رواية شمس تتحدي الغيوم الفصل التاسع 9 - بقلم عبير سليم
الفصل التاسع من رواية شمس تتحدى الغيوم
بقلمي :عبير سليم
💖💖💖💖💖💖💖💖
عاد يزيد إلى المنزل فوجد والده وهاله جالسين يشاهدان التليفزيون ويضحكون
يزيد:مساء الخير على حبايبى الحلوين
هاله :مساء الفل على عيونك ياحبيبي تحب احضرلك العشا
يزيد:مش جعان والله ياامى
شاكر:تعالى اقعد جمبي يايزيد طمنى يابنى على اخبارك واخبار الشركه
يزيد:تمام والله يابابا الشركه زى الفل وكله تمام
شاكر:اخوك مقالكش حينزل امتى بقى
يزيد:قريب ان شاء الله يا بابا متقلقش حضرتك هما مروة وولادها مشوا امتى
هاله:لسه من شويه
يزيد:بص حضرتك يابابا انا مش عاجبنى لعب العيال اللى احنا فيه ده ولولا احترامى لحضرتك كان حيبقى لية تصرف تانى
أنس ابن اختى على عينى وعلى راسي وربنا يعلم غلاوته عندى لكن مش للدرجه دى يابابا ده راح واللا جه عيل لسه عنده ١١سنه وانا في سنه كان أقصى أمنيه لية اشترى عجله واللا حضرتك توافق اتفسح مع اصحابي فسحه.
وده عايشلى دور الحبيب الولهان ومتزعلش منى حضرتك اللى مقويه ومكبر الموضوع فى دماغه.
شاكر:انت ممكن يكون معاك حق يايزيد بس انا لو مكنتش عارف ومتاكد من انه بيحب عشق حب حقيقي وحبها بيجرى فى دمه زى ماحصل مع ابوه بالظبط زمان مكنتش حوافق على اللى بيحصل ده. ولا حسمح بيه من أساسه
فاكر يوم ولادة عشق يومها الكل كان فى المستشفى وكان خوفنا ان عاليه يحصللها حاجه اكبر من خوفنا على الطفله انها توصل بالسلامه مليون مرة.
وكان كل هدفنا وقتها سلامة عاليه وبس يومها كان انس بيبكى من قلبه برغم انه كان صغير مكملش اربع سنين لكنه كان حاسس بكل اللى بيحصل حواليه ولما اطمنا الحمد لله على عاليه والطفله وكلنا دخلنا وشفناها وانت سميتها عشق وقتها انس طلب يشيلها وانا حطتها على رجله وهو فرح اوى وانا وقتها شفت فى عينه نفس النظرة اللى شفتها فى عين على يوم ماشال مروة اختك وهى صغيرة برغم انه لسه ميستوعبش بس كان فى عيونه نظرة حب ليها.
والايام مرت وحب على لمروة بقى بيكبر كل يوم عن اليوم اللى قبله واديك شفت بنفسك انه مقدرش يستنى ان مروة تخلص جامعتها وصمم انه يتجوزها واتجوزها وهى لسه مكملتش عشرين سنه وكملت الجامعه وهى متجوزه.
اتاكدت من ان نفس القصه حتتعاد تانى وفعلا ده اللى حصل وبقى حب عشق بيجرى فى دمه وانا غصب عنى لقيتنى فرحان ومبسوط ان احفادى يرتبطوا ببعض
انا عارف ياحبيبي انك متضايق منه وحاسس ان أنس مزودها شويه بس والله ده نابع من حبه ليها واحساسه بانها حته منه وعالعموم انا حتكلم معاه وحفهمه وانا متأكد انه حيستوعب كلامى أنس ماشاء الله عليه سابق سنه وعقله اكبر بكتير من سنه.
يزيد :حاضر ياسي بابا ادينى حستنى لما اشوف حتعمل ايه
انا طالع تصبحوا على خير
هاله وشاكر:وانت من اهل الخير
يصعد يزيد ويمر على غرفة ابنته ويقبلها ويحكم الغطاء عليها
ثم يتجه لغرفته وقد اشتاق لحبيبة قلبه
قام بفتح الباب فوجدها تصلي فرضها فقام بتغيير ملابسه
عاليه:السلام عليكم ورحمة الله
يزيد:تقبل الله ياحبيبتى
عاليه:منا ومنكم ياحبيبي حمدالله على السلامه
يزيد:الله يسلمك يا قلب يزيد
ممكن حبيبتى تغمض عينيها
عاليه:حاضر
فتجده يرفع شعرها الحريري ويحيط رقبتها بشئ ما ثم يقبلها من رقبتها
يزيد:ممكن تفتحى عينيكى
عاليه:الله حلوة اوى السلسله دى ياحبيبي ربنا يخليك ليا يا رب
بس ده كتير اوى انت لسه جايبلى خاتم الشهر اللى فات
يزيد:حبيبتى انا لو علية نفسي اجيبلك الدنيا كلها بين ايديكي
عاليه:انا مش عايزه من الدنيا كلها غيرك يايزيد انت دنيتى كلها انت احلى حلم حلمت بيه واتمنيته وحفضل اشكر ربنا طول عمرى على انه استجاب لدعائى وحققلي امنيتى الوحيده اللى مااتمنتش غيرها
يزيد وهو يقبل يدها:ربنا يخليكى لية يارب وميحرمناش منك ياست الستات
بس انا عاوز اعرف هو انتى ايه حكايتك بالظبط
عاليه:حكاية ايه ياحبيبي
يزيد :كل يوم تحلوى اكتر من اليوم اللى قبله لا انا مش حقدر على كده ابدا قلبي الصغير لن يتحمل
عاليه:ههههههههههه ههههههههه سلامة قلبك ياقلب عاليه
واللا اقولك بلاش قلبي التعبان ده.
يزيد:قلبك ده احلى هديه ربنا هداها لى وأطيب واحن قلب فى الدنيا كلها
عاليه :بس انا خايفه اكون مقصرة فى حقك ياحبيبي
يزيد:ايه الكلام ده مين اللى مقصر فى حق مين ده قلبك محاوطنى بحبه من كل ناحية اتلفت كده الاقيه واتلفت كده الاقيه اهوه حتى بصي اهوه
عاليه:ههههههههه
يزيد:تعرفى ان ضحكتك الجميلة دى هى اللى بتهون علية تعب اليوم كله
عاليه:ربنا ميحرمنيش منك ياابو عشق
يزيد:ولا يحرمنا منك ياام عشق ياعاليه واعلى مما تتخيلي
💖💖💖💖💖💖💖💖💖💖💖
ظلت تفكر شمس فى حوارها مع يزيد واخذ عقلها يستعيد كل كلمه قالها لها وقد ارتاح قلبها لما دار بينها وبين يزيد قامت وتوضات وصلت ركعتى استخارة لله سبحانه وتعالى لترمى حمولها على الله وتترك له الأمر يفعل مايريد
ثم استسلمت للنوم الذى غاب عن عينيها عدة أيام واستغرقت فى نومها ونامت نوما عميقا.
أعلنت الشمس عن بداية يوم جديد
تخرج ايمان وهى تتثاءب:صباح الخير ياخالتى
سناء :صباح الخير ياايمان ياللا عشان تفطرى ياحبيبتى
إيمان :لاء انا حستنى شمس تقوم ونفطر سوا
شمس من خلفهم بابتسامه هادئه :وانا صحيت اهوه ياللا بقى نفطر عشان انا جعانه اوى.
سناء:بسم الله ماشاء الله وشك منور زى البدر ياحبيبتى
شمس:صباح الخير ياجماعه
إيمان :صباح الفل والياسمين على عيونك يا قمر
شمس:بس انا شمس مش قمر
ايمان:انتى قمرى انا
سناء وهى تحتضن الاثنتين:انتو الاتنين شمسي وقمرى ربنا يخليكم لبعض ومتتحرموش من بعض ابدا ويديم بينكم المحبه يارب.
ايمان وشمس:يارب ياخالتو يارب.
تفرح سناء كثيرا بعودة الضحكه لوجه شمس وتدعو الله الا يصيب الحزن قلبها مرة ثانيه.
🌸🌸🌸🌸🌸🌸🌸🌸🌸🌸
بعدمرور يومين
فى لندن فى داخل شقة عمر
سيف :ادخل يامعلم حمدلله على السلامه
عمر وهو يستند على صديقه:اه مش قادر ياسيف انا حاسس انى طالع من معركه
سيف :ههههههه معلش بقى تعيش وتاخد غيرها
عمر:اخد غيرها ده ايه حرام عليك انا لو خدت غيرها مش حقوم منها تانى.
سيف:امال يعنى كنت عامللى نفسك شجيع السيما ازاى معرفتش تدافع عن نفسك
عمر:انت بتهزر اااه مش قادر ادافع هو انا لحقت يابنى ادم انت ده انا فجاة لقيته نازل فية ضرب انا قلت الحرب قامت ده انا لو بينى وبينه تار مش حيعمل فية كده
سيف:انا قلقان عليك بس متكونش دى النهايه ويطلعلك تانى ماهى جينا شكلها عاوزة تنتقم وتاخد حفها منك
عمر:طب والعمل اعمل ايه شور علية يافالح
سيف:ننزل مصر وفى اقرب وقت ممكن ده الحل الوحيد اللى قدامك
عمر:ييه بقى انا كنت عاوز ااخر نزولى مصر باى طريقة
سيف:ليه ياعمر بس اخوك نفسه اوى انك تنزل وانا كمان بصراحه نويت انزل ومش هاين علية انزل مصر من غيرك.
عمر :ومين قالك انى حسيبك تنزل من غيري ومين مصبرنى هنا غير وجودك معايا واحنا متفقين بانعيش سوا يانموت سوا
سيف:هههههههههه يبقى خلاص يامعلم تشد حيلك كده ونلم حاجاتنا وننزل تمام
عمر:امرى لله شكلها مش حتيجى غير كده بس بعد مااخف اه مانا مش عاوزهم يشمتوا فية
سيف:تمام يامعلم
🌸🌸🌸🌸🌸🌸🌸🌸🌸🌸
فى داخل الشركه
تدخل إيمان الشركه فتجد مياده امامها
إيمان بصوت منخفض :ياصباح ياعليم كنت مرتاحه من شوفتك
مياده :إيمان ازيك عامله ايه ياحبيبتى قلبي عندك والله
إيمان :فى إيه ياايمان مالك عالصبح ماتتكلمى عدل.
مياده:مالى فى جيبي ياحبيبتى انا زى الفل بس بجد اتأثرت اوى باللى حصل لصاحبتك ياعينى عليها دي أكيد حالتها صعبه جدا.
إيمان :جرى إيه ياماما مالك فى إيه ماتتعدلى كده وتعرفى انتى بتقولى إيه.
مياده :جرى ايه ياست إيمان انتى حتعمليهم علية واللا إيه ماالشركه كلها عارفه اللى حصل وان شمس وعصام سابوا بعض.
إيمان :طب وانتى مالك انتى إيه دخلك انتى يابارده سابوا بعض واللا لاء ايه علاقتك بالموضوع أصلا
مياده :ياسلام مش كانوا عايشين دور العشاق والست شمس محسسانا انهم ولا روميو وجولييت لاء وايه وزعت كروت الفرح بقلب جامد واهم سابوا بعض فى الاخر هههههههه.
بصراحه انا مكسوفالها جدا والله وشكلها وحش أوى الصراحه.
وانا لو مكانها احبس نفسي فى الببت مطلعش ابدا
إيمان :هى مين دى يابت انتى اللى شكلها وحش انتى اتجننتى واللا إيه.
مياده :بت لما تبتك احترمى نفسك واللا تكونش عينتك المحامى بتاعها
إيمان :اقسم بالله لو مااتلميتى يابت انتى لجيبك من شعرك شمس دى ستك ياكلبه ولما تتكلمى عنها تتكلمى بأدب
مياده:هههههه ست مين ياماما هى تطول تبقى زيي واللا إيه على الاقل محدش ضحك علية وسابنى قبل الفرح بكام يوم شوفى انتى بقى إيه اللى حصل بينهم واللا شاف عليها إيه حخلاه يسيبها واللا بلاش دى أعراض بردو.
إيمان :يانهارك اسود انتى بتقولى ايه ياسافله دى شمس اشرف من الف واحده من عينتك.
مياده :طبعا مانتى لازم تقولى كده مانتوا عينه واحده
اما نشوف بقى حتحط عينها على مين المرة الجايه.
إيمان وهى تكلمها بغضب : بصي بقى انا ماسكه نفسي عنك من الصبح وعماله تعكى فى الكلام وانا عارفه انه من غيرتك منهاو غلك وكرهك ليها طبعا عشان العين مبتكرهش غير اللى أحسن منها لكن ودينى وايمانى لو مااتلميتى يازفته انتى وبعدتى عن وشي الساعه دى وحطيتى فى بؤك جذمه لحعرفك مقامك وامسح بكرامتك بلاط الشركه
مياده:نعم ياماما طبعا مانتى عشان عارفه ان كلامى على حق مش عارفه تردى وبتقولى اى كلام وخلاص بقى انا بغير منها وحغير منها ليه ان شاء الله ده انا احلى منها واصغر منها.
إيمان وهى تشمر كمها :بت انتى مستفزة وانا بقى حعرفك مقامك اتشاهدى على نفسك بقى ياحلوة وقامت بالهجوم عليها بعنف شديد وضربها وعضها من كل مكان فى جسمها وقامت بشد شعرها
مياده :ااه الحقونى ياناس ابعدى عنى يابت ال..........
إيمان :عشان تبقى تعرفى تتكلمى عن اسيادك بأدب ياحيوانه
يبدأ جميع الموظفين بالشركه يجتمعون عالصوت ومحاولة تخليص مياده من ايد إيمان
على وهو مع يزيد فى مكتبه :يزيد انا متهيألي فى صوت دوشه برة
يزيد:طب اطلع شوف في ايه ولكنهم يتفاجئوا بمنى تفتح الباب عليهم الحقنا يابشمهندس
على ويزبد بفزع :فى إيه يامنى
منى:خناقه جامده بين ايمان ومياده والشركه كلها ملمومه عليهم
يزيد :نعم خناقه فى الشركه ايه التهريج ده ويقوم سريعا من مكتبه ليرى مايحدث فيتفاجا مما يحدث والشجار بالايدى والالفاظ بين إيمان ومياده ومحاولة الزملاء فى فض النزاع بينهم
يزيد بصوت عالي:ايه اللى بيحصل ده
مياده ببكاء شديد :الحقنى يابشمهندس إيمان بهدلتنى شوف حضرتك عملت فية إيه
يزيد:يانهارك اسود ياايمان انتى ايه اللى عملتيه فيها ده
ايمان بغل:احسن تستاهل حلال فيها
يزيد :كل واحد يتفضل يشوف شغله وانتوا الاتنين ورايا عالمكتب
فى داخل المكتب
يزيد :ايه يااستاذه انتى وهى ممكن افهم ايه اللى انا شايفه ده هو احنا فى شركه واللا فى سوق
مياده ببكاء:والله ماعملتلها حاجه يابشمهندس انا لقيتها هجمت علية وضربتنى وبهدلتنى زى ما حضرتك شايف.
كان على ينظر لايمان وهى تنظر لمياده بغيظ وهو يكتم ضحكته خوفا من رد فعل يزيد.
يزيد:ايه ياهانم ساكته ليه اتفضلي اتكلمى وقولى اللى حصل
وازاى تعملي فى زميلتك كده
ايمان:مستياها تخلص الكهن بتاعها
على وهو يضحك :ايمان عيب كده اتكلمى كويس
إيمان :ماعيب الا العيب يابشمهندس يرضيكم ان الحيوانه دى تشتم على شمس وتجيب سيرتها وتتكلم فى اخلاقها ده انا اقسم بالله لولا زمايلنا بعدونى عنها كان زمانى اكلتها بسنانى
يزيد بغضب شديد :الكلام ده حقيقي يامياده. انتى جيبتى سيرة زميلتك.بالوحش.
ميادة :لا والله يابشمهندس حضرتك حتصدقها دى كدابه ده انا يادوب بسألها عن شمس واخبارها لقيتها هجمت علية اهئ اهئ ضربتني وبهدلتنى وقطعتلى شعري وان عشان مؤدبه مامدتش ايدي عليها
هو ده جزائى عشان بسأل عن زميلتى اهئ اهئ انا عاوزة حقى منها يابشمهندس.
انا اتبهدلت ادام كل الموظفين واتهانت كرامتى اهئ اهئ.
إيمان :شوف ازاى ياعينى تصدقى صعبتى علية والله حعيط الدمعه حتفر من عينى بتحلفى بربنا كدب ياكدابه اوعى تصدفها يابشمهندس اقسم بالله كدابه ده لو حضرتك سمعت الكلام اللى قالته فى حق شمس كنت حضرتك رفدتها من الشركه.
مياده:منك لله يامفتريه اه انا مش قادرة انا حسه انى حموت
إيمان وهى تهجم عليها :طب تعالى بقى عشان اكمل عليكى ويبقى اللى عملته فيكى على حق. وتقوم بشدها من شعرها مرة اخرى
على وهو يضحك بشده :سيبيها يامجنونه البت حتموت فى ايدك.
يزيد بصوت عالي ايمااااان
مياده :لاء انا حطلع عالقسم واعمل بلاغ فيها
يزيد :روحى مكان ماتروحى بس مش قبل مااعرف الأول ايه اللى قلتيه على شمس
مياده:مانا قلت لحضرتك
يزيد:كدابه إيمان مبتكدبش واقسم بالله لو مانطقتى يامياده لحتكونى مرفوده حالا من الشركه.
مياده :يعنى اتضرب وكمان اترفد ده ظلم.
يزيد:يبقى تتكلمى وتقولى الحقيقه والا ماتلوميش غير نفسك
مياده :والله انا مكنتش اقصد هى اللى استفزتنى واتهمتنى انى بغير منها وانا كل اللى قلته انى لو مكانها اتكسف ارجع الشغل تانى
يزيد:بتتكلمى فى أخلاق بنت زيك يامياده
طب لو افترضنا ان حصل معاكى اى موقف زى اللى حصلها ترضي حد يجيب سيرتك او يشكك فى اخلاقك.
فتسكت مياده ولا ترد
يزيد:طب اسمعى بقى وانتى عارفه انى بقول الكلام مرة واحده بس.
شمس عارفه مين شمس شمس دى بنتى متربيه على ايدي اختى اللى واثق فيها وفى اخلاقها وعارف هى مين شمس اللى محدش يقدر يجيب سيرتها بكلمه ولا يمس اخلاقها.
مياده:حضرتك أنا
يزيد:انتى تخرسى خالص وتسمعى الكلام اللى بقوله وبس انتى فاهمه
قطع لسان اللى يجيب سيرة شمس بكلمه اول واخر مرة تجيبي سيرة شمس على لسانك انتى فاهمه ولو بلغنى خبر انك بس اتنفستى باسمها رفدك من الشركه حيكون رحمه ليكى لأنك مش حتتخيلي انا حعمل فيكى ايه المرة دى حكتفى بخصم نص شهر من مرتبك عشان تحرمى تجيبي سيرة حد بالشر.
لكن المرة الجايه حتكون نهايتك سمعتى قلت إيه.
مياده وهى تهز رأسها :حاضر سمعت
يزيد:اتفضلي على مكتبك ولو حد سالك عن سبب اللى حصل واياكى تنطقى بكلمه انتى فاهمه
مياده :حاضر حاضر
على:روحى يامياده بقى
تخرج مياده سريعا وهى تسب وتلعن وتتوعد شمس بالا تتركها:ماشي ياشمس انا وراكى والزمن طويل بقى انا يتعمل فية كده عشان خاطرك ماشي اما اشوف انا واللا انتى يابرنسيسه.
بينما فى داخل المكتب كانت إيمان تقف وهى تفرك فى يديها ويزيد لا يعرف ماذا يفعل معها
إيمان :انا اسفه يابشمهندس
على:ههههههههه حرام عليكى ياايمان ده انتى شرحتيها دى اتبهدلت خالص تعضيها يامفتريه انتى ايه يابنتى مبتاكليش لحمه
إيمان :احسن طيبه وتستاهل كل خير حلال فيها.
يزيدوهو يخبط على مكتبه:على اساس انكم شغالين فى طابونه مش كده
فتنتفض ايمان من مكانها :والله العظيم قالت ثم بدأت فى البكاء:قالت كلام وحش اوى عن شمس مانا معاكم بقالى سنين عمرى عملت كده لكن تجيب سيرتها ليه هى عملتلها ايه مش كفايه اللي حصلها.
يزيد:بصي ياايمان انا مقدر حبك لصاحبتك وانك مبتستحمليش كلمه عليها بس كده مينفعش احنا مش فى الشارع احنا فى شركه لما يحصل حاجه تيجى وتقوليلي وانتى عارفه انى مش حسكت على حاجه تخص شمس.
إيمان :عارفه والله يابشمهندس بس البت دى مستفزة عصبتنى وغلاوتك يابشمهندس لو ماكانوش خادوها من ايدي كنت خليتها متنفعش طبله ولا تار.
على:ههههههه هههههههه عسل وربنا سكر يامونى
إيمان :ان شالله يخليك يابشمهندس.
يزيد:اكتر من كده ياايمان دى البنت اتبهدلت مش شايفه منطرها عامله ازاى دى زى ماتكون طالعه من معجنه.
دى لو طلعت عالقسم وبلغت فيكى حتتحبسي
إيمان :لادى جبانه بوء عالفاضي
يزبد:ايمان اهدى كده انا لولا انى عارف انك مبتكدبيش وانك انفعلتى عشان صاحبتك كنت حولتك للتحقيق
ايمان:انا يابشمهندس
يزيد:ايوة ياايمان عشان مينفعش اللى حصل ده انتوا ملكمش كبير واللا إيه واللا الشركه دى ملهاش صاحب.
إيمان :خلاص يابشمهندس لو حضرتك عاوز تحقق معايا معنديش مانع
على:لا كتر خيرك والله على اساس ان يزيد بيستئذن منك
ايمان:ياربي عليكم طب اعملكم ايه دلوقتي مانا قلت اسفه وهى اللى تستااهل اللى جرى لها
يزيد:إيمان انا بعزك اه لكن ماتستعبطيش
ايمان :وانا بعزك والله يابشمهندس وحضرتك عارف.
يزيد:طب اتفضلي ياست هانم على مكتبك انتى كمان
إيمان :حاضر اى اوامر تانيه
يزيد:قوليلي الاول ياام لسانين شمس اخبارها ايه
فجلست شمس بدون اذن لها:طب اطلبلي عصير ليمون يروق دمى الاول وانا احكيلك على كل حاجه
على ويزيد :ههههههههههههه مجنونه وربنا
🌸🌸🌸🌸🌸🌸🌸🌸🌸🌸🌸🌸
فى منزل عصام
هاجر:الشقه حلوة اوى ياحبيبي والألوان تحفه دى أكيد زوقك
عصام :بصراحه هى زوق شمس هى اللى كانت بتقف مع العمال وهما شغالين وهى اللى اختارت كل حاجه بنفسها
هاحر:اه قلتلي وانت فين رأيك يعنى
عصام :انا كنت ببقى واقف مع بابا فى المحل عشان اقدر اكمل اللى ناقصنى
هاجر:ماشي عالعموم كتر خيرها
تفتح الغرف لترى الموبيليا :اوضة النوم زوقها بلدى اوى
عصام :بالعكس دى لونها راقى وجميل جدا ورومانسيه اوى
هاجر:اه بس الروز ده بيتبهدل بسرعه
عصام :امال انتى بتعملى ايه مانتى حتنضفيها باستمرار عشان تبقى نضيفه على طول
هاجر:انت عاوز تهدنى فى تنضيف الشقه واللا ايه
عصام :نعم امال يعنى اجيبلك شغاله
هاجر:وايه يعنى ياحبيبي بكرة تكبر فى شغلك وتجيبلي شغاله ويبقى عندنا شقه اكبر عشان دى بصراحه ضيقه اوى
عصام :انا مهما كبرت ياهاجر حفضل موظف بردو وبعدين مالها الشقه دى كانت عاجبه شمس جدا
هاجر:فى ابه ياعصام ماتراعى مشاعرى كل حاجه تقوللى شمس شمس
عصام :انا مقصدش ياحبيبتى ازعلك وبعدين مانا سيبتها علشان خاطرك بس انتى كمان لازم تقدرى ظروفى
هاجر:حاضر ياحبيبي وبعدين انا اى مكان اعيش معاك فيه حيبقى جنه
تعالى بقى ورينى بقية الأوضة التانيه شكلها ايه
عصام :هاجر انتى عارفه ان شمس كانت واخده لنا اجازة من صاحب الشركه عشان التجهيزات والفرح وهو عشان بيعزها مقالش حاجه وفات منها اسبوع وفاضل ٣اسابيع يعنى يادوب بقى نكتب الكتاب ونتجوز عشان نلحق نقضي يومين حلوين كده قبل ماانزل الشغل.
هاجر: احنا حنتجوز فى نفس القاعه اللى كنتوا حاجزينها واللا إيه
عصام :احنا مكناش حاجزين قاعه احنا كنا حاجزين جنينه فى فيلا عشان نوفر فى المصاريف
هاجر :طيب ماشي اى حاجه المهم نبقى مع بعض
عصام :بس الموضوع اتغير ومش حينفع نعمل حاجه خلاص
هاجر:نعم يعني إيه مش حينفع نعمل حاجه تقصدايه بالكلام ده
عصام :اقصد ان اللى كانوا حيحضروا الفرح يبقوا زمايلنا فى الشركه واهلى وجيرانى اللى كلهم عارفين ان العروسه تبقى شمس فلما يحضروا ويلاقوا العروسه مش شمس مش حنخلص من لسانهم فيبقى الافضل لينا اننا نعمل كتب كتاب عالضيق ونسهر فى اى مكان ونرجع على عالبيت.
هاجر:بقى كده ياعصام وانا اللى قلت انك عاوز تفرح وتفرحنى
عصام :هاجر المفروض انا اللى ازعل مش انتى عالاقل انتى اتجوزتى وعملتى فرح قبل كده لكن دى اول مرة لية
هاجر:انت بتعايرنى ياعصام خلاص ياسيدي ولا تزعل ننهى الموضوع كله
عصام :حبيبتى انا مقصدش ومش عاوز ازعلك بس بجد عاوزك تقدرى موقفى واوعدك بعد الجواز حعوضك واعوض نفسي عن بعدنا عن بعض السنين اللى فاتت كلها
هاجر:ماشي ياعصام اما اشوف
عصام :خلاص تعملي حسابك تجهزى حنكتب الكتاب ونتجوز بعد يومين
هاجر :وانا جاهزة من دلوقتى ياحبيبي.
💖💖💖💖💖💖💖💖💖💖
فى صباح يوم جديد
تستيقظ من نومها وهى فى قمة النشاط والحيويه تتوضأ وتدعو الله أن يبعد عنها الهم والحزن ويكفيها شر الألسنه تفتح الدولاب الخاص بها وترتدى فستانا جميلا رقيقا مثلها تماما وترفع شعرها لأعلى كانت حقا جميله وكأنها عروس
تخرج فتجد خالتها جالسه :صباح الخير ياخالتو.
سناء وهى تنظر لها بانبهار:ياصباح السعاده عليكى ياقلب خالتو الله الله أكبر عليكى ياحبيبتى بسم الله ماشاء الله ربنا يحميكى يارب
شمس:حلوة ياخالتو
سناء:بدر منور ياحبيبتى نويتى خلاص
شمس :ايوة ياخالتو كفايه كده مش حضيع عمرى فى الحزن والزعل على حد ميستاهلش بس ادعيلي ياخالتو خايفه اوى من مواجهة زمايلي حسه كانى اول مرة حدخل الشركه حسه ان الكل حيقعد يتكلم علية ويواسونى بنظراتهم لية
سناء :احنا قلنا إيه مش قلنا مش حنهتم بكلام حد واللى يقول يقول وبعدين انتى حتدخلى مكان جديد ومعاكى ايمان مش حتسيبك
شمس:ربنا يخليه البشمهندس يارب جهزلنا المكتب احنا الاتنين مع ان شغلنا مختلف تماما
سناء:والله الراجل ده مش عارفه حنردله جمايله ازاى ربنا يكرمه يارب
شمس :يارب ياخالتو يارب
سناء:المهم دلوقتي عاوزاكى تبقى قويه كده وتجمدى واوعى حاجه تحصل تخليكى تفقدى ثقتك فى نفسك.
شمس :اطمنى ياخالتو ان شاء الله حقف على رجلى وحثبت لنفسي قبل اى حد ان شمس حتتحدى وحتقف بكل قوتها ادام اى سحابه أو غيمه تقف قصادها
💖💖💖💖💖💖💖💖💖💖💖💖
•تابع الفصل التالي "رواية شمس تتحدي الغيوم" اضغط على اسم الرواية