رواية شمس تتحدي الغيوم الفصل الخامس 5 - بقلم عبير سليم

 رواية شمس تتحدي الغيوم الفصل الخامس 5 - بقلم عبير سليم 

الفصل الخامس من رواية شمس تتحدى الغيوم

بقلمي :عبير سليم

🌺🌺🌺🌺🌺🌺🌺🌺

يقول الله تعالى فى كتابه الكريم "وعسى أن تكرهوا شيئا وهو خير لكم وعسى أن تحبوا شيئآ وهو شر لكم والله يعلم وأنتم لا تعلمون"

                          صدق الله العظيم

عشقت قلوبنا وتمنت ورجت من القدر أن يكون رحيما بنا حليما بتلك القلوب الضعيفه التى لاتقوى على شئ سوى التمنى والرجاء.

غافله تلك القلوب عن أنها بين اصابع الرحمن يقلبها كيفما يشاء.

نعم فالعاشق لايرى سوى حبه لايسمع سوى دقات قلبه تغفل وتتناسى أى شئ سواها.

تعمى قلوبنا عن عيوب من تعشقه فالعين لا تبصر سوى الحبيب وتغض البصر عما سواه

نفرح بما تريده القلوب وتحزن لما تفقده وهى لا تدرى ان الخير بل كل الخير فيما يقدره لنا السميع العليم الذى يعلم ولا نعلم وهو علام الغيوب.                                     

  😥😥😥😥😥😥😥😥😥😥        

  سناء: خير يادكتور طمنى بنتى مالها فيها إيه 

الدكتور:عندها انهيار عصبي. انا اديتلها حقنه مهدئه عشان تنام و تهدى وارجوكم محدش يصحيها نهائى سيبوها ترتاح لحد ماتقوم بنفسها. 

سناء وهى تخبط على صدرها:يامصيبتى السوده انهيار عصبي ليه لا مش ممكن استحاله إيه الكلام اللى حضرتك بتقوله ده يادكتور

بنتى بنتى أنا عندها انهيار عصبي طب ازاى ده مفيش حد فى الدنيا فرحان فرحتها. لا لا اكيد فى حاجه غلط 

الدكتور:واضح انها اتعرضت لصدمه نفسيه وياريت لما تفوق تحاولوا تتعاملوا معاها بالراحه ولو حصل اى حاجه ممكن تتصلوا بية وانا حجيلكم فى أى وقت. 

ايمان :وهى تبكى على صديقتها وهى ممكن تفوق فى خلال اد إيه يادكتور

الدكتور:مش قبل ست ساعات من دلوقتى وممكن اكتر حسب حاجة جسمها للراحه والهروب من الصدمه اللى اتعرضتلها.

إيمان :شكرا لحضرتك يا دكتور تعبناك معاناوتقوم بدفع تمن الكشف له وتوصيله للباب.

سناء:الحقينى ياايمان انا عاوزة افهم ايه معنى الكلام اللى الدكتور قاله ده انهيار عصبي إيه وصدمه نفسيه ايه انا مش فاهمه حاجه يابنتى فهمينى

إيمان :خالتى الله يخليكى اهدى عشان نعرف حنتصرف ازاى وحنعمل ايه

سناء:نعمل ايه فى ايه يابنتى البت نزلت الصبح وقالتلي انا نازله حقابل عصام وحاجى بسرعه عشان ايمان حتيجى وحننزل نكمل الحاجات.

وانتى جيتى وهى مجاتش وقعدنا نقول زمانها جايه وارن عليها متردش وعصام تليفونه مقفول

وجت وقلنا الحمد لله وصلت واديكى شفتى منظرها كان عامل ازارى دى زى ماتكون طالعه من خناقه

ثم تقوم باللطم على وجهها :يالهوي ياخرابي لتكون البت حصلها حاجه يكون حد ابن حرام عمل حاجه فيها يالهوى ده انا اروح فيها اعمل ايه ياربي بس ازاى وهى كانت مع خطيبها 

ايمان:خالتى الله يخليكى ابوس ايدك اهدى ان شاء الله خير

سناء:خير وحييجى منين الخير مانتى سمعتى الدكتور بنفسك قال إيه دى البت ياحبة عينى من ساعة ماحددنا الفرح وهى الدنيا مش سايعاها من الفرحه دى رجعت كانها عيله عندها عشر سنين

وقالتلي نازله لعصام أيوة قالتلي رايحه له 

عصام ايوة محدش حيفهمنى غير عصام ايوة انا لازم اعرف اللى حصل منه أكيد هو عارف بس ازاى عارف فيها إيه ويسيبها تيجى لوحدها بالمنظر ده

لا لا انا قلبي مش مطمن انا حسه ان فى مصيبه حصلت

ياحبيبتى يابتى ياترى فيكى إيه يابت الغاليه

إيمان :ياخالتى احنا منعرفش حاجه ولا فاهمين اللى حصل بالراحه ياخالتى وانا حروح بنفسي لعصام أفهم منه ايه اللى حصل

سناء:تروحى وانا أفضل كده قاعده على نار وبنتى معرفش مالها ولا إيه اللى فيها لا انا لازم اروحله وافهم منه

إيمان :ونسيب شمس لوحدها مش حينفع

سناء:مش سمعتى الدكتور وهو بيقول انها مش حتفوق دلوقتى. انا لازم اروحله ياللا بينا على بيت ابوه واعرف بنتى مالها

💖💖💖💖💖💖💖💖💖

فى منزل عصام

يجلس عصام فى غرفته حائرا مما حدث لايعلم ايفرح بما أخذه من قرار وانهائه لعلاقته مع شمس أم يحزن لما فعله معها بعدكل هذه السنوات من الخطبه واحساسه بالذنب تجاهها

يعلن تليفونه عن اتصال من تلك التى ترك شمس من أجلها

عصام :انا خلاص نهيت كل حاجه

الفتاه:بجد انت بتتكلم بجد ربنا يخليك لية ياحبيبي انا مبسوطه مبسوطه اوى

عصام:...........................

الفتاة:ساكت ليه ياحبيبي

عصام :مضايق من اللى حصل وزعلان من نفسي أوى على اللى عملته فيها

الفتاه:حبيبي صدقنى دلوقتى احسن من بعدين وزي مابيقولوا خسارة قريبه احسن من خسارة بعيده

عصام :بس شمس مكنتش تستاهل منى أعمل فيها كده دى كانت بنحبنى أوى

الفتاه:لا ياعصام متقولش كده انا بحبك اكتر انت حبيبي حبيبي انا وانا حبيبتك اللى مستعده اسيب الدنيا كلها واجى معاك

عصام :ياريتك كنتى عملتى كده زمان فاكرة لما قلتلك تعالي نهرب ونتجوز ونحط الكل ادام الأمر الواقع فاكرة

الفتاه :كنت لسه صغيرة ياعصام ومكنش فى ايدي حاجه لكن دلوقتى انا كبرت خلاص وبقيت قادرة انى اخد قرارى واحدد مصيري بنفسي انا عمرى ماكنت سعيده فى بعدى عنك ابدا وعمرى ماعرفت طعم السعاده وانت بعيد عنى

عصام:على العموم خلاص اللى حصل حصل

الفتاه:ايوة ياحبيبى خلاص ننسى اللى فات ونبدا حياتنا من جديد عاوزين نرمى كل حاجه ورا ضهرنا واوعدك ياعصام انى حعوضك عن كل اللى فات وحنسيك كل لحظه عشناها بعيد عن بعض. 

فيجد والده يفتح عليه الباب ويدخل فيغلق الهاتف مباشرة

والد عصام :عصام يابنى

عصام :ايوة يابابا اتفضل. 

والده:عاوزك تتصل على خالك وخالتك يابنى

عصام :ليه يابابا فى حاجه

والده:عشان ييجوا يحضروا كتب كتابك يابنى وميزعلوش مننا دول من ريحة أمك الله يرحمها. 

عصام :كتب كتاب مين مفيش كتب كتاب خلاص

والده:مفيش كتب كتاب إيه اللى انت بتقوله ده ياعصام هو فى حاجه حصلت خالة شمس تعبت واللا حاجه

وقبل أن يرد عليه يسمعون طرقا على الباب فتذهب اخت عصام لفتح الباب فتجد خالة شمس وصديقتها ايمان على الباب

نيرة:طنط سناء اتفضلي يا طنط

سناء:هو عصام هنا يانيرة

نيرة:أيوة جوة فى اوضته اتفضلوا ادخلوا ازيك ياايمان عامله إيه.

ايمان :الحمد لله بس نادى عصام الله يخليكى عاوزينه بسرعه

نيرة:حاضر ياطنط بس هو فى حاجه حصلت شكلكم بيقول ان في حاجه 

سناء:ناديه حالا الله يخليكى يابنتى انا مش قادرة أقف على رجلية

يخرج والدهم سريعا من غرفة عصام ليرى من الذى كان يطرق على الباب هكذا

والدهم :مين يا نيرة اللى جه

نيرة :دى طنط سناء خالة شمس يابابا ومعاها ايمان عاوزين عصام

والده:اهلا ياحاجه نورتينا والله ازيك ياايمان يابنتى

اتفضلوا استريحوا واقفين كده ليه

سناء:انا مش عاوزة اقعد ولا استريح انا عاوزة عصام الله يخليك ياحاج ناديهولى حالا

والده:هو فى إيه ياحاجه هو حصل ايه عشان نأجل كتب الكتاب هو انتى تعبانه ياحاجه واللا ايه 

سناء وايمان وهم ينظرون لبعضهم فى دهشه

إيمان :كتب كتابهم يتأجل ليه انا مش فاهمه حاجه

سناء:ياحاج الله يخليك ناديهولى واللا ادخله انا

والده:ادخلي بسرعه يانيرة نادى اخوكى من جوة حالا

يخرج عصام اليهم وهو لايعرف ماذا سيقول لهم وبماذا سيبرر موقفه أمامهم. 

إيمان :عصام هى مش شمس نزلت تقابلك حصل ايه هو انتوا زعلتوا مع بعض واللا حاجه

وكتب كتاب مين اللى حيتاجل عصام هو انت شفت شمس واللا لاء

وقف عصام امامهم مطاطئ راسه لا يستطيع ان يرفع رأسه امامهم عجز لسانه عن النطق بحرف

ماذا سيقول لهم وبم سيبرر لهم مافعله بتلك المسكينه

سناء:انت ساكت ليه ياعصام ماتنطق وتفهمنا إيه اللى حصل

والده:اهدى ياحاجه عشان نفهم فى ايه ونعرف الموضوع ايه بالظبط. 

سناء:اهدى إيه وزفت ايه انا بنتى حتروح منى شمس رجعت البيت من شويه واغمى عليها وجبنا الدكتور وقال عندها انهيار عصبي وانها اتعرضت لصدمه عصبيه واداها مهدئ

ودلوقتى انتوا بتقولوا كتب الكتاب معرفش ماله

هو فى إيه انا عايزة أعرف من ابنك اللى حصل وايه معنى الكلام ده

قوللى يابنى ريح قلبي هو فى حد اتهجم عليكم والبت معاك واذاها واللا ايه. اتكلم انا مش قادرة اتلم على اعصابي 

يسكت عصام ولايستطيع النطق بكلمه 

والده وهو منفعل :انت ساكت ليه يابنى ادم ماترد عالست فى ايه. اتكلم بدل مااطلع روحك فى إيدي

عصام :اصل اصل انا وشمس سيبنا بعض

سناء وهى تضرب على صدرها:يامصيبتى انت بتقول ايه سيبتوا بعض ازاى يعنى إيه سيبتوابعض مين اللى ساب مين انت وشمس اللى فرحكم كمان كام يوم طب ليه حصل ايه دى البت اشترت فستانها وطول الليل واخداه فى حضنها وهي نايمه يقوم يطلع الصبح تسيبوا بعض

عصام :زى الناس عادى مكملناش

والده:يعنى ايه عادى هو ايه اللى عادى فى إيه وايه اللى يخليكم تسيبوا بعض. ده كتب كتابكم بعد بكرة وفرحكم بعد اسبوعين وجاى دلوقتى تقول سيبنا بعض كده ببساطه

هو لعب عيال واللا إيه

عصام:الجواز قسمه ونصيب واحنا ملناش نصيب مع بعض

والده:جاى بعد اكتر من تلت سنين خطوبه تقول مفيش نصيب وامتى قبل الفرح بكام يوم لا أكيد انت اتجننت يااما حصل حاجه بينكم هى السبب انطق قول حصل إيه

انتوا اتخانقتوا مع بعض يابنى ماهو الكلام ده ميتعقلش ومينفعش عش تاخدوا قرارات من نفسكم 

ليه ملكمش كبير واللا إيه

عصام وهو منفعل بشده ويعلو صوته أمام الجميع :محصلش حاجه ومفيش أسباب انا مبحبهاش ومش حقدر اكمل معاها وانا قلتلها الكلام ده النهارده وخلاص بقى خلصنا وانا مش عاوز حد يتكلم معايا فى الموضوع ده تانى انا حر اعمل اللى انا عاوزه

كل هذا وايمان وسناء فى صدمه مما يسمعون غير مصدقين ماتسمعه اذانهم

فجاة لا يجد عصام سوى صفعه شديده على وجهه من والده:اتكلم بأدب ياحيوان واضح انى معرفتش اربيك وعاوز تتربى من اول وجديد

حر مين ده اللى حر هى بنات الناس لعبه تقعد خاطبها وداخل طالع عليهم وجاى دلوقتى تقول خلاص مش عاوز تكمل

ده انت حتكمل والجذمه فى بؤك يابن ال...........       

لاتشعر سناء بنفسها إلا وهى قابضه عليه من صدره ويكاد قميصه ان يتقطع فى يديها:سيبت مين انت بتقول إيه انت 

سيبت بنتى بنتى انا شمس ست البنات اللى انت مكنتش تحلم تتجوزها يامعفن مبتحبش بنتى بنتى اللى اختارتك من وسط الناس كلها اللى سابت اسيادك اللى كانوا يتمنوالها الرضا عشانك وفضلتك عنهم كلهم

يبقى ده جزاءها تسيبها وتقول مبحبهاش ياللى عملناك بنى ادم واشتريناك وانت محيلتكش الهوا

سيبت شمس اللى صبرت عليك سنين اللى كانت حارمه نفسها من كل حاجه عشان تقف جمبك وتساعدك وتقوللى حرام ياخالتى لسه بيكون نفسه

بنتى شمس اللى جذمتها تشيلها فوق راسك اللى مكنتش تطول ضافرها، تسيبها وتقول مبتحبهاش

بنتى انا مبتحبهاش ولما انت مبتحبهاش فضلت خاطبها وموقف حالها جنبك كل السنين دى ليه 

ده ضوفرها برقبة عشرة زيك ياواطى. 

واحنا بقى اللى مش عاوزينك بس اقسم بالله العظيم لحدفعك تمن اللحظه اللى شفت بنتى قدامى وهى منهارة ومش عارفه مالها ولا فيها إيه

آخر حاجه كنت اتخيلها انك تغدر بيها

يافضيحتنا فى وسط الناس نودى وشنا فين من الناس

نقول ايه للأهل والجيران اللى عارفين معاد كتب الكتاب والفرح

بس اقسم بالله ياعصام لحخليك تندم عاليوم اللى جرحت فيه بنتى تفوق بس من اللى هى فيه تفوق واشوفها وهى بتتكلم قدامى وبعد كده مش حيكفينى فيها عيلتك كلها ودينى ومااعبد ماحسيبك ياعصام 

بنتى بنتى اللى كانت زى الورده المفتحه يجيلها انهيار من واحد واطى زيك

روح ياشيخ حسبي الله ونعم الوكيل فيك حسبي الله ونعم الوكيل فيك

ربنا ينتقم منك الهى ماتشوف الفرح بعنيك وتعيش مكسور ومذلول ادام الخلق كلها

وبردو ده مش حيكفينى ولا يبرد نارى ولا يشفى غليلي منك

مش حيبرد نارى غير لما تشرب من نفس الكاس اللى سقيت منه شمس 

كانت تتكلم بقهرة أم على كسرة قلب ابنتها

لم يتدخل والده بل تركها تفعل به ماتريد وماتشاء

بينما كانت ايمان تبكى بحرقه وتحاول ابعادها عنها خوفا عليها فقلبها لن يستطيع تحمل ذلك الموقف

إيمان :خلاص ياخالتى خلاص الله يخليكى شمس عاوزاكى محتاجاكى ياللا بينا احنا ملناش مكان هنا

ولكنها قبل ان تغادر المكان تقوم بالبصق فى وجهه:اتفو عليك

تخرج ايمان وسناء من منزلهم والدموع منهمرة على وجههم

سناء:شفتى شفتى ياايمان قلتلك فى حاجه حصلت للبت

بتى حتروح منى ياايمان

بقى الكلب الواطى ده يعمل في شمس كده شمس اللى مكنش يحلم بس بنظرة منها ادى اخرة اللى يعمل للمعفن تمن

بس والله ماحسيبه. 

إيمان :اهم حاجه دلوقتى شمس وبعد كده اى حاجه فى الدنيا تهون

بينما فى الاعلى كان عصام جالس لا يستطيع رفع عينه فى عين ابيه

ابيه الذى كان يتمنى فى هذه اللحطه ان يغرزه بخنجر فى قلبه بسبب ماارتكبه فى حق تلك المسكينه

سيبت بنت الناس بنت الاصول المتربيه اللى وقفت معاك وساندتك طول السنين دى اللى عمرها ماطلبت منك حاجه واللى كانت بتديلك ومتاخدش منك

سيبتها بعتها طب ليه وعشان ايه عملتلك إيه الغلبانه دى

 ده احنا حبناها من حبها ليك وخوفها عليك

نسيت يابنى لما كنت بتبقى عيان واللا عندك دور برد نسيت انها هى اللى كانت بتجرى تروح تجيبلك العلاج وتعملك الأكل بنفسها ولما تروح تفضل تكلمك كل شويه عشان تطمن عليك.

كل ده وتقول مبتحبهاش طب ازاى يابنى ازاى فهمنى

بعنى ده جزاء حبها ليك يابنى

هى دى مكافئة نهاية الخدمه اللى بتقدمهالها هى دى كلمة شكرا اللي بتقولهالها

قللى يابنى الحقيقه قوللى ايه اللى حصل وانا احاول أصلح الموضوع وكأن محصلش حاجه

انتوا اتخانقتوا قالتلك حاجه جرحت كرامتك ماتقول الله يخرببيتك

عصام :انا قلت كل اللى عندى ومعنديش حاجه تانيه اقولها خلاص اللى بيننا انتهى وكل واحد فينا راح لحاله وهى بكرة تنسى وتقابل حد تانى يحبها وتحبه لكن اكيد مش حيكون انا

والده:مش انت ابنى بس انا حدعى عليك روح ربنا ينتقم منك حسبي الله ونعم الوكيل فيك ربنا يكسر بخاطرك زى ماكسرت بخاطرها

وان شاء الله ربنا حيعوضها وحيكرمها براجل يحبها راجل بجد

عصام:ليه جاى علية كده ده انا اللى ابنك

والده:ماهو عشان انت ابنى خايف عليك من اللى حيحصلك

طب مجاش فى بالك ان ربنا يعمل فى اختك اللى انت عملنه فيها وان ربنا يردهولك فيها ماهو داين تدان

روح الله يسهلك بعيد عنى وانا مش عاوز اشوفك فى بيتى تانى لا انت ابنى ولا اعرفك

حاجه واحده بس هى اللى ممكن تخلينى اسامحك انك تروح تصالحها وتبوس على رأسها وتنسيها اللى حصل وده لو هى اصلا رضت تسامحك

غير كده انت لا ابنى ولا اعرفك

عصام :هو فى إيه كل ده عشان سيبت خطيبتى هو محدش بيسيب حد وايه المشكله لما منكملش مع بعض

انا عملت ايه لكل ده ده انا ابنك اللى المفروض اهم حاجه عندك سعادته

والده:وهى سعادتك مكنتش حتلاقيها مع شمس

عصام :لاء سعادتى مش مع شمس ومش ممكن تكون معاها

والده:ولماانت عارف ان سعادتك مش معاها من الأول ليه رهنتها جمبك السنين دى كلها يابنى ده انتوا عاملين كل حاجه سوا مختارين الوان الشقه سوا جايبين عفشكم سوا وزعتوا كروت الفرح سوا

والبنت عمرها ماسابتنا وأيام وفاة امك الله يرحمها محدش كان واخد باله من أختك غيرها

عصام :بابا الله يخليك كفايه بقى انا مش عاوز اتكلم في الموضوع ده تانى وانا اهم حاجه عندى سعادتي

والده:وانت عرفت حتلاقى سعادتك مع مين بااستاذ

عصام :مع هاجر

والده :هاجر هاجر مين يابنى اوعى يكون قصدك على البت اللى كنت بتحبها زمان

عصام :ايوة هى انا عمرى ماحبيت ولا ححب واحده غيرها ومش حلاقى سعادتى مع حد غيرها

والده:نعم انت بتقول ايه هاجر

  ايه الكلام الفارغ ده ثم مش البت دى اتجوزت وغارت فى داهيه وخلصنا من موضوعها من سنين ايه اللى فكرك بيها تانى

عصام :اطلقت اطلقت من جوزها لانها مبتحبوش وبتحبنى انا وانا لازم ارجعلها واتجوزها واكمل معاها حياتى واعوضها عن السنين اللي بعدنا فيها عن بعض.

والده:هههههههههه تتجوزها عاوز تتجوزها لا حول ولا قوة الا بالله العلي العظيم استغفرك يارب واتوب إليك بقى تسيب البنت اللى حبتك واخلصتلك ووقفت معاك وكانت سند ليك عشان واحده زى دى

وكمان عاوز تتجوزها تتجوز مين يامتخلف عاوز تتجوز واحده باعتك واتجوزت وانبسطت وعاشت حياتها ولما زهقت اطلقت ورجعت لابنى الأهبل ابو رياله

عصام :بابا الله يخليك دى حياتى وانا حر فيها

والده:حياتك انت عاوز تكبر على ابوك بتعلى صوتك على ابوك ياعصام هى دى اخرة تربيتى فيك. 

عصام :بابا والله مااقصد حقك علية انا اسف بس ارجوك افهمنى وقدر موقفى انا بحب هاجر بحبها يابابا ومتاكد انها بتحبنى وحضرتك عارف كويس اللى حصل زمان وان عمها هو اللى اجبرها تتجوز ابنه بابا الله يخليك مش انا ابنك اللى بتتمناله السعاده. 

والده:وهو انا لية مين غيرك انت واختك يابنى وكل منايا فى الدنيا اشوفكم سعدا ومتهنيين لكن اللى انت عملته ده غلط وغلط كبير وظلم وانا مش ممكن اشارك فيه واتاكد يابنى ان ربنا حياخدلها حقها منك عارف ليه لانك ظلمتها

ودعوة المظلوم ليس بينها وبين الله حجاب

واعمل حسابك لو صممت على اللى فى دماغك انت تمشي من البيت ده ومتدخلش بيتى تانى وروح اخطب واتجوز مع نفسك وانسى ان ليك اب روح افرح ياحبيبي وانبسط وابنى سعادتك على تعاسة واحده غلبانه وثقت فيك وحبتك وكان جزاءها الغدر. 

وحسبي الله ونعم الوكيل فى كل واحد يظلم بنات الناس ويكسر قلبهم

حسبي الله ونعم الوكيل

😢😢😢😢😢😢😢😢😢😢

تدخل سناء، وشمس المنزل وهم لا يعلمون ماذا سيفعلون فيما هم فيه

تفتح سناء، عليها الغرفه فتجدها نائمه فتقبلها من جبينها وتغلق عليها الباب

ايمان:نايمه ياخالتى

سناء وهى تجلس على الكرسي :أيوة نايمه حنعمل ايه دلوقتي ياايمان

حنقول ايه للناس اللى عارفه معاد كتب الكتاب والفرح وابوها اللى كان لسه هنا امبارح وماكده عليه المعاد

ومراة ابوها اللى ربنا يرحمنا من لسانها وشماتتها فينا

وشمس أنا خايفه عليها اوى يابنتى خايفه يحصلها حاجه دى كانت روحها فيه ياحبيبتى يابت اختى ياضنايا يابنتى 

إيمان :قدر الله وماشاء فعل ربنا يخلف عليها بالخير ان شاء الله

سناء:ليه بس كده ياربي دى غلبانه وحنينه وطول عمرها اللى فى ايدها مش ليها بتحب الخير للناس وعمرها مابصت لحاجه فى ايد غيرها 

ده ربنا بيقول وهل جزاء الاحسان الا الاحسان

يبقى ده جزاءها ده جزاء شمس ياايمان شمس صاحبتك تستاهل اللى حصلها ده

إيمان :لا ياخالتى شمس متستاهلش كده بس ربنا مش حيضيعها وحينصرها ان شاء الله

سناء:يارب العوض من عندك انت يارب انصرها يارب

ايمان وهى تتلفت حولها:خالتى هو انتى حاطه حاجه عالبوتجاز وناسياها انا شامه ريحة شياط

سناء:لا ياحبيبتي انا مدخلتش المطبخ النهارده تلاقيها ريحه من عند الجيران واللا حاجه

ايمان وهى تلتفت بعينها تجاه غرفة شمس فتنتبه لما رأته عينها

دخان يخرج من أسفل باب الغرفه

فتصرخ بصوت عالى: خالتى فى دخان طالع من تحت باب اوضة شمس

سناء: يالهوى شمس

💞💞💞💞💞💞💞💞💞💞💞💞

انتهى الفصل النهارده يارب يكون عجبكم

وياريت متبخلوش علية بالتعليقات والتوقعات لأنها بجد بتسعدنى ككاتبه وبتتحسسنى بقيمة اللى كتبته

لكن بصراحه قلة التفاعل بتحسسنى ان الروايه مش عجباكم وانا والله ببذل مجهود عشان أوصلها للشكل اللى يرضيكم

🌸🌸🌸🌸🌸🌸🌸🌸🌸🌸🌸

القصه هنا فقط اعمل متابعة ليصلك كل جديد 👇 

عشاق الروايات

 •تابع الفصل التالي "رواية شمس تتحدي الغيوم" اضغط على اسم الرواية