ليالي رمضانية الفصل الرابع 4 - بقلم عبد الرحمن الرداد
اليوم الرابع
كان يستقل سيارة "ميكروباص" بعد عودته من العمل في اليوم الرابع من شهر رمضان وأثناء شروده انتبه لصوت السائق الذي ردد بصوت مرتفع لصديقه المجاور له:
- بقولك ايه يا صاحبي، هات السيجارة متوجعش دماغي
ليرد عليه صديقه قائلا بابتسامة:
- خد يا زميلي أحلى مسا عليك ولع وعيش
بالفعل أخذ منه السيجارة وأشعلها في الحال ومن ثم ضغط على المشغل الخاص بالسيارة لترتفع أصوات الأغاني. شعر الركاب بالسوء مما حدث لكنهم لم يتحدثوا عن الأمر لكن «مراد» لم يكن مثلهم بل نهض وتقدم لمقدمة السيارة قبل أن يرفع صوته وهو يقول:
- اطفي البتاع ده يسطا واسمعني بعد اذنك
بالفعل أطفأ الأغاني ونظر له بانتباه هو وصديقه قبل أن يقول:
- عايز ايه يا صاحبي
شعر «مراد» بالسوء والحزن في آن واحد وقال:
- صاحبي؟! أنت اسمك ايه يسطا؟
أسرع السائق وأجاب عليه:
- محمد
ابتسم «مراد» بسخرية وردد:
- ياااه اسمك على اسم أشرف الخلق ودي أخلاقك؟! بتشرب سجاير في نهار رمضان؟ يعني فاطر وبتجهر بالمعصية ومشغل أغاني كمان؟ يا أخي اعمل حساب للشهر الفضيل اللي إحنا فيه، هيجي يوم وتقف فيه قدام ربنا هتقوله ايه؟
بدل نظراته بينهما وتابع بقول الله:
- «الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ»
أنت وهو فاكرين إنكم كدا صحاب لكن يوم القيامة هتبقوا أعداء، ده هيقول يارب ده هو اللي أضلني وجرني معاه والتاني هيقول لا يارب ده هو اللي جرني معاه وبدل ما أنت بتقوله يا صاحبي وهو يقولك يا زميلي هتقوله يا عدوي وهو يقولك يا عدوي، اتقي الله أنت وهو..الصيام فرض على كل مسلم يعني فرض تصوم أنت وهو وملكمش عذر..ده فيه ناس مرضى وبيصوموا وأنتم أصحاء وفاطرين؟
صمت للحظات وتابع:
- شهر رمضان ده كنز وأنتوا بتضيعوه بالسهولة دي؟
الرسول صلى الله عليه وسلم قال: "خاب وخسر من أدرك رمضان ولم يُغفر له""
وقال بردو: "أتاكم شهرُ رمضان، شهرٌ مبارَكٌ، فرض اللهُ عليكم صيامَه، تفتحُ فيه أبوابُ الجنَّة، وتُغلَق فيه أبوابُ الجحيم، وتُغَلُّ فيه مَرَدَةُ الشياطين، وفيه ليلةٌ هي خيرٌ من ألف شهرٍ، من حُرِمَ خيرَها فقد حُرِم"
وربنا سبحانه وتعالى قال: «شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ ۚ فَمَن شَهِدَ مِنكُمُ الشَّهْرَ فَلْيَصُمْهُ ۖ وَمَن كَانَ مَرِيضًا أَوْ عَلَىٰ سَفَرٍ فَعِدَّةٌ مِّنْ أَيَّامٍ أُخَرَ ۗ يُرِيدُ اللَّهُ بِكُمُ الْيُسْرَ وَلَا يُرِيدُ بِكُمُ الْعُسْرَ وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَىٰ مَا هَدَاكُمْ وَلَعَلَّكُمْ تَشْكُرُونَ»
ده بالنسبة للفطار في نهار رمضان أما الجهر بالمعصية فقال عنه رسول الله: "كل أمتي معافى إلا المجاهرين"
وما إن أنهى حديثه حتى ردد السائق بصوت مسموع:
- عملت فيها شيخ خلاص، حل عن دماغي بقى يا صاحبي علشان مش فايقلك
ابتسم «مراد» بسخرية وردد وهو يشير إلى قلبه:
- هنا بقى أسود خلاص للأسف، أنا نصحتك لله علشان يوم القيامة لما نقف بين ادين الرحمن ميكونش ليك حجة وتقول محدش قالي، ساعتها هقول يارب أنا بلغت ....
إلى اللقاء في اليوم الخامس
عبد الرحمن الرداد
•تابع الفصل التالي "ليالي رمضانية" اضغط على اسم الرواية