رواية شمس تتحدي الغيوم الفصل السابع و الثلاثون 37 - بقلم عبير سليم
الفصل السابع والثلاثون من رواية شمس تتحدى الغيوم
❤️❤️❤️❤️❤️❤️❤️❤️
ماذا تريدين منا أيتها الأيام لماذا تزداد قسوتك علينا هكذا كلما ظننا أننا ملكناكي وتحكمنا بكى وجدنا انفسنا كمن يقبض على الهواء يظنه فى يديه وإذا به ينظر فلا يجد شيئا
نحن لا ننكر فضلك علينا ولكن لما تاخذين مننا الفرحه وتعطينا الأحزان كفى فقلوبنا تعبت وارهقت من كثرة ماتذوقته من الآلام فلقد تجرعنا من هذا الكأس فكفى بالله عليك فقلوبنالم يعد لديها القدرة على الاحتمال
يدخل عمر وشمس على الأصوات العاليه التى تبعث القلق فى النفوس
عليا فى داخل احضان هاله منهارة من البكاء وعشق تبكي على بكاء أمها بينما شاكر يحاول تهدئة يزيد الثائر
لم يعهده أحد من قبل فى هذه الثورة ولكن لما التعجب وأنه معرض لفقد زوجته وحبيبته ورفيقة حياته وأم طفلته التى منحها القدر له
عمر:فى ايه ايه اللى حصل يزيد بتزعق كده ليه صوتكم جايب للشارع مالها عليا بتعيط ليه متفهموني فى إيه
يزيدبصوت جهوري تهتز له الجدران :الهانم حامل
عمر: مش معقوله عليا حامل طب ازاي ليه كده بس ياعليا انتي مش عارفه ان الحمل خطر على حياتك ده احنا مصدقناش نفسنا لما ولادة عشق عدت على خير
وانك قمتي بالسلامه
عليا:حرام عليكم انتوا ليه كلكم جايين علية وكأني أنا اللى عاوزة اموت نفسي واسيب بنتي وجوزي اللى هما اصلا كل دنيتي
هاله :طب اهدي ياعليا احنا عارفين ياحبيبتى انه نصيب بس احنا كلنا قلقانين عليكي انتي
عليا :والله العظيم انا ماعارفه ده حصل ازاي والله انا عمري ماجه فى بالي انى ممكن اخلف تاني
يزيد :ماهو ده اللى حيجنني ده انا بروح معاها للدكتورة بنفسي كل فترة عشان نتاكد ان كل شئ تمام وان مش حيحصل حمل
عليا:اديك قلت اهوه يعني انا ايه ذنبي فان حصل حمل
يزيد :ذنبك انك خبيتي علية الفترة اللى فاتت كان زماننا دلوقتى اتصرفنا بسرعه قبل مايكون فى خطر عليكي
عليا :والله ماكنت اعرف انى حامل
شاكر:ازاي بس ياحبيبتى مش انتوا ياستات بتعرفوا ده كويس ده انتوا بتعرفوا من اول شهر واللا انا غلطان يابنتى
عليا وهى تبكي:ايوة معاك حق ياعمي بس الادويه اللى باخدها بتغير الهرمونات عندى والدنيا بتكون مش منتظمه وانا متعوده على كده طول عمري ويزيد عارف ده كويس
عشان كده مجاش فبالي حاجه انا قلت عادي ومحطتش فى دماغي حاجه
حتى لما بدأت احس بدوخه قلت يمكن من العلاج اللى باخده لكن لما رحت النهارده المتابعه وقلت للدكتور على الاعراض اللى بحس بيها عشان يغيرلي الادويه لأنى كنت معتقده انها السبب هو اللى طلب مني اعمل تحاليل واطلع بيها على الدكتورة بتاعتي
انا وربنا اتصدمت اول ماعرفت النتيجه واسالوا مروة اهي كانت معايا وشافت حالتي كانت عامله ازاي
😥فعلا ياعلي والله كانت منهارة وعماله تعيط والدكتورة طبعا كانت متضايفه اكتر منها واتفاجئنا اكتر لما عرفنا انهم تواءم اه مامامتكم كانت جايباكم توأم وهى ورثت منها الموضوع ده
والدكتورة عشان متابعه حالتها قلقت جدا خصوصا انها تقريبا فى اول الرابع واجهاض الجنين حيكون خطر على حياتها وفيه مجازفه كبيرة
ولقيت عليا بتحمد ربنا وتقول قدر الله وما شاء فعل وبرغم انى انا والدكتورة كنا مرعوبين لكن هى سبحان الله ربنا نزل على قلبها السكينه
كان على ثورته لاتقل عن ثورة يزيد ولما لا وهو معرض لفقد اخته توأم روحه احن الناس واقربهم الى قلبه
علي:ياترى يزيد عامل ايه دلوقتي ده مش بعيد يولع الدنيا ياللا لازم نروحلهم حالا ده النهارده جالنا الخبر اللى اتمنناه سنين طويله
مروة:خبر ايه ياعلي
😭يزيد :مركز زراعة القلب اتصلوا بية وقالولي ان فى ست تقريبا فى سن عليا عملت حادثه والست اتوفت والقلب سليم وان اهل المتوفية قرروا يتبرعوا باعضاءها الحية للى محتاج والمركز لقى ان الانسجه ان شاء الله حتكون متوافقه مع انسجة عاليه
والمستشفى قالتلي لازم العمليه تتعمل فى خلال اربع ساعات
وانا جيت جري على اساس اننا حنروح المركز وحتدخل العمليات حالا حتى علي كان المفروض حيحصلنا على هناك ده انا حتى مالحقتش ابلغ حد وجيت جري عشان منضيعش وقت
تفتكروا رد فعلى حيكون ازاي وانا فنفس الوقت اللى الأمل اتولد فيه جوايا ان عليا حتفضل فى حياتي ا اكتشف انها ممكن تروح مني
شاكر :قدر الله وما شاء فعل خلاص يابنى مفيش نصيب يعنى حتى لو اجهضنا الجنين بردو مش حنلحق
ان شاء الله تتعوض مرة تانيه
يزيد :تتعوض مرة تانيه كانت اتعوضت قبل كده مانا بقالي سنين بدور فى الموضوع ده وكل مانقول هانت نلاقي الانسجه مش متوافقه مع القلب الموجود
وانا ماصدقت ان انسجة القلب ده اتوافقت مع انسجتها ده الدكتور اللى متابع معايا فى المركز هو نفسه بيكلمني وهو طاير من الفرحه
ده احنا لا كنا لاقيين برة ولا هنا يقوم لما نلاقيه نقول لاء مينفعش طب ليه ليه
عشان الولاد انا مش عاوز ولاد انا مش عاوز حد غيرك غيرك انتي وبس انتي فاهمه واللا لاء انتى لو جرالك حاجه انا حعمل ايه بالولاد حينفعوني بايه انا عيال الدنيا كلها مش ممكن تعوضني غيابك
عمر:يزيد الله يخليك اهدى عشان نعرف نفكر بالراحه يمكن نوصل لحل
عليا :اي حل غير انى افرط فى ولادي
يزيد:انتي تخرسي خالص انتي فاهمه
عليا :لا مش فاهمه يايزيد ولو عملت حاجه ضيعت بيها ولادي انا عمري ماحسامحك ابدا
يزيد وهو ياخذها من أحضان هاله ويحتضنها بقوة:خايف عليكي تروحي مني كان يتحدث اليها والدموع تغرق وجهه:طب انا مفكرتيش فية مفكرتيش انا ممكن اعيش ازاي وانتي مش موجوده انا طول فترة حمل عشق كنت مرعوب مكنتش بنام
التسع شهور عدوا عليا تسع سنين وقلبك كمان وقتها كانت حالته افضل من دلوقتى كتير
لكن انتى المرة دى قلبك تعبان وحامل فى اتنين مش واحد يعني ممكن تروحي منى ياعليا طب انا اهون عليكي
تسيبيني يعنى انتي مش عاوزة تفرطي فى حد انتي لسه مشوفتيهوش وعندك استعداد تفرطي فية انا ياعليا
طب بلاش انا ياستي بنتك دى عاوزة تسيبها ياعليا عاوزة تسيبي عشق تهون عليكي تسيبيها وهى روحها فيكي يهون عليكي تبقى بنتك يتيمة الأم
عليا وهي منهارة:لا مقدرش اسيبك ولا اسيبها
طب اعمل ايه قللي اعمل ايه عشان احافظ عليكم كلكم
يزيد :بصي ياعليا لو الحمل ده هو الجدار اللى حيفصل بيني وبينك انا حهده انتى فاهمه حهده مهما كان التمن انتي حياتك عندي اهم واغلى من اى شئ فى الدنيا
الحمل ده حينزل باي وسيله حتى لو ملحقناش نعمل العمليه بس على الاقل اضمن وجودك فحياتي
لحد ماربنا يكرمنا بقلب تاني لكن مكونش عايش فى رعب
كانت عليا لاترد وانما اكتفت بالبكاء الشديد كان حقا موقف صعب الكل حزين كانت شمس منهارة على حال عليا وفى نفس الوقت فخورة بيزيد و بحبه لزوجته فاغلبهم يقول ابني اهم ويفرطون فى زوجاتهم من اجل الانجاب كما حدث بين خالتها وزوجها اما الان فهى ترى عاشقا حقيقيا بكل ماتحمل الكلمه من معنى
فتحاول مشاركتهم فى حل المشكله :انا عندي فكرة
عمر :فكرة ايه ياشمس
شمس :احنا نروح حالا مركز زراعة القلب اللى المفروض حيتعمل فيه العمليه ونعرض الأمر على الدكاترة وهما الللى يختاروا الصح ووقتها احنا مش حنقول غير قدر الله وما شاء فعل واظن كلمة الدكاترة حتكون هى الفيصل
يعجب يزيد باقتراح شمس وياخذها على المركز ومعه عمر وشمس وعلي ذهب إليهم على المركز
يزيد وهو يقبل يد هاله :ادعيلنا ياامي ادعي لعليا
هاله :ربنا يطمن قلبكم يارب وترجعوا مجبورين الخاطر يارب
فى داخل المركز تم استدعاء احد اطباء النساء الكبار ليقول كلمته الأخيرة وحتى لا يتحمل احد ماسيحدث تباع هذا الأمر
يجلس يزيد وعلى مع الدكتور فى مكتبه بعد ان اتم الكشف على عليا
الدكتور :للأسف مش حنقدر نعمل إجهاض
يزيد :حضرتك بتقول إيه يعني إيه مش حينفع
الدكتور :المريضه حامل فى الشهر الرابع واجهاض الجنين فى الوقت ده حيكون اخطر عليها من الاحتفاظ بيه
يزيد :لا ارجوك ابوس ايدك يادكتور اتصرف مراتي لو كملت الحمل حتموت قلبها مش حيستحمل الله يخليك اعمل اي حاجه المهم مراتي تعيش
الدكتور :استغفر الله العظيم هو مين فينا يقدر يقول ده امتى حيموت الحياة والموت بايد ربنا ومحدش يعرف حيموت امتى
علي :ونعم بالله يادكتور بس ربنا قال ولا تلقوا بايديكم الى التهلكه
الدكتور :طب واذا كانت التهلكه الحقيقيه فى الاجهاض نقول ايه
يزيد :طب حضرتك مش واخد بالك انها كانت بتاخد ادوية قلب وده أكيد حياثر على الجنين
الدكتور :فعلا معاك حق فدي بس انا شفت الادويه اللى بتاخدها ومعظمها امنه جدا ونسبة الخطورة فيها ضعيفه جدا
يزيدوهو منهار :يعني خلاص مفيش حل يعني عليا حتروح مني خلاص لاء مستحيل
الدكتور وهو يربط على كتفيه:قول يارب وخللى ثقتك فى ربنا كبيرة وقدام ارادة ربنا مفيش حاجه ممكن تقف قصادها حتى الطب
يزيد وهو يمسح دموعه بايديه:طب حنعمل إيه دلوقتي
الدكتور :اولا حنلغي فكرة العملية دلوقتى لأنها خلاص مش حتنفع
يزيد :ياااه نلغيها ده انا بقالي سنين بحلم باللحظه دى ولما تيجي تروح فى ثانيه
الدكتور :وعسى ان تكرهوا شيئا وهو خير لكم
ومحدش يعرف يمكن ربنا جعل الحمل يحصل فى الوقت ده بالذات عشان ينقذها من حاجه وحشه كانت ممكن فعلا تحصللها لو عملت العمليه
علي :ونعم بالله طب وبعد كده يادكتور
الدكتور : احنا حنخليها تحت رعايه طبيه وان شاء ربنا ان يتواجد قلب انسجته متوافقه معاها بس تكون دخلت في الشهر السابع حنحاول نولدها ان شاء الله
يزيد :طب ايه الفرق بين انها تولد فى السابع وانها تولد دلوقتى
الدكتور :عيب يابشمهندس لما تسأل سؤال زى ده اللى حضرتك عاوزه يحصل دلوقتى هو إجهاض معناه فصل الجنين بالاجبار عن المشيمه اللى بتربط بينه وبين الأم قبل اكتمال نموه وفصلها عن الام بالشكل ده يتسبب فى نزيف شديد ممكن منقدرش نوقفه وكمان ممكن يحصل مضاعفات كتيرة تسبب الوفاة خصوصا لو كانت حالة المريضه اصلا خطر
لكن الجنين فى الشهر السابع بيكون اكتمل نموه حتى لو كان حجمه صغير نقدر نحطه فى حضانه لكن حتكون ولاده وده يقلل الخطورة على حياة الأم
علي :بس دول توام اتنين مش واحد
الدكتور :سيبها على ربنا ادعيه الدعاء بيغير القدر
الدعاء، والبلاء يعتلجان
الشئ الوحيد اللى ممكن يغير القدر ويمنع البلاء هو الدعاء
يخرج يزيد وعلي من غرفة الطبيب ليروا عمر وشمس ومروة الجميع منتظرين سماع كلمته
عمر :طمني يايزيد الدكتور قالك إيه
يضع يزيد رأسه بين كفيه ولا يتحدث
عمر :فى ايه فهمني انت ياعلي الدكتور قال ايه
على:قدر الله وما شاء فعل خلاص ياعمر مش حينفع الإجهاض وعليا لازم تكمل الحمل
مروة :ان شاء الله خير وان شاء الله ربنا حيقف معاها وتقوم بألف سلامه
كانت عليا جالسه بينهم لا تتحدث وعيناها محمرة من البكاء تنظر ليزيد وهى خائفه ترى فى عينيه نظرة اتهام لها وهى لم تخطئ فى شئ ولم تتعمد فى ايذاء نفسها والحاق الاذى بها
😭يأخذها فى احضانه يعتصرها بايديه متشبث بها وكأنه خائف من ان يختطفها القدر منه :حبيبتي ممكن تهدي بقى شويه انتى فحضني خلاص
عليا وهى منهارة :انا اسفه اسفه والله ماكان قصدي ان اللى حصل ده يحصل انا بحبك اوي مش عاوزاك تزعل مني
يزيد :انا ازعل منك ده انتي روحي حد يزعل من روحه
اللى اسف ياعليا انا السبب انا اللى المفروض كنت اسيطر على نفسي وعلى مشاعري ناحيتك اكتر من كده
حبي ليكي ورغبتي فيكي خلوني اجي عليكى اكتر من اللازم انا كنت أناني أوى المفروض كنت احاول ابعدك عنى على اد مااقدر وماكنتش اعرضك للخطر
كان كفايه علية انك تفضلي فحياتي وبس انا مكنتش محتاج اكتر من كده
انا اسف اسف ياحبيبتي سامحيني
عليا :لا يايزيد اذا كان فى حد المفروض يعتذر فعلا يبقى انا
انا وجودى فحياتك حكم عليك انك تعيش مع واحده مريضه متقدرش تسعدك
وذمان كنت عاوزني احرمك من حقك فية وحقي فيك طب ازاي الحب مفيهوش عذريه ياحبيبي
ثم تأخذ يديه وتضعها على بطنها:ولادك هنا يايزيد انا جوايا حته منك يا حبيبي
يزيد وهو يلعد وجهه عنها ليمسح دموعه:ربنا يقومكم لية بالسلامه
من بكرة فى ممرضه حتكون متواجده معانا طول فترة الحنل حتراعيكي بنفسها
عليا :ربنا يخليك لية ياحبيبي
يزيد :ربنا يخليكي انتي لية ياحبيبتى
😥فى الاسفل يتجمع بقية العائله:صللي عالنبي كده ياعلي
على:عليه الصلاة والسلام خخايف عليها ياعمي عليا دى مش اختى دى روحي من جوه
هاله :ان شاء الله خير وربنا مش حيوجع قلبنا عليها ابدا
عشق:جدو هو انتوا زعلانين كده ليه هى ماما حتموت وتىوح عند ربنا
شاكر :ألف بعد الشر عنخاربنا يخليها يارب ماما حتقوم بالف سلامه وحتجيبلك اخوات حلوين تلعبي معاهم ياحبيبتى
عشق :انا كان نفسي اوى يبقى عندي اخوات كل اصحابي فى المدرسه عندهم اخوات وانا لاء
شمس :خلاص ياعشق ماما ان شاء الله حتجيبلك احلى اخوات فى الدنيا
😭😭😭😭😭😭😭😭😭😭
فى اليوم التالي
تخرج من البيت وعلى كتفها صغيرتها قاصده منزل صديقتها فلقد اعتادت زيارتها بين الحين والآخر ولكن يشترط عليها اخوها ان يقوم احد بتوصيلها والعوده بها خشية ان تقابل طليقها فيتسبب لها فى مضايقه
تتجه نحو محل اخيها:صباح الخير يااخويا
منعم :صباح الفل يا حبيبه ثم يلتقط الصغيرة من على كتفها ويقبلها:صباح الخير ياحبيبة قلب خالو
حبيبه :انا رايحه عند أمل شويه
منعم:طب استني اتصل بعبد الرحمن يروح يوصلك
حبيبه :مفيش داعي تتعبه كل مرة كده احنا لسه الصبح
منعم :لا معلش افرضي الزفت فتحي شافك وضايقك وانتي لوحدك واللا خطف البنت لا بصي معلش انا شارط عليكي مفيش خروج غير ومعاكي حد
حبيبه :طيب خلاص يااخويا اعمل اللى يريحك ربنا يخليك لية يارب وميحرمنيش من حنيتك علية
يجدون صديقه ماهر مقبلا عليهم:صباح الخير
حبيبه ومنعم:صباح النور
ماهر:مالكم فى حاجه واقفين كده ليه
منعم:لا مفيش دى حبيبه رايحه تزور صاحبتها وانا بتصل على عبد الرحمن ينزل بوصل عمته
ماهر :طب متتعبهوش خليه نايم حرام ده بيسهر طول الليل يذاكر انا رايح اسخن العربيه اخدها اوصلها على طريقي
منعم :لاياعم انت رايح تسعى على لقمة عيشك ولسه جايب الميكروباص ربنا يباركلك فيه يارب نقوم نعطلك
ماهر:منعم هو انت معتبرني غربب عنكم
منعم:واحد والله ياماهر بس معلش مش جينفع والله انت عارف كلام الناس اى حد حيشوفها راكبه معاك العربيه حيتكلمواوانت عارف لسنة الناس مبترحمش
ماهر :قطع لسان اللى يجيب سيرة ام جنى على لسانه دى ست الكل
منعم :معلش ياماهر مانت مش حتعرف تمسك لسان حد والف مين عاوز يلاقى جنازة ويشبع فيها لطم
انا عارف والله انت مين ياماهر لو حامن حد على اختي مش حيكون عيرك بس الناس متعرفش
ماهر :ماشي يامنعم ولا يهمك انا كان قصدي خير والله
منعم :مننحرموش منك يارب
ماهر:طيب عن اذنكم
منعم :تعالي ياحبيبه انا حوصلك بنفسي وارجع المحل تاني
حبيبه :لا والنبي يااخويا انا خلاص حرجع البيت تاني وابقى اروحلها مرة تانيه
منعم :لا وربنا ماحيحصل هو انتى بتروحي فين بعنى ده هى دى خروجتك الوحيده تعالي واهوه بالمرة اجيبلك شوية حاجات تطلعي بيهم لصاحبتك
حبيبه :ربنا يخليك لية يارب
ويفرحك بعبد الرحمن وتشوفه دكتور اد الدنيا
اخدها منعم ووصلها عند امل اللى فرحت جدا بزيارة حبيبه اللى بتستناها دايما وبعد شويه راحوا يكملوا قعدتهم مع سناء اللى لو عرفت ان حبيبه جت لامل ومعدتش عليها بتزعل منها اوى
بصراحه وجود امل وابنها وحتى حبيبه كمان فرق جدا فى حياة سناء
محستش بالوحده طول الوقت معاها وحواليها ده حتى فى اوقات كتير امل بتعمل الأكل وبتروح تاكل مع سناء خصوصا لما بيكون وليد راجع من العلاج الطبيعي وعاوز يرتاح
🌺🌺🌺🌺🌺🌺🌺🌺🌺
تطرق على الباب فتذهب نيرة لتفتحه :هاجر اهلا وسهلا اتفضلي ادخلي
هاجر :معلش يانيرة بس انا كنت عاوزة اسيبلك البنت شويه حروح مشوار وراجعه على طول
نيرة وهي تاخذ منها البنت:حبيبة قلبي وحشتيني أوى
طب انتى استاذتني من جوزك ياهاجر وقلتيله انك حتخرجي
هاجر :لا والله ملحقتش اصل خالي تعبان اوى وحروح ازوره بسرعه قبل ماعصام يرجع من الشغل بس معلش متقوليلوش انتي حاجه انا لما ارجع البيت حبلغه انى خرجت
نيرة:ماشي براحتك مع السلامه
تخرج هاجر ببنما تأخذ نيرة دارين وتدخل
وطبعا اول ماجدها شافها اخدها فى حضنه طبعا ماهى حفيدته حبيبته ومهما كان زعلان من ابوها واللا مش طايق امها لكن هي حاجه تانيه خالص كان فرحان بيها جدا
🌹يعمل فى نشاط وهمه ليحول المحل الذي اشتراه لورشة ميكانيكا سيارات:برافو عليكم ياولاد ايوة كده
احد الصبيان :تمام كده يابشمهندس
علاء :تمام اوى يابطل ياللا بقى خد صاحبك وروحوا اتغدوا وساعه وتكونوا هنا لسه قدامنا شغل كتير
الصبي:حاضر يابشمهندس
يمشي الصبيان بينما يستكمل علاء عمله بالورشه
والتي أصبحت جاهزة لتصليح السيارات
وبينما هو يعمل ويمسح عرقه الذي تساقط على جسمه من شدة التعب يسمع صوتها خلفه نعم هو صوتها وكيف له الا يعرفه من بين الاف الاصوات وهو اكثر صوت يكرهه فى حياته :ازيك ياعلاء
علاء وهز يلتفت لها:انتى
انتي ايه اللى جابك هنا و عرفتى مكاني ازاي
هاجر :مش مهم عرفته ازاي المهم اني عرفته وجيتلك على طول
علاء:هاجر امشي من ادامي
هاجر :معقول ياعلاء تطلب مني امشي طب مفيش ازيك ياهاجر وحشتيني اى حاجه ده احنا بقالنا اكتر من سنه مشوفناش بعض
علاء :اقولك وحشتينى ههههههههههه انتى عاوزة ايه وجايه هنا ليه
هاجر :عاوزاك انت ياعلاء
علاء الله يخليك اسمعني انا بحبك ومقدرتش انساك ابدا
علاء :انتي عبيطه ولا ايه هو انتى مش اتجوزتي وخلفتي عاوزة منى ايه
هاجر :وانت عرفت منين اني اتجوزت وخلفت
علاء:ملكيش فيه اهوه عرفت منين ماعرفت المهم اني مش عاوز اشوف وشك ده تاني امشي غوري من هنا
هاجر:كلامك ده معناه انك لسه بتحبني ياعلاء ايوة انت بتحبني لو مكنتش بتحبني مكنتش اهتميت تعرف اخباري وتطمن علية
علاء :اطمن عليكي هههههههه انتي شكلك شاربه حاجه انا احبك انتي ده انتي اكتر واحده بكرهها فحياتي
هاجر :علاء انا عارفه انك زعلان مني لكن متنكرش اني اول حب فحياتك وانك مش قادر تحب غيري بدليل انك متجوزتش بعدي علاء عشان خاطري افتكرلي اى حاجه حلوة كانت بيننا علاء انا جايالك النهارده عشان نفتح مع بعض صفحه جديده وننسى اللى فات انا مستعده اسيب الدنيا كلها علشانك
علاء:انت ايه شيطانه انتى عاوزة منى ايه تاني ماتسيبينى فحالي بقى
وبعدين كل حاجه ايه اللى عاوزة تسبيها بيتك وجوزك وبنتك انتى عمرك ماحتتغيري ابدا
انتى لو ممشيتيش من قدامي حالا وديني لعملك فضيحه امشي غوري
هاجر :علاء ده بنت عمك قبل مااكون مراتك ازاي تكلمني كده
علاء :هههههههههه بنت عمي اه بنت عمي اللي انا اتجبرت على جوازها واديت نفسي فرصه وحبتها وعيشتها اللى عمرها ماعاشته
بنت عمي اللى اديتلها كل حاجه ومااخدتش منها غير الغدر والخيانه
هاجر :لاء انت فهمت غلط ياعلاء والله العظيم انا ماخنتك ابدا ده انا عمري ماحبيت حد غيرك انت
علاء :تعرفي انى لما بشوفك قدامي بحس بالارف
هاجر :علاء انا مستعده اعوضك عن كل حاجه
علاء:تعوضيني حتعوضيني عن شقايا وتعبي وشقا غربتي اللى ضيعته عليكي عشان ابسطك
واللا حتعوضيني عن بنتي اللى موتيها باهمالك وانا نيتك وحبك لنفسك وهى خلاص كانت كبرت قدامي وبقت عروسه
كانت الحاجه الحلوة الوحيده اللى فحياتي كانت هى اللى مصبراني عليكى
انا مفيش حاجه منعتني عن اني اقتلك غير صلة الرحم اللى انتي محيتيها بعمايلك
بس اقسم بالله ياهاجر لو ممشيتي من قدامي حالا لكون خاتقك بايديه الاتنين واريح قلبي من النار القايده جواه واللى مفيش حاجه فى الدنيا ممكن تطفيها
ايوه هى هاجر كانت عارفه ان علاء زعلان منها اوى لكن غباءها خلاها تفتكر انه ممكن يكون لسه بيحبها وممكن يسامحها
تلتفت على صوتها وهو يناديها:هاااااجر
هاجر بنظرة كلها خوف:عصام
انا كان نفسي اكملكم حكاية هاجر وعلاء بس كنت حضطر انزلكم البارت بكرة وانا عارفه انكم طبعا بتستنوا الروايه بفارغ الصبر
قولولي اه والنبي ارفعوا معنوياتي شويه
حقولكم تصبحوا على الف خير واشوفكم البارت الجاي مع نكد جديد قصدي احداث جديده
باي باي يااحلى فانز فى الدنيا
🌹🌹🌹🌹🌹🌹🌹🌹🌹🌹🌹🌹🌹
•تابع الفصل التالي "رواية شمس تتحدي الغيوم" اضغط على اسم الرواية