يزيد:انت بتتشرط كمان شرط ايه بقى ياحبيبي
أنس :توعدنى انى حتجوز عشق
عاليه:حبيب قلب عمتو ياناس
يزيد:اتشطر فى المدرسه وانا اجوزهالك ياحبيبي
أنس :اوعدك ياخالو حبقى شاطر واطلع الأول
عشق انا حتجوزك خلاص ياعشق ونلعب سوا واجيبلك حاجات حلوة ونروح الملاهى سوا
عشق:ههه هههه الله حروح معاك الملاهى ياانس
مروة:لووولى مبروك ياحبايبي الف مبروك فين الشربات ياجماعه
والله القعده دى كانت عاوزة عهد هى كمان عشان تبقى كملت
هاله:عامله ايه عهد فى كليتها يامروه
مروة:كويسه ياماما مانتى عارفه عهد طول عمرها متفوقه
هاله:ولسه بتروح الجيم
مروة:طبعا ده روحها ده الاسبوع اللى فات كان عندها دور برد جامد ومع ذلك قامت وراحت
هاله :وحشتني أوى بقالى فترة ماشوفتهاش
مروة:حقولها والله لما اروح تجيلكم ان شاء الله
وبعدين ماهى حتكون موجوده فى عيد الميلاد ان شاء الله
على:مروة ياللا بقى عاوزين نمشي انا تعبان وعاوز اروح انام
يزيد:مالك ياعلى حسك ملكش مزاج
على:النهارده اشتغلت كتير وحاسس انى تعبان عاوز أروح ارتاح شويه
يزيد:ماشي ياعلى روح بالسلامه
على:مروة ياللا بينا حبيبتى
مروة: تمام ياحبيبي ياللا بينا
وحضرتك يااستاذ مش ناوى تقوم معانا واللا ناوى تقعد هنا
أنس :استغفرالله العظيم ياربي أكيد حروح معاكم ياماما
عشق انا حقوم امشي مع بابا وماما ولما اروح حكلمك
عشق :ماشي ياانس
مروة:كتير كده كتير والله انا اعصابي مش حتستحمل ده كله
على:حبيب قلب ابوك من جوة بتفكرنى بشبابي ياضنايا.
انا فخور بيك يابنى والله بس ياللا بينا بقى وابقى كمل وصلة العشق دى مرة تانيه
أنس :ياللا يابابا
❤️❤️❤️❤️❤️❤️❤️❤️❤️❤️
فى احدى المطاعم الشعبيه
شمس:يااه رجلى اتكسرت من المشي ياايمان مش كنا جيبنا اى حاجه وخلاص
إيمان :ازاى يعنى اى حاجه وخلاص انتى عروسه ياحبيبتى ولازم تبقى حاجتك نمبر وان لما تتجوزى ان شاء الله حيبقى وراكى مصاريف تانيه كتير وبيت مفتوح مبيتقفلش ووقتها مش حتعرفى تجيبى حاجه تانى يبقى نجيب حاجات كويسه عشان تعيش معاكى ياحبيبتى
شمس:بس انا تعبتك معايا ياايمان انا مش عارفه من غيرك كنت عملت ايه ربنا يخليكى لية يارب وربنا يقدرنى وارد وقفتك معايا ياحبيبتى
ايمان:تعبتينى ايه ياعبيطه انتى اختى ياشموستى انا اهم حاجه عندى انك تبقى سعيده فى حياتك ياحبيبتى وربنا يطمنى عليكى يارب
شمس:يارب يامونتى المهم قوليلي بقى
انتى صحيح فى حد فحياتك واللا كنت بتهزرى
ايمان:بصي بقى انتى عارفانى مبعرفش اتكلم وانا جعانه اضرب طبق الكشري الأول وبعدين احكيلك كل حاجه
لو سمحت ياكابتن ناولنى الشطه اللى على الطربيزة دى
الرجل:اتفضلي ياانسه بس خللى بالك دى مولعه نار
ايمان:شكرا يا كابتن مننحرمش
شمس :يابنتى انتى حتفضلى طول عمرك فقريه كده.
إيمان :ليه بس ياشموستى عملتلك ايه.
شمس :كنت عاوزة اعزمك فى مكان كويس يافقريه حلاوة المكافأة تقومى تصري تاكلى كشرى انا مش عارفه ايه سر حبك للكشرى ده
إيمان :ياسلام يعنى المكافاه اللى اخدتيها تدفعيها فى غدا ليه يعنى ده انتى ناقصك حاجات كتير لسه ياقلبي وانتى اولى بكل جنيه
شمس :يعنى انتى بتوفريلي بقى
ايمان:حاجه زى كده وبعدين انتى عارفه انى مقدرش اعدى من قدام محل كشرى ومدخلش اكل انتى عاوزانى اتجنن يابنتى
شمس :يخرببيتك كل دى شطه حتموتى ياتحفه
ايمان وهى تضع الشطه فى الطبق:يابنتى الكشري ده عشقى الأول والأخير وشوية الشطه دول احلى حاجه فى الدنيا كلها
شمس :مانا بحبه بردو ياايمان بس مش زيك ياحبيبتى انتى مدمنه ده انتى ناقص تاخديه حقن هههههههه
إيمان :يابنتى طبق الكشري ده مش مجرد طبق فيه شوية حاجات على بعضها وخلاص لاء ده حاجه كده مرتبطه ببعضها ارتباط غريب ولو شيلتى حاجه فيهم بتحسي ان الطبق ناقصه حاجه ويفقد طعمه ومتكملش حلاوته بقى غير بشوية الشطه دول
شمس:يخرببيتك حتموتى
إيمان :هههههه متخافيش علية مش الشطه اللى حتموتنى عارفه ياشموستى طبق الكشري ده صورة للحياة اللى عايشينها
متستغربيش اه وربنا الحياة دى طبق كشرى كبير فيها كل حاجه حب وكره وزعل وحزن وفرح خوف وامل تفاؤل وياس
بس ايماننا بربنا اننا لازم نحمده على كل شئ هو ده اللى بيحللي الدنيا فى عنينا ويخلينا نستحمل اى حاجه
اه مانتى زى ما بتاكلى طبق الكشري برزه بمكرونته ببصله بعدسه
لازم تاخدى الحياة وتقبليها زى ماهى بحزنها قبل فرحها
شمس:ياسلام شوف ازاى ماكنتش اعرف انك فيلسوفه كده
ايمان:اممممم يالهوى عالطعامه ايه الجمال ده تحفه ملوش حل
شمس:ههههههه مجنونه وربنا قوليلي بقى يازفته ايه حكايتك بالظبط
ايمان:حسن
شمس:حسن مين
ايمان:حسن صاحب عصام اللى جه الشركه عندنا من حوالى ٣شهور عشان يسأل عن عصام
شمس:لا مش ممكن طب وايه اللى لم الشامى عالمغربي
إيمان :ماهو لما جه عصام مكنش فى المكتب وانا استقبلته فى مكتبي واتعرفنا على بعض وبقينا بنتكلم وبصراحه كده يعنى تقدرى تقولى بقى بيننا مشاعر حلوة
شمس:انتى بتتكلمى بجد يعنى اتعرفتوا على بعض واتكلمتوا وكمان حبيتوا بعض كل ده من ورايا ياجذمه كده بردو تخبي علية حاجه زى دى خسارة فيكى الكشري اللى كل شويه اعزمك عليه ده
إيمان:لا وربنا مااقصد أخبي عليكى يا قلبي بس انا مكنتش عاوزة اقولك غير لما اتأكد من مشاعره ناحيتى
كنت خايفه يكون حب من طرف واحد بس وابقى فضحت نفسي عالفاضي
وكمان انتى ياحبيبتى طول الوقت مشغوله وكنت مستنيه الوقت اللى اعرف احكيلك فيه كل حاجه
شمس:وعصام عارف علاقتكم
ايمان:لاء حسن قاللى مش حيقولله غير لما ناخد خطوة رسميه
شمس :غريبه مع انهم اصحاب أوى وانا كنت فاكرة انهم مبيخبوش حاجه عن بعض
إيمان :ايوة فعلا دى حقيقه بس هو عاوز كده
شمس :ربنا يهنيكى ويسعدك ياحبيبتى يارب
إيمان :ويطمنى عليكى ياشمس
ثم تحدث نفسها:ربنا يخيب ظنى فيك ياعصام يارب ويكون اللى سمعته ده مش حقيقى بس انا مش حسكت لازم اعرف وافهم اللى بيحصل بالظبط واخللى حسن يفهمنى كل حاجه
شمس:رحتى فين يامونتى اللى واخد عقلك ياقلبي
إيمان :تسلميلي ياحبيبة قلبي ااحطلك شوية شطه
شمس :ههههههههه لا يااختى حطى لنفسك انا مش عاوزة
كلى انتى على مااكلم عصام
عصام:ايوة ياشمس عامله ايه
شمس:تعالى كل معانا بناكل كشرى
عصام :بالهنا والشفا ليكم انتوا لسه مروحتوش
شمس:حناكل ونروح بقولك ايه ماتيجى تقعد معايا بالليل شويه خالتو بتسألني عنك وزعلانه منك عشان بقالك فترة مجتش عندنا
عصام :حاضر يا شمس بالليل حجيلكم شويه بس معلش حسيبك دلوقتى عشان تعبان وعاوز ارتاح
شمس:ماشي مع السلامه يا عصام
إيمان :مالك ياشمس فى حاجه
شمس:مش عارفه ياايمان في حاجه حساها بس مش عارفه ايه هى
ايمان :هو عصام قالك حاجه زعلتك
شمس:عصام متغير فيه حاجه غريبه مش هو حسه انى بكلم حد تانى تعرفى ياايمان عصام دايما كان لما يتكلم معايا يقوللى حبيبتى شموستى شمسي لكن بقاله فترة مبيقوليش غير شمس
إيمان :ودى حاجه تزعلك يعنى
شمس:ايوة طبعا ياايمان انا متعوده معاه على مشاعر نفسي تزيد اكتر مش تقل
إيمان :حبيبتى متقلقيش ان شاء الله خير يمكن يكون تعبان واللا حاجه
شمس:مش عارفه ايمان انا عاوزة امشي وحستناه لما ييجى بالليل عشان اعرف ايه حكايته بالظبط
يارب يكون خير يارب متفرقش بيننا ابدا يارب
انا بحبه اوى ياايمان وخايفه اوى يكون فى حاجه
إيمان :حبيبة قلبي متقلقيش نفسك ان شاء الله خير انتى طيبه ياشمس وان شاء الله ربنا مش حيكتبلك غير كل خير
شمس:يارب ياايمان يارب
يخرجان من المطعم وإيمان يتقطع قلبها على صديقتها الوحيده والتى تعتبرها بمثابة اخت لها وتدعو لها الله ان يريح قلبها ويقدر لها الله الخير كله.
♥️♥️♥️♥️♥️♥️♥️♥️
بعد مرور عدة أيام
فى فيلا المهدى
اغانى الاطفال والزينه والفرحة على وجوه الجميع بهذا اليوم السعيد الذى ولدت فيه اهم شخص فى حياة يزيد المهدى عشق التى اسماها عشق لانها هى عشقه الحقيقي
تجمع عائلي فلا أحد يستطيع الا يشارك هذه العائله فى الاحتفال باى مناسبه تخصهم
أنس ملازما لعشق لايقدر على الابتعاد عنها لحظه واحده
يرقص معها على اغانى الأطفال ومعهم عدد كبير من أبناء العائله والأصدقاء
هاله:وحشتينى اوى ياعهد بقالك فترة مجيتيش
عهد:معلش بقى ياطنط حقك علية بس حعمل إيه محاضرات وجيم وتمارين
هاله: حبيبتى ربنا ينجحك وتحققى كل اللى تتمنيه
عهد:يارب ياطنط
طنط هو عمر مش حينزل مصر قريب
هاله:ايه عمر لا معرفش والله
عهد:طنط انا اسفه والله انا مقصدش اضايقك
هاله:تضايقينى ليه ياحبيبتى عمر زى يزيد ومروة وربنا يعلم غلاوته عندى
عهد:حبيبة قلبي يالوله والله انتى مفيش حد زيك فى الدنيا كلها
هاله:طب انا حسيبك واروح اسلم على بقية الناس
عهد:اتفضلي ياطنط انا حروح لاختى اشوفها
يقف على مع صديق له فيجد عشق مقبله عليه وهى تبكى:عشق مالك ياحبيبتى بتعيطى ليه
عشق:أنس زعقلي ياخالو وشخط فية
على:زعقلك ليه الزفت ده وازاى يشخط فيكى
عشق:عشان كنت بلعب مع زين وشخط فية
على:معلش حبيبتى انا حجيبه واهزؤه قدامك
فيجد هذا العاشق مقبل عليه
على:انت ازاى يامتخلف انت تزعل عشق وهى الاميرة النهارده والحفله دى اصلا بتاعتها هى
أنس :بتلعب مع الواد زين يابابا وانا مش بحبه ده بارد ورخم
على:أنس اقسم بالله العظيم لو دمعه واحده نزلت من عيون عشق بسببك لامحيك من على وش الدنيا انت سامع وححرمك من اللعب معاها فهمت واللا اقول تانى
مروة تاتى على هذا الشجار:على فى ايه ياحبيبي صوتك عالى حصل ايه
على:فى ان الأهبل ده عايش الدور وعاوز يقرف عشق فى عيشتها انا واخد الموضوع بصفة ضحك وهزار لكن لو الزفت ده حيعيش علينا الدور حقطم رقبته انت فاهم واللا تحب افهمك بطريقتى
مروة:ينفع كده بردو ياانس كده تزعل عشق وبابا منك اتفضل اعتذر لهم ياللا حالا
انس اتقاء لشر والده:بابا انا مكنتش عاوز ازعلها والله انا اسف
عشق متزعليش منى انا اسف ياعشق عاوزة تلعبي روحى العبي بس متلعبيش مع زين
على :انس ياحبيبي مش انت بتحب عشق
أنس :ايوة يابابا بحبها
على:يبقى متزعلهاش تانى ابدا اللى بيحب حد ميزعلوش لاء لازم يفرحه ويخليه يضحك دايما انت بتشوفنى بزعل ماما او بشخط فيها
أنس :لاء يابابا انا بشوف ماما هى اللى دايما تزعق وتقول انا مجنونه
على:فى دى عندك حق بس بردو مامتك دى حبيبة قلبى
أنس :خلاص يابابا حاضر انا مش حخليها تزعل منى تانى ومش حشخط فيها تانى متزعليش ياعشق و ياللا بينا نلعب.
عشق:ياللا بينا ياانس
مروة:هههههه شفت بقى عمال تعللى صوتك وتنرفز نفسك وفى الاخر جرت معاه
على:يخرببيت عقلك ياانس الولد اكل بعقلنا حلاوة ههههههه
🌺🌺🌺🌺🌺🌺🌺🌺🌺
فى غرفة يزيد وعاليه
عاليه:مبسوط ياحبيبي
يزيد:وده سؤال بردو ازاى مش حكون مبسوط والنهارده أجمل يوم فى حياتى كلها
عاليه:هو ده بس السبب اللى مخليك مبسوط يايزيد.
يزيد:مالك ياعاليه فى حاجه ياحبيبتى حاسس انك عاوزة تقولي حاجه
عاليه:حبيبتك هو انا حبيبتك بجد يايزيد
يزيد:ايوة طبعا انتى بنت عمى ومراتى وحبيبتى وكل دنيتى
واللا انتى عندك شك فكده
عاليه:انا عمرى ماشكيت فى صدقك واخلاصك لحظه واحده يايزيد انت أطيب وأحن انسان علية فى الدنيا دى كلها
عمرى ماحسيت بالأمان غير وانا فى حضنك ثم تنهمر الدموع من عينيها
يزيد وهو يمسك يديها ويجلسها امامه على حرف السرير:طب ولزمتها ايه الدموع دى دلوقتى ده النهارده اجمل يوم فى حياتنا
النهارده اليوم اللى عشق نورت فيه حياتنا كلها
مالك ياعاليه مالك ياغاليه وايه الكلام الغريب ده عاليه هو انا عمرى قصرت معاكى في حاجه عمرك حسيتى ان قلبي مش معاكى
عاليه:ابدا والله يايزيد ده انت ابن عمى وحبيبي اللى عينى فتحت على حبه عمر مافى حد خطف قلبي ولا عشقته غيرك ياحبيبي بس
يزيد:بس ايه ياعاليه قولى ياحبيبتى اللي جواكى انا سامعك اتكلمى يابنت عمى
عاليه:حسه انى ظلماك معايا يايزيد
وفجأه يسمعون دقا على الباب فيقوم يزيد ليفتح الباب
عهد:ابيه الناس كلها بتسأل عنكم تحت
مالك يالولو فى حاجه
عاليه:لا ياروحي مفيش انزلى واحنا حنحصلك
عهد:حاضر
يزيد لعاليه وهو يحتضن:انا اكتر حاجه ممكن تقتلنى انى اشوف دموعك دى
العيون الحلوة دى اتخلقت عشان تضحك مش عشان تبكى
فترتسم ابتسامه جميله على وجه عاليه
يزيد :احلى ضحكه فى الدنيا من احلى واجمل عاليه
عاليه:ربنا يخليك لية ياحبيبي
يزيد:ويخليكى لية ياست الكل
ثم يمسكها من يدها ليهبطان للأسفل حبث يتواجد الجميع
على:أجمل سلام وتحيه لابو العروسه وام العروسه
يزيد :ههههههههه حبيبي ياابو أنس
ثم يسلمان على الجميع والكل يهنىئ بعيد ميلاد عشق
ثم يلتف كل العائله حول الطاوله الكبيرة والتى أعدت مخصوصا لصاحبة تلك الليله
ولكن فجاة تنطفئ الانوار، ويحدث حاله من الخوف والفزع بين الحاضرين
عشق:بابى انا خايفه
يزيد:متخافيش ياحبيبتى
على:فى ايه ايه اللى بيحصل ده من فضلكم ياجماعه محدش يتحرك لحد مانحل المشكله
❤️❤️❤️❤️❤️❤️❤️❤️❤️
عشاق الروايات
•تابع الفصل التالي "رواية شمس تتحدي الغيوم" اضغط على اسم الرواية