رواية شمس تتحدي الغيوم الفصل التاسع و الاربعون 49 - بقلم عبير سليم
الفصل التاسع والأربعون من رواية شمس تتحدى الغيوم بقلمي :عبير سليم
🌺🌺🌺🌺🌺🌺
فى احدى المستشفيات الخاصه ترقد على ظهرها والمحلول معلق فى يديها وتجلس صديقتها بجوارها وهى ممسكه بيديها:كده بردو ياموني تقلقيني عليكي بالشكل ده
إيمان :حقك علية حبيبتي
شمس :موني حبيبتي مالك ايه اللى حصل عشان تنهاري بالشكل ده وبعدين انتي ليه عندك هبوط كده
ده الدكتور بيقول عندك هبوط جامد وواضح انك مش بتاكلي
إيمان :أبدا ياحبيبتي بس من يوم سفر حسن وانا مليش نفس للأكل
شمس :تعرفي لما اغمى عليكي كلنا افتكرناكي حامل ههههه
إيمان :حامل لا ياروحي انا لسه مش حامل
شمس :يارب انا وانتي نحمل مع بعض ياموني
إيمان :كل شئ باوان ياشمس
شمس:المهم بقى مقلتليش ايه اللى زعلك ياحبيبتى وليه دخلتي المكتب بالشكل ده
إيمان :قوليلي الأول انا جيت هنا ازاي انا مش فاكرة حاجه
شمس :وحتفتكري ازاي وانتي اصلا كان مغمى عليكي
عمر وسيف ياحبيبتى شالوكي بالكرسي بسرعه وجيبناكي على هنا على طول
إيمان :يالهوى يعني انا اتفضحت فى الشركه
شمس :اتفضحتى ده ايه وليه يعني
اصلا ده كان وقت عمل وكل الناس فمكاتبهم واللى اخد باله قليلين اوى وبعدين هو احنا كنا فايه واللا فايه ده انا كنت حموت لما لقيتك مش عاوزة تفوقي ورايحه فدنيا تانيه
إيمان :حبيبتي ياشمس ربنا يخليكي لية
يدق الباب ويدخل بطلته الجميله :حتسمحولي ادخل واللا ألف وارجع
شمس :ياخبر اتفضل يابشمهندس طبعا
يدخل بينما تسكت إيمان ولا تتحدث ولكن تنزل دمعه من عيونها لم تستطع التحكم بها
شمس :بص بقى يرضيك من وقت مافاقت اتحايل عليها تقوللي ايه اللي حصل وهي مش عاوزة تقول بس أكيد طبعا مش حتخبي عنك ماحضرتك الباشا بتاعها صح ياموني
ايمان تسكت ولا ترد بكلمه
يزيد وهو ينظر ناحيتها بابتسامه:لا هى مش حتقوللي حاجه لانى اصلا عارف سبب زعلها
شمس :ايه ده معقوله طب مين اللى زعلها ووصلها لكده
يزيد :انا ياشمس
شمس:حضرتك لا طبعا مش ممكن اصدق انك ممكن تزعل موني دي الحته الجوانيه مش كده ياقلبي انتي ههههههههه
يزيد :لا ياشمس انا فعلا اللي زعلتها بس والله انا كنت اصلا متوتر واعصابي تعبانه وعاوز انفجر فحد وطلعت فيها هيا تستحمليني يعني ياهانم واللا خلاص تعمليلنا فيها الشهيده
ايمان وهى تبكى:حضرتك انا مستعده استحمل اى حاجه منك بس من غير إهانه
وكمان منى ذنبها ايه تتبهدل كده وهي ملهاش ذنب
شمس :انا مش فاهمه حاجه خالص ماتفهمنى يابشمهندس
يزيد :انا حفهمك ياشمس واحكمي بنفسك
يحكي لها كل ماحدث بالتفصيل
شمس :بص حقولك طبعا ايمان غلطانه ايوه غلطانه ياايمان المفروض كنتي احترمتي طلبه انه مش عاوز حد يدخل يبقى مكنتيش دخلتي
ومنى كمان غلطانه عشان طاوعتك ايه التهريج ده
بس حضرتك بردو متزعلش منها حضرتك عارف إيمان كويس وعارف انها مقصدتش تعمل كده عشان عاوزة تتجسس او تعرف اللى بيحصل فى المكتب هي عملت كده من عشمها فيك وعارفه انها موني حبيبة القلب اللى عالحجر وانك حتهزاها بكلمتين وتقولك متزعلش يابرنس وصالحني ياللا وخلاص
بس هى اتصدمت من رد فعلك
ثم تهمس له:حضرتك بهدلتهم جامد الصراحه ومنى غلبانه يومين تخصملها يومين طب اخصم من مقصوفة الرقبه دي اهي عالاقل مضيعه كل فلوسها عاللبس والحاجات اللى ملهاش لازمه لكن منى عندها ولاد وبتحتاج كل جنيه
يزيد :ساكته يعني ياام لسانين مبتتكلميش
إيمان :حقول ايه بس حضرتك من حقك تقول اللي عاوزه لكن انا مجرد موظفه مقدرش اقول غير نعم وحاضر وبس
شمس :ماهي دي حقيقه فعلا ياموني احنا مش اكتر من موظفين فى الشركه ومبنقولش غير حاضر وبس
إيمان :طيب ياشمس مانا ساكته اهوه وانا قلت حاجه
يزيد :تعرفي انا اللي ضايقنى اكتر من كونك دخلتي رغم رفضي للأمر انك داخله بصفتك الجرسونه اللى بتقدم المشروب للهانم اللي قاعده ورجلها فوشك حسيت انى اتضايقت منك لانك سمحتي لنفسك انك تتنازلي عن كرامتك لمجرد حبك للاستطلاع مش اكتر برغم انك لو كنتي استنيتي برة مع منى شويه كنا حنخرج ادامك وحتشوفيها وكنت اكيد حدخلك المكتب واقولك مين دي وجايه ليه لكن انتي اتصرفتي بغباء لمجرد انك حتموتي وتعرفي فى ايه
حيكون فى ايه يعني غير عميل عندي واللا انتي كنتي فاكرة حاجه تانيه
ايمان وهي تمسح دموعها :انا اسفه والله يابشمهندس انا اتصرفت من غير تفكير انا بعتذر لحضرتك
يزيد :خلاص مفيش حاجه حصل خير وحقك علية ياموني انتي عارفه انتي عندي ايه
شمس :وهو فى زي موني وقلبها الطيب وبعدين هي تقدر تنطق اصلا مش كفايه حضرتك سيبت الشركه وجيت عشان تشوفها
إيمان :ماهي طيبة قلبي دي اللى مودياني فداهيه ياللا عشان خاطر شموستي بس وكله بثوابه
يزيد :يعني صافى يالبن
إيمان :ههههههههه حليب ياقشطه
شمس :أيوة بقى هي دي موني القمر بتاعنا
يزيد :بس ايه ده كله كل ده من تهزيئة مستشفى ومحلول معالجة الجفاف
امال لو كنت رفدتك كان حيحصلك ايه
إيمان :عشان انا حساسه بس وربنا لو هزئتني تاني
يزيد :حتعملي إيه يعني
إيمان :ولا حاجه طبعا ياباشا احنا فداك
يزيد وشمس :هههههههههه
🌺🌺🌺🌺🌺🌺🌺🌺
تمر الأيام سريعا لتعلن عن الاحتفال بزواج العشاق الذين جمع الحب بينهم واستحوذ على كل مشاعرهم ووأصبح الحب اللغه التى تتحدث بها قلوبهم
يدخل الغرفه عليها ليجدها فى قمة تالقها:بسم الله ماشاء الله قمر ياحبيبتي ربنا يخليكي لية يارب
عليا:بجد حلوة يايزيد
يزيد :حلوة بس ده انتي حتاكلي الجو من العرايس النهارده
عليا:ببطني دي ده انا عامله زى القنبله الموقوته
يزيد :بردو قمر واجمل ست فى الدنيا كلها
عليا :ياحبيبي يايزيد ربنا يخليك لية يارب
يزيد :ويخليكي لينا ياست الكل شفتي بقى عهد الصغيرة كبرت ازاى والليلادي فرحها
عليا :أنا مش مصدقة انى ححضر فرحها انا كنت خايفه اوى اموت قبل مااشوفها عروسه
يزيد :عليا الله يخليكي متجيبيش سيرةالموت على لسانك ابدا
عليا:الموت ده هو الحقيقه اللي فحياتنا محدش يقدر يهرب منها
يزيد :طب يعني ينفع فى الليله الجميله دي نتكلم فحاجه زى كده الليلادي فرح عهد ياحبيبتي
عليا :ياحبيبتي ياعهد انا عاوزة اشوفها بفارغ الصبر
يزيد اطمنت على عشق ياحبيبي
يزيد :طبعا ياروحي اطمني شمس واخده بالها منها كويس
وزمان عمر وعلي ومروة والولاد راحولهم
عليا :يعني حروح انا وانت وماما وعمى بس
يزيد :اه و الجماعه تحت حيروحوا معانا طبعا
ياللا بينا بقى :يمد يده لها:تسمحلي مولاتي
عليا :ههههههههه
بعد قليل يقف يزيد وعلى فى استقبال المدعوين والترحيب بهم وتعلن الصواريخ عن قدوم العرسان عهد وسيف وسامر وحنين فرحه تملأ قلب الجميع
كانت القاعه كبيرة جدا حتى تتسع لهذا الكم الهائل من المدعوين من الموظفين ورجال الاعمال والأهل والأصحاب
يقف العرسان خارج القاعه للزفه التى يتجمع فيها الكل وهم فرحون يشاركوهم فى الرقص
وتبدأ الفرقه فى غناء الأغاني الجميله
اقروا الفاتحه لأبو العباس
اسكندريه يااجدع ناس يااجدع ناس
اسكندريه أحسن ناس عالبحر ماشيه تتمخطر
من سيدي بشر لابو العباس أيوه ياعالم عالمنظر
أيوه ياعالم عالمينا
والشوق يتمرجح بينا
و٣٠٠الف سفينه عالبحر ماشيه تتمخطر
ياما اعظم حى الجدعان
حى العرايس والعرسان
محروسه من الأنس ومن جان
اسكندريه أحسن ناس عالبحر ماشيه تتمخطر
الكل يتجمع ويدور حول العرسان وهم يرقصون معهم
وبعد الانتهاء من الزفه يدخلون جميعهم للقاعه لاستقبال العرسان
ويبدأ الحفل ويصعد الجميع لالتقاط الصور واكثر من حظي بتلك الصور كانت عليا فلقد تم التقاط العديد والعديد من الصور لها مع اختها الحبيبه
كان على لاتسعه الفرحه وهو يزوج اخته الصغيرة وابنته الكبيرة ويراها وهي فى يد عريسها
صعد الجميع لمشاركة العرسان فى الرقص شمس وعمر ومروة وعلى وايمان وحسن
وكل الاهل والاصدقاء
يأخذ حسن ايمان وينزلان ليستريحان قليلا:منورة ياماما والله
إيمان :ايه رايك فى الفرح ياسماح
سماح:هى دي الافراح واللا بلاش بصراحه حاجه كده تشرح القلب وترد الروح
انتي عارفه ياسناء انا عمري مارحت فرح عليه القيمه كلها افراح تعر ويبقوا فاكرين انهم عملوا اللى محدش عمله فحياته ييجوا يشوفوا الافراح اللي بجد
سناء :ههههههه كل واحد بيعمل اللي على اده ياام حسن
امل :وبعدين الفرحه فى القلب مش فى الافراح يا خالتي والله
سماح :لا يااختي بس الفرح لما بيبقى حلو كده بيفتح النفس تبقى مش عاوزة تسيبيه غير لما يطفشونا لكن فى افراح تبقى عاوزة تقولي سلام عليكم وعليكم السلام
حسن :ههههههه عسل ياماما والله
امال مجبتيش بسمه ليه تغير جو
سماح:بزمتك هي اختك دي وش فرحان ده انا كنت خايفه متحضرش فرحها
حسن :ههههههه بتيجي عندك واللا ايه
سماح:هو انا مقولتلكش
حسن:خير ياامي
سماح :مش صاحبتك اقولها تعالي باتي معايا يوم نتعارك مع بعض شويه ونعيد أمجاد زمان تقوللي لاء ياحبيبتى انا مبقدرش انام بعيد عن حضن جوزى حبيبي
سناء :هههههههه طب وربنا عاقله المفروض تفرحي
سماح:ربنا يهني سعيد بسعيده يااختي
بينما على الجانب الاخر هناك من تجلس وهى مقطبة الجبين:مالك مكشرة ليه ده الليلادي فرح بنتك والمفروض الدنيا مش سيعاكي من الفرحه
هيام:انا الدنيا تبقى مش سايعاني من الفرحه لما اكون راضيه عن الجوازة لكن جوازتها جي مش نزلالي من زور اصلا
امها:استغفرك يارب ماله سامر الولد طيب ومؤدب ومحترم وبيحب بنتك عاوزة ايه اكتر من كده
هيام :اه وشقته اد علبة الكبريت وبيستنى مرتبه كل اول شهر بلا خيبه
امها:خيبه لما تخيبك انا بقول تقومي تمشي احسن انتي اصلا ايه اللي جابك ده انتي حتى مسالتيش جبتوا ايه وناقصها ايه ولا اهتميتي تعرفي حاجه عنها. هو انتي لامنك ولا كفاية شرك
الحمد لله ياحنين ان ربنا رزقك بابن الحلال اللي يريح قلبي من ناحيتك وانتي ربنا يستىرعلى عيالك منك ومن تفكيرك اللى حيوديكي فداهيه
تمر الليله على الجميع وهم سعداء يستمر حفل الزفاف لقرابة الثانيه صباحا ثم يطير العرسان على شرم الشيخ لقضاء شهر العسل
حيث اتفق يزيد مع عمار ان يهتم بهم ويرعاهم فى رحلة شهر العسل فبم يقصر معهم وفعل معهم مثلما فعل مع إيمان وحسن
فى داخل الجناح المخصص لعهد وسيف
كان سيف يجري وراء عهد التى تجري بالفستان ولا يستطيع سيف الامساك بها
تصعد فوق السرير يصعد وراءها فتنزل على الأرض
سيف :يابنتي هديتي حيلي حرام عليكي كده نفسي حيروح على قلة فايده
عهد :انت عاوز إيه
سيف:حكون عاوز ايه انزلي ياعهد الله يهديكي
عهد:ماشي حنزل بس اياك تقرب انت فاهم والا حتصل بعلي اخويا يجيلك
سيف :وحتقوليله إيه إن شاء الله جوزى حبيبي اللى اتجوزني ادام الناس كلها عاوز يبوسني
عهد :اه حقولله كده
سيف :عارفه حيقولك إيه
عهد :حيقوللي ايه مش عارفه
سيف :حيقولك سيبيه يمسكها يافوزيه وحيضحك علينا هو ومروة وانس ومليكه ومش بعيد يتصل بالعيله كلها عهوده حبيبتي مش انا سيف حبيبك
عهد:أيوة بس نقعد باحترام اه
سيف :ههههههههه حاضر حنقعد بأدب واحترام اللى انتي عاواه ياقلب سيف
مش حتغيري الفستان ده بقى انا تعبتلك وربنا
عهد :ماشي حدخل أغير فى التويلت
سيف :ماشي ياعهد اتفضلي
تدخل عهد بينما يحدث نفسه :مجنونه وحتتعبيني بس على قلبي زى العسل
يجدها تخرج وهي منكسة الرأس
حبيبتي مالك
عهد :مش عارفه افك السوسته
سيف :تعالي ياقلبي افكهالك ولا يهمك
يفتح لها سوستة الفستان ثم يساعدها فى خلعه تلتقى الأعين فيتوه فى عينيها الساحرة وهي تضعف أمام نظرة عينيه التى تشع بالحب والعشق لها
تنهد كل اسوار الخوف والرهبه التى كانت تسيطر عليها لتعلن عن عجزها عن مقاومة تلك الأحاسيس التى تسيدت عليها
يصبح الحب سيد الموقف بينهم له السطوة في السيطرة على تلك المشاعر الجامحه
تركت لقلبها الحريه فيما يريده ويتمناه فقدت قدرتها على التحكم في شئ لم تسمع سوى دقات قلب تنبض بالحب لمسات حبيب تشعر بالاحتواء
ولم يختلف الأمر كثيرا عند حنين وسامر
ليله سعيده مرت على عشاق كتب لهم الله ان يتذوقوا السعاده ويعرفون طعمها
وان يسجلوا اول سطور فى تلك الحياة التى بدات حياتهم بها
🌺🌺🌺🌺🌺🌺🌺
فى صباح يوم جديد وكل شخص فى محل عمله
ينتظر قدومها ولكنها لم تأت بعد
بينما هي تجلس على فراشها وهي تلعب بموبايلها فجاة تجد هاتفها يعلن عن اتصال هاتفي تنظر للاسم المدون على الشاشه وتضحك:ههههههه شكله حيقع قريب
تنتظرقليلا ثم تفتح الخط وتتحدث بهمس:الو
ادم:صباح الخير يا مياده
مياده :صباح الخير يامستر ادم
ادم:خير يامياده مجيتيش الشغل ليه النهارده
مياده:اصلي حسيت اني تعبانه شويه الظاهر انى داخله على دور برد فمقدرتش اجي انا بتأسف لحضرتك
ادم :الف بعد الشر عنك مش مهم طبعا الشغل المهم سلامتك انا بس قلقت عليكي وقلت اطمن
مياده :ميرسي اوى لحضرتك شكرا ليك بجد
آدم :طب وياترى لسه تعبانه واللا بقيتي أحسن
مياده :مادمت سمعت صوتك أكيد طبعا بقيت احسن بكتير
آدم :طب ايه رايك اعزمك عالغدا فاي مكان تحبيه
مياده:تعزمني انا وايه المناسبه
ادم:المناسبه ان فى كلام كتير عاوز اقولهولك ومش حينفع فى الشغل ولا فى التليفون
مياده :شكله كده كلام مهم اوى
ادم :اوى مهم جدا كمان
مياده :خلاص اوكيه تحب نتقابل امتى وفين
تنهي مكالمتها معه وهي تحدث نفسها:شكلها كده حتحلو بس انجى حعمل معاها ايه دي
دي شكلها راسمه عليه
طب وانا مالي هو اللى شكله واقع عالاخر
تقوم لتستعد لتلك المقابله التى تنتظرها منذ فترة
بعد مرور بعض الوقت تجلس معه فى احدى الأماكن العامه
ينظر إليها باعجاب شديد فقد كانت متألقه وملفته جدا بملابسها ومكياجها الصارخ
مياده :ايوة ممكن اعرف حضرتك جايبني هنا ليه يامستر ادم
آدم :أولا طول مااحنا بعيد عن الشغل اسمي ادم
مياده :أيوة بس
آدم :مفيش بس
مياده انتي متعرفيش انتي مهمه بالنسبه لي ازاي انتي من يوم مادخلتي الشركه وانتي شغلاني بقيت مبفكرش غير فيكي شاغله كل وقتي النهارده مكنتش طايق اقعد وانتي مش موجوده
مياده :معقوله الكلام ده انا مش مصدقة
آدم :مياده انا بحبك
مياده :بتحبني أنا
آدم :ايوة بحبك
مياده:ايوة بس انجى
آدم :انجي هههههههه انجى دي صديقه مش اكتر
مياده :ايوة بس اللى فهمته منها انها بتحبك
آدم :المهم انا بحب مين
مياده:يعني انت عاوز تتجوزينى
آدم :اتجوزك طبعا ده أكيد
بس فى الوقت الحالي مش حقدر اتجوزك رسمي ممكن نتجوز عرفي
مياده:عرفي لاء طبعا مش حقدر مستحيل
آدم :مياده فكري كويس متستعجليش فى الرد انا ححققلك كل أحلامك حجيبلك شقه وعربيه وحخليكي تعيشي وتشوفي الحياة اللي عمرك ماشفتيها
مياده :طب وليه ده ميحصلش واحنا متجوزين رسمي
آدم :عندي ظروف خاصه حتخليني مش حينفع
اننا نتجوز رسمي فى الوقت الحالي ولازم نستنى شويه
مياده :خلاص نستنى انا مش مستعجله
ادم :ايوة بس انا مستعجل انا مش قادر اشوفك كل يوم ادامي وابقى بعيد عنك بالشكل ده نفسي تبقي معايا على طول
وبعدين احنا ليه نستنى احنا نتجوز دلوقتى ونعيش حياتنا لحد ماظروفي تتحسن
مياده فكري براحتك حديكي فرصه يومين وتردي علية
يجد اتصالا من انجي فيرد عليها:ايوة ياانجي عامله ايه
لا والله بس مشغول شويه
لا معلش مش حينفع انا مش فاضي نخليها وقت تاني
يغلق معها الهاتف:على فكرة انجي تتمنى اني اعرض عليها الجواز حتى لو عرفي
فكري يامياده وهما يومين بس وبعد كده انسي اني كلمتك فحاجه
🌺🌺🌺🌺🌺🌺🌺
فى شقة سماح :انتي بتشتغليني ياجذمه
بسمه:وربنا ابدا ياماما انا لسه عامله التحليل
سماح :يعني انتي حامل بجد معقوله دي ياحبيبتى يابسمه ألف مبروك يا حبيبة امك
يطرق الباب فتقوم بسمه لتفتح الباب فتجد حسن وإيمان
سماح :بسمه حامل ياولاد عقبالك ياايمان يارب
إيمان بحب:ألف مبروك يابسمه الف مبروك يا حبيبتي
بسمه :الله يبارك فيكي ياايمان عقبالك يارب
حسن بفرحه لاخته:ألف مبروك يا حبيبتي
بسمه :الله يبارك فيك ياحبيبي عقبالكم يارب
حسن:يارب يابسمه
سماح:سبحان الله صحيح ياماتحت السواهي دواهي بقى انتي حامل يابسمه سبحانك ياربى
وانا اللي كان كل همي اعرف بتهببوا ايه انتى وهو
بسمه:هههههههه
سماح:وبتضحكي كمان لا انا قلبي مش حيستحمل فرحتين مع بعض تحملي وتضحكي
فيضحكون جميعهم على هذا الكلام
قومي ادخلى لابوكي ياحبيبتى صحيه من الغيبوبه اللي هو فيها وقوليله يمكن ربنا يكرمه ويطلع من المعتقل اللى حابس نفسه فيه على طول ده
يستكملان السهرة ويعودان الى شقتهما
إيمان وهي تستبدل ملابسها:ياااه النهارده كان يوم متعب اوى
حسن:..............
إيمان :حسن مالك ياحبيبي من ساعة ماخرجنا من عند الجماعه وانت مسهم
حسن:ايمان انا عاوز اخدك ونروح للدكتور
إيمان :ليه ياحسن انت تعبان ياحبيبي واللا حاجه
حسن :مانا عاوز اعرف انا تعبان واللا سليم
إيمان :انا مش فاهمه حاجه
حسن :إيمان انا عاوز نروح لدكتور امراض نسا وذكورة وعقم عشان نعرف فى مانع للحمل واللا ايه
إيمان :هههههههه حسن مالك ياحبيبي ايه الكلام ده حسن احنا لسه مكملناش حاجه حبيبي اللى زينا لسه بيقضي شهر العسل
حسن:اشمعنى بسمه حامل
إيمان :ده نصيب ياحبيبي اصبر ياحسن احنا لسه ملحقناش ياحبيبي
حسن :ماشي ياايمان نصبر مفيش مشكله بس لما اطمن الأول واعرف ان مفيش مانع وقتها حصبر عادي
إيمان :وافرض كان فى حاجه ياحسن حنعمل ايه
حسن :انتي ليه بتقولي كده ان شاء الله مش حيكون فى حاجه بس نطمن ايمان ريحيني الله يخليكي
إيمان :حاضر ياحسن حعملك اللى انت عاوزه بس اصبر ياحبيبي ادينا وقت
نصبر حتى لما يعدي ست شهور
حسن لاحظ اننا قعدنا مع بعض عشرين يوم وبعد كده سافرت ودي اول مرة تيجي فيها من ساعة ماسافرت يبقى حلحق احمل امتى بس
ادينا فرصه ياحبيبي وان شاء الله ربنا حيكرمنا
وبعدين احنا كنا متفقين انك حتسيب شرم وتستقر هنا ايه اللى مخليك لسه هناك لحد دلوقتي
حسن:مينفعش ياايمان انا شغال تبع شركه ولسه عندي التزامات مقدرش اسيبهم قبل مااخلص كل حاجه واسلم كل العهده اللى تخص الشغل والا ادفع مبلغ كبير
إيمان :خلاص ياحبيبي اصبر شويه وبعدين انت زهقت مني خلاص واللا ايه
حسن:زهقت وهو انا عمري ازهق منك ياحبيبتى بس نفسي يبقى عندي اولاد يامنتي نفسي اوى
إيمان :ان شاء الله يا حبيبي
🌺🌺🌺🌺🌺🌺🌺🌺🌺
تمر الأيام على الجميع والكل فى حالة ترقب لما ينتظره في حياته فهناك من ينتظر بداية حياة جديده وهناك من يخشى شيئا ما
فى داخل الشركه
شمس :مالك ياحبيبتي فى ايه حساكي متغيرة
إيمان :حسن ياشمس
شمس :حسن ماله ياحبيبتي فى إيه
إيمان :موضوع الولاد حيجننه من وقت ما عرف ان بسمه حامل وهو مهموم وحزين
شمس :انتي بتهزري صح ده انتم مكملتوش شهرين يابنتي امال انا وعمر مااحنا متجوزين قبلكم ولسه وعادي جدا
إيمان :انا والله ماعندي مشكله بس هو اللي مفيش فحياته غير الموضوع ده مسيطر عليه بشكل لدرجة اني بدات اتخنق
شمس :ياربي عليكم يعني اليومين اللى جاي يقضيهم معاكي تبقوا بالشكل ده
إيمان :انا حسه انه اتجوز عشان موضوع الولاد بس
شمس :طب وحبه ليكي
إيمان :موجود طبعا ياشمس حسن بيحبني جدا لكن بردو موضوع الولاد حيجننه
شمس :ان شاء الله ياحبيبتي ربنا حيكرمكم بأمر الله
إيمان :يارب ياشمس انا وانتي يارب
يمر اليوم ويعود الكل الى بيوتهم حيث الأمان والسكن
🌺في غرفة شمس وعمر
عمر:معقوله ده انا قلت فى مصيبه حصلت دي معظم اليوم النهارده كانت سرحانه ومش مركزة خالص
هو حسن جه أهبل واللا عبيط
شمس :ملهوف على الولاد بشكل غريب
عمر:شمس هو احنا مش كده نعتبر اتاخرنا فموضوع الحمل ده
شمس :ههههههههه ايه ياحبيبي هو حسن عداك واللا ايه
عمر :لا والله انا مكنش فى دماغي حاجه زى دي بس مش عارف بجد
شمس :وانا كمان مش عارفه والله تحب نروح نكشف ونطمن
عمر:ياريت ياشمس انا فعلا محتاج اطمن
شمس :طب وافرض بقى طلعت مبخلفش حتسيبني ياعمر. عمر:اسيبك ده انا اسيب روحي وماسيبكيش ياقلب عمر
انتي حياتي وروحي وعمري كله ووجودك فحياتي بالدنيا ومافيها بس بقول نطمن مش اكتر
شمس :خلاص ياعمر مفيش مشكله فى دكاترة كتير كويسين نشوف ياحبيبي
بعد مرور عدة أيام يجلس امام دكتور فى احدى العيادات الخاصه بعد ان قام بالتحاليل والاشعات اللازمه
ينظر الدكتور للتحاليل والاشعات بكل اسف:للأسف حضرتك مش حتقدر تخلف
عمر :ازاي الكلام ده حضرتك بتقول إيه
الدكتور:والله مش انا اللي بقول التحاليل اللى قدامي هى اللي بتقول كده
نسبة حدوث الحمل ضعيفه جدا وتكاد تكون معدومه
عمر :طب مفيش علاج
الدكتور :أكيد فى بس بياخد سنين طويله وكمان المفروض نبتدي فيه من سن صغير عشان نعرف نسيطر عالحاله لكن فحالتك دي حيبقى الوصع صعب جدا
يخرج عمر وعيناه لاترى شيئا ايعقل هذا لم اكن اتوقع فى يوم من الأيام ان اكون بلا اطفال
يلف بالسيارة وقتا طويلا لايعرف وجهته لايريد ان يراها بماذا سيخبرها بعد
😥😥يدخل غرفة نومه وهو فى قمة الحزن والاسى تقلق شمس من هيئته:عمر مالك يا عمر
كنت فين برن عليك مبتردش
يجلس عمر ويبكي كالاطفال:
شمس :عمر مالك فى ايه حصل ايه رد علية الله يخليك عمر انت كويس ايه اللى حصل
عمر:شمس انا مش حقدر اخليكي ام
شمس :ايه الكلام ده ياعمر
عمر:شمس انا عملت التحاليل والاشعات بتقول انى عقيم مبخلفش انا مش حخلف ياشمس انا مش حقدر يكون عندي ولاد
شمس وهي تحتضنه:حبيبي اهدى اهدى ياعمر ان شاء الله حنروح لدكتور واتنين وعشرة وان شاء الله حيكون فى حل
لكن اوعى تيأس ابدا ياحبيبي اوعى تيأس
عمر :شمس انا مش حقدر اظلمك معايا شمس لو عاوزاني اطلق
تضع شمس يدها على فمه:وقدرت تنطقها ياعمر قدر لسانك ينطقها انت ايه الكلام اللى انت بتقوله ده انا استحاله حسيبك مهما حصل ولو انت مش حتكون ابو ولادى انا مش عاوزاهم ياعمر
عمر:اى واحده بتبقى عاوزة تبقى ام ياشمس
شمس :ايوة بس انا معرفهمش مشوفتهمش انا معرفش غيرك مشوفتش حنيه من غيرك عاوزني اضحي بيك ياعمر عشان خاطر حد معرفهوش طب لو انا قدرت اضحي انت حتقدر تضحي بية ياعمر حتقدر تسيب شمس ياعمر
عمر:انا استحاله اقدر اسيبك او اعيش من غيرك
انتي مراتي وصاحبتي وكل دنيتي
عوضتيني عن كل حاجه كنت محروم منها فحياتي انا من غيرك أموت
شمس :انا اللي من غيرك تبقى حياتي ملهاش لزمه
تمسح له دموع عينيه :خلاص يبقى ان شاء الله نروح لكل الدكاترة وان شاء الله ربنا مش حيكسر بخاطرنا
عمر :حتقدري تتعبي معايا شمس
شمس :انا معاك اتعب و اتحدى الدنيا كلها بس نبقى مع بعض ياحبيبى
يمر عليهم الليل وهي تاخذه فى حضنها لتطمئنه كمثل أى طفل خائف يهرب فى حضن امه
طوال الليل وهو يرتعش فى احضانها كانت تشدد فى احتضانه لتشعره بالأمان وتطمئنه
يأتي الصباح وقد عزمت امرها على الا تترك القلق يسيطر عليه لمدة طويله
تبدا فى البحث عن اكبر الاطباء المتخصصين فى هذا المجال حتى يطمئن قلبها لدكتور ما وتتصل وتحجز ميعاد فى اقرب وقت
😥😥بعد مرور عدة أيام يجلسان أمام الطبيب وهو يتفحص تلك المستندات الطبيه التى امامه
ثم يتوجه لهما بالحديث :بص انا حتكلم معاكم بصراحه
الحاله فعلا صعبه بس متقلقش ليها حل ان شاء الله
عمر :بجد يادكتور
الدكتور :أيوة طبعا بجد احنا قدامنا اكتر من طريق ممكن نمشي فيه حقولكم عليهم وبعد كده انتوا تقدروا تختاروا الطريق اللي يريحكم
اول حاجه العمليه بس دي لازم تتعمل برة مش هنا وكمان ممكن يبقى فيها خطورة ونسبة نجاحها مش مضمونه
والحاجة التانيه العلاج بس ده كمان بيحتاج سنين لحد ماتظهر نتيجته حضرتك عديت الخمسه وتلاتين
شمس :طب وايه الحل دلوقتى حضرتك كده حيرتنا وخوفتنا
الدكتور :فى اخر حل وانا شايفه انه احسن الحلول وان شاء الله حتكون نتيجته كويسه
عمر :حل ايه يادكتور
الدكتور:اطفال الانابيب هو ده احسن حاجه فحالتكم دي
شمس :والنتيجه مضمونه يادكتور
الدكتور :طبعا كل حاجه بمشيئة ربنا بس نسب النجاح فبها بتعدي السبعين فالمية
واحنا مش حيكون ادامنا حل غيرها
عمر :شمس ايه رايك
شمس :اللي الدكتور شايفه صح هو اللي نعمله
الدكتور:انا شايف ان ده انسب حاجه ليكم
عمر :خلاص تمام واحنا مستعدين من دلوقتى
الدكتور:تمام يبقى اتفقنا احنا حنجهز كل حاجه ونعملها وان شاء الله خير
عمر وشمس :يارب
😥😥😥😥😥😥😥😥😥😥
•تابع الفصل التالي "رواية شمس تتحدي الغيوم" اضغط على اسم الرواية