رواية شمس تتحدي الغيوم الفصل الخامس و الثلاثون 35 - بقلم عبير سليم
الفصل الخامس والثلاثون من رواية شمس تتحدى الغيوم
بقلمي :عبير سليم
💖💖💖💖💖💖💖💖
فى فيلا عائلة المهدي فى غرفة عليا ويزيد
عليا:عهد ياحبيبتي انتي متأكده من مشاعرك ناحية سيف
عهد :أيوة ياعليا متأكده اانتى عاوزة تقولي حاجه
عليا:ايوة ياحبيبتى عاوزة اقولك ان الجواز مش لعبه وجرح المشاعر أكبر مليون مرة من أى جرح فى الدنيا
عهد :انتي ليه بتقوليلي كده ياعليا
عليا :عشان انا خايفه تكوني قررتي توافقي على سيف عشان تنسي عمر مش اكتر سيف إنسان كويس اوى وميستاهلش منك انه يكون مجرد وسيله للنسيان مش اكتر
عهد :متقلقيش يالولو انا منكرش انى فى الاول كنت بوافق انى اروح معاه الجيم واخرج معاه عشان ابطل افكر فى عمر لكن مع الوقت اتعلقت بيه بقيت بحب اخرج معاه بقيت بفرح لما الاقي اسمه على شاشة التليفون بقى بيوحشني لما بيغيب عنى يوم واحد مشوفهوش فيه حبه لية واهتمامه بية فى ادق تفاصيل حياتى خلاني غصب عني اتعلق بيه وابطل افكر فى عمر بقيت لما بشوف عمر قلبي مبيدقش زى الاول ولما اسمع صوته يبقى شئ عادي بالنسبه لي
انا مش عارفه اذا كنت بحبه واللا لاء بس انا بحب اشوفه بحب افضل معاه بحب اتكلم معاه بحس معاه بالراحه وبالامان والاكتر من كل ده انى بقيت حبه انى ارتبط بيه.
واطمني يالولو انا عمري ماحجرحه او اتسببله فى اى الم لانه ميستاهلش مني غير كل خير
انا جربت انى أحب من طرف واحد لقيته شئ وحش اوى وصعب وتعب قلب عالفاضي
كنت طول الوقت بتمنى نظرة كلمه ضحكه شبه الشحاتين لكن انا دلوقتى معايا كل ده من غير مااطلبه ودي نعمه كبيرة اوى من ربنا ويبقى غباء مني لو فرطت فحاجه زى دى
عليا :ياحبيبتى ياعهد ربنا يكملك بعقلك يارب انا مش مصدقه انك كبرتي وبقيتى بتفكري صح بالشكل ده
عهد :وجودكم فى حياتي هو اللى قواني وكمان جدة حنين صاحبتي اتكلمت معايا وحكتلي قصة جواز مامة حنين وباباها وبصراحه انا خفت يحصللي كده
عليا :للدرجادي
عهد :ايوة يالولو انا عارفه ان باباها ومامتها منفصلين بس مكنتش اعرف السبب وعمري ماسالت حنين لأن ده شئ ميخصنيش لكن جدة حنين قالتلي ان مامة حنين كانت بتحب بابا حنين اوى وهى اللى فضلت تجري وراه لحد مااتجوزته لكن بعد مااتجوزوا هو مقدرش يحبها وهى كانت طول الوقت حاسه انه على علاقه بحد غيرها والشك والغيرة ملوا حياتها وكترت بينهم المشاكل لحد ماكرهته وقرروا هما الاتنين ينفصلوا وكمان عشان تعند معاه اتجوزت وهو كمان اتجوز وحنين كانت هى الضحيه الوحيده ونصحتني اني اتمسك بسيف وماسيبهوش مهما حصل
وانا بصراحه اقتنعت جدا بكلامها خصوصا انى بثق جدا فيها
عليا:الدنيا ياما فيها ياعهد وربنا يكتبلك الخير يارب
يدخل عليهم يزيد:ايه ياعليا هو انتوا كل ده لسه قاعدين والناس على وصول ياللا بقى قوموا البسوا
عهد:حاضر ياابيه
فيمسكها يزيد من كتفيها ويقبلها من جبينها:الف مبروك ياحبيبتى
عهد :ربنا يبارك فيك يارب عقبال عشق
يزيد :فرحتي بيكي النهارده مش اقل من فرحتي بعشق انتي بنتنا كلنا ياحبيبتى وربنا يكمل فرحتنا على خير يارب
عهد :انا بحبكم اوى انا بحسد نفسي عليكم وعلى حبكم لية انا عمري ماحسيت اني يتيمه ابدا من يوم ماوعيت عالدنيا وكلكم محاوطني بالحب على وعليا ومروة وحضرتك وعمى وطنط هاله كلكم حواليه ومهتمين بأدق تفاصيل حياتي ربنا يخليكم لية يارب انتوا اجمل عيله فى الدنيا كلها
يزيد:وانتى تستحقي الحب والاهتمام ده ياعهد انتى طول عمرك مثال للادب والاخلاق العاليه وعمري ماثقتي فيكي اتهزت ابدا
ياللا بقى يابنتى والد سيف اول مرة حيدخل بيتنا مينفعش نسيبه ملطوع
عهد :حاضر
تخرج عهد لارتداء ملابسها بينما ترتمي عليا فى احضان حبيبها:بحبك اوي
يزيد :بموت فيكي اوى
بعد قليل من الوقت يجلس الجميع مع سيف ووالده واخوه سامر
شاكر :البيت منور والله يا جماعه
سيف :منور بوجودك والله ياعمى
شاكر :انا اتشرفت بمعرفتك يابشمهندس
سعد والدهم:الشرف لية والله انا من زمان نفسي اتعرف عليكم من كتر كلام سيف عنكم
تنزل عليا وفى يديها عهد :مساء الخير ياجماعه
الكل يرد :مساء النور
شاكر :عروستنا الحلوة
سعد :بسم الله ماشاء الله إيه الجمال ده كله
عهد :ميرسي يااونكل
سعد :احنا يسعدنا ويشرفنا ان عهد تنور حياتنا وتوافقوا على جوازها من ابني سيف
شاكر :واحنا عمرنا ماحنلاقي لعهد أحسن من سيف ولاعمرنا حنطمن عليها غير مع سيف
سعد :حيث كده بقى ممكن تقولولنا طلباتكم
شاكر:طلباتنا ان سيف يحط عهد فى عينيه الاتنين ومشوفش دمعة حزن واحده فى عينيها
سيف :عهد في عينيه والله ياعمى
سعد :سيف عنده شقته وانا والله اللى كانت واقف على ايد العمال وعامله كل حاجه بنفسي ولو عروستنا عاوزة تغير فيها اى حاجه من عينينا
علي:اللى عرايسنا عاوزينه نعملهولهم ان شاء الله
سعد:طب احنا ممكن نقرا الفاتحه
شاكر :طبعا ممكن نقرا الفاتحه
يبدأ الجميع فى قراءة الفاتحه والدعاء لهم باتمام فرحتهم على خير
يجلس الجميع يتكلمون فى عدة موضوعات ليتعرفوا اكثر على والد سيف ولقد ابدوا اعجابهم بيه وبشخصيته وحبه الشديد لسيف برغم انه ليس والده الحقيقي وانما هو زوج امه الذي رباه منذ الصغر
بينما علي أخذ عهد وسيف واجلسهم فى الحديقه ليتحدثوا سويا
عهد :باباك شكله طيب اوى وبيحبك اوى
سيف :بابا ده وهو وسامر احلى حاجه فى حياتي
عهد :امممممم طيب
سيف:لا ياحبيبتى انا مقصدش والله انا اقصد من ناحية النسب والعيله لكن انتى حاجه تانيه خالص ياعهد انتى الحب اللى كنت بدور عليه طول عمري انتى حبي الوحيد
عهد:اشمعنى انا انت كنت عايش برة سنين طويله واكيد شفت كتير ليه انا
سيف :فعلا زى ماقلتي لكن انا عمري ماحسيت بميل ناحية اى واحده فيهم انا طول عمري نفسي اتجوز بنت من بنات بلدى وأول ماعيني شافتك قلبي مبطلش دق حسيتك بتجري جوايا من غير مااحس عهد انا بحبك اوى
عهد :انت كتير علية اوى ياسيف
سيف :بالعكس ده انتى اللى كتير علية اوى انا حاسس انى بحلم مش مصدق نفسي اننا خلاص بقينا لبعض
عهد :اطمن ياسيف احنا بقينا لبعض خلاص وان شاء الله مفيش حاجه حتفرق بيننا غير الموت
سيف :بجد بجد ياعهد
عهد انتى بتقولي الكلام ده من قلبك حساه ياعهد
عهد:حساه اوى كمان وعمري ماحسيته مع حد غيرك انت حبي الحقيقي ياسيف اللى مش ممكن حتنازل عنه مهما حصل
سيف :ولا انا ممكن اتنازل عن حبك ده ياعهد
يستمر الحديث بينهم وتتاكد عهد من حسن اختيارها تشعر بالرضا والإرتياح لهذا القرار
ثم يستئذنون ويغادرون المنزل ويجلس الجميع مع بعضهم البعض
بينما كان انس جالسا كاشر الوجه لا يتحدث إليهم
مروة:انوس مالك ياحبيبي
انس :مفيش ياماما
مروة :لاء فى حاجه انا ملاحظه من الصبح انك ساكت حتى مبتلعبش مع عشق
فنزلت الدموع من أعين انس وقام من المكان سريعا
عليا :الله هو فى ايه عشق انتى زعلتي أنس فى حاجه
عشق :لا والله يامامي هو مش بيتكلم معايا وقلتله نلعب مرضاش
على:عمى انت ساكت ليه
يزيد:عشان عارف السبب وانا بصراحه مش عارف انتوا مستغربين ليه
شاكر :معلش يابني العيله دى مفيهاش غيرك انت ياحبيبي اللى بتفهم الباقيين دول مخهم على ادهم
يعني انتوا مش فاهمين ان أنس زعلان عشان عهد
على وهو يضرب على جبينه:تاهت منى ازاي دي
ده انس مرتبط جدا بعهد وكل أسراره معاها واكيد زعلان انها حتتجوز وتمشي
تقوم عهد من بينهم لتصعد وتتحدث اليه
على :عمى بعد اذنك انا حعمل خطوبة عهد قاعه ان شاء الله
شاكر :ليه بس ياعلي مانعملها هنا فى الفيلا
علي:معلش ياعمي كان نفسي والله تبقى خطوبة عهد هنا بس تقريبا خطوبتهم حتبقى مع خطوبة سامر هو كمان فمش حينفع
شاكر :خلاص ياعلي ولابهمك واحد يابنى سواء هنا او فى اى مكان كده كده كلنا حنكون موجودين بأمر الله
علي:ربنا يخليك لينا ياعمى
بينما فى الاعلى
عهد:انت زعلان انى حتخطب ياانس خلاص ياحبيبي انا حرفض سيف واقولله انا مقدرش ازعل انوس ابدا
أنس :لا ياعهد انا مش زعلان انك حتتجوزي وانا بحب سيف اوى بس انتى حتوحشيني اوى
انتى صاحبتى بحكيلك كل حاجه تعرفي عنى اللى بابا وماما ميعرفهوش وبعدك عني حيفرق معايا ياعهد
عهد :وانا عمري ما حبعد عنك ياحبيبي انت عارف ياانوس لما مروة ولدتك انا اول واحده شيلتك وعلي كان عاوز يسميك سليم على اسم بابا الله يرحمه لكن انا مرضتش وقلتله انا عاوزة اسنيه أنس ووقتها الكل استغرب اشمعنى الاسم ده وانا قلتلهم عشان حيبقى انيس لية وحيبقى اخويا وصاحبي ومن يوميها وانت مفارقتنيش ياحبيبي وعمرك ماحتفارقني ابدا ياانس ياحبيبي
يرتمي أنس فى حضنها:وانا بحبك اوى ياعهد انتى مش عمتى انتي اختي وصاحبتى
عهد :مش حتقوللي بقى مبروك
أنس :مبروك ياعهد
عهد:الله يبارك فيك يا قلب عهد
فى اليوم التالي يذهب سامر بصحبة ابيه واخيه لخطبة حنين وكانت عهد متواجده مع صديقتها
حنين:انا خايفه اوى ياعهد
عهد :ليه بس ياحبيبتى
حنين :قلقانه حد من اهلي يعمل مشكله مع سامر اصلي عارفاهم ميهمهمش غير المظاهر
عهد :متقلقيش خير ياحبيبتى ان شاء الله
بينما فى الخارج يجلس والد حنين وجدتها:شايفه الهانم بنتك مجتش لغاية دلوقتي ازاى
الجده:معلش يابني الغايب حجته معاه زمانها جايه
يعلن الجرس عن وصول احد ما
الجده:اهيه اكيد جت تخرج عهد سريعا لفتح الباب ظنا منها انها والدة عهد فتتفاجا بوصول سامر وعائلته
يدخلون ويسلمون على جدة حنين وعلى والدها
تدخل عهد الى حنين لتخبرها عن وصول سامر
حنين :وماما مجتش ياعهد
عهد :لسه اكيد زمانها جايه متقلقيش بقى
تأخذها عهد ويخرجان للسلام على سامر وعائلته
سعد :بسم الله ماشاء الله ولادي الاتنين عرفوا يختاروا الصراحه
جدة حنين:حنين وعهد طول عمرهم صحاب مبيسيبوش بعض ثانيه واحده وتحسهم بقوا شبه بعض فى كل حاجه
سيف :وحيفضلوا اصحاب العمر كله ان شاء الله
سعد وهو يوجه حديثه لوالد حنين :اعرفك بية انا سعد عبدالرحمن كنت مدير عام بس حاليا على المعاش وفاتح مطعم صغير كده بتسللى فيه وده إبني الكبير سيف مهندس فى شركة المهدي للمقاولات وواول امبارح ربنا وفقنا الحمد لله وقرينا فاتحته على عهد المهدى اخت اصحاب الشركه
وده بقى سامر ابني الصغير عنده خمسه وعشرين سنه خريج تجارة وبيشتغل محاسب فى بنك وعنده شقه فى منطقه كويسه ويشرفنا اننا نتقدم لحنين وتكون من نصيبه وحضرتك تقدر تاخد وقتك وتسال عننا كويس
والد حنين :واحنا اتشرفنا بمعرفتك يابشمهندس وبعدين احنا مش محتاجين نسال عنكم سيماهم على وجوهم
واذا كان اهل عهد وافقوا على سيف يبقى اكيد احنا كمان حنوافق على سامر
سعد :وطلباتكم اوامر
والد حنين :احنا حنعمل زى كل الناس واللى علينا حنجيبه لبنتنا اهم حاجه تكون سعيده فحياتها
سامر :اطمن على حنين معايا حضرتك
ياخذون وقتهم فى الحديث وقد سعد قلب سامر بموافقة اهلها على الارتباط وتم تحديد موعد الخطبه الذى سيوافق ميعاد خطبة سيف وعهد
ثم يستئذنون فى الذهاب ويأخذون عهد فى طريقهم لتوصيلها للبيت
بينما ظلت حنين تبكي على حالها
جدتها :ليه بس كده ياحنين مش انتى فرحانه ياحبيبتى
حنين :شفتي ماما ياتيته لاجت ولا اهتمت حتى تسأل ده بابا اللى انا كنت خايفه انه ميجيش جه واستقبلهم كويس وماما متجيش ليه هو انا عملتلها ايه هى ليه بتعاملنى كده ليه بتعاقبني هو انا اللى قلتلها تخلفني انا اللى قلتلها تتطلق وترميني
جدتها:نصيبك يابنتى واحمدى ربنا ياحبيبتى انه عوضك بواحد بيحبك وشاريكي ربك بيعوض ياحنين
ياللا قومي امسحي دموعك العيون الحلوة دى مينفعش تبكي ابدا دى لازم تفرح وبس
بس شفتى ياحنين سبحان الله بقى معقوله انتى وعهد تنجوزوا اخين سبحان الله
ربنا يتمملكم على خير يارب
حنين :يارب ياتيته يارب
💖💖💖💖💖💖💖💖💖
فى احدى الدول الاوروبيه يتحدث في الهاتف:الف الف مبروك يامعلم
سيف :الله يبارك فيك ياعمر
عمر:اوعوا تعملوا الخطوبه غير لما ننزل
سيف :ده أكيد طبعا بس انتوا نازلين امتى
عمر وهو يحتضن شمس :والله انا لو علية عاوز افضل هنا العمر كله
سيف :ياعم ياعم اوعدنا يارب
عمر:هههههههه ان شاء الله يا حبيبي عهد طيبه وحنينه بس هى محتاجه اللى يحتويها
سيف :ربنا يقدرني يارب واخليها أسعد انسانه فى الدنيا كلها
يغلق معه الهاتف لينظر لمن تسكن احضانه:الفرح لما بييجي بييجي مرة واحده
شمس :ربنا يجعل ايامنا كلها فرح باذن الله
عمر:طول مانتي معاياوفحضني ان شاء الله حتفضل ايامنا حلوة العمر كله
شمس:مبسوط يا عمر
عمر :لا بصراحه انا مش مبسوط خالص
شمس :ايه بجد مش مبسوط
عمر :ايوة طبعا انا مش مبسوط انا قلبي حيقف من كتر الانبساط انا سعيد لدرجه متتخيليهاش انا الزمن عوضني بيكى ياشمس ياريتنى كنت قابلتك من زمان وكنا ابتدينا حياتنا بدري شويه
بدل مانا باديها معاكى وانا عندي سته وتلاتين سنه
شمس :ده على اساس انى انا اللى لسه نونه مانا كمان عندي تسعه وعشرين سنه بس معاك بحس انى طفله بضفاير عمرها ست سنين
العمر مش بالسن ياعمر شهادة الميلاد دى مجرد رقم فى البطاقه مش اكتر وبعدين كل شئ، مقدر من عند ربنا مااحنا اتقابلنا زمان فاكر
عمر:ايه ده انت فاكرة
شمس :ايوة طبعا فاكرة ياعمر لما وقعت علية العصير
عمر:ازاي مااخدتش بالي منك وقتها ازاى مدخلتيش قلبى ساعتها كنا وفرنا على نفسنا وقت كبير اوى ضيعناه عالفاضي
شمس :ربنا ماكنش لسه اراد لينا اننا نتقابل ياعمر وياعالم يمكن لو كنت موجود ماكنتش عينك شافتني ولا عينى شافتك وانا كان قلبي مشغول بعصام
عمر :شمس من فضلك متجيبيش السيرة دى على لسانك
شمس :انت بتغير ياعمر
عمر:طبعا بغير ياشمس انا بغير من نسمة الهوى اللى بتعدي من جمبك يبقى ازاي مغيرش لما تنطقي اسم راجل غيري
شمس :عمر انت اسم مش محتاجه انطقه بلساني لأنه محفور فى قلبي
عمر :لا بصي بقى انتي كده عاوزة تجنيني
شمس :هههههههههه
عمر:هو انا حد دعالي في ليلة القدر واللا إيه
شمس :انت مش جعان
عمر:ميت من الجوع
تحاول شمس النهوض لتحضر له الطعام فيمسكها عمر من يديها:رايحه فين
شمس :رايحه اجيب الأكل مش انت جعان
عمر:توء توء انا مش جعان عاوز اكل انا جعان من حبك ياشموستي
فتنظر شمس للأرض فى خجل
عمر:يالهوي عالقمر بتاعي وهو مكسوف ياناس
شمس :بس بقى ياعمر
عمر: بس بقى ياعمر ياروح قلب عمر ياناس بقولك ايه تعالي بقى عاوز احكيلك على موضوع مهم جدا جدا
ثم يأخذها فى عالم تنبض فيها القلوب عن العشق الذى يكمن بداخلها
تمر عليهم الأيام والسعاده تملاء قلوبهم أصبح الحب يملاء حياتهم واصبحت الثقه بينهم تتعدى كل الحدود بينهم
💖💖💖💖💖💖💖💖💖💖💖
تخرج حنين من الجامعه لتجد سامر فى انتظارها لياخذها ويقوم لتوصيلها الى البيت تدخل فتتفاجا بوجود امها التى سمعت صوتها العالي منذ فتحها الباب
والدتها :اهلا بالعروسه الحلوة اللى رايحه تتخطبلي لحتة موظف كحيان ببمد ايده كل شهر عشان يقبض مرتبه
حنين:فى ايه ياماما حضرتك بتزعقي ليه وايه الكلام اللى حضرتك بتقوليه ده
سامر انسان محترم جدا وبيشتغل فى بنك وليه مستقبل وفوق كل ده بيحبني وانا بحبه يبقى ايه وجه اعتراضك
والدتها:ياهبله انتى حلوة وصغيرة وادامك الطريق طويل ايه اللى يربطك باول واحد يتقدملك اصبري شويه وانا حجوزك سيد سيده
جدتها :حنين قومي ادخلى اوضتك ياحبيبتى
حنين :لاء ياتيته انا مش حدخل ده مستقبلي ومش حسمح لحد انه يفرض علية رأيه
والدتها :انتى بتكلمينى انا يابنت انتى
حنين :ايوة بكلمك انتى ياهيام هانم ممكن افهم حضرتك عامله كده ليه ومهتمه اصلا بية ليه من امتى وحضرتك بتهتمي بحاجه تخصني ده انتى مهتمتيش تيجى امبارح حتى وتشوفى اهل خطيبي وجايه النهارده راسمه دور الام اللى بتدور على مصلحة بنتها
مش لايق عليكي الدور ده ياهيام هانم خليكي مع البيه جوزك حبيبك اللى مضيعه كل فلوسك عليه وانتى عارفه انه كل يوم والتاني مع واحده وكل الناس عارفه فضايحه كويس لكن حضرتك طبعا متقدريش تستغني عن ضوفره وهو اصلا بيضحك عليكي ومستغفلك
فلا تشعر حنين سوى بصفعه على وجهها من امها:دى طريقه تكلمي ببها امك ياسافله
حنين:بتضربيني عشان قلت الحقيقه مش كده عالعموم ريحي نفسك انا بحب سامر وحتجوزه ومش حسمح لحد انه يفرق بيننا وخللى حبك للمظاهر ده لولادك لكن انا تنسينى خالص زى ماطول عمرك ناسياني ومتدخليش فى حياتي تاني وياريت مشوفكيش تاني عشان انا بكرهك بكرهك
وتدخل سريعا على غرفتها
هيام:شفتي البنت بتكلمني ازاى بقى هي دى حنين القطه المغمضه هى دى تربيتك ليها ياست ماما انها تبجح فى امها بالشكل ده من غير ادب ولا احترام
امها:انتي تسكتي خالص مش عاوزة اسمع صوتك انتى فاهمه واللا لاء
تربية ايه اللى بتتكلمي عنها تعرفي ايه انتي عن بنتك واللا تربيتها هاه انطقى رميتيهالى واخدتى بعضك وجريتي رحتى اتجوزتي واحد اصغر منك طمعان فيكي واخد اللى وراكي اول باول
البنت مكدبتش ياست هانم البنت عندها حق فى كل كلمه نطقت بيها انا بجد زعلانه زعلانه اوى ان بنتي يبقى شكلها وحش كده ادام بنتها
ده ابوها اللى كنا فاكرين ان هو اللى مش حيهتم هو اللى جه تفتكري اهل خطيبها يكونوا بيقولوا علينا ايه دلوقتي هاه وهما شايفين امها مااهتمتش حتى تحضر فى حاجه تخص مستقبل بنتها
امشي ياهيام روحى يابنتى لجوزك وولادك يمكن انا ربنا وفقنى وقدرت اربيلك بنتك الغلبانه دى لكن لو رميتي ولادك التانيين معتقدش انك حتلاقي حد يربيهم روحي لحالك وسيبي بنتك وابعدي عنها سيبيها فحالها الله يخليكي
انا ماصدقت انى شفتها بتضحك وعندها امل فى بكرة حرام عليكي عاوزة منها ايه مش كفايه انها اتيتمت وابوها وامها عايشين لاعمر حد فيكم راحلها مدرسه ولا اهتم يعرف عنها حاجه وجايه دلوقتى عامله نفسك الام اللى خايفه على مصلحة بنتها ياعينى شوف ازاى ياللا يابنتى روحي الله يخليكى
تخرج هيام من بيت امها وهى خجلانه من نفسها فلقد شعرت بالحرج من حديث ابنتها وامها لها
بينما دخلت الجده لحفيدتها لتطيب خاطرها وتطمئن قلبها بان الله سيفرج كربها ويدخل السرور على قلبها
🌺🌺🌺🌺🌺🌺🌺🌺🌺🌺🌺🌺🌺🌺
فى منتصف الليل تقوم من النوم وهى تصرخ بصوت عال:اه الحقني
عصام :ايه فى ايه مالك
هاجر:تعبانه مش قادرة
عصام :تعبانه ازاي فهميني
هاجر :معرفش مش قادرة حسه بوجع جامد اوى
عصام :طب قومي بسرعه وانا حساعدك تلبسي
بعد مرور بعض الوقت فى احدى المستشفيات الخاصه يخرج الدكتور ليخبره بأنها حالة ولاده
عصام :ولاده ازاي ده لسه بدري
الدكتور:الجنين وضعه مش مستقر واى انتظار اكتر من كده حيكون خطر عليه وعلى الام
عصام :خلاص يادكتور اعمل اللى حضرتك شايفه
الدكتور:تمام حنجهز اوضة العمليات حالا
يقف عصام امام غرفة العمليات وهو فى حالة توتر شديد ولما لا ومن فى الداخل زوجته وابنته التى ينتظر مجيئها لعلها تعوضه عما بينه وبين زوجته
تخرج احدى الممرضات بعد مرور بعض الوقت
عصام :طمنيني الله يخليكى
الممرضه :الف مبروك جاتلك بنوته زى القمر تتربى فى عزك ان شاء الله
عصام :الله يبارك فيكي ومراتي عامله إيه
الممرضه :بخير هى دلوقتى فى الافاقه نص ساعه ان شاء الله وحتروح اوضه عاديه
بعد مرور حوالي ساعه فى احدى غرف المستشفى
عصام :حمد الله على سلامتك ياهاجر
هاجر :الله يسلمك ياعصام
عصام :تعبانه
هاجر :تعبانه اوى مش قادرة
عصام :معلش ياهاجر مش بطنك مفتوحه يومين وحتبقي كويسه ان شاء الله
هاجر :شفت البنت
عصام :جميله اوى زى القمر
هاجر:حتسميها ايه
عصام :مش عارف والله شوفي كده انتى عاوزة تسميها ايه
هاجر :كل ام واب بيفكروا فى اسماء ولادهم من قبل مايتولدوا الا احنا زى مانكون مكناش عاوزينها تيجي اصلا
عصام :لزمتوا ايه الكلام ده دلوقتى وبعدين دى بنتي نور عينيه ربنا يخليهالنا
يجدون طرقا على الباب فيقوم عصام ليفتحه فيجد اخته :نيرة حبيبتى تعالي ادخلي
تدخل نيرة :حمد الله على سلامتك ياهاجر
هاجر :الله يسلمك يا نيرة عقبال مانفرح بيكي
تحمل الصغيرة على يديها :بسم الله ماشاء الله تبارك الله فيما خلق ايه الجمال والطعامه دى كلها ربنا يخليها يارب
سميتوها إيه
عصام :لسه والله ماقررناش
نيرة:ايه رايكم فى فى اسم دارين
عصام :دارين الله اسم جميل ايه رايك ياهاجر
هاجر:مفيش مشكله اللى انتوا عاوزينه
عصام :خلاص يبقى نسميها دارين
نيرة:ربنا يباركلك فيها يا حبيبي ويجعلها من السعداء
عصام :يارب يانيرة
نيرة:بابا بيسلم عليك وبيقولك الف مبروك تتربى فى عزك وان شاء الله حيبقى يروحلكم البيت يباركلكم
عصام :هو عامل ايه واخبار صحته ايه
نيرة :السكر والله عالي عليه اليومين دول وتعبان اوى
عصام :ليه بس كده
نيرة :حنعمل ايه الحمد لله على كل حال
ثم تخرج من حقيبتها مظروفا وتضعه فى صدر المولوده
عصام :طب ليه بس كده ياحبيبتى
نيرة:الف مبروك يا عصام ياللا انا جقوم بقى وان شاء الله حنبقى نجيلكم البيت بأمر الله
💖💖💖💖💖💖💖💖💖💖💖💖
مرت الأيام سريعا هكذا هى الحياة فدائما ماتمر الابام السعيده سريعا ولكن تبقى القلوب على العهد بدوام السعاده التى غمرت حياتهم
تعلو الزغاريد فى داخل الفيلا لتعلن عن وصول العروسين
تحتضنه فاطمه الخادمه:الف حمد الله عالسلامه ياحبيبي
عمر:الله يسلمك ياحبيبتى عامله ايه وازى صحتك
فاطمه:الحمد لله ياحبيبي
ثم تقبل شمس وتسلم عليها:نورتي بيتك ياحبيبتى
شمس :الله يسلمك يا داده
يأخذه شاكر بالاحضان :حبيبي الف حمد لله على السلامة
عمر :الله يسلمك يا بابا وحشتني اوى والله
شاكر :وحشتك يانصاب ده انت مكنتش بتفكر تتصل لولا احنا اللى كنا كل شويه نتصل نطمن عليكم
عمر :ههههههههه معلش بقى يابابا حقك علية حبيبي مانت عارف بقى اللى فيها ده انت حبيب وعارف واللا ايه ياماما
فتفتح له هاله احضانها بعد ان سلمت على شمس:حبيبي ياعمر الف حمد الله على السلامة يا قلبي
عمر :الله يسلمك يا ست الحبايب
شاكر وهو يحتضن شمس بكل حب:حبيبتى ياشموسه طمنيني عليكي اوعي الواد ده يكون زعلك فى حاجه قوليلي وانا اقطملك رقبته
شمس :عمر مزعلني استحاله طبعا يابابا ده عمر هو فرحتي الوحيده اللى الدنيا انعمت علية بيها
شاكر :ياحبيبتى يابنتى ربنا يهنيكم يارب
يجلس عمر وتجلس شمس بجواره ويرحب بوصولهم الجميع
على:حمد الله على السلامة يا عرسان
عمر:الله يسلمك يا حبيبي
مروة:نورتي بيتك ياشموسه
شمس :البيت منور بيكم يامروة والف مبروك لعهد
مروة:الله يبارك فيكي حبيبتي عقبال ماربنا يرزقكم بالذريه الصالحه يارب.
فيحتضن عمر شمس :لا ياستي احنا مش مستعجلين عاوزين نشبع من بعض شويه قبل مانلخم نفسنا باطفال
هاله:ده كلام بس ياحبيبي لكن لو عدى شويه بس حتلاقوا نفسكم زهقتم وعاوزين بيبي يملا حياتكم
عمر:انا شمس عندي كل الحياة وطول ماهى فحياتي عمري ماححس انى زهقان ابدا
يزيد :ياسيدي ياسيدي ربنا يهنيكم يارب ياحبايبي
يقضون وقتا مع العائله فى التحدث فى عدة موضوعات تشعر شمس بالراحه والسكينه بينهم تشعر بأنها وسط اهلها حب يملاء قلب الجميع ضحكات نابعه من داخل القلوب بدون نفاق او غش
يعلن جرس الباب عن وصول احد ماتفتح فاطمه الباب وتطلق الزغاريد
عمر:هو يوم الزغاريد العالمي ده واللا ايه
يقوم الكل للسلام عليهم والمباركه لهم
يزيد:الف مبروك ياولاد ربنا يتمم فرحتنا على خير يارب
سيف :يارب يابشمهندس يارب
يسلمون جميعهم على شمس وعمر
عليا تسلم على عمر وشمس وتدعوا لهم بدوام السعاده
تفتح لهم عليا علبة الشبكه لتريها لهم
شمس:الله حلوة اوى ياعهد الف مبروك يا حبيبتي ربنا يتمم على خير يارب
عهد :الله يبارك فيكي يا شمس
عليا :بصراحه سيف كان نفسه يجيبلها المحل كله بس عهد هى اللى اختارت الطقم ده
شاكر :طقم فى منتهى الجمال الف مبروك يا ولاد
عمر :وسامر جاب شبكته
سيف :ايوة وراح يوصل حنين البيت
يزيد:ربنا يتمم فرحتنا على خيريارب
🌺🌺🌺🌺🌺🌺🌺🌺🌺🌺🌺🌺
تتحدث فى الهاتف وهى منزعجه:يعني هو ده الموضوع اللى عماركان عاوزك فيه مش كده
حسن :مالك يامنتى انا مش فاهم بس ايه اللى مضايقك
إيمان :عشان انا مستغرباك ياحسن اشمعنى يعني لما عمر طلب منك تسيبك من شغل المرشد ده وتيجي تشتغل معانا فى الشركه رفضت وقلت لامقدرش اسيب شغلي اللى بحبه
ودلوقتى بقى حلو انك تسيب شغلك وتشتغل مع عمار
مش كده
حسن :ايمان انا متخيلتش نهائي ان الموضوع دا ممكن يضايقك انا اصلا وافقت على انى اشتغل مع عمار واساعده فى ادارة الفندق الجديد عشانك انتى
إيمان :عشانى انا ليه ان شاء الله
حسن :عشان اخلص بقية الحاجات اللى فاضله ياحبيبتى ونتجوز بقى
إيمان :انت مستعجل اوى كده على جوازنا ياحسونتى
حسن :يالهوي ده انا حموت ونتجوز بقى ياموني نفسي تبقي معايا النهارده قبل بكرة
إيمان :بعد الشر عنك ياقلب مونى
حسن :حبيبتى يامونتي ربنا يخليكى لية ياقلب حسن
إيمان :بتعرف تثبتني بس بردو مش حتشتغل مع عمار انت فاهم والا وديني لحجيلك شرم واسحبك من قفاك
حسن :انا نفسي افهم بس انتي ايه اللى مضايقك من الموضوع ده ماتتكلمي معايا بصراحه ياموني
ايمان :عشان انت لو اشتغلت مع عمار حتستقر معاه وانا بقى مش حستحمل بعد الجواز انك تغيب عنى كتيرونفسي بقى تستقر معايا فى اسكندريه
حسن :وانا مش حزعلك يامونتي اللى انتى عاوزاه ياقلبي المهم تكوني راضيه بلاها شغل مع عمار ولو عاوزاني اشتغل معاكم فى الشركه بعد الجواز معنديش مشكله المهم روح قلبي متزعلش
ايمان :بجد ياحسونتي حتعمللى اللى نفسي فيه
حسن :طبعا ياايمان انا بحبك اوى ومقدرش ازعل منك ياام عيالي
إيمان :عيالك مش لسه بدري عليه الكلام ده
حسن:بدري من عمرك ياست البنات بقولك ايه انا عاوز بعد تسع شهور بالظبط من جوازنا يكون معانا بنتين توام ووراهم ولدين توام
إيمان :يالهوي ومين اللى حيقدر على كل دول
حسن:احنا ياروحي طبعا مونتى انا نفسي يكون عندي ولاد كتير يملوا علية حياتي
إيمان :حاضر ياقلبي ربنا يقدرني يارب واملالك البيت عيال المهم حقفل معاك بقى احسن الباشا عمال يرن علية من بدري وانا قالباه عشان اكمل معاك كلام
حسن :ماشي ياقلبي ردي عليه ياستى وخللى بالك من نفسك
إيمان :وانت تخللى بالك من نفسك واوعى عينك تبص كده واللا كده والا وربي افقعهملك
حسن:يااما حاضر ياروحى
تغلق معه الهاتف لتردعليه:اهلا ياباشا
يزيد :"والله انتى ماعندك دم
إيمان :ليه بس يابرنس
يزيد:بقالي ساعه برن عليكى ياجذمه وحضرتك مش هاين عليكي تخلصي المكالمه مع حبيب القلب وتردي علية
إيمان :سوري ياباشا اصلي كنت بتخانق معاه
يزيد :ليه يازفته حتطفشي الواد من ايدك
إيمان :لا ميقدرش ده بيموت فية وميقدرش يستغنى عن ضوفري
يزي:ياعم ياجامد المهم ركزي معايا الله يخرببيتك
ايمان:معاك ياكابتن قول
يزيد:بس بالراحه كده ومن غير ماتتعصبي عشان اعصابك ياحبيبتى
إيمان :والله على حسب
تدخل عليه عليا بتكلم مين ياحبيبي
يزيد :إيمان
عليا:دلوقتى ليه
يزيد وهو يفتح الاسبيكر اسمعي وانتى حتعرفي وربنا يستر والتليفون ميفرقعش فى وشي
إيمان :انت ياعمنا رحت فين
يزيد:معاكي ياموني بصي يابطتى
دلوقتي انتى عارفه ان خطوبة سيف وعهد الاسبوع الجاي
ايمان :اه قول بقى اتاريك شغال رن رن وانا اللى قلت فى ايه زلزال قام
وخليتني قفلت السكه مع حسونتي عشان اشوف مالك بس انا لو كنت اعرف انك عاوز تضحك علية وتثبتني بكلمتين عشان خاطر سي سيف مكنتش رديت اصلا
يزيد :بقى كده يامونتى طب انا زعلان منك
إيمان: مقدرشى ازعلكشي وحياتك مقدرشي
بص ياباشا انا عملت اللى علية وزياده واهو الحمد لله ربنا نتعهم بالسلامه واتخطبوا خلاص يتهدوا بقى واللا ايه
يعنى الاول يحبوا بعض وقلنا ماشي ودلوقتى اتخطبوا في ايه تانى عاوزين مني ايه دى خطوبه يابرنس خطوبه يعنى مش حياخد اجازة غير يوم الخطوبه وكرم مني ياخد اليوم اللى قبله اكتر من كده حولع فيه وربنا وانا على اخري منه
يزيد:يعني هى بقت كده ماشي ياايمان خلاص انا حدى لسيف اجازة يومين وانا اللى حعمل شغله بنفسي
إيمان :يالهوي بقى حضرتك تشتغل وانا موجوده بردو ده انا فداك يابرنس
الله معاك ومعاك قلوبنا ونروح فداك مانت حبيبنا وانت الشراع لبحرنا
يزيد :ههههههههه ايوة هى دى مونتى حبيبتى اللى مهنش عليها
إيمان :مانت عارفنى قلبي ابيض وطول عمري بخدم من غيراى حاجه
يزيد :عينيه ليكى ياموني
ايمان :شهر اجازة
يزيد:نعم يااختى شهر ليه ان شاء الله
إيمان :اعصابي تعبانه وعاوزه استريح
يزيد :والهانم اعصابها تعبانه من ايه ان شاء الله
ايمان :منكم ومن عمايلكم السوده هو فى حد تعبلي اعصابي غيركم كل مرة اطلع من مصيبه اقع فى اللى بعديهاعاوزة الحق نفسي قبل ماالاقى نفسي برتب لجواز المخفية مياده كمان
يزيد :ههههه طب مش حتيجى تسلمي على صاحبتك ياام لسانين
إيمان :بكرة ان شاء الله ياباشا
يزيد :ماشي يامونتى
ايمان : ماشي ياكابتن امااشوف اخرتها معاكم ايه
تغلق معه الهاتف
يزيد :مالك يالولو فى حاجه
عليا:مفيش ياحبيبي
يزيد :مفيش ازاى انا حسك في حاجه
عليا :مش انا بس اللى حبيبتك
يزيد :انتي عندك شك فكده ياحبيبتى
عليا :لاء، طبعا معنديش شك فده بس انت قلت لايمان حبيبيتى فى المكالمه
يزيد :هههههههههههههه يالهوي على حبيبة قلبي وهى بتغير علية انا مفيش حبيبي غيرك ياكابتن
عليا :كابتن
يزيد:ياربي اصل ايمان لسه قايلالي كده
عليا :ماشي كابتن كابتن وماله
يزيد :طب بقولك ايه ماتيجى ياكابتن ندرب شويه احسن جسمي تعبان ومحتاج شوية مساج وعوزك تدهينيلي ركبي يابنتى اصل ايدك حنينه اوى
عليا:هههههه
يزيد :بركاتك ياست ايمان هههههههههه
انتى ياقلبي ياللى قريتي البارت وطلعتي تجري شايفاكي اثبتي عندك فين لايكاتك فين تعليقاتك فين توقعاتك واياكي تقولي نسيت
نسيتي تاكلي نسيتي تشربي نسيتي تفتحي النت وتقري البارت هاه
اشمعنى بقى نسيتي تعلقى
طبعا انا بعاتبكم من عشمي فيكم عشان انتوا حبايبي
و معلش بتأخر عليكم اليومين دول اصلي لسه عند ماما والله ومش عارفه اركز فى وسط الولاد تحسوا انكم قاعدين فى مهرجان السياحه والتسوق السيرك القومي حاجه فى الرينج ده
اللى بيلعب واللى عاوز ياكل واللى عاوز ينام بجد احلى حاجه فى الدنيا لمة العيله ربنا ميحرمكمش من حبايبكم ابدا
وتحية خاصه لمروة ( سلمي سليم) مراة اخويا حبيبة قلبي اللى تولت ادهم الصغير بالرعايه والاهتمام عشان اعرف اكتبلكم البارت ربنا يخليها لية
وتصبحوا على الف خير
🌺🌺🌺🌺🌺🌺🌺🌺🌺🌺🌺🌺🌺🌺🌺
•تابع الفصل التالي "رواية شمس تتحدي الغيوم" اضغط على اسم الرواية