رواية شمس تتحدي الغيوم الفصل الثامن و الاربعون 48 - بقلم عبير سليم
الفصل الثامن والاربعون من روايه شمس تتحدى الغيوم بقلمي :عبير سليم
🌹🌹🌹🌹🌹
قبل بداية البارت النهارده انا مش عاوزة منكم لايك ولا تعليق انا عاوزة تدعو لصاحبتي اتوفت من يومين وده سبب تأخير البارت ربنا وحده العالم حزني عليها اد إيه قلبي واجعني عليها أوى خصوصا انها سايبه تلت بنات يتامى بالله عليكم قبل ماتبداوا قرايه تدعولها ربنا يرحمها ويغفر لها ويصبر بناتها على فراقها ويحميهم
أناحكتب البارت ومش عارفه حكتبوا ازاي بس بجد محتاجه اخرج من الحاله اللي انا فيها
يارب يعجبكم وبعتذرلكم مقدما لو لقيتوا اى تقصير فى البارت او لو كان قصير انا حكتب على اد مااقدر وربنا يخليلكم حبايبكم وميحرمكمش من عزيز عليكم
بسم الله الرحمن الرحيم
كم أننا مدينون للقدر على تلك الأمنيات التى حلمنا بها ودعت بها قلوبنا
وحققها لنا من دون حول ولاقوة منا
لك منا جزيل الشكر يا قدر على انك منحتنا من السعاده ما كنا نحلم بها و نتمناها كم سهرنا واشتقنا خفقت قلوبنا ورسمت في خيالها ما تتمنى
فلننحني جميعا تقديرا واحتراما لقدرة الله عز وجل الذي وهبتنا السعادة والهناء
تجلس فى السيارة فى الخلف بجوار ابنتها تبكي بشده :ياوحدتي من بعدك ياغاليه حعمل ايه من بعدك ياحبيبتى حتوحشينى اوى ياقلبي
تنظر لها ابنتها فى تعجب وهي ترفع احدى حاجبيها:ايه ده انتي بتندبي على مين ياماما متوحدي الله ياحجه وتحددي الاسم عشان نكون معاكي فى الصورة
سماح :حكون بندب على مين يعني غير بنتي حبيبة قلبي نور عينيه بسمتي ونور حياتي
بسنت :ماما انتي سخنه واللا حاجه انا لو مكنتش شربت واكلت من نفس اللى اكلتيه كنت قلت أكيد الأكل كان فيه حاجه
سماح :ليه ياجذمه انتي مستكترة علية اني اعيط على اختك بعد مامشت وسابتنا
بسنت:ليه ياحجه هو احنا بعد الشر دفنهاها ده احنا جوزناها وغورناها على رأيك فين بقى المشكله
سماح:حتوحشني اوى بت الجذمه دى
بسنت:سماح اعقلي كده ياحبيبتى مش دي بسمه اللى انتي كنتي مصممه تكسري وراها القله الصبح لولا اني فضلت اتحايل عليكي واقولك مش عاوزين الناس تضحك علينا
سماح :من ورا قلبي يامتخلفه لكن ده انتوا نور عينيه من جوة وانا عندي غيركم
بسنت :اه بس انا من يوم ماوعيت عالدنيا وانا شايفاكم مقطعين هدوم بعض والله لو ماكانت بسمه نسخه منك كنت قلت انك اكيد مراة ابوها ومخبيين
هدي اعصابك ياماما اديها اهيه مشيت بالسلامه وراحت مع جوزها وربنا يهنيها وليلتهم كانت زى العسل
سماح :ياحبيبتي يابسومتى بت يابسنت شفتي ام ياسمين وهي حتاكلها بعنيها كنت عاوزة افقعهملها
واللا أم حازم تبص لأحمد وتقوللي جبتوه منين ده وازاي جالها وربي لولا اني مش عاوزة فضايح كنت مسكت فيها ورنتها علقه.
بسنت:ليه بس دي الست معجبه بأحمد وجماله ونفسها تعرف المحل عشان تشتري لبنتها واحد هي كمان
سماح :معجبه بمين ياعنيه باحمد على ايه ان شاء الله على ماله واللا جماله ده احنا واخدينه عشان نكسب فيه ثواب ياما كان نفسي اخدلها شاب كده وسيم طول بعرض شبه شباب جيل المستقبل بس حنعمل ايه النصيب
بسنت:هو احنا كتا لقيين ياماما احنا كمان وبعدين ماله احمد ده كفايه ادبه واخلاقه
سماح :الصراحه اه ادب واخلاق مشفتش كده اهم حاجه بس ياخد باله من أختك الهبله
بسنت: مقولتليش بقى كنتي عاوزة تضربيها ليه
سماح :ماهي مادامت مستغربه ان العريس جه والجوازةتمت تبقى اكيد هي اللى عامله العمل لاختك
وكانت مستغربه ازاي عاملالها عمل وجالها عريس وانا وربي ماحيهدالي بال غير لما اتأكد انها هيا
زوج ابنتها وهويسوق السيارة:عمل ايه بس ياماما ماالبنت اتجوزت اهيه ادعيلها ربنا يكرمها ويرزقها بالذريه الصالحه
سماح وهي تعوج بؤها وتحدث ابنتها بهمس:ربنا يكرمهم يارب احسن انا قلبي مش مطمن للواد ده
بسنت :ليه ياماما حصل منه حاجه
سماح:ياريت يااختي كان حصل ياخوفي لميحصلش
بسنت:هههههههه ايه الكلام اللي بتقوليه ده بس ياماما امال يعني كان بيتجوز ليه لو مش كده
سماح :حيبان كله حيبان وقال على وشك يبان يانداغ اللبان
ربنا يطمني عليك ياحسن ياحبيبي انت وجوز اختك يارب
زوج بسنت:انا ياماما
سماح:انت ايه انت كمان مانت اتنيلت اتجوزت واثبت كفاءاتك خلاص يا حسام
حسام :هههههههه ربنا يخليكي لينا يااحلى حما فى الدنيا وربنا انتي عسل
سماح :حبيبي وربنا والله ماحد بيريحني غيرك ربنا يريح قلبك يارب ويقوملك مراتك بالسلامه يارب
بسنت :يارب ياماما
سماح :اهئ اهئ اهئ
بسنت :في ايه تاني
سماح : بسمتي وحشتني يعنى انا حدخل البيت مش حلاقيها طب مين اللى حيعكنن عليةمن بعدك يابسبوستي مين اللى حصطبح الصبح على تكشيرته ياقلب امك
بسنت:بابا هو حضرتك مبتشاركناش فى الحوار ليه مسمعتش صوتك من ساعة ماركبنا العربيه
سماح :ابوكي مات قصدي نام يعني انتي مش عارفاه بينام مع الكتاكيت
بسنت:هههههههههه مش راكبين على بعض خالص انتي وبابا ياماما
سماح :ابوكي ده حبيبي يابت بس هو طول عمره كده مكبر دماغه وضارب الدنيا طناش واهم حاجه عنده النوم والفرجه على ماتشات الكورة وخصوصا المتعاده حيشلنى
بس فرحهم كان حلو صح يابسنت
بسنت :ليلتهم كانت جميله والله
سماح :ياحبيبتي يابسمه ربنا ينفخ في صورتك وتضحكي فوش عريسك ياحبيبتى بدل ماالراجل يطفش
بسنت :ماما
سماح :مالك يابت
بسنت:مش عارفه ياماما بس حسه اني تعبانه يالهوي ماما انا بولد اه مش قادرة
سماح :يالهوي وده وقته
حسام:متقلقيش يابسنت حنروح المستشفى حالا
بسنت:بسرعه والنبي يا حسام مش قادرة
سماح:مانتي كنتي زى القرده تستاهلي كله بسبب تنطيطك فى الفرح يابت الجذمه
وانت يااخويا ماتصحى يادي النيله عليك انت ايه مبتشبعش نوم على طول كده مع الأموات قطيعه تقطعكم كلكم جتكم القرف عيله هم
😎😎😎😎😎😎😎بينما هم الان في طريقهم الى المطار حيث الاستمتاع بشهر العسل حتى وان كان ليس شهرا كاملا
وانما هي ايام نسرقها من الزمن نعيش فيها اجمل ايام حياتنا وتظل ذكرى جميله خالده في اذهاننا محفوره في قلوبنا
يجلس عمر في سيارته وبجواره حبيبه القلب بينما يجلس فيه الخلف حسن ومعشوقته التي يهواها قلبه
يقود سيف سيارته وبجانبه تلك التي امتلكت قلبه واستحوذت على كل مشاعره ويجلس في الخلف كلا من بسمه واحمد الحب يسيطر على قلوبهم والامل في السعاده كل احلامهم
الاغاني الصاخبه تعلو فى داخل السيارتين يجريان بسرعه شديده كأنهما فى سباق مع الزمن والفرحه تملأ قلوبهم حتى يصلون جميعهم الى المطار ويسلمون عليهم
شمس وهى تحتضن إيمان :ألف مبروك يا حبيبتي ربنا يسعد ايامك كلها واشوفك دايما متهنيه يارب
إيمان :حبيبتى ياشموسه منحرمش منك ياحبيبتى ربنا يخليكي لية ويارب اسمع خبر حلو كده قريب ان شاء الله
شمس :انا وانتي يارب
عمر:منتنا الجميله خللي بالك من نفسك
إيمان :ههههههه عمر انا متشكرة اوى انا مش عارفه اقولك ايه
عمر:مش عارفه تقولي ايه
شموستي هى البت دي هبله واللا عبيطه ده انا اخوكي يابت
إيمان :اخويا والله ياعمر انت وسيف اخواتي ربنا يخليكم لية يارب
سيف :منوني ربنا يهنيكي يارب ياست البنات وترجعيلنا بالف سلامه
حسن تخللي بالك من ايمان دي معبودة الجماهير
حسن :هههههههه ايمان دي حبيبة قلبي ربنا يقدرني واسعدها
شمس وهي تبكي: حسن والنبي امانه عليك ايمان تخللي بالك منها وتشيلها فعنيك
حسن:حاضر والله صاحبتك فعنيه
تحتضن شمس وايمان بعضهما بشده وتمسح إيمان لشمس دموع عينيها :بحبك يااجمل صاحبه واخت فى الدنيا
تضحك شمس وتسلم على بسمه التى تقف وهي على وجهها العبوس
إيمان :مالك يااختي قالبالنا البوز كده فكيها بقى شويه ده احنا حتى فيوم مفترج مش ده اليوم اللى كنتي مستنياه يابت وربنا دي لو سماح هنا كانت جابتك من شعرك
بسمه:الشوز ضيقه ووجعتلي رجلي وماما الله يسامحها صممت اني ارقص وانا مش قادرة خلاص
أحمد :خلاص ياحبيبتى دلوقتى نركب الطياره وترتاحي
يسلمون عليهم جميعهم ويودعونهم وهم يتجهون لركوب الطائرة ويدعون لهم الله بدوام السعاده
سيف :اخت حسن دي ملهاش حل تاخد الاوسكار فى النكد وقلبة البوز دي مافتحتش بؤها طول الطريق
عهد :سبحان الله عكس مامتها خالص
شمس :سماح هههههه دى ملهاش حل
😎😎😎😎😎😎😎
بعد مرور القليل من الوقت يقف في انتطارهم نعم لم يحالفه الحظ لحضور حفل زفافهم ولكنه أعد لهم مفاجأة فلقد خصص لكل من العروسين جناحا خاص بهما وقد أعد عدته على ان يكون الاسبوعان هديه منه لهم جميعا
يقبل عليهم ويسلم عليهم بحرارة:الف مليون مبروك
حسن :الله يبارك فحضرتك يابشمهندس
إيمان :بص انا زعلانه منك ومخاصماك ومش حكلمك
عمار:يالهوي لاء كله الا القمر بتاعنا وربنا ميزعل ابدا حقك علية يا عروستنا والله الشغل كان كتير اوى وبعدين انا كنت بجهزلكم كل حاجه
حسن :تعبناك معانا يابشمهندس
عمار :عيب عليك ياحسن دي اقل حاجه احلى اسبوعين لاحلى عرايس فى الدنيا كلها
ثم يتوجه بالنظر الى بسمه وزوجها ويقدم لهما التهنئه ويصطحبهما جميعا الى الفندق
الذين ماان وصلوا إليه جميعهم حتى استقبلوهم بزفه جميله جعلت كل من بالفندق يشاركونهم فيها من رقص ومرح وحتى السائحين الاجانب شاركوهم الفرحه والرقص والتصوير معهم
ثم قام عمار باصطحابهم الى الجناح المخصص لكل منهما
قاموا بتوصيل بسمه واحمد ثم توصيل ايمان وحسن
عمار:حسن انا عاوز اسالك عن حاجه بس محرج شويه
حسن :محرج من ايه انت قلقتني يابشهندس
عمار:ههههههههه لا مفيش قلق ولا حاجه بس هى اختك مغصوبه عالجوازة واللا حاجه
حسن وإيمان :ههههههههههه
عمار :انا اسف والله مقصدش ادخل فحياتكم بس اصلها مبتسمتش خالص حتى والسياح بيسلموا عليها كانت بتسلم عليهم بقرف
حسن :لا اطمن هي دي بسمه اختي وهو ده العادي بتاعها وشها وحركاتها بيدوا انطباع انها زهقانه قرفانه على طول
لكن هي اصلا حتموت من الفرحه دي كانت ماشيه تقول عريس ياماي طخه ومتعوروش
يابوي
عمار :هههههههههه ربنا يفرحكم كلكم يارب
ياللا اسيبكم بقى وعاوز اسمع ضرب النار بقى هاه
حسن :ضرب نار بس ده انت حتسمع قنابل بتفرقع وبيبان وشبابيك بيخبطوا واعاصير ورعد وبرق بص حنولعلك الفندق
عمار:ههههههههه اما نشوف الف مبروك ياولاد
فى داخل غرفة بسمه وأحمد :يااااه زى مااكون عطشان وشربت زى مااكون جعان واكلت
اخيرا يااحمد قلعت الزفته الجذمه دي كنت حاسه اني حموت وربنا
أحمد :ايوة يعني انتي ارتحتي كده خلاص ياقلبي
بسمه وهى تبتسم:اه ارتحت
أحمد :يافرج الله اخيرا ابتسمتي يابسمه ده الناس يابنتي فاكرني خاطفك
بسمه:بغزي العين عننا عشان محدش يدينا عين ويحسدنا ياقلبي
أحمد :يعني هو كده يعني انتي مش نكديه
بسمه:توءتوء
أحمد :الليله ليلتك يامعلم
بسمه:ههههههههههههه
أحمد :يابركة دعاكي يااما ثم يرمي نفسه على الفراش
بسمه :يالهوي انت حتعمل ايه
أحمد :حتعرفي كل حاجه متستعجليش على رزقك
🌹🌹هو اللى احنا فيه ده حلم واللا حقيقه
ايمان وهي تلف يديها حول عنقه:دي احلى حقيقه فى الدنيا كلها
حسن :الليلادي الناس كلها كانت عنيهم منك كنت خايف عليكي اوى من عينيهم ياقلبي
إيمان :حبيبي ياسونه وانا عينيا مبتشوفش غير حسونتي وبس
حسن :قلب حسونتك ياناس انا فرحان اوى
إيمان :فرحان بية واللا بحد تاني
حسن :قصدك عصام مش كده
إيمان :انا عزمته بس متوقعتش بصراحه انه حييجي
حسن :صاحب عمري ياايمان متفتكريش ان بعادنا عن بعض كان سهل علية
بس بصراحه حضوره الفرح فرح قلبي اوى
إيمان :عارفه انت حتقوللي ده انت قضيت بقية الفرح معاه
حسن :حبيبتي بتغير واللا إيه
ايمان:انا بغير من نسمة الهوا اللي بتعدي من جمبك
حسن :ياروحي ياناس طب بقولك مش ياللا بينا
إيمان :ياللابينا ايه
حسن :ياللا عشان ندخل
إيمان :ندخل فين ماحنا دخلنا اهوه
حسن :دخلنا فين يخرببيتك احنا لسه حندخل دلوقتى يابت مش الليله ليلة الدخله بردو
إيمان :اه ياقليل الأدب
ايه ده انا جعانه اوي تعالى تعالى بص الاكل شكله يجنن
حسن :حقولك على كلمتين بس وبعد كده ناكل ونشرب ونعمل كل حاجه
إيمان :لا انا مليش دعوة انا جعانه انا عاوزة اكل
حسن :طب بصي تعالي بس اقولك حاجه بسرعه كده وبعدين حخليكي تاكلي وتشربي
إيمان :لاء انا حاكل الأول
حسن :تمام اوى طب تعالي بقى ثم يرفعها بيديه على كتفه
إيمان :حسن يخرببيتك نزلني
ينزلها حسن على السرير:والله انتي كنتي عاوزة سماح تيجي دلوقتى عشان تديلك قلمين على وشك
إيمان :لاياحبيبي دي كانت عاوزة تيجي عشان تطمن عليك انت يابابا وتشوفك كفاءة واللا
لمو اخذه هههههههههههه
حسن :تمام اوى كده اتشاهدي على روحك انتى اللي جبتيه لنفسك وانا حطمنها بعد خمس دقايق بالظبط
إيمان :الحقيني ياماما
حسن:مانا ماما وبابا وانور وجدي
ايمان:هههههههههههه
حسن :اللهم صل على النبي حتموتي ياسوسو
فلتسجل أيها التاريخ تلك اللحظات لتظل عالقه فى تاريخ الزمن
اكتب ياتاريخ سجل يازمن
إيمان :ههههههههه ههههههههه
ملناش دعوة بيهم هاه محدش يبص كله يغمض عينه صح ياموني
موني:صح يابيرو ياعسل
🌹ربنا يهنيكي ياقلبي
موني:حبيبتي يابيرو ويفرحك بولادك
🌹🌹🌹🌹🌹🌹🌹🌹🌹
ينقضي نصف النهار وهم مازالوا نائمين:موني قومي بقى ياقلبي
إيمان :اممم بس بقى ياماما عاوزة انام شويه
حسن :ماما ماما مين يابت انتي بقى بعد كل اللي عملته امبارح وتقولي ماما قومي يابت اصحي
إيمان :ايه ده انا فين حسن انت ايه اللى جابك هنا وبتعمل ايه يالهوي يافضيحتك يادودي حتوري وشك من الناس فين
حسن :الله يخرببيتك على بيت عيشتك السوده انا جوزك يامتخلفه وان كنتي ناسيه افكرك
إيمان :مش محتاجه تفكرني ياقلبي هو اقدر انسى بردو أي حاجه بيننا
حسن :يعني بتشتغليني طب تعالي بقى
يجري حسن ورا ايمان فى الاوضه وايمان تطلع فوق السرير وتضحك وتصرخ وهو يمسكها
عرايس بقى حنقول ايه
بس هما ليه كانوا نايمين لحد دلوقتي
عرايس
ايوه يعني هما كانوا ليه نايمين لحد دلوقتي
بكرة لما تكبروا حقولكم
ربنا يفرحك ياموني يارب
🌹🌹🌹🌹🌹🌹🌹🌹
تمر الأيام عليهم والسعاده تملاء قلوبهم جميعا وكان العرايس يقضون أجمل ايام فى حياتهم ليلهم نهار ونهارهم ليل
ولم يتوانى عمار عن توفير كل سبل الراحه لهم حتى يتمتعوا بقضاء شهر العسل
كان حسن تملأ السعاده قلبه بوجود إيمان فى حياته وايضا كان مسرورا بالابتسامه التى قلما ماراها على وجه اخته
كانوا يجلسون فى الفندق يتناولون الطعام بينما يتحدث عمار بعيدا عنهم فى الهاتف :وحشتيني اوى ياحبيبتي
أشرقت :انت اكتر ياحبيبي
عمار :أشرقت صوتك مش عاجبني هو فى حاجه حصلت انتي تعبانه ماسه كويسه
أشرقت :حبيبي اطمن مفيش حاجه بس انا بعد ماشفت صور الفرح اللى بعتتهالي ايمان على تليفوني نسيت امسحها وماسه شافتهم
عمار :وبعدين حصل ايه أكيد طبعا انهارت
أشرقت :بالعكس دي دعت لهم ربنا يفرحهم وسابت التليفون بس من وقتها وهي تقريبا مبتتكلمش انا خايفه عليها اوى ياعمار
عمار :مش قلتلك تاخديها وتخرجوا يااشرقت
أشرقت :والله بقولها وهي اللي مش عاوزة وبتتحجج بأي حجه يادوب بتمتحن وترجع على طول
المشوار الوحيد اللى بتروح معايا فيه وهي فرحانه مشوار الدكتور غير كده لاء
عمار :ربنا يحميها يارب ويخليكي لينا ياقلبي
أشرقت :ويخليك لينا ياحبيبي
بقولك ايه هي مش هنا اديني ايمان بسرعه اسلم عليها
يقترب عمار منهم :موني اشرقت عاوزاكي
إيمان :قلبي ياشوشو وحشتيني
أشرقت :هههههههه حبيبتى ياموني عامله ايه طمنيني
إيمان :الامور تسير على اكمل وجه ههههههه
أشرقت :حبيبتي ربنا يديم عليكم السعاده يارب
اوعي يكون عمار مقصر معاكم فحاجه
إيمان :لا والله ابدا ربنا بخليه يارب ويفرحكم بالنونو الصغير أن شاء الله
مقلتليش بقى عرفتى ولد واللا بنت واللا لسه
أشرقت :ولد ان شاء الله
إيمان :ياحبيبي ربنا يجيبه بالف سلامه بس بقولك ايه مش عاوزينه شبهك
أشرقت :ليه ياموني هو انا وحشه
إيمان :وحشه يالهوي ياريت الوحاشه كانت شبهك هو انتي فى حد فجمالك ياشوشو ده انتي قمر هو فى حد كده ياشيخه
فتخيلي بقى ان الواد يطلع طعم وامور ومقطقط كده زيك يوقف حال الشباب بقى والناس تعاكسه فى الشارع ونقف بقى ننظم المرور ينفع كده
أشرقت :ههههههههه حبيبتى ياايمان وربنا انتي عسل ربنا يفرح قلبك يارب ويرزقك بالذريه الصالحه ياقلبي
إيمان :يارب ياشوشو يارب
🌹🌹🌹🌹🌹🌹🌹🌹🌹🌹
فى الشركه كان منفعلا بشده وهو قليل ماينفعل هكذا:الشغل بالشكل ده مش حينفع اللي بيحصل ده اسمه لعب عيال
يدخل على على صوته:يزيد فى ايه صوتك جايب لآخر الشركه إيه اللي حصل
يزيد :انتوا اللي في إيه ياعلي الشغل زي الزفت
على:ممكن تهدى كده وتفهمني إيه اللى مضايقك
يزيد:لما يفوت اسبوعين فى تأسيس الفرع الجديد ولحد دلوقتي مفيش أي جديد ده يتسمى إيه
علي :يزيد افهمني بس انت عارف ان معظم العمال اللي عندنا شغالين فى الموقع بتاع دمنهور وصعب جدا عليهم انهم يبقوا مابين دمنهور وبرج العرب الرحمه برضو
يزيد :وانا من امتى باجي عالعمال ياعلي من امتى وانا بحملهم فوق طاقتهم
معندكمش عمال زياده هاتوا ماهم قاعدين على الارصفه بيستنوا عربية رمله يحملوها وكل واحد قاعد حاطط ايده على خده مستني رزق ولاده تاخدوهم كلهم على برج العرب ويخلصوا المشروع
على :بس ده مش حيكون فيه تكلفه عالشركه يزيد متنساش ان ده حيحمل الشركه مصاريف نقل ليهم كل يوم
يزيد :مش مهم ياعلى اتوبيسات الشركه موجوده وخللى الناس تاكل عيش
على:خلاص يايزيد اللى انت عاوزه
يزيد :كريم انت وعلى مسئولين ادامي عن العمال اللي حيروحوا البرج والشغل يمشي بقى كفايانا عطله
كريم :حاضر يا بشمهندس حاضر
يخرج كريم بينما بجلس على:ممكن تهدى بقى كده وتصللي عالنبي مالك فى ايه ده مش انفعال شغل انت فى حاجه مضايقاك
يزيد:قلقان اوي ياعلي كل ماالايام بتمر بموت من القلق
على:ان شاء الله ربنا حيقف معاها وحيقومها بألف سلامه
يزيد :يارب ياعلى يارب انا حموت من القلق
على:يزيد الله يخليك انا مش مستحمل انا ربنا العالم بية والله انا ماباجي الشغل غير عشان احاول انسى الموضوع ده شويه
هو الدكتور اللي متابعه معاه قال ايه رايه ايه
يزيد :هو بيقول ان الاطفال وضعهم كويس لكن هي دقات قلبها مش منتظمه ودكتور القلب زود الجرعات عشان قلبها مش مستحمل مجهود الحمل اكتر من كده
على :طب وبعدين يايزيد طب مينفعش تولد دلوقتى
يزيد :تولد دلوقتى ايه بس انت بتهزر لاء، طبعا
على :ياحبيبتى ياعليا ربنا معاكى ياحبيبتى ويقومك لينا بألف سلامه
يزيد :يارب ياعلى يارب
😥😥😥😥😥😥😥 يتحدث الى والدته:ألف حمدالله على سلامتها ياماما
بس ليه خبيتي علية الفترة اللي فاتت
سماح :الله يسلمك ياقلب امك عقبالك ياحبيبي لما اشيل ولادك انت وهمي الكبير
وبعدين محبتش اقلقك قلت اسيبكم تنبسطوا بقولك ايه صحيح هى بتقوللي انها مبسوطه وكله تمام الكلام ده بجد واللا بتضحك علية
حسن :وانا ايش عارفني ياامي هو انا بنام فوسطهم وبعدين ماهما طول اليوم عمالين يبلبطوا فى المية كأنهم عمرهم ماشافوا بحر
وبعد كده بيدخلوا اوضتهم ومحدش بيشوفهم بيعملوا ايه بقى الله اعلم
سماح:ماشي عالعموم كله حيبان وانت ياواد طمني عليك عامل ايه مع مراتك
حسن :تمام اوي زى الفل
سماح :اديهاني اكلمها وحشتني الجذمه دي
حسن:بتاخد دش والله
سماح:دش الهنا ياحبيبي ربنا يهنيكم ويسعدكم يارب
حسن:انتي اخدتيني فى الكلام ومقلتليش سميتوا النونو إيه
سماح :إياد
حسن :الله اسم حلو اوى
سماح:عقبالك ياحبيبي لما تجيب عبد الوارث
حسن :عبد الوارث ده مين ان شاء الله
سماح:ابويا ياجذمه اصل مفيش حد خالص رضا يسمي على اسمه قلت مفيش غيرك ياحبيبي اللى حتجبر بخاطري وتسمي عبد الوارث
حسن:يعني انا اجبر بخاطرك طب ومين يجبر بخاطر الواد لما كل امة لا اله الا الله تتريق عليه
ال عبد الوارث وده حيورث ايه ان شاء الله
انا ان شاء الله حجيب علي علي ياامي عشان ابقى حسن ابو علي
سماح :ان شاء الله ياحبيبي اتجدعن انت بس ووريني الشطارة
حسن:على اخري والله ياامي دعواتك انتي بس وان شاء الله بعد تمن شهور ونص بالظبط يكون على معانا
سماح :واشمعنى تمن شهور ونص مش فاهمه
حسن :مانا محدد انهم تسع شهور من ليلة الدخله فات اسبوعين يتبقى تمانيه ونص
سماح :ان شالله ياحبيبي
ياللا انا حسيبك عشان ابوك خرج من المعتقل بتاعه ورايحه اغديه خدوا بالكم من نفسكم وانتوا راجعبن
حسن :حاضر يا حبيبتي مع الف سلامه
يغلق معها الهاتف فيجدها تحتضنه من الخلف:كنت بتكلم مين
حسن وهو يلتفت لها:دي ماما ياقلبي
إيمان :سموحتي وحشتنى اوى
حسن :بس انتي بقى وحشاني اكتر
إيمان :حسن بس بقى ياللا عشان ننزل بص بقى احنا النهارده اخر يوم لينا هنا عاوزاك تفسحني فكل حته عاوزة كل شبر هنا يكون فيه ذكرى لينا
حسن :حاضر من عيوني يا قلبي
🌹🌹🌹🌹🌹🌹🌹🌹🌹
فى اليوم التالي تجتمع الأسرة كلها احتفالا بسبوع إياد ابن بسنت
إيمان وهى تحمله:ايه حلاوة دي ايه عسل ده
بسنت :عقبالكم يارب ياحبايبي
حسن:يارب يابسبوسه يارب
بسنت:يااخويا انت متسربع على ايه اللي يشوفك كده يقول متجوزين من قرن وانت مبقالكمش غير اسبوعين
حسن :احنا عاوزين نجيب ولاد بسرعه مش كده يا قلبي
إيمان :اه طبعا ياحبيبي
سماح:وانتي ياهمي الكبير عامله ايه يا قلبي وحشانى يامنيله البيت بقى منور قصدى مضلم من غيرك
بسمه:انا كويسه ياماما والدنيا زى الفل
سماح:وانتوا كمان ياحبايبي عاوزين تخلفوا بسرعه زى الهبل دول واللا حتستنوا شويه
احمد :لا ياماما انا مش مستعجل انا عاوز ادلع بسمه شويه
سماح:تدلع مين ياحبيبي بسمه سبحانك ياربي
بت ياايمان
إيمان :ايوة ياسماح
سماح:يكونش يابت العيب فينا واحنا اللي مش عارفين نتعامل معاها والواد احمد هو اللى عرف يفك الشفرة
إيمان :شفرة إيه بس هو احنا فى مسلسل رافت الهجان
سماح :مانا مش عارفة والله بس ياللا مش مهم بقى المهم ان ربنا يثبت اقدامها
يقضون السهرة فى بيت بسنت ثم يعودون بيتهم
تدخل ايمان وهى كاشرة الوجه
حسن :مالك بس ياايمان فى ايه
ايمان :فى انك مبتفوتش خمس دقايق غير لما تتكلم فى موضوع الولاد كاننا متجوزين من سنه واللا متجوز بس عشان الولاد
حسن :إيمان انتي زعلتي حقك علية ياحبيبتي انا والله مقصدش ازعلك
إيمان :حسن انا داخله انام تصبح على خير
حسن :بقى كده طب ياايمان بقى هو ده اتفاقنا ان محدش فينا يزعل من التاني مهما حصل
ايمان:................
حسن :انتي مش عارفه بحبك اد ايه
ايمان :عارفه
حسن :نازله الشغل امتى
إيمان :بعد بكرة
حسن:يعنى دي اخر ليله حنسهر فيها وبعد كده حتنامي مع الكتاكيت
إيمان :أيوة
تتفاجأ ايمان بحسن يحملها على كتفه :حسن نزلني ياحسن
حسن :حقك علية ماتزعلشي مقدرشي والنبي والنبي مقدرشي
لازم اصالح القمر بتاعي مقدرش على زعله ياناس
🌹🌹🌹🌹🌹🌹🌹🌹🌹
فى صباح يوم جديد تجلس مياده فى مكتبها تمارس عملها فتاخذ بعض الاوراق وتدخل بها الى مديرها وصاحب المكان تطرق الباب فياذن لها
صباح الخير يا مستر ادم
ادم :صباح النور يامياده خلصتي الشغل
مياده:اتفضل حضرتك كله تمام
ادم وهو ياخذ منها الورق ويتفحصها:برافو عليكي الشغل تمام واضح انك شاطرة فشغلك
مياده :ميرسي لحضرتك
آدم :انا مستغرب ازاي انتي ممتازة كده فشغلك وسابوكي تمشي
مياده:انا اللي قدمت استقالتي محدش مشاني
آدم :اكيد طبعا ماهو مش معقوله حد يشتغل معاه القمر ده ويمشيه انا بجد معجب بيكي وبشغلك وشياكتك جدا
وبصراحه انا مراقبك من يوم مااستلمتي الشغل وكل يوم بتثبتيلي كفاءتك
مياده :ميرسي ليك يامستر حضرتك تؤمرني بحاجه تانيه
ادم:لا متشكر اتفضلي على مكتبك
تتحرك من امامه وهي تبتسم بخبث بينما هو يتفحصها جيدا وهو يلعب بالقلم
يجد اتصالا من انجى فلا يعيره اهتمام ولا يرد
ولكنها تعيد الاتصال اكثر من مرة حتى يضطر للرد :أيوة ياانجي
انجى :ادم حبيبي فينك بقالك يومين مختفي وحشتنى اوى هو انا موحشتكش
ادم :معقوله بردو متوحشينيش أكيد طبعا وحشتيني بس انتي عارفه الشغل
انجى :طب ايه ماتيجي نسهر مع بعض الليلادي
آدم :مليش مزاج اروح مكان
انجى :خلاص تعالى عندي حجهزلك سهرة حكايه حنسيك تعب الشغل كله
آدم :اوكيه ماشي سلام
انجى :سلام ياقلبي
🍎🍎🍎🍎🍎🍎🍎🍎🍎
بعد مرور عدة أيام
تدخل الشركه وهى فى قمة تالقها رائحة عطرها ينتشر فى المكان بشكل يثير الانتباه
يلتفت الجميع لصاحبة الكعب العالي الذي يرن فى الأرض يرونها وهي تتحرك بينهم مرتديه ملابس انيقة وتاركه لشعرها العنان
تقف امام منى التى تتسمر من جمالها
منى وهى تنظر لها بدهشه:ايوة حضرتك
فترد الاخرى عليها:فى معاد مع البشمهندس يزيد
منى:اقولله مين حضرتك
ترد عليها:نادين الحداد
تدخل منى المكتب ليزيد وهو منهمك فى العمل:بشمهندس يابشمهندس
يزيد :مالك يامنى فى حاجه
منى:فى حاجه ده فى حاجات
يزيد :فى ايه يابنتي ماتنطقي يخرببيتك
منى:صاروخ ارض جو
يزيد :صاروخ فين ده
منى:هنا فى الشركه قاعد برةفى المكتب
يزيد :منى انتي اتهبلتي فى ايه انا مش فاضيلك
منى:وربنا مابهزر حتة مزة قاعده برة قمر شبه الممثلات لا وربنا دي احلى منهم
واللا ريحة برفانها دي اكيد حاطه الازازة كلها
يزيد :ودي مين وعاوزة ايه
منى:عاوزة إيه عاوزاك ياباشا
ومين بقى نادين الحداد
يزيد :اه دي واخده معاد دخليها حالا ومتدخليش حد علينا
منى:ادخل حد ده ايه ده احنا ححط اللمبه الحمرا
يزيد :امشي ياجذمه
منى:ماشي يابرنس على راى موني الاصحيح البت ايمان لو طبت اخليها تدخل واللااعمل فيها ايه
يزيد :انا مش قلت مش عاوز حديدخل وبعدين إيمان بالذات لأ
منى:ماشي اوامرك ياكبير
تخرج اليهافتجدها جالسه واضعه قدما على الاخرى:اتفضلي حضرتك
تدخل فيقف يزيد لاستقبالها:اهلا وسهلا يادكتورة نادين الشركه نورت
نادين:ميرسي يابشمهندس الشركه منورة بوجودك
يجلس معها على الانتريه الموجود بالمكتب
طبعا انتوا عاوزين تعرفوا مين دي حقولكم
🌺نادين الحداد امرأة جميله جذابه سيده من سيدات المجتمع من عائله كبيرة وايضا تعمل طبيبه
عمرها ٣٦ سنه كانت بتشتغل فى الخارج فى احدى الدول الاجنبيه اتوفى زوجها منذ عام واحد ولم ترزق منه باطفال
ورثت عنه مبلغا كبيرا قررت ترجع بلدها وتبني مستشفى والمفروض ان شركة المهدي هي اللي حتبني المستشفى وتسلمهالها كاملة التشطيبات
انا قلت لحضرتك يادكتورة على اللى الشركه حتقدر عليه اكتر من كده مش حينفع والله
نادين:بشمهندس يزيد انا محدش حيبنيلي المستشفى غير شركتكم حتى لو استنيت سنه
يزيد :انا بشكرك جدا على ثقتك فينا احنا كل المشكله عندنا اننا بنبني فرع تاني للشركه وفى عجز فى العمال وحاليا كمان عندنا مشروع شغالين فيه
نادين :وانا حنتظر واللا حضرتك عندك مانع
يزيد :ياخبر ده شئ، يشرفنا والله
وسيادة عضو مجلس الشعب اخباره إيه
نادين :بابا هو حضرتك تعرفه
يزيد :طبعا ده اكيد فى حد بردو ميعرفش سالم الحداد ده سمعته زى الطبل والكل بيشهدله
نادين :ميرسي لحضرتك يابشمهندس على فكرة بابا ده خدوم جدا ولو حضرتك ليك اى طلب ممكن يخلصهولك بسهوله
يزيد :متشكر جدا انا الحمد لله ربنا واقف معايا دايما ومش بحتاج حاجه انا بسأل بس لأني عارفه وعارف سيرته الطيبه
فى الخارج :إيمان استني انتي مش حينفع تدخلي
ايمان :ايه الكلام ده مانا بدخل على طول
منى :فى عميله عند البشمهندس جوة ومحرج دخول اى حد
إيمان :حتى أنا
منى :ده بالخصوص انتي
إيمان :ماشي وادي قعده
يأتي عليهم مجدي ليعطي القهوة لمنى لتدخلها المكتب
إيمان :منى سيبيني انا ادخل بالقهوة والنبي
منى:إيمان الله يخليكي متجيبيليش المشاكل
إيمان :متخافيش والله حدخلها واخرج بسرعه
منى:لاء ياايمان
إيمان :عشان خاطري يامنون
منى:قلت لاء يعني لاء
فى الداخل:تمام يادكتوره ان شاء الله ابتداء من الشهر الجاي حنبدا فى شغل التصميمات
يجد طرقا على الباب وايمان تدخل وبيديها صينية القهوة
تضعها امامهم وعيونها مسلطه على نادين بينما كانت نادين واضعه قدما على الاخرى
نادين :ميرسي
يزيد وهو ينظر لها بغضب متشكر اتفضلي اخرجي
تتحرك ايمان نحو الباب وتفتحه وتخرج ثم يستكمل حواره مع الدكتورة حتى تستئذن وتمشي فيقوم بتوصيلها للخارج
ثم يعود لمكتبه فلا يعير لايمان اهتماما ويوجه كلامه لمنى:اتفضلي ورايا
تدخل منى وهي فى قمة رعبها:والله العظيم إيمان اللى اتحايلت علية تدخل
يزيد :وانتي شغاله عند ايمان واللا عندي
اوامر مين اللى بتنفذيها فهميني
منى :انا آسفه والله يابشمهندس مش حكررها تاني
يزيد :مخصوم منك يومين عشان تبقي تعرفي تاخدي اوامر من حد غيري
منى :اللى حضرتك عاوزه
تدخل إيمان :بشمهندس منى ملهاش ذنب انا اللى دخلت من وراها عاوز تخصم لحد تخصملي انا مش هيا
يزيد :وانتي كمان مخصوملك يومين عشان تلتزمي حدودك
انتي موظفه هنا مش صاحبة الشركه
والمفروض لما تعرفي ان امرت بحاجه تنفذيها انتي فاهمه واللا لاء
كانت إيمان غير مستوعبه مايحدث :انا عارفه طبعا اني موظفه ومكنش قصدي اضايق حضرتك والله انا كنت
يزيد بصوت عالي :كنتي كنتي ايه بس الحق مش عليكي الحق علية انا اديتك حجم تتصرفي زى مانتي عاوزة
مش اي تصرف تتصرفيه يبقى مقبول والمفروض مادامت منى قالتلك انا قلت ايه يبقى كلامي يتنفذ احنا فشركه مش لعب عيال
إيمان :انا اسفه انا اسفه حضرتك انا اسفه يامنى حقك علية
تجري وتخرج سريعا نحو المكتب وتضع راسها على المكتب وهي منهاره فهي لم تتوقع نتيجة مافعلته ان يكون بهذا الشكل
شمس :ايمان مالك فى ايه
كانت إيمان لا تتحدث فقط تبكي بانهيار
شمس :الله فى ايه اتكلمي ياايمان ايه اللى حصل
وجدت شمس ايمان ترتعش بين يديها وتحاول ان تتكلم فلم تستطع
يدخل عمر فيتفاجا بشمس :عمر الحقني مش عارفه إيمان مالها
فجاة وجدت ايمان قد فقدت وعيها
شمس:ايمان ايمان الحقني ياعمر
😥😥😥😥😥😥😥😥😥😥😥😥
•تابع الفصل التالي "رواية شمس تتحدي الغيوم" اضغط على اسم الرواية