رواية شمس تتحدي الغيوم الفصل الحادي و الثلاثون 31 - بقلم عبير سليم
الفصل الواحد والثلاثون من رواية شمس تتحدى الغيوم
بقلمي :عبير سليم
💖💖💖💖💖💖💖💖
فى شقة عصام
عصام :هاجر انتى حتفضلي ساكته كده مبتكلمنيش
هاجر :عصام من فضلك ياريت تخليك فى حالك وتبعد عنى
عصام :ازاي يعنى أبعد عنك انتى مراتي وأم بنتى انتى هاجر اللى اتحديت الدنيا كلها علشانها وعلشان أكون ليها.
ازاى دلوقتى بتطلبي منى أبعد عنك
هاجر :انا عارفه انك اتحديت الدنيا عشانى ومبنكرش ده لكن انت خلاص لا بقيت طايقنى ولا عاوزنى شايفه عينيك كلها كره لية.
عصام :إيه الكلام الفارغ ده انا عمري ماكرهتك ياهاجر انا كاره تصرفاتك اللى بتتصرفيها.
بتتصرفي بشكل يخلينى احس انك مبتحبنيش زى مابحبك
هاجر :ليه عملتلك إيه طلبت منك شاليه فى الساحل واللا عربيه أحدث موديل مانا قابلاك بعيشتك كل ده عشان كام فسحه فسحتهالي واللا كام حاجه هبله اشتريتها لي كل شويه تقولي طلباتك كتير خربتى بيتى انزلي اشتغلي وساعدينى ليه يعنى ده كله لما انت مش قد فتح بيت كنت بتتجوز ليه ولما انت محتاج واحده تشتغل وتساعدك متجوزتش واحده بتشتغل ليه
ماهى كانت معاك اللى بتشتغل سيبتها ليه سمعت كلامى ليه ماكنت اتجوزتها وريحت نفسك وريحتنى.
عصام :عشان بحبك ياهاجر عشان بحبك انتى ضحيت بكل حاجه عشانك انتى.
جرحتها ودست عليها بكل قسوة عشان بحبك انتى.
مهمنيش الناس حتقول عليها ايه وانا سايبها قبل الفرح بأيام عشان خاطرك انتى.
نسيت كل اللى عملته معايا وكل وقفاتها اللى وقفتها معايا عشان مسيبكيش انتى.
طردتها من حياتى بكل جبروت متهزتش لدمعه من دموع عينيها اللى شفتها وهى نازله ادامى زى الشلال عشان هاجر.
عرفت ان جالها انهيار عصبي وان حالتها سيئه جدا وبىدو مهمنيش وقلت عادي حتنسى.
كل ده ليه هاه تقدري تقوليلي عملت كل ده عشان خاطر مين
عشان هاجر حبيبتى اللى عينى فتحت على حبها من أيام ماكنا فى ثانوي وبنروح الدروس سوا لحد مادخلنا الكليه مع بعض عمري ماحلمت بحياتى غير معاكى عمرى ماتمنبت اعيش غير وياكى انتى مش حد تانى
هاجر :اه عشان كده كل شويه تعايرني وتقوللى ياريتنى ماكنت اتجوزتك انا انخدعت فيكى ياريتنى ماسيبتها.
عصام :انتى السبب فى كل اللى انا بقوله ده انتى السبب لما تبقي طول الوقت مبتفكريش غير فنفسك وبس طبيعى لازم اقارن بينك وبينها صحيح انا مكنتش بحبها قد ماهى كانت بتحبنى بس كنت حابب حبها لية أكتر خوفها علية اهتمامها بية
انتى بقى فين من كل ده هاه انطقى بصي يابنت الناس انا من ساعة اللى حصل وانا عمال ادادي فيكى مش عشان دايب فهواكى دوب لا انتى قدرتي وففترة صغيرة اوى تغيري مشاعري من ناحيتك.
ولا عشان متكلمتيش وقلتى انى انا اللى عملت فيكى كده لا ياهاجر انا بعمل كده بس عشا بنتى اللى كنت حتسبب فى موتها وعشان بلوم نفسي على انى مديت اديا عليكى واناعمري مامديت ايدي على واحده ست.
لكن حتسوقي الهبل علية حوريكى اللى عمرك ماشفتيه انتى فاهمه واللا لاء فوقي كده وخللي بالك من اللى فبطنك وحافظى على بيتك ياهاجر يمكن نقدر نكمل مع بعض مش عشانى وعشانك لاء لكن عشان البنت اللى ملهاش اى ذنب انها تتربى بين اب وام بعيد عن بعض.
وده اخر كلام عندى ولو متعدلتيش الباب يفوت جمل بس تعملي حسابك انك حتخرجى من هنا لوحدك والبنت حتفضل معايا انا وانا اللى حربي بنتى وانتى مع الف مليون سلامه.
انا خارج رايح ازور ابويا واختى الأكل جمبك اهوه عن إذنك
يخرج عصام من الشقه بينما تحدث هاجر نفسها: بقى كده ياعصام العموم أحسن بردو فى ستين داهيه انا اصلا مش طايقه اعيش معاك بس ياترى علاء لما يرجع حيرضى انه يرجعلي تانى.
ايوة انا متأكده انه حيرجعلي هو بس زعلان منى لكن انا متاكده انه لسه بيحبنى وسلمى قالتلي انه متجوزش انا لازم اعرف حيرجع امتى عشان اتكلم معاه واخليه يسامحنى ونرجع لبعض تانى
💖💖💖💖💖💖💖💖💖
فى صباح يوم جديد وميلاد أمل جديد للحياة وتخطي مرحله من حياتنا واستقبال حياة جديدة تحمل لنا الأمل والتفاؤل.
فى احدى المستشفيات الخاصه فى داخل احدى الغرف
يجلس على الكرسي المتحرك وهو مرتدي روب العمليات وعلى قدمه طفله الصغير وبجانبه زوجته و معهم أيضا شمس.
وليد :بشمهندسه ممكن اطلب منك طلب
شمس :اتفضل ياوليد
وليد :لو ربنا أراد انه يسترد وديعته والوشوش متقابلتش تانى امانه عليكى أمل وزياد تخللي بالك منهم ومتسيبيهومش دول غلابه ملهمش حد فى الدنيا
أمل وهى تبكى :ألف بعد الشر عنك ياحبيبي ان شاء الله حتخرج بالف سلامه وحتخرج من هنا واقف على رجليك بامر الله ومحدش حيربي ابنك غيرك ياوليد
وليد :يارب ياامل يارب بس بردو عاوز قلبي يبقى مطمن من ناحيتكم.
شمس :وليد بلاش الكلام ده أن شاء الله حتبقى زى الفل وترجع تقف على رجليك تانى.
يدخل عمر عليهم :جاهز ياوليد
وليد :ايوة جاهز يابشمهندس.
يدخل الممرض:ياللا بينا يابطل العمليات جاهزة خلاص
شمس :هى مدة العمليه اد إيه
الممرض : لسه بدري مش اقل من اربع ساعات ادعوله بس ربنا يقومه بالسلامه.
يقبل وليد زياد ويحتضنه بشده وكأنه يخاف الا يراه ثانية ويحتضن زوجته ويوصيها على ابنه:امانه عليكى ابنى ياامل زياد امانه فى رقبتك ياامل تخللى بالك منه وتربيه كويس وتقوليله انى بحبه اوي وكان نفسي اكبره واعلمه واخليه راجل
وتخللى بالك من نفسك انا عارف انك جدعه وبميت راجل بس الزمن بقى وحش اوى والناس مبقتش زى زمان خللى بالك من نفسك ومن زياد ياامل
كانت امل منهارة من البكاء خوفا على زوجها
عمر:فى ايه بس ياوليد لزمته ايه بس الكلام ده أن شاء الله حتخرج بألف سلامه
يخرج وليد بصحبة الممرض على الكرسي ويقومون جميعهم بتوصيله حتى باب الاسانسير.
الممرض :خلاص دوركم انتهى الاسانسير طالع عالعمليات مباشرة ماينفعش حد يطلع دعواتكم.
ترتمى امل فى حضن شمس وتبكى بشده
بينما تبكى معها شمس وتصبر قلبها:اهدي اهدي ياحبيبتى ان شاء الله حيقوم بالف سلامه.
أمل :يارب يارب ده غلبان اوى وطول عمره شقيان ياحبيبي عمره ماشاف الفرح من اول ماوعت عينه على الدنيا
هيا ليه الدنيا جايه عالغلبان اوى كده.
سايبه القوي والمفتري يظلم ويتجبر ومبتهدش غير اللى ماشي جمب الحيط
شمس :ابتلاء ياامل ربنا بيحطنا فى ابتلاءات عشان يشوفنا حنصبر واللا لاء واللى بيصبر ربنا بيجازيه كل خير مش ربنا بيقول وانما يوفى الصابرون اجرهم بغير حساب
يبقى احنا لازم نصبر وندعي ربنا
اما بالنسبه للى بيظلم ده ربنا بيسيبه يظلم عشان حسابه بيبقى تقيل قوى
امل :يارب يارب يابشمهندسه يارب
كان عمر واقفا وهو يحمل زياد على كتفيه
امل :ياخبر يابشمهندس عن حضرتك تعبناكم معانا مش عارفه من غيركم كنا عملنا ايه ربنا مايرميكم فى ضيقه ابدا ويديم عليكم صحتكم وعافتكم يارب.
عمر :ماتقوليش كده ياامل الناس لبعضيها
شمس خليكى انتى مع امل ماتسيبيهاش وانا حوصل بس الشركه ادي الورق اللى فمكتبي لعلي يخلصه وحجيب يزيد وحنيجي ساعتين بالكتير وحنكون هنا بأمر الله ولو حصل اى حاجه كلمينى ياشمس.
شمس :حاضر ياعمر خللى بالك من نفسك
بينما فى داخل غرفة العمليات
ينام وليد على الفراش المخصص للعمليات ويوجد الدكتور الألماني وبصحبته اكثر من طبيب مصري وفريق الممرضين
الدكتور:انت اسمك إيه
وليد :هو حضرتك بتتكلم عربي
الدكتور:اوه بتكلم حلو كتير احسن منك يامصري انت انا بحب مصر كتير وكنت باجي على طول اشوف اهرامات واثار وكمان كنت بحب بنت مصريه كانت بتتعلم فى ألمانيا وهى علمتنى اتكلم عربي كويس
هاه اسمك ايه بقى
وليد :وليد تسمي وليد
الدكتور :ان شاء الله تخف وليد
وليد :انا حعيش يادكتور
الدكتور :اوه احنا بنعيش وبنموت بايد ربنا وحده فى واحد بيبقى تعبان سنين وسنين طويله بيتمنى الموت فى كل لحظه بس بيعيش لحد ماربنا بيريد.
وفى واحد بيكون سليم مش فيه اى حاجه وفجأة يموت من غير اى سبب.
بس ان شاء الله انت حتخف وليد احنا بس نطمن ان عملية نجحت وان شاء الله شوية تمارين وعلاج طبيعى حترجع تمشي وتجري زى الأول.
صلي على نبي كده مش انتوا قولوا كده مصريين
وليد :عليه الصلاة والسلام
الدكتور :عليه صلاة وسلام
وليد :هو حضرتك مسلم يادكتور
الدكتور :عشان قلت عليه صلاة وسلام مش انتوا قولوا محمد نبي عيسي نبي موسى نبي
وليد :وكل من ليه نبي يصللي عليه والابتسامه تملاء وجهه.
الدكتور :أيوة كده وليد اضحك ربنا كبير كلنا اعبد ربنا ربنا واحد بس كل واحد اعبده بطريقته
ولازم نكون مؤمنين بيه وليد صح واللا غلط
وليد :صح يادكتور حضرتك طيب أوى
الدكتور :ربنا قدرنى ان شاء الله واقدر اساعدك تقف تانى وتمشي انت متجوز وليد
وليد :أيوة متجوز وعندى زياد
الدكتور :مع ان شكلك صغير انت عندك كام سنه وليد
وليد :عندى ٣٢ س
لم يكمل وليد كلمة سنه وفد غاب عن الوعي
الدكتور :ياللا نقول زي مابتقولوا مصريين بسم الله الرحمن الرحيم
فى داخل الغرفه
شمس :أمل هو ليه مفيش حد جه غيرنا فى اهلكم ياامل
أمل :أهلنا احنا ملناش حد احنا غلابه يابشمهندسه
شمس :مااحنا كلنا غلابه ياحبيبتى بس بردو لينا اهل بيقفوا معانا عالاقل فى الازمات
أمل :انا ايويا الله يرحمه مات وانا صغيرة وامى الله يرحمها حصلته معرفش ماتوا من الفقر واللا من الرطوبه اللى كانت ماسكه فى جتتنا من البرد
لقيت نفسي عايشه فبيت خالى ومراته حق الله خالى كان راجل طيب بس ملوش كلمه شخشيخه فى ايد مراته توديه وتجيبه كانت مشغلانى خدامه عندهم حرمتنى من كل حاجه فى الدنيا اخدت الاعداديه بالعافيه
وبعد كده كانت عاوزة تجوزنى ابنها بالعافيه عشان افضل اخدم فيهم العمر كله
ولما رفضت ضربتنى وحرقتنى رحت عند شيخ الجامع وهو بهدل خالى ومراته وقعدنى عنده هو ومراته فى البيت
لحد ماجه وليد يزورهم كان قريبهم من بعيد وهو كمان زي حالاتى غلبان وملوش حد وعشان عارف ان الشيخ ومراته معندهمش ولاد كان بييجى يبص عليهم كل فترة
شافنى ومرة فمرة حبينا بعض
الشيخ الله يكرمه يارب جوزنا بس ابن خالى كان عايز ياذينا
الشيخ خاف علينا وادانا قرشين وقاللنا امشوا من هنا أرض الله واسعه لقينا نفسنا هنا فى اسكندريه ووليد اشتغل عندكم فى الشركه مع العمال وانا كنت عاوزة اشتغل اى حاجه ان شاء الله خدامه عشان اساعده لكن هو مرديش ابدا وقاللى انا لو مديت ايدي وقلت يامحسنين مش حسيبك تتمرمطي ابدا
والحمد لله ربنا كرمنا بزياد وكل يوم بنحب بعض اكتر لحد ماحصل اللى حصل
الدنيا مهنش علينا تسيبنا فحالنا جت علينا هى كمان
انا مليش حد غيره انا لو وليد حصلله حاجه انا مش حقدر اعيش انا بحبه اوى انا مستعده اعيش العمر كله خدامه تحت رجليه بس يفضل حسه فى الدنيا
شمس :اطمنى ياامل ان شاء الله حيخرج بالف سلامه
💖💖💖💖💖💖💖💖💖💖
بعد الظهيرة فى احد النوادي الرياضيه
يدخل سيف وبصحبته حنين وعهد فيجد اخاه سامر فى انتظاره :أهلا اهلا حمدالله على السلامه ياشباب
سيف :الله يسلمك ياحبيبي اعرفك بالبنات الحلوين عهد اخت على وبنت عم عمر والقمر دى حنين صاحبتها
يسلم سامر عليهم ويرحب بهم:بصوا بقى انتوا هنا حتنسوا اى جيم رحتوه قبل كده حتحسوا هنا انكم فى بيتكم حترتاحوا احلى راحه
سيف :انهى راحه بالظبط ياسامر
سامر :حنريحوكى ياشابه
فيضحكون جميعهم:هههههههه
يقوم سامر بتعريفهم على كل الموجودين فى المكان
ثم يبدءون فى ممارسة التمارين المعتادين عليها كان سيف يتحدث الى عهد ويحاول فتح الكثير من الموضوعات معها وهى كانت متجاوبه معه
بينما كان سامر يتحدث لحنين بناء على اتفاقه مع سيف حتى يعطيهم الفرصه ليتحدثوا سويا
سامر :وانتى طول عمرك بقى بتلعبي رياضه
حنين :من وانا فى اولى ثانوى
سامر :وانتى وعهد اصحاب من زمان
حنين :اه طبعا احنا مع بعض من اولى اعدادى كنا بنقعد فى نفس الديسك فى المدرسه وكنا بنروح دروسنا سوا كمان دخلنا نفس الكليه عشان منسيبش بعض
سامر :للدرجه دى انتوا صحاب
حنين :عهد صاحبتى واختى انا تقريبا مليش غيرها هى وتيته ربنا يخليهوملي
سامر :ربنا يخليهوملك بس انا اسف يعنى هو انتى ملكيش اخوات
حنين:لاء لية اخوات من ماما واخوات من بابا بس مفيش بيننا وبين بعض تعامل كتير
يفهم سامر ماترمي اليه من حديثها ويفهم بأن والدها ووالدتها منفصلين ولهذا لا تشعر بالحب سوى من اتجاه عهد وجدتها فقط لا غير
سامر :طب ممكن تعتبرينى صديق ليكى انا كمان
حنين :ده شيء يشرفنى طبعا
يتحدثان فى عدة موضوعات ويشعر سامر بالتعاطف تجاه حنين يرى فيها الأدب والخجل فيعجب بها وبحمالها الهادئ الذي يبعث الطمأنينه فى النفس
سامر :على فكرة انا ممكن كمان اساعدكم فى اى ماده صعبه عليكم
حنين :بجد حتعرف
سامر :طبعا يابنتى انتى متعرفيش سامر ده انا خمسه فواحد
واقدر اساعدكم فى اى حاجه
حتى اقدر كمان اقولك انتى بتفكري فى ايه دلوقتي
حنين :ياسلام على اساس انك دكتور نفسي حضرتك
سامر :تقدري تقولي حاجه زى كده
حنين :نعم هو مش انت خريج تجارة
سامر :وده يمنع يعنى انا بحب اقرا فكل حاجه وبحب يكون عندى علم بكل شئ
حنين :اممممم طيب كويس
سامر :طبعا كويس جده جربينى بس وحتشوفى
حنين :هههههههههه
سامر:الله ضحكتك حلوة كده وعينيكى كمان حلوين اوى
حنين :اعتبر دى معاكسه واللا إيه
سامر :لا والله مابعاكس انا بقول الحقيقه
حنين :ماشي شكرا بس انت مقلتليش بقى بفكر فى ايه دلوقتي
سامر :بتفكري فى انك عاوزة تعرفى كل حاجه عنى صح واللا غلط
فتشعر حنين بالاحراج وتسكت
سامر :ههههههه شفتى بقى بقولك ايه تعالي نشرب عصير برتقال فريش كده ونرجع نكمل التدريب تانى
حنين :ايوة بس يعنى
سامر :هو ايه اللى ايوة وبس ويعنى بقولك ايه الجيم هنا جيمنا ونعمل فيه اللى عاوزينه
حنين :ماشي
سامر :ايوة كده وبعد كده لما اقولك حاجه تقولي حاضر وبس
حنين :ياسلام وده على اساس ايه ان شاء الله
سامر :على اساس ايه والله ماعارف بصي انتى تسمعي الكلام وخلاص واللا عندك مانع
حنين :ههههههههههه
سامر :يادي النيله علية ياللا امشي قدامي
بينما على الجانب الآخر سيف :ايه ده انا لمحت سامر وحنين رايحين ناحية البوفيه
عهد :هو مسموح بشرب المشروبات خلال التمرين
سيف :يابنتى سامر ده استاذ وئيس قسم بيعمل اللى هو عاوزه من غير ماحد يقولله بتعمل ايه بقولك ايه تيجى نروحلهم
عهد :بس كده حنضيع الوقت
سيف :مايضيع مانا اصلا جاي عشان نضيع الوقت قصدي يعنى نتكلم مع بعض اكتر
عهد :مااحنا بنتكلم مع بعض اهوه
سيف :بس انا حابب اعرفك اكتر من كدا
عهد :مش فاهمه
سيف :طب تعالي نشرب العصير وافهمك
ياخذها ويتجهان ناحية سامر وحنين
سيف :اللى يشرب لوحده يزور
سامر :ياربي جه هادم اللذات ومفرق الجماعات
فيضحكون جميعا ويجلسون وقتا يملؤه الضحك والبهجة
💖💖💖💖💖💖💖💖💖💖
فى الشركه
عمر:امال سيف فين ياعلي
على :فى الجيم
عمر :نعم جيم يعنى سايب الشغل ورايح الجيم
على :اه يروح الجيم ميروحش ليه الجيم اهم من الشغل مليون مرة مش العقل السليم في الجسم السليم
عمر:عقل ايه وجسم ايه ياعلي
على انت مالك فى حاجه
على :حيكون في ايه يعنى ياتحفه انت المهم طمنى على وليد دخل العمليات
عمر:ايوة وشمس معاهم وانا حخلص شوية الشغل ده واديهولك واخد يزيد ونروحلهم
على:ماشي طيب انا حروح مكتبي وانت خلص الشغل وابعتهولي
يخرج على من المكتب ويتصل على سيف ليطمئن:ايوة ايه الاخبار
سيف :هو احنا لسه لحقنا ياعلى
على:ماشي يا فالح بقولك ايه تظبط مواعيد الجيم بعد كده بعد الشغل انا مش عاوز حد هنا يتكلم
سيف :حاضر والله ربنا يخليك ياعلي انا مش عارف أشكرك إزاى
على:مش لما تعمل حاجه تبقى تشكرني ياللا سلام دلوقتي
يسمع عمر دقا على باب مكتبه:ادخل
مياده :ازي حضرتك يابشمهندس
عمر :ازيك يامياده عامله إيه
مياده :الحمد لله والله بخير الف مبروك على الخطوبه
عمر :الله يبارك فيكي عقبالك أن شاء الله
مياده :ان شاء الله يا بشمهندس
اتفضل حضرتك دى كل الأوراق المسئوله من القسم عندنا
عمر:مش محمد زميلك هو اللى بيجيبلي الأوراق كل مرة
مياده :وهو فى مشكله انى اجيبها لحضرتك يعنى لو مضايق حضرتك خلاص اسفه مش حتتكرر تانى
عمر :لا طبعا الشغل شغل يامياده انا بس مستغرب مش اكتر
مياده :محمد اجازة النهارده مجاش وعصام كمان مجاش
عمر :ماشي يامياده عالعموم سيبي الأوراق وحخلصها
مياده:بعد اذن حضرتك يابشمهندس وتخرج مباشرة
بينما يبدا عمر فى مراجعة الأوراق سريعا تتحدث هى لصديقتها عبر الهاتف:ادينى عملت زى ماقلتيلي بالظبط بس تفتكري اللى احنا اتفقنا عليه حيحصل
انجى :عيب عليكى ده انا انجى امشي انتى ورابا بس وانتى حتدعيلي تعملى اللى بقولك عليه بالحرف
مياده :ماشي ياست انجى اما اشوف اخرتها معاكى ايه
تدخل ايمان المكتب لعمر:عمر هى البت دى كانت بتعمل عندك ايه
عمى:مالك ياايمان مفيش سلام حتى
ايمان :من فضلك ياعمر رد عليه الزفته اللى اسمها مياده دى كانت هنا ليه
عمر:بتجيبلي شغل ياايمان انتى ناسيه انها موظفه واللا ايه
وبعدين هو انتى عينتي نفسك وصي علينا واللا ايه
ايمان احنا بنحبك اه وبندلعك لكن بردو
إيمان :عمر من غير تجريح وكلام ملوش لزمه انا عارفه انى مش اكتر من موظفه فى الشركه منين مااروح تجيبوا مكانى عشرة لكن كل ده ميهمنيش انا اللى يهمنى حاجه واحده بس عمر وشمس حبهم اللى اتولد على ايدي لازم يستمر وانا مش حسمح لاى قوه فى الدنيا انها تهد الحب ده حتى لو ارتكبت جريمه
عمر :وليه ده كله ياايمان حصل ايه لكل ده
إيمان :عشان انت متعرفش الاعيبها كويس
عمر : دخلت بادبها ومعملتش اى حاجه سابت الورق وطلعت بمنتهى الادب وباركتلي كمان عالخطوبه يبقى فين المشكله بقى
إيمان :اقطع دراعي اما كانت بتدبر لحاجه دى سماويه انا عارفاها كويس
عمر :ماتقلقيش ياايمان حتى لو زى مابتقولي انامفيش قوة ممكن تبعدنى عن شمس
واسف حقك علية مقصدش ازعلك انتى عارفه انتى إيه بالنسبه لنا
إيمان :تما انا عارفه طبعا انك متقصدش تزعلنى
عمر:ياربي عالغرور
ايمان :مش غرور يابنى دى ثقه
عمر :ههههههههه ياعم ياجامد
يفتح يزيد ويدخل : ياسلام عالضحك والقهقهه هو ده اللى مستعجل مستعجل وانت عمال ترغي وتصحك مع الست الهانم
إيمان :تمام معالي الباشا لا حضرتك ده احنا كنا بنناقش بعض الامور العائليه
يزيد :ماشي ياهانم خلصتي شغلك؟ .
إيمان :طبعا ودى محتاجه سؤال اه صحيح فكرتنى بص بقى انا دلوقتى عملت شغلي وشغل سيف كمان هاه عشان تبقى واخد بالك بس عشان لما اطلب اجازة ماتقوليش لاء
يزيد :ياسلام يعنى انتى بتبتزينى
إيمان :عيب عليك معقوله بردو ابتز الباشا الكبير بس بردو بقولك عشان تحط ده فى عين الاعتبار
على:بسم الله ماشاء الله متجمعين عند النبي ان شاء الله
يزيد :اللهم امين يارب
عمر:خد ياعلي الأوراق اهيه ياللا يايزيد
يزيد :ياللا بينا
💖💖💖💖💖💖💖💖💖💖💖💖
تمر الساعات بطيئه كالسنوات لحظات مرعبه نشعر فيها بالخوف والرهبه من فقدان أعز الناس إلينا تحاول شمس تهدئة أمل التى لم تكف عن البكاء لحظه واحده
يجدون عمر ويزيد يفتحان باب الغرفه:السلام عليكم
شمس :وعليكم السلام ورحمة الله وبركاته
يزيد :هاه ياشمس طمنيني فى جديد
شمس :لسه والله مفيش حاجة محدش طمنا لحد دلوقتي
عمر :خير ان شاء الله
فجأة يجدون باب الغرفه يفتح عليهم ويدخل احد الممرضين
يزيد :إيه الأخبار
الممرض :خلاص حضرتك العمليه خلصت والمريض حيبجى هنا كمان شويه
عمر:هو مش حيدخل العنايه المركزه؟
الممرض :لاء الدكتور الالمانى قال ان حالته مستقرة وهو دلوقتى فى الافاقه خلاص يفوق وحنجيبه على طول بعد اذنكم
بعد مرور حوالي نصف ساعه
يزيد :حمد الله على السلامة يا وليد
وليد :الله يسلمك يا بشمهندس هى العمليه نجحت
يزيد :الدكتور جاى حالا وحيطمنا باذن الله
يدخل الدكتور:عامل ايه وليد
وليد :طمنى الله يخليك يادكتور انا حمشي تانى على رجلي واللا لاء
الدكتور :ليه تشاؤم ده وليد
كان يتحدث وهو يغرز دبوس فى رجله :هاه حاسس بحاجه وليد
وليد:اه حسيت بحاجه شكتنى
الدكتور :حاول تحرك صوبع رجلك كده وليد
فيقوم وليد بتحريكها ببطء
الدكتور :حمد الله على سلامتك وليد
اطمنوا كلكم عمليه نجحت
امل :بجد بجد والنبي يادكتور يعنى جوزى حيرجع يمشي على رجليه تانى.
الدكتور :طبعا بجد مدام حيمشي ويجري كمان بس لازم علاج طبيعى فترة ونفسيه كتير حلوة مش يكون فى توتر او ازعاج او زعل من اى شئ لأن ده ياثر على حركته ويجيب نتيجه مش كويسه
يزيد :شكرا لحضرتك يادكتور
الدكتور :مفيش شكر ده واجبي وانا ببقى مبسوط كتير اما عمليه تنجح
يزيد :حيحتاح يقعد اد ايه هنا
الدكتور :حيقعد يومين دكاترة اطمنوا عليه وبعدين نبدأ فى الجلسات مع العلاج عشان عموده فقري يرجع زى اول واحسن كمان
يزيد :هو حضرتك حتسافر يادكتوراامتى
الدكتور :فى عمليه تانيه حعملها بكرة واسافر على طول بس مش تخافوا انا حتابع حاله من هناك
يزيد :شكرا لحضرتك مرة تانيه يادكتور
كان وليد يبكى كالاطفال غير مصدق انه سيقف على رجليه مرة ثانيه:الف حمد وشكر ليك يارب
أمل :حمد الله على سلامتك ياحبيبي الحمد لله ان ربنا وقف جمبنا الف حمد وشكر ليك يارب
شمس :حمد الله على السلامة يا وليد
وليد :الله يسلمك يا بشمهندسه
عمر:حمد الله على السلامة يا وليد ياللا شد حيلك كده عشان تكمل علاجك وترجع تنورنا بأمر الله
وليد :ان شاء الله أن شاء الله
يزيد :الف حمد الله على سلامتك ياوليد
وليد :انا مش عارف اشكرك ازاى يابشمنهدس انا لو قعدت اشكرك العمر كله مش حوفيك حقك ربنا يكرمك يارب ويعللى مراتبك كمان وكمان ومايحرمك من حبايبك يارب
يزيد :يارب ياوليد يارب
يمر اليوم ويعود كل الى بيته بينما تظل امل بصحبة زوجها تسهر بجانبه طوال الليل ولم يغمض لها جفن
حتى تشرق الشمس وتعلن عن ميلاد يوم جديد
يدق باب الغرفه عليهم فتحكم حجابها وتقوم لتفتح الباب:اهلا يااحمد اتفضل
احمد صديق وليد :حمد الله على سلامة وليد
أمل :الله يسلمك يااخويا
يفتح وليد عينيه:تعالى يااحمد
احمد :الف حمد الله على السلامه انا والله اول ماعرفت انك عملت العمليه جيت على طول
تقدم له كوب من العصير فيكاد ان يسقط من يديها
آحمد :على مهلك ياام زياد
امل :معلش يااحمد اصلي مش مركزه من قلة النوم
احمد :طب بقولك ايه انا النهارده عملت اذن روحى انتى ريحيلك ساعتين وانا حقعد مع وليد وتعالي براحتك
أمل :لا انا مقدرش اسيب وليد وأمشي
وليد :اسمعي الكلام ياامل انتى بقالك يومين منمتيش روحي واحمد معايا
تاخذ امل صغيرها وتذهب للبيت طلبا للراحه تطعم صغيرها فيذهب فى سبات عميق
بينما هى تضع راسها على الوساده ولا تكاد عينيها تغمض وتستسلم للنوم حتى تسمع طرقا على الباب
ياربي مين اللى ببخبط دلوقتى بس
تفتح الباب فتجده أمامها :ابو جنى خير فى حاجه
فتحى :لا ابدا كنت عاوز اطمن على وليد معلش معرفتش اجيلكم المستشفى امبارح
أمل :الحمد لله والله بخير
فتحي :يعنى العمليه نجحت
أمل :ايوة نجحت الحمد لله
فتحى:طيب بس كنت عاوز استئذنك لو ينفع تدينى مفتاح الانبوبه انتى عارفه حبيبه عند امها وانا مش عارف هى شايلاه فين
امل :حاضر ثوانى
تدخل امل لتحضر له ماطلب فتتفاجا به أمامها
امل :ابو جنى ايه اللى دخلك هنا
فتحى وهو يقترب منها:انا داخل عشانك ياامل
انتهى البارت النهارده يارب يكون عجبكم واشوفكم البارت الجاي ان شاء الله
ياريت اللى يعجبه البارت يدعيلي دعوة حلوة عشان عينيه وجعانى اوى وعماله احط قطرة من امبارح عشان اعرف اكتبلكم الفصل لدرجة انى بفكر اشرب القطرة بدل مااحطها فى عينيه يمكن تعمل مفعول
تعليقاتكم وتوقعاتكم ولايكاتكم يااجمل فانز فى الدنيا
🍎🍎🍎🍎🍎🍎🍎🍎🍎🍎🍎🍎🍎🍎🍎
•تابع الفصل التالي "رواية شمس تتحدي الغيوم" اضغط على اسم الرواية