رواية شمس تتحدي الغيوم الفصل الرابع و الاربعون 44 - بقلم عبير سليم
الفصل الرابع والأربعون من رواية شمس تتحدى الغيوم
بقلمي :عبير سليم
🌺🌺🌺🌺🌺🌺🌺🌺
من منا لم يرتكب ذنبا أو جرما في هذه الدنيا اننا لم نخلق ملائكة
ولم يخلقنا الله لنعيش ملائكه فالله خلقنا لنخطئ ونتوب ثم نخطئ ونتوب وفى كل مرة نخطئ ونطلب المغفرة يغفر الله لنا
فكل بني ادم خطائون وخير الخطائين التوابون
وان الله يبسط يده بالنهار ليتوب مسئ الليل ويبسط يده بالليل ليتوب مسئ الليل
فلا يجب علينا مهما اخطانا او اذنبنا ان نياس من رحمة الله بنا فهو احن بنا من الام بوليدها
وكثيرا مايرسل لنا القدر هديه نصلح بها اخطاءنا ونريح بها ضمائرنا عما صدر منا بعمد و بقصد او بسهو وخطأ
😭يجلس مع صديقه و زميله فى العمل ليعرف سبب غيابه عن العمل اليومين الماضيين فهو لم يقتنع بعد بأنه مريض كما يدعي وشعر من صوته ان هناك خطب ما
ولذا قرر الذهاب إليه اليوم الجمعه حيث الفراغ من العمل للاطنئنان عليه فى بيت والده :الف سلامه عليك قلقتنى عليك ياعصوم
عصام :الله يسلمك يامحمد ربنا يخليك يارب تعبت نفسك والله مانا راجع بكرة ان شاء الله
محمد :عيب عليك ده احنا اخوات وعشرة عمر المهم طمني اخبارك ايه وإيه اللى حصل يخليك متجيش بقالك يومين
انا عملتهوملك اعتيادي وقلت لعبد الخالق انك تعبان اوى عشان ميتكلمش انت عارفه ده فى الخصومات معندوش فهم
ومتقوليش انك فعلا كنت تعبان عشان مش حصدقك
عصام :............
محمد :انا آسف لو كنت بتدخل فى شئ ميخصنيش ده من عشمي بس ياعصام وان ربنا بعلم انا بعزك ازاى
عصام :متقولش كده يامحمد انت راجل محترم وصديق وفي وربنا يباركلك فى صحتك ويخليللك ولادك يارب وانا كل اللى اقدر اقولهولك اني انا ومراتي انفصلنا خلاص وكل واحد راح لحاله
محمد:لا حول ولا قوة الا بالله ليه كده بس ياعصام مش كنتوا تحاولوا تعالجوا مشاكلكم بس وانتوا مع بعض عشان خاطر البنوته الصغيرة
عصام :ماهو عشان خاطرها هيا انا عملت كده
محمد:انت تقصد ايه بالكلام ده ياعصام اوعى يكون علاء الميكانيكي ليه يد فى الموضوع ده
عصام :علاء ده احسن حاجه حصلتلي وهو ده اللى ربنا عوضني بيه انسان كويس اوى يامحمد ميتخيرش عنك فى الادب والأخلاق والجدعنه ربنا يعوضه خير ان شاء الله
محمد :خلاص ياعصام قدر الله وماشاء فعل ومادمت شايف انك عملت الصح يبقى تنتبه بقى لشغلك وتركز فيه كويس خصوصا الفترة الجايه
عصام :اشمعنى يعني الفترة الجايه
محمد :انا عرفت ان الشركه داخله على مشاريع كبيرة الفترة الجايه ان شاء الله
وممكن ان شاء الله تفتح فرع تاني واللى حيثبتوا كفاءتهم حيكونوا من ضمن فريق القياده فى الفرع التاني للشركه وانا شايف ان دي حتبقى فرصه حلوة بالنسبه لك وتبدأ من اول وجديد
عصام :ياريت والله يامحمد انا فعلا محتاج أبعد شويه بس هو الفرع التاني حيكون هنا فى اسكندريه بردو
محمد :والله لسه مش عارف ياعصام كل اللى فهمته ان الشركه بتاعتنا حتبقى الشركه الأم اما الشركه التانيه حتبقى فرع بينفذ بعض المشروعات من الشركه لكن بعد الرجوع للشركه الاساسيه وانهم تقريبا حيقسموا بعض منهم حيفضل فى الشركه عندنا والتانيين حيمسكوا الفرع الجديد
وانا عن نفسي ححاول اعمل اللى علية عشان امسك منصب فى الفرع الجديد ونفسي تبقى معايا ياعصام
عصام :ان شاء الله يا محمد
بس لما افوق من اللي انا فيه شويه انا لسه مش عارف اتعايش مع الواقع اللى انكتب علية
محمد :طب ودارين حتعمل معاها ايه
عصام :معايا وانا خلتها تكتب تنازل عنها
محمد :وهي وافقت بحاجه زى دي إزاي
عصام :وافقت يامحمد وافقت شفت ربنا انتقم مني ازاي على اللي عملته فشمس
تصدق بالله انا برغم اني حزين على اللي حصللي بس حاسس بالراحه ان ربنا انتقملها مني واني اتغدر بية زى ماغدرت بيها وشربت من نفس الكاس اللى شربتهولها
بس عالاقل هي الكل كان متعاطف معاها وبيحاول يقويها لكن انا خايف حتى احكي واقول لحد لأني حشوف نظرة الشماته فعيونهم
بس بردو مش حرتاح غير لما اطمن انها سامحتني عشان ارناح يامحمد من اللى انا فيه
محمد :خلاص ياعصام انسى شمس ربنا عوضها خير ودلوقتى ماشاء الله عليها عايشه سعيده مع عمر
وانت مش فدماغها اصلا فكبر دماغك وحاول انت تصلح من نفسك وربنا يعوضك خير باللي تريح بالك وتكون ام حنينه على البنت يارب
عصام :محدش حيكون حنين على بنتي ادي يامحمد وانا خلاص مش عاوز حاجه من الدنيا غيرها ربنا يقدرني واربيها واخليها احسن الناس غير كده مش عاوز خلاص
محمد :محدش يعرف بكرة فيه ايه يا عصام سيبها على الله
تتقدم منهم نيرة لتضع العصير امامهم :اتفضلوا
محمد :انتي نيرة بسم الله ماشاء الله ده احنا كبرنا خالص
نيرة بابتسامه جميله :شكرا لحضرتك
محمد :تعرفي اني مشوفتكيش من زمان اوى بس بجد متخيلتش انك كبرتي كده ماشاء الله عليكي ربنا بحميكى يارب
نيرة :ربنا يخليك يارب
عصام :والله انا ماعارف من غير نيرة كنت عملت ايه يامحمد محدش شايل دارين فى عينيها غيرها ربنا يفرح قلبنا بيها يارب
محمد :انتي خلصتي دراستك يانيرة
نيرة:ايوة لسه مخلصه السنه اللى فاتت تجارة ادارة اعمال
محمد :بسم الله ماشاء الله ربنا يحميكي ياحبيبتى يارب وعقبال مااشرب شربات فرحك يارب وحيكون قريب أوى ان شاء الله
تستئذن نيرة وتنصرف فيجد هاتفه يعلن عن اتصال فيفتح الخط سريعا:موني القمر والمزة بتاعتنا بتتصل بية والله انا مش مصدق نفسي
إيمان :لا صدق يامحمد ياعسل بقولك ايه انت فين
محمد :انا فمشوار ياايمان خير فى حاجه
إيمان :عاوزاك يامحمد ضروري اوى مسأله حياة او موت
محمد :ايمان انتي بتتكلمي بجد واللا ده هزار زي عادتك
إيمان :لا وربنا بتكلم بجد ولازم اشوفك دلوقتي اى مكان
محمد :حاضر ياايمان قوليلي عاوزه نتقابل فين بالظبط وحكون عندك حالا
🌺خير يابنتي ماتتكلمي يخربببت سنينك جايباني على ملا وشي وبقالك ربع ساعه ساكته ماتنطقي يابنتي
ايمان :محمد انت عارف اني بعزك صح
محمد :صح ياايمان وانا كمان وربنا بعزك اوى وعمري ماحنسالك لما اقنعتي غاده تتجوزني بعد ماكانت رفضاني تماما
إيمان :مانا شفتك ياعيني متشحتف وعينك حتطلع عليها وهي مش معبراك مانت بصراحه كان شكلك عجيب وبتلبس لبس عجيب انت كنت بتجيب القمصان دي مين يامحمد
محمد :ههههههه ههههههه مابلاش فضايح بقى
إيمان :صعبت علية ياعيني واقنعتها بيك واديكم اهوه اتجوزتوا وخلفتوا كمان وجبتلنا يوسف ويمنى عقبال مانجيب يسرا كمان عشان تبقى ظبطت كل الاتجاهات
محمد :ههههه لا الحمد لله اوى على كده وتتردلك فى الافراح يامنتي وانا عمري ماحنسالك جميلك ده
إيمان :جميل ايه بس يامحمد عيب عليك ده احنا اخوات بس جه الوقت اللى تردلي فيه جميلي عليك قلت ايه يامعلم
محمد :قلت سمعا وطاعه طبعا بس فهميني بالظبط الحكايه وعينيه ليكي ياموني
إيمان :الزفته مياده
محمد :قطيعه تقطعها وتقطع سيرتها مالها المحروقه دي
إيمان :حبيبي ياابو يوسف بص بقى يامعلم المخفيه دي عملت مصيبه كده عشان تفرق بين عمر وشمس وتلهفه لنفسها تمام
محمد :يانهار ابوها اسود وهي مالها بعمر وشمس وتاخده منها ليه مافى اكتر من واحد فى الشركه كانوا عاوزين يتقدمولها.وهي اللى رفضتهم
إيمان :طمع بعيد عنك قالت لنفسها ليه اخد القليل لما ممكن اخد الكتير
محمد :والمطلوب ياايمان
إيمان :عاوزة اسجل لها مكالماتها كلها عشان نعرف بتكلم مين بتقولله ايه بخصوص موضوعها ده واكيد حنوصل لحاجه بس بسرعه والنبي يامحمد البت شمس مصممه عالطلاق ولازم نلحقهم يااخويا
محمد :طلاق ايه بعد الشر وأكيد حتعرفوا حاجه من تليفوناتها لأني انا اصلا شاكك فيها من زمان حركاتها وتصرفاتها مريبه كده وكنت حاسس انها بتدبر لمصيبه
إيمان :مصيبه لما تشيلها ان شاء الله وتريحنا منها ياقادر ياكريم
يعني خلاص اتفقنا حتساعدني يامحمد
محمد :كان على عيني والله ياايمان بس مش حقدر
إيمان :كان على ايه ياعينيه عينك ياخي جاك وجع فعينك يعني انا مقعداك فى كافيه عالبحر وطالباك مانجا اللى الكوبايه بخمسين جنيه ده انا معملتهاش مع حسونتي
وقدامك اطباق وشوك وسكاكين على اعتبار ان لو نفذت حعزمك عالعشا كمان واخليهم يلفولك الباقى تاخده وانت مروح
كل ده عشان تقوللي على عيني ده انا حخزقهملك دلوقتى
محمد :وطي صوتك يخرببيتك على بيت معرفتك السوده فضحتينا اقعدي يازفته الناس بتبص علينا
إيمان وهي تصدر له السكين الموضوع على الطاوله:حتنفذ واللا لاء
محمد :الله بخرببيتك عندي ولاد عاوز اربيهم
إيمان :يبقى تسمع الكلام وتنفذ من غير نقاش والا علية وعلى اعدائي رد انطق ساكت ليه
ياتي الجرسون:خير ياافندم هو فى مشكله واللا حاجه
إيمان :وانت مالك انت مشاكل عائليه
الجرسون:طب بعد اذنك ممكن بصوت واطي فى اجانب فى المكان وميصحش كده
إيمان :اجانب اه سوري طيب
محمد:هههههههههه هههههههههه اقسم بالله مجنونه رسمي عجبك كده
إيمان :محمد انت حتساعدني يعني حتساعدني بالذوق بالعافيه حتساعدني قلت ايه حتساعدني بالذوق واللا اروح اقول لغاده انك ضحكت عليه واستدرجتني واخدت مني اعز مااملك
ونشوف بقى غاده حيبقى ايه رايها فى الكلام ده
محمد :يانهار اسود انتي عاوزه تلفقيلي مصيبه وانتي عارفاها أصلا مجنونه وبتصدق اى حاجه وبعدين مين ده اللى يقدر يستدرجك ده انتي تستدرجي بلد
بصي ياايمان افهميني بس الله يحرقك انا عشان اعمل اللى انتي عاوزاه مني ده لازم اكون قريب منها وعلاقتنا ببعض حلوة لكن ده احنا بيننا ماصنع الحداد وكل يوم مبهدلها على سيبانها للشغل كل شويه ومكالماتها يبقى حعرف اسجللها ازاي
إيمان :اذا كنتم انتم بينكم مشكله انا بيني وبينها نار جهنم وانت والشركه كلها عارفه محمد الله يخليك البت بيتها حيتخرب يرضيك كده لو يرضيك خلاص
اعمل اي حاجه يامحمد ابوس ايدك
محمد :طب ممكن تديني فرصه لحد الصبح وارد عليكي
ايمان:صبح ايه لا يامحمد مينفعش انت لازم ترد علية بعد ساعتين تلاته بالكتير تقوللي فكرت فايه انت فاهم واللا لاء والا حتلاقيني مقطعه هدومي وبخبط على باب شقتك قلت ايه انطق
محمد :واهون عليكي بردو ياموني تعملي فية كده
إيمان :امال اسيب بيت صاحبتي يتخرب علية وعلى اعدائي
محمد :يخرببيتك خلاص خلاص انسدي ايه بالعه راديو خلاص ياايمان ان شاء الله حكلمك واقولك الخلاصه خلاص
إيمان :حبيبي ياابويوسف كنت عارفه انك أصيل ومش حهون عليك ثم تشاور للجرسون:ياكابتن
الجرسون:أيوة حضرتك
إيمان :هو مفيش عندكم عرض اللى ياخد كوبايتين مانجا ياخد عليهم فرخه مشويه هديه
الجرسون:ههههههه لا والله حضرتك ولا حتى ورك فرخه
إيمان :ياع مبحبهوش بحب الصدر بس
وانت يامحمد بتحب الصدر واللا الورك
محمد :استغفرك يارب واتوب اليك
إيمان : طب بعد اذنك بقى عاوزة فرخه مشويه بالسلطات والطحينه ظبطنا كده ماشي
الجرسون:هههههههههه حاضر يا فندم اى اوامر تانيه
إيمان :شكرا ياقمر انت
بزمتك مش امور الجرسون ده والنبي خسارة فى الشغلانه دي ده المفروض يبقى مدير
محمد : ياربي اللهم طولك ياروح إيمان اطلعي من دماغي انتي عاوزة تشيليني
إيمان :بعد الشر عنك يامحمد امال مين اللى حيدفع الحساب قصدي مين اللي حيساعدني ياقمر ان شالله مياده يارب يجيلها شلل رباعي بت الجذمه دي
اشرب عصير المانجا بقى ده بتمانين جنيه
محمد :مش كان من شويه بخمسين بقى بتمانين
إيمان :قلبك أبيض بقى ياحمو ده انت حبيبي وربنا ههههههههه متزعلش ياابويوسف فكها بقى ده انا عازماك على فرخه مشويه وغلاوتك مابعملها غير مع الغاليين بس وانت غالي اوى والله ياجميل انت يااختي كميله
محمد :لا ياهانم انا اللي ححاسب طبعا هو انتي قاعده مع سوسن صاحبتك واللا إيه
إيمان :طب مش كنت قلت كده من الأول كنت خليته جاب كباب وكفته أحسن
محمد :ربنا عالظالم والمفتري أشوف فيكي يوم يامياده مبيجيش من وراكي غير الخسارة
إيمان :اخس عليك يامحمد يعنى خسارة فية كوباية عصير مانجا وفرخه مشويه
محمد :خسارة فية لاء وانتي الصادقه خسارة لية
إيمان :ههههههههههه عسل وربنا يامحمد
محمد:والله مافى حدعسل وسكر غيرك ياموني ربنا يقدرني يارب واساعدك عشان اخلص من زنك ده
إيمان :منحرمش منك يا ابويوسف وان شالله نردهالك فى الأفراح يارب
😎😎😎😎😎😎😎😎😎😎😎😎
يجلسون على مائدة العشاء والصمت يعم المكان لا أحد يتحدث كل منهم ينظر فى طبقه فقط
هاله :مالكم ياولاد فى ايه
عمر:ايه بتقولي حاجه ياماما
هاله:بقول مالكم ياحبايبي مش بعاده تاكلوا وانتوا ساكتين كده هو فى حاجه حصلت فى الشركه زعلتكم
فينظر شمس وعمر لبعضهما البعض دون التحدث بحرف
شاكر:معلش ياولاد خلاص هانت كلها يومين ان شاء الله وعليا تخرج بالسلامه ويزيد وعلي حيرجعوا الشركه ان شاء الله
شمس :حضرتك بتقول ليه كده بس يابابا احنا اهم حاجه عندنا صحة عليا والشغل الحمد لله كويس والله جدا وماشي زى الفل احنا بس مجهدين شويه
شاكر :لا اجهاد ايه انا عاوزكم تشدوا حيلكم كده عشان تملولنا البيت ولاد
فيضع عمر يديه على يد شمس :ان شاء الله يا بابا
بعد اذنكم انا طالع استريح شويه
هاله :اطلع ياحبيبي شمس اطلعي مع جوزك ياحبيبتى
يدخلان الغرفه فيوجه اليها الحديث :ممكن افهم انتي ليه مخليتينش اروح اعمل تحليل الدم
شمس :لعدة اسباب ياعمر
عمر:طب فهميني دي حاجه كانت حتبقى اثبات عليها
شمس :ده على أساس اننا خلاص متاكدين كل ده مجرد تخمينات ياعمر
عمر اولا تحليل الدم بيتعمل فى خلال ساعات معينه واحنا على بال ماانتبهنا للموضوع ده كان فات وقت
وبعدين تحليل ايه ده اللي كنت حتعمله بعد الفول والفلافل والبدنجان المخلل اللى اكلتهم انت وايمان فى الشركه الصبح
عمر:وهو انا يعني كنت عاوز اكل ياشمس مش هي اللى نزلت اشترت وصممت وحلفت انها مش حتساعدنا غير لو اكلت
شمس :وانت بقى عملت إيه اكلت معاها كانك طالع من مجاعه ده انت كأنك كنت بتنتقم مش بتاكل
عمر :انتي بتقولي فيها طب والله انا كنت حاسس اني بطلع همي فى الأكل وبصراحه بقى اكتر انا كنت جعان اوى والفلافل ريحتها كانت رهيبه
شمس :ماشي يبقى تحليل ايه بقى وبعدين لو حتى اتاكدنا انها حطت حاجه حنثبت ده عليها ازاي ماطبيعي حتنكر وتلزقها لمجدي
عمر:هو كده بس ياشمس واللا انتي خايفه اكون مقلتش الحقيقه وميكونش فى حاجه شربتها خلتني معرفش ايه اللي حصل
شمس :عمر اللي لازم تتأكد منه ان لو كان جوايا شك بنسبة واحد فى المليون انك مقلتش الحقيقه انا استحاله كنت حبقى واقفه قدامك دلوقتى
يمسك يديها ويقبلها:ربنا يخليكي ليا يا رب وان شاء الله ربنا حيثبت برائتي
بس تفتكري ايمان حتعرف تساعدنا
شمس :انت نفسك لو مكنتش متأكد من ده مكنتش انت اللي طلبت مني اجيبها الشركه
عمر :حسيت ان محدش حيقدر يطلعنا من الورطة دي غيرها
شمس :وهي حتقدر ياعمر حتى لو ارتكبت جنايه دي صاحبتي وانا عارفاها كويس وعارفه بتفكر ازاي
😎😎😎😎😎😎😎😎
يجلس مع اخته وهو يلاعب ابنته الصغيرة ويضع الببرونه فى فمها
شفتي يانيرة دارين بقت جميله ازاي
نيرة:قمر بسم الله ماشاء الله عليها ربنا يخليهالك ياحبيبي يارب وتشوفها احلى عروسه في الدنيا كلها
عصام :يارب يانيرة نفسي اوى اربيها واكبرها واعلمها القيم والأخلاق نفسي اقدر احميها من غدر الزمن
نيرة :ان شاء الله يا حبيبي ترببها احسن تربيه
عصام :عارفه يانيرة انا ان شاء الله اول ماتبدا تتكلم حوديها دار تحفظ قران واعلمها الصلاة واخليها قريبه من ربنا نفسي اوى تبقى شاطرة وتعتمد على نفسها عاوزها تبقى بت جدعه كده تعرف الصح متاذيش حد متوجعش حد
نيرة:ربنا يقدرك وتعمل كل اللى نفسك فيه ياعصام
عصام :معلش يانيرة تعبناكي معانا
نيرة :ياسلام شوف ازاي ده على اساس انك مش عارف دارين عندي ايه دي حتة من قلبي بنت اخويا وحبيبة قلبي ربنا يخليها يارب
يعلن جرس الباب عن مجئ شخص ما:ده أكيد بابا حروح افتحله تجري على الباب لتفتحه دون ان تكون واضعه شيئا على رأسها:حمدلله على السلامه يا با
يلزم فمها الصمت عندما وجدته أمامها وهي بتلك الهيئه التى لم يراها عليها من قبل فلقد اعتاد ان يراها وشعرها مغطى ومرتديه ملابس محتشمه اما الان فهي واقفه أمامه ببجامه بيتيه وذراعها مكشوف وشعرها مشعث ترفعه كحكه والباقي منثور بشكل غير مرتب على وجهها
تشهق من المفاجاه وتجري سريعا على غرفتها بينما هو يقف مكانه لايتحرك يشعر بالسعاده من داخله بعد ان راها بتلك الهيئه التى زادتها براءة واظهرتها بمظهرا طفوليا
يقوم عصام لاستقباله وابنته على كتفه :علاء أهلا وسهلا واقف كده ليه متدخل ياعلاء
علاء :انا متأسف اوى والله انى جيت من غير معاد انا رنيت عليك كتير وتليفونك غير متاح وكان لازم اكلمك ضروري
عصام :طب تعالى ادخل ياعلاء ميصحش نقف نتكلم عالباب كده
يدخل علاء ويمد يديه لاخذالصغيرة فيعطيها عصام له
علاء:أهلا أهلا بالاميرة دارين وحشتيني ياقمر
كانت نيرة فى غرفتها واضعه يديها على قلبها من مفاجاتها بوجود علاء امامها ورؤيته لها بهذه الهيئه تنظر لهيئتها امام المرأه وتحدث نفسها:يالهوي علية وعلى منظري شبه ام محمد اللي بتبيع جبنه فى السوق ده منظر ده الراجل يشوفك بيه
تسمع صوت اخيها وهو ينادي عليها فتلبس اسدال الصلاة وتخرج اليهم ووجهها فى الأرض من الخجل:سلام عليكم
علاء:وعليكم السلام ورحمة الله وبركاته ازيك يانيرة
نيرة:الحمد لله والله امال فين سلمى مجتش معاك ليه
علاء :معلش بقى اصلي جاي في السريع وماشي على طول
عصام :خير يا علاء قلقتني
علاء :كل خير ان شاء الله بص بقى ياسيدي انا امبارح بعد مامشينا من عندكم عديت عالسمسار فى طريقي وقلتله عالشقه بتاعتك ومن ساعتين لقيته جايلي الورشه وبيبلغنى ان في زبون عاوز يشوف الشقه بكرة ان شاء الله فانا حبيبت اقولك عشان تعمل حسابك
عصام :معقوله بالسرعه دي ده انا قلت الموضوع ده حياخد شهر عالاقل
علاء :ده بيبقى حسب الشقه ومكانها وشقتك على وصفكم ليها انها حلوه انا حتى لما قلت للسمسار العنوان استخسرها اوى والله وقاللي دي تبقى لقطه
المهم هاه انت لسه عند رايك
عصام :ايوة طبعا ياعلاء بس يارب البيعه تتم على خير
يعطيه صغيرته بعد أن يقبلها ويقف وهو يتحدث:خلاص يبقى اتفقنا بكرة ان شاء الله الراجل حيتصل بيك وحيروح معاك انت والسمسار بعد صلاة العصر يشوف الشقه وربنا يكتب اللى فيه الخير ان شاء الله
عصام :طب انت وقفت ليه متقعد شويه
علاء :معلش والله مش حينفع وقت تاني ان شاء الله
نيرة من خلفه :طب انا عملت العصير حتمشي من غير ماتشربه
علاء:معلش بقى اعفيني المرة دي
نيرة:لا مانا مقعدش اقشر فى الليمون عشان تقول مرة تانيه العصير حيتشرب يعني حيتشرب اتفضل اشرب وبعدين امشي
عصام :خلاص بقى ياعلاء خده منها انا عارفها دي زنانه
يمد علاء يديه وياخذ الكوب ويشربه وعينيه فى عين نيرة فتشعر بالخجل وتنظر للجهه الاخرى
يضع الكوب فى الصينيه :من يد مانعدمها عقبال مانشرب شربات فرحك ان شاء الله
عصام :يارب نفسي اشوفها عروسه
نيرة :ياسلام يعني عاوز تخلص مني طب ايه رايك بقى اني حفضل قاعدالك كده على قلبك
عصام :قلب اخوكي انتي يانيرة
يضحك علاء على كلامهما وينصرف بينما تشعر نيرة بدقات قلبها تتزايد بشده بشكل لم تشعره من قبل
بينما يفتح عصام هاتفه الذي كان قد اغلقه من بعد خروج محمد من عنده حتى لا يتصل به احد
فيتفاجا بان محمد قد اتصل به اكثر من عشر مرات
عصام لنفسه :كل دي ميسدات يامحمد خير فى ايه فيتصل عليه فيجيبه سريعا:ايه ياعصام تليفونك غير متاح ليه
عصام :معلش والله يامحمد قفلته شويه ونسيته هو فى حاجه
محمد :ايوة فى حاجه انزلي عالقهوة اللى على اول الشارع عندك وانا جايلك حالا
عصام :ماشي يامحمد
😍بعد مرور القليل من الوقت يجلسان فى القهوة ويبدأ محمد فى الحديث:عصام انت قلتلي انك نفسك تعمل اى حاجه تكفر بيها عن اللى عملته مع شمس وضميرك يستريح وتكمل حياتك وانت مرتاح صح
عصام :ايوة طبعا يا محمد بس ازاي حقدر اعمل كده ده انا كل ماافكر اروحلها المكتب واعتذرلها اخاف جدا تحصل مشكله وفنفس الوقت مش عارف اعمل ايه انت عندك حل للموضوع ده
.
محمد :الحل موجود ان شاء الله وانت مش بس حتبقى اعتذرتلها لاء ده انت كمان حتبقى حافظت على بيتها من الخراب
عصام :خراب ليه بعد الشر هو في ايه بالظبط يامحمد ماتتكلم
محمد :مياده ياعصام واضح جدا ان عنيها على عمر جوز شمس وشكلها كده بترتب تخطفه منها وشكلها عشان توصل لده عملت مصيبه كبيرة عشان تقدر تفرق ببنهم
ومفيش حاجه حتخليهم يقدروا يكشفوها غير حاجه واحده بس نهم يسمعوا مكالماتها بتكلم مين بتقول ايه بمكن ده يخلبهم يقدروا يوصلوا لحاجه
عصام :هو انا فعلا ملاحظها من فترة بتتكلم كتير فى التليفون ومبتسيبهوش من ايديها وكنت مستغربها اوى بس بصراحه قلت يمكن بتحب واللا حاجه
طب ممكن افهم انا ايه دوري فى الموضوع ده يامحمد
محمد :احنا عشان نتصنت على تليفونها ايه المطلوب
عصام :المطلوب ان تليفونها يتحط علبه برنامج التصنت على المكالمات وتسجيلها
محمد :واذا قلتلك ان مفيش حد حيعرف يعمل حاجه زى دي غيرك انت تقول ايه
عصام :انا طب اشمعنى انا وازاي اصلا حعمل كده
محمد :اشمعنى انت لأن انت عارف كويس ان علاقتي بمياده زى الزفت. وده ميدينيش المساحه اني مثلا امسك تليفونها لاى سبب
عصام :بصراحه اه مش بتطيقك فعلا
محمد :أحسن بردو القلوب عند بعضها جتها داهيه تاخدها وتريحنا منها المهم انت بقى بتعزك اوي ومفيش من ناحيتك اى حاجه تقلقها
وثانيا لانك شاطر فى برمجة التليفونات وكذا مرة اجيبلك تليفونات وتظبطهالي ده انت مظبط تليفونات الببت عندنا كله ومش حيصعب عليك تعمل حاجه زي دي
عصام :فهمت قصدك يامحمد يعني انت عاوزني اخد منها التليفون لاي حجه صح وانزل عليه برنامج التصنت مش كده
محمد :برافو عليك ونحاول نلخمها فى اى حاجه شويه على ماتخلص بس هو ده ممكن ياخد معاك وقت اد إيه
والأهم ان البرنامج ده مش عاوزه يظهر على سطح المكتب عشان متكشفش اللعبه
هاه ياعصام ايه رايك قلت إيه حتقدر تساعد شمس واللا لاء
عصام :محمد انا مستعد اني اعمل اي حاجه فى الدنيا تخللى شمس تسامحني على اللي عملته فيها وانا بجد مابهونش علية اشوفها بيتغدر بيها للمرة التانيه حرام بجد كده حيبقى كتير عليها اوي مش حتستحمل اللى بيحصل لها ده كله
انا موافق يامحمد سيب الموضوع ده علية وماتقلقش انا حخفي البرنامج واخليه ميظهرش قدامها على سطح المكتب تماما وانا مش ححتاج اكتر من تلت ساعه بالكتير اكون نزلت البرنامج وظبطته كويس وحضرته عالتشغيل
محمد :ان شاء الله خصوصا ان سرعة النت عندنا فى الشركه عاليه
عصام :بالظبط كده وان شاء الله حيحصل كل خير وربنا يقدرني واحميها من اي شر ممكن يحصلها يااه يامحمد متعرفش لو ده حصل قلبي وضميري وكل حياتي حتبقى ازاي
محمد :ان شاء الله يا عصام ان شاء الله
وبعد مانخلص من الموضوع ده على خير فى حاجه تانيه كده بس دي حاجه خاصه عاوزك فيها
عصام :خير ياعصام حاجة ايه دي
محمد :خليها وقتها بقى ومتقلقش دي حاجه جميله وحتفرحنا كلنا ان شاء الله
😎😎😎😎😎😎😎😎😎😎😎😎😎
تتحدث إلى حبيبها وخطيبها فى التليفون:اطمن ياحبيبي كل شئ ماشي زى الفل
حسن :ربنا يخليكي لية يامونتي ومنحرمش منك تعبينك معانا دايما ياقلبي بس انتي عارفاهم مفيش بينهم عمار
ومحدش ببعرف بهدي الجو بينهم غيرك ياقلبي
إيمان :ملكش دعوة على قلبي زى العسل حسونتي انت متعرفش سماح دي انا بحبها ازاي مبحسهاش حماتي كده لاخالص والله بحسها صاحبتي اختي حاجه كده
حسن :وهي كمان بتحبك اوى والله وكل شويه تقوللي ايمان دي لو لفيت الدنيا كلها مش حتلاقي ضوفرها
ايمان :وانت رايك ايه بقى فى الكلام ده
حسن :رايي ودي فيها راي بردو ده انتي حبيبتي وروح قلبي من جوة بحبك يابت المجنونه
إيمان :بس بقى بتكسف الله
حسن:بتتكسفي طب ماشي انا بقى عاوز اشوف الكسوف ده لما انزل الاسبوع الجاي
إيمان :قلبي معلش معايا مكالمه ضروريه جدا
حسن :اياكي تقوليلي يزيد انا بجد بقيت بغير منه
إيمان :بتغير من الباشا الكبير بتاعنا وربنا انت بتهز
حسن:ومغيرش ليه منه ياست هانم مش راجل ده واللا ايه وبيتكلم معاكي وبيشوفك اكتر مني
وانتوا بصراحه واخدين على بعض اوى لدرجه كبيرة اوي ياحبيبتي
إيمان :حسن انت بتحبني اوى كده
حسن :لا وربنا شوف ازاي على اساس انك متعرفيش يعنى
ده انتي الحب يابت العشق ياهبله
إيمان :واللي بيحب حد بيثق فيه مش كده واللا ايه
حسن:وانا بثق فيكي جدا بس بردو ياايمان معرفش نوايا اللي حواليكي ايه وبيبصولك ازاي وانتي يخرببيت اهلك ملكيش حل تنطقي الحجر وعندك قدرة عجيبه على انك تسعدي كل اللي حواليكي وبخاف اوى عيون حد تتشدلك وديني لولع فيكي ياجذمه
إيمان :يالهوي يالهوى انا حسه ان قلبي حيقف من كتر الفرحه بحبك ياحسن بحبك يابن المجنونه
حسن:انتي بشتمي امي يابت
إيمان :صاحبتي وبشتمها عادي ملكش دعوة انت اطلع منها انت بس
يخرببيت سنينك يامحمد مش مبطل زن حسن حسيبك بقى ارد عالمخفي ده كمان
حسن:وده مين بقى ان شاء الله ده كمان
ابمان:ده زميلنا فى الشغل ياسونه تلاقي فى مصيبه حصلت واللا حاجه
حسن:والله ده انا اللي شكلي حروح فيكي فمصيبه و داهيه امشي يابت وترني علية بعد ماتخلصي والا حنزلك اقتلك في ايدي
إيمان :بموت فيك وانت متعصب ياسنسون باي باي بقى
تفتح الخط:فى ايه يابني ماتهدى شويه عاوز ايه
محمد :عاوز ايه حكون عاوز ايه ان شاء الله انتي اللى عاوزة مش انا
إيمان :اناوعاوزة وانا حعوز منك ايه ان شاء الله مش كفايه قطعت حبل الوصال اللي كان شغال دلوقتي
محمد :حبل ايه يااختي ده حبل غسيل ده واللا ايه الله يخرببيتك ياشيخه مش انتي اللى قلتيلي لازم اتصل بيكي
ايمان وهي تضرب على جبهتها:احيه علية قول بسرعه ايه الاخبار
محمد :كله حيبقى تحت السيطرة
إيمان :بجد يامحمد والله العظيم لو حصل ححليلك بؤك واعوضك عن الميتين جنيه اللى دفعتهم
محمد :هههههه هههههه بالف هنا وشفا ياموني ده انتي ربنا يعلم غلاوتك عندنا عقبال مااعزمك انتى وحسن يوم فرحكم يارب
إيمان :يارب يامحمد المهم طمني فكرت حتعمل ايه
محمد :بصي بقى سيبي كل حاجه وبعد ماكله يبقى تمام حقولك على كل اللي حصل ماشي
ايمان :ماشي والمطلوب
محمد :المطلوب حاجه واحده بس اول ماتلاقيني برن عليكي تبعدي مياده عن المكتب بأي حجه ان شالله حتى تيجي تتخانقي معاها المهم ميكونش اقل من نص ساعه تمام
إيمان :تمام التمام يامعلم ايوة كده مايجيلها الارجالها
تغلق معه الهاتف :والله وحتقعي تحت ايدي يامياده ومحدش حيسمي عليكي وليكي علية حعملك حتة زفة محصلتش وانشرها فكل القنوات الفضائيه
😎😎😎😎😎😎😎😎😎😎😎😎😎
يمر الليل عليهم طويل كطول الدهر لم يمر عليهم من قبل هكذا
كل منهم معطي ظهره للاخر يتحدث مع نفسه حائر فيما قد يحدث والى ماستذهب اليه الأمور
لما سيظل القدر دائما يلعب معنا لعبته التي تقلب موازين الحياة على رؤوسنا ام ان القدر شاء ان يحدث كل ذلك لحكمه عنده
ياااه حعمل ايه بس ياربي لو حصل واتاكدنا ان حصلت بينهم حاجه فعلا مهما كان دي بنت ومينفعش مايسترش عليها بس انا فنفس الوقت مش حقدر استحمل اشوف جوزى مع حد غيري حتى لو كان عالورق يارب عينني وقويني يارب انت العالم بحالي اقف جمبي وانصرني يارب
بينما كان هو أيضا الآخر يحدث نفسه :يارب انا عارف اني أخطأت كتير وعصيتك كتير بس انا تبت اليك توبه نصوحه باىب ماتفرقش بيني وبين مراتي يارب
ان شالله يارب ياعمورة يستجيب منك ياقمر ونخلص من وش الهم للي اسمها مياده دي
انا نزلتلكم البارت بدري اهوه اى خدمه عدوا الجمايل بقى حسيبكم واروح اشوف اللي ورايا اصل جوزي عقبال عندكم يارب جابلي بقى امبارح ييجي عشرة كيلو ملوخيه عشان افرزنها هيا كمان
وحقعد اخرط فيها ييجي عشر ساعات واحتمال الف بيها علجيران والاماكن المجاورة عشان يساعدوني وكل واحد يخرطله خرطه
طبعا هو بيعمل كده عشان يعطلني عن الكتابه بس على مين اديني كتبته اهوه ههههههههههه
اه صحيح نسيت اقولكم حاجه اي كلمه غلط عدوها لقيتوا اسم مكان اسم عدوه اعذروني ياجماعه انا بكتب وانا اصلا فى العالم الاخر
استنوا متمشوش حقول قصيدة كل مرة تعليقاتكم ثم تعليقاتكم ثم توقعاتكم
عشان ان شاء الله الروايه الجايه حنزلها فى الاماكن اللي فيها تفاعل بس عشان نفسيتي بتتعب ياجماعه وربنا
باي باي دعواتكم معايا بقى وياريت اللي خلصت قرايه تحط تعليقها هاه تعليقها وتيجي تخرطلها خرطه
😎😎😎😎😎😎😎😎😎😎😎😎😎😎
•تابع الفصل التالي "رواية شمس تتحدي الغيوم" اضغط على اسم الرواية