رواية شمس تتحدي الغيوم الفصل الرابع 4 - بقلم عبير سليم
الفصل الرابع من رواية شمس تتحدى الغيوم
بقلمي :عبير سليم
❤️❤️❤️❤️❤️❤️❤️❤️
فى داخل احد المولات المليئة بفساتين الزفاف والسواريه
كانت بداخل احدى البروفات ترتدى ذلك الثوب الذى طالما حلمت وتمنت أن يأتى اليوم الذى ترتديه لمن عشقه وتمناه قلبها كانت لاتصدق مافيه اهى تحلم ام تلك الحقيقه وجاء اليوم الذى ستفرح فيه وتبدأ فيه حياتها الجديده
كانت ترتدى فستانا مكشوفا قليلا من الصدر والظهر وقد أبرز جمال رقبتها وصدرها وبشرتها الخمريه وكان شعرها الأسود الناعم منسدلا على ظهرها
إيمان :بسم الله ماشاء الله قمر ياشموستى.
شمس:بجد ياايمان حلو علية واللا اجرب واحد تانى
إيمان :حلو ده تحفه بابنتى مش ممكن ده كأنه متفصل علشانك
شمس وهى تتحدث للبائعه :وانتى ياانسه رايك ايه فى الفستان بس بامانه الله يخليكى
البائعه:أقسم بالله العظيم ومش عشان عاوزاكى تاخديه وخلاص لا والله ابدا بس بجد الفستان تحفه عليكى حاجه كده ملهاش حل ربنا يهنيكى بيه يارب
شمس:يعنى مش متخننى ولا مبين الديفوهات
البائعه:هههههه متخنك ايه بس ياعروسه وديفوهات ايه اللى بتتكلمى عنها ده انتى ماشاء الله عليكى جسمك عود فرنساوى بجد يابخت عريسك بيكى ده شكله مامته دعياله
شمس:وهى تنظر لنفسها فى المرايه باعجاب :خلاص حاخده بس تكرمينا فى السعر بقى.
عشان اختى دى فرحها بعد شهر ونيجى ناخد من عندك ان شاء الله
البائعه:عينيه ليكوا ياعروسه والمحل محلكم ياحبيبتى حعملك خصم حلو أوى
تخرج شمس وايمان من المحل وهم يضحكان بشده تحمل فستانها على ذراعها وقلبها يكاد أن يخرج من مكانه من شدة الفرحه
شمس:ربنا يخليكى لية يامونتى منحرمش منك يا قلبي عقبال مااتعبلك يوم فرحك يارب
إيمان :يارب ياشموستى يارب
شمس :ادينى قلتلها ان فرحك بعد شهر عشان يكون بشرة خير
إيمان :ده انتى تحفه وربنا ههههههههه ياللا مش مهم المهم اننا خدناه بسعر كويس
شمس:بس ازاى قدرتى تنزلى سعر الفستان بالشكل ده انا متوقعتش ابدا انها ممكن توافق تبيع بالسعر اللى قلتى عليه
إيمان :قدرات يابنتى وبعدين ياحبيبتى السوق واقف واديكى شايفه مكنش فيه حد غيرنا اصلا فى المحل ومعظم الناس دلوقتى بتاجر بس انتى اللى صممتى تشترى وكمان على حسابك مع ان المفروض عصام هو اللى يدفع تمن الفستان
شمس :عشان يبقى ذكرى ياايمان والبسه فى عيد جوازنا ان شاء الله وبعدين عصام دفع فلوس كتير الفترة اللى فاتت وانا معايا الحمد لله
إيمان :ههههههه مجنونه وربنا على أساس ان جسمك حيفضل زى ماهو
عالعموم ربنا يهنيكى ياحبيبتى يارب
شمس :يارب يامونتى يارب وعقبالك ان شاء الله
ايمان:يارب ياشمس نفسي الحق اتجوز قبل مااعنس بقى
شمس:تعنسى إيه بس ياهبله ده انتى زى القمر
إيمان :قمر بالستر يااختى ده البنات مقاصيف الرقبه اللى فى ساكنين فى الشارع اللى كانوا بيجولى اذاكرلهم وهما صغيرين اتخطبوا واتجوزوا وخلفوا كمان وانا قاعده زى خيبتها وكل مااشوف واحده فيهم تقوللى ازيك ياابله إيمان مفيش حاجه حلوة كده واللا كده ربنا يسعدك يارب ببقى عاوزة اجيبها من شعرها اقسم بالله
شمس:هههههههه عسل يامونتى وبعدين مش قلتيلي ان حسن حيخطبك خلاص
إيمان :ايوة ان شاء الله بس مستنى يشترى الشقه الأول عشان بابا ميرفضهوش
شمس :ربنا يكتبلك الخير يا قلبي انتى تستاهلى كل خير يامونتى
إيمان :أنا أهم حاجه عندى دلوقتى اطمن عليكى ياست البنات وانا معايا ربنا بقى
فتضحك الفتاتان:هههههه هههههه هههههه
🌸🌸🌸🌸🌸🌸🌸🌸🌸
كان يتحدث عصام الى احدى الفتيات عبر الهاتف
عصام :خلاص مش حينفع الكلام ده انا حكتب كتابى كمان يومين
الفتاة:وحبنا ياعصام نسيته خلاص
عصام :نصيبنا كده بقى وكل واحد بياخد نصيبه لكن انا مش حقدر اظلم شمس انا مشوفتش منها غير كل خير.
الفتاة:وحتقدر ياعصام حتقدر تتجوز واحده غيري انت كده تبقى بتظلم نفسك وتظلمها معاك.
تقدر تقوللى ازاى حتتجوز واحده وقلبك مع واحده تانيه حرام عليك ياحبيبي اللى بتعمله فنفسك وفية وفيها كمان
هى كويسه وحلوة واكيد حتلاقى اللى يحبها وتحبه وتبدا معاه حياتها لكن انت لو صممت تكمل جوازك منها تبقى بتحكم على نفسك بالتعاسه طول عمرك
عصام :حبيبك انا لو كنت حبيبك مكنتيش سمحتى اللى حصل يحصل
الفتاة:تانى ياعصام حنعيده تانى مانت عارف انه كان غصب عنى والله كان غصب عنى ياحبيبي وانت فاهم كل حاجه وعارف كل اللى حصل وقتها.
ومتاكد انى عمرى ماحبيت ولا ححب حد غيرك.
عصام :عالعموم خلاص بقى معتش ينفع الكلام ده دلوقتى انا خلاص حتجوز افهمى بقى وشمس بتحبنى ومتستاهلش منى انى اكسر فرحتها وقفت معايا وساعدتنى كتير
الله يخليكى افهمينى بقى ابعدى عنى روحى لحالك وسيبينى بقى
ومتنسيش انك انتى اللى اختارتى يبقى تتحملى نتيجة اختيارك ارجوكى بقى انسينى وسيبينى أعيش حياتى زى مانتى عيشتيها زمان ويغلق الهاتف فى وجهها.
🌸🌸🌸🌸🌸🌸🌸🌸🌸🌸🌸🌸
تعود شمس الى المنزل والدنيا لا تسعها من الفرحه لتجد والدها فى المنزل عند خالتها
شمس:بابا ازى حضرتك
والدها:الحمد لله ياحبيبتى انتى عامله إيه
شمس:الحمد لله والله يا بابا انا كويسه
والدها:ماشاء الله انتى جيلتى الفستان ربنا يكمل فرحتك على خير يارب
شمس :أيوة يابابا عقبال اخواتى ان شاء الله
والدها:انا جيت عشان اتاكد من معاد كتب الكتاب عشان اخواتك ييجوا معايا ويكونوا حواليكى
شمس :ربنا يخليك لية يابابا
والدها وهو يحتضنها:حقك علية ياشمس انا عارف انى قصرت معاكى كتير وانى مكنتش ليكى الأب اللى يكون سندك فى الدنيا بس معلش ياحبيبتى سامحينى واعذرينى
شمس :ولا يهمك يابابا المهم انك تكون معايا وتشاركنى فرحتى بجوازى
والدها:ان شاء الله يا حبيبتى طبعا ده انتى بنتى الذبيرة وأول فرحتى وامك الله يرحمها كانت ونعمه الزوجه وكفايه تربيتها هى وخالتك ليكى اللى مخليانى رافع راسي للسما
سناء:شمس دى بنتى اللى ربنا عوضني بيها وربنا يديك الصحه وتشيل ولادها ان شاء الله
والدها :ان شاء الله.
🌺🌺🌺🌺🌺🌺🌺🌺🌺
فى اليوم التالي
تستيقظ شمس فى الصباح على تليفون من عصام
شمس:حبيبي صباح الخير
عصام :صباح النور ياشمس عامله إيه
شمس:مبسوطه أوى ياحبيبي حسه انى طايرة من الفرحه مش مصدقه ان خلاص كمان كام يوم حنبقى مع بعض ومفيش حاجه ممكن تفرق بيننا ابدا حنخرج مع بعض وندخل الشركه وايدينا فى ايد بعض واعملك الأكل بايدي يااه ياعصام اخيرا ياحبيبي
عصام:شمس ممكن تلبسي وتنزلى تقابلينى دلوقتى
شمس :خير ياحبيبي فى حاجه
عصام :محتاج أتكلم معاكى شويه ياشمس.
شمس :حاضر ياحبيبى دقايق واكون عندك.
بعد مرور نصف ساعه يجلس عصام أمام شمس ولا يعرف من اين ولا كيف يبدأ الكلام
شمس:حبيبي مالك فى ايه.
عصام :خايف ياشمس أوى.
شمس:خايف من ايه ياعصام ايه اللى حصل في حاجه حصلت باباك تعبان واللا حاجه ماتتكلم ياعصام وقعت قلبي فى رجلية
عصام :خايف متفهمنيش او متقدريش موقفى
شمس :هو فى ايه ياعصام انت بتتكلم بالالغاز كده ليه من فضلك اتكلم بقى وقول فى ايه.
عصام :بس توعدينى الاول انك حتقدرى موقفى وحتفهمينى
شمس :مانا طول عمرى بفهمك ياعصام وبعرف كل اللى جواك من غير ماتتكلم قول ياعصام طلع كل اللى جواك انا اصلا حساك بقالك فترة فى حاجه مخبيها عنى
عصام :فعلا ياشمس انا فى حاجه مخبيها عنك وجه الوقت اللى لازم تعرفى فيها كل حاجه.
بس الله يخليكى تسمعينى للاخر من غير ماتقاطعينى
تسكت شمس وقلبها يكاد ان يتوقف عن النبض من الخوف مما هو آت
عصام :من فترة فترة طويله أوى بالتحديد من ايام الثانوى ارتبطت بواحده زميلتى وحبينا بعض اوى بنينا احلامنا سوا حلمنا بالمستقبل اللى حيجمعنا سوا ودخلنا كلية الهندسه مع بعض كنا مع بعض فى كل مكان مكناش بنسيب بعض لحظه واحده كان كل املنا اننا نتخطب ونتجوز لدرجة انى اقنعت بابا انه يروح معايا عند أهلها ووعدته انى حشتغل فى الاجازة واكون مستقبلي وفعلا راح معايا وكلمنا باباها وقرينا الفاتحه وبقينا مخطوبين قدام الناس كلها لحد ما اتخرجنا بس للأسف باباها مات فجأة وعمها صمم انه يجوزها لابنه بالاجبار وتسافر معاه برة رحتله واتخانقت معاه وبابا كلمه طردنا وقال بنت اخويا وانا ولى أمرها وهى حاولت ترفض لكن مفيش فايده جوزها لابنه واخدها وسافر واخبارها انقطعت عنى
عشت أيام وليالي وشهور ربنا العالم بية كنت بموت كل يوم لدرجة انى رحت لدكتور نفسانى لكن صورتها مكنتش بتفارق خيالي لحظه اشتغلت فى محافظات كتير لحد مابدات حالتى تتحسن شويه وبدأت اتكيف على انها خلاص مبقتش موجوده فى حياتى مرت السنين لحد مااشتغلت عندكم فى الشركه وفنفس القسم اللى انتى فيه وبرغم انك اصغر منى فى السن إلا ان البشمهندس يزيد طلب منك تدربينى على الشغل فى الشركه ولقيتنى بتكلم معاكى كل يوم وبنقرب من بعض وحسيت بمشاعرك تجاهى ولقيتها فرصه انى أبدا حياتى معاكى من جديد وكنت حبيتك والله ياشمس واتعودت على وجودك فى حياتى وخلاص نسيت الماضى لحد كام شهر فاتوا قلبوا حياتى كلها
ظهر حبي القديم تانى رجعتلى تانى وقالتلي انها اطلقت من جوزها وعاوزة ترجعلى قاومت والله قاومت كتير ياشمس حاولت أنساها نهائى حاولت اخرجها واطردها من حياتى لكن للأسف قلبي مش قادر ينساها وحاسس انى حظلمك وحاجى عليكى باشمس لو ارتبطت بيكى وكملت معاكى.
شمس انا بحترمك اوى ومقامك عالى عندى اوى عشان كده مش حقدر احطك فى موقف زى ده مش حقدر اظلمك ياشمس مش عاوزك تعيشي معايا وقلبي مع واحده تانيه انا اسف ياشمس اسف بجد انا عارف ان اعتذار الدنيا كله مش ممكن ينفع فى موقف زى ده
بس انتى تستحقى شخص احسن منى شخص يحبك وتحبيه بجد شخص تكونى مالكه كل مشاعره وأحاسيسه
تبقى كل حاجه فى حياته ياشمس
كانت شمس صامته لاتتحدث بحرف فقط تسمع مايقوله عصام لها
عصام :شمس
شمس:أيوة ياعصام
عصام:انا عارف ان كلامى زعلك
شمس وهى تتلفت حولها يمينا ويسارا:انت بتكلم مين ياعصام
عصام : شمس سامحينى ياشمس
شمس:هههههههههه ده اكيد برنامج الكاميرا الخفيه مش كده يالهوى عليك ياعصام مكنتش اعرف انك بتعرف تعمل مقالب كده
عصام :شمس الله يخليكى متصعبيهاش علية وقدرى موقفى
شمس والدموع تنهمر على وجهها:اقدر موقفك طب وانا مين اللى يقدر موقفى
انا عملت فيك ايه عشان تعمل فية كل ده ده انا مبحبتش حد قدك يبقى ده جزائى هى دى مكافأة حبي واخلاصي ليك طب ازاى فهمنى انا حسه انى حتشل لا لا مش ممكن انا استحاله أصدق اللى انت بتقوله ده
عصام:مش عاوز اظلمك معايا
شمس:هههههه هههههه كانت تضحك وهى تضرب كفا على كف مش عاوز تظلمنى لا بجد الف شكر ليك بجد مش عارفه اقولك ايه لاء حقيقي عداك العيب
ظلم إيه اللى بتتكلم عنه وهو اللى انت عملته ده مكنش ظلم لية لما تدخلنى حياتك وتوهمنى بحبك طول السنين اللى فاتت دى متبقاش ظلمتنى
انا عمرى مافرضت مشاعري عليك ولا خليتك تخطبنى غصب عنك لما انت فى واحده فى حياتك سمحتلى ادخل حياتك ليه
ليه ماقولتليش ليه الكلام ده قبل كده جاى تقوللى الكلام ده دلوقتى
والفرح كمان اسبوعين وكتب الكتاب بعد يومين طب ازاى طب انا اعمل ايه دلوقتى طب وايه التصرف اللى المفروض أتصرفه
طب وانت بتاخد قرارك ده مفكرتش فية مفكرتش الناس ممكن تقول علية ايه ممكن تفسر سبب فك خطوبتك لية قبل الفرح بأيام ازاى واهلى وجيرانى واصحابي وكل الناس اللى كانت كل شويه تسالنى فرحك امتى ياشمس حنفرح بيكم امتى ياحبيبتى طولتوا اوى ياشمس. العمر بيجرى باحبيبتى عاوزين نفرح بيكم بقى
اقولهم ايه افسرلهم يبب اللى حصل ازاى.
انت بتقول انك بتحترمنى وهو اللى انت بتعمله ده فين احترامك لية فيه
طب سيبك من مشاعرى ناحيتك اللى دوست عليها بكل جبروت وقسوة فى ستين داهيه كسرة قلبي وفرحتى بفستانى وانا لابساه اللى ضاعت خلاص
لكن كرامتى اعمل فيها ايه تقدر تقوللى حعرف ارفع راسي فى وسط الناس والجيران والشركه ازاى
ده انا وزعت كروت الدعوة على الناس حقولهم ايه دلوقتى اقولهم بصوا ياجماعه الفرح زى ماهو فى معاده والعريس زى ماهو بس فى تغيير بسيط اوى العروسه مش هى العروسه اللى انتوا عارفينها لاء احنا عاميلينلكم مفاجأة هايله العروسه اتغيرت وبقت واحده تانيه خالص عارفين مين حبيبة العريس القديمه اللي للأسف حبي ليه مكنش كافى عشان اقدر انسيهاله
هو ده اللى انت عاوز تسمعه ياعصام هو ده
فاكرنى حقولك ايه حقولك اللى بيحب بيسامح حقولك اللى بيحب بيتمنى لحبيبه السعاده حتى لو مش معاه
لا انا مش مسمحاك ياعصام وعمرى ماحسامحك ابدا
مش حسامحك على عمرى اللى ضاع وانا مستنياك
مش حسامحك على حبي ليك اللى عمرك ماحتقدر تعوضه أبدا
عصام:شمس ارجوكى ياشمس احنا فى مكان عام انا اسف اسف ياشمس.
شمس وهى واقفه وصوتها يعلو على كل الأصوات فى المكان:ترجونى ايه انت ايه انت مش ممكن تكون الانسان اللى انا حبيته واتمنيت اللحظه اللى حتجمعنا سوا
جاى بعد السنين دى كلها تقوللى اسف ههههههههه اسف على الازعاج لا انا اكيد بحلم لا ده مش حلم ده كابوس مش حقيقه
عصام عصام الله يخليك قوللى انى بحلم قوللى اننا مش قاعدين هنا دلوقتى قوللى ان الكلام اللى قلته ده هزار هزار مش حقيقه بتختبر بيه مشاعرك ناحيتى
لكن انه يكون حقيقه لا لا استحاله لا انا مش حقدر استحمل اللى بيحصل ده والله ماحقدر استحمل ليه ليه حرام عليك ليه
عصام وهو يحاول ان يمسك يدها لتهدئتها:تعالي معايا الله يخليكى
شمس:سيب ايدى متمسكنيش الايد دى أنا مسكتها قبل كده عشان كانت امانى فى الدنيا لكن استحاله بعد كده ممكن اثق فيها وامسكها تانى.
ابعد عنى انا بكرهك بكره كل لحظه سلمت فيها قلبي ومشاعري لواحد خاين حقير واطى اشترى الرخيص بالغالي
بس والله لتندم ياعصام والله لتندم على شمس
شمس النور اللى كان حينور حياتك كلها واللى ان شاء الله بظلمك لية حياتك حتبقى ضلمه حتتخبط فيها وانت بتدور علية ومش حتلاقينى ووقتها انا اللى حشمت فيك ياعصام وحضحك حضحك من قلبي وانا شيفاك مذلول لية عارف ليه عشان اللى يكسر قلب انسانه حبت واخلصت عمره ماحيشوف الفرح ابدا فى حياته
ثم تقوم بخلع الدبله من يدها ورميها فى وجهه وهو عاجز عن النطق بكلمه امامها
كان كل من فى المكان يشاهدون مايحدث ويتعجبون مما يرونه ويسمعونه فجأة انتبهت لما يحدث حولها فاقت مما هى فيه لتجد الجميع ينظر إليهم وهم لايعرفون من الظالم ومن المظلوم.
لم تستطع ابصمود اكثر من ذلك اخذت حقيبتها واسرعت بالخروج من هذا المكان الذى طالما جلست فيه معه
لا تدرى ماذا تفعل ولا إلى أين تذهب كانت تجرى فى الشارع وهى منهارة من البكاء لاتعرف ماذا ستفعل
كيف سيتحمل قلبها مايحدث كيف سيتحمل تلك الصدمه
قلبها الذى أحب وعشق
ذلك القلب الذى ينزف بغزارة بعد ان غرزه الحبيب بخنجر مسموم بسم الغدر والخيانه
فجاة وجدت نفسها ترتجف من شدة البرد تشعر ببروده لم تشعر بها من قبل برغم دفء الجو وخلوه من اى بر د او صقيع ولكن الاحساس بالحزن دائما مايشعر صاحبه بالبرد الشديد
🌺🌺🌺🌺🌺🌺🌺🌺🌺🌺🌺
فى منزل خالة شمس
إيمان :شمس اتاخرت اوى ياسوسو
سناء:زمانها جاية ياايمان هى قالتلي عصام عاوزها فى حاجه وجايه على طول
إيمان :وده وقته احنا ورانا حاجات كتير النهارده عاوزين نروح نحجز الاستوديو والكوافير ونشتري شوية حاجات.
عشان كتب الكتاب
سناء:انا برن عليها اهوه اصبري يابنتى
إيمان :لما ترد اديهالي لو كده انزلها بدل مااستناها هنا عشان نكسب وقت
سناء:جرس ومبتردش
إيمان :طب رنى على عصام
سناء:رنيت عليه والله تليفونه مقفول اصبري ياايمان زمانها جايه ان شاء الله
فجأة يسمعون صوت فتح الباب
إيمان :شمس جت الحمد لله
تخرج ايمان وسناء لاستقبال شمس ولكنهم يتفاجئون من منظرها فقد كان شعرها مشعث على وجهها وعيناها محمرة من البكاء.
سناء:شمس مالك ياحبيبتى فى إيه
إيمان :شمس انتى كنتى فين ومال شكلك عامل كده ليه
كانت شمس تنظر إليهم باعين زائغه ولاتعرف بماتجيب عليهم
بدأ القلق والرعب يدب فى قلوب سناء وايمان
سناء :شمس انتى مبترديش ليه ياشمس ردى علية يابنتى الله يخليكى
ايمان وهى تمسكها من وجهها:شمس حبيبتى مالك فيكى ايه انتى كنتى مع عصام طب كنتوا فين واتاخرتى كده ليه
شمس مالك ياحبيبتى ردى علية ياشموستى انتى ساكته ليه
شمس:انا سقعانه سقعانه اوى انا بردانه عاوزة انام
ايمان:يالهوى الحقينى ياخالتى دى شمس جسمها تلج
وفجأة تجد من تسقط من بين يديهاويفترش جسمها الأرض
سناء:يالهوى شمسسسس
💙💙💙💙💙💙💙💙💙💙💙💙
انتهى الفصل ويارب يكون نال اعجابكم تعليقاتكم وتوقعاتكم بقى واشوفكم الفصل الجاى ان شاء الله
القصه هنا فقط اعمل متابعة ليصلك كل جديد 👇👇
عشاق الروايات
•تابع الفصل التالي "رواية شمس تتحدي الغيوم" اضغط على اسم الرواية