رواية شمس تتحدي الغيوم الفصل السادس و الثلاثون 36 - بقلم عبير سليم
الفصل السادس والثلاثون من رواية شمس تتحدى الغيوم
بقلمي :عبير سليم
💖💖💖💖💖💖💖💖
الحمد لله الذي جعلنا ننعم بحياتنا ونسعد بها بعد ان اكتوينا بالام من كنا نظن انهم كل الحياة.
لقد من علينا القدر وفاض علينا من نسائمه الرقيقه التى تبعث فى النفس الفرح والسعاده
ولكن هل ستدوم هذه السعاده هلى ستهدا القلوب بعد ان كانت هائجه
هل ستكون هذه نهاية للاحزان وبدايه للافراح ام سيلعب معنا القدر لعبته وينال من قلوبنا ويقسو عليها ثانية
تعلو أصوات الضحكات النابعه من القلب فى شقة سناء
سناء:بت انتى اتلمي بقى يخرببيتك قلبي حيقف من كتر الضحك
شمس :ألف بعد الشر عنك يا خالتو
إيمان :هو انا عملت حاجه انا بحكيلكم بس ياسناء اللى حصل طب انا غلطانه متبقيش تقوليلي احكيلي ياايمان
سناء :مانتى بتتكلمي بس مبتشوفيش نفسك بتتكلمي ازاى ههههههه
إيمان :مانا عادي اهوه طب بزمتك ياامل انا قلت حاجه تضحك
أمل :يالهوى ده انا حموت من الضحك والله العظيم انا عمري ماضحكت بالشكل ده ربنا يسعد قلبك ويفرحك ياقادر ياكريم
شمس :وبعدين يامونتي كملي ايه اللى حصل
إيمان :اللى حصل وصل يا قلبي اقولها ياطنط ده نصيب وكل واحد بياخد نصيبه ولسه نصيبها مجاش تقول ابدا انا بنتي أكيد معمولها عمل اه ماهو مش معقول تبقى حلوة وزي القمر ومفيش عريس يشوفها ويوافق عليها
ده كل ماييجي عريش يطفش وميرجعش لا انا لازم اروح لعم حسنين يشوفلنا حل هى مفيش غيرها مراة عمها العقربه اكيد هى اللى عاملاها العمل عشان البت متتجوزش
شمس :مين عم حسنين ده ياموني
إيمان :واحد دجال نصاب بيضحك على اللى الناس الغلابه ويفهمهم انه عنده كرامات وانه بيجيب الحبيب ويرد المطلقه ويجلب الرزق والناس الهبله بتصدقه
سناء :لا حول ولا قوة الا بالله بس ده كفر بربنا
ايمان:تقولي ايه بقى فى الجهل قلتلها ياطنط ده الرسول عليه الصلاة والسلام قال ان اللى يروح لدجال تبطل صلاته أربعين يوم واللى يصدقه فقد كفر بما انزل على محمد
تقوللى لا انا ربنا عالم بنيتي وعالم انى عاوزة استر بنتي واجوزها ومفيش فى نيتي حاجه وحشه
اقنعها مااقنعها انه دجال ونصاب تقوللى ابدا الا الشيخ حسنين ده راجل مبروك وبتاع ربنا وسره باتع ومفيش حد راحله الا وربنا جبره ومفيش حد غيره حيفك لبنتي العمل اللى معمولها
شمس :وراحت ياايمان
إيمان :لاء الحمد لله مارحتش جت من عند ربنا وجه العريس المنتظر
امل :جه لوحده كده
إيمان :لا طبعا ده انا اللى جبته
سناء :يخرببيتك جيبتيه ازاي يابت
إيمان :من عندربنا والله ياخالتي اتعرفت على امه عند الدكتور وانا مع ماما بتكشف
سناء :وانتي عرفتي ازاى ان عندها ابن عاوز يخطب
إيمان :اصل احنا لما رحنا العياده كانت زحمه اوى لقيت مكان لماما وانا من حسن حظي او من حسن حظها هى اصل البت بسمه دى غلبانه اوى رحت وقفت جمب الست دى قامت اللى جمبها جه عليها الدور ودخلت انا بقى قعدت جمبها
فى الاول سالتني عن الدكتور لانها اول مرة تيجي عنده وانا شكرتلها فيه بعد كده قعدنا نتكلم ونضحك وفتحت معاهاشوية كلام
لقيتها بتسالني انتي مخطوبه اصلك عجبتيني وانا بدور لابني على عروسه
سناء :ليه مشافتش الدبله اللى فى صوباعك
إيمان :لا شكلها مبتشوفش اصدي ان واضح ان نظرها ضعيف كانت لابسه نضارة شبه قعر الكوبايه
المهم بقى انا مردتش اضيع الفرصه وقلت بختك يابسمه سألتها عن ابنها وشكله فضلت تدور على صورته ساعه فى الشنطه اللى معاها
فكرتني بمسرحية وجهة نظر لما كانت بتدور على المرايا المكبره وتقولله كانت فى الشنطه ومحمد صبحي يقوللها ده مفيش غيرها فى الشنطه ياسنيه
فيضحك الجميع :ههههههه ههههههه
ايمان :ههههههههه المهم فضلت تدور وانا مستنيه الفرج وتقوللى والله يابنتي كانت معايا طب خدي دوري فى دول معايا اول مامسكت الورق اللى مطلعاه لقيت صورة شاب وسيم فى وشي قلتلها ده
قالتلي ايوة هو ده ابني حبيبي والست فضلت تبوس فى الصورة كأنه كان تايه وبتدور عليه وماصدقت لقته
انا قلت يالهوي ياللا ماجمع الا الما وفق ده انتى لو قعدتي مع حماتي حتبقوا تحفتين
وقالتلي انه قيمه ومركز ووظيفه ميري وعنده شقه مطرحين وصاله
كادت سناء ان تقع ، من على الكرسي من شدة الضحك:الله يقطعك مش قادرة حتموتيني يخربببتك
إيمان :وانا قلت حاجه ده انا بحكيلك يامزتي
آمل :ههههههههه وبعدين حصل ايه بعد كده
إيمان :وبعدين سألتني عن صورتي انا كمان عشان توريها للعريس المنتظر فانا بقى فهمتها بالراحه انى مرتبطه وان عندي عروسه احلى مني مليون مرة
فى الأول حستها زعلت وافتكرتني مش عاجبني العريس بعد كده قالتلي ماشي واخدت تليفونى وانا مسيبتهاش غير لما اخدت تليفونها هى كمان اه ماهو عريس بقى طخه ومتعوروش يابوي
بس كده ويادوب روحنا البيت لقيتها بتتصل اتفقت معاهاانى حقول لأهل العروسه وبعدين اتصل عليها ابلغها بالمعاد واشوف حقابلهم فين عشان مش حيعرفوا يوصلوا للبيت لوحدهم
كلمتهم وقلتلهم فى عريس لبسمه
وفرحوا جدا طبعا وحماتي تقوللى لو الموضوع تم حيبقالك الحلاوة قلتلها انا حلاوتي اتجوز ابنك عشان انا تعبت خلاص
وحلفت بسمه تضحك فى وش العريس سبحان الله يقولك كل واحد ليه نصيب من اسمه الابسمه مع انها طيبه اوى وغلبانه بس مبتضحكش ابدا حسن مسميها خميرة العكننه
المهم رحت استنيتهم مانا بقى الوسيط بتاعهم واخدتهم ورحنا وأول مادخلت عليهم بسمه تقوليش عمرهم ماشافوا بنات قبل كده انبهروا بيها والعريس مكنش عاوز يروح وراسه والف سيف انه لازم يقرا الفاتحه
انا قلت يانهار اسود ده عبيط ده واللا إيه
حمايا قالله حنسال عنكم ونرد عليكم
والحمد لله سألوا عليهم فى المنطقه اللى ساكنين فيها وفشغله ولاقوهم ناس فى حالهم وزمايله فى الشغل شكروا فيه
واتصلوا بيهم وراحولهم وتم المراد من رب العباد
وكله كوم ولما رحنا نشوف الشقه كوم تاني الست مبهورة بالشقه بتاعة ابنها وتقول بصوا النجف نحاس وبصوا التحفه دى نحاس قامت حماتي مسكتتش قالتلها وانا حجيب لبنتي هون نحاس انا كمان
خلتني كنت حموت من الضحك والعريس بقى لازق لبسمه لزقه وحماتي تقول انا مش حقول لحد اه انا كل مرة اعمل اذاعه فى الشارع كله والموضوع يبوظ انا المرة دى مش حجيب سيرة لحد ابدا
والحمد لله اتفقوا على كل حاجه وخطوبتهم الاسبوع الجاي
أمل :شوفوا سبحان الله يعني ربنا قدرلك انك تروحي مع امك للدكتور عشان تشوفي ام العريس لاء وكمان تقعدي معاها وتتكلمي معاها ده ولا الأفلام
إيمان :والغريبه انى مكنتش عاوزة اروح فى اليوم ده بالذات مع ماما وقلتلها خلينا بكرة انا تعبانه فضلت تقوللي طبعا مانا مش حد من صحابك اللى اول ماتشاورلك تطلعي تجري عليهم قلتلها خلاص حنروح زى مايكون ربنا كان باعتني فى اليوم ده بالذات عشان خاطر بسمه
شمس :ده قدر ياموني مش صدفه ياقلبي انا زمان لما كنت اشوف فيلم او مسلسل والاقى اتنين اتقابلوا فى اى مكان كنت استغرب واقول شغل افلام لكن لقيت ده فعلا بيحصل فى الحقيقه
سناء :ايوة طبعا ماهو كل حاجه بتحصل بسبب و ربك هو اللى بيسبب الاسباب
شمس : بس اهم حاجه اوعي يكون خطوبة بسمه فنفس يوم خطوبة عهد احسن ازعل منك وربنا
إيمان :لا ياشموستى اطمني خطوبة بسمه قبل خطوبة عهد بيومين وكان نفسي اوى حسن يقعد ويحضر معانا خطوبة عهد بس مش حينفع لازم يسافر تاني يوم خطوبة بسمه
شمس :ياخسارة مع انه كان واحش عمر اوى وكان نفسه يشوفه
إيمان :معلش المرة دى وهو كده كده نازل الشهر الجاي عشان نتفق على الوان الشقه ونخلصها بقى عشان انا زهقت وطهقت
سناء :اتلمي يابت
إيمان :اتلم أكتر من كده ايه حرام عليكي انا عاوزة اتجوز ياناس
امل وشمس وسناء:هههههههههه ربنا يسعدك ياايمان ويفرح قلبك يارب
💖💖💖💖💖💖💖💖💖💖💖
فى اليوم التالي يدخل عمر الشركه وفى يديه شمس يقبل عليهم جميع الموظفين ليسلموا عليهم ويباركون لهم ويدعون لهم ولكن الله وحده أعلم بماتكنه الصدور فالبعض فرح من قلبه والبعض يظهر المحبه وفى قلبه حسد لهم فكيف لموظفه عاديه فى الشركه ان ترتبط بصاحب الشركه نفسه يالها من محظوظه
تدخل شمس مكتبها ومعها عمر لممارسة عملهما و كان سيف ينفذ عمله فى المكتب الخاص به و كانت إيمان تقوم هى الاخرى بعملها على أتم وجه لتحصل على اجازة من يزيد دون اى اعتراض
شمس :ايمان الله يخليكي ممكن تودي التصميمات دى للبشمهمدس
إيمان :خلليهم جمبك بس ثواني اكون خلصت الشغل ده واوديه كله مرة واحده
شمس :ماشي
عمر:انا حروح اجيب قهوة من البوفيه موني حتشربي قهوة معانا واللا حتشربي البتاع بتاعك ده اللى بتشربيه
إيمان :من فضلك لما تتكلم عن البتاع ده تتكلم عنه باحترام اه ده كابتشينو ياعم
عمر :ههههههههه احلى مج كابتشينو فى الدنيا لاحلى موني فى الشركه كلها
إيمان :ان شالله يخليك ياجوز صاحبتي اصيل والله ياعمر
عمر :عمري ماحبقى اصيل زيك يامونتي ده كفايه انك انتي اللى كان ليكى الفضل بعد ربنا انى انا وشمس نقرب من بعض كده وتبقى مراتي وحبيبتي
إيمان :كله بثوابه يامعلم المهم تخللي بالك منها احسن وربي تشوف وش عمرك ماشفته
عمر :هههههههه اطمني ياايمان شمس دى روح قلبي من جوة
ايمان:طب ياللا الله يخليك الحقني بالكابتشينو قبل ماروح للباشا ويهزئني شويه
عمر:يزيد بهزاك انتى ده انتى الحته الجوانيه
ايمان وهى تحرك اصابعها امامه:الله اكبر الله اكبر قل اعوذ برب الفلق كان عندي كتكوت وكبر
يخرج عمر من المكتب وهو يضحك فيجدها امامه بملابس محتشمه الى حد ما وواضعه القليل من مساحيق التجميل فلقد راها بشكل لم يعهده من قبل:ازيك يامياده عامله إيه
مياده :الحمد لله يابشمهندس ازى حضرتك والف مبروك على الجواز
عمر :الله يبارك فيكي يامياده وعقبالك ان شاء الله
مياده :ربنا يخليك يا بشمهندس عن اذن حضرتك
عمر:اتفضلي يا مياده
يتعجب عمر من طريقتها فى الحوار معه فأين مياده التى كانت تتعمد ان تبرز مفاتنها وان تتحدث باغراء امامه
ولكنه لا يضع الموضوع فى عقله ولا يعطيه اهميه ويتجه نحو البوفيه لاحضار الكابتشينو والقهوة
بينما فى داخل المكتب تتحدث ايمان لشمس :مبسوطه ياشموستي
شمس:اوى اوى ياايمان اول مرة ابقى مبسوطه بالشكل ده بس انا خايفه اوى ياايمان
ايمان:خايفه من ايه يا حبيبتي
شمس :خايفه الدنيا تستكتر علية الفرحه
ايمان :ان شاء الله تدوم عليكي السعاده ياحبيبتى وعمر بيحبك اوى وعمره ماحيزعلك ابدا
شمس :انا متأكده من ده ياايمان بس خايفه بردو
فيدخل عليهم عمر:وعندك واحد كابتشينو واتنين قهوة لاجمل بنتين فى الدنيا
بعد قليل فى مكتب يزيد تطرق عليه الباب وتدخل:اتفضل يابشمهندس
يزيد :شكرا ياايمان منحرمش منك
ايمان :احم احم
يزيد :اقعدي ياايمان قولي اللى عندك
إيمان :بص هو يعني والله انا مكسوفه منك ووشي فى الأرض
يزيد :ايمان انتى عارفه ان مشروع برج العرب واخد مننا مجهود كبير ومش حينفع اجازة خالص دلوقتى
إيمان :هو يوم واحد والله خطوبة اخت حسن ولازم اكون معاها البت غلبانه
يزيد :انتى حتشحتي يابنتي حاضر ياايمان بس الله يخليكي متقوليليش على اجازة تاتي دلوقتى
إيمان :لاء ماهو احنا حنبدا بقى نخلص اللى ورانا واقفل حاجتي عشان اتجوز بقى واللا انتوا فرحانين بقعدتي كده
يزيد :لا ياستي طبعا احنا عاوزين نفرح بيكي واذا كان على كده نبقى نظبط مع بعض تخلصي شغلك وتروحي تمام وليكي عندي حديكي اسبوع بحاله اجازة الجواز
إيمان :اسبوع لا وربنا ومالك جاي على نفسك كده ليه وليه البعزءه دى كلها ماتخليها يوم الفرح واجيلكم فى الصباحيه
يزيد :لاعيب عليكي انتى عاوزة سي حسن بتاعك يقول علينا معندناش ذوق بس انتوا نويتوا على امتى ان شاء الله
إيمان :والله مانا عارفه المفروض قريب ان شاء الله بس امتى بالظبط وربنا مااعرف
يزيد :كل شئ باوانه
إيمان :اوان ايه بس يابشمهندس ده انا خللت خلاص
يزيد :هههههههههه يابنتي اتقلي شويه كده مينفعش الراجل يقول ايه بس
إيمان :مايقول اللى يقوله واحده مخطوبه وعاوزة تتجوز فيها ايه دي
يزيد :ربنا يفرحنا بيكى ان شاء الله
إيمان :يارب ياباشا يارب
💖💖💖💖💖💖💖💖💖💖💖
بعد مرور عدة أيام فى شقة اهل حسن
بسمه:خلاص بقى ياايمان كفايه كده
إيمان :بت انتي اخرسي خالص وسيبيني اركز
بسمه:ماشي ياستي بس خلصيني
فتدخل سماح امها :خلصت روحك ياشيخه بت انتي تتعاملي كويس كده مع الناس انتي فاهمه احنا ماصدقنا ان ربنا نفخ في صورتك وفى عريس واحد وافق عليكي عارفه لو طفش وديني لسيبلكم البيت واهج
بسمه:انا عاوزة افهم انتى امي واللا مراة ابويا
إيمان :ههههههههه وربنا انتوا عيله تجن
بسمه :مش شايفاها بتعاملني ازاى ده انا زى مااكون بنت جوزها
سماح:استغفر الله العظيم ياربي الحق علية يابت الجذمه عاوزة افرح بيكي واشوفك فى بيت عدلك بكرة اخوكي حيتجوز المعدله دي واختك اللي اصغر منك اتجوزت وحامل وانتى حتفضلي قاعدالي كده شبه خيبتها
إيمان لحماتها:ليه يااختي هو انتى ناويه على ايه بعد مابسمه تتجوز
سماح :ناويه اطلع عمرة واكفر عن ذنوبي اللى عملتها واللى معملتهاش
إيمان :علية انا بردو ده انتي مش بعيد تكون ناويه تعملى شهر عسل جديد
سماح:ياختي اتنيلي احنا خلاص ياحبيبتى شطبنا
إيمان :ايه ده يعنى عمى بشنباته دى اللى يقف عليها الصقر ورصيده خلص
سماح:اه خلص خلاص وحياتك ياحبيبتى
إيمان :ياكسوفي ياكسوفي
بسمه:انتوا بتقولوا ايه انا مش فاهمه حاجه
إيمان :حفهمك ياقلبي الهاتف الذي طلبته غير متاح من فضلك حاول الاتصال فى وقت لاحق
لاء حاول ايه بقى بصي ياسموحتي انتى تكسري التليفون وتشتري تليفون جديد أحسن
سماح:الهي تتكسر رقبتك ياشيخه ماتتلمي يابت بلاقلة ادب
ياللا خلصوا الناس زمانهم جايين جتكم القرف
إيمان :هى مين الست دى
بسمه:الست دي امى قرفانه طول عمرها
ايمان وبسمه:هههههههههه
إيمان :يااااه اخيرا ا يابسمه شفتك بتضحكي
بسمه:اعمل ايه بس مانا كانت نفسيتي تعبانه من كتر العرسان اللى بيرفضوني
إيمان :بس الواد أحمد ده شكله وقع يابت يابسمه
بسمه:تفتكري ياايمي
ايمان:طبعا افتكر اوى ده واحنا بنشتري الشبكه الراجل كان عاوز يجيبلك المحل كله
بسمه:يااختي اتنيلي ده قاللى هى الاسورة والدبله مفيش غيرهم
ايمان :مش شاب ياحبيبتى وبيكوم نفسه قصدي بيكون نفسه
يدخل حسن:العريس جه خلصتوا
إيمان :ايوة ياحسونتى خلاص
حسن:ايه القمر اللى انا خاطبها دى ياناس
إيمان :منكسفنيش بقى ياحسن
حسن:عسل يامونتي
بسمه:بقولكم ايه انتوا الاتنين متقرفونيش انا على اخري
حسن:هو انتي مش اتخطبتي خلاص فى ايه بقى يازفته
بسمه:لاء، انا مش حطمن غير لما اتجوز وامشي من هنا قبل امك ماتولع فية
حسن وإيمان :هههههههههههه
خرجت ايمان وحسن وبسمه والحمد لله كانت خطوبتهم حلوة والعريس الحليوة فرحان اوى ببسمه وايمان فرحانه
انها كانت السبب فى الفرحه دى اما سماح امهم كانت الدنيا مش سايعاها ان بنتها الكبيرة اخيرا حتتخطب مانتوا عارفين الأمهات بقى وليلتهم كانت حلوة وخلصت الشبكه على خير
ومشى العريس وأهله
سماح:ربنا يخليكي ياايمان ويفرح قلبك زى مافرحتينا يارب
ايمان:يارب
حسن:ادعيلنا ياامى ربنا يرزقنا بالذريه يارب
سماح:ذرية ايه يابن الهبله مش لما تتجوزوا الأول واللا انتوا ناويين على ايه يخرببيتكم
ايمان :الله يخرببيتك ياشيخ ههههههههه عسل وربنا ياسماح ده حسن بيتكلم فيما سيكون تفاؤل بقى
سماح:ماشي بس انت مستعجل ليه يابني مش لما تشبعوا من بعض شويه قبل ماتشيلوا الهم
حسن :نشبع من بعض ده ايه بس هو احنا صغيرين ده يادوب نلحق نتجوز ونخلفلنا عيلين قبل مانوصل لسن اليأس
سماح :ياس ايه بعد الشر عنكم ده انتوا فى عز شبابكم
حسن: يارب ياامي نفسي اوى ابقى اب
يلاحظ حسن ان ايمان صامته لاتتحدث فيحاول التحدث اليها:ايمان مالك فى حاجه
ايمان:ايه لا مفيش
حسن :ايمان لافي انتى وشك قلب مرة واحده هو انتى اتضايقتي من كلامي
فتنظر له ايمان وكأنها لاتعرفه ولا تعلم من هو:لا انت مقلتش حاجه تخليني ازعل بس انا لازم امشي دلوقتى
حسن:طيب تعالي اوصلك
تسلم ايمان على الموجودين وتخرج مع حسن ولكنها لم تنطق بكلمه طوال الطريق وكلما حاول حسن التحدث اليها ترد باقل الكلمات
حسن:إيمان انتى ايه حكايتك بالظبط فى ايه مالك
إيمان :حسن هو انا غشيتك او ضحكت عليك فى موضوع سني مش من ساعة ماعرفنا بعض وانا قايلالك ان عندى ٢٩ سنه
حسن: وايه لزمة الكلام ده دلوقتى
إيمان :لزمته ايه انت مش حاسس باللي قلته مش واخد بالك انك جرحتني بكلامك
حسن :انا جرحتك لا ياايمان اوعي تقولي كده والله العظيم ماكان قصدي
ايمان:لما انت شايف انى كبيرة وداخله على سن الياس ليه مارحتش لبنت صغيرة
حسن :لاء ارجوكي ياايمان اوعي تقولي كده انا بحبك وعمر قلبي مادق ولاحب غيرك انتى ده انتي حبيبتي يامنتى
وانا اسف والله ماكنت اقصد الكلمه طلعت منى من غير مااقصد حقك علية ياحبيبتى ده انتى ضافرك عندي بالف واحده
إيمان :ماهي المشكله ان الكلام اللى بيطلع من غير مانقصد بيبقى هو ده اللى بنحاول نخبيه لكن لساننا بينطقه من غير مانحس
حسن :لا والنبي ياايمان الله يخليكي اوعي تقولي كده انتي عندك شك فى حبي ليكي ياريت كان اتقطع واللا حصلتلي مصيبه قبل ماانطق كلمه توجعك ياحبيبتى
إيمان :الف بعد الشر عنك ياحبيبي
حسن :طب قوليلي انك مش زعلانه
إيمان :طيب ياحسن تصبح على خير
حسن :اصبح على خير ده ايه والله ماحيحصل
طبعا حسن حس انه غلط فى حق ايمان من غير مايقصد وعشان ايمان حساسه الكلام زعلها اوى لكن هو مرضاش يسيبها وفضل يكلمها طول الليل لحد مااطمن انها خلاص مبقتش زعلانه
(الله يخرببيتك ياحسن كان لازم يعني لسانك يفلت خد بقى التهزئ اللى حيجيلك من الفانز انت مش عارف غلاوة ايمان عندهم تستاهل بقى انا مش حعرف ادافع عنك)
💙💙💙💙💙💙💙💙💙💙
والنهارده بقى خطوبة الاتنين الحلوين عهد وحنين
فرحه شديده تغمر قلب الجميع هاهي طفلتهم الصغيرة اصبحت عروسه جميله
يالها من ليلة جميله تجمع فيها كل الاهل والأصدقاء والاقارب والاصحاب
لا احد يصدق ايعقل ان عهد وحنين اللاتى لم يقارقن بعضهمن طوال عمرهم يسعد بهم الحظ لينالوا فرحتهم فى ليلة واحده ولاخين ماهذه الصدفه العجيبه وماهذا القدر
الكل فرح لهم ولم يتركها العاشقان الصغيران لحظه واحده وكانا يتراقصان طول الحفل
يزيد :يخرببيت سنينك ياانس بقى ده االى كان عمال يعيط وقالبهالنا مناحه ده مقعدش من وقت مابدات الخطوبه
على:يابني الواد بيعرف يفصل دى نقرة ودي نقرة
مروة:هههههههههه ابن ابوه
يصعد الجميع للسلام عليهم والتقاط الصور معهم
إيمان :ألف مبروك يا سيف الحمد لله يااخويا انك ارتحت ألف حمد وشكر ليك يارب
سيف:ايمان ههههههه ربنا يخليكي لية يارب وعمرى ماحنسالك اللى عملتيه معايا ابدا
عهد :موني معلش ياقلبي حقك علية انا عرفت انه كان بيسيبلك الشغل عشانى وانت استحملتيه كتير
إيمان :ولا يهمك ياقلبي كله يهون عشان خاطر عيونك الحلوين هو احنا عندنا كام عهد دى عهد واحده
عهد :بس انا سمعت انك كنتي بتتخانقي معاه هههههههه
إيمان :عيب انا اتخانق مع سيف بردو ده اخويا وربنا العالم ده انا بس كنت بهزر معاه مش اكتر
سيف وهو يهمس لها:اصيله ياموني
إيمان :طول عمري يامعلم اى خدمه وعد الجمايل بقى
سيف :جمايلك كتير اوى وفوق راسي يامونتي وربنا يقدرني واردهالك
إيمان :قريب ان شاء الله
تجلس ايمان مع عمر وشمس
عمر:عامله ايه ياايمان
إيمان :الحمد لله والله ياعمر
شمس :مالك ياايمان
إيمان :مفيش ياحبيبتى
شمس :إيمان علية انا بردو والله ماحسيبك غير لما تحكيلي
هو حسن زعلك فى حاجه
تهرب دمعه من عيون إيمان دون ان تشعر
فتميل شمس على عمر:عمر انا حاخد إيمان ونطلع برة شويه
عمر:ماشي حبيبتي وانا حقعد مع يزيد شويه بس متتاخروش
تخرج شمس وايمان بينما يتجه عمر للجلوس مع بقية العائله
يزيد :سيبت حبايبك وجيت ليه
عمر:إيمان شكلها فى حاجه مضايقاها وشمس اخدتها وطلعت برة شويه
يزيد :كان باين عليها فعلا فى الشركه النهارده بس انا مرضتش اكلمها ربنا يهنيها ويفرح قلبها
عمر :يارب يايزيد شوف سبحان الله على اد ماكنت مبطيقهاش فى الاول لكن لما قربت منها لقيتها حاجه كده ملهاش زي معموله بطريقه غريبه سبحان الله
وبقت غلاوتها عندي ملهاش حدود بحسها اختي بجد
يزيد :وهى تستاهل ياعمر
بينما في الخارج تجلس شمس مع ايمان وتحكي لها ايمان ماحدث وماالذي اغضبها من حسن
شمس :بس انتي قلتي انه اعتذرلك ياحبيبتى
إيمان :ايوة هو فعلا اعتذرلي ومن يومها وهو كل شويه يكلمني عشان يتاكد انى مش زعلانه لكن اكلامه خوفني ياشمس حسسني انى لو مخلفتش هو ممكن يسببنى
شمس :ايه الكلام الفارغ ده مانتي عارفه حسن بيحبك ازاي ياايمان ده روحه فيكي ده انتى الاسبوع اللي فات لما كنتى تعبانه كان حيموت عليكي من القلق
شيلي الوساوس دى من راسك ياحبيبتى وان شاء الله خير
يتحدثان بعض الوقت ثم يدخلان القاعه مرة اخرى
انتهت الحفله واكمل العرسان فرحتهم بالسهرة فى احد الاماكن واصطحبوا معهم العائله بينما عادت ايمان مع محمد زميلهم فى الشركه الذي عرض عليها توصيلها للبيت والذي يعمل فى نفس المكتب مع عصام ومياده
مياده:عامل ايه يامحمد وازي اولادك
محمد:الحمد لله والله ياايمان انتى اللى عامله ايه وحنفرح بيكي امتى
ايمان:قريب ان شاء الله
بقولك ايه اخبار الاتنين اللى معاك فى المكتب
محمد:عصام ربنا رزقه بدارين
إيمان :لا والله ده من امتى
عصام :من ييحي تلت اسابيع او اكتر والله مافاكر
إيمان :غريبه يعني ده لما بيكون فى حاجه كده الخبر بينتشر بسرعه والكل بيجامل
محمد:مانتي عارفه ياايمان من وقت اللى حصل بينه وبين شمس وهو حاسس ان الناس مش طايقاه وهو كمان بقى منعزل مع نفسه ومبيتكلمش مع حد
إيمان :ياللا عالعموم ربنا يخليهاله والزفته مياده عامله ايه
محمد :ههههههههههه حبيبتك انا عارف
دى بقى متعرفيلهاش حاجه ولا تفهمي اللى فى دماغها تصرفاتها بقت غريبه اوى
ايمان :ازاي يعني فهمني
محمد:لبسها اتظبط كتير ومبقتش بتحط كيلو مكياج فى وشها زى ماكانت بتعمل وبتتكلم بكل ادب واحترام
ايمان :اه مانا لاحظت الموضوع ده فعلا واستغربت
محمد:بس طول اليوم التليفون على ودنها مبتسيبهوش ابدا وتبقى بتتكلم وصوتها واطي عشان محدش يسمعها
إيمان :يمكن بتحب جديد واللا حاجه
محمد:يمكن بس انا بسمعها تقول انجي دايما فى مكالمتها وكذا مرة اشوف اسمها على شاشة التليفون عندها
إيمان :اللى زى مياده دي ميجيش من وراها خير واكيد اللى بنكلمها دى زيها الطيور على تشكالها تقع
محمد:بصراحه انا مش بستريح لها
إيمان :ومين سمعك ربنا يكفينا شرها يارب
💖💖💖💖💖💖💖💖💖💖💖
تمر الأيام ولاجديد الامور تسير على وتيرة واحده الكل يعيش حياته فى هدوء
يعود من عمله مرهقا فلقد اصبح يقضي وقتا اضافيا ليحصل على زياده فى المرتب تكفى حاجتهم جميعا ولا يشعر بالتقصير تجاه طفلته التى هون عليه وجودها الدنيا ومافيها
يفتح الباب ويدخل فيسمع صوت بكاء صغيرته فى غرفتها يجري عليها ويحملها سريعا :دودى حبيبتى هششششش بس ياروح بابا
امال ماما سابتك وراحت فين اكيد بتحضرلك الأكل تعالي نروحلها:هاجر ياهاجر
الله راحت فين دى وازاي تخرج من البيت وتسيبك لوحدك كده
دي يومها اسود بس لما ترجع ينظر لصغيرته المنهارة من البكاء وهى تضع اصابعها فى فمها وكأنها تخبره بجوعها
الشديد :ياحبيبتى يابنتي انتي جعانه
ياخذها ويدخل المطبخ ويحضر لها رضعه سريعا ولكنها ساخنه والطفله جائعه يتصل على هاجر فيجد تليفونها مغلق
طب انا اعمل ايه بس ياربي اه جتلي فكره انا حاخد الببرونه وافتح عليها الحنفيه لحد ماتبرد شويه
واول ماحس ان الببرونه بدات تبقى دافيه بدا يديها لدارين لقاها بتشرب بشراهه :ياحبيبتى يابنتى ده انتى كنتي جعانه اوى ثم يشعر بابتلال تحت يديه:انتي عملتيها ياقلب بابا
وبعدين بقى فى الحوسه دي ياربي تعالي يابنتي اما اشوف حغيرلك ازاي يبدأ يطلع هدوم من الدولاب ويحضر الحفاضه ويحاول تشطيفها بالماء والصابون ثم يغير لها ملابسها
وسبحان الله على اد ماكان مضايق من هاجر انها مش موجوده على اد ماكان فرجان ومبسوط وهو بيراعي بنته وفرح اوي اول مالاقاها عينيها راحت فى النوم نيمها فى السرير وفضل قاعد يبص عليها شويه
وبعد كده قام غير هدومه وفضل مستني الهانم لحد ماتيجى
شويه ولقاها بتفتح الباب وباين عليها انها تعبانه او فى حاجه
انتى كنتي فين وازي تخرجي وتسيبي البنت لوحدها كده انتى اتجننتي
هاجر :انا تعبانه ومش قادرة اتكلم
عصام :وانا مش حسيبك غير لما اعرف كنتي فين انطقي بدل وربي ما اموتك فى ايدي
هاجر :كنت عند الدكتورة
عصام :ليه كنتي بتعملي ايه عندها
هاجر:تعبت اوى وكنت بموت من الوجع قلت اروح بسرعه واجي على طول وانا ملحقتش انا دخلت علطول وكشفت وحيت على طول
عصام : والدكتورة قالتلك ايه
هاجر :قالتلي لازم ارتاح شويه عشان ميحصليش مضاعفات
عصام :بس انتي من يوم ماولدتي متعبتيش فى حاجه نيرة بتيجي وبتنضف الشقه وبتعمل الاكل وانتى طول الوقت نايمه يبقى فين التعب ده
هاجر:معرفش بقى اهى قالتلي كده وخلاص
عصام :ماشي ياستي بس ازاي بردو تسيبي البنت لوحدها وتخرجي انا رجعت لقيتها بتعيط بشكل هيستيري البنت قلبها كان حيقف حرام عليكي ياشيخه انتى إيه
هاجر :متكبرش الموضوع بقى ياعصام ماكل الاطفال بيعيطوا انا حدخل اغير وارتاح شويه انا تعبانه
عصام :اتفضلي ياهانم ادخلى ارتاحي
تدخل هاجر وتجلس على الفراش وتحدث نفسها:بقى كده ياسلمى بتضحكي علية وتقوليلي علاء مرجعش كل ده عشان متديناش فرصه نرجع لبعض تاني بس انا مش حسكت انا حروحله المحل واتكلم معاه ولازم نرجع لبعض مهما كان التمن انا مش قادرة اكمل حياتي وهو بعيد عني
انا من بكرة حروحله ومش حستسلم ابدا علاء بيحبني ومش حيقدر يستغنى عني ابدا
💙💙💙💙💙💙💙💙💙💙💙
فى فيلا المهدي
يدخل يزيد والدنيا لا تسعه من الفرحه:السلام عليكم ورحمة الله وبركاته
هاله:وعليكم السلام ياحبيبي حمد الله على سلامتك
يزيد :الله يسلمك ياامي امال فين بابا والولاد وعليا
هاله :باباك قاعد فى اوضته بيحكي ذكرياته لعشق وأنس
وعليا فى اوضتها من وقت ما رجعت من عند الدكتور
يزيد :طب انا طالعلها
هاله :امال فين عمر وشمس
يزيد :محبوسين كلهم فى الشركه ومعاهم علي
هاله :ربنا يقويهم يارب
يزيد :طب انا طالع ياامي
هاله:طب مش جعان
يزيد :لا جعان ايه ده الفرحه اللى انا فيها مخلياني حاسس انى واكل خروف بحاله
هاله :خير يا حبيبي فرحنا معاك
يزيد :ان شاء الله كله حيفرح ياامي
هاله:ربنا يفرحكم ياحبيبي يارب واشوفكم أسعد ناس فى الدنيا
يزيد وهو يقبل يديها: وانتي وبابا معانا ياست الكل
يصعد سريعا إلى حبيبته
يدخل عليها الغرفة فيجدها فى قمة تالقها فياخذها بين احضانه:عندي ليكي مفاجأة حلوه أوى
عليا :وانا كمان عندي مفاجأة حلوة ليك
يزيد :اممممم طب قوليلي مفاجئتك انتى الاول
تأخذ عليا يديه وتضعها على بطنها انا حامل
يصعق يزيد لهذا الخبر هل ماسمعته صحيح هل ماتفوهت به حقيقه
ايه انتى قلتى ايه دلوقتي قولي انك بتهزري ياعليا
عليا :وهى الحاجات دي فيها هزار بردو انا حامل فى تلت شهور يايزيد
كان يزيد يتحدث وهو ثائر يريد ان يحطم كل مايقع تحت عينيه ازاي ازاي ودلوقتى بالذات لا مش ممكن مستحيل وبعدين احنا مش واخدين احتياطاتنا كويس يبقى ازاى ده حصل فهميني ده حصل ازاي
عليا :معرفش اهوه حصل وخلاص ربنا عاوز كده وعلى فكرة انا حامل فى تواءم
يزيد :نعم لا مش ممكن مستحيل اخللي الحمل ده يتم الحمل ده لازم ينزل انتى فاهمه لازم ينزل
عليا :مش حينفع ينزل نزوله فيه خطر على حياتى وانا مش حعمل كده دول ولادى وانا مش ممكن اموتهم بايدي ابدا
يزيد وهو يحتضن وجهها بكفيه:وانا مش ممكن اسيبك تموتي وتسبيني ياعليا
حرام عليكي ياعليا انا اقدر استحمل اى حاجه فى الدنيا بس وانتي معايا من غير وجودك معايا تبقى حياتي انتهت وميبقاش ليها لزمه
عليا :سيبها على ربنا ياحبيبي وقادر ربنا زى مانجاني فى ولادة عشق ينجيني المرة دى
يزيد :قلبك مكنش تعبان اوى كده ياعليا لكن انتى دلوقتى قلبك تعبان مش حيستحمل
قلبك لا مش ممكن
يجلس أمامها عالارض:عليا انتى مش فاهمه حاجه انا كنت جايبلك خبر حلو اوى النهارده خبر كان حيسعدنا ياحبيبتى كان حيحيينا من اول وجديد.
والحمل ده حيضيع كل امل جوايا حيضيع فرحتي اللى فرحتها الله يخليكي ياعليا احنا لازم ننزل دلوقتى مش حينفع نسيب الوقت يضيع من ايدينا حننزل حالا نروح لدكتور واتنين وعشرة المهم انتي انتي ياحبيبتى وبس
عليا :حتموت ولادك يايدك يايزيد
يزيد:انا ولاد الدنيا كلها مش ممكن يعوضوني عنك لو حصلك حاجه احنا يوم ماربنا رزقنا بعشق حمدت ربنا عليها ومطمعتش فى اكتر من كده
عليا :وانا مش حموت ولادي مهما كان التمن يايزيد
ياترى ايه اللى حيحصل مع عاليه ويزيد
ومع مياده وهاجر وعصام وحسن وإيمان كل ده حنعرفه الفصول الجايه ان شاء الله
واللى لازم تعرفوه ان اللى فات حماده واللى جاي حماده تاني خالص
وربنا يستر من اللى جاي ويقدرنا على فعل الخير وشكر الله سعيكم
لايكاتكم تعليقاتكم توقعاتكم
اه صح نسيت اقولكم برافو عليكم على توقعاتكم ان الحوار بين يزيد وعليا طلع صح وده فرحني اوى انكم معايا فى الروايه ومندمجين فى احداثها وعرفتم الحوار بين مين
اشوفكم على خير البارت الجاي ان شاء الله
😥😥😥😥😥😥😥😥😥😥😥😥😥😥😥😥
•تابع الفصل التالي "رواية شمس تتحدي الغيوم" اضغط على اسم الرواية